ឆ្មាំសមុទ្រអាមេរិកបានរឹបអូសកប៉ាល់១គ្រឿងដឹកប្រេងឥន្ធនៈមានទង់ជាតិរុស្ស៊ីនៅមហាសមុទ្រអាត្លង់ទិកបន្ទាប់ពីដេញតាមអស់រយៈពេលជាង២សប្តាហ៍ ដោយអះអាងថា កប៉ាល់នេះដឹកប្រេងដែលអាមេរិកដាក់ទណ្ឌ.កម្ម និងជាការអនុវត្តតាមគោលនយោបាយទប់ស្កាត់កប៉ាល់ដឹកប្រេងចេញពីវេណេស៊ុយអេឡា ខណៈរុស្ស៊ីចេញសេចក្តីថ្លែងការណ៍ថ្កោលទោ.សទង្វើអាមេរិកផ្ទុយនឹងអនុសញ្ញាអង្គការសហប្រជាជាតិ ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី៧ ខែមករា ឆ្នាំ២០២៦ ។

កាលពីថ្ងៃទី៧ ខែមករា ឆ្មាំសមុទ្រអាមេរិកឱ្យដឹងថា បានរឹបអូសកប៉ាល់១គ្រឿងដែលមានទង់ជាតិរុស្ស៊ី ដែលកប៉ាល់នេះពាក់ព័ន្ធនឹងវេណេស៊ុយអេឡា បន្ទាប់ពីឆ្មាំសមុទ្រអាមេរិកដេញតាមកប៉ាល់នេះក្នុងមហាសមុទ្រអាត្លង់ទិកអស់រយៈពេលជាង២សប្តាហ៍ ។ ការរឹបអូសកប៉ាល់ដឹកប្រេងអាចធ្វើឱ្យស្ថានការណ៍កាន់តែតានតឹងខ្លាំងឡើងរវាងអាមេរិក និងរុស្ស៊ី ស្របពេលមាននាវាមុជទឹក និងនាវចម្បាំងរបស់រុស្ស៊ីនៅក្បែរនោះ ។

កប៉ាល់ដឹកប្រេងនេះឈ្មោះ Bella 1 ប៉ុន្តែបច្ចុប្បន្នបានប្តូរឈ្មោះជាកប៉ាល់ Marinera ព្យាយាមគេចពីការត្រួតពិនិត្យរបស់ឆ្មាំសមុទ្រអាមេរិក ហើយត្រូវបានឆ្មាំសមុទ្រអាមេរិកកំណត់គោលដៅរឹបអូសតាមគោលនយោបាយទប់ស្កាត់កប៉ាល់ដឹកប្រេងចេញពីវេណេស៊ុយអេឡា ។ តាមការបង្ហោះសារក្នុងបណ្តាញសង្គម X របស់បញ្ជាការដ្ឋានតំបន់អឺរ៉ុបរបស់កងទ័ពអាមេរិក គឺរដ្ឋាភិបាលរបស់លោកប្រធានាធិបតី Donald Trump បានបញ្ជាឱ្យរឹបអូសកប៉ាល់ដឹកប្រេងនេះ ដោយសារល្មើសនឹងការដាក់ទណ្ឌកម្មប្រេងរបស់អាមេរិក ។

លោក Pete Hegseth រដ្ឋមន្ត្រីក្រសួងការពារជាតិអាមេរិកបានឆ្លើយតបនឹងការបង្ហោះសាររបស់បញ្ជាការដ្ឋានតំបន់អឺរ៉ុបរបស់កងទ័ពអាមេរិកថា ការបិទផ្លូវដឹកជញ្ជូនប្រេងខុសច្បាប់ និងដាក់ទណ្ឌកម្មលើពាណិជ្ជកម្មប្រេងវេណេស៊ុយអេឡានៅតែមានប្រសិទ្ធភាពពេញលេញ មិនថានៅទីណាទេលើពិភពលោក ។

ចំណែករុស្ស៊ីចេញសេចក្តីថ្លែងការណ៍ថ្កោលទោសអាមេរិកយ៉ាងខ្លាំងដែលរឹបអូសកប៉ាល់ដឹកប្រេងមានទង់ជាតិរុស្ស៊ី ។ ក្រសួងគមនាគមន៍រុស្ស៊ីបញ្ចាក់ក្នុងសេចក្តីថ្លែងការណ៍ថា តាមអនុសញ្ញាអង្គការសហប្រជាជាតិ ស្តីពីច្បាប់សមុទ្រ ឆ្នាំ១៩៨២ កប៉ាល់នានាមានសេរីភាពធ្វើចរាចរណ៍ក្នុងដែនទឹកអន្តរជាតិ និងគ្មានប្រទេសណាមានសិទ្ធិប្រើប្រាស់កម្លាំងរឹបអូសកប៉ាល់ដែលចុះបានចុះបញ្ជីស្របច្បាប់ក្រោមអំណាចរបស់ប្រទេសមួយទៀត ។

ក្រសួងគមនាគមន៍រុស្ស៊ីបញ្ជាក់ថា កប៉ាល់ដឹកប្រេងនេះទទួលបានការអនុញ្ញាតបណ្តោះអាសន្នឱ្យចរាចរណ៍ក្នុងសមុទ្រដោយដាក់ទង់ជាតិរុស្ស៊ី កាលពីថ្ងៃទី២៤ ខែធ្នូ ឆ្នាំ២០២៥ ។ អាជ្ញាធរបាត់ការទំនាក់ទំនងជាមួយកប៉ាល់ បន្ទាប់ពីកងទ័ពជើងទឹកអាមេរិកនសំរុកឡើងលើកប៉ាល់ដែលស្ថិតក្នុងដែនទឹកអន្តរជាតិ និងនៅក្រៅដែនទឹកប្រទេសណាមួយ ។ មន្ត្រីរុស្ស៊ីម្នាក់មិនបញ្ចេញឈ្មោះថា វាជាហេតុការណ៍ដំបូងក្នុងប្រវត្តិសាស្ត្រដែលកងទ័ពជើងទឹកអាមេរិកព្យាយាមរឹបអូសកប៉ាល់ដាក់ទង់ជាតិរុស្ស៊ី ។

គួរបញ្ជាក់ថា ឆ្មាំសមុទ្រអាមេរិកព្យាយាមដេញតាមកប៉ាល់នេះកាលពីខែធ្នូ ឆ្នាំ២០២៥ ដោយសារអ្នកនៅលើកប៉ាល់បដិសេធមិនឱ្យឆ្មាំសមុទ្រអាមេរិកត្រួតពិនិត្យ ហើយតាំងពីពេលនោះមក កប៉ាល់នេះក៏ប្តូរទង់ជាតិពីប្រទេសហ្គីយ៉ាណាទៅជាទង់ជាតិរុស្ស៊ី ប៉ុន្តែនៅតែគេចមិនផុតពីការរឹបអូសរបស់ឆ្មាំសមុទ្រអាមេរិក ៕

វ៉ាស៊ីនតោន៖ លោកប្រធានាធិបតី Trump កាលពីថ្ងៃពុធបានចុះហត្ថលេខា ដកសហរដ្ឋអាមេរិកចេញពីអង្គការអន្តរជាតិ និងសន្ធិសញ្ញាចំនួន 66 រួមទាំងអនុសញ្ញាក្របខ័ណ្ឌនៃអង្គការសហប្រជាជាតិផងដែរ បន្ទាប់ពីកត់សម្គាល់ឃើញថាអង្គការអន្តរជាតិ អនុសញ្ញា និងសន្ធិសញ្ញាទាំងនេះ មិនបានផ្ដល់ផលប្រយោជន៍អ្វីដល់សហរដ្ឋអាមេរិក។

យោងតាមសេចក្ដីប្រកាសនៅគេហទំព័ររបស់សេតវិមាន ថ្ងៃទី៧ ខែមករា ឆ្នាំ២០២៦ បានឲ្យដឹងថា ការដកខ្លួនចេញរបស់សហរដ្ឋអាមេរិក ធ្វើឡើងចំពោះអង្គការអន្តរជាតិ អនុសញ្ញា និងសន្ធិសញ្ញាទាំងឡាយណា ដែលផ្ទុយនឹងផលប្រយោជន៍របស់សហរដ្ឋអាមេរិក ជាពិសេសអង្គការទាំងនេះភាគច្រើនផ្តោតលើបញ្ហាអាកាសធាតុ ការងារ និងសង្គម ដែលរដ្ឋបាលលោក Trump បានចាត់ទុកថាជាការលើកកម្ពស់របៀបវារៈ “ទើបភ្ញាក់ដឹងខ្លួន” របស់ពួកគេ បន្ទាប់ពីបានខ្ជះខ្ជាយនិងគ្រប់គ្រងមូលនិធិមិនបានល្អ។

ការសម្រេចចិត្តដ៏សំខាន់បំផុតមួយរបស់សហរដ្ឋអាមេរិក គឺការដកខ្លួនចេញពីអនុសញ្ញាក្របខ័ណ្ឌអង្គការសហប្រជាជាតិស្តីពីការប្រែប្រួលអាកាសធាតុ (UNFCCC) ដែលជាសន្ធិសញ្ញាឆ្នាំ 1992 ដែលគាំទ្រដល់កិច្ចព្រមព្រៀងទីក្រុងប៉ារីស។ អ្នកវិទ្យាសាស្ត្រព្រមា.នថា ការចាកចេញនេះអាចធ្វើឱ្យកិច្ចខិតខំប្រឹងប្រែងជាសកលក្នុងការទប់ស្កាត់ការបំភាយឧស្ម័នថយចុះ និងមានការលំបាក បើគ្មានកិច្ចសហប្រតិបត្តិការពីសហរដ្ឋអាមេរិក ដែលជាប្រទេសមួយក្នុងចំណោមប្រទេសដែលបញ្ចេញឧស្ម័ន និងសេដ្ឋកិច្ចធំជាងគេបំផុតរបស់ពិភពលោក។

រដ្ឋបាលលោកត្រាំ បានបញ្ជាក់ថា ខ្លួនមានបំណងបង្វែរថវិកាដែលបានពីអ្នកជាប់ពន្ធ ទៅពង្រឹងឥទ្ធិពលអាមេរិកក្នុងគំនិតផ្តួចផ្តើមដែលកំណត់ស្តង់ដារអន្តរជាតិ ជាទីដែលអាមេរិកត្រូវប្រកួតប្រជែងដោយផ្ទាល់ជាមួយប្រទេសចិន ដូចជាវិស័យទូរគមនាគមន៍ និងបទប្បញ្ញត្តិដែនសមុទ្រជាដើម។ ការផ្លាស់ប្តូរនេះ គឺជាការដើរចេញពីយុទ្ធសាស្រ្តការទូតបែបប្រពៃណីរបស់រដ្ឋបាលមុនៗ ហើយបានបង្ខំឲ្យអង្គការសហប្រជាជាតិចាប់ផ្តើម កាត់បន្ថយបុគ្គលិក និងកម្មវិធីរបស់ខ្លួនជាបន្តបន្ទាប់។

ទោះជាយ៉ាងណា ការដកខ្លួនចេញពី UNFCCC បានរងការរិះគន់យ៉ាងខ្លាំងពីអ្នកជំនាញផ្នែកអាកាសធាតុ និងអតីតមន្ត្រីរដ្ឋាភិបាល ដោយពួកគេបានព្រមានថា ការចាកចេញពីសន្ធិសញ្ញាដែលមានអាយុកាលជាង30ឆ្នាំនេះ នឹងធ្វើឲ្យអាមេរិកបាត់បង់ឥទ្ធិពលលើការវិនិយោគពិភពលោករាប់ទ្រីលានដុល្លារ ហើយអាចជាលេសឲ្យប្រទេសដទៃទៀតពន្យារពេលការប្តេជ្ញាចិត្តផ្នែកបរិស្ថានរបស់ពួកគេ៕

(ភ្នំពេញ)៖ ប្រទេសទីម័រឡេស្តេ (ទីម័រខាងកើត) បានរំលឹកឡើងវិញនូវគុណបំណាច់របស់សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា នៅក្នុងដំណើរការជួយជ្រោមជ្រែងនិងខ្នះខ្នែង ឱ្យប្រទេសទីម័រ ក្លាយជាសមាជិកទី១១ ជាផ្លូវការនៃសមាគមប្រជាជាតិអាស៊ីអាគ្នេយ៍ ឬដែលហៅកាត់ថា អាស៊ាន ។

យោងតាមលិខិតរបស់លោក ចូហ្សេ រ៉ាមូស អរតា ប្រធានាធិបតីទីម័រឡេស្តេ ផ្ញើថ្លែងអំណរគុណសម្តេចតេជោ ក្នុងឱកាសទីម័រឡេស្តេ ក្លាយជាសមាជិកទី១១របស់អាស៊ាន បានឱ្យដឹងថា សម្តេចបាននាំឱ្យមានការទទួលស្គាល់ និងការទទួលយកជាគោលការណ៍ នូវសមាជិកភាពរបស់ទីម័រឡេស្តេ ក្នុងអាស៊ានអំឡុងពេលកិច្ចប្រជុំកំពូល អាស៊ានលើកទី៤០ និងលើកទី៤១ ដែលបានប្រព្រឹត្តឡើងនៅកម្ពុជា ។

ការខិតខំប្រឹងប្រែងរបស់សម្តេចតេជោ សបញ្ជាក់ពីភាព ជាអ្នកដឹកនាំប្រកប ដោយចក្ខុវិស័យដ៏ឧត្តុង្គឧត្តម ដែលបានរួមចំណែកយ៉ាងសំខាន់ ដល់ការពង្រឹងមាគ៌ាដែលទីម័រ ទទួលបាននៅពេលនេះ ។

ទន្ទឹមនឹងនេះ លោក ចូហ្សេ រ៉ាមូស សង្កត់ធ្ងន់ថា សម្តេចតេជោនិងរូបលោកផ្ទាល់ បានចែករំលែកយ៉ាងពេញលេញនូវចក្ខុវិស័យអាស៊ាន ដែលមានភាពស្អិតរមួត សន្តិភាព និងភាពធន់ ដោយតម្រង់ឆ្ពោះទៅរកការអភិវឌ្ឍប្រកបដោយចីរភាពសម្រាប់ប្រជាជន។ ទីម័រឡេស្តេ ប្តេជ្ញាយ៉ាងមុតមាំក្នុងការរួមចំណែកដ៏សកម្ម និងការខុសត្រូវចំពោះការពង្រឹងសហគមន៍អាស៊ាន ការពង្រឹងកិច្ចសន្ទនា កិច្ចសហប្រតិបត្តិការក្នុងតំបន់ និងវិបុលភាពរួមគ្នា ។

ប្រធានាធិបតីទីម័រឡេស្តេ ជឿជាក់ថា ចំណងមិត្តភាព និងកិច្ចសហប្រតិបត្តិការ រវាងទីម័រឡេស្តេ និងកម្ពុជា នឹងបន្តកាន់តែស៊ីជម្រៅ ដោយពង្រឹងនូវសមាជិកភាពរួមគ្នាក្នុងគ្រួសារអាស៊ាន ។ ដោយស្មារតីនៃការយោគយល់ និងការគោរពគ្នាទៅវិញទៅមក ព្រមទាំងភាពជឿ ជាក់លើ ដំណោះស្រាយជម្លោះដោយសន្តិវិធី លោកបញ្ជាក់ជាថ្មី នូវការត្រៀម ខ្លួនរួចជាស្រេច របស់ទីម័រឡេស្តេ ក្នុងការធ្វើការជាមួយគ្នា ដើម្បីសម្រេចបាន នូវគោលដៅរួមរបស់អាស៊ាន ៕

សហរដ្ឋអាមេរិក ៖ ប្រធានាធិបតីអាមេរិក លោក Donald Trump ប្រកាសថា រដ្ឋាភិបាលបណ្តោះអាសន្នរបស់វេណេស៊ុយអេឡានឹងបញ្ជូនប្រេងឥន្ធនៈឱ្យអាមេរិកក្នុងបរិមាណច្រើនបំផុតរហូតដល់៥០លានបារ៉ែលនាពេលឆាប់ៗ លោកនឹងគ្រប់គ្រងការលក់ និងប្រាក់ចំណូលប្រេងទាំងអស់ដោយខ្លួនឯងសម្រាប់ប្រយោជន៍រួមគ្នារវាងអាមេរិក និងវេណេស៊ុយអេឡា ។ ការលើកឡើងនេះ ស្របនឹងពិភពលោករិះគន់អាមេរិកវាយប្រ.ហារទីក្រុង Caracas និងចា.ប់ខ្លួនប្រធានាធិបតីវេណេស៊ុយអេឡា និងភរិយា គឺមិនពាក់ព័ន្ធនឹងសេរីភាព ឬប្រជាធិបតេយ្យ ប៉ុន្តែអាមេរិកចង់បានប្រេង រួមទាំងធនធានធម្មជាតិរបស់វេណេស៊ុយអេឡា ។

សារព័ត៌មានបរទេសបានរាយការណ៍ពីទីក្រុងវ៉ាស៊ីនតោន សហរដ្ឋអាមេរិក នៅថ្ងៃទី៧ ខែមករា ឆ្នាំ២០២៦ គឺលោកប្រធានាធិបតី Trump បានបង្ហោះសារក្នុងបណ្តាញសង្គម Truth Social កាលពីថ្ងៃទី៦ ខែមករា ថា រដ្ឋាភិបាលបណ្តោះអាសន្នរបស់វេណេស៊ុយអេឡានឹងបញ្ជូនប្រេងឆៅមានគុណភាពខ្ពស់ដែលត្រូវបានដាក់ទណ្ឌកម្មពីមុន មកកាន់អាមេរិកនាពេលឆាប់ៗ ចាប់ពី៣០លានបារ៉ែល ទៅ៥០លានបារ៉ែល ។

លោកប្រធានាធិបតី Trump បន្តថា នៅពេលទទួលបានប្រេងពីវេណេស៊ុយអេឡា អាមេរិកនឹងលក់ប្រេងនេះតាមតម្លៃទីផ្សារ លោកនឹងគ្រប់គ្រងការលក់ និងប្រាក់ចំណូលប្រេងទាំងអស់ដោយខ្លួនឯងក្នុងឋានៈជាមេដឹកនាំអាមេរិក ដើម្បីឱ្យប្រាកដចិត្តថា ប្រាក់ចំណូលប្រេងនឹងយកទៅប្រើប្រាស់ជាប្រយោជន៍របស់វេណេស៊ុយអេឡា និងប្រយោជន៍ពលរដ្ឋអាមេរិក ។

លោក Trump បានបញ្ជាឱ្យរដ្ឋមន្ត្រីក្រសួងថាមពលអាមេរិក លោក Chris Wright ដំណើរការលក់ប្រេងវេណេស៊ុយអេឡាភ្លាមៗ ដោយបញ្ជូនកប៉ាល់ទៅដឹកប្រេងពីវេណេស៊ុយអេឡា រួចហើយបញ្ជូនមកកាន់កន្លែងផ្ទុកប្រេងនៅកំពង់ផែអាមេរិក ។

ប៉ុន្តែវាធ្វើឱ្យមានមតិរិះគន់ជាបន្តបន្ទាប់ពីអាមេរិកលក់ប្រេងវេណេស៊ុយអេឡា ថាយោងតាមច្បាប់អន្តរជាតិ ប្រសិនបើមេដឹកនាំប្រទេសមួយគ្រប់គ្រងប្រាក់ចំណូលដោយផ្ទាល់ដែលបានពីការលក់ធនធានធម្មជាតិរបស់ប្រទេសមួយផ្សេងទៀត គឺជាការរំលោភអធិបតេយ្យ ។

តាមទិន្នន័យរបស់អង្គការ OPEC វេណេស៊ុយអេឡាមានប្រេងបម្រុងរហូតដល់ជាង៣សែនលានបារ៉ែល ដែលជាបរិមាណប្រេងច្រើនបំផុតលើពិភពលោក ស្មើទឹកប្រាក់ប្រមាណជាង១៧លានលានដុល្លារអាមេរិក នេះបើផ្អែកតាមតម្លៃប្រេងបច្ចុប្បន្ន ស្មើ៥៧ដុល្លារក្នុង១បារ៉ែល ។ វេណេស៊ុយអេឡា ជាប្រទេសមានប្រេងបម្រុងច្រើនបំផុតលើពិភពលោក បន្ទាប់មក គឺអារ៉ាប៊ីសាអូឌីត អ៊ីរ៉ង់ អ៊ីរ៉ាក់ និងអាមេរិក ។

តាមសេចក្តីរាយការណ៍ រដ្ឋាភិបាលអាមេរិកនឹងរៀបចំកិច្ចប្រជុំបន្ទាន់ជាមួយនាយកប្រតិបត្តិជាន់ខ្ពស់របស់បណ្តាក្រុមហ៊ុនប្រេងអាមេរិក នៅថ្ងៃទី៩ ខែមករា នៅសេតវិមាន ។ លោកប្រធានាធិបតី Trump ថា ពេលនេះ អាមេរិកមានតួនាទីទទួលខុសត្រូវប្រទេសវេណេស៊ុយអេឡា និងត្រៀមសហការជាមួយប្រធានាធិបតីស្តីទីវេណេស៊ុយអេឡា លោកស្រី Delcy Rodriguez ដើម្បីឱ្យលោកស្រីយល់ព្រមតាមការទាមទាររបស់លោក ក្នុងការកាន់កាប់ប្រេងបម្រុងដ៏ច្រើនមហាសាលរបស់វេណេស៊ុយអេឡា ។

គួរបញ្ជាក់ថា ក្រោយការគំរាមរបស់លោកប្រធានាធិបតី Trump ពេលនេះ ប្រធានាធិបតីស្តីទីវេណេស៊ុយអេឡាបានបន្ទន់ជំហររបស់ខ្លួន តាមរយៈការស្នើសុំសហការជាមួយអាមេរិក ដើម្បីបង្ហាញសញ្ញាផ្សះផ្សាលើកដំបូង ក្រោយអាមេរិកចាប់ខ្លួនលោកប្រធានាធិបតី Nicolas Maduro និងភរិយា កាលពីថ្ងៃទី៣ ខែមករា ។ ប្រធានាធិបតីស្តីទីវេណេស៊ុយអេឡា លោកស្រី Delcy Rodriguez ថា រដ្ឋាភិបាលលោកស្រីផ្តល់អាទិភាពដល់ការផ្លាស់ប្តូរឆ្ពោះទៅរកទំនាក់ទំនងដ៏គោរពជាមួយអាមេរិក ហើយលោក Maduro នៅតែជាប្រធានាធិបតីវេណេស៊ុយអេឡាដដែល ៕