ប្រទេសព្រុយណេ ៖ កាលពីថ្ងៃទី២៦ ខែធ្នូ ឆ្នាំ២០២៣ សារព័ត៌មាន Xinhua បានរាយការណ៍ថា ការិយាល័យអភិវឌ្ឍន៍ទេសចរណ៍ស្ថិតនៅក្រោមក្រសួងទេសចរណ៍ បង្ហាញថា ប្រទេសព្រុយណេបានព្យាយាមដោះស្រាយបញ្ហាការប៉ះពាល់មុខមាត់ក្នុងវិស័យទេសចរណ៍ ដែលបណ្តាលមកពីមគ្គុទ្ទេសក៍ទេសចរខុសច្បាប់ និងបុគ្គលគ្មានលិខិតអនុញ្ញាតធ្វើការក្នុងវិស័យទេសចរណ៍ ។

បច្ចុប្បន្ន ប្រទេសព្រុយណេបានក្លាយជាគោលដៅទេសចរណ៍ពេញនិយមពីសំណាក់ភ្ញៀវទេសចរបរទេស ប៉ុន្តែប្រទេសនេះបានប្រឈមនឹងបញ្ហាមួយចំនួនក្នុងវិស័យទេសចរណ៍ ដូចជា ៖ មគ្គុទ្ទេសក៍ទេសចរគ្មានលិខិតអនុញ្ញាតធ្វើការត្រឹមត្រូវ ។ ហេតុនេះ វាបណ្តាលឱ្យប៉ះពាល់ដល់មុខមាត់ទេសចរណ៍របស់ប្រទេសនេះយ៉ាងខ្លាំង ហើយធ្វើឱ្យគេបារម្ភអំពីគុណភាព និងបទពិសោធន៍ក្នុងដំណើរកម្សាន្តផងដែរ ។

ការិយាល័យអភិវឌ្ឍន៍ទេសចរណ៍បានជូនដំណឹងទៅកាន់ភ្ញៀវទេសចរ និងក្រុមហ៊ុនទេសចរណ៍ថា ពួកគេគួរជួលមគ្គុទ្ទេសក៍ទេសចរណាដែលមានលិខិតអនុញ្ញាតធ្វើការត្រឹមត្រូវប៉ុណ្ណោះ ដោយសារអ្នកទាំងនោះមានចំណេះដឹងជ្រៅជ្រះ និងអាចប្រាប់ភ្ញៀវទេសចរអំពីតំបន់កម្សាន្ត ។ ហេតុនេះ ភ្ញៀវទេសចរទាំងអស់នឹងមានសុវត្ថិភាព និងទទួលបាននូវបទពិសោធន៍ល្អៗពេលពួកគេមកកម្សាន្តនៅប្រទេសព្រុយណេ ។

ដូចគ្នានេះ រដ្ឋាភិបាលព្រុយណេប្រកាសថា ភ្ញៀវទេសចរទាំងអស់គួរតែស្វែងរកក្រុមហ៊ុនទេសចរណ៍ណា ដែលមានលិខិតអនុញ្ញាតច្បាស់លាស់ពីរដ្ឋាភិបាល ។ រីឯមគ្គុទ្ទេសក៍ទេសចរវិញ គួរស្វែងរកបុគ្គលណាដែលទទួលបានលិខិតអនុញ្ញាតធ្វើការត្រឹមត្រូវ និងមានសញ្ញាសម្គាល់ជាផ្លូវការ ដូចជា ៖ ឈ្មោះ, រូបថត និងព័ត៌មានផ្សេងៗ ៕

ប្រទេសឥណ្ឌូណេស៊ី ៖ ប្រទេសឥណ្ឌូណេស៊ីគ្រោងផ្តល់អត្ថប្រយោជន៍ផ្នែកពន្ធដល់ក្រុមហ៊ុនផលិតរថយន្ត ដែលមានគម្រោងសាងសង់រោងចក្រផលិតរថយន្តអគ្គិសនី និងការនាំចូលរថយន្តអគ្គិសនីដំឡើងរួច រហូតដល់ឆ្នាំ២០២៥ ។ គម្រោងថ្មីនេះបង្ហាញឱ្យឃើញថា ឥណ្ឌូណេស៊ីបានព្យាយាមទាក់ទាញការវិនិយោគចូលក្នុងប្រទេសរបស់ខ្លួនកាន់តែច្រើន ។

បទប្បញ្ញត្តិថ្មីនេះបានចុះហត្ថលេខា កាលពីថ្ងៃទី៨ ខែធ្នូ ឆ្នាំ២០២៣ បញ្ជាក់ថា ក្រុមហ៊ុនផ្សេងៗដែលបានវិនិយោគសាងសង់រោងចក្រផលិតរថយន្តអគ្គិសនី និងមានគម្រោងបង្កើនការវិនិយោគផ្នែករថយន្តអគ្គិសនី ពួកគេអាចនឹងទទួលបានអត្ថប្រយោជន៍ផ្នែកពន្ធ ។

បទប្បញ្ញត្តិថ្មីនេះនឹងលុបចោលពន្ធនាំចូល និងពន្ធលើការលក់គ្រឿងបន្លាស់ទំនើបសម្រាប់រថយន្តដំឡើងរួច ដែលនាំចូលប្រទេសឥណ្ឌូណេស៊ី ។ ឥណ្ឌូណេស៊ីគ្រោងផ្តល់អត្ថប្រយោជន៍ពន្ធ ដែលប្រមូលពីអាជ្ញាធរក្នុងតំបន់ផងដែរ ។ មុននេះ ឥណ្ឌូណេស៊ីបានផ្តល់អត្ថប្រយោជន៍ពន្ធចំពោះការនាំចូលគ្រឿងបន្លាស់រថយន្ត ដែលដំឡើងនៅប្រទេសឥណ្ឌូណេស៊ីប៉ុណ្ណោះ ។ គេចាត់ទុកថា ឥណ្ឌូណេស៊ី គឺជាទីផ្សាររថយន្តដ៏ធំបំផុតក្នុងតំបន់អាស៊ីអាគ្នេយ៍ ។

ទោះយ៉ាងណា ចំនួនក្រុមហ៊ុនរថយន្តដែលអាចនាំចូលរថយន្តបាន គឺអាស្រ័យលើទំហំការវិនិយោគទុន និងការអភិវឌ្ឍរោងចក្រ ។ លើសពីនេះ ក្រុមហ៊ុនទាំងនោះត្រូវតែទទួលបានការអនុម័តពីក្រសួងវិនិយោគ ។ រដ្ឋាភិបាលឥណ្ឌូណេស៊ីបានកំណត់គោលដៅថា នឹងផលិតរថយន្តអគ្គិសនីឱ្យបានរហូតដល់៦សែនគ្រឿងនៅឆ្នាំ២០៣០ ដែលចំនួននេះលើសពីចំនួនលក់រថយន្តក្នុងឆមាសទី១ នៃឆ្នាំ២០២៣ របស់ឥណ្ឌូណេស៊ី រហូតដល់១០០ដង ។

ចំណែកក្រុមហ៊ុន Hyundai ក៏បានចូលមកវិនិយោគនៅឥណ្ឌូណេស៊ីផងដែរ ខណៈក្រុមហ៊ុនរថយន្តអគ្គិសនី Neta និងក្រុមហ៊ុន Mitsubishi Motors សន្យាថា នឹងវិនិយោគនៅឥណ្ឌូណេស៊ី ។ ក្រៅពីនេះ ឥណ្ឌូណេស៊ីបានអញ្ជើញក្រុមហ៊ុនធំៗមកវិនិយោគផងដែរ ដូចជា ៖ ក្រុមហ៊ុន Tesla និង BYD ៕

អាមេរិក៖ លោកយាយ SARAH SIMPKINS អាយុ ១០១ ឆ្នាំត្រូវបានគេរំពឹងថានឹងបញ្ចប់ការសិក្សាថ្នាក់បរិញ្ញាបត្រផ្នែកអប់រំកុមារតូចពីមហាវិទ្យាល័យសហគមន៍ Brightpoint ក្នុងខែឧសភា ឆ្នាំ ២០២៤ បន្ទាប់ពីគាត់បានបោះបង់ការសិក្សាអស់រយៈពេល ៨១ ឆ្នាំ។យោងតាមគេហទំព័រអន្តរជាតិ The Shade Room ដែលបានចុះផ្សាយនៅថ្ងៃទី២៥ ខែធ្នូថា ស្ត្រីវ័យ ១០១ ឆ្នាំ និងចៅស្រីរបស់គាត់ត្រៀមបញ្ចប់ការសិក្សានៅឆ្នាំក្រោយក្នុងមហាវិទ្យាល័យជាមួយគ្នា។ Sarah Simpkins ធ្លាប់បានចូលរៀននៅសកលវិទ្យាល័យ Allen Columbia រដ្ឋ South Carolina សហរដ្ឋអាមេរិក ប៉ុន្តែគាត់បានបោះបង់ការសិក្សាចោលដោយសារតែគាត់មានផ្ទៃពោះកូនដំបូង។

Sarah Simpkins បានសម្រាលកូនចំនួន ១២ នាក់ ហើយបានចំណាយពេលភាគច្រើនរបស់គាត់ផ្តោតលើការចិញ្ចឹមពួកគេ ដោយលោកយាយ Sarah បាននិយាយថា៖ «ក្នុងអំឡុងពេលនោះ គាត់ពិតជាចង់ទៅសាលារៀនវិញណាស់។ បន្ទាប់មកនៅពេលដែលលោកយាយមានអាយុ ៩៦ ឆ្នាំគាត់បានផ្លាស់ពី Brooklyn រដ្ឋ New York ទៅ Virginia ដើម្បីរស់នៅជាមួយចៅស្រីរបស់គាត់ដែលជាសិស្ស។

នៅក្រោមច្បាប់ឧត្តមសិក្សារបស់រដ្ឋ Virginia ចាប់តាំងពីឆ្នាំ ១៩៧៤ មនុស្សដែលមានអាយុលើសពី ៦០ ឆ្នាំអាចចុះឈ្មោះសម្រាប់ថ្នាក់ក្រេឌីត ឬវគ្គសិក្សាដោយមិនបង់ថ្លៃសិក្សា ដូច្នេះហើយលោកស្រី Sarah Simpkins ក៏បានចាប់យកឱកាសនេះតែម្តង។ Sarah Simpkins ជឿថាអាយុគ្រាន់តែជាតួរលេខប៉ុណ្ណោះ គាត់តែងតែមានអារម្មណ៍ថាគាត់ទើបតែមានអាយុ ៤២ ឆ្នាំប៉ុណ្ណោះ ខណៈដែលបច្ចុប្បន្នគាត់មានអាយុ ១០១ ឆ្នាំទៅហើយ។

ទោះជាយ៉ាងណាក៏ដោយ ស្ត្រីចំណាស់រូបនេះតែងតែមកសាលាជារៀងរាល់ថ្ងៃ ហើយថ្នាក់សិល្បៈដែលធ្វើឡើងរៀងរាល់ថ្ងៃអង្គារ និងថ្ងៃព្រហស្បតិ៍ គឺជាថ្នាក់ដែលគាត់ចូលចិត្តជាងគេ។ Sarah បាននិយាយថា៖ «ខ្ញុំមានអំណរគុណដែលជីវិតបានអនុញ្ញាតឱ្យខ្ញុំត្រឡប់ទៅសាលារៀនវិញ។ ដូច្នេះនៅអាយុ ១០១ ឆ្នាំលោកយាយបានបន្តទស្សនវិជ្ជាជីវិតនៃការរីករាយនិងសុភមង្គលគ្រប់ពេល៕

គេហទំព័រ usnews បានចាត់ចំណាត់ថ្នាក់ប្រទេសល្អបំផុតនៅលើពិភពលោក តាមរយៈការវាយតម្លៃទៅលើគុណភាពជីវិត, ការប្រកបអាជីវកម្ម, មរតកវប្បធម៌ និងឥទ្ធិពលនៅលើពិភពលោក ។ យោងតាមការវាយតម្លៃលើកត្តាផ្សេងៗបង្ហាញថា ប្រទេសស្វីសបានជាប់ចំណាត់ថ្នាក់ទី១ ជាប្រទេសល្អបំផុតនៅលើពិភពលោក ប្រចាំឆ្នាំ២០២៣ ចំណែកប្រទេសថៃ បានជាប់ចំណាត់ថ្នាក់ទី២៩ ក្នុងចំណោម៨៧ប្រទេសដែលល្បីល្បាញផ្នែកទេសចរណ៍ ។

ប្រទេសល្អបំផុតនៅលើពិភពលោក ប្រចាំឆ្នាំ២០២៣ មានចំនួន៥ រួមមាន ៖

១-ប្រទេសស្វីស ៖ ប្រទេសនេះមានទំហំតូច និងពោរពេញទៅដោយធម្មជាតិដ៏ស្រស់ស្អាត ព្រមទាំងប្រកាន់អព្យាក្រឹតអស់រយៈពេលយ៉ាងយូរ ។ បើតាមប្រវត្តិសាស្ត្របង្ហាញថា ការកសាងប្រទេសស្វីសកើតឡើងដោយសារការសាមគ្គីគ្នា និងក្លាយជាប្រទេសឯករាជ្យ, មានសន្តិសុខ និងអភិវឌ្ឍន៍រីកចម្រើន ។ លើសពីនេះ សេដ្ឋកិច្ចស្វីសមានភាពរឹងមាំ, អត្រាគ្មានការងារធ្វើទាប រីឯពលរដ្ឋមានជំនាញខ្ពស់ ។

២-ប្រទេសកាណាដា ៖ ជាប្រទេសមានទំហំធំទូលាយ ធម្មជាតិស្រស់ស្អាត ហើយពលរដ្ឋកាណាដាមានភាពរួសរាយរាក់ទាក់ ។ ប្រទេសកាណាដាមានការរស់នៅចម្រុះ ប៉ុន្តែបានប្រឈមនឹងការរួបរួមក្នុងសង្គមមានលក្ខណៈខុសគ្នា ដូចជា ៖ ជាតិសាសន៍, វប្បធម៌ និងភាសា ។ កាណាដា គឺជាទឹកដីសិល្បៈ, ប្រវត្តិសាស្ត្រ ខណៈកាណាដាមានប្រព័ន្ធគ្រប់គ្រងប្រទេសរួមគ្នារវាងលទ្ធិប្រជាធិបតេយ្យ និងរបបរាជានិយម ។

៣-ប្រទេសស៊ុយអែត ៖ ប្រទេសនេះមានប្រវត្តិសាស្ត្រយូរអង្វែង, ធម្មជាតិស្រស់ស្អាត និងសង្គមប្រកបដោយគុណភាព ។ ប្រទេសនេះអាចផ្លាស់ប្តូរពីទឹកដីសមរភូមិមកជាប្រទេសមានសន្តិភាព, គោរពសិទ្ធិមនុស្ស, ប្រព័ន្ធសុខុមាលភាពល្អ និងមានការយកចិត្តទុកដាក់ជាមួយបរិស្ថាន ។ ហេតុនេះ ស៊ុយអែតបានក្លាយជាប្រទេសគំរូមួយដែលគួរឱ្យកោតសរសើរ ។

៤-ប្រទេសអូស្ត្រាលី ៖ ជាប្រទេសឈានមុខគេក្នុងតំបន់អាស៊ីប៉ាស៊ីហ្វិក ដែលមានវប្បធម៌រួមផ្សំគ្នារវាងជាតិសាសន៍ជាច្រើន និងមានសេដ្ឋកិច្ចរឹងមាំ ។ ពលរដ្ឋអូស្ត្រាលីភាគច្រើនមានអាយុវែង, មានការយល់ដឹងពីបញ្ហាបរិស្ថាន ហើយពួកគេគាំទ្រការរៀបអាពាហ៍ពិពាហ៍ភេទដូចគ្នា ។ ចំណែកទីក្រុងធំៗរបស់អូស្ត្រាលីបានជាប់ចំណាត់ថ្នាក់ជាទីក្រុងគួរឱ្យចង់រស់នៅលើពិភពលោក ។

៥-សហរដ្ឋអាមេរិក ៖ សហរដ្ឋអាមេរិកមានភាពរឹងមាំផ្នែកសេដ្ឋកិច្ច, កងទ័ព, វប្បធម៌, ប្រព័ន្ធផ្សព្វផ្សាយផ្នែកកម្សាន្តល្បីល្បាញ ហើយអាមេរិកមានឥទ្ធិពលយ៉ាងខ្លាំងទៅលើប្រទេសផ្សេងៗលើពិភពលោក ។ អាមេរិកល្បីល្បាញផ្នែកសេដ្ឋកិច្ច, បច្ចេកវិទ្យា និងធនធានធម្មជាតិ ខណៈប្រទេសនេះមានភាពចម្រុះផ្នែកជាតិសាសន៍ និងវប្បធម៌ ។

ចំណែកប្រទេសថៃ បានជាប់ចំណាត់ថ្នាក់ទី២៩ ក្នុងចំណោមប្រទេសចំនួន៨៧ ។ ប្រទេសថៃស្ថិតក្នុងចំណោមប្រទេសដែលមានភាពល្បីល្បាញផ្នែកទេសចរណ៍ និងទទួលបានការពេញនិយមពីភ្ញៀវទេសចរនៅលើពិភពលោក បើទោះជាប្រាក់ចំណូលបានពីវិស័យទេសចរណ៍ ស្មើត្រឹមតែ៧% នៃផលិតផលក្នុងស្រុកសរុប (GDP) ក្តី ៕