ក្រោយពីនារីម្នាក់ដែលបានលើកយកបទចម្រៀងដើមរបស់លោកស្រី ប៉ែន រ៉ន មកច្រៀងកែប្រែអត្ថន័យខ្លឹមសារ និងប្រើប្រាស់ពាក្យពេចន៍មិនសមរម្យលើឆាកតន្ត្រីអកកេះកាលយប់ពីថ្ងៃ២១ ខែវិច្ឆិកា កន្លងទៅនេះ ឥឡូវត្រូវបានក្រសួងហៅទៅណែនាំហើយ។ កាលពីថ្ងៃទី២១ ខែវិច្ឆិកាកន្លងទៅនេះ មហាជននៅក្នុងបណ្តាញសង្គមបានធ្វើការរិះគន់យ៉ាងជះដៃទៅលើនារីម្នាក់ច្រៀងចម្រៀងអសុរសនៅលើឆាកតន្ត្រីអកកេះ ដែលមានអ្នកចែករំលែកវីដេអូរាប់ពាន់នាក់នៅក្នុងគេហទំព័រ Facebook ។ មិនយូរប៉ុន្មាននៅថ្ងៃយប់ថ្ងៃទី២២ ខែវិច្ឆិកា មន្ទីរវប្បធម៌ និងវិចិត្រសិល្បៈខេត្តកំពង់ចាម បានកោះហៅក្រុមតន្រ្តីកុសល់ប្រម៉ូតន្រ្តី មកធ្វើការអប់រំ ណែនាំ និងធ្វើកិច្ចសន្យាបញ្ឈប់ការប្រើប្រាស់ពាក្យពេចន៍អសីលធម៌ ដែលប៉ះពាល់ប្រពៃណីវប្បធម៌ និងសីលធម៌សង្គម។

ក្នុងកិច្ចសន្យានោះ ក្រុមតន្រ្តីកុសល់ប្រម៉ូតន្រ្តី បានសរសេរថា ខ្ញុំបាទឈ្មោះ កាយ កុសល ភេទប្រុស អាយុ ៣៩ឆ្នាំ ដែលជាម្ចាស់ផេកកុសលប្រម៉ូតន្ត្រី។
សូមគោរពជូន លោកប្រធានមន្ទីរវប្បធម៌ និងវិចិត្រសិល្បៈខេត្តកំពង់ចាម ខ្ញុំបាទសូមធ្វើការសន្យា និងឈប់ផុសមាតិកា រូបភាពឬវីដេអូ និងចម្រៀងដែលមានបារ៉ូលអសុរស ធ្វើឱ្យប៉ះពាល់ដល់តម្លៃវប្បធម៌ជាតិខ្មែរដ៏ផូរផង់ ក៏ដូចជាកាយវិការណាមួយ ដែលមិនសមរម្យទៅក្នុងបណ្តាញសង្គម ដូចជា Facebook, Youtube,TikTok ជាដើម-ល-។ ប្រសិនបើខ្ញុំបាទមិនគោរពតាមកិច្ចសន្យានេះទេ ខ្ញុំបាទសូមទទួលខុសត្រូវមុខច្បាប់ជាធរមាន។

គួរបញ្ជាក់ដែរថា វីដេអូចម្រៀងនេះបានផ្ទុះការចាប់អារម្មណ៍យ៉ាងខ្លាំងពីសំណាកអ្នកនិយមលេងបណ្តាញសង្គមកាលពីយប់ថ្ងៃទី២១ ខែវិច្ឆិកា ដោយសារតែនារីម្នាក់កែប្រែអត្ថន័យខ្លឹមសារចម្រៀងដើម និងប្រើពាក្យពេចន៍មិនសមរម្យ។ ទោះជាយ៉ាងណាក៏ដោយ បច្ចុប្បន្នក្រសួងវប្បធម៌ និងវិចិត្រសិល្បៈបានធ្វើការកោះហៅទៅណែនាំ ក៏ដូចជាធ្វើការអប់រំ ណែនាំ និងធ្វើកិច្ចសន្យាបញ្ឈប់ការប្រើប្រាស់ពាក្យពេចន៍អសីលធម៌ ដែលប៉ះពាល់ប្រពៃណីវប្បធម៌ និងសីលធម៌សង្គម ហើយក្រុមតន្ត្រីនោះក៏បានចេញមុខសូមទោសជាសារធារណៈផងដែរ៕

នាព្រឹកថ្ងៃទី២៣ ខែវិច្ឆិកា ឆ្នាំ២០២៣នេះ ក្រសួងអប់រំយុវជន និងកីឡា បានចេញសេចក្តីប្រកាសស្តីពី លទ្ធផលប្រឡងសញ្ញាបត្រមធ្យមសិក្សាទុតិយភូមិសម័យប្រឡង ថ្ងៃទី ៦ ខែវិច្ឆិកា ឆ្នាំ២០២២។
ដោយនៅក្នុងនោះគេឃើញថា បេក្ខជនទទួលបាននិទ្ទេស A មានការកើនឡើង៦២៤នាក់ឯណោះ បើប្រៀបធៀបទៅនឹងឆ្នាំ២០២២។

ខាងក្រោមនេះជាលទ្ធផលតាមនិទ្ទេសនីមួយ នៃសម័យប្រឡង ថ្ងៃទី ៦ ខែវិច្ឆិកា ឆ្នាំ២០២៣៖
• និទ្ទេស A មានចំនួន ១៦៧៣ នាក់
• និទ្ទេស B មានចំនួន ៦៩៦៤ នាក់
• និទ្ទេស C មានចំនួន ១៨ ៣០៨ នាក់
• និទ្ទេស D មានចំនួន ៣៤ ២៤៦ នាក់
• និទ្ទេស E មានចំនួន ៣៧ ២៤៩ នាក់

ដោយឡែកឆ្នាំ ២០២២វិញ
• និទ្ទេស A មានចំនួន ១០៤៩ នាក់
• និទ្ទេស B មានចំនួន ៧២៣២ នាក់
• និទ្ទេស C មានចំនួន ១៩០៥៣ នាក់
• និទ្ទេស D មានចំនួន ៣១១៦៦ នាក់
• និទ្ទេស E មានចំនួន ៣២៤៥០ នាក់

នាថ្ងៃទី១៤ ខែវិច្ឆិកា ឆ្នាំ២០២៣ កន្លងទៅនេះ កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ត្រូវបានប្រមុខរាជរដ្ឋាភិបាលប្រកាសអនុវត្តជាផ្លូវការ។

យុវជន និងអាណាព្យាបាលនៃ គ្រួសារ ក្រីក្រនិងងាយរងហានិភ័យ និងអាជ្ញាធរមូលដ្ឋានបានសម្តែង នូវការពេញចិត្តជាខ្លាំងដោយពួកគាត់ជឿជាក់ថា ក្រោយការរៀនចប់វគ្គ បណ្តុះបណ្តាលដោយមិនគិតថ្លៃនេះហើយ យុវជនគ្រួសារក្រីក្រនឹងមាន ជំនាញពិតប្រាកដមួយ និងអាចរកចំណូលសមរម្យសម្រាប់ ផ្គត់ផ្គង់ គ្រួសារ ទៀតផង។
ចំពោះកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ដល់ក្រុមគោលដៅយុវជនមកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេស ចំនួន ១,៥លាននាក់ គឺជាកម្មវិធីផ្តល់ឱ្យសិក្ខាកាមគោលដៅទាំងអស់ ឆាប់មានជំនាញបច្ចេកទេសមូលដ្ឋានមួយជាក់លាក់ដើម្បីឆាប់ទទួលបានការងារធ្វើដោយសមរម្យក្រោយការបណ្តុះបណ្តាលដែលនឹងធ្វើឡើងរយៈពេល៤ខែដោយទទួលបានប្រាក់ឧបត្ថម្ភទឹកប្រាក់ចំនួន២៨ម៉ឺនរៀលក្នុងមួយខែទៀតផង។

នៅក្នុងនោះយុវជនអាចមានជម្រើសរៀនមុខវិជ្ជាជំនាញ១០មុខ ដោយឥតគិតថ្លៃរួមមាន៖
• សំណង់
• អគ្គិសនី និងថាមពល
• អេឡិចត្រូនិច
• បរិក្ខារត្រជាក់ និងក្តៅ
• កម្មន្តសាល
• មេកានិកទូទៅ
• ទេសចរណ៍
• សេវាកម្ម
• កសិកម្ម និងកសិ-ឧស្សាហកម្ម
• ធុរកិច្ច និងព័ត៌មានវិទ្យា

លទ្ធផលប្រឡងបាក់ឌុបឆ្នាំ២០២៣ នឹងត្រូវប្រកាសមុនថ្ងៃកំណត់ ពោលគឺនៅរសៀលថ្ងៃទី២៣ ខែវិច្ឆិកា ឆ្នាំ២០២៣ សម្រាប់មណ្ឌលរាជធានីភ្នំពេញ និងខេត្តកណ្ដាល និងព្រឹកថ្ងៃទី ២៤ វិច្ឆិកា ២០២៣ សម្រាប់តាមបណ្ដាខេត្តផ្សេងទៀត នេះបើយោងតាមការចេញផ្សាយរបស់ក្រសួងអប់រំ យុវជន និងកីឡា។

សម្រាប់អ្នកដែលប្រឡងជាប់ គួរណាស់តែជ្រើសមុខវិជ្ជាក្នុងការសិក្សានៅថ្នាក់ឧត្តមសិក្សាទៅតាមការចូលចិត្តនិងទេពកោសល្យរបស់ពួកគេ។ ដោយឡែកអ្នកធ្លាក់ កុំបាក់ទឹកចិត្ត ព្រោះអ្នកធ្លាក់បាក់ឌុបក៏នៅមានជម្រើសជាច្រើនទៀតក្នុងការបន្តដំណើរទៅមុខ។

មិនតែប៉ុណ្ណោះ ការបន្តរៀនថ្នាក់១២ឡើងវិញមួយឆ្នាំទៀត មិនមែនមានន័យថាខ្លួនឯងអន់នោះទេ គឺសបញ្ជាក់ថាខ្លួនមានភាពក្លាហានហ៊ានទទួលស្គាល់ការពិត និងអាចដឹងពីចំណុចខ្វះខាតប្រឹងប្រែងកែប្រែដើម្បីទទួលជោគជ័យនៅឆ្នាំក្រោយ។

តែសម្រាប់លទ្ធផលយ៉ាងណាវិញ សិស្សានុសិស្សអាចទៅស្តាប់ផ្ទាល់នៅមណ្ឌលប្រឡងក៏បាន ឬក៏អាចរងចាំប្រកាសរបស់ផេកផ្លូវការរបស់ក្រសួងអប់រំ ដែលនៅក្នុងផេកក្រសួងអប់រំបង្ហោះតែអ្នកជាប់តែប៉ុណ្ណោះ៕

ឯកឧត្តម ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ និង ឯកឧត្តម ស ថេត អគ្គស្នងការនគរបាលជាតិក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានប្រកាសដាក់ចេញនូវឯកសណ្ឋានថ្មីរបស់មន្ត្រីជាប់កិច្ចសន្យា ដើម្បីថែរក្សាសណ្តាប់ធ្នាប់ សុវត្ថិភាពចរាចរណ៍ផ្លូវគោក។
ការកែសម្រួលឯកសណ្ឋានមន្ត្រីជាប់កិច្ចសន្យា ដែលជាមន្ត្រីជំនួយការសហការការងារជាមួយមន្ត្រីនគរបាលចរាចរណ៍ផ្លូវគោក ក្នុងគោលបំណងពង្រឹងប្រសិទ្ធភាពការងាររបស់មន្ត្រីជាប់កិច្ចសន្យាឱ្យមានការទទួលខុសត្រូវខ្ពស់ក្នុងតួនាទីភារកិច្ចចូលរួមថែរក្សាសណ្តាប់ធ្នាប់សាធារណៈ សុវត្ថិភាពចរាចរណ៍នៅក្នុងរាជធានីភ្នំពេញ និងក៏ដើម្បីចៀសវាងកុំឱ្យមហាជនយល់ច្រឡំជាមន្ត្រីនគរបាលចរាចរណ៍។កន្លងទៅគេឃើញមានមន្ត្រីនគរបាលចរាចរណ៍ជាប់កិច្ចសន្យា មួយចំនួនបានធ្វើខុសទៅនឹងតួនាទី ដោយតែងតែហៅរថយន្ត ឬម៉ូតូ ដែលជាខុសច្បាប់ ដើម្បីឱ្យបង់ប្រាក់។

ការធ្វើបែបនេះ​ គឺផ្ទុយទាំងស្រុងពីតួនាទីរបស់មន្ត្រីនគរបាលចរាចរណ៍ជាប់កិច្ចសន្យា ដោយអ្នកទាំងនោះមិនត្រូវបានអនុញ្ញាតឱ្យផាកពិន័យ យានយន្តណាដែលប្រព្រឹត្តិខុសនោះទេ គឹមានសិទ្ធសម្រាប់សម្រួលចរាចរណ៍នៅតាមតំបន់ដែលមានការកកស្ទះខ្លាំង ទាំងនៅពេលព្រឹក និងពេលល្ងាចតែប៉ុណ្ណោះ៕