ប្រទេសអ៊ីតាលី៖ បុរសសង្ហាបំផុតនៅអ៊ីតាលី បានសម្រេចចិត្តបោះបង់ការងារសិល្បៈ ហើយបន្តដើរលើវិថីសាសនាគ្រិស្ត ដើម្បីក្លាយជាបូជាចារ្យ។

យោងតាមគេហទំព័រអន្តរជាតិ New York Post បានឱ្យដឹងថា បុរសម្នាក់ឈ្មោះ Edoardo Santini អាយុ ២១ឆ្នាំ ត្រូវបានបោះឆ្នោតជ្រើសរើសជាបុរសសង្ហាបំផុតនៅក្នុងប្រទេសអ៊ីតាលី ដែលរៀបចំដោយក្រុមម៉ូដ ABE ក្នុងឆ្នាំ ២០១៩។ បច្ចុប្បន្ន Santini គឺជាតារាបង្ហាញម៉ូដប្រុសដ៏សង្ហា និងទាក់ទាញម្នាក់ដែលមានរូបរាងល្អឥតខ្ចោះ។

ជាងនេះទៅទៀត យុវជនម្នាក់នេះមានអ្នក Follow ច្រើនជាង ២៤,០០០នាក់ នៅលើ Instagram។ ប៉ុន្តែថ្មីៗនេះ Santini បានអាប់ដេតព័ត៌មានផ្ទាល់ខ្លួនតាម IG ដោយនិយាយថា “គាត់គឺជាគ្រិស្តបរិស័ទ ហើយចង់ក្លាយជាបូជាចារ្យ ដើម្បីដើរតាមឆន្ទៈរបស់ព្រះ”។ ដូច្នេះគាត់នឹងសម្រេចចិត្តបោះបង់ចោលទាំងអស់នៅការដើរម៉ូដ សម្ដែង និងរាំ ហើយនឹងរស់នៅខុសពីគេដោយដើរតាមគន្លងរបស់ព្រះ។

បុរសសង្ហាវ័យ ២១ ឆ្នាំរូបនេះបាននិយាយដូច្នេះថា “គាត់មានឱកាសជួបមនុស្សអស្ចារ្យមួយចំនួន ហើយពួកគេបានធ្វើឱ្យគាត់ដឹងពីចម្លើយចំពោះសំណួរដែលគាត់បានសួរខ្លួនឯងតាំងពីកុមារភាព” គាត់មាននិស្ស័យជាមួយព្រះ ហើយគាត់នឹងបង្កើតជីវិតថ្មីឡើងវិញក្នុងបរិបទផ្សេងជាមួយនឹងព្រះ។

កន្លងមក Edoardo Santini ធ្លាប់រស់នៅជាមួយបូជាចារ្យពីរនាក់ ហើយគាត់បានចាត់ទុកពេលវេលានេះជាបទពិសោធន៍ដ៏ស្រស់ស្អាតបំផុតក្នុងជីវិតរបស់គាត់។ ទោះជាយ៉ាងណាក៏ដោយ ការសម្រេចចិត្តបោះបង់អាជីពក្នុងវិស័យសិល្បៈនេះ ធ្វើឱ្យឪពុកម្តាយ ក៏ដូចជាអ្នកគាំទ្រជានារីៗមានការសោកស្តាយយ៉ាងខ្លាំង ប៉ុន្តែចំពោះ Santini ផ្ទាល់វិញគឺសប្បាយចិត្តនឹងផ្លូវដែលគាត់បានជ្រើសរើស៕

ប្រទេសថៃ ៖ សារព័ត៌មានថៃឈ្មោះ Mono News បានរាយការណ៍នៅថ្ងៃទី១១ ខែធ្នូ ឆ្នាំ២០២៣ ថា ស្ត្រីវៀតណាមម្នាក់បានបង្ហោះសារនៅក្នុងហ្វេសប៊ុក និងប្រតិកម្មជាមួយអ្នករត់ម៉ូតូឌុបនៅប្រទេសថៃ ដោយសារតែទាមទារប្រាក់ពីនាងលើសមុនទ្វេដង ។ ស្ត្រីវៀតណាមរូបនេះបញ្ជាក់ថា តម្លៃដែលនាងបានព្រមព្រៀងគ្នាជាមួយម៉ូតូឌុប គឺតម្លៃ២៥០បាត ប៉ុន្តែម៉ូតូឌុបបានដំឡើងថ្លៃរហូតដល់៥០០បាត ដោយសារតែនាំនាងជិះផ្លូវផ្សេង ។

សារព័ត៌មានថៃបន្តថា ភ្ញៀវទេសចរវៀតណាម២នាក់បានមកមើលការប្រគំតន្ត្រីនៅប្រទេសថៃ បន្ទាប់មក ពួកគេបានហៅម៉ូតូឌុបឱ្យជូនពួកគេទៅសណ្ឋាគារនៅតំបន់ប្រាទូណាម និងយល់ព្រមតម្លៃគ្នារួចហើយ ។ ប៉ុន្តែចុងក្រោយ អ្នកបើកម៉ូតូឌុបនេះបើកទៅផ្លូវផ្សេង និងគំរាមទារប្រាក់បន្ថែមទៀត ដែលលើសពីតម្លៃព្រមព្រៀងគ្នា ។ ចុងក្រោយ ភ្ញៀវទេសចរវៀតណាមទាំង២នាក់ ក៏សម្រេចចិត្តលោតចុះពីលើម៉ូតូភ្លាមៗ និងសុំឱ្យសន្តិសុខមន្ទីរពេទ្យជួយពួកគេ ។

ស្ត្រីជនជាតិវៀតណាមបានសរសេរសារនៅក្នុងហ្វេសប៊ុក ដើម្បីចែករំលែកបទពិសោធន៍ជិះម៉ូតូឌុបរបស់នាងនៅប្រទេសថៃ នៅពេលនាងហៅម៉ូតូឌុបជិះពីខាងមុខទីលានរ៉ាជឆាមាំងក្លា កីឡឋាន ទៅកាន់សណ្ឋាគារក្នុងតំបន់ប្រាទូណាម ក្រោយពីនាងមើលការប្រគំតន្ត្រីចប់ នៅថ្ងៃទី៨ ខែធ្នូ ឆ្នាំ២០២៣ ។ នាងប្រាប់ថា នាង និងមិត្តរបស់នាងម្នាក់ទៀតបានយល់ព្រមជាមួយម៉ូតូឌុបថា ពួកគេនឹងជិះក្នុងតម្លៃ២៥០បាត ប៉ុន្តែពេលកំពុងធ្វើដំណើរ ស្រាប់តែម៉ូតូឌុបបានបត់ទៅផ្លូវផ្សេង ហើយគំរាមឱ្យពួកនាងបង់ប្រាក់បន្ថែមទៀត គឺឱ្យពួកនាងបង់ប្រាក់រហូតដល់៥០០បាតឯណោះ ។

ស្ត្រីវៀតណាមរូបនេះប្រាប់ថា នាងភ័យខ្លាចខ្លាំងណាស់ ក៏សម្រេចចិត្តលោតចុះពីលើម៉ូតូ និងរត់ទៅសុំឱ្យសន្តិសុខយាមមន្ទីរពេទ្យនៅក្បែរនោះជួយ ។ ប៉ុន្តែម៉ូតូឌុបនេះនៅតែបើកដេញតាមមកគំរាមនាងទៀត ហើយថែមទាំងថតរូបនាង និងមិត្តភក្តិទៀតផង ។ នាងប្រាប់ថា នាងបានសុំឱ្យសន្តិសុខជួយទូរស័ព្ទប្តឹងប៉ូលិស ហើយក្រោយមក ម៉ូតូឌុបនេះក៏យល់ព្រមចាកចេញទៅ ។

ក្រោយកើតហេតុ ប៉ូលិសថៃបានចុះទៅកាន់កន្លែងកើតហេតុដើម្បីប្រមូលភស្តុតាង និងត្រៀមហៅអ្នកបើកម៉ូតូឌុបដែលត្រូវបានស្ត្រីវៀតណាមប្តឹង មកធ្វើការស៊ើបអង្កេត ពីព្រោះបារម្ភថា នឹងប៉ះពាល់ដល់មុខមាត់វិស័យទេសចរណ៍ប្រទេសថៃ ៕ ប្រភព ៖ Mono News

បរទេស៖ ប្រទេសកូរ៉េខាងត្បូងនឹងផ្តល់ទិដ្ឋាការដោយឥតគិតថ្លៃដល់ប្រទេសមួយចំនួនដូចជាហ្វីលីពីន និងឥណ្ឌូនេស៊ី រួមទាំងវៀតណាមផងដែរ ដើម្បីសម្រេចបាននូវគោលដៅស្វាគមន៍ភ្ញៀវអន្តរជាតិចំនួន ២០ លាននាក់នៅឆ្នាំ ២០២៤។

យោងតាមនាយករដ្ឋមន្ត្រី Han Duck-soo នៃប្រទេសកូរ៉េដែលបានលើកឡើងកាលពីថ្ងៃទី១០ ខែធ្នូថា លោកនឹងកំណត់គោលដៅទាក់ទាញភ្ញៀវទេសចរណ៍ជាង ២០ លាននាក់ និងសម្រេចបានប្រាក់ចំណូលពីវិស័យទេសចរណ៍ចំនួន ២៤,៥ ពាន់លានដុល្លារនៅឆ្នាំ ២០២៤។

អាស្រ័យហេតុនេះ រដ្ឋាភិបាលកូរ៉េនឹងពង្រីកបញ្ជីប្រទេសដែលមានទិដ្ឋាការឥតគិតថ្លៃសម្រាប់ក្រុម និងផ្លាស់ប្តូរគោលនយោបាយមួយចំនួនលើការបង្វិលសងប្រាក់ពន្ធនៅទីតាំងទិញទំនិញសម្រាប់ភ្ញៀវអន្តរជាតិ។ ដូច្នេះចាប់ពីថ្ងៃទី១ ខែមករា ឆ្នាំ២០២៤ វៀតណាម ហ្វីលីពីន ក៏ដូចជាឥណ្ឌូនេស៊ី នឹងមានសិទ្ធិទទួលបានទិដ្ឋាការដោយឥតគិតថ្លៃ ខណៈដែលពីមុនកូរ៉េអនុវត្តគោលនយោបាយនេះចំពោះចិនតែប៉ុណ្ណោះ។

លើសពីនេះ ដើម្បីជួយសម្រួលដល់ការធ្វើដំណើរក្នុងស្រុកសម្រាប់ភ្ញៀវទេសចរ រដ្ឋាភិបាលកូរ៉េនឹងបង្កើតកម្មវិធីមួយដើម្បីគាំទ្រការកក់ទុកលើការដឹកជញ្ជូនសាធារណៈសម្រាប់ភ្ញៀវអន្តរជាតិណាដែលមិនសូវចេះភាសាអង់គ្លេស។ បច្ចេកវិជ្ជា Artificial Intelligence (AI) ក្នុងការបកប្រែក៏នឹងជួយភ្ញៀវទេសចរមកពីជុំវិញពិភពលោកធ្វើដំណើរក្នុងប្រទេសកូរ៉េកាន់តែងាយស្រួលផងដែរ។

ទោះជាយ៉ាងណាក៏ដោយ យោងតាមនាយករដ្ឋមន្ត្រី Han Duck-soo បាននិយាយថា ចំនួនអ្នកទេសចរបរទេសចូលមកប្រទេសកូរ៉េបានធ្លាក់ចុះយ៉ាងខ្លាំងបន្ទាប់ពី Covid-19 ។ ដូច្នេះហើយ រដ្ឋាភិបាលនៃប្រទេសនេះមានគោលបំណងស្តារ និងកែលម្អប្រតិបត្តិការនៃឧស្សាហកម្មទេសចរណ៍ ដោយជំរុញឱ្យភ្ញៀវទេសចរមកញឹកញាប់ និងបន្តការស្នាក់នៅរបស់ពួកគេ៕

ប្រទេសជប៉ុន ៖ គេបានប្រទះឃើញត្រីរាប់ម៉ឺនក្បាលត្រូវបានទឹករលកនាំមកប្រមូលផ្តុំនៅបរិវេណឆ្នេរសមុទ្រក្នុងទីក្រុងហាកូដាតេត ខេត្តហុកកៃដូ ស្ថិតនៅភាគខាងជើងប្រទេសជប៉ុន ក្នុងចម្ងាយប្រមាណ១គីឡូម៉ែត្រ ។ អាជ្ញាធរជប៉ុនឱ្យដឹងថា វាអាចបណ្តាលមកពីត្រីធំៗដេញស៊ី ហើយអាជ្ញាធរបានប្រាប់ទៅពលរដ្ឋថា កុំយកត្រីទាំងនេះទៅធ្វើម្ហូបដាច់ខាត ។

បើតាមវីដេអូថតដោយដ្រូនបង្ហាញថា មានត្រីងា.ប់យ៉ាងច្រើនមហាសាល និងអណ្តែតនៅតាមបណ្តោយឆ្នេរសមុទ្រ ។ រីឯសារព័ត៌មានជប៉ុនបានចុះផ្សាយពីត្រីងា.ប់នៅឆ្នេរសមុទ្រ និងបញ្ជាក់ថា អាជ្ញាធរហាមមិនឱ្យពលរដ្ឋយកត្រីទាំងនេះទៅបរិភោគទេ ។ អាជ្ញាធរប្រចាំទីក្រុងហាកូដាតេត បានចេញសេចក្តីថ្លែងការណ៍មួយបញ្ជាក់ពីការប្រទះឃើញត្រីងា.ប់ដ៏ច្រើនមហាសាលនេះ ប៉ុន្តែពួកគេពុំជ្រាបពីមូលហេតុច្បាស់លាស់ដែលបណ្តាលឱ្យត្រីងា.ប់ទេ ។

លោក ហ្វូជីអូកា អ្នកស្រាវជ្រាវមកពីស្ថាប័ននេសាទប្រចាំទីក្រុងហាកូដាតេត លើកឡើងថា ត្រីទាំងនេះអាចអស់កម្លាំងខ្លាំង ដោយសារការរត់គេចពីត្រីធំៗដេញស៊ី និងការខ្វះខាតអុកស៊ីសែន នៅពេលពួកវាកំពុងហែលទឹកប្រជ្រៀតគ្នា ។ ហេតុការណ៍នេះកើតឡើងស្របគ្នាជាមួយការធ្វើដំណើររបស់ត្រីសាឌីនទៅកាន់ភាគខាងត្បូង និងអាចធ្វើឱ្យត្រីធ្វើដំណើរទៅតំបន់ទឹកត្រជាក់ភ្លាមៗ ។ អ្នកស្រាវជ្រាវរូបនេះប្រាប់ថា លោកធ្លាប់បានឮហេតុការណ៍ដូចគ្នានេះពីមុន តែក្នុងជីវិតជាក់ស្តែង លោកពុំធ្លាប់ឃើញទេ ។

ទោះយ៉ាងណា ត្រីងា.ប់នៅតាមឆ្នេរសមុទ្រអាចធ្វើឱ្យកម្រិតអុកស៊ីសែននៅក្នុងទឹកធ្លាក់ចុះ និងធ្វើឱ្យប៉ះពាល់ដល់បរិស្ថានសមុទ្រយ៉ាងខ្លាំង ។ អាជ្ញាធរជប៉ុនបានចុះមកត្រួតពិនិត្យនៅតំបន់ឆ្នេរសមុទ្រ និងព្យាយាមយកត្រីទាំងនេះទៅពិសោធន៍រកមូលហេតុពិតប្រាកដ ខណៈពលរដ្ឋក្នុងតំបន់បានប្រមូលត្រីងា.ប់យកទៅលក់ ឬធ្វើម្ហូប បើទោះជាអាជ្ញាធរហាមឃាត់ក្តី ៕ ប្រភព ៖ TNN World

បរទេស៖ ប្រទេសចិនមានមហិច្ឆតាក្នុងការដឹកនាំ 6G ឆ្ពោះទៅលើទីផ្សារពិភពលោក ដោយកំណត់គោលដៅដើម្បីធ្វើពាណិជ្ជកម្មបច្ចេកវិទ្យានេះនៅឆ្នាំ ២០៣០។

យោងតាមប្រភពព័ត៌មាន Vnexpress ដែលបានចុះផ្សាយនៅថ្ងៃទី១០ ខែធ្នូថា អាជីវកម្ម សាលារៀន និងអង្គការវិទ្យាសាស្ត្រជាច្រើននៅក្នុងប្រទេសចិន បានសម្រេចនូវរបកគំហើញនៅក្នុងបច្ចេកវិទ្យា 6G ដូចជាការរួមបញ្ចូលគ្នានៃស្ថាបត្យកម្មបណ្តាញថ្មី និង AI ។ ដូច្នេះ មហិច្ឆតារបស់ចិនមិនមែនដោយគ្មានមូលដ្ឋានទេ នៅថ្ងៃទី ២២ ខែមេសា វិទ្យាស្ថានទី ២៥ នៃបណ្ឌិត្យសភាវិទ្យាសាស្ត្រ និងឧស្សាហកម្មអវកាសចិនបានធ្វើតេស្តដោយជោគជ័យនូវល្បឿនបញ្ជូនឥតខ្សែ 100 Gigabits ក្នុងមួយវិនាទី ដែលខ្ពស់ជាងល្បឿនបណ្តាញមធ្យម 5G 100 ដង (មួយ Gb/s)។ នេះត្រូវបានចាត់ទុកថាជា របកគំហើញដ៏សំខាន់ របស់ប្រទេសចិន ក្នុងការស្រាវជ្រាវ 6G ។

6G គឺជាជំហានបន្ទាប់ឆ្ពោះទៅមុខពី 5G ហើយត្រូវបានគេរំពឹងថានឹងឈានដល់ល្បឿនមួយ terabit ក្នុងមួយវិនាទី។ នោះមានន័យថាជាមធ្យមរៀងរាល់វិនាទី អ្នកប្រើប្រាស់អាចទាញយកមាតិកា Netflix បាន ១៤២ ម៉ោងជាមួយនឹងគុណភាពបង្ហាញខ្ពស់បំផុត បើប្រៀបធៀបទៅនឹង 5G ល្បឿនទ្រឹស្តីនៃបណ្តាញ 6G គឺលឿនជាង ១០០ ដង។

យោងតាមលោក Jin Zhuanglong រដ្ឋមន្ត្រីក្រសួងឧស្សាហកម្ម និងបច្ចេកវិទ្យាព័ត៌មានបានអះអាងថា ប្រទេសចិនកំពុងនាំមុខគេលើពិភពលោកក្នុងល្បឿននៃការស្រាវជ្រាវ និងអភិវឌ្ឍន៍ 6G ។ សេចក្តីថ្លែងការណ៍នេះត្រូវបានធ្វើឡើងនៅថ្ងៃទី ២២ ខែមីនានៅទីក្រុងណានជីងដែលបានឈានដល់ការឯកភាពគ្នាលើការដាក់ពង្រាយសេវាបណ្តាញទូរស័ព្ទចល័ត 6G នៅឆ្នាំ ២០៣០ ។

នៅក្នុងបទសម្ភាសន៍មួយកាលពីថ្ងៃទី ៦ ខែធ្នូ នៅលើទូរទស្សន៍ជាតិចិន ( CCTV ) លោក Wang Zhiqin នាយករងនៃបណ្ឌិត្យសភាបច្ចេកវិទ្យាព័ត៌មាន និងទំនាក់ទំនងចិន ដែលជាអ្នកដឹកនាំក្រុមផ្សព្វផ្សាយ 6G ជាតិបាននិយាយថា “សម្រាប់អ្នកប្រើប្រាស់ទូទៅ 6G គឺលឿនជាង 5G ទៅទៀត ប៉ុន្តែនៅពេលដែលធ្វើពាណិជ្ជកម្ម បច្ចេកវិទ្យានេះនឹងផ្លាស់ប្តូរទាំងស្រុងនូវវិធីទំនាក់ទំនងរបស់មនុស្ស ដោយបើកគំរូអាជីវកម្មថ្មីទាំងស្រុង”។

ហេតុនេះហើយ វិស័យចំនួនបីដែលនឹងផ្លាស់ប្តូរយ៉ាងខ្លាំងនៅពេលដែល 6G លេចឡើងគឺ៖ ការតភ្ជាប់ការយល់ឃើញរបស់មនុស្ស និង AI; ការតភ្ជាប់បន្តពីផែនដីទៅលំហអាកាស; និងការតភ្ជាប់រូបវន្តឌីជីថល ដោយនាំយកអ្វីដែលមាននៅក្នុងពិភពរូបវន្តទៅកាន់ពិភពឌីជីថល ដើម្បីបង្កើតពិភពលោកស្របគ្នា។ លោក Wang Zhiqin ក៏បានសង្កត់ធ្ងន់ទៀតថា បណ្តាញ 6G នាពេលអនាគតនឹងមិនត្រឹមតែមានល្បឿនលឿន និងមានស្ថេរភាពជាង 5G ប៉ុណ្ណោះទេ ប៉ុន្តែវាក៏នឹងក្លាយជាកម្លាំងជំរុញសម្រាប់ទិន្នន័យធំ AI, Cloud, Blockchain និងវិស័យផ្សេងទៀតដើម្បីអភិវឌ្ឍរួមគ្នាផងដែរ៕

កាលពីថ្ងៃសៅរ៍ ទី៩ ខែធ្នូ ឆ្នាំ២០២៣នេះ ប្រធានរដ្ឋសភាវៀតណាមគឺ លោក Vuong Dinh Hue បានកាត់ខ្សែបូ ដើម្បីសម្ពោធទីប្រជុំជនវៀតណាមថ្មីនិងដំបូងគេមួយនៅក្នុងខេត្ត Udon Thani ភាគឦសានប្រទេសថៃ។

លោករដ្ឋសភាក៏បានសម្តែងនូវសេចក្តីរីករាយជាពន់ពេក ដែលតម្លៃនៃវប្បធម៌និងប្រវត្តិសាស្ត្ររបស់វៀតណាមត្រូវបានផ្សព្វផ្សាយនៅប្រទេសថៃ ដោយនៅទីនោះបានសាងសង់ទាំងវត្តអារាមវៀតណាម និងទីតាំងប្រវត្តិសាស្រ្តវៀតណាមចំនួនបីដើម្បីឧទ្ទិសដល់លោកប្រធានាធិបតីហូជីមិញ។

លោកបានថ្លែងអំណរគុណដល់រដ្ឋបាលខេត្ត Udon Thani និងអ្នកឧបត្ថម្ភសម្រាប់ការគាំទ្រដល់គម្រោង Vietnam Town ។ ដោយគូសបញ្ជាក់ថា វាជាទីប្រជុំជនវៀតណាមដំបូងគេ និងមានតែមួយគត់លើពិភពលោក ដោយលោកប្រធានរដ្ឋសភា Hue បានមានប្រសាសន៍ថា «លោកជឿជាក់យ៉ាងមុតមាំថា ដោយមានការគាំទ្រយ៉ាងខ្លាំងពីរដ្ឋបាលមូលដ្ឋាន ទីក្រុងថ្មីនេះនឹងជាកន្លែងបើកអាជីវកម្មផ្សេងៗ ក៏ដូចជាទីតាំងវប្បធម៌ និងទេសចរណ៍ដ៏មមាញឹក»។ ដូច្នេះហើយវាបានក្លាយជាគោលដៅទេសចរណ៍សម្រាប់ទាំងជនជាតិវៀតណាមនិងទាក់ទាញភ្ញៀវទេសចរណ៍អន្តរជាតិ នៅពេលបានមកលេងថៃក៏ដូចជាបានមកវៀតណាមដូចគ្នាដែរ ហើយក៏បានស្គាល់នូវវប្បធម៌សម្បូរបែបរវាងទំាង២ជាតិសាសន៍គឺវៀតណាមនិងថៃ។

អភិបាលខេត្ត Udon Thani លោក Wanchai Kongkasem បានពិនិត្យមើលឡើងវិញនូវទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំង២ក្នុងរយៈពេលប៉ុន្មានឆ្នាំកន្លងមកនេះរួចទៅហើយ និងបានគូសសម្គាល់ផងដែរថាសហគមន៍វៀតណាមបានដើរតួនាទីជាកត្តាសំខាន់ក្នុងការជំរុញទំនាក់ទំនងរវាងប្រទេសទាំងពីរ មានន័យថាការបង្កើតទីប្រជុំជនវៀតណាមគឺជានិមិត្តរូបនៃសាមគ្គីភាព មិត្តភាព និងកិច្ចសហប្រតិបត្តិការរវាងប្រទេស និងប្រជាជនពួកគេទាំង២។

បើយោងតាមសមាគមជនជាតិវៀតណាមនៅខេត្ត Udon Thani បានឲ្យដឹងថា នៅទីនោះមានជនជាតិវៀតណាមប្រមាណ៦ម៉ឺននាក់ ដែលប្រជាជន ៩៩% សុទ្ធតែជាជនជាតិដើមវៀតណាម និងមានជនជាតិថៃត្រឹមតែ១%ប៉ុណ្ណោះផងដែរ៕

បរទេស៖ រដ្ឋមន្ត្រីក្រសួងឧស្សាហកម្ម និងពាណិជ្ជកម្ម បាននិយាយថា វៀតណាមនឹងទិញអគ្គិសនី រួមជាមួយធ្យូងថ្មបន្ថែមទៀតពីប្រទេសឡាវនៅឆ្នាំក្រោយ សម្រាប់ផលិតកម្ម និងសន្តិសុខជាតិ។

យោងតាមប្រភពព័ត៌មាន SSGP English Edition ដែលបានរាយការណ៍នៅថ្ងៃទី១០ ខែធ្នូថា ក្រសួងឧស្សាហកម្ម និងពាណិជ្ជកម្មវៀតណាម ក៏ដូចជាក្រសួងថាមពល និងរ៉ែរបស់ប្រទេសឡាវបានចុះហត្ថលេខាលើអនុស្សរណៈនៃការយល់ដឹងអំពីកិច្ចសហប្រតិបត្តិការក្នុងវិស័យធ្យូងថ្ម។ ដូច្នេះ ការនាំចូលថាមពលអគ្គិសនី និងធ្យូងថ្មពីប្រទេសឡាវ មិនត្រឹមតែជួយដល់ការអភិវឌ្ឍន៍សេដ្ឋកិច្ចរវាងប្រទេសទាំងពីរឱ្យកាន់តែរីកចម្រើនប៉ុណ្ណោះទេ ថែមទាំងអាចសម្រេចបាននូវគោលដៅពីរនៃសន្តិសុខជាតិ និងការពារជាតិ ក៏ដូចជាការផ្តល់នូវថាមពលសម្រាប់សេដ្ឋកិច្ចផងដែរ។

ថាមពលធ្យូងថ្ម និងថាមពលវារីអគ្គិសនី រួមទាំងទួរប៊ីនឧស្ម័នរបស់ប្រទេសឡាវបានដើរតួយ៉ាងសំខាន់ក្នុងការធានាការផ្គត់ផ្គង់អគ្គិសនីវៀតណាមសម្រាប់ប្រព័ន្ធជាតិនៅឆ្នាំក្រោយ។ ទន្ទឹមនឹងនេះ ថាមពលខ្យល់ និងថាមពលព្រះអាទិត្យនឹងកកើតឡើងវិញ ដែលត្រូវបានប្រមូលផ្តុំទៅតាមតម្រូវការ និងសមត្ថភាពស្រូបយករបស់បណ្តាញអគ្គិសនី។ យោងតាមផែនការផ្គត់ផ្គង់ និងប្រតិបត្តិការឆ្នាំ ២០២៤ របស់ក្រសួងឧស្សាហកម្ម និងពាណិជ្ជកម្ម បានឱ្យដឹងថា ទិន្នផលអគ្គិសនីដែលបានផលិត និងនាំចូលមានជិត ៣០៦.២៦ ពាន់លាន kWh ដែលក្នុងនោះរដូវវស្សាមាន ៥២%។

មូលហេតុដែលជំរុញឱ្យប្រទេសវៀតណាមនាំចូលអគ្គិសនី និងធ្យូងថ្មពីឡាវ គឺដោយសារតម្លៃប្រកួតប្រជែងក្នុងទីផ្សារទាប បើធៀបនឹងប្រទេសមួយចំនួន។ យោងតាមក្រសួង បានឱ្យដឹងទៀតថា វៀតណាមនឹងទិញថាមពលអគ្គិសនី ៣,០០០ MW ពីប្រទេសឡាវនៅឆ្នាំ ២០២៥ រួមទាំង ៥,០០០ MW នៅឆ្នាំ ២០៣០ ហើយអាចកើនឡើងដល់ ៨,០០០ MW ប្រសិនបើលក្ខខណ្ឌអនុញ្ញាត។ បច្ចុប្បន្នក្នុងរយៈពេល ១១ ខែនេះ បរិមាណអគ្គិសនីរបស់វៀតណាមដែលនាំចូលសរុបពីឡាវ និងចិន មានជិត ៤ ពាន់លានគីឡូវ៉ាត់ម៉ោង ដែលស្មើនឹង ១.៥% នៃទិន្នផលប្រព័ន្ធទាំងមូល។

ទោះជាយ៉ាងណាក៏ដោយ ក្រសួងនេះបានវាយតម្លៃថាប្រទេសវៀតណាមនៅឆ្នាំ ២០២៤ នឹងក្លាយជាឆ្នាំដែលកត្តាមិនអំណោយផល ក៏ដូចជាជួបការលំបាកជាច្រើនដែលលេចឡើងសម្រាប់ការផ្គត់ផ្គង់អគ្គិសនី ដូចជាគ្មានប្រភពថាមពលធំសម្រាប់ដំណើរការ បរិមាណឧស្ម័នដែលផ្គត់ផ្គង់សម្រាប់ផលិតថាមពលពីប្រភពឧស្ម័នដែលមានស្រាប់នឹងថយចុះ ដូច្នេះប្រភពឧស្ម័នថ្មី គឺនៅពីក្រោយកាលវិភាគ។ ទន្ទឹមនឹងនេះ តម្រូវការធ្យូងថ្មសម្រាប់ផលិតអគ្គិសនីកើនឡើង ហេតុនេះហើយការនាំចូលត្រូវតែកើនឡើង ដោយគេរំពឹងថា រោងចក្រនឹងត្រូវនាំចូលធ្យូងថ្មជាង ២៦ លានតោនសម្រាប់អគ្គិសនីនៅឆ្នាំ ២០២៤៕

ប្រទេសចិន ៖ ភ្ញៀវទេសចរបរទេសជាច្រើននាក់បានមកកម្សាន្តនៅប្រទេសចិន ក្នុងអំឡុងពេលជិតពិធីបុណ្យចូលឆ្នាំសកល និងថ្ងៃឈប់សម្រាកយូរថ្ងៃក្នុងរដូវស្លឹកលាស់ ដោយសារប្រទេសចិនអនុវត្តវិធានការលើកលែងទិដ្ឋាការដល់ភ្ញៀវទេសចរបរទេសឡើងវិញ ។ វិធានការនេះបានជំរុញការធ្វើដំណើររបស់ភ្ញៀវទេសចររវាងចិន និងប្រទេសផ្សេងៗ ក៏ដូចជាជំរុញការផ្តល់សេវាកម្ម និងការបើកជើងហោះហើរឆ្លងប្រទេសបន្ថែមទៀត ។

ក្រៅពីនេះ ភ្ញៀវទេសចរចិនបានផ្តល់រង្វាន់ឱ្យខ្លួនឯងក្រោយពីពួកគេបានបំពេញការងារនឿយហត់ ដោយការធ្វើដំណើរកម្សាន្តនៅតាមប្រទេសនានា ហើយកំណើនភ្ញៀវទេសចរនេះបានទទួលប្រយោជន៍ពីវិធានការលើកលែងទិដ្ឋាការផងដែរ ។ ចំនួនការកក់សំបុត្រហោះហើរឆ្លងប្រទេសកើនឡើង បានធ្វើឱ្យក្រុមហ៊ុនអាកាសចរណ៍ផ្សេងៗត្រៀមបង្កើនជើងហោះហើរបន្ថែមទៀត រួមទាំងសេវាកម្មបើកការហោះហើរថ្មី ដើម្បីបំពេញតម្រូវការការធ្វើដំណើរកើនឡើងរបស់ភ្ញៀវទេសចរ ។

អ្នកនាង យូ ហៃយ៉ាន នាយករងផ្នែកទីផ្សារក្រុមហ៊ុន China Southern Airlines លើកឡើងថា ៖ «ពេលនេះ China Southern Airlines មានជើងហោះហើរឆ្លងប្រទេសចំនួន១០៧ជើង នៅក្នុងប្រទេសនិងតំបន់ចំនួន៣៨ ក្នុងនោះមានជើងហោះហើរទៅ-មក ចំនួន៦០០ជើងរៀងរាល់សប្តាហ៍» ។

អ្នកនាងបន្តថា ៖ «យើងមានគម្រោងផ្តល់សេវាកម្មហោះហើរត្រង់ឡើងវិញរវាងទីក្រុង Zhengzhou ខេត្តហៃណាន ស្ថិតនៅភាគកណ្តាលប្រទេសចិន ។ លើសពីនេះ យើងនឹងបើកហោះហើរទៅកាន់ទីក្រុងឡុងដ៍ម្តងទៀត ចាប់ពីថ្ងៃទី១២ ខែធ្នូ ឆ្នាំ២០២៣ ក៏ដូចជាជើងហោះហើរផ្សេងទៀត ស្របពេលប្រទេសចិនមានវិធានការលើកលែងទិដ្ឋាការដល់ភ្ញៀវទេសចរ ។ រីឯការធ្វើដំណើរបន្ទាន់ យើងបានរៀបចំគម្រោងហោះហើរប្រចាំថ្ងៃ រវាងទីក្រុងក្វាងចូវ និង Sabah របស់ប្រទេសម៉ាឡេស៊ីផងដែរ» ។

ជាមួយគ្នានេះ ចាប់ពីខែធ្នូ ឆ្នាំ២០២៣ រហូតដល់ខែមករា ឆ្នាំ២០២៤ ក្រុមហ៊ុនអាកាសចរណ៍ China Eastern Airlines នឹងផ្តល់សេវាកម្មហោះហើរត្រង់រវាងទីក្រុងសៀងហៃ និងតំបន់គោលដៅពេញនិយមមួយចំនួននៅក្រៅប្រទេស ។ ក្រុមហ៊ុននេះរំពឹងថា ចំនួនការហោះហើរឆ្លងប្រទេស និងតំបន់ នឹងកើនឡើងរហូតដល់៨០% នៃចំនួនជើងហោះហើរសរុបក្នុងអំឡុងពេលមុនការឆ្លងរាតត្បាតនៃជំងឺកូវីដ-១៩ (គឺនៅឆ្នាំ២០១៩) ។ កត្តាសំខាន់មួយទៀត គឺលទ្ធភាពការធ្វើដំណើរកើនឡើងបានធ្វើឱ្យតម្លៃសំបុត្រយន្តហោះធ្លាក់ចុះ និងជួយជំរុញការធ្វើដំណើរចេញក្រៅប្រទេស ៕ ប្រភព ៖ TNN World