បរទេស៖ ភោជនីយដ្ឋានជប៉ុនមួយកន្លែងដែលមានឈ្មោះថា Sushiya no Nohachi បានបង្កើត Sushi តូចជាងគេបំផុតលើពិភពលោក ដោយប្រើតែអង្ករមួយគ្រាប់ប៉ុណ្ណោះ។

យោងតាមគេហទំព័រអន្តរជាតិ Audicity Central ដែលបានចុះផ្សាយនៅថ្ងៃទី២៦ ខែធ្នូថា ភោជនីយដ្ឋានមួយក្នុងប្រទេសជប៉ុនដែលមានឈ្មោះថា Sushiya no Nohachi គឺជាភោជនីយដ្ឋានស៊ូស៊ីដ៏ល្បីល្បាញនៅតំបន់ Asakusa នៃទីក្រុងតូក្យូ ដែលមានលក្ខណៈពិសេសក្នុងការបម្រើអាហារស៊ូស៊ីតូចជាងគេបំផុតរបស់ពិភពលោក ជាមួយនឹងអង្ករមួយគ្រាប់ប៉ុណ្ណោះ។

ដូច្នេះហើយ ដុំស៊ូស៊ីនីមួយៗត្រូវបានទាមទារភាពច្បាស់លាស់ និងភាពល្អិតល្អន់ច្រើន ដោយសារទំហំតូចរបស់វា ទើបហាងកំណត់ចំនួនដែលពួកគេធ្វើក្នុងមួយសប្តាហ៍ ដោយក្នុងមួយសប្តាហ៍នឹងត្រូវបានបម្រើមិនលើសពី ៥ ដងឡើយ។ ហេតុនេះហើយ រាល់បំណែកដែលបានបម្រើគឺពិតជាល្អឥតខ្ចោះ ដែលបង្ហាញពីចំនួនការងារ និងការអត់ធ្មត់របស់ចុងភៅ។

លោក Hironori Ikeno មេចុងភៅនៅ Sushiya no Nohachi បាននិយាយថា គាត់បានទទួលគំនិតនេះក្នុងឆ្នាំ ២០០២ បន្ទាប់ពីអតិថិជនម្នាក់បានសួរគាត់ថា តើគាត់អាចធ្វើស៊ូស៊ីដែលមានទំហំតូចបំផុតបានទេ? ភ្លាមនោះគាត់ក៏បានឆ្លើយថា បាន!! គឺ “តូចដូចគ្រាប់ស្រូវ” អញ្ចឹង ហើយក៏បន្តបង្ហាញថាគាត់មិនបាននិយាយលេងនោះទេ។ បន្ទាប់មកក្នុងរយៈពេលប៉ុន្មានឆ្នាំមកនេះ ភោជនីយដ្ឋានរបស់គាត់ពិតជាមានភាពល្បីល្បាញជាអន្តរជាតិសម្រាប់ការធ្វើស៊ូស៊ីតូចជាងគេបំផុតរបស់ពិភពលោក។

ទោះជាយ៉ាងណាក៏ដោយ ស៊ូស៊ីតូចនេះវាមិនមែនជាមុខម្ហូបដែលអាចបញ្ជាទិញបានទេ។ ដូច្នេះហើយ អតិថិជនអាចស្នើសុំវាពីភោជនីយដ្ឋានដើម្បីញ៉ាំជាមួយឈុតស៊ូស៊ីទំហំធម្មតាដែលមានតម្លៃប្រហែល ៧,១២៧ យ៉េន (ប្រមាណ ៥០ ដុល្លារអាមេរិក) ៕

បរទេស៖ រថយន្តអគ្គិសនីដំបូងបង្អស់របស់រុស្ស៊ី ត្រូវបានអ្នកនិយមលេងអ៊ីនធឺណិតជាច្រើនសើចចំអកលើបណ្ដាញសង្គម ដោយពួកគេបាននិយាយថា ជារថយន្តដែលអាក្រក់បំផុតនៅក្នុងពិភពលោក ដោយសារតែការរចនាមិនទាក់ទាញ។

យោងតាមគេហទំព័រអន្តរជាតិ Yahoo News ដែលបានចុះផ្សាយនៅថ្ងៃទី២៥ ខែធ្នូថា រថយន្តអគ្គិសនីដែលមានឈ្មោះថា Amber Yantar គឺជារថយន្តអគ្គិសនីថ្មីបំផុតរបស់ប្រទេសរុស្ស៊ី ត្រូវបានអ្នកនិយមលេងអ៊ីនធឺណិតជាច្រើនសើចចំអកយ៉ាងខ្លាំងអំពីរូបរាងរបស់វា។

Amber Yantar គឺជារថយន្តអគ្គិសនីគំរូ (EV) ដែលរចនាដោយក្រុមហ៊ុនផលិតរថយន្តរុស្ស៊ី Avtotor នៅ Kaliningrad ។ ក្រុមហ៊ុនផលិតនេះបានសហការជាមួយវិទ្យាស្ថានពហុបច្ចេកទេសម៉ូស្គូ ហើយវាត្រូវបានចេញផ្សាយជាសាធារណៈកាលពីប៉ុន្មានថ្ងៃកន្លងមកនេះ។ ក្រុមហ៊ុន Avtotor ធ្លាប់បានប្រកាសថា ខ្លួនគ្រោងនឹងចាប់ផ្តើមផលិតរថយន្តអគ្គិសនី Yantar រហូតដល់ ៥០,០០០ គ្រឿងនៅឆ្នាំ ២០២៥ ជាមួយនឹងគ្រឿងបន្លាស់ រួមទាំងឧបករណ៍រថយន្តអគ្គិសនីទាំងអស់ដូចជា ម៉ូទ័រអេឡិចត្រិច រាល់អាំងវឺរទ័រ ផ្ទាំងបញ្ជា និងថ្ម ដែលត្រូវបានរចនាឡើង និងផលិតទាំងស្រុងនៅក្នុងប្រទេសរុស្ស៊ី។

ទោះជាយ៉ាងណាក៏ដោយ រថយន្តអគ្គិសនីប្រភេទនេះហាក់ដូចជាមិនមានការចាប់អារម្មណ៍នោះទេ ដោយសារតែរូបរាងមិនទាក់ទាញ និងការរចនាដ៏ចម្លែករបស់វា ធ្វើឱ្យអ្នកលេងអ៊ីនធឺណិតមួយចំនួនបាននិយាយរិះគន់ ក៏ដូចជាសើចចំអក និងថែមទាំងបញ្ចេញមតិខ្លាំងៗបែបនេះថា ជារថយន្តអាក្រក់បំផុតនៅក្នុងពិភពលោក រថយន្តគ្មានស្តង់ដារ មិនស្អាត មិនទាន់សម័យជាដើម។

គួរបញ្ជាក់ដែរថា Amber Yantar គឺជារថយន្តអគ្គិសនីដែលភ្ជាប់មកជាមួយថ្ម 25kW/h និងល្បឿន 105 គីឡូម៉ែត្រក្នុងមួយម៉ោង ជាមួយនឹងតម្លៃគឺមិនថ្លៃនោះទេ នេះបើយោងតាមការបញ្ជាក់របស់ក្រុមហ៊ុនផលិតរថយន្តរុស្ស៊ី Avtotor៕

ប្រទេសចិន ៖ យូណាន គឺជាខេត្តដាំដុះដំណាំកាហ្វេច្រើនបំផុតនៅប្រទេសចិន ដោយសារខេត្តនេះស្ថិតនៅតំបន់ខ្ពង់រាប និងមានអាកាសធាតុអំណោយផល ។ កសិករនៅខេត្តយូណានបានដាំដំណាំកាហ្វេមានគុណភាពខ្ពស់ ស្របគ្នាជាមួយតម្លៃកាហ្វេនៅខេត្តយូណានកើនឡើងជាបន្តបន្ទាប់ ។ ក្រៅពីនេះ កសិករនៅតំបន់ផ្សេងទៀត ក៏បាននាំគ្នាដាំកាហ្វេផងដែរ ដូចជា ៖ នៅទីក្រុងភូអឺ និងទីក្រុងប៉ៅសាន ។

ចំណែក Hu Wenbin ជាអ្នកគ្រប់គ្រងក្នុងចម្ការកាហ្វេមួយកន្លែងនៅទីក្រុងភូអឺ និយាយថា ក្រុមហ៊ុនរបស់លោកបានដាំដំណាំកាហ្វេនៅលើផ្ទៃដីប្រមាណ៤០ហិកតា ហើយលោកសង្ឃឹមថា នឹងទទួលបានផលខ្ពស់រហូតដល់៤៦០តោន ។ ក្នុងរយៈពេលប៉ុន្មានឆ្នាំកន្លងមកនេះ តម្លៃកាហ្វេបានកើនឡើងជាបន្តបន្ទាប់ ហើយតម្លៃកាហ្វេនៅខេត្តយូណានបានកើនឡើងទ្វេដង បើធៀបនឹងកាហ្វេនៅទីក្រុងភូអឺ ។

កាលពីឆ្នាំ២០២២ តម្លៃជាមធ្យមរបស់គ្រាប់កាហ្វេពុំទាន់ឆ្អិននៅខេត្តយូណាន គឺស្មើនឹង៣០យាន់ក្នុង១គីឡូក្រាម ខណៈតម្លៃជាមធ្យមរបស់គ្រាប់កាហ្វេពុំទាន់ឆ្អិននៅទីក្រុងប៉ៅសាន ស្មើនឹង៤០យាន់ក្នុង១គីឡូក្រាម ។ ចំណែកតម្លៃគ្រាប់កាហ្វេពិសេសក្នុងតំបន់ផ្សេងៗបានកើនឡើងខ្ពស់ជាងនេះទៀត ដូចជា គ្រាប់កាហ្វេ Guixia មានតម្លៃខ្ពស់រហូតដល់១.២០០យាន់ឯណោះក្នុង១គីឡូក្រាម ។

Yang Zhu ជានាយកក្រុមហ៊ុន Baoshan Zhongka Food លើកឡើងថា តម្លៃគ្រាប់កាហ្វេនៅទីក្រុងប៉ៅសាន បានកើនឡើងជាបន្តបន្ទាប់ ប៉ុន្តែក្រុមហ៊ុនរបស់លោក នៅតែទិញគ្រាប់កាហ្វេមកពីទីក្រុងប៉ៅសាន ដោយសារតែអតិថិជនពេញចិត្តលើគុណភាពរបស់វា ។ នៅឆ្នាំ២០២៣ នេះ ក្រុមហ៊ុនបានទិញគ្រាប់កាហ្វេរហូតដល់ជាង៤.០០០តោន ដែលបរិមាណនេះច្រើនជាងឆ្នាំ២០២២ ប្រមាណ២០% ។

នៅទីក្រុងប៉ៅសាន គេបានបើកវគ្គបណ្តុះបណ្តាលកសិករក្នុងតំបន់អំពីការដាំដំណាំកាហ្វេជាង៤០ពូជ ដោយការប្រើប្រាស់ជីសរីរាង្គ ដើម្បីទទួលបានកាហ្វេមានគុណភាពខ្ពស់លក់ឱ្យអតិថិជន ។ កសិករចូលរួមក្នុងវគ្គបណ្តុះបណ្តាលនេះនិយាយថា ដំណាំកាហ្វេបានធ្វើឱ្យជីវភាពរបស់ពួកគេល្អប្រសើរជាងមុន ៕

កម្មវិធីប្រកួតសម្រស់ Miss Amazing Malaysia 2023/2024 ជាព្រឹត្តិការណ៍មួយដែលត្រូវរៀបចំឡើងនៅរដ្ឋ Bangsar ទីក្រុង Kuala Lumpur ប្រទេសម៉ាឡេស៊ី។

អ្នកចូលរួមប្រកួតគឺមានស្ត្រីសរុបចំនួន ១២ នាក់។ ស្រីទាំងនោះគឺមានអាយុចន្លោះពី ១៦ ទៅ ៣៨ ឆ្នាំ ដែលមកពីជាតិសាសន៍ផ្សេងៗគ្នាបាននឹងកំពុងចូលរួមក្នុងកម្មវិធីប្រកួតសម្រស់ដើម្បីលើកកម្ពស់ស្ត្រីដែលមានសមត្ថភាពខុសៗគ្នា។

វេទិកានេះផងដែរ គឺបានរៀបចំឡើងសម្រាប់ស្ត្រីដែលជាស្រ្តីជនពិការ ក៏ដូចជាស្រ្តីកំពុងប្រឈមនឹងបញ្ហាផ្នែកសតិអារម្មណ៍ (ដូចជាស្រ្តីកើតជំងឺអូទីស្សឹម ជាដើម) និងលើកចិត្តពួកគេឲ្យមកចូលរួមបង្ហាញនូវលក្ខណៈវិសេសក្នុងខ្លួនរបស់ពួកគេរៀងៗខ្លួន តាមរយៈការបញ្ចេញនូវទេពកោសល្យចម្រុះ និងការបញ្ចេញមតិយោបល់។ល។

កម្មវិធីនេះបានរួមបញ្ចូលនូវសកម្មភាពជាច្រើនទៀត សម្រាប់ការអភិវឌ្ឍខ្លួនពួកគេ និង បណ្តុះបណ្តាលជំនាញក្នុងការប្រាស្រ័យទាក់ទង ការនិយាយជាសាធារណៈ ការហាត់ប្រាណ ការដើរបង្ហាញម៉ូដ ការប្រឹក្សាផ្សេងៗ ព្រមទាំងការណែនាំក្នុងការតុបតែងខ្លួន ការតុបតែងមុខ និងបង្ហាញម៉ូតសម្លៀកបំពាក់ផងដែរ។

ការប្រកួតវគ្គផ្តាច់ព្រ័ត្រនៃកម្មវិធី Miss Amazing Malaysia នឹងប្រារព្ធធ្វើឡើងនៅថ្ងៃទី ៧ ខែមករា ឆ្នាំ ២០២៤ នៅក្នុងរដ្ឋ Petaling Jaya ប្រទេសម៉ាឡេស៊ី។ រីឯបេក្ខនារីដែលទទួលបានជ័យលេភី នឹងត្រូវបានដាក់ពិន្ទុយ៉ាងយកចិត្តទុកដាក់ដោយផ្អែកលើវដ្តមាន ការប្តេជ្ញាចិត្ត ការចូលរួមយ៉ាងសកម្ម និងការផ្លាស់ប្តូរខ្លួនឯងឲ្យប្រសើរជាងមុនជាដើម៕