តារាកំប្លែង ពាក់មី មិនអាចទទួលយកបានជុំវិញការរិះគន់ថាជា«មនុស្សអត់ប្រយោជន៍»

តារាកំប្លែងពាក់មី បានបង្ហាញការមិនពេញចិត្តនិងមិនអាចទទួលយកបាននូវពាក្យសម្តីរបស់អ្នករិះគន់មួយចំនួនដែលជេរលោកថាជាមនុស្សឥតប្រយោជន៍។ តារាកំប្លែងល្បីឈ្មោះរូបនេះថាពាក្យនេះធ្ងន់សម្រាប់លោកខណៈលោកបានជួយសង្គមជាច្រើន។ លើសពីនេះ នាយពាក់មី បានបញ្ជាក់ជុំវិញការនាំនារីម្នាក់ឈ្មោះ លក្ខិណា ចូលសិល្បៈផងដែរ។

នៅយប់ថ្ងៃទី១៣ ខែមិថុនា តារាកំប្លែងពាក់មី បានប្រតិកម្មទៅនឹងគណនីមួយដែលបញ្ចេញមតិរិះគន់និងហៅលោកថាជាមនុស្សអត់ប្រយោជន៍។ តារាកំប្លែងរូបនេះបានសរសេរថា «ពាក្យ ( អាអត់ប្រយោជន៍ វាធ្ងន់ណាស់សម្រាប់ខ្ញុំ )ខ្ញុំជួយសង្គមដូចជាច្រើនដែរ បូករួមទាំងវីដេអូអប់រំ វីដេអូជួយសង្គមផ្សេងៗ។ រឿងផ្សាយស្រា ជាមុខរបររកស៊ីស្របច្បាប់ មានទាំងអ្នកផលិតស្រា អ្នកលក់ស្រា អ្នកហូបស្រា មានច្រើនណាស់»។

នៅក្នុងថតតារាកំប្លែងរូបនេះបញ្ជាក់ថាមិនបែងចែកតួប្រុសឬស្រីនោះទេខណៈភរិយារបស់លោកក៏បានចូលរួមថតដូចគ្នាហើយការសម្តែងមិនបានលើសលួសអ្វីឡើយ។ លោក បានសរសេរថា «រឿងថតសិល្បៈ មិនចាំបាច់បែងចែកថតស្រីថតប្រុសអី ទោះមានតួស្រី ក៏មានប្រពន្ធពាក់មីសម្តែងជាមួយដែរ ហើយក៏មិនដែលបង្ហាញរូបភាព ឬ សាច់រឿងអីលើសលួសដែរ»។

លើសពីនេះទៅទៀតជុំវិញពាក្យខ្សឹមខ្សៀវនាំនារីម្នាក់ចូលវិថីសិល្បៈ តារាកំប្លែង ពាក់មី បានចេញមកបញ្ជាក់យ៉ាងដូច្នេះថា « រឿង លក្ខិណា គ្នាចូលសិល្បៈប្រុងឱ្យគ្នាថត1វីដេអូហើយឈប់មែន តើគ្នាខុសអី ហេតុអី ? តើវីដេអូគ្នាទាំងអស់ ថោកទាប ឬ មានអីបំពុលសង្គមមែន ? យើងគ្រប់គ្នា មានមុខរបររៀងៗខ្លួនសំខាន់កុំឱ្យតែខុសច្បាប់!»។

ការបញ្ជាក់របស់តារាកំប្លែង ពាក់មី បានធ្វើឱ្យមានការចាប់អារម្មណ៍ជាច្រើនដោយអ្នកខ្លះក៏បញ្ចេញមតិបែបវិជ្ជមានចំណែកមតិមួយទៀតនៅតែបង្ហាញការមិនពេញចិត្តទៅកាន់តារាកំប្លែងរូបនេះដដែល។ គួរឱ្យដឹងថា ថ្មីៗនេះលោកក៏រងនូវពាក្យចចាមអារ៉ាមមិនល្អទាក់ទងនឹងការនាំយក លក្ខិណា ចូលវិថីសិល្បៈដូចគ្នា។ បុគ្គលដែលមានឥទ្ធិពលលើបណ្តាញសង្គមក៏បានបង្ហោះសំណេរឌឺដងផងដែរខណៈមនុស្សមួយចំនួនបានតម្រង់មុខសញ្ញាមកកាន់លោក៕