បច្ចុប្បន្ន វិស័យថែទាំសុខភាព វិទ្យាសាស្ត្រ និងបច្ចេកវិទ្យា ក៏ដូចជាការដឹកជញ្ជូន រួមទាំងការងារឃ្លាំងត្រូវបានព្យាករណ៍ថានឹងមានតម្រូវការទីផ្សារច្រើនបំផុតនៅសហរដ្ឋអាមេរិកក្នុងរយៈពេល ១០ ឆ្នាំខាងមុខ។
យោងតាមការព្យាករណ៍ការងារឆ្នាំ ២០២២-២០៣២ នៃការិយាល័យស្ថិតិការងារសហរដ្ឋអាមេរិក (BLS) បានឱ្យដឹងថា ចំនួនការងារថ្មីៗនៅសហរដ្ឋអាមេរិកត្រូវបានគេរំពឹងថានឹងកើនឡើងប្រហែល ៤.៧ លាន ដល់ ១៦៩.១ លានការងារនៅឆ្នាំ ២០៣២។ ដូច្នេះ ការងារថ្មីចំនួន ១៥ ដែលមានតម្រូវការទីផ្សារខ្ពស់បំផុតនោះមានដូចជា៖

១.ជំនួយការថែទាំសុខភាពតាមផ្ទះ ដោយមានឱកាសការងារប្រហែល ៨០៤.៦០០កន្លែងក្នុងឆ្នាំ ២០៣២។
២.ការអភិវឌ្ឍន៍កម្មវិធី នឹងមានឱកាសការងារប្រមាណ ៤១០,៤០០ កន្លែង។
៣.ចុងភៅ (២៧៧.៦០០)។
៤.បុគ្គលិកផ្នែកលក់/បញ្ជាទិញ (១៧៨.៦០០)។
៥.គិលានុបដ្ឋាយិកា (១៧៧.៤០០)។
៦.កម្មករដឹកជញ្ជូនទំនិញ និងសម្ភារៈ (១៥៨.៨០០)។
៧.នាយកប្រតិបត្តិ (១៤៧.៣០០)។
៨.នាយកសេវាវេជ្ជសាស្រ្ត (១៤៤.៧០០)។
៩.បើកឡានភីកអាប់ (១៣៣.៨០០)។
១០.ប្រធានហិរញ្ញវត្ថុ (១២៦.៦០០)។
១១.ការព្យាបាលថែទាំ (១១៨ ៦០០)។
១២.អ្នកវិភាគទីផ្សារ / អ្នកជំនាញទីផ្សារ (១១៦.៦០០)។
១៣.ជំនួយការវេជ្ជសាស្រ្ត (១០៥,៩០០)។
១៤.អ្នកវិភាគការគ្រប់គ្រង (៩៥.៧០០)។
១៥.អ្នកបើកបររថយន្តដឹកទំនិញធុនធ្ងន់ / រ៉ឺម៉ក (៨៩.៣០០)។

ក្រៅពីការងារចំនួន ១៥ ខាងលើនេះក៏មានការងារជាច្រើនទៀតដូចជា កុំព្យូទ័រ គណិតវិទ្យា ស្ថាបត្យកម្ម និងវិស្វកម្ម វិទ្យាសាស្ត្រជីវិត/រូបវិទ្យា ដែលជំនាញនេះក៏មានកំណើនការងារខ្ពស់ផងដែរ។ បច្ចុប្បន្ន ឱកាសការងារបានក្លាយជាចំណុចទាក់ទាញមួយសម្រាប់និស្សិតអន្តរជាតិដែលមករៀននៅសហរដ្ឋអាមេរិក។ ក្នុងចំណោមសិស្សអន្តរជាតិជិត ៩៥០,០០០ នាក់នៃឆ្នាំសិក្សា ២០២១-២០២២ មានប្រមាណ ៥៤% បន្តការសិក្សាផ្នែក STEM និង ២១% សិក្សាផ្នែកគណិតវិទ្យា និងវិទ្យាសាស្ត្រកុំព្យូទ័រ ក៏ដូចជាវិស្វកម្ម រួមទាំងគ្រប់គ្រងអាជីវកម្មជាដើម។

ទោះជាយ៉ាងណាក៏ដោយ មកទល់នឹងពេលនេះទីផ្សារការងារនៅសហរដ្ឋអាមេរិកបានបន្តធ្លាក់ចុះ នេះបើយោងតាម BLS ផងដែរ។ សេដ្ឋកិច្ចបានបន្ថែមការងារថ្មីត្រឹមតែ ១៥០,០០០ ប៉ុណ្ណោះ ដែលស្មើនឹងពាក់កណ្តាលនៃខែកញ្ញា និងទាបជាងជាមធ្យមក្នុងឆ្នាំនេះ ដែលមានការងារថ្មីចំនួន ២៦០,០០០ ក្នុងមួយខែ ដូច្នេះអត្រាគ្មានការងារធ្វើបានកើនឡើង ០.១% បើធៀបនឹងខែកញ្ញាដល់ ៣.៩%៕

ប្រទេសចិន ៖ ពណ៌ក្រហមស្រស់របស់ក្រែមលាបមាត់ដែលនារីៗទាំងឡាយពេញនិយមនោះ គឺគេបានយកផ្លែម្ទេសធ្វើជាគ្រឿងផ្សំផងដែរ ហើយសារធាតុពណ៌ក្រហមរបស់ផ្លែម្ទេសមួយចំនួនអាចប្រើប្រាស់ធ្វើជាពណ៌ធម្មជាតិយ៉ាងមានសុវត្ថិភាព ។

នៅតំបន់ស្វយ័តអ៊ុយកូ ស៊ីនចៀន ស្ថិតនៅភាគពាយ័ព្យប្រទេសចិន គឺជាតំបន់ផលិតសារធាតុពណ៌ក្រហមពីផ្លែម្ទេសទុំ និងជាតំបន់ផលិតដ៏សំខាន់នៅលើពិភពលោក ។ តំបន់នេះមានអាកាសធាតុអំណោយផល ដូចជា មានខ្យល់ស្ងួត និងពន្លឺថ្ងៃគ្រប់គ្រាន់ ព្រមទាំងមានសីតុណ្ហភាពខុសប្លែកគ្នាខ្លាំងរវាងពេលថ្ងៃ និងពេលយប់ ។

ផ្លែម្ទេសពូជប៉ាន់ចៀវ មានដើមកំណើតនៅស្រុកប៉ូហ៊ូ តំបន់ស៊ីនចៀន ។ ម្ទេសពូជប៉ាន់ចៀវ មានពណ៌ដិតខ្លាំងជាងម្ទេសធម្មតា ហេតុនេះ គេបានយកវាមកធ្វើជាសារធាតុពណ៌ក្រហមរបស់ក្រែមលាបមាត់ ។ លើសពីនេះ សារធាតុពណ៌ក្រហមដែលចម្រាញ់ចេញពីម្ទេសពូជប៉ាន់ចៀវ គឺអាចប្រើប្រាស់សម្រាប់ផ្នែកជាច្រើនទៀតដូចជា ក្រែមលាបមាត់, នំខេក, ការ៉ែមកី, ភេសជ្ជៈ និងថ្នាំ ។

ស្រុកប៉ូហ៊ូ មានបរិស្ថានស្រស់ស្អាត, ដីមានជីវជាតិ និងពន្លឺថ្ងៃគ្រប់គ្រាន់ ទើបធ្វើឱ្យផ្លែម្ទេសដែលបានដាំដុះនៅទីនេះមានពណ៌ស្រស់ស្អាត និងកាល់ស្យូមខ្ពស់ ។ កាលពីឆ្នាំ២០២០ ផ្លែម្ទេសនៅស្រុកប៉ូហ៊ូ ត្រូវបានសមាគមបន្លែចិនចាត់ក្នុងចំណាត់ថ្នាក់ជាម្ទេសល្អចំនួន១០ប្រភេទនៅប្រទេសចិន ។ ក្រោយពីបានអភិវឌ្ឍន៍វិធីសាស្ត្រដាំដុះអស់រយៈពេលជាច្រើនឆ្នាំមក គេបានដាំម្ទេសនៅស្រុកប៉ូហ៊ូ លើផ្ទៃដីធំទូលាយជាងមុន ។

ការដាំម្ទេស គឺជាសកម្មភាពមួយដែលផ្តល់នូវអត្ថប្រយោជន៍ពិសេសសម្រាប់អភិវឌ្ឍន៍វិស័យកសិកម្មនៅឆ្នាំ២០២៣ ។ នៅទូទាំងស្រុកប៉ូហ៊ូ គេបានដាំម្ទេសនៅលើផ្ទៃដីជាង៤.០០០ហិកតា ហើយម្ទេសទាំងនេះជាពូជដែលផ្តល់នូវបរិមាណខ្ពស់, ពណ៌ស្រស់ស្អាត និងមិនខូចខាតដោយសារសត្វល្អិត ។ ហេតុនេះ ម្ទេសពូជប៉ាន់ចៀវ ទទួលបានការនិយមពីកសិករ ក៏ដូចជាអតិថិជន ៕ ប្រភព ៖ China face

បរទេស៖ ប៉ូលីសបានចាប់ខ្លួនតារា TikTok អាហ្រ្វិកខាងត្បូងដ៏ល្បីម្នាក់ដោយសារតែគាត់បានតាំងខ្លួនជាវេជ្ជបណ្ឌិត នឹងថតឃ្លីបនៅក្នុងការរិយាល័យពេទ្យ ដោយផ្តល់ដំបូន្មានវេជ្ជសាស្រ្តខុសដល់អ្នកតាមដាន។
យោងតាមគេហទំព័រ Audiity Central ដែលបានចុះផ្សាយនៅថ្ងៃទី ១០ ខែវិច្ឆិកាថា ប៉ូលីសបានចាប់ខ្លួនលោក Matthew Bokani Lani អាយុ ២៧ ឆ្នាំ ដែលជាតារា TikTok ជនជាតិអាហ្វ្រិកខាងត្បូងដ៏ល្បីម្នាក់មានអ្នកតាមដានជាង ៣០០,០០០ នាក់ ដោយចោទប្រកាន់ពីបទក្លែងបន្លំជាវេជ្ជបណ្ឌិត និងផ្តល់ដំបូន្មានផ្នែកវេជ្ជសាស្រ្តខុស ទាំងដែលគ្មានបទពិសោធលើបញ្ហាវេជ្ជសាស្ត្រទាល់តែសោះ។

ហេតុការណ៍នេះកើតឡើងនៅម៉ោងប្រហែល ៨ យប់ក្នុងមន្ទីរពេទ្យ Helen Joseph នៃទីក្រុង Johannesburg ដោយលោក Lani ពាក់មួក និងពាក់ម៉ាស ហើយព្យួរឧបករណ៍ពិនិត្យសុខភាពនៅជុំវិញករបស់គាត់ នឹងត្រូវបានប៉ូលីសឃាត់ខ្លួនបានសម្រេច។ យោងតាមការស្រាវជ្រាវពីអាជ្ញាធរបានឱ្យដឹងថា នេះមិនមែនជាលើកទីមួយទេដែលលោក Lani ក្លែងខ្លួនជាវេជ្ជបណ្ឌិត ហើយលោកក៏បានចូលមន្ទីរពេទ្យនេះដោយសម្ងាត់ នឹងផ្តល់ចំណេះដឹងខុស ដោយអះអាងថាខ្លួនជាអ្នកជំនាញផ្នែកវេជ្ជសាស្រ្ដ។

ទោះបីជាយ៉ាងណាក៏ដោយ ការិយាល័យរដ្ឋអាជ្ញាជាតិអាហ្រ្វិកបាននិយាយថា បច្ចុប្បន្ននេះពួកគេកំពុងស៊ើបអង្កេតថាតើត្រូវបន្តចាត់ការតាមផ្លូវច្បាប់ឬយ៉ាងណា ព្រោះមេធាវីរបស់ជនជាប់ចោទនេះបាននិយាយថា លោក Lani មិនដែលនិយាយថាគាត់ជាវេជ្ជបណ្ឌិតពិតប្រាកដទេ ហើយវីដេអូឃ្លីបរបស់គាត់គឺធ្វើឡើងក្នុងគោលបំណងកម្សាន្តតែប៉ុណ្ណោះ។

គួរបញ្ជាក់ដែរថា លោក Matthew Bokani បានបញ្ចប់ការសិក្សានៅអាយុ ១៦ ឆ្នាំហើយបានចូលសាលាវេជ្ជសាស្ត្រនៅសាកលវិទ្យាល័យ Witwaterrand និងបានផ្តល់ដំបូន្មានវេជ្ជសាស្រ្តដល់អ្នកតាមដានជាង ៣០០,០០០ នាក់ ទោះជាយ៉ាងណាក៏ដោយ ការក្លែងបន្លំជាវេជ្ជបណ្ឌិតនៅអាហ្វ្រិកខាងត្បូងគឺមិនធម្មតាឡើយ ដោយយោងទៅតាមប្រភពព័ត៌មាន BBC បានឱ្យដឹងផងដែរថា ប៉ូលីសបានចាប់ខ្លួនមនុស្ស ១២៤ នាក់ដែលធ្វើពុតជាវេជ្ជបណ្ឌិតក្នុងរយៈពេល ៣ ឆ្នាំចុងក្រោយនេះ៕

ប្រទេសថៃ ៖ កាលពីថ្ងៃទី៩ ខែវិច្ឆិកា ឆ្នាំ២០២៣ មានហេតុការណ៍រញ្ជួយដីកម្រិត៤.៧វ៉ិចទ័រ នៅឃុំវឿងនឿ ស្រុកប៉ាយ ខេត្តម៉េហុងសន ប្រទេសថៃ ដែលមានជម្រៅ២គីឡូម៉ែត្រ ។ ចំណែកតំបន់នៅជុំវិញនោះ រួមទាំងនៅតាមបណ្តាស្រុកផ្សេងៗរបស់ខេត្តឈៀងម៉ៃ ក៏បានទទួលកម្លាំងរំញ័រផងដែរ ។ ក្រោយហេតុការណ៍រញ្ជួយដី មន្ត្រីការិយាល័យធារាសាស្ត្រ និងមន្ត្រីពាក់ព័ន្ធបានចុះពិនិត្យមើលទំនប់ទឹកនានា ហើយឃើញថា ទំនប់ទឹកមិនបានរងផលប៉ះពាល់ដោយសាររញ្ជួយដីទេ ។

លោក Worapot Phetnarachat ប្រធានការិយាល័យធារាសាស្ត្រទី៣ រួមទាំងមន្ត្រីពាក់ព័ន្ធបានចុះពិនិត្យមើលនៅតាមទំនប់ និងអាងស្តុកទឹកនានា ដែលស្ថិតនៅក្រោមការទទួលខុសត្រូវរបស់ការិយាល័យធារាសាស្ត្រ ដើម្បីរាយការណ៍ព័ត៌មានប្រាប់ពលរដ្ឋរស់នៅតំបន់ក្រោមទំនប់ទឹក ឱ្យមានទំនុកចិត្ត និងជឿជាក់លើសុវត្ថិភាព ។

ដូចគ្នានេះ លោក Atthaya Annopphet ប្រធានគម្រោងដឹកជញ្ជូន និងថែទាំទំនប់ទឹក ព្រមទាំងមន្ត្រីនានាបានចុះក្នុងតំបន់ និងដើរពិនិត្យមើលដោយផ្ទាល់ភ្នែកនៅតំបន់ចំនួន៣ របស់ទំនប់មេគួងឧត្តមថារ៉ា (គឺទំនប់ខាងស្តាំ, ខាងឆ្វេង និងទំនប់ធំ) គឺមិនឃើញមានអ្វីខុសប្លែក ដូចជា ស្នាមប្រេះ ឬជ្រាបទឹកទេ ហើយទំនប់ទឹកទាំងអស់មានសភាពធម្មតា និងសុវត្ថិភាព ។ បន្ទាប់មក ក្រុមមន្ត្រីក៏បានដាក់លិខិតទៅកាន់ស្ថាប័នពាក់ព័ន្ធ និងជូនដំណឹងឱ្យពលរដ្ឋបានជ្រាបផងដែរ ។

រីឯលោក Suphamit Kritsanamit ប្រធាននាយកដ្ឋានគ្រប់គ្រងសុវត្ថិភាពទំនប់ និងធារាសាស្ត្រ បានរាយការណ៍ពីស្ថានភាពទំនប់ទឹកក្រោយកើតរញ្ជួយដីនៅខេត្តម៉េហុងសន ថា ទំនប់ទឹកនានាមានសភាពធម្មតា និងមានសុវត្ថិភាព ។

ពលរដ្ឋរស់នៅក្នុងតំបន់ខាងក្រោមទំនប់ទឹកជឿជាក់ថា គ្រោះរញ្ជួយដីមិនបានធ្វើឱ្យប៉ះពាល់ដល់ទំនប់ទឹកទាំងនេះទេ ព្រោះទំនប់ទឹកអាចទប់ទល់នឹងកម្លាំងរំញ័រដោយសារគ្រោះរញ្ជួយដីបាន ។ កន្លងមក ការិយាល័យធារាសាស្ត្របានចុះមកត្រួតពិនិត្យទំនប់ទឹកនានាជាប្រចាំ មិនថាស្ថានការណ៍ធម្មតា ឬមានស្ថានការណ៍រញ្ជួយដី ៕ ប្រភព ៖ work point news

សំណង់ Tour Eiffel គឺជាស្ថាបត្យកម្មដ៏ល្អឯក និងក៏ជាកន្លែងទេសចរណ៍ដ៏ពេញនិយមបំផុតនៅលើពិភពលោកផងដែរ។

Tour Eiffel ស្ថិតនៅចំទីក្រុងប៉ារីសប្រទេសបារាំង ដែលបានសាងសង់ឡើងនៅឆ្នាំ១៨៨៧ និងបញ្ជប់ការសាងស់នៅឆ្នាំ១៨៨៩។
ស្ថាបត្យកម្មដ៏ល្អឯកនេះ មានកម្ពស់៣២៤ម៉ែត្រ រចនាឡើងដោយលោក Gustave Eiffel។ តាមពិតទៅអគារ Tour Eiffel កសាងឡើងដើម្បីអបអរសាទរខួបគម្រប់១០០ឆ្នាំនៃបដិវត្តបារាំង និងសម្រាប់អ្នកមកទស្សនាតាំងពិព័រណ៍ពិភពលោកក្នុងឆ្នាំ១៨៨៩តែប៉ុណ្ណោះ។
ដោយគ្រានោះ Tour Eiffel គ្រងនឹងត្រូវបានគេកម្ទេចចោលវិញ បន្ទាប់ពីរងការរិះគន់ ដោយថា សំណង់អាគារនេះគ្មានអ្វីអស្ចារ្យនោះទេ ដោយគ្រាន់តែយកដែកដាក់ពីលើគ្នាតែប៉ុណ្ណោះ។

តែក្រោយមក នៅឆ្នាំ១៩៩០ រដ្ឋបាភិបាលបារាំង បាន Tour Eiffel ធ្វើជាមជ្ឈមណ្ឌលបញ្ជូនសំឡេងវិទ្យុវិញ ដែលធ្វើឱ្យប្រជនបារាំងហាក់ស្ងប់ការរិះគន់។ មកទល់បច្ចុប្បន្ន Tour Eiffel ក្លាយជាទិសដៅទេសចរណ៍ដ៏ល្បីបំផុតនៅលើពិភពលោក៕

យោងតាម Channel News Asia កាលពីថ្ងៃពុធទី៨ខែវិច្ឆិការនេះ ការអះអាងរបស់អាជ្ញាធរអន្តោប្រវេសន៍ និងប៉ុស្តិ៍ត្រួតពិនិត្យរបស់ប្រទេសសិង្ហបុរីបាននិយាយថា មានស្រីស្អាតជនជាតិចិនម្នាក់គឺនាង Han Feizi បន្ទាប់ពីការផ្ទុះឡើងនូវវីដេអូដែលខ្លួននាងឈ្លោះប្រកែកជាមួយបុគ្គលិកនៅមន្ទីរពេទ្យសិង្ហបុរី និងមន្ត្រីស៊ើបអង្កេតក្នុងស្រុក ក៏ត្រូវបានបណ្តេញទៅប្រទេសចិនវិញ ហើយហាមឃាត់មិនឲ្យចូលប្រទេសសិង្ហបុរីជាអចិន្ត្រៃយ៍។ ។

កាលពីថ្ងៃទី 25 ខែតុលា សារព័ត៌មាន The Straits Times បានរាយការណ៍ថា នេះជាការកាត់ទោសដែលបានធ្វើឱ្យមានភាពប្រសើរឡើងវិញ បន្ទាប់ពីស្រីស្អាតរូបនេះបានជាប់ពន្ធនាគាររយៈពេល 40 ថ្ងៃមុននេះមកហើយ និងពិន័យជាប្រាក់ចំនួន 600 ដុល្លារផងដែរ ខណៈដែលនាងបានសារភាពកំហុសចំពោះការ “ប្រើភាសាប្រមាថ”ទៅលើជនជាតិសិង្ហបុរីពិតមែន ។

ស្រីស្អាត Han Feizi គឺជាជនជាតិចិន អាយុ 29ឆ្នាំ បានជាប់ទោសពីបទរំលោភបំពាននិយាយពាក្យសំដីមិនគប្បី ថែមទាំងរូបនាងបានឈ្លោះប្រកែកគ្នាយ៉ាងចាស់ដៃជាមួយបុគ្គលិកថែទាំសុខភាពនៅមន្ទីរពេទ្យ Singapore General Hospital។ មិនតែប៉ុណ្ណោះនាងក៏បានឈ្លោះជាមួយនឹងមន្ត្រីស៊ើបអង្កេតនៅកន្លែងដដែលនោះទៀត បន្ទាប់ពីនាងត្រូវបានគេណែនាំឱ្យពាក់ម៉ាស់។ ម៉្យាងវិញទៀត នាងថែមទាំងបានបង្ហោះវីដេអូនៃការឈ្លោះប្រកែករបស់នាងយ៉ាងឡូយចូលទៅក្នុងTikTokទៀត ដែលបានបង្កឲ្យមានការខឹងសម្បារយ៉ាងខ្លាំងពីសាធារណៈជន។

បន្ទាប់ពីមានការរិះគន់យ៉ាងចាស់ដៃនិងដឹងកំហុសពិតមែន នាងបានសារភាពនៅតុលាការថា ខ្លួនកំពុងតែស្រវឹងនៅពេលប្រព្រឹត្តបទល្មើស ហើយក៏បានធ្វើការសុំទោសដែលបណ្តាលឱ្យមានរឿងមិនគប្បីបែបនេះកើតឡើង។

គួរបញ្ជាក់ផងដែរថា យោងទៅតាមលិខិតស្នើសុំការងារ បានបង្ហាញថានាងកំពុងធ្វើការជាអ្នកទទួលភ្ញៀវនៅហាងមួយកន្លែងនៃសិង្ហបុរីផងដែរ។ អាស្រ័យហេតុនេះ ប័ណ្ណការងាររបស់នាង ត្រូវបានគេដកហូត ខណៈនាងក៏ត្រូវបានគេបណ្តេញចេញឲ្យត្រឡប់ទៅស្រុកកំណើតវិញ និងហាមឃាត់មិនឱ្យចូលប្រទេសសិង្ហបុរីជារៀងរហូត៕

ប្រទេសវៀតណាម ៖ គម្រោងសាងសង់លំនៅឋាននៅក្បែរឆ្នេរសមុទ្រហាឡុង (Ha Long) ប្រទេសវៀតណាម បានធ្វើឱ្យមានការប្រឆាំងយ៉ាងខ្លាំងក្លាពីសំណាក់ពលរដ្ឋក្នុងតំបន់ ដោយសារពួកគេបារម្ភពីផលប៉ះពាល់ និងធ្វើឱ្យឆ្នេរសមុទ្រដែលសម្បត្តិបេតិកភណ្ឌពិភពលោករបស់អង្គការយូណេស្កូ (UNESCO) ត្រូវខូចខាត ។

ឆ្នេរសមុទ្រហាឡុងបានល្បីល្បាញពីភាពស្រស់ស្អាត និងទឹកសមុទ្រមានពណ៌ខៀវស្រងាត់ ដែលហ៊ុព័ទ្ធទៅដោយព្រៃឈើនៅលើកោះថ្ម ។ ឆ្នេសមុទ្រហាឡុង គឺជាតំបន់ទេសចរណ៍ដ៏ពេញនិយមខ្លាំងបំផុតរបស់ប្រទេសវៀតណាម ហើយឆ្នេរនេះបានទាក់ទាញភ្ញៀវទេសចររហូតដល់ជាង៧លាននាក់នៅឆ្នាំ២០២២ ។

ឆ្នេរសមុទ្រ និងទីក្រុងនៅក្បែរៗឆ្នេរបានអភិវឌ្ឍន៍យ៉ាងខ្លាំង ប៉ុន្តែកាលពីដើមខែវិច្ឆិកា ឆ្នាំ២០២៣ ក៏មានការបង្ហាញរូបភាពគម្រោងសាងសង់ដ៏ធំ និងត្រូវការផ្ទៃដីជាច្រើនហិកតា គឺគម្រោងសាងសង់នេះស្ថិតនៅជាប់ឆ្នេរសមុទ្រ Bai Tu Long និងនៅក្បែរឆ្នេរសមុទ្រហាឡុង ។ ចំណែកម្ចាស់គម្រោងសាងសង់ គឺក្រុមហ៊ុន Do Gia Capital Limited កំពុងត្រៀមផ្ទៃដីសម្រាប់សាងសង់លំនៅឋាន និងសណ្ឋាគារធំៗ ។

ការដ្ឋានសាងសង់របស់គម្រោងលំនៅឋាន និងសណ្ឋាគារ គឺស្ថិតនៅតំបន់ដែលអង្គការយូណេស្កូបានកំណត់ជាតំបន់ការពារសម្បត្តិបេតិកភណ្ឌពិភពលោក ។ ទោះយ៉ាងណា នៅពេលគម្រោងសាងសង់នេះបញ្ចប់ តំបន់ខាងលើនឹងសម្បូរទៅដោយវីឡា និងលំនៅឋានចំនួន៤៥១ខ្នង, សណ្ឋាគារកម្ពស់៧ជាន់ជាច្រើនកន្លែង ព្រមទាំងកន្លែងសេវាកម្ម និងពាណិជ្ជកម្មជាច្រើនទៀត ។

លោក Truong Quoc Binh អតីតអនុប្រធាននាយកដ្ឋានបេតិកភណ្ឌរបស់ក្រសួងវប្បធម៌វៀតណាមលើកឡើងថា តំបន់នៅក្បែរឆ្នេរសមុទ្រហាឡុង កំពុងត្រូវបានគេឈ្លានពានយ៉ាងខ្លាំង ។ ចំណែកមន្ត្រីនៅទីក្រុង Cam Pha ដែលទីក្រុងនេះស្ថិតនៅក្បែរការដ្ឋានសាងសង់ឱ្យដឹងថា រដ្ឋាភិបាលបានស្នើឱ្យវិនិយោគិនផ្អាកការសាងសង់ ហើយបានចុះត្រួតពិនិត្យតំបន់នេះ នៅមុនថ្ងៃទី១០ ខែវិច្ឆិកា ឆ្នាំ២០២៣ ។

អ្នកអភិរក្សតំបន់ធម្មជាតិលើកឡើងថា ឆ្នេរសមុទ្រហាឡុងមានផ្កាថ្មប្រមាណ២៣៤ប្រភេទ ប៉ុន្តែបច្ចុប្បន្ន ផ្កាថ្មនៅសល់ត្រឹមតែពាក់កណ្តាលប៉ុណ្ណោះ ។ ក្រៅពីនេះ ឆ្នេរហាឡុង ក៏ប្រឈមនឹងបញ្ហាសំរាមផ្លាស្ទិកផងដែរ ដោយសារពលរដ្ឋវៀតណាមបោះសំរាមគ្មានសណ្តាប់ធ្នាប់ ។ ចំណែកការិយាល័យអង្គការយូណេស្កូប្រចាំប្រទេសវៀតណាម និងគណៈកម្មការគ្រប់គ្រងឆ្នេរហាឡុង ពុំទាន់បញ្ចេញមតិយោបល់អ្វីទេពាក់ព័ន្ធនឹងបញ្ហានេះ ៕ ប្រភព ៖ AEC connect

ប្រទេសថៃ ៖ កាលពីថ្ងៃទី៩ ខែវិច្ឆិកា ឆ្នាំ២០២៣ ស្ថានីយវិទ្យុប្រចាំស្រុកឧត្តរថានី ប្រទេសថៃ បានទទួលសេចក្តីរាយការណ៍ពីពលរដ្ឋម្នាក់ថា ប្រទះឃើញព្រះសង្ឃ១អង្គសឹង (ដេក) នៅតាមផ្លូវដើរត្រង់បរិវេណផ្លូវបំបែកជា៥ នៅម្តុំសាលាក្រុងឧត្តរថានី ទើបបារម្ភថា អាចនឹងមានគ្រោះថ្នាក់ ដោយសារព្រះសង្ឃសឹង (ដេក) មិនកម្រើកសោះ ។ ក្រោយទទួលបានសេចក្តីរាយការណ៍នេះ កម្លាំងសមត្ថកិច្ចក៏បានចុះទៅត្រួតពិនិត្យដល់កន្លែង ។

នៅពេលកម្លាំងសមត្ថកិច្ចទៅដល់ទីនោះ ក៏បានប្រទះឃើញព្រះសង្ឃអង្គនេះសឹង (ដេក) មិនកម្រើកនៅតាមផ្លូវថ្មើរជើង និងមានបាត្រលោក១ផងដែរនៅក្បែរនោះ ។ ពេលសមត្ថកិច្ច និងអ្នកសារព័ត៌មានដើរទៅពិនិត្យមើលជិតៗទើបដឹងថា ព្រះសង្ឃឆាន់ស្រា ដោយសារធុំក្លិនស្រាយ៉ាងខ្លាំង ។

ក្រោយមក កម្លាំងសមត្ថកិច្ចក៏ដាស់ព្រះសង្ឃឱ្យភ្ញាក់ដើម្បីសាកសួរ ប៉ុន្តែទោះជាដាស់យ៉ាងណា ក៏ព្រះសង្ឃពុំព្រមភ្ញាក់សោះ ។ ៥នាទីក្រោយមក ព្រះសង្ឃក៏កម្រើកខ្លួនបន្តិចដូចជាចង់ភ្ញាក់ ប៉ុន្តែក៏សឹងលក់ (ដេក) បន្តទៀត ។ ពេលនោះ សមត្ថកិច្ចក៏ព្យាយាមដាស់ម្តងទៀត ប៉ុន្តែព្រះសង្ឃនៅតែមិនភ្ញាក់ដដែល ។

សមត្ថកិច្ចគិតថា បើទុកឱ្យព្រះសង្ឃសឹង (ដេក) នៅតាមផ្លូវដើរបែបនេះបន្តទៀត វាមិនល្អទេ ក្នុងក្រសែភ្នែកពលរដ្ឋធ្វើដំណើរទៅមក ។ ដូច្នេះ សមត្ថកិច្ចចំនួន៤រូបក៏សម្រេចចិត្តនាំគ្នាសែងព្រះសង្ឃដាក់លើរថយន្តបញ្ជូនទៅប៉ុស្តិ៍ដើម្បីឱ្យស្វាងស្រវឹង មុននឹងសាកសួរថា ជាព្រះសង្ឃពិតប្រាកដ ឬក្លែងក្លាយ ។ បើជាព្រះសង្ឃពិតប្រាកដ សមត្ថកិច្ចនឹងបញ្ជូនទៅវត្ត ព្រមទាំងឱ្យសឹក ។

ពលរដ្ឋលើកឡើងថា កាលពីពេលកន្លងទៅថ្មីៗនេះ មានព្រះសង្ឃ១អង្គស្រវឹងស្រាហើយសឹង (ដេក) នៅក្បែរហាងលក់ទំនិញកណ្តាលស្រុកឧត្តរថានី ប៉ុន្តែពួកគេមិនប្រាកដចិត្តថា ជាព្រះសង្ឃដដែលនេះ ឬព្រះសង្ឃផ្សេងទៀត ។ រីឯពលរដ្ឋខ្លះទៀតនិយាយថា នេះជាព្រះសង្ឃពិតប្រាកដ មិនមែនជាព្រះសង្ឃ AI ទេ ដោយសារព្រះអង្គឆាន់ស្រាជ្រុល ទើបសឹង (ដេក) នៅតាមផ្លូវបែបនេះ ហើយរំខានដល់សមត្ថកិច្ច ៕ ប្រភព ៖ 3Plus News