ជំនួសឱ្យការចំណាយប្រាក់ច្រើនទៅលើផលិតផលថែរក្សាសម្រស់ថ្លៃៗ នារីៗអាចងាកមកសាកល្បងរូបមន្តធម្មជាតិទាំងនេះ ដើម្បីធ្វើឱ្យស្បែកស្រស់ថ្លា ទន់រលោង មានសំណើម និងក្មេងជាងវ័យ។ ពិតណាស់ គ្រឿងផ្សំធម្មជាតិមិនត្រឹមតែងាយស្រួលរកប៉ុណ្ណោះទេ ប៉ុន្តែវាថែមទាំងមានប្រសិទ្ធភាពហួសពីការស្មានទៀតផង។ ម្យ៉ាងវិញទៀត យើងក៏មិនចាំបាច់ព្រួយបារម្ភថាស្បែកអាចនឹងប្រតិកម្មបន្ទាប់ពីប្រើប្រាស់រួចដូចផលិតផលមួយចំនួនដែលមានលក់នៅលើទីផ្សារផងដែរ។ ដូច្នេះហើយ ខាងក្រោមនេះគឺជាវិធីធ្វើម៉ាសបិទមុខ ៤ យ៉ាងពីផ្លែបឺរចំនួន៖
១.ផ្លែបឺរ និងទឹកឃ្មុំ៖ នេះគឺជាម៉ាសបិទមុខដ៏ល្អឥតខ្ចោះសម្រាប់ការសម្អាត និងផ្តល់សំណើម។ ការរួមបញ្ចូលគ្នានៃផ្លែបឺរ និងទឹកឃ្មុំនឹងរឹតបន្តឹងរន្ធញើស ធ្វើឱ្យស្បែកតឹងណែន កាត់បន្ថយភាពជ្រីវជ្រួញ និងកាត់បន្ថយភាពចាស់។
ហេតុនេះហើយ ជាដំបូងត្រូវកិនផ្លែបឺរទុំមួយដុំ ហើយលាយជាមួយទឹកឃ្មុំមួយស្លាបព្រា បន្ទាប់មកលាបស្រទាប់ស្តើងលើស្បែក ហើយទុកចោល ២០ នាទី រួចលាងជម្រះជាមួយទឹកក្តៅជាការស្រេច។
២.ផ្លែបឺរ និងត្រសក់៖ វិធីនេះជួយបន្ថែមសំណើម និងការពារស្បែកស្ងួត ប្រឆាំងអុកស៊ីតកម្ម ក៏ដូចជាជួយស្តារស្បែកដែលខូចផងដែរ។
ដូច្នេះ ដំបូងយើងត្រូវយកផ្លែបឺរ ១/២ មកលាយជាមួយទឹកត្រសក់ ២ស្លាបព្រាបាយ រួចលាងមុខឱ្យស្អាត បន្ទាប់មកលាបម៉ាសឱ្យស្មើលើមុខរបស់អ្នក ទុកចោល ១០ ទៅ ១៥ នាទី ហើយលាងសម្អាតម៉ាសចេញជាមួយនឹងទឹកក្តៅឧណ្ហៗ និងជូតមុខឱ្យស្ងួតជាការស្រេច។
៣.ផ្លែបឺរ និង Oatmeal៖ ម៉ាសនេះជួយព្យាបាលរបួសស្បែកដូចជា មុន ឬរលាកស្បែក និងបំបាត់ការរមាស់។ ដូច្នេះវិធីធ្វើជាដំបូងត្រូវដាក់ប័រ និងម្សៅ Oatmeal ចូលក្នុងចានមួយ រួចច្របល់ឱ្យសព្វ បន្ទាប់មកលាបលើមុខឱ្យស្មើៗគ្នា ហើយទុកចោលប្រហែល ១៥ ទៅ ២០ នាទី រហូតដល់ម៉ាសស្ងួត បន្ទាប់មកលាងជម្រែះជាការស្រេច។
៤.ផ្លែបឺរ និងទឹកដោះគោជូរ៖ រូបមន្តនេះមានអត្ថប្រយោជន៍ខ្លាំងណាស់ ដែលវានឹងជួយធ្វើឱ្យមុខភ្លឺថ្លាបែបធម្មជាតិ រួមទាំងធ្វើឱ្យស្បែកស្រស់ថ្លា និងមានសំណើមពីខាងក្នុង។
ហេតុនេះហើយ ដំបូងយើងត្រូវយកទឹកដោះគោជូរធម្មជាតិមួយស្លាបព្រា ហើយលាយវាជាមួយផ្លែប៊ឺ រួចលាបលើផ្ទៃមុខឱ្យស្មើ ទុកចោល ១០ ទៅ ១៥ នាទី សឹមលាងមុខចេញជាមួយទឹកក្តៅឧណ្ហៗ រួចជូតឱ្យស្ងួតជាការស្រេច។
ទោះជាយ៉ាងណាក៏ដោយ អ្នកដែលមានអាឡែស៊ីទៅនឹងផ្លែឈើ ឬបន្លែ ឬអ្នកដែលមានអាឡែស៊ីទៅនឹងជ័រអាចមានបញ្ហារមាស់តិចតួច។ នៅក្នុងករណីទាំងនេះ អ្នកគួរតែសាកល្បងម៉ាសនៅលើតំបន់តូចមួយនៃស្បែកមុនពេលអនុវត្ត៕
