ម៉ាឡេស៊ី៖ ស្ត្រីខ្មែរម្នាក់អាយុ ៤៧ឆ្នាំ និងកូនប្រុសរបស់នាងអាយុ ២២ឆ្នាំ បានបើកអាជីវកម្មនៅក្នុងប្រទេសម៉ាឡេស៊ី ត្រូវបានអាជ្ញាធរចាប់ខ្លួនពីបទបង្ហោះវីដេអូរិះគន់ប្រជាជនម៉ាឡេស៊ីថា “ខ្ជិល” តាមរយៈ Tiktok។

យោងតាមគេហទំព័រអន្តរជាតិ Free Malaysia Today ដែលបានចុះផ្សាយនៅខែធ្នូថ្មីៗនេះថា ស្ត្រីពាណិជ្ជករខ្មែរម្នាក់ និងកូនប្រុសរបស់នាង ត្រូវបានអាជ្ញាធរម៉ាឡេស៊ីចោទប្រកាន់ពីបទប្រើប្រាស់ពាក្យសម្តីមិនសមរម្យប្រមាទប្រជាជនម៉ាឡេស៊ី ដែលបទល្មើសនេះស្ថិតក្រោមមាត្រា ៥០៥ (គ) នៃក្រមព្រហ្មទណ្ឌ។ បន្ទាប់ពីពួកគេបានបង្ហោះវីដេអូមួយនៅលើ TikTok និយាយថា “ប្រជាជនកម្ពុជាឆ្លាតជាង និងឧស្សាហ៍ព្យាយាមជាងជនជាតិម៉ាឡេស៊ី”។

នៅក្នុងវីដេអូនេះផងដែរ បានធ្វើឱ្យប្រជាជនម៉ាឡេស៊ីជាច្រើនមានការមិនពេញចិត្តយ៉ាងខ្លាំង ក្រោយមកនាងនិងកូនប្រុសរបស់នាងក៏ត្រូវបានចាប់ខ្លួន។ ស្ត្រីជនជាតិខ្មែរ Mariya Yaakob និងកូនប្រុសរបស់នាង Ezuan Hafsham Mohd Hisyam ត្រូវបានតុលាការផ្តន្ទាទោសដាក់ពន្ធនាគាររយៈពេល ២ឆ្នាំ និងពិន័យជាប្រាក់អតិបរមាចំនួន ៥០,០០០ រីងហ្គីតម៉ាឡេស៊ី (ប្រមាណជាង ១ ម៉ឺនដុល្លារអាមេរិក) ហើយនឹងត្រូវផ្តន្ទាទោសពិន័យជាប្រាក់បន្ថែមទៀតចំនួន ១,០០០ រីងហ្គីតម៉ាឡេស៊ី (ប្រមាណ ២១៣ ដុល្លារ) ជារៀងរាល់ថ្ងៃក្នុងអំឡុងពេលដែលបទល្មើសនេះត្រូវបានប្រព្រឹត្ត។

ទោះជាយ៉ាងណាក៏ដោយ មេធាវីរបស់ម្តាយកូនរូបនេះ បានធ្វើការស្នើសុំឱ្យតុលាការបន្ថយការនៅក្រៅឃុំ ដោយសារម៉ារីយ៉ា ជាម្តាយទោលនិងជាអ្នកជំនួញដែលត្រូវរកប្រាក់ ឬធ្វើដំណើរទៅធ្វើការនៅបរទេស រីឯកូនប្រុសរបស់នាង Esuan កំពុងសិក្សានៅសាកលវិទ្យាល័យ ហើយអ្វីៗគឺនាងជាអ្នករ៉ាប់រងទាំងអស់។

ហេតុនេះហើយ តុលាការក៏សម្រេចចិត្តឱ្យពួកគេនៅក្រៅឃុំដោយត្រូវដាក់ប្រាក់ធានាប្រមាណ ៣,២០០ ដុល្លារសម្រាប់ Mariyah និង ២,១០០ ដុល្លារសម្រាប់ Ezuan។ ប៉ុន្តែពួកគេត្រូវបានតុលាការដកហូតលិខិតឆ្លងដែន ក៏ដូចជាឱ្យពួកគេទាំងពីរបដិសេធមិនធ្វើសេចក្តីថ្លែងការណ៍ណាមួយដែលអាចប៉ះពាល់ដល់ដំណើរការរបស់តុលាការឡើយ៕

ប្រទេសប៉ាគីស្ថាន ៖ កាលពីថ្ងៃទី១៧ ខែធ្នូ ឆ្នាំ២០២៣ សារព័ត៌មានបរទេសរាយការណ៍ថា អាជ្ញាធរប្រចាំទីក្រុង Lahore ដែលជាទីក្រុងធំលំដាប់ទី២ និងស្ថិតនៅភាគខាងកើតប្រទេសប៉ាគីស្ថាន បានចេញសេចក្តីថ្លែងការណ៍មួយថា យន្តហោះចំនួន២គ្រឿងរបស់ភ្នាក់ងារមកពីសហព័ន្ធអារ៉ាប់រួម (United Arab Emirates-UAE) បានបង្កើតភ្លៀងសិប្បនិម្មិតក្នុងតំបន់ចំនួន១០ នៅទីក្រុង Lahore ដោយជោគជ័យ និងមានភ្លៀងធ្លាក់មកកាលពីថ្ងៃ១៦ ខែធ្នូ កន្លងមក ។

នេះជាលើកដំបូងហើយដែលមានការបង្កើតភ្លៀងសិប្បនិម្មិតនៅប៉ាគីស្ថាន ដែលជាប្រទេសមួយបានប្រឈមនឹងការបំពុលបរិយាកាសខ្ពស់បំផុតនៅលើពិភពលោក ។ កាលពីប៉ុន្មានឆ្នាំកន្លងមកនេះ ប្រទេសប៉ាគីស្ថានបានប្រឈមនឹងការបំពុលបរិយាកាសធ្ងន់ធ្ងរ ដោយសារការប្រើប្រាស់ថាមពលហ្វូស៊ីលក្នុងកម្រិតខ្ពស់ ក៏ដូចជាការដុតចម្ការជាច្រើននៅជិតដល់ពេលរដូវដាំដុះ ស្របពេលប្រទេសនេះមានកាន់តែត្រជាក់ខ្លាំងក្នុងរដូវរងាផងដែរ ។ចំណែកលទ្ធផលការវាស់វែងកម្រិតខ្យល់ PM 2.5 ជាពិសេស នៅទីក្រុង Lahore កាលពីថ្ងៃទី១៦ ខែធ្នូ ឆ្នាំ២០២៣ បង្ហាញថា វាមានកម្រិតខ្ពស់ជាងកម្រិតគ្រោះថ្នាក់ដែលកំណត់ដោយអង្គការសុខភាពពិភពលោក (WHO) រហូតដល់៦៦ដងឯណោះ ។ ហេតុនេះ កម្រិតខ្យល់ពុលនៅលើបរិយាកាសបានធ្វើឱ្យប៉ះពាល់ដល់សុខភាពពលរដ្ឋប៉ាគីស្ថាន និងការរស់នៅរបស់ពលរដ្ឋក្នុងទីក្រុងយ៉ាងខ្លាំង ៕ ប្រភព ៖ daily news

យោងតាមគេហទំព័រ Lonely Planet បានឱ្យដឹងថា ភ្ញៀវទេសចរដែលចង់ធ្វើដំណើរទៅប្រទេសជប៉ុនចាំបាច់ត្រូវយល់ដឹងពីតិចនិចទាំងនេះ ដើម្បីងាយស្រួលធ្វើដំណើរ ក៏ដូចជាទទួលបានបទពិសោធន៍ល្អៗ ព្រោះដោយសារប្រទេសជប៉ុនជាធម្មតាមានពិធីសាសនាជាច្រើន ដែលជួនកាលអាចបង្កភាពមិនស្រួលដល់ភ្ញៀវទេសចរ។ ដូច្នេះខាងក្រោមនេះគឺ ១០ ចំណុចដែលអ្នកត្រូវចងចាំមុនពេលធ្វើដំណើរទៅប្រទេសជប៉ុន៖

១.ធ្វើការកក់ទុកមុន និងមកដល់ឱ្យទាន់ពេល៖ អ្នកទេសចរគួរតែកក់កន្លែងស្នាក់នៅឱ្យបានឆាប់ ជាពិសេសក្នុងឱកាសកំពូលដូចជាសប្តាហ៍ដំបូងនៃខែមករា ពិធីបុណ្យផ្ការីក ចុងខែមីនាដល់ខែមេសាជាដើម នឹងត្រូវមកដល់ឱ្យទាន់ពេល ពីព្រោះបុគ្គលិកទាំងអស់សុទ្ធតែកំណត់ពេលវេលាច្បាស់លាស់ក្នុងការពិនិត្យ ដូច្នេះនៅពេលអ្នកមកយឺត ឬហួសម៉ោងបុគ្គលិកអាចនឹងអវត្តមាន ។

២.រៀបចំអីវ៉ាន់របស់អ្នក៖ បន្ទប់នៅក្នុងប្រទេសជប៉ុនជាទូទៅមានទំហំតូច ដូច្នេះមិនមានកន្លែងច្រើនសម្រាប់ដាក់វ៉ាលីសំពីងសំពោងទេ។ លើសពីនេះ ការយកវ៉ាលីធំៗក៏បង្កភាពរអាក់រអួលសម្រាប់ភ្ញៀវទេសចរពេលប្រើមធ្យោបាយធ្វើដំណើរសាធារណៈផងដែរ។ ហេតុនេះហើយ អ្នកទេសចរគួរតែខ្ចប់អីវ៉ាន់ស្រាលៗពេលធ្វើដំណើរទៅប្រទេសជប៉ុន។

៣.ទិញស៊ីមដែលមានសមត្ថភាពទិន្នន័យខ្ពស់៖ អាស័យដ្ឋាននៅប្រទេសជប៉ុនមានការពិបាកក្នុងការរុករកខ្លាំងណាស់ សូម្បីតែអ្នកស្រុកក៏ដោយ។ ដូច្នេះ អ្នកទេសចរគួរតែទិញស៊ីមកាតដែលមានសមត្ថភាពទិន្នន័យខ្ពស់ ដើម្បីប្រើប្រាស់សម្រាប់កំណត់ទីតាំងក្នុងពេលធ្វើដំណើរ។

៤.ពាក់ស្បែកជើងដែលងាយស្រួលដោះចេញ៖ ក្រៅពីកត្តាផាសុកភាព អ្នកទស្សនាគួរតែជ្រើសរើសស្បែកជើងដែលងាយស្រួលដោះចេញ។ ព្រោះពេលមកដល់ប្រទេសជប៉ុន អ្នកទេសចរតែងតែទៅលេងកន្លែងកម្សាន្តបែបសាសនា ផ្ទះសំណាក់បែបប្រពៃណី និងញ៉ាំអាហារនៅភោជនីយដ្ឋានជាដើម ដោយកន្លែងទាំងនេះជារឿយៗតម្រូវឱ្យដោះស្បែកជើងចេញ។

៥.រៀនពីរបៀបប្រើបង្គន់៖ នៅប្រទេសជប៉ុន បង្គន់អេឡិចត្រូនិចមានប្រជាប្រិយភាពខ្លាំងជាមួយនឹងមុខងារសម្អាតនៅពេលចុចប៊ូតុង។ លើសពីនេះបង្គន់ជារឿយៗខ្វះកន្សែង និងមិនមានម៉ាស៊ីនសម្ងួតដៃ ដូច្នេះភ្ញៀវត្រូវរៀបចំយ៉ាងសកម្មផងដែរ។

៦.នាំយកសាច់ប្រាក់៖ ប្រសិនបើការធ្វើដំណើរទៅកាន់តំបន់ជនបទ ប័ណ្ណឥណទាន ឬការទូទាត់តាមអេឡិចត្រូនិកប្រហែលជាមិនត្រូវបានទទួលយកទេ។ ដូច្នេះភ្ញៀវត្រូវរៀបចំសាច់ប្រាក់ ក៏ដូចជាត្រូវដាក់លុយ និងកាតនៅក្នុងថាសក្បែរកន្លែងដាក់ប្រាក់ ជំនួសឱ្យការបង់ប្រាក់ដោយផ្ទាល់ទៅអ្នកគិតលុយ។

៧.ត្រូវដឹងពីរបៀបឈរ៖ នៅពេលប្រើជណ្តើរយន្ត អ្នកទស្សនាត្រូវតែឈរនៅម្ខាងជានិច្ច អាស្រ័យលើទីតាំង។ ជាឧទាហរណ៍ នៅតំបន់ Kanto និងភាគខាងកើត អ្នកត្រូវឈរនៅខាងឆ្វេង ប៉ុន្តែនៅ Kansai និងតំបន់ភាគខាងលិចវិញ អ្នកត្រូវឈរនៅខាងស្តាំ។

៨.ត្រូវដឹងពីរបៀបជិះរថភ្លើង៖ រថភ្លើងក្រោមដីនៅក្នុងទីក្រុងដំណើរការរហូតដល់ម៉ោង ១ កណ្តាលអាធ្រាតនៅពេលចុងក្រោយបំផុត។ ប្រសិនបើអ្នកខកខានការធ្វើដំណើរនេះ ជម្រើសតែមួយគត់របស់អ្នកគឺហៅតាក់ស៊ី ហើយវានឹងមានតម្លៃថ្លៃខ្លាំងណាស់។

៩.ពេលព្រឹកនៅទីក្រុងតូក្យូ៖ សម្រាប់អ្នកក្រុងតូក្យូ ការទៅធ្វើការពេលព្រឹកចាប់ពីម៉ោង ៧:៣០ ព្រឹកដល់ម៉ោង ៩:០០ ព្រឹក មនុស្សរាប់លាននាក់បានប្រមូលផ្តុំគ្នានៅលើរថភ្លើងនៅក្នុងទីក្រុង។ ដូច្នេះអ្នកដំណើរត្រូវមកឱ្យទាន់ពេលព្រោះអាចមិនមានកន្លែងអង្គុយគ្រប់គ្រាន់។

១០.រៀនពាក្យជាមូលដ្ឋានមួយចំនួន៖ ភាសាអង់គ្លេសគឺមានការពេញនិយមយ៉ាងខ្លាំងនៅតាមទីក្រុង និងតំបន់ទេសចរណ៍។ ទោះយ៉ាងណាក៏ដោយ នៅតំបន់ជនបទ ភាសានេះប្រហែលជាមិនមានប្រយោជន៍ទេ។ ជំនួសមកវិញ អ្នកទស្សនាគួរតែរៀនឃ្លាមូលដ្ឋានមួយចំនួនសម្រាប់ការទំនាក់ទំនងដូចជា អារីហ្គាតូ (សូមអរគុណ), តូរី (បន្ទប់ទឹក), ម៉ូឈីការី (យកទៅឆ្ងាយ), តេនណៃ ដឺ (ញ៉ាំនៅនឹងកន្លែង) ជាដើម៕

ប្រទេសចិន ៖ សារមន្ទីរនានានៅទូទាំងប្រទេសចិនបានស្វែងរកវិធីថ្មីៗជាបន្តបន្ទាប់ដើម្បីធ្វើយ៉ាងណា ឱ្យការដាក់តាំងវត្ថុបុរាណនានាមានភាពរស់រវើក និងជួយឱ្យអ្នកចូលទស្សនាងាយយល់ពីវត្ថុបុរាណទាំងនេះផងដែរ ។ គេសង្កេតឃើញថា សារមន្ទីរទាំងនេះបានបំពាក់នូវបច្ចេកវិទ្យាទំនើប និងមានឧបករណ៍ជំនួយ ដើម្បីឱ្យអ្នកទស្សនាទទួលបានបទពិសោធន៍ជាច្រើន តាមរយៈការទស្សនា, ការស្តាប់ និងការប៉ះពាល់ដោយផ្ទាល់ ។

សារមន្ទីរ Sanxingdui គឺជាសារមន្ទីរថ្មីមួយក្នុងខេត្តស៊ីឈួន ប្រទេសចិន ដែលបានរៀបចំឡើងតាមបែបបច្ចេកវិទ្យាទំនើប និងមានការបង្ហាញវត្ថុបុរាណផ្នែកវប្បធម៌ជាច្រើន ។ សារមន្ទីរនេះមានបន្ទប់ដាក់វត្ថុបុរាណ ដែលគេបានបំពាក់ដោយបច្ចេកវិទ្យា 3D ដើម្បីឱ្យអ្នកចូលទស្សនាទទួលបានបទពិសោធន៍ផ្នែកបុរាណវិទ្យាដោយខ្លួនឯង ហើយពួកគេក៏អាចទស្សនាវត្ថុបុរាណផ្នែកវប្បធម៌យ៉ាងជិតស្និទ្ធ ។

រីឯសារមន្ទីរមួយកន្លែងទៀតឈ្មោះ Liang Zhu ស្ថិតនៅស្រុក Yuhang ទីក្រុង Hangzhou ខេត្ត Zhejiang ក៏បានប្រើប្រាស់បច្ចេកវិទ្យាទំនើបផងដែរ ។ សារមន្ទីរនេះ អនុញ្ញាតឱ្យអ្នកទស្សនាអាចពាក់វ៉ែនតានាំផ្លូវដ៏ឆ្លាតវៃ គឺនៅពេលពួកគេបានពាក់វ៉ែនតានេះហើយ ពួកគេនឹងអាចមើលឃើញវត្ថុបុរាណវប្បធម៌ឌីជីថលបាន ។

ជាមួយគ្នានេះ ការពាក់វ៉ែនតានាំផ្លូវឆ្លាតវៃធ្វើឱ្យពួកគេអាចឮសូរសំឡេងពន្យល់អំពីប្រវត្តិរបស់វត្ថុបុរាណនីមួយៗ ។ ដូច្នេះ វាធ្វើឱ្យវត្ថុបុរាណដែលដាក់បង្ហាញនៅសារមន្ទីរ Liang Zhu មានភាពរស់រវើក និងធ្វើឱ្យអ្នកចូលទស្សនាសារមន្ទីរកាន់តែងាយយល់ជាងមុន ៕ ប្រភព ៖ China face

បើយោងទៅតាមការចេញផ្សាយរបស់សារព័ត៌មានចិនបានចុះផ្សាយ កាលពីថ្ងៃទី១៥ ខែធ្នូ ឆ្នាំ២០២៣នេះ បានឲ្យដឹងថា ក្រុមហ៊ុនចិនជាច្រើនកំពុងតែចាប់ផ្តើមអនុវត្តនូវវិធានការដោយហាមប្រាមបុគ្គលិកក្រុមហ៊ុនទាំងអស់យកទូរស័ព្ទដៃម៉ាក iphone និង ឧបករណ៍ភ្ជាប់ដែលជាម៉ាកយីហោបរទេសដទៃទៀត ចូលកន្លែងធ្វើការជាដាច់ខាត។

រយៈពេលជាងមួយទសវត្សន៍មកនេះ គឺប្រទេសចិនកំពុងតែព្យាយាមកាត់បន្ថយការប្រើប្រាស់ ដោយផ្នែកលើបច្ចេកវិទ្យាបរទេស ជំនួសមកវិញដោយគាំទ្រអ្វីដែលជារបស់ចិន ដូចជាក្រុមហ៊ុនមួយចំនួនបានប្តូរមកប្រើប្រាស់កម្មវិធី Software ចិន និងលើកកម្ពស់បន្ទះឈីប Semiconductor ដែលជាផលិតផលក្នុងស្រុករបស់ខ្លួនវិញ។

បើតាមរបាយការណ៍របស់ Bloomberg បានបញ្ជាក់ទៀតថា រយៈពេលប្រមាណ១-២ខែមុននេះ ក្រុមហ៊ុនរដ្ឋនិងស្ថាប័នរដ្ឋាភិបាលចិន នៅក្នុងខេត្តចំនួន៨នៃប្រទេសចិន មានដូចជាខេត្ត Zhejiang , Shandong , Liaoning, Hebei ជាដើមគឺសុទ្ធតែបានណែនាំនយោជិតរបស់ខ្លួនហាមប្រើប្រាស់ផលិតផលពីបរទេស ជាពិសេសទៅលើផលិតផល Apple/iphone របស់សហរដ្ឋអាមេរិក ជំនួសដោយការលើកស្ទួយផលិតផលក្នុងស្រុករបស់ខ្លួនវិញ។

គួរបញ្ជាក់ផងដែរថា ការដែលចិនចេញនូវនិន្នាការបែបនេះ គឺដើម្បីបន្ថយនៅឥទ្ធិពលរបស់លោកខាងលិច ជាពិសេសគឺសហរដ្ឋអាមេរិកទៅលើផ្នែកសេដ្ឋកិច្ច-ពាណិជ្ជកម្មសកល និងបច្ចេកវិទ្យា ដោយហេតុថាអាមេរិកនិងចិនគឺជាគូរប្រជែងសេដ្ឋកិច្ចដ៏ធំលំដាប់ទី១និងទី២ទូទាំងសកលលោក។ ចិនព្យាយាមលើកកម្ពស់ផលិតផលរបស់ខ្លួនឯង ក៏ដូចជាបង្កើនកំណើនអ្នកប្រើប្រាស់របស់ខ្លួនព្រោះថាប្រជាជនចិននៅលើពិភពលោកយើងនេះ គឺមានរហូតដល់ទៅជាង១០០០លាននាក់។ ដូច្នេះហើយការដែលចង់ឲ្យផលិតផលមួយលក់ដាច់ខ្លាំងនិងវ៉ាដាច់នៅលើពិភពលោកគឺត្រូវតែផ្តើមចេញពីជំនឿជាក់របស់ប្រជាពលរដ្ឋខ្លួនជាមុនសិន៕

សហរដ្ឋអាមេរិក៖ Deja Taylor ត្រូវបានកាត់ទោសឱ្យជាប់ពន្ធនាគាររយៈពេល ២ ឆ្នាំពីបទធ្វេសប្រហែសលើកុមារដែលបង្កឱ្យមានផលវិបាកធ្ងន់ធ្ងរ បន្ទាប់ពីកូនប្រុសអាយុ ៦ ឆ្នាំរបស់នាងបានលួចកាំភ្លើងទៅរៀន និងបានបាញ់គ្រូបង្រៀនរបស់ខ្លួនឱ្យមានរបួសធ្ងន់ធ្ងរ។យោងតាមគេហទំព័រអន្តរជាតិ NBC News ដែលបានចុះផ្សាយកាលពីថ្ងៃទី១៦ ខែធ្នូថា កូនប្រុសថ្នាក់ទី ១ របស់ Taylor បានយកកាំភ្លើងខ្លី ៩ មីលីម៉ែត្ររបស់ម្តាយគាត់ដោយឡើងលើថតដើម្បីឈានដល់កាបូបដែលមានកាំភ្លើងនៅផ្នែកខាងលើនៃតុរព្យួរខោអាវ។

ហេតុការណ៍នេះកើតឡើងតាំងពីថ្ងៃទី៦ ខែមករា មកម្លេះនៅពេលដែលក្មេងប្រុសនោះ បានលាក់កាំភ្លើងក្នុងកាបូបស្ពាយរបស់ខ្លួន ហើយបានទៅសាលាបឋមសិក្សា Rickneck ក្នុងទីក្រុង Newport News រដ្ឋ Virginia សហរដ្ឋអាមេរិក។ បន្ទាប់មកគាត់បានរំកិលកាំភ្លើងចូលទៅក្នុងហោប៉ៅរបស់គាត់ ហើយបានបាញ់ទៅលើគ្រូបង្រៀន Abby Zwerner អាយុ ២៥ ឆ្នាំ នៅមាត់ទ្វារបន្ទប់បណ្តាលឱ្យមានរបួសធ្ងន់ធ្ងរ ប៉ុន្តែមិនមានការបាត់បង់ជីវិតឡើយ។ ទោះជាយ៉ាងណាក៏ដោយ Taylor ដែលជាម្តាយរបស់ក្មេងប្រុសនោះបានអះអាងថា កាំភ្លើងបានបំពាក់គន្លឹះសុវត្ថិភាព ដូច្នេះមិនត្រូវបានប៉ូលីសចាប់ខ្លួន ឬកាត់ទោសភ្លាមៗនោះទេ។

បន្ទាប់មកនៅខែមេសាប៉ូលីសបានធ្វើការស៊ើបអង្កេតក៏បានដឹងថា Taylor ដែលជាម្តាយរបស់ក្មេងប្រុសនោះបានប្រើប្រាស់កញ្ឆា ក៏ដូចជាកាត់ទោសឱ្យជាប់ពន្ធនាគារសហព័ន្ធចំនួន ២១ ខែផងដែរ។ នៅថ្ងៃទី១៥ ខែធ្នូ ឆ្នាំ២០២៣ នេះនាងក៏ត្រូវបានតុលាការរដ្ឋកាត់ទោសឱ្យជាប់ពន្ធនាគារ ២ ឆ្នាំបន្ថែមទៀតពីបទធ្វេសប្រហែសលើកុមារដែលបង្កឱ្យមានផលវិបាកធ្ងន់ធ្ងរទៅលើមនុស្សជុំវិញខ្លួន។ ដូច្នេះទោសទាំងពីរនេះបានកាត់ទោសឱ្យ Taylor ជាប់ពន្ធនាគារសរុបជិត ៤ ឆ្នាំ នេះបើយោងតាមឯកសាររបស់តុលាការ ក៏បានឱ្យដឹងទៀតថា នាងក៏ត្រូវបានគេធ្វើរោគវិនិច្ឆ័យថាមានជំងឺវិកលចរិកផងដែរ។

គួរបញ្ជាក់ដែរថា អ្នកគ្រូម្នាក់ដែលត្រូវក្មេងប្រុសអាយុ ៦ ឆ្នាំបាញ់នោះ បច្ចុប្បន្នគាត់លែងធ្វើការឱ្យប្រព័ន្ធសាលា និងមិនបានបង្រៀនទៀតឡើយ។ គាត់បាននិយាយថា គាត់ខ្លាចការងារក្នុងបរិយាកាសនេះ ហើយគាត់ក៏បានចូលរួមការព្យាបាល ហើយត្រូវបានគេរកឃើញថាមានជំងឺស្ត្រេសក្រោយការប៉ះទង្គិច ព្រមទាំងជំងឺធ្លាក់ទឹកចិត្ត និងការថប់បារម្ភទៀតផង៕