ប្រទេសថៃ ៖ កាលពីថ្ងៃទី១៨ ខែវិច្ឆិកា ឆ្នាំ២០២៣ ទំព័រហ្វេសប៊ុកឈ្មោះ Social Rayong របស់ថៃ បានបង្ហោះរូបភាពភ្លើងឆេះរូបចម្លាក់យក្សដ៏ធំមួយស្ថិតនៅបរិវេណឆ្នេរសមុទ្រស៊ែងចាន់ ឬពលរដ្ឋថៃហៅថា ផ្លូវបំបែកនាងយក្ស ដែលស្ថិតនៅឃុំនឺនព្រះ ស្រុកមឿង ខេត្តរ៉ាក់យ៉ង ។ ទំព័រហ្វេសប៊ុកនេះបន្ថែមថា ពលរដ្ឋនៅកន្លែងកើតហេតុបានជួយគ្នាពន្លត់ភ្លើងហើយ ដោយសារមានមនុស្សសតិមិនល្អមកដុតបំផ្លាញ ។

ក្រោយពីប៉ូលិសប្រចាំស្រុកមឿង ខេត្តរ៉ាក់យ៉ង បានទទួលសេចក្តីរាយការណ៍ពីហេតុការណ៍ភ្លើងឆេះរូបចម្លាក់យក្សត្រង់បរិវេណផ្លូវបំបែកជា៣ នៅឆ្នេរសមុទ្រស៊ែងចាន់ ប៉ូលិសក៏បានចុះត្រួតពិនិត្យនៅកន្លែងកើតហេតុ និងឃើញភ្លើងកំពុងឆាបឆេះរូបចម្លាក់យក្សដែលមានកម្ពស់ប្រមាណ៣ម៉ែត្រ ហើយភ្លើងបានឆេះឈុតថៃរបស់រូបចម្លាក់យក្សខ្ទេចអស់ ។ ក្រោយមក អ្នកស្រុក និងអាជីវករលក់ដូរក្នុងបរិវេណនេះបាននាំគ្នាជួយពន្លត់ភ្លើង ដោយចំណាយពេលប្រមាណ១០នាទី ទើបភ្លើងរលត់វិញ ។

តាមរយៈការត្រួតពិនិត្យឃើញថា រូបចម្លាក់យក្ខនីនេះត្រូវបានភ្លើងឆេះឈុតថៃរលូតដល់អស់ពីខ្លួន ហើយនៅ

លើខ្លួនប្រាណយក្សបានខូចខាតជាច្រើនកន្លែង ។ ក្រៅពីនេះ រូបចម្លាក់ផ្សេងទៀតដែលនៅក្បែរៗនោះ ក៏ត្រូវបានភ្លើងឆេះរហូតដល់ខ្មៅផងដែរ ។

អ្នកស្រុក និងអាជីវករលក់ដូរនៅបរិវេណឆ្នេរសមុទ្រនិយាយថា មុនពេលកើតហេតុ ពួកគេបានឃើញបុរសមានសតិមិនល្អម្នាក់ដើរទៅដើរមកនៅក្បែររូបចម្លាក់នោះ ។ ក្រោយមក ស្រាប់តែមានផ្សែងចេញមកយ៉ាងឆាប់រហ័ស ទើបពួកគេស្រែកហៅអ្នកនៅជិតៗឱ្យមកជួយពន្លត់ភ្លើង ។ រីឯបុរសមានសតិមិនល្អបានរត់គេចខ្លួនបាត់ ។ សំណាងល្អ រូបចម្លាក់នេះមិនខូចខាតអ្វីធ្ងន់ធ្ងរទេ ហើយពួកគេក៏បានជួយគ្នាសម្អាតរូបចម្លាក់ និងយកក្រណាត់ថ្មីមកស្លៀកពាក់ឱ្យយក្ស ។

ប៉ុន្តែអ្នកភូមិបារម្ភថា វាអាចជាប្រផ្នូលមិនល្អ និងខ្លាចមានរឿងអាក្រក់កើតឡើង ពីព្រោះអ្នកស្រុកមានជំនឿ និងគោរពរូបចម្លាក់នេះណាស់ ។ អ្នកស្រុកតែងមកក្រាបសំពះសុំពរជាប្រចាំ ជាពិសេស ពួកគេមកសុំលេខឆ្នោតមិនដែលខានទេ ។

ប៉ូលិសបានស្វែងរកចាប់ខ្លួនបុរសមានសតិមិនល្អ និងព្យាយាមសាកសួររកព័ត៌មានពីការដុតរូបចម្លាក់ ។ ប៉ុន្តែបុរសនេះនិយាយស្តីមិនដឹងរឿង ដឹងត្រឹមតែថា រូបគេឈ្មោះ «មីង» រស់នៅខេត្តសាគុន ណាខន ។ នៅពេលប៉ូលិសសួរថា តើបានដុតរូបចម្លាក់យក្សនេះឬអត់? បុរសនេះឆ្លើយថា មិនដឹងទេ ហើយនិយាយថា ខ្លួននឹងទៅរកមិត្តភក្តិ ។ ហេតុនេះ ប៉ូលិសក៏បាននាំគាត់ចេញពីទីនេះ និងទាក់ទងទៅកាន់ស្ថាប័នពាក់ព័ន្ធដើម្បីយកគាត់ទៅព្យាបាលបន្ត ៕ ប្រភព ៖ sanook

ប្រទេសកម្ពុជាបានជាប់ចំណាត់ថ្នាក់ទី ៩៨ ក្នុងចំណោមប្រទេសចំនួន ១១៣ សម្រាប់ជំនាញភាសាអង់គ្លេសរបស់មនុស្សពេញវ័យទូទាំងពិភពលោក ខណៈប្រទេសថៃជាប់លេខ ១០១ ផ្នែកភាសាអង់គ្លេស។
យោងតាមគេហទំព័រ EF Education First នៅថ្ងៃទី១៨ ខែវិច្ឆិកា ដែលបានប្រកាសចំណាត់ថ្នាក់សន្ទស្សន៍ជំនាញភាសាអង់គ្លេសរបស់ EF EPI នៅក្នុងប្រទេស និងដែនដីចំនួន ១១៣។ ក្នុងនោះ ១២ ប្រទេសមានកម្រិតជំនាញភាសាអង់គ្លេសខ្ពស់ខ្លាំង (៦០០-៨០០ពិន្ទុ) រីឯ ១៨ ប្រទេសទៀតមានកម្រិតជំនាញខ្ពស់ (៥៥០-៥៩៩ពិន្ទុ) ចំណែកឯ ៣៣ ប្រទេសមានកម្រិតជំនាញមធ្យម (៥០០-៥៤៩ពិន្ទុ) រួមទាំង ២៧ ប្រទេសទៀតមានកម្រិតជំនាញទាប (៤៥០-៤៩៩ ពិន្ទុ) និង ២២ ប្រទេសទៀតមានកម្រិតអង់គ្លេសទាបណាស់ (ក្រោម ៤៥០ ពិន្ទុ)។

ដូច្នេះ ប្រទេសកម្ពុជាទទួលបាន ៤២១ ពិន្ទុលើពិភពលោកក្នុងឆ្នាំនេះ ដោយស្ថិតនៅក្នុងកម្រិតភាសាអង់គ្លេសទាបណាស់។ ខណៈសិង្ហបុរីបន្តនាំមុខគេ ហើយជាប់ចំណាត់ថ្នាក់លេខ ២ ជុំវិញពិភពលោកដោយមាន ៦៣១ ពិន្ទុ និងហ្វីលីពីន ម៉ាឡេស៊ីស្ថិតក្នុងកម្រិតខ្ពស់។ វៀតណាមស្ថិតក្នុងកម្រិតមធ្យម និងថៃស្ថិតនៅក្នុងកម្រិតភាសាអង់គ្លេសទាបណាស់ជាមួយពិន្ទុត្រឹមតែ ៤១៦។យោងតាមការវាយតម្លៃរបស់ EF បានឱ្យដឹងថា បច្ចុប្បន្នសមត្ថភាពប្រើប្រាស់ភាសាអង់គ្លេសក្នុងចំណោមមនុស្សពេញវ័យនៅអាស៊ីខាងត្បូង និងអាស៊ីអាគ្នេយ៍ ក៏ដូចជាអាស៊ីបូព៌ាបានថយចុះបន្តិច ដោយសារតែចម្ងាយនយោបាយ ការផ្លាស់ប្តូរប្រជាសាស្រ្ត និងសំណួរអំពីឥទ្ធិពលនៃវប្បធម៌លោកខាងលិចមកលើការអប់រំ។

នៅលើមាត្រដ្ឋានពិភពលោក ប្រទេសហូឡង់រក្សាបានចំណាត់ថ្នាក់លេខ ១ ក្នុងជំនាញភាសាអង់គ្លេសដោយមាន ៦៤៧ ពិន្ទុ។ ដូច្នេះ អឺរ៉ុបនៅតែជាទ្វីបដែលប្រើប្រាស់ភាសាអង់គ្លេសបានល្អបំផុតនៅលើពិភពលោក។ បន្ថែមពីលើចំណាត់ថ្នាក់ EF ក៏បានវាយតម្លៃថាក្នុងរយៈពេលមួយទសវត្សរ៍កន្លងមកនេះ នៅទូទាំងពិភពលោក សមត្ថភាពភាសាអង់គ្លេសរបស់បុរសមានភាពប្រសើរឡើង ខណៈដែលស្ត្រីមានការថយចុះបន្តិច។

ក្នុងចំណាត់ថ្នាក់ទាំងអស់នេះ គឺផ្អែកលើលទ្ធផលតេស្តភាសាអង់គ្លេសស្តង់ដារ EF SET របស់មនុស្សពេញវ័យ ២.២ លាននាក់ក្នុងឆ្នាំ ២០២២។ នេះគឺជាការសាកល្បងភាសាអង់គ្លេសតាមអ៊ីនធឺណិតនៃជំនាញអាន និងស្តាប់ ដែលមានលក្ខណៈស្តង់ដារ និងរចនាឡើងដើម្បីចាត់ថ្នាក់សមត្ថភាពភាសា។ បេក្ខជនត្រូវបានគេវាយតម្លៃនៅកម្រិតជំនាញមួយក្នុងចំណោមកម្រិតជំនាញទាំងប្រាំមួយដោយផ្អែកលើក្របខ័ណ្ឌយោងទូទៅរបស់អឺរ៉ុប (CEFR)។
គួរបញ្ជាក់ដែរថា EF Education First គឺជាអង្គការសិក្សាដ៏ធំបំផុតមួយរបស់ពិភពលោក ដែលមានឯកទេសក្នុងការផ្តល់នូវការសិក្សានៅបរទេស ការរៀនភាសា និងកម្មវិធីផ្លាស់ប្តូរវប្បធម៌៕

សហរដ្ឋអាមេរិក ៖ សារព័ត៌មានបរទេសបានរាយការណ៍កាលពីថ្ងៃទី១៩ ខែវិច្ឆិកា ឆ្នាំ២០២៣ ថា គម្រោងអប់រំនៅក្នុងពន្ធនាគាររបស់សាកលវិទ្យាល័យ Northwestern បានរៀបចំពិធីបញ្ចប់ការសិក្សាថ្នាក់បរិញ្ញាបត្រសម្រាប់និស្សិត ដែលកំពុងជាប់ឃុំឃាំ.ងនៅក្នុងពន្ធនាគារ ។ គេចាត់ទុកថា នេះគឺជាសាកលវិទ្យាល័យកម្រិត Top 10 ដំបូងគេរបស់សហរដ្ឋអាមេរិក ដែលបានប្រគល់សញ្ញាបត្រដល់អ្នកទោស កាលពីថ្ងៃទី១៥ ខែវិច្ឆិកា កន្លងមក ។

បណ្តាអ្នកទោសបានបញ្ចប់ការសិក្សាទាំងនេះ បានសម្តែងការរីករាយជាមួយសំឡេងទះដៃ នៅពេលមិត្តភក្តិរបស់ពួកគេឡើងទៅលើវេទិកាដើម្បីទទួលសញ្ញាបត្រ ។ នេះចាត់ទុកថា ពួកគេជាក្រុមអ្នកទោសដំបូងគេ ដែលបានបញ្ចប់ថ្នាក់បរិញ្ញាបត្រពីគម្រោងអប់រំនៅក្នុងពន្ធនាគាររបស់សាកលវិទ្យាល័យ Northwestern ស្ថិតនៅទីក្រុង Crest Hill រដ្ឋអ៊ីលីណយ ។

លោកស្រី Juliana Stratton អភិបាលរងរដ្ឋអ៊ីលីណយ លើកឡើងថា ការបញ្ចប់ការសិក្សារបស់និស្សិតលើកនេះចាត់ទុកថា គឺជាការបោះជំហានទៅមុខដ៏សំខាន់នាថ្ងៃអនាគត សម្រាប់ការអប់រំកម្រិតខ្ពស់ក្នុងប្រព័ន្ធច្បាប់ព្រហ្មទណ្ឌ ហើយត្រូវធ្វើឱ្យបានច្រើនជាងនេះផងដែរ ។ ពលរដ្ឋអាមេរិកគ្រប់រូប មិនថាពួកគេជាប់ពន្ធនាគារ ឬរស់នៅទីកន្លែងណាមួយទេ គឺពួកគេមានសិទ្ធិទទួលបានការសិក្សា ហើយប្រទេសជាតិត្រូវតែគិតគូរពីអនាគតរបស់ពួកគេ ។

លោកស្រី Juliana Stratton អភិបាលរងរដ្ឋអ៊ីលីណយថ្លែងថា ៖ «គម្រោងអប់រំនៅក្នុងពន្ធនាគាររបស់សាកលវិទ្យាល័យ Northwestern បានបង្ហាញថា អំណាចរបស់ការសិក្សាអាចផ្លាស់ប្តូរជីវិតរបស់មនុស្សម្នាក់ៗបាន ។ ពួកគេនឹងដឹងថា តើការសិក្សាបានផ្តល់ក្តីសង្ឃឹមសម្រាប់ថ្ងៃអនាគតដ៏ល្អប្រសើរទាំងនៅក្នុងពន្ធនាគារ និងក្រៅពន្ធនាគារសម្រាប់ពួកគេដូចម្តេចខ្លះ» ៕ ប្រភព ៖ TNN World

ប្រទេសថៃ ៖ កាលពីថ្ងៃទី១៨ ខែវិច្ឆិកា ឆ្នាំ២០២៣ សារព័ត៌មានថៃរាយការណ៍ថា វាបានធ្វើឱ្យអ្នកលេងបណ្តាញសង្គមនៅប្រទេសថៃរិះគន់គ្រប់ៗគ្នា ក្រោយពីហាងលក់នំមួយកន្លែងនៅប្រទេសថៃ (ដែលគេមិនស្គាល់ទីតាំងពិតប្រាកដ) បានធ្វើនំ Cookie ជារូបរាងព្រះពុទ្ធ ដោយដាក់ស្នូលម្នាស់នៅផ្នែកខាងក្នុង មានពណ៌ត្នោត ហើយមើលទៅ ដូចព្រះពុទ្ធបេះបិទ ។ អ្នកលេងបណ្តាញសង្គមថៃសួរថា តើវាសមរម្យដែរឬទេ ដែលហាងនេះយករូបព្រះពុទ្ធមកលេងសើចដូច្នេះ?

នំ Cookie ដាក់ស្នូលម្នាស់នៅផ្នែកខាងក្នុង និងធ្វើឱ្យមនុស្សជាច្រើននាក់ជជែកគ្នាក្នុងបណ្តាញសង្គមនោះ ដោយសារនំនេះមានរូបរាងមិនដូចនំផ្សេងទៀត ។ ហាងបានធ្វើវាឡើងមកឱ្យមានលក្ខណៈដូចគ្នានឹងរូបព្រះពុទ្ធ រហូតធ្វើឱ្យពលរដ្ឋថៃជជែកគ្នាក្នុងបណ្តាញសង្គមពីភាពមិនសមរម្យ ។ ចុងក្រោយ ពលរដ្ឋថៃបានសំណូមពរឱ្យការិយាល័យព្រះពុទ្ធសាសនា និងស្ថាប័នពាក់ព័ន្ធត្រួតពិនិត្យករណីនេះ ។

ព្រះសង្ឃព្រះនាម Phayom Kanlayano ជាព្រះចៅអធិការវត្តសួនកែវ ស្ថិតនៅឃុំបាងសែន ស្រុកបាងញ៉ៃ ខេត្តនុនថៈបុរី ប្រទេសថៃ បានបញ្ចេញមតិចំពោះរឿងនេះថា បើអ្នកមិនបានមើលងាយព្រះពុទ្ធសាសនានោះល្អហើយ ប៉ុន្តែបើធ្វើហើយ ធ្វើឱ្យពុទ្ធសាសនាធ្លាក់ចុះ វាមិនល្អទេ ។

ព្រះចៅអធិការវត្តមានសង្ឃដីកាថា ៖ «អ្នកគួរតែនឹកឃើញដល់ព្រះពុទ្ធរូបផង ទោះជាអ្វីក៏ដោយ ។ ចូរកុំធ្វើអ្វីឱ្យថោកទាបទៅបានហើយ ដូចជា ការធ្វើម្ហូបអាហារ និងនំចំណី ព្រោះនឹងធ្វើឱ្យគេរិះគន់ ។ ម្ហូបអាហារ ឬនំចំណី អ្នកអាចធ្វើជារូបភាពផ្សេងៗមានច្រើនណាស់ ហើយការធ្វើនំរូបព្រះពុទ្ធ គឺដូចគ្នានឹងព័ត៌មានមុននេះបានចុះផ្សាយអីចឹង ដែលមានអ្នកផលិតថ្នាំឆ្កួត ហើយដាក់រូបព្រះកេសព្រះពុទ្ធ» ។

ព្រះចៅអធិការវត្តណែនាំថា ហាងលក់នំគួរតែផ្លាស់ប្តូរធ្វើជារូបភាពផ្សេងវិញ វាសមរម្យជាងនេះ ។ ការធ្វើនំជារូបរាងព្រះពុទ្ធ អាចប៉ះពាល់ដល់ផ្លូវចិត្តអ្នកគោរពព្រះពុទ្ធសាសនានៅប្រទេសថៃ ហើយបើអាចចៀសវាងបាន គួរតែចៀសវាងទៅ ។

ក្រោយពីព័ត៌មាននេះបានល្បីល្បាញក្នុងបណ្តាញសង្គម ធ្វើឱ្យពលរដ្ឋថៃជាច្រើននាក់សម្តែងការមិនពេញចិត្ត ក្នុងនោះពលរដ្ឋថៃម្នាក់និយាយថា ៖ «វាមិនសមរម្យយ៉ាងខ្លាំង ហើយរូបភាពផ្សេងៗមានច្រើនណាស់ ម៉េចមិនធ្វើ» ។ ពលរដ្ឋថៃម្នាក់ទៀតថា ៖ «មិនគួរធ្វើនំ និងយករូបព្រះពុទ្ធដែលជាទីគោរពដ៏ខ្ពង់ខ្ពស់មកដាក់បែបនេះទេ» ។ ពលរដ្ឋថៃម្នាក់ទៀតថា ៖ «ការធ្វើបែបនេះ ជ្រុលហួសហេតុពេកហើយ» ។

ពលរដ្ឋថៃម្នាក់ទៀតថា ៖ «មិនគួរធ្វើសោះឡើយ បើយើងឱ្យគេធ្វើនំដោយដាក់មុខឪពុក-ម្តាយរបស់យើងវិញ ហើយឱ្យអ្នកផ្សេងបរិភោគនោះ តើយើងហ៊ានធ្វើអីចឹងទេ? ព្រះពុទ្ធប្រៀបបីដូចជាឪពុករបស់យើងដែរ មិនគួរណាធ្វើទេ» ៕ ប្រភព ៖ pptv hd

របាយការណ៍ផ្តាច់មុខដោយប្រព័ន្ធផ្សព្វផ្សាយ Munhwa Ilbo នៅថ្ងៃទី២០ ខែវិច្ឆិកាបានបង្ហាញថា BLACKPINK បានយល់ព្រមបន្តសកម្មភាពរបស់ពួកគេជាក្រុម ដោយកិច្ចសន្យាផ្តាច់មុខបុគ្គលរវាងសមាជិកម្នាក់ៗ និង YG Entertainment នៅតែមិនទាន់ដោះស្រាយនៅឡើយ។ ខណៈពេលដែលរក្សាសកម្មភាពក្រុមរបស់ពួកគេ សមាជិកគ្រោងនឹងបន្តគម្រោងនីមួយៗ ដោយមករួមគ្នាសម្រាប់តែ BLACKPINK ប៉ុណ្ណោះ។ របាយការណ៍បញ្ជាក់ទៀតថា សមាជិកពីរនាក់បានបញ្ចប់កិច្ចសន្យាជាមួយនឹង YG រួចហើយប៉ុន្តែស្ថានភាពទាក់ទងនឹងកិច្ចសន្យាបុគ្គលនៅតែមិនច្បាស់លាស់ ដោយ Lisa ទំនងជាដើរតាមផ្លូវឯករាជ្យ។

សមាជិកនៃក្រុម K-pop ដែលទទួលបានការគាំទ្រទូទាំងពិភពលោក BLACKPINK ថ្មីៗនេះបានយល់ព្រមជាមួយ YG Entertainment (YG) ដើម្បីបន្តសកម្មភាពក្រុមរបស់ពួកគេ។ ក្នុងចំណោមសមាជិកទាំងពីរនាក់បានបញ្ចប់កិច្ចសន្យាជាមួយ YG រួចហើយ ដោយបញ្ជាក់ពីការប្ដេជ្ញាចិត្តរបស់ពួកគេក្នុងការបន្តការខិតខំរបស់ BLACKPINK ។ YG បានបញ្ជាក់ពីគម្រោងធ្វើកិច្ចព្រមព្រៀងជាផ្លូវការជាមួយនឹងសមាជិកដែលនៅសេសសល់នៅពេលដែលកុងត្រារបស់ពួកគេត្រូវបានចុះហត្ថលេខា។

នៅក្នុងរបាយការណ៍ប្រចាំត្រីមាសរបស់ខ្លួនដែលបានចេញផ្សាយនៅថ្ងៃទី១៤ វិច្ឆិកា ក្រុមហ៊ុន YG បាននិយាយថា «ការចរចារសម្រាប់ការបន្តកិច្ចសន្យាផ្តាច់មុខជាមួយសិល្បករ (Blackpink) បច្ចុប្បន្នកំពុងដំណើរការ។ លទ្ធផលចុងក្រោយនឹងត្រូវបង្ហាញនៅពេលក្រោយតាមរយៈការប្រកាសដ៏សំខាន់មួយទាក់ទងនឹងបញ្ហាគ្រប់គ្រងដែលទាក់ទងនឹងការវិនិយោគ»។

ទោះជាយ៉ាងណាក៏ដោយ ស្ថានភាពនៃកិច្ចសន្យាផ្តាច់មុខរវាងសមាជិកទាំងបួន និង YG នៅតែមិនច្បាស់លាស់។ មកដល់ពេលនេះ គ្មានសមាជិកណាបន្តកុងត្រាជាមួយ YG ទេ។ Lisa ធ្លាប់បានសម្រេចចិត្តបន្តផ្លូវឯករាជ្យ ដូចដែលបានរាយការណ៍ដោយ Munhwa Ilbo កាលពីថ្ងៃទី១២ ខែកក្កដា នៅក្នុងអត្ថបទមួយដែលមានចំណងជើងថា ការបន្តកិច្ចសន្យា YG របស់ Lisa មិនច្បាស់លាស់’ហើយសមាជិកផ្សេងទៀតក៏កំពុងស្វែងរកលក្ខខណ្ឌជាមួយក្រុមហ៊ុនផ្សេងៗផងដែរ។ យ៉ាងណាក៏ដោយ សមាជិកមួយចំនួននៅតែពិចារណាលើកិច្ចសន្យាសកម្មភាពបុគ្គលជាមួយ YG។

គួរបញ្ជាក់ថា BLACKPINK បានបញ្ចប់ការប្រគំតន្ត្រីទេសចរណ៍ពិភពលោករបស់ពួកគេកាលពីខែកញ្ញា ដែលបានទាក់ទាញអ្នកចូលទស្សនាផ្ទាល់ចំនួន ១.៨លាននាក់ និងទទួលបានប្រាក់ចំណូលជិត ៣០០ ពាន់លានវ៉ុន ប្រមាណ ២៣៥ លានដុល្លារអាម៉េរិក) ។ ដូច្នេះហើយ ទោះបីជាកិច្ចសន្យាផ្តាច់មុខបុគ្គលមិនត្រូវបានបញ្ចប់ក៏ដោយ ក៏ YG និងសមាជិកម្នាក់ៗត្រូវបានគេរំពឹងខ្ពស់លើប្រាក់ចំណូលចំពោះការបញ្ចេញសកម្មភាពទោលដូចគ្នា៕

ប្រជាជនឥណ្ឌាជឿថាការអនុញ្ញាតឱ្យគោជាន់លើមនុស្សក្នុងពិធីបុណ្យភ្លើង Diwali នឹងនាំមកនូវសំណាងល្អពេញមួយឆ្នាំ។

ប្រពៃណីនេះបានកើតឡើងនៅក្នុងភូមិ Bhidavad រដ្ឋ Madhya Pradesh ដែលប្រព្រឹត្តទៅនៅថ្ងៃទី ១២ ខែវិច្ឆិកា ត្រូវបានចាត់ទុកថាប្លែក និងចម្លែកដោយមានអ្នកទេសចរជាច្រើនជុំវិញពិភពលោកចូលរួមទស្សនាផងដែរ។ នៅក្នុងពិធីបុណ្យនោះ តម្រូវឱ្យមនុស្សដេកនឹងដីរួចឱ្យគោរាប់សិបក្បាលជាន់លើមនុស្ស ដោយគេជឿថាព្រះចំនួន ៣៣០ លានរស់នៅក្នុងសត្វគោ ដូច្នេះអ្នកដែលសត្វគោនោះជាន់នឹងទទួលបានពរជ័យពីព្រះ។ មនុស្សជាច្រើនមានការព្រួយបារម្ភអំពីការខ្វះសុវត្ថិភាពនៅពេលដែលសត្វគោដើរជាន់លើមនុស្ស។ ទោះជាយ៉ាងក៏ដោយ រហូតមកទល់នឹងពេលនេះ ពុំមានអ្នកណាម្នាក់រងរបួសធ្ងន់ធ្ងរនោះទេ នេះបើយោងតាមប្រជាពលរដ្ឋមូលដ្ឋានរបស់ប្រទេសឥណ្ឌា។

មួយវិញទៀត អ្នកដែលចូលរួមក្នុងទំនៀមទំលាប់នេះ ត្រូវតែគោរពពិធីដ៏តឹងរ៉ឹង គឺការតមអាហាររយៈពេលប្រាំថ្ងៃ ហើយមួយថ្ងៃមុនពិធីបុណ្យនេះត្រូវតែស្នាក់នៅប្រាសាទភូមិពេញមួយយប់។ នៅថ្ងៃបន្ទាប់ពីពិធីបូជាព្រះហើយ ប្រជាជននឹងវាយស្គរ រួចដើរតាមផ្លូវដើម្បីបង្កើតបរិយាកាសរស់រវើកពេញភូមិ។ ក្នុងអំឡុងពេលនោះសត្វគោនៅក្នុងភូមិនឹងត្រូវបានប្រមូលផ្តុំទុកមួយកន្លែងជាការបញ្ចប់កម្មពិធីបុណ្យ។

Diwali នៅក្នុងប្រទេសឥណ្ឌា គឺជាថ្ងៃបុណ្យជាតិ ដែលត្រូវបានគេស្គាល់ថាជាពិធីបុណ្យនៃពន្លឺ ដោយសារតែមនុស្សមានទំនៀមទម្លាប់នៃការបំភ្លឺចង្កៀងប្រេងជាមួយនឹង wicks (dipa) ដើម្បីអបអរសាទរជ័យជំនះរបស់ Lord Krishna លើ Narakasura ដែលជានិមិត្តរូបនៃការយកឈ្នះអំពើអាក្រក់។ នៅរាត្រី Diwali អ្នកកាន់សាសនាហិណ្ឌូស្លៀកសំលៀកបំពាក់ដ៏ល្អបំផុតរបស់ពួកគេ និងបំភ្លឺចង្កៀងខាងក្នុង និងខាងក្រៅផ្ទះរបស់ពួកគេ។ សមាជិកគ្រួសារ និងមិត្តភក្តិជិតស្និទ្ធតែងតែប្រាស្រ័យទាក់ទងគ្នា និងផ្តល់អំណោយដល់គ្នាទៅវិញទៅមកក្នុងថ្ងៃនេះ។ នៅពេលល្ងាច ពួកគេនឹងធ្វើពិធីបួងសួងឯកជនដល់ព្រះនាង Lakshmi ដែលជានិមិត្តរូបនៃសំណាងល្អ និងភាពរុងរឿង។ ពិធីបុណ្យនេះជាធម្មតាមានរយៈពេល ៥ ថ្ងៃដោយទាក់ទាញអ្នកទស្សនារាប់លាននាក់ជារៀងរាល់ឆ្នាំ។

គួរបញ្ជាក់ដែរថា នៅឆ្នាំនេះ ប្រជាជនឥណ្ឌាបាននាំគ្នាទៅច្រាំងទន្លេ Saryu នៅយប់ថ្ងៃទី ១១ ខែវិច្ឆិកា ក្នុងរដ្ឋ Ayodhya ដើម្បីបំភ្លឺចង្កៀងប្រេងកាតជាង ២.២ លាន ដែលបានបង្កើតកំណត់ត្រាហ្គីណេសសម្រាប់ចំនួនចង្កៀងច្រើនជាងគេបំផុតក្នុងពិធីបុណ្យភ្លើងនេះ៕