ប្រទេសកូរ៉េខាងជើង ៖ កាលពីថ្ងៃទី២១ ខែវិច្ឆិកា ឆ្នាំ២០២៣ សារព័ត៌មានបរទេសរាយការណ៍ថា ប្រទេសកូរ៉េខាងជើងបានប្រកាសថ្កោលទោសអាមេរិក ដោយសារអាមេរិកត្រៀមលក់អាវុធមានសក្តានុពលខ្ពស់ឱ្យប្រទេសជប៉ុន និងកូរ៉េខាងត្បូង ដែលជាប្រទេសសម្ព័ន្ធមិត្តជាមួយអាមេរិកនៅតំបន់អាស៊ី ។ កូរ៉េខាងជើងលើកឡើងថា ការធ្វើបែបនេះ នឹងធ្វើឱ្យស្ថានការណ៍នៅក្នុងតំបន់កាន់តែតានតឹងខ្លាំងឡើង ដោយសារការយកអាវុធប្រភេទថ្មីចូលមកក្នុងតំបន់ ។

ចំណែកសារព័ត៌មានកូរ៉េខាងជើង KCNA រាយការណ៍ថា ប្រទេសកូរ៉េខាងជើងនឹងចាត់វិធានការទប់ស្កាត់ និងការពារសន្តិសុខនៅក្នុងតំបន់ ព្រមទាំងលើកហេតុផលថា បញ្ហាអសន្តិសុខក្នុងតំបន់ គឺបង្កឡើងដោយអាមេរិក និងបណ្តាប្រទេសសម្ព័ន្ធមិត្ត ដូចជា ជប៉ុន និងកូរ៉េខាងត្បូង ។

យោងតាមសេចក្តីរាយការណ៍ឱ្យដឹងថា ប្រទេសជប៉ុនមានគម្រោងទិញមីស៊ីល «Tomahawk» ពីអាមេរិក ចំនួន៤០០គ្រឿង ដើម្បីបង្កើនសក្តានុពលក្នុងវិស័យកងទ័ពដ៏ធំបំផុត បើគិតតាំងពីសង្គ្រាមលោក កទី២ មក ។ ជាមួយគ្នានេះ អាមេរិកទើបតែបានប្រកាសថា អាមេរិកអាចនឹងលក់មីស៊ីលប្រភេទ «Sidewider» និងមីស៊ីលទំនើប Standard Missile 6 ឱ្យទៅកូរ៉េខាងត្បូងផងដែរ ។

ប្រទេសកូរ៉េខាងជើងបានចេញមុខថ្កោលទោសអាមេរិកលើកនេះ ស្របពេលកូរ៉េខាងជើងកំពុងត្រៀមខ្លួនបង្ហោះផ្កាយរណបចារកម្ម ។ រីឯកូរ៉េខាងត្បូងបានចេញសារដាស់តឿនថា កូរ៉េខាងជើងគួរតែហ៊ានប្រឈមមុខជាមួយការពិត ពាក់ព័ន្ធនឹងបញ្ហាសហគមន៍អន្តរជាតិថ្កោលទោសកូរ៉េខាងជើងចំពោះទង្វើខុសច្បាប់ផ្សេងៗ ព្រមទាំងលុបចោលគម្រោងបង្ហោះផ្កាយរណបចារកម្មជាបន្ទាន់ ៕

នៅថ្ងៃទី២១ ខែវិច្ឆិកា ព្រះនាង Kate Middleton បច្ចុប្បន្នមានព្រះជន្ម ៤១ ព្រះវស្សាបានចូលរួមពិធីជប់លៀងរដ្ឋនៅវិមាន Buckingham ជាមួយនឹងភ្ញៀវចំនួន១៧០ នាក់ រួមទាំងក្រុម BLACKPINK ផងដែរ។ ព្រឹត្តិការណ៍នេះគឺជាផ្នែកមួយនៃកម្មវិធីដើម្បីស្វាគមន៍ប្រធានាធិបតីកូរ៉េខាងត្បូងដែលមកបំពេញទស្សនកិច្ចនៅចក្រភពអង់គ្លេស។

ព្រះនាងបានទាក់ទាញការចាប់អារម្មណ៍នៅពេលដែលគ្រងមកុដ Strathmore Rose (មកុដផ្កាកុលាប) ដ៏កម្រនៃគ្រួសាររាជវង្សអង់គ្លេស។ យោងទៅតាមទស្សនាវដ្តី People បានឱ្យដឹងថាមកុដផ្កាកុលាបមិនត្រូវបានគេឃើញតាំងពីឆ្នាំ ១៩៣០ដែលជាផ្នែកមួយនៃការប្រមូលរបស់ម្ចាស់ក្សត្រី Elizabeth ដែលជាព្រះមាតារបស់មហាក្សត្រី Elizabeth II ។ គ្រឿងអលង្ការនេះគឺជាអំណោយអាពាហ៍ពិពាហ៍ពីព្រះបិតារបស់ព្រះនាងនៅពេលដែលព្រះមហាក្សត្រិយានី បានរៀបអភិសេកជាមួយព្រះអង្គម្ចាស់ Albert (ក្រោយមកស្តេច George VI) ។ មកុដនេះត្រូវបានធ្វើឡើងនៅចុងសតវត្សទី១៩ ។

បន្ទាប់ពីម្ចាស់ក្សត្រី Elizabeth ព្រះនាង Kate Middleton គឺជាមនុស្សទីពីរដែលពាក់មកុដនេះ។ មហាក្សត្រី Elizabeth II បានទទួលមរតកមកុដនេះពីព្រះមាតាទ្រង់ក្នុងឆ្នាំ២០០២ ប៉ុន្តែទ្រង់មិនដែលគ្រងមកុដនេះនៅទីសាធារណៈឡើយក្នុងអំឡុងពេលទ្រង់មានព្រះជន្ម ។បើតាមប្រភពព័ត៌មានដដែលបានឱ្យដឹងថាព្រះនាង Kate គ្រងមកុដនេះមកជាសាធារណៈវិញ គឺជាវិធីមួយដើម្បីបង្ហាញពីក្តីស្រលាញ់ និងការដឹងគុណចំពោះទំនាក់ទំនងគ្រួសារ ជាពិសេសជាមួយព្រះមហាក្សត្រ។
នេះជាលើកទី៤ហើយដែលព្រះនាង Kate បានគ្រងមកុដក្នុងសំលៀកបំពាក់ជាសែរាជរង្សអង់គ្លេសចាប់តាំងពីរៀបអភិសេកជាមួយព្រះអង្គម្ចាស់ William ។ នៅខែមេសា ឆ្នាំ២០១១ នៅថ្ងៃរៀបអភិសេក ព្រះនាង Kate បានពាក់មកុដ Cartier Halo ។ ក្នុងឆ្នាំ ២០១៣ ព្រះនាងបានបង្ហាញខ្លួនជាលើកដំបូងដោយពាក់មកុដផ្កាឈូកនៅឯពិធីទទួលការទូតនៅវិមាន Buckingham ។ នៅពេលទទួលស្វាគមន៍ប្រធានាធិបតីចិន ស៊ី ជីនពីង មកកាន់រាជវាំងក្នុងឆ្នាំ ២០១៥ព្រះនាងបានពាក់ចិញ្ចៀនគូស្នេហ៍ដែលតុបតែងដោយគុជរបស់ម្ចាស់ក្សត្រី Mary ដែលជាគ្រឿងអលង្ការសំណព្វរបស់ព្រះនាង Diana ៕

ប្រទេសវៀតណាម ៖ កាលពីពាក់កណ្តាលខែវិច្ឆិកា ឆ្នាំ២០២៣ ប្រធានាធិបតីវៀតណាម លោក Vo Van Thuong បានរៀបចំពិធីទទួលស្វាគមន៍លោក Tim Cook នាយកក្រុមហ៊ុន Apple ហើយមេដឹកនាំវៀតណាមបានសរសើរក្រុមហ៊ុន Apple អំពីការពង្រីកអាជីវកម្ម និងបង្កើតរោងចក្រផលិតនៅវៀតណាម ។ លោក Vo Van Thuong ថ្លែងថា ផលិតផលរបស់ Apple បានផ្តល់ឱកាសជាច្រើនដល់យុវជនវៀតណាម ក្នុងការប្រើប្រាស់ឧបករណ៍បច្ចេកវិទ្យាទំនើបផ្សេងៗ ។

ប្រធានាធិបតីវៀតណាម លោក Vo Van Thuong បានយល់ព្រមទទួលយកសំណូមពរ និងយុទ្ធសាស្ត្រអាជីវកម្មផ្សេងៗពីក្រុមហ៊ុន Apple ។ លោកប្រធានាធិបតីវៀតណាមសង្កត់ធ្ងន់ថា ការពង្រឹងទំនាក់ទំនងទ្វេភាគីរវាងវៀតណាម និងអាមេរិក ឱ្យក្លាយជាដៃគូយុទ្ធសាស្ត្រដ៏ទូលំទូលាយនោះ វាជាឱកាសដ៏ល្អសម្រាប់ Apple អាចពង្រីកការវិនិយោគនៅវៀតណាម ជាពិសេស ឧស្សាហកម្មបច្ចេកវិទ្យាទំនើប ខណៈវៀតណាមបានផ្តល់ភាពសំខាន់ជាចម្បងលើចំណុចទាំងនេះ ។

ចំណែកលោក Tim Cook នាយកក្រុមហ៊ុន Apple ថ្លែងថា វៀតណាមជាចំណែកមួយនៃយុទ្ធសាស្ត្រផ្នែកអាជីវកម្មពិសេសរបស់ Apple ដោយសារផលិតផលជាច្រើនប្រភេទរបស់ក្រុមហ៊ុននេះបានផលិតនៅវៀតណាម ដូចជា ៖ Macbook, ipad និង Apple Watch ។ លើសពីនេះ សេដ្ឋកិច្ចឌីជីថលរបស់វៀតណាមកំពុងរីកចម្រើន បានធ្វើឱ្យក្រុមហ៊ុនអេឡិចត្រូនិក និងបច្ចេកវិទ្យាលំដាប់ពិភពលោកជាច្រើន រួមទាំងក្រុមហ៊ុនអាមេរិកផងដែរ ចូលមកវិនិយោគធ្វើអាជីវកម្មនៅវៀតណាមកាន់តែច្រើន ។ ក្រៅពីនេះ វៀតណាមសម្បូរទៅដោយវិស្វករមានជំនាញខ្ពស់ និងអ្នកជំនាញផ្នែកបច្ចេកវិទ្យា ។

ទោះយ៉ាងណា វៀតណាមចាំបាច់ត្រូវកែលម្អប្រព័ន្ធស្តង់ដារសម្រាប់ការប្រើប្រាស់បច្ចេកវិទ្យា 5G និងកែលម្អច្បាប់គាំទ្រការអភិវឌ្ឍសេដ្ឋកិច្ចជីឌីថល រួមទាំងពិចារណាពីកត្តាពាក់ព័ន្ធជាមួយកម្មវិធី ព្រមទាំងការអភិវឌ្ឍបញ្ញាសិប្បនិម្មិត ។ រដ្ឋាភិបាលវៀតណាមបានធ្វើការយ៉ាងលំបាកដើម្បីបង្កើតយន្តការ និងគោលនយោបាយផ្សេងៗឱ្យបានគ្រប់គ្រាន់ ជាពិសេស កែលម្អការវិនិយោគ និងបរិយាកាសអាជីវកម្មនៅវៀតណាម ដើម្បីសម្រួលដល់ការវិនិយោគបរទេស ។

ម្យ៉ាងទៀត វៀតណាមត្រូវព្យាយាមជំរុញស្តង់ដារទូរគមនាគមន៍, កែលម្អច្បាប់ដើម្បីគាំទ្រការអភិវឌ្ឍសេដ្ឋកិច្ចឌីជីថល, គម្រោងហេដ្ឋារចនាសម្ព័ន្ធឌីជីថល និងការបណ្តុះបណ្តាលបុគ្គលិកផ្នែកឌីជីផល ។ វៀតណាមក៏មានគោលបំណងឱ្យក្រុមហ៊ុន Apple បន្ថែមការវិនិយោគនៅតាមខេត្តផ្សេងៗបន្ថែមទៀត ជាពិសេស នៅបណ្តាខេត្ត និងទីក្រុងធំៗ រួមទាំងមានចំណែករួមក្នុងការអភិវឌ្ឍ និងការប្រើប្រាស់បច្ចេកវិទ្យា 5G នៅវៀតណាមផងដែរ ៕ ប្រភព ៖ AEC connect

ជប៉ុន៖ បុគ្គលិករោងចក្រសំរាមមួយនៅក្នុងទីក្រុង Fukuyama ខេត្ត Hiroshima ប្រទេសជប៉ុន បានរកឃើញក្រដាសប្រាក់ជាង ៣០០ សន្លឹកដែលមានតម្លៃសរុប ៤ លានយ៉េន (ប្រមាណ ២៧,០០០ ដុល្លារអាមេរិក) ពេលកំពុងផ្ទុកសំរាមដាក់លើឡានដឹកទំនិញ។

យោងតាមគេហទំព័រ News On Japan ដែលបានរាយការណ៍កាលពីថ្ងៃទី២១ ខែវិច្ឆិកាថា ក្រដាសប្រាក់នេះត្រូវបានគេរកឃើញនៅម៉ោងប្រហែល ៣ និង ៣០ នាទីរសៀល ដែលលាយឡំជាមួយកាកសំណល់មិនអាចដុតបាន រួមមានក្រដាសប្រាក់ ៣៨៣ ម៉ឺនយ៉េន និងក្រដាសប្រាក់រហែក ១៧ សន្លឹក ដែលមានតម្លៃសរុបចំនួន ៤ លានយ៉េន (ប្រមាណ ២៧,០០០ ដុល្លារអាមេរិក) ពីគំនរសំរាម។

ការរកឃើញទាំងនេះ ត្រូវបានរាយការណ៍ភ្លាមៗទៅប៉ូលីសថាជាទ្រព្យសម្បត្តិដែលបានបាត់បង់។ មន្ត្រីម្នាក់បាននិយាយថា រោងចក្រសំរាមក្នុងទីក្រុងនេះ ពេលខ្លះបានរកឃើញកាបូបដែលមានកាក់ និងរបស់របរផ្សេងទៀត ប៉ុន្តែ “មិនដែលរកឃើញក្រដាសប្រាក់ច្រើនបែបនេះនោះទេ”។ បច្ចុប្បន្ន ប៉ូលីសក្នុងទីក្រុង Fukuyma ខាងកើតកំពុងធ្វើការស្វែងរកម្ចាស់ក្រដាសប្រាក់នេះ បើតាមបទប្បញ្ញត្តិ បើមន្ត្រីរកមិនឃើញម្ចាស់ក្នុងរយៈពេលបីខែទេ អ្នកដែលរកឃើញលុយនោះនឹងមានសិទ្ធិកាន់កាប់។

គួរបញ្ជាក់ដែរថា ប្រទេសជប៉ុន បានកត់ត្រាករណីជាច្រើននៃការរកឃើញប្រាក់ដ៏ច្រើនក្នុងការប្រមូលសំរាម និងកន្លែងព្យាបាល។ កាលពីដើមឆ្នាំនេះ រោងចក្រមួយនៅទីក្រុង Sapporo ទីក្រុង Hokkaido បានរកឃើញប្រាក់ចំនួន ១០ លានយ៉េននៅក្នុងធុងសំរាម ខណៈដែលកំពុងតម្រៀបក្រដាសសំរាមដែលបានកែច្នៃឡើងវិញ៕

https://youtu.be/Q7843Og1qmw