បរទេស៖ ទីភ្នាក់ងារអង្គការសហប្រជាជាតិ (UNODC ) បាននិយាយថា បច្ចុប្បន្នមីយ៉ាន់ម៉ាក្លាយជាប្រទេសដែលផលិតអាភៀនដ៏ធំបំផុតរបស់ពិភពលោក បន្ទាប់ពីផលិតកម្មនៅក្នុងប្រទេសអាហ្វហ្គានីស្ថានបានធ្លាក់ចុះដោយសារតែការហាមឃាត់របស់ពួកតាលីបង់។

យោងតាមប្រភពព័ត៌មាន ABC News ដែលបានចុះផ្សាយនៅថ្ងៃទី១២ ខែធ្នូថ្មីៗនេះថា ប្រទេសមីយ៉ាន់ម៉ាផលិតអាភៀនបាន ១០៨០ តោនក្នុងឆ្នាំ ២០២២-២០២៣ ពោលគឺច្រើនជាងប្រទេសអាហ្វហ្គានីស្ថានបីដងក្នុងរយៈពេលដូចគ្នានេះ។

បើតាមការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម (UNODC) ក៏បានឱ្យដឹងទៀតថា ការដាំដុះអាភៀននៅអាហ្វហ្គានីស្ថានបច្ចុប្បន្នបានថយចុះ ៩៥% បន្ទាប់ពីរដ្ឋាភិបាលតាលីបង់ដាក់បម្រាមគ្រឿងញៀន។ ដូច្នេះ ការផ្គត់ផ្គង់អាភៀនសកលបានផ្លាស់ប្តូរទៅកាន់ប្រទេសមីយ៉ាន់ម៉ា ដែលជាប្រទេសប្រឈមនឹងភាពមិនច្បាស់លាស់ជាច្រើនបន្ទាប់ពីរដ្ឋប្រហារឆ្នាំ ២០២១។

សព្វថ្ងៃនេះ ប្រាក់ចំណូលរបស់អ្នកដាំអាភៀនមីយ៉ាន់ម៉ាបានកើនឡើង ៧៥% នៅពេលដែលតម្លៃទំនិញនេះកើនឡើងដល់ ៣៥៥ ដុល្លារ/គីឡូក្រាម។ UNODC បាននិយាយថា តំបន់ដែលស្ថិតនៅក្រោមការដាំដុះអាភៀនបានកើនឡើង ១៨% ធៀបនឹងរយៈពេលដូចគ្នាកាលពីឆ្នាំមុន ពី ៤០,១០០ ទៅ ៤៧,០០០ ហិកតា ដែលជំរុញឱ្យផលិតភាពដល់កម្រិតខ្ពស់បំផុតចាប់តាំងពីឆ្នាំ ២០០១។

លោក Jeremy Douglas អ្នកតំណាងប្រចាំតំបន់របស់ UNODC បាននិយាយថា អស្ថិរភាពបន្ទាប់ពីរដ្ឋប្រហារយោធានៅក្នុងប្រទេសមីយ៉ាន់ម៉ា បានជំរុញឱ្យកសិករនៅតំបន់ដាច់ស្រយាលដាំអាភៀនដើម្បីចិញ្ចឹមជីវិត។ នេះបើយោងតាមរបាយការណ៍របស់អង្គការសហប្រជាជាតិបាននិយាយទៀតថា តំបន់ដែលកំពុងដាំអាភៀនបានកើនឡើងច្រើនជាងគេនៅតំបន់ព្រំដែនភាគខាងជើងនៃប្រទេសមីយ៉ាន់ម៉ា រួមមានរដ្ឋ Shan រដ្ឋ Chin និង Kachin ហើយផលិតភាពក៏កើនឡើងផងដែរ។

លោក Douglas ក៏បានព្រមានដែរថា ការបង្កើនការប្រយុទ្ធគ្នារវាងយោធាមីយ៉ាន់ម៉ា និងក្រុមឧទ្ទាមអាចជំរុញឱ្យមានការដាំដុះអាភៀនកាន់តែច្រើនឡើង។ ហេតុនេះហើយ ការពង្រីកការដាំដុះអាភៀនអាចជំរុញការផលិត និងការជួញដូរគ្រឿងញៀន ការលាងលុយកខ្វក់ និងការក្លែងបន្លំតាមអ៊ីនធឺណិតជាដើម។ ទោះជាយ៉ាងណាក៏ដោយ រដ្ឋាភិបាលមីយ៉ាន់ម៉ាមិនបានធ្វើអត្ថាធិប្បាយលើរបាយការណ៍របស់អង្គការសហប្រជាជាតិនោះទេ៕

ប្រទេសអូស្ត្រាលី ៖ កាលពីថ្ងៃទី១១ ខែធ្នូ ឆ្នាំ២០២៣ មានការបង្ហោះវីដេអូមួយក្នុងប្រព័ន្ធផ្សព្វផ្សាយអូស្ត្រាលី ដោយក្នុងវីដេអូនេះបានបង្ហាញពីត្រីបាឡែនដ៏ធំ១ក្បាលត្រូវបានគេប្រទះឃើញនៅបរិវេណឆ្នេរសមុទ្រ «Port Beach» ស្ថិតក្នុងទីក្រុង Perth ប្រទេសអូស្ត្រាលី ។ ភ្ញៀវទេសចរដែលបានឃើញត្រីបាឡែន ក៏នាំគ្នាហែលទឹកទៅប៉ះវា ខណៈមនុស្សផ្សេងទៀតបង្ហាញក្តីបារម្ភ ។

វីដេអូដែលថតបង្ហោះនេះមិនបានកើតឡើងជាញឹកញាប់ទេ នៅពេលមានត្រីបាឡែនយ៉ាងធំ១ក្បាលបានហែលមកកាន់តំបន់ទឹករាក់ ។ ភ្ញៀវទេសចរប្រមាណជាង១០នាក់ដែលបានទៅកម្សាន្តនៅឆ្នេរសមុទ្រ Port Beach បានហែលទឹកទៅរកត្រីបាឡែនដើម្បីប៉ះខ្លួនវា ។ គេបានថតវីដេអូនេះ កាលពីថ្ងៃទី៩ ខែធ្នូ ឆ្នាំ២០២៣ ។

សារព័ត៌មានអូស្ត្រាលីរាយការណ៍ថា ត្រីបាឡែន១ក្បាលនេះបានហែលទឹកទៅរកតំបន់ទឹកជ្រៅ ក្រោយពីវាបានហែលមកកាន់ទឹករាក់ប្រមាណជា១ម៉ោង ។ ចំណែកអ្នកស្រុកមួយចំនួនដែលបានឃើញហេតុការណ៍នេះបានបង្ហាញក្តីបារម្ភអំពីសុខភាព និងសុវត្ថិភាពត្រីបាឡែន ដោយសារតែវាហែលមកកៀកឆ្នេរសមុទ្រខុសធម្មតា ។

រីឯអ្នកវិទ្យាសាស្ត្រផ្នែកសមុទ្របាននិយាយមកកាន់សារព័ត៌មាន BBC ថា សត្វចិញ្ចឹមកូនដោយទឹកដោះនេះ អាចភ្ញាក់ផ្អើលនឹងវត្តមានរបស់មនុស្សម្នា ហើយទង្វើនេះចាត់ទុកថា គឺជាទង្វើខុសប្រក្រតី និងមានគ្រោះថ្នាក់ដល់សត្វ ។ អ្នកវិទ្យាសាស្ត្ររូបនេះបន្តថា អ្នកហែលទឹកទៅក្បែរត្រីបាឡែន នឹងធ្វើឱ្យវាភ្ញាក់ផ្អើល ហើយរឿងល្អបំផុតដែលពួកគេគួរធ្វើនៅក្នុងស្ថានភាពបែបនេះ គឺបណ្តោយឱ្យវាហែលទឹកតាមចិត្តរបស់វា ។

ចុងក្រោយ សារព័ត៌មានអូស្ត្រាលីរាយការណ៍ថា ត្រីបាឡែនដែលមានប្រវែង១៥ម៉ែត្រនេះបានងា.ប់ហើយ នៅថ្ងៃទី១២ ខែធ្នូ ឆ្នាំ២០២៣ ។ គេគិតថា មូលហេតុដែលវាហែលមកក្បែរឆ្នេរសមុទ្រ ដោយសារវាត្រូវបាននាវាបុក ហើយអាជ្ញាធរក៏បានបិទឆ្នេរសមុទ្រនេះ ដើម្បីបម្លាស់ទីខ្មោចត្រីបាឡែនចេញពីឆ្នេរសមុទ្រ ។ អាជ្ញាធរបញ្ជាក់ថា នឹងរកមូលហេតុនៃការងា.ប់របស់វាឱ្យឃើញ ៕ ប្រភព ៖ TNN World

ក្នុងឱកាសប្រារព្ធខួបលើកទី ២៥ នៃវត្តមានរបស់ Google ដែលជាគេហទំព័រធំបំផុតរបស់ពិភពលោក Google បានបង្ហោះវីដេអូមួយដែលបង្ហាញពីនិន្នាការសកលលោកដែលគួរឱ្យកត់សម្គាល់បំផុតគ្រប់ពេលវេលា ដោយផ្តល់នូវទស្សនវិស័យពិសេសលើចំណាប់អារម្មណ៍ និងកង្វល់របស់មនុស្សក្នុងរយៈពេលជាច្រើនឆ្នាំមកនេះ។

ក្នុងវីដេអូនោះដែរក្រុម BLACKPINK តំណាងកូរ៉េខាងត្បូង និង K-pop បានក្លាយជាក្រុមចម្រៀងនារីដែលមានការស្វែងរកច្រើនបំផុតក្នុងប្រវត្តិសាស្ត្រនៃវេទិកានេះ។ សមិទ្ធិផលដ៏សំខាន់នេះគឺបង្ហាញពីភាពអស្ចារ្យណាស់របស់ក្រុមចម្រៀង BLACKPINK ដែលបង្កើតឡើងនៅខែសីហា ឆ្នាំ២០១៦ ហើយក្នុងរយៈពេល២-៣ឆ្នាំក្រោយមក ពួកគេបានគ្រប់គ្រងលើវិស័យ K-pop ដែលមានមនុស្សជាច្រើនស្គាល់ដល់សព្វថ្ងៃនេះ។

BLACKPINK បានបន្តជាចំណងជើងគ្រប់គ្រងលើប្រព័ន្ធផ្សព្វផ្សាយនានព្រមទាំងបង្កើតសមិទ្ធិជាច្រើននៅក្នុងវិស័យតន្រី្តផ្នែកផ្សេងៗដូចជាការលក់អាល់ប៊ុម ការប្រគំតន្រ្តីដំណើរទេសចរណ៍ជុំវិញពិភពលោក ខណៈបានក្លាយជាក្រុមចម្រៀងនារីដែលមានការស្វែងរកច្រើនជាងគេទៀតនៅលើ Google ក្នុងរយៈពេលច្រើនឆ្នាំមកនេះ។

ជាមួយជោគជ័យនេះ ក្រុម BLACKPINK ទើបតែជាប់ក្នុងបញ្ជីកំពូលអ្នកបង្ហាញម៉ូតឆ្នើមប្រចាំឆ្នាំ២០២៣ ខណៈបានក្លាយជាតារាK-Popដំបូងក្នុងប្រវត្តិសាស្រ្តដែលទទួលបានមេដាយកិត្តិយសពីស្តេចអង់គ្លេស។

មិនត្រឹមតែសាងភាពល្បីល្បាញជុំវិញពិភពលោកប៉ុណ្ណោះទេ តែសមាជិកទាំង៤ រួមមាន Jisoo, Jennie Rosé និង Lisa សុទ្ធតែបង្កើតឥទ្ធិពលរៀងៗខ្លួនជាអ្នកតំណាងផលិតផលធំៗលំដាប់ពិភពលោក ហើយក្រុមទាំងមូលបានសាងភាពអស្ចារ្យបំបែកប្រវត្តិសាស្រ្តក្នុងវិស័យតន្រ្តីជាច្រើនរាប់មិនអស់៕

បរទេស៖ កំពូលកីឡាករបាល់ទាត់របស់ពិភពលោក Lionel Messi និង Cristiano Ronaldo នឹងជួបគ្នាម្តងទៀតនៅលើទីលានក្នុងប្រទេសអារ៉ាប៊ីសាអូឌីតនៅដើមឆ្នាំក្រោយ។

យោងតាមប្រភពព័ត៌មាន Yahoo Finance Canada ដែលបានចុះផ្សាយនៅថ្ងៃទី១២ ខែធ្នូថ្មីៗនេះថា ក្លឹប Inter Miami របស់ Messi នឹងចូលរួមក្នុងការប្រកួតមិត្តភាពជាមួយ Al Nasser ដែលជាក្លឹបបាល់ទាត់របស់ Ronaldo នៅដើមឆ្នាំក្រោយ។ បណ្តាញប្រព័ន្ធផ្សព្វផ្សាយសង្គមរបស់ Inter Miami ដែលជាក្រុមដ៏ល្បីល្បាញរបស់សហរដ្ឋអាមេរិក បានបង្ហោះសារបញ្ជាក់ពីការចូលរួមរបស់ពួកគេក្នុងការប្រកួតកម្ដៅសាច់ដុំ Riyadh Season Cup ដែលជាការប្រកួតសន្សំពិន្ទុ។

Inter Miami បានបញ្ជាក់ថា ពួកគេគ្រោងនឹងប្រកួតជាមួយក្រុមយក្ស Al Hilal ដែលមានតារាដូចជា Neymar, Sergej Milinkovic-Savic, Rúben Neves, Aleksandar Mitrovic, Kalidou Koulibaly និង Malcom នៅថ្ងៃទី ២៩ ខែមករា ឆ្នាំ ២០២៤ និង Al Nasser រយៈពេលបីថ្ងៃចាប់ពីថ្ងៃទី១ ខែកុម្ភៈ ឆ្នាំ២០២៤ ក្នុងការប្រកួតដែលមានកីឡាករឆ្នើមពីរនាក់គឺ Messi និង Ronaldo។

ក្លឹបដ៏ល្បីល្បាញមកពីទឹកដី Uncle Sam ក៏បានបញ្ជាក់ទៀតថា Lionel Messi ដែលជាកំពូលកីឡាករបាល់ទាត់ឆ្នើមរូបនេះ ពិតជាបានចូលរួមក្នុងការប្រកួតខាងលើនេះមែន។ នោះមានន័យថា អ្នកគាំទ្របាល់ទាត់ជុំវិញពិភពលោកនឹងបានឃើញ Messi ជួបគ្នាម្តងទៀតជាមួយនឹង Cristiano Ronaldo ដែលជាកីឡាករដ៏ល្បីល្បាញបំផុតរបស់ក្រុម Al Nasser បន្ទាប់ពីពួកគេទាំងពីបានប៉ះគ្នាជាលើកចុងក្រោយកាលពីដើមឆ្នាំ ២០២៣។

គួរបញ្ជាក់ដែរថា កីឡាករទាំងពីរូបនេះបានប្រកួតគ្នាចំនួន ៣៦ ដងដោយពួកគេប៉ះគ្នាជាលើកដំបូងនៅឆ្នាំ ២០០៨។ បច្ចុប្បន្ន Messi គឺជាម្ចាស់ជើងឯក Ballon d’Or ប្រាំបីសម័យកាល និងជាម្ចាស់ជើងឯក World Cup ឆ្នាំ 2022 ហើយក៏ជាកីឡាករឆ្នើមដំបូងរបស់ទស្សនាវដ្តី TIME ផងដែរ។ រីឯ Ronaldo គឺជាកីឡាករដ៏អស្ចារ្យបំផុតដែលបានឈ្នះពានរង្វាន់ Ballon d’Or ចំនួនប្រាំ និងពានរង្វាន់ UEFA Men’s Player of the Year Awards ចំនួនបី និងស្បែកជើងមាសអឺរ៉ុបចំនួន ៤ ផងដែរ៕

ប្រទេសជប៉ុន ៖ កាលពីថ្ងៃទី១១ ខែធ្នូ ឆ្នាំ២០២៣ សារព័ត៌មាន Kyodo News រាយការណ៍ថា ក្រុមហ៊ុនអាកាសចរណ៍ជប៉ុននឹងអនុញ្ញាតឱ្យអ្នកដំណើរយកឆ្កែ និងឆ្មាតូចៗជិះយន្តហោះសម្រាប់ការធ្វើដំណើរក្នុងប្រទេសជប៉ុន ។ ការអនុញ្ញាតនេះគិតចាប់ពីខែមករា ឆ្នាំ២០២៤ តទៅ ដើម្បីបំពេញតម្រូវការធ្វើដំណើររបស់អតិថិជនកាន់តែច្រើន ។

Star Flyer Inc. គឺជាក្រុមហ៊ុនអាកាសចរណ៍ដំបូងគេនៅប្រទេសជប៉ុន ដែលបានអនុញ្ញាតឱ្យអ្នកដំណើរយកសត្វចិញ្ចឹមរបស់ពួកគេជិះយន្តហោះ កាលពីខែមីនា ឆ្នាំ២០២២ សម្រាប់ការធ្វើដំណើររវាងអាកាសយានដ្ឋាន Kitakyushu នៅខេត្តហ្វូគូអូកា និងអាកាសយានដ្ឋាន Haneda នៅទីក្រុងតូក្យូ ។ ក្រុមហ៊ុនបានសម្រេចចិត្តពង្រីកសេវាកម្មនេះ ដោយសារទទួលបានការគាំទ្រពីអតិថិជន ។

អ្នកដំណើរម្នាក់អាចយកសត្វចិញ្ចឹមបាន១ក្បាលទៅតាមខ្លួន ហើយជើងហោះហើរនីមួយៗអនុញ្ញាតឱ្យមានសត្វចិញ្ចឹមច្រើនបំផុតចំនួន២ក្បាល ។ រីឯសំបុត្រសម្រាប់សត្វចិញ្ចឹម១ក្បាលមានតម្លៃ៣៥០ដុល្លារអាមេរិក ខណៈម្ចាស់របស់វានឹងទទួលបានកន្លែងអង្គុយនៅក្បែរសត្វពួកគេ គឺកៅអីជួរក្រោយបង្អស់ក្នុងយន្តហោះ ។ ប៉ុន្តែក្រុមហ៊ុនអាកាសចរណ៍បានស្នើសុំការសហការពីអ្នកដំណើរដែលបានយកសត្វចិញ្ចឹមមកជាមួយ ហាមផ្តល់ចំណីឱ្យវាស៊ីក្នុងអំឡុងពេលហោះហើរ ប៉ុន្តែពួកគេអាចផ្តល់ទឹកឱ្យវាផឹកបាន ។

ចាប់ពីឆ្នាំ២០២៤ តទៅ ក្រុមហ៊ុនអាកាសចរណ៍ជប៉ុននឹងអនុញ្ញាតឱ្យអ្នកដំណើរអាចយកសត្វចិញ្ចឹមជិះយន្តហោះរវាងអាកាសយានដ្ឋាន Haneda និង Kansai ក្នុងខេត្តអូសាកា និងអាកាសយានដ្ឋាន Yamaguchi Ube នៅខេត្ត Yamaguchi ព្រមទាំងអាកាសយានដ្ឋាន Fukuoka និងអាកាសយានដ្ឋាន Chubu នៅខេត្ត Aichi និង Fukuoka ។

អ្នកតំណាងក្រុមហ៊ុន Star Flyer Inc. លើកឡើងថា ៖ «រហូតមកដល់ពេលបច្ចុប្បន្ន មានអតិថិជនប្រើប្រាស់សេវាកម្មនេះប្រមាណ៣០០លើកក្នុងជើងហោះហើររវាងអាកាសយានដ្ឋាន Kitakyushu និងអាកាសយានដ្ឋាន Haneda» ៕ ប្រភព ៖ mgronline

ប្រទេសវៀតណាម ៖ ប្រទេសចិន គឺជាទីផ្សារទុរេនដ៏ធំបំផុតនៅលើពិភពលោក ហើយមានប្រទេសចំនួន៤ ដែលបាននាំចេញទុរេនទៅលក់ក្នុងទីផ្សារចិន រួមមាន ៖ ប្រទេសថៃ, ម៉ាឡេស៊ី, ហ្វីលីពីន និងវៀតណាម ។ នៅខែធ្នូ ឆ្នាំ២០២៣ នេះ កសិករនៅតំបន់ Cai Lai ខេត្ត Tien Giang ប្រទេសវៀតណាម បានប្រមូលផលទុរនលក់ក្នុងតម្លៃចាប់ពី៩ម៉ឺន៧ពាន់ដុង រហូតដល់១២ម៉ឺន៥ពាន់ដុងក្នុង១គីឡូក្រាម ។

លោក Doan Nguyen Duc នាយកក្រុមហ៊ុន Hoang Anh Gia Lai (HAGL) លើកឡើងថា ក្រុមហ៊ុនរបស់លោកទើបតែលក់ទុរេនបានចំនួន៤៤០តោន ក្នុងតម្លៃជិតស្មើ១០ម៉ឺនដុងក្នុង១គីឡូក្រាម ហើយក្រុមហ៊ុនទទួលបានប្រាក់ចំណូលរាប់លានដុងផងដែរ ។ ទុរេនភាគច្រើនបាននាំចេញទៅលក់នៅប្រទេសចិន ហើយដោយសារទិន្នផលទុរេនមានបរិមាណតិចនៅប្រទេសវៀតណាម ធ្វើឱ្យក្រុមហ៊ុនលោកអាចលក់ទុរេនបានរាប់រយតោន ។

កាលពីឆ្នាំ២០២១ ការនាំចូលទុរេនស្រស់របស់ប្រទេសចិន បានកើនឡើង៨២,៤% ហើយបានកើនឡើងខ្ពស់ជាងឆ្នាំ២០១៧ រហូតដល់៤ដងឯណោះ ។ ហេតុនេះ តម្លៃទុរេនម៉ន់ថងវៀតណាមកើនឡើងខ្ពស់ ដោយសារមានតម្រូវការច្រើនពីប្រទេសចិន ។

នៅខែធ្នូ ឆ្នាំ២០២៣ តម្លៃទុរេនម៉ន់ថងរបស់ថៃ ឬពូជដូណា ដែលបានដាំដុះនៅប្រទេសវៀតណាម បានកើនឡើង៣០% គឺមានតម្លៃ១៥ម៉ឺនដុងក្នុង១គីឡូក្រាម ។ រីឯតំបន់ដីសណ្តទន្លេមេគង្គ និងតំបន់ខ្ពង់រាបកណ្តាល តម្លៃទុរេនបានកើនឡើងខ្ពស់ កាលពីចុងខែវិច្ឆិកា ឆ្នាំ២០២៣ ក្នុងនោះទុរេនម៉ន់ថងទទួលបានប្រាក់ចំណេញច្រើនបំផុត ។

ចំណែកទុរេនម៉ន់ថងមានគុណភាពល្អជាងគេ ដែលមានទម្ងន់ចាប់ពី២គីឡូក្រាម ទៅ៥គីឡូក្រាម គឺមានតម្លៃ១៥ម៉ឺនដុងក្នុង១គីឡូក្រាម ។ តម្លៃនេះខ្ពស់ជាងអំឡុងពេលការប្រមូលផលទុរេន រហូតដល់៦០% ៕ ប្រភព ៖ Sakda Sinives