ប្រទេសថៃ ៖ នៅថ្ងៃទី១៦ ខែវិច្ឆិកា ឆ្នាំ២០២៣ សារព័ត៌មានថៃចុះផ្សាយថា មានព្រះពុទ្ធបដិមាចម្លែក១អង្គមានកម្ពស់ជាង១ម៉ែត្រ ដែលត្រូវបានគេតម្កល់ទុកនៅវត្តមួយកន្លែងស្ថិតក្នុងខេត្តណាខនណាយក ប្រទេសថៃ បានចេញស្នាមកន្ទួលតូចៗពេញទាំងអស់ ។ ក្រោយមក ក៏មានការចែកចាយរូបភាពព្រះពុទ្ធបដិមានេះក្នុងបណ្តាញសង្គម ហើយធ្វើឱ្យមនុស្សម្នាជាច្រើននាក់យល់ឃើញខុសៗគ្នា និងមានអ្នកយកធូប ទៀន និងផ្កាមកក្រាបសំពះព្រះពុទ្ធបដិមាដើម្បីសុំលាភសំណាង និងលេខឆ្នោតផងដែរ ។

ព្រះចៅអធិការវត្តបូសកានអរ ស្ថិតក្នុងឃុំថាឆាង ស្រុកមឿង ខេត្តណាខនណាយក មានសង្ឃដីកាថា ព្រះពុទ្ធបដិមានេះព្រះនាម «ព្រះរាំផឹង» គឺជាព្រះប្រចាំថ្ងៃកំណើតថ្ងៃសុក្រ ។ កាលពីឆ្នាំ២០០២ មានញាតិញ៉ោមយកព្រះពុទ្ធបដិមាមកថ្វាយវត្ត ហើយពេលយកមកថ្វាយនោះ គឺព្រះពុទ្ធបដិមាមានសភាពធម្មតាដូចព្រះពុទ្ធបដិមាផ្សេងទៀតដែរ និងគ្មានស្នាមកន្ទួលបែបនេះទេ ។ ប៉ុន្តែរយៈពេលក្រោយមក ស្រាប់តែកើតស្នាមកន្ទួលពេញទាំងអស់ ។

ព្រះចៅអធិការវត្តមានសង្ឃដីកាថា ៖ «នៅពេលញាតិញ៉ោមយកព្រះពុទ្ធបដិមាមកថ្វាយវត្ត គឺគ្មានស្នាមកន្ទួលបែបនេះទេ ហើយរយៈពេល១ឆ្នាំ ឬ២ឆ្នាំក្រោយការថ្វាយ ស្រាប់តែកើតស្នាមកន្ទួលពេញតែម្តង ។ រឿងនេះ អាត្មាក៏មិនដឹងថា តើវាកើតឡើងដូចម្តេចនោះទេ គឺស្រេចតែលើការយល់ឃើញរបស់បុគ្គលម្នាក់ៗប៉ុណ្ណោះ» ។ ប៉ុន្តែមតិផ្សេងទៀតលើកឡើងថា វាអាចបណ្តាលមកពីការកសាងព្រះពុទ្ធបដិមា ក្រុមជាងបានប្រើប្រាស់វត្ថុធាតុដើមមិនល្អ ទើបបណ្តាលឱ្យខូចខាតបែបនេះ ។

រីឯលោក Pornchai Thiankrajang អាយុ៤១ឆ្នាំ ជាមន្ត្រីសាលាសង្កាត់ថាឆាង ស្រុកមឿង និយាយថា លោក និងអ្នកភូមិបានយកដៃទៅចាប់ព្រះពុទ្ធបដិមានេះឃើញថា មានស្នាមកន្ទួលរឹងតូចៗចេញពីខាងក្នុង និងគួរឱ្យចម្លែកខ្លាំងណាស់ ។ បន្ទាប់មក អ្នកភូមិមួយចំនួនក៏បានយកធូប ទៀន និងផ្កាមកសំពះសុំលេខឆ្នោតដើម្បីផ្សេងសំណងតាមជំនឿរៀងៗខ្លួន ៕ ប្រភព ៖ Morning News

ប្រទេសឥណ្ឌា ៖ សារព័ត៌មានបរទេសបានចុះផ្សាយហេតុការណ៍គួរឱ្យតក់ស្លុតមួយនៅកណ្តាលរោងភាពយន្តប្រទេសឥណ្ឌា ពេលក្រុមអ្នកគាំទ្រតារាសម្តែងប្រុសឈ្មោះ Salman Khan នាំគ្នាដុតកាំជ្រួចនៅកណ្តាលរោងភាពយន្ត ក្នុងអំឡុងពេលមនុស្សជាច្រើនកំពុងអង្គុយទស្សនាភាពយន្តរឿង «Tiger 3» ។ ការដុតកាំជ្រួចនេះ ក្នុងគោលបំណងបង្ហាញការអបអរសាទរពេលលេចមុខតារាសម្តែងល្បីនៅលើផ្ទាំងក្រណាត់ ។

សារព័ត៌មានឥណ្ឌារាយការណ៍ថា ហេតុការណ៍នេះបានកើតឡើងកាលពីថ្ងៃទី១២ ខែវិច្ឆិកា ឆ្នាំ២០២៣ ក្នុងរោងភាពយន្ត «Mohan Cinema» ស្ថិតនៅទីក្រុង Malecon រដ្ឋ Maharashtra ប្រទេសឥណ្ឌា ។ វីដេអូហេតុការណ៍នេះបានបង្ហាញពីមនុស្សម្នាជាច្រើននាក់កំពុងរត់ជាន់ជើងគ្នាចេញពីរោងភាពយន្តដោយការភ័យខ្លាច ក្រោយពីក្រុមអ្នកគាំទ្រតារាសម្តែងមួយក្រុម កំពុងរង់ចាំការបង្ហាញមុខរបស់តារាសម្តែងល្បីឈ្មោះលេខឡើងក្នុងផ្ទាំងក្រណាត់ បន្ទាប់មក ពួកគេក៏ចាប់ផ្តើមដុតកាំជ្រួចតែម្តង ។

ការដុតកាំជ្រួចនេះមិនបានធ្វើឱ្យមនុស្សក្នុងរោងភាពយន្តរីករាយជាមួយទេ ផ្ទុយទៅវិញ មនុស្សជាច្រើននាក់បានរត់ទៅរកផ្លូវចេញដោយភាពភ័យខ្លាច ខណៈរោងភាពយន្តពោរពេញទៅដោយកាំជ្រួចគ្រប់កន្លែង ។ ក្នុងអំឡុងពេលនោះ គេបានឮសំឡេងយំស្រែក និងសំឡេងគាំទ្រលាន់ឡើងព្រមគ្នា ហើយធ្វើឱ្យរោងភាពយន្តត្រូវផ្អាកបញ្ចាំងរឿងត្រឹមនេះ ។

ទោះយ៉ាងណា ហេតុការណ៍ដូចគ្នានេះធ្លាប់បានកើតឡើងនៅតាមរោងភាពយន្តជាច្រើនកន្លែងទៀតក្នុងប្រទេសឥណ្ឌា ទើបធ្វើឱ្យតារាសម្តែងប្រុសឈ្មោះ Salman Khan បានសរសេរសារក្នុងបណ្តាញសង្គម X (Twitter) ដើម្បីថ្កោលទោសហេតុការណ៍នេះថា ៖ «ខ្ញុំបានជ្រាបព័ត៌មានការដុតកាំជ្រួចក្នុងរោងភាពយន្តពេលកំពុងបញ្ចាំងរឿង Tiger 3 ប៉ុន្តែការប្រព្រឹត្តនូវទង្វើនេះគ្រោះថ្នាក់ណាស់ ។ សូមអ្នកទាំងអស់គ្នារីករាយជាមួយខ្សែភាពយន្ត ដោយមិនធ្វើឱ្យខ្លួនឯង និងអ្នកដទៃស្ថិតក្នុងគ្រោះថ្នាក់ ។ សូមឱ្យមានសុវត្ថិភាព» ។

សារព័ត៌មានឥណ្ឌាចុះផ្សាយបន្ថែមថា បច្ចុប្បន្ន ប៉ូលិសឥណ្ឌាបានចោទប្រកាន់អ្នកគាំទ្រតារាសម្តែងពីបទល្មើសខុសនឹងមាត្រា៤៣៥ ឬការបង្កគ្រោះថ្នាក់ដោយសារភ្លើង ឬឧបករណ៍ផ្សេងទៀត ក្នុងគោលបំណងបង្កការខូចខាត ឬការប្រព្រឹត្តទង្វើដែលនាំឱ្យមានគ្រោះថ្នាក់ដល់ជីវិតមនុស្ស ឬសុវត្ថិភាពអ្នកដទៃ ។

លោក Salman Khan គឺជាតារាសម្តែងខ្សែភាពយន្ត និងបុគ្គលិកប្រចាំទូរទស្សន៍ ដែលមានឈ្មោះបោះសំឡេងយ៉ាងខ្លាំងនៅប្រទេសឥណ្ឌា ។ លោកបានទទួលរង្វាន់ជាច្រើន ហើយលោកជាបុគ្គលម្នាក់ក្នុងចំណោមបុគ្គលមានប្រាក់ចំណូលខ្ពស់បំផុតនៅលើពិភពលោក កាលពីឆ្នាំ២០១៥ និងឆ្នាំ២០១៨ ។ ហេតុនេះ អ្នកទស្សនាជាច្រើននាក់បានរង់ចាំទស្សនាខ្សែភាពយន្តរឿង Tiger 3 ភាគថ្មី ដែលដឹកនាំការផលិតដោយក្រុមហ៊ុន Yash Raj Films ក្នុងនោះមានលោក Salman Khan និងអ្នកនាង Katrina Kaif សម្តែងជាតួឯក ៕ ប្រភព ៖ khaosod

បរទេស៖ បច្ចុប្បន្ន ប្រទេសហ្វាំងឡង់កំពុងពិចារណាបិទច្រកព្រំដែនមួយចំនួន ឬទាំងអស់ជាមួយរុស្ស៊ី ដើម្បីទប់ស្កាត់លំហូរជនចំណាកស្រុកដែលគ្មានឯកសារត្រឹមត្រូវចូលមកក្នុងប្រទេស។

យោងតាមប្រភពព័ត៌មាន Kyiv Independent ដែលបានរាយការណ៍នៅថ្ងៃទី១៦ ខែវិច្ឆិកាថ្មីៗនេះថា នាយករដ្ឋមន្ត្រីហ្វាំងឡង់លោក Petteri Orpo បានចាប់ផ្តើមរឹតបន្តឹងចរាចរណ៍នៅតំបន់ព្រំដែន នឹងបិទច្រកព្រំដែនមួយចំនួន ឬទាំងអស់ជាមួយរុស្ស៊ី ដើម្បីទប់ស្កាត់ការកើនឡើងនៃចំនួនជនចំណាកស្រុកខុសច្បាប់ចូលប្រទេសហ្វាំងឡង់ពីច្រកព្រំដែនភាគខាងកើតរបស់ប្រទេសដែលមានព្រំប្រទល់ជាប់នឹងប្រទេសរុស្ស៊ី។ ដូច្នេះ សាររបស់រដ្ឋាភិបាលហ្វាំងឡង់គឺច្បាស់ណាស់ ដែលប្រទេសនេះចង់ធានាសន្តិសុខតាមច្រកព្រំដែន។

រដ្ឋមន្ត្រីមហាផ្ទៃហ្វាំងឡង់លោក Mari Rantanen ក៏ធ្លាប់បាននិយាយដែរថា ប្រទេសនេះបានត្រៀមខ្លួនរួចជាស្រេចដើម្បីដាក់កម្រិតចរាចរណ៍នៅតាមព្រំដែនជាមួយប្រទេសរុស្ស៊ី។

ប្រទេសហ្វាំងឡង់ បានកត់ត្រាជនភៀសខ្លួនដែលគ្មានឯកសារប្រហែល ៦០ នាក់ដែលឆ្លងកាត់ព្រំដែនភាគខាងកើតរបស់ខ្លួនក្នុងសប្តាហ៍នេះ។ កាលពីសប្តាហ៍មុន ចំនួននេះមានរហូតដល់ ៧១នាក់។ យោងតាមទីភ្នាក់ងារការពារព្រំដែនហ្វាំងឡង់ បានឱ្យដឹងថា មនុស្សទាំងនេះមិនមែនជាពលរដ្ឋរុស្ស៊ីនោះទេ ប៉ុន្តែភាគច្រើនមកពីមជ្ឈិមបូព៌ា ដោយឆ្លងកាត់ក្នុងប្រទេសរុស្ស៊ីមុនពេលចូលប្រទេសហ្វាំងឡង់។

កាលពីខែមេសា ប្រទេសហ្វាំងឡង់បានចាប់ផ្តើមដំឡើងរបងសន្តិសុខសំណាញ់ដែកដែលបំពាក់ដោយប្រព័ន្ធឃ្លាំមើលនៅតាមព្រំដែនរបស់ខ្លួនជាមួយប្រទេសរុស្ស៊ី។ គេរំពឹងថានៅចុងឆ្នាំ ២០២៦ របងប្រហែល ២០០ គីឡូម៉ែត្រនឹងត្រូវបានសាងសង់នៅក្នុងផ្នែកសំខាន់បំផុតនៅតាមព្រំដែននៃប្រទេសទាំងពីរ។
គួរបញ្ជាក់ដែរថា ប្រទេសហ្វាំងឡង់ មានព្រំប្រទល់ប្រវែងសរុប ១,៣០០ គីឡូម៉ែត្រ ជាមួយប្រទេសរុស្ស៊ី ដែលព្រំដែនរបស់ប្រទេសទាំងពីរពីមុនត្រូវបានដំឡើងរបងទាប ជាចម្បងដើម្បីការពារគោក្របី និងសត្វចិញ្ចឹមកុំឱ្យរត់ចេញពីស្រុក៕

វៀតណាម៖ បច្ចុប្បន្នការនាំចេញត្រីធូណារបស់វៀតណាមទៅកាន់ចក្រភពអង់គ្លេសបានធ្លាក់ចុះយ៉ាងខ្លាំងតាំងពីខែកញ្ញាមកម្លេះ ដោយធ្លាក់ចុះ ៣៦% បើធៀបនឹងរយៈពេលដូចគ្នាក្នុងឆ្នាំ ២០២២។

យោងតាមគេហទំព័រ VASEP ដែលបានចុះផ្សាយនៅថ្ងៃទី១៥ ខែវិច្ឆិកាថា ក្នុងរយៈពេល ៩ខែ ការនាំចេញត្រីធូណាទៅកាន់ចក្រភពអង់គ្លេសបានកើនឡើង ៤៨% ធៀបនឹងរយៈពេលដូចគ្នាកាលពីឆ្នាំមុន ដែលឈានដល់ជាង ៥,៥ លានដុល្លារអាមេរិក។ ប៉ុន្តែទោះជាយ៉ាងណាក៏ដោយចាប់តាំងពីខែដើមកញ្ញាមកការនាំចេញបានធ្លាក់ចុះជាខ្លាំងរហូតដល់ ៣៦% បន្ទាប់ពីរយៈពេលនៃកំណើនដ៏ល្អ។

កន្លងទៅ ប្រទេសវៀតណាមបាននាំចេញសាច់ និងត្រីកំប៉ុងធូណាក្លាសេច្រើនជាងគេ ដែលមានចំនួន ៩៤% នៃការនាំចេញសរុប បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។ នៅក្នុងខែដំបូងនៃឆ្នាំ ២០២៣ នេះចក្រភពអង់គ្លេសមានអត្រាអតិផរណាខ្ពស់បំផុតក្នុងចំណោមប្រទេសសេដ្ឋកិច្ចសំខាន់ៗ។ អតិផរណាខ្ពស់បានប៉ះពាល់ដល់ការលក់អាហារសមុទ្រ រួមទាំងត្រីធូណា នៅក្នុងប្រទេសនេះ ដែលធ្វើឱ្យតម្រូវការផលិតផលត្រីធូណា និងអាហារសមុទ្របានធ្លាក់ចុះយ៉ាងខ្លាំង។

បច្ចុប្បន្ន ចក្រភពអង់គ្លេសគឺជាទីផ្សារមួយក្នុងចំណោមទីផ្សារនាំចូលត្រីធូណាធំជាងគេទាំង ១០ នៅលើពិភពលោក។ ដូច្នេះ ប្រទេសវៀតណាមក៏ជាអ្នកផ្គត់ផ្គង់ត្រីធូណាធំជាងគេទី ១៣ ក្នុងចំណោម ៤៥ នៅចក្រភពអង់គ្លេស ខណៈដែលប្រទេស Ecuador, Mauritius និង Seychelles កំពុងនាំមុខគេ។ យោងតាម VASEP ក៏បានព្យាករណ៍ដែរថាខែចុងក្រោយនៃឆ្នាំនេះអាចជាឱកាសសម្រាប់ប្រទេសអាស៊ី រួមទាំងវៀតណាមផងដែរក្នុងការនាំចេញទៅកាន់ទីផ្សារនេះ។គួរបញ្ជាក់ដែរថា កន្លងមកប្រទេសវៀតណាមមានគុណវិបត្តិក្នុងការតម្រូវឱ្យផលិតផលនេសាទរបស់អង់គ្លេសស្មើនឹង EU ខណៈដែលអាហារសមុទ្រវៀតណាមត្រូវទទួលការបញ្ជាទិញ “កាតលឿង” ដែលជាហេតុកាត់បន្ថយការប្រកួតប្រជែង៕