ប្រទេសប្រេស៊ីល ៖ នៅពាក់កណ្តាលខែវិច្ឆិកា ឆ្នាំ២០២៣ ប្រទេសប្រេស៊ីលបានចេញសេចក្តីប្រកាសអាសន្នអំពីអាកាសធាតុក្តៅខ្លាំងបំផុត និងស្ថិតក្នុងកម្រិតគ្រោះថ្នាក់នៅតំបន់ជាងពាក់កណ្តាលប្រទេស ក្រោយពីប្រេស៊ីលបានប្រឈមនឹងរលកកំដៅលើកទី៤ នៅឆ្នាំ២០២៣ ។ ការិយាល័យឧតុនិយមរាយការណ៍ថា សីតុណ្ហភាពក្នុងប្រទេសនេះបានកើនឡើងរហូតដល់៥៨.៥អង្សារសេ ។

ពលរដ្ឋប្រេស៊ីលបាននាំគ្នាទៅកាន់តំបន់ឆ្នេរសមុទ្រនៅទីក្រុង Rio de Janeiro កាលពីថ្ងៃទី១៤ ខែវិច្ឆិកា ឆ្នាំ២០២៣ ដើម្បីស្រូបយកបរិយាកាសនៅឆ្នេរសមុទ្រ និងកាត់បន្ថយកំដៅដោយសារអាកាសធាតុក្តៅខ្លាំង ។ នៅឆ្នាំ២០២៣ នេះ ប្រទេសប្រេស៊ីលបានប្រឈមមុខនឹងរលកកំដៅចំនួន៤លើកហើយ ។

ការិយាល័យឧតុនិយមប្រេស៊ីលបានប្រកាសទៅកាន់ពលរដ្ឋអំពីរលកកំដៅក្នុងកម្រិតគ្រោះថ្នាក់ខ្លាំង គិតចាប់តាំងពីថ្ងៃទី១៣ ខែវិច្ឆិកា ឆ្នាំ២០២៣ នៅតំបន់ជាងពាក់កណ្តាលប្រទេសរបស់ប្រេស៊ីល រួមទាំងទីក្រុង Rio de Janeiro ផងដែរ ។ ចំពោះមូលហេតុបណ្តាលឱ្យអាកាសធាតុនៅប្រេស៊ីលកាន់តែក្តៅខ្លាំងបែបនេះ ដោយសារមានបាតុភូតអេលនីណូ និងបញ្ហាឡើងកំដៅផែនដី ។

កាលពីថ្ងៃទី១៤ ខែវិច្ឆិកា ឆ្នាំ២០២៣ ប្រព័ន្ធផ្តល់ដំណឹងពីអាកាសធាតុនៅទីក្រុង Rio de Janeiro បញ្ជាក់ថា សីតុណ្ហភាពបានកើនឡើងរហូតដល់៥៨.៥អង្សារសេ ។ វាជាសីតុណ្ហភាពខ្ពស់បំផុតក្នុងរយៈពេល៩ឆ្នាំនៅប្រទេសនេះ បើគិតចាប់តាំងពីឆ្នាំ២០១៤ មក ។

ចំណែកប្រព័ន្ធផ្សព្វផ្សាយប្រេស៊ីលដាស់តឿនថា សីតុណ្ហភាពអាចកើនឡើង១៣អង្សារសេទៀត និងលើសសីតុណ្ហភាពជាមធ្យមក្នុងរដូវកាលនេះ ។ ការិយាល័យឧតុនិយមដាស់តឿនទៀតថា ប្រទេសប្រេស៊ីលត្រូវប្រឈមនឹងរលកកំដៅ រហូតដល់ថ្ងៃទី១៧ ខែវិច្ឆិកា ឆ្នាំ២០២៣ ៕ ប្រភព ៖ TNN World

ប្រទេសថៃ ៖ កាលពីថ្ងៃទី១៤ ខែវិច្ឆិកា ឆ្នាំ២០២៣ ប៉ូលិសអន្តោប្រវេសន៍ប្រចាំខេត្តសមុទ្រប្រាកាន បានសហការជាមួយមន្ត្រីសុខាភិបាលប្រចាំខេត្តសមុទ្រប្រាកាន ប្រទេសថៃ ដោយយកដីការបស់តុលាការមកឆែកឆេរលំនៅឋានមួយកន្លែងស្ថិតនៅស្រុកបាងសៅធុង ខេត្តសមុទ្រប្រាកាន ។ ការចុះត្រួតពិនិត្យលំនៅឋាននេះ ក្រោយពីប៉ូលិសស៊ើបអង្កេតឃើញថា វាជាកន្លែងលាក់ទុកផលិតផលគ្រឿងសម្អាង និងលក់ចែកចាយនៅប្រទេសថៃដោយខុសច្បាប់ ។

ប៉ូលិសលើកឡើងថា អ្នកលក់ផលិតផលគ្រឿងសម្អាងនេះ គឺជាស្ត្រីជនជាតិខ្មែរ មានអាយុ៣០ឆ្នាំ ។ ផលិតផលគ្រឿងសម្អាងមានដូចជា សាប៊ូដុំដុសខ្លួន, ឡេលាបស្បែក និងផលិតផលថែរក្សាស្បែក ចំនួនជាង៣.២០០ប្រភេទ ហើយប៉ូលិសបញ្ជាក់ថា ផលិតផលទាំងនេះមិនបានចុះឈ្មោះក្នុងបញ្ជីតាមច្បាប់ប្រទេសថៃទេ ។

ស្ត្រីជនជាតិខ្មែរទទួលស្គាល់ថា ខ្លួនបានកុម្ម៉ង់ទិញផលិតផលទាំងនេះមកពីប្រទេសកម្ពុជា និងថៃ បន្ទាប់មក នាងយកមកលក់តាមអនឡាញ ។ ចំណែកអតិថិជនភាគច្រើន គឺជាពលករខ្មែរ និងពលករមកពីប្រទេសជិតខាងថៃ ។ ចំណែកប្រាក់ចំណេញវិញ គឺនាងទទួលបានមិនក្រោម១៥.០០០បាតទេក្នុង១ខែ ហើយនាងបានប្រកបមុខរបរលក់ផលិតផលតាមអនឡាញ អស់រយៈពេលជាង៣ឆ្នាំហើយ ។

លោកវរសេនីយ៍ឯក Chinwut Tangwonglert នាយកការិយាល័យប៉ូលិសអន្តោប្រវេសន៍ប្រចាំខេត្តសមុទ្រប្រាកាន លើកឡើងថា តាមរយៈការត្រួតពិនិត្យឯកសាររកឃើញថា ស្ត្រីខ្មែរម្នាក់នេះបានលួចលក់ផលិតផលគ្រឿងសម្អាងនៅតាមបណ្តាញសង្គមផ្សេងៗ និងមានអ្នក Followers ចំនួនជាង៦ម៉ឺននាក់ ។ ហេតុនេះ លោកក៏បានស្នើសុំដីកាពីតុលាការដើម្បីធ្វើការស្រាវជ្រាវ និងចាប់ខ្លួនស្ត្រីខាងលើ ។

ជំហានដំបូង ប៉ូលិសបានចោទប្រកាន់ពីបទល្មើសទាក់ទងនឹងច្បាប់ការងារជនបរទេសនៅប្រទេសថៃ រួមទាំងច្បាប់ផលិតផលគ្រឿងសម្អាងផងដែរ ។ បន្ទាប់មក ប៉ូលិសក៏បានចាប់ខ្លួនស្ត្រីខ្មែរ ព្រមទាំងវត្ថុតាងបញ្ជូនទៅកាន់ការិយាល័យស៊ើបអង្កេតឱ្យចាត់វិធានការតាមច្បាប់បន្តទៀត ៕ ប្រភព ៖ Mono News

ប្រទេសថៃ ៖ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃបានលើកឡើងអំពីការត្រៀមផែនការទុក ប្រសិនបើគម្រោងខ្ចីប្រាក់ចំនួន៥សែនលានបាតរបស់គណបក្សភឿថៃ មិនទទួលបានការយល់ព្រមពីការិយាល័យក្រុមប្រឹក្សារដ្ឋ (Office of The Council of State) ទេនោះ ។ លោកនាយករដ្ឋមន្ត្រីថ្លែងថា មិនមែនមានតែគណបក្សភឿថៃនោះទេដែលបារម្ភ ប៉ុន្តែគ្រប់គ្នាបារម្ភថា តើគោលនយោបាយនេះនឹងទៅជាយ៉ាងណា? ជាពិសេស ពលរដ្ឋរស់នៅតាមខេត្ត និងបញ្ហាផលិតផលក្នុងស្រុកសរុប (GDP) មិនបានកើនឡើងយូរមកហើយ ។

លោក សេដ្ឋា ថាវីស៊ីន នាយករដ្ឋមន្ត្រីថៃបន្តថា លោកធ្លាប់បាននិយាយរួចហើយថា ប្រទេសថៃកំពុងមានវិបត្តិសេដ្ឋកិច្ច ហើយប្រទេសថៃចាំបាច់ត្រូវជំរុញសេដ្ឋកិច្ច ដោយគោលនយោបាយការផ្តល់ប្រាក់ចំនួន១ម៉ឺនបាតឱ្យពលរដ្ឋ តាមរយៈគម្រោង «Digital Wallet» ។ លោកមានទំនុកចិត្តថា វាជាគោលនយោបាយដ៏សំខាន់មួយសម្រាប់ជួយជំរុញសេដ្ឋកិច្ចថៃ ។

ចំណែកករណីលោក Chaithawat Tulathon មេដឹកនាំគណបក្សកាវក្លៃ មិនបានប្រឆាំងនឹងគោលនយោបាយផ្តល់ប្រាក់ឱ្យពលរដ្ឋម្នាក់១ម៉ឺនបាត ប៉ុន្តែមេដឹកនាំគណបក្សកាវក្លៃលើកឡើងថា ប្រសិនបើរដ្ឋាភិបាលដំណើរការគម្រោងនេះបន្តទៀត គួរតែរៀបចំផែនការទុក លោក សេដ្ឋា ថាវីស៊ីន បញ្ជាក់ថា លោកមិនចង់ប្រាប់ថា មានផែនការបម្រុងទុកអ្វីខ្លះទេ ប៉ុន្តែយើងបំពេញការងារដោយអនុវត្តតាមវិធានការជាច្រើន ដើម្បីជំរុញសេដ្ឋកិច្ចជាតិ ។

លោកនាយករដ្ឋមន្ត្រីបន្តថា បច្ចុប្បន្ន យើងផ្តោតលើការចែកប្រាក់ឱ្យពលរដ្ឋ តាមរយៈគម្រោង «Digital Wallet» ។ កន្លងមក រដ្ឋាភិបាលបានបង្ហាញពីគោលជំហរច្បាស់លាស់ដើម្បីជំរុញសេដ្ឋកិច្ច និងមានដំណាក់កាលច្បាស់លាស់ ព្រមទាំងរង់ចាំស្តាប់មតិយោបល់របស់ការិយាល័យក្រុមប្រឹក្សារដ្ឋ បន្ទាប់មក យើងនឹងស្នើសុំការអនុម័តពីរដ្ឋសភា ។

រីឯករណីដែលគណបក្សកាវក្លៃសង្ឃឹមថា ចង់ឱ្យរដ្ឋាភិបាលត្រួតពិនិត្យដោយមិនលម្អៀងនោះ លោកនាយករដ្ឋមន្ត្រីថៃលើកឡើងថា គ្មានការលម្អៀងទេ ហើយលោកសូមបញ្ជាក់ថា នឹងទទួលយកការផ្តល់មតិយោបល់ទាំងអស់ ហើយបើមានអ្វីកើតឡើង យើងនឹងអាចដោះស្រាយបាន ។ លោកជឿជាក់ថា គម្រោង «Digital Wallet» មានភាពច្បាស់លាស់ និងស្តាប់យោបល់ពីគ្រប់ភាគី ហើយក៏សូមអរគុណនូវបំណងល្អរបស់គណបក្សកាវក្លៃផងដែរ ៕ ប្រភព ៖ beartai BRIEF

បរទេស៖ Truth Social ដែលជាវេទិកាប្រព័ន្ធផ្សព្វផ្សាយសង្គមដ៏ទំនើបមួយដែលបង្កើតឡើងដោយអតីតប្រធានាធិបតីសហរដ្ឋអាមេរិក Donald Trump បានខាតបង់ប្រាក់ចំនួន ៧៣ លានដុល្លារ ចាប់តាំងពីដាក់ឱ្យប្រើប្រាស់នៅក្នុងឆ្នាំ ២០២២ មកម្លេះ។

យោងតាមគេហទំព័រ CNBC News ដែលបានចុះផ្សាយកាលពីថ្ងៃទី១៤ ខែវិច្ឆិកាថា Truth Social ដែលបង្កើតឡើងដោយក្រុមហ៊ុនប្រព័ន្ធផ្សព្វផ្សាយ និងបច្ចេកវិទ្យារបស់អាមេរិក Trump Media & Technology Group បានខាតបង់ប្រាក់ចំនួន ៧៣ លានដុល្លារ គិតចាប់ពីឆ្នាំ២០២២ រហូតមកដល់បច្ចុប្បន្ន។

នៅខែកុម្ភៈ ឆ្នាំ២០២២ បណ្តាញសង្គម Truth Social បានខាតបង់ ៧៣ លានដុល្លារឯណោះ ដោយសារមិនសូវមានអ្នកប្រើប្រាស់បណ្តាញសង្គមនេះ។ នៅថ្ងៃទី១៣ ខែវិច្ឆិកា ត្រឹមដំណាច់ឆ្នាំ ២០២២ ក្រុមហ៊ុន TMTG របស់ Donald Trump ក៏បានខាតបង់លើសពី ៥០ លានដុល្លារផងដែរ ហើយនៅពាក់កណ្តាលដំបូងនៃឆ្នាំ ២០២៣ ក្រុមហ៊ុនមួយនេះ ក៏បានបាត់បង់ ២៣ លានដុល្លារបន្ថែមទៀត ដោយ TMTG បាននិយាយថា ក្រុមហ៊ុនរបស់ខ្លួនអាចនឹងប្រឈមជាមួយការបិទ។

ទោះជាយ៉ាងណាក៏ដោយ ក្រុមហ៊ុនធំៗមួយចំនួនរបស់សហរដ្ឋអាមេរិក មានបំណងចង់បញ្ចូលក្រុមហ៊ុនរបស់លោកត្រាំជាមួយក្រុមហ៊ុនខ្លួន ដើម្បីអាចរ៉ាប់រងចំពោះបំណុល និងបន្តប្រតិបត្តិការ។ ទន្ទឹមនេះ ក្រុមហ៊ុន Digital World Acquisition Corporation ក៏បានដាក់សំណើទៅគណៈកម្មការមូលបត្រអាមេរិក (SEC) ដើម្បីច្របាច់បញ្ចូលក្រុមហ៊ុនរបស់លោកត្រាំ ជាមួយខ្លួនផងដែរ។

គួរបញ្ជាក់ដែលថា បច្ចុប្បន្នអតីតប្រធានាធិបតីសហរដ្ឋអាមេរិក Donald Trump កំពុងប្រឈមមុខនឹងការស៊ើបអង្កេតឧក្រិដ្ឋកម្មមួយចំនួនដូចជា គម្រោងកែប្រែលទ្ធផលបោះឆ្នោតឆ្នាំ២០២០, ការបង់ប្រាក់ឱ្យតារាអាសអាភាស និងការប្រើប្រាស់ឯកសារសម្ងាត់របស់រដ្ឋាភិបាលមិនត្រឹមត្រូវជាដើម ខណៈពេលដែលលោកកំពុងដឹកនាំការបោះឆ្នោតក្នុងចំណោមបេក្ខជនប្រធានាធិបតីនៃគណបក្សសាធារណរដ្ឋឆ្នាំ ២០២៤៕

សារព័ត៌មានបរទេសរាយការណ៍ថា មាននារីបម្រើការនៅលើយន្តហោះម្នាក់បានចែករំលែកបទពិសោធន៍របស់នាងនៅក្នុងបណ្តាញសង្គម ព្រមទាំងផ្តាំផ្ញើថា ពេលចូលសម្រាកក្នុងសណ្ឋាគារ យើងមិនគួរមើលរំលងក្រោមគ្រែទេ ។ គួរតែពិនិត្យមើលនៅក្រោមគ្រែសម្រាកដើម្បីសុវត្ថិភាព និងចៀសវាងហេតុការណ៍មិនល្អនឹកស្មានពុំដល់ ។

នារីរូបនេះបានបង្ហោះសារក្នុងបណ្តាញសង្គមថា នាងជាបុគ្គលិកបម្រើការនៅលើយន្តហោះរបស់ក្រុមហ៊ុនអាកាសចរណ៍ European Airlines ហើយនាងមានបទពិសោធន៍ចូលសម្រាកក្នុងសណ្ឋាគារជាច្រើនកន្លែងនៅទូទាំងពិភពលោក ។ នាងបានសង្កត់ធ្ងន់លើសុវត្ថិភាពផ្ទាល់ខ្លួនថា នៅពេលអ្នករាល់គ្នាចូលសម្រាកក្នុងសណ្ឋាគារ រឿងដំបូងដែលត្រូវធ្វើមុនគេនោះ គឺការបោះដបទឹកចូលទៅក្រោមគ្រែ ដើម្បីឱ្យប្រាកដចិត្តថា តើបន្ទប់នេះមានសុវត្ថិភាពសម្រាប់ស្នាក់នៅដែរឬទេ?

នាងពន្យល់ថា ការបោះដបទឹកចូលទៅក្រោមគ្រែ គឺជាវិធីមួយដើម្បីឱ្យយើងអាចដឹងយ៉ាងងាយថា តើមានអ្នកណាម្នាក់សម្ងំលាក់ខ្លួននៅក្រោមគ្រែដែរឬអត់? ព្រោះនៅពេលបោះដបទឹកចូលក្រោមគ្រែ បើគ្មានអ្វីនៅក្រោមនោះទេ ដបទឹករបស់យើងនឹងរមៀលទៅជ្រុងម្ខាងទៀត ។ ប៉ុន្តែបើវាមិនរមៀលមកជ្រុងម្ខាងទៀតទេ មានន័យថា មានអ្នកណាម្នាក់សម្ងំនៅក្រោមគ្រែ ហើយចាប់ដបទឹករបស់យើងទុក ពេលនោះ គឺយើងកំពុងស្ថិតក្នុងស្ថានការណ៍អាក្រក់បំផុត ។ ដូច្នេះ នាងសូមណែនាំឱ្យអ្នករាល់គ្នាប្រញាប់ចេញពីបន្ទប់ និងទូរស័ព្ទទាក់ទងទៅខាងសន្តិសុខសណ្ឋាគារភ្លាមៗ ។

ក្រៅពីនេះ ពេលយើងបោះដបទឹកចូលក្រោមគ្រែនឹងធ្វើឱ្យយើងដឹងថា តើបន្ទប់ក្នុងសណ្ឋាគារស្អាតមានអនាម័យដែរឬអត់ ព្រោះបើគេមិនបានសម្អាតបន្ទប់គ្រប់កន្លែងទេ នៅក្រោមគ្រែនឹងសម្បូរធូលី និងភាពកខ្វក់ ។ លើសពីនេះ នៅក្រោមគ្រែអាចជាកន្លែងរស់នៅរបស់សត្វផ្សេងៗ ដូចជា ស្រមោច, កន្លាត និងសង្កើចផងដែរ ដែលធ្វើឱ្យអ្នកចូលសម្រាកឆ្លងមេរោគបាន ។

ចុងក្រោយ នារីបម្រើការលើយន្តហោះនិយាយថា នៅក្រោមគ្រែក្នុងបន្ទប់សណ្ឋាគារ ក៏អាចជាកន្លែងដែលអ្នកណាម្នាក់លាក់ទុករបស់របរខុសច្បាប់ ។ ដូច្នេះ ការពិនិត្យមើលនៅក្រោមគ្រែពេលយើងចូលសម្រាកក្នុងបន្ទប់សណ្ឋាគារ គឺជាវិធីដំបូងជួយឱ្យយើងអាចការពារខ្លួនបានយ៉ាងមានប្រសិទ្ធភាព ៕ ប្រភព ៖ khaosod