Sophea Böttcher ត្រូវបានប្រជាពលរដ្ឋខ្មែរចាត់ទុកថាជាសេដ្ឋីនីចិត្តធម៌មួយរូបដែលបានជួយប្រទេសជាតិយ៉ាងច្រើនក្នុងអំឡុងពេលដែលសៀមឈ្លានពានកម្ពុជាតាមរយៈអ្នកបង្កើតមាតិកាក្នុងស្រុកជាច្រើនរូប។ លោកស្រីបានបញ្ជាក់ថាគិតមកទល់ពេលនេះលោកស្រីបានជួយប្រទេសកម្ពុជាជាង៤លានដុល្លារហើយ ខណៈសេដ្ឋីនីរូបនេះបញ្ជាក់ថានឹងបន្តជួយថែមទៀតទៅតាមមន្ទីរពេទ្យព្យាបាលកុមាររួមទាំងកម្រោងមួយចំនួនទៀត។

ថ្មីៗនេះអ្នកគាំទ្រសង្កេតឃើញថាលោកស្រី Sophea Böttcher ដែលមានស្វាមីជាសេដ្ឋីអាល្លឺម៉ង់ មានវត្តមាននៅក្នុងប្រទេសកម្ពុជាដោយថែមទាំងបានជួបជាមួយនឹងស្រ្តីទី១នៃប្រទេសកម្ពុជាផងដែរ។ Sophea Böttcher ត្រូវបានមហាជនស្គាល់យ៉ាងទូលំទូលាយតាមរយៈសកម្មភាពសប្បុរធម៌របស់ខ្លួនជាពិសេសគឺក្នុងអំឡុងពេលដែលសៀមឈ្លានពានតែម្តង។ ជាមួយគ្នានេះដែរ លោកស្រី ក៏បានលេចមុខក្នុងកម្មវិធីសម្ភាសន៍របស់ ឌីជេ ណាណា ដោយបានរៀបរាប់ពីការតស៊ូរបស់ខ្លួនជាច្រើនមុននឹងចាយជីវិតជាសេដ្ឋីនីរស់នៅលើគំនរមាសប្រាក់។

តាមការបង្ហាញរបស់លោកស្រី Sophea Böttcher លោកស្រីបានជួយជាទឹកប្រាក់សរុបជាង ៤លានដុល្លារមកហើយ។ ជាមួយនឹងការបរិច្ចាគទឹកប្រាក់យ៉ាងសន្ធឹកសន្ធាប់នេះលោកស្រីបានបញ្ជាក់ថាពុំមានការឃាត់ឃាំងពីស្វាមីនោះទេប៉ុន្តែផ្ទុយទៅវិញគឺមានតែជំរុញបន្ថែមដោយសារតែអ្នកទាំងពីរគឺមានបានច្រើនហើយ។

ទន្ទឹមនឹងការជួយរហូតដល់ទៅជាង៤លានដុល្លារនេះដែរលោកស្រី Sophea Böttcher បានបញ្ជាក់ថាការជួយនេះគ្រាន់តែជាការចាប់ផ្តើមជួយបានបន្តិចតែប៉ុណ្ណោះហើយលោកស្រីនឹងបន្តជួយថែមទៀតទៅកាន់មន្ទីរពេទ្យដែលជួយសង្គ្រោះអាយុជីវិតកុមារដូចជាមន្ទីរពេទ្យគន្ធបុផ្ផា មន្ទីរពេទ្យកុមារជាតិជាដើម។ លោកស្រីបានបន្ថែមទៀតថាលោកស្រីនឹងជួយផ្តល់អាហារូបករណ៍ទៅដល់សិស្សខ្វះខាត វីរកងទ័ពដែលរងរបួស រួមទាំងអ្នករើសសំរាមនៅស្ទឹងមានជ័យ អ្នកក្រីក្ររួមទាំងអ្នកកំព្រានិងមណ្ឌលចាស់ជរា។

ទឹកចិត្តដ៏ថ្លៃថ្លារបស់លោកស្រី Sophea Böttcher បានធ្វើឱ្យសាធារណជនជ្រួលជ្រាបយ៉ាងខ្លាំងចំពោះសេដ្ឋីនីចិត្តធម៌ដែលមានដើមកំណើតនៅខេត្តកំពង់ធំរូបនេះ៕

កោះអង្ក្រង គឺជាកោះតូចមួយស្ថិតក្នុងតំបន់អភិរក្សនៃប្រជុំកោះអាចន៍សេះ។ វាស្ថិតនៅមិនឆ្ងាយប៉ុន្មានពីកោះទន្សាយនោះទេ ដោយអ្នកអាចធ្វើដំណើរតាមទូកពីកំពង់ផែឆ្នេរកែប ប្រហែល ២០ ទៅ ៣០ នាទី ប៉ុណ្ណោះ។

កោះនេះពោរពេញទៅដោយទេសភាពបៃតងស្រស់បំព្រងប្លែកភ្នែក ទឹកសមុទ្រថ្លាឆ្វង់ ផ្កាថ្ម ថ្មប៉ប្រះទឹក និងពពួកថ្មច្រើនប្រភេទចម្រុះពណ៌ មានសណ្ឋានរលោងបែបធម្មជាតិ បង្កើតបានជាទស្សនីយភាពដ៏ស្រស់ស្អាត និងគួរឲ្យទាក់ទាញ។

ជាមួយនឹងធម្មជាតិស្ងប់ស្ងាត់ខៀវស្រងាត់ បូករួមទាំងជាតំបន់អភិរក្សមិនទាន់មានការអភិវឌ្ឍនៅឡើយ បានធ្វើឲ្យកោះអង្រ្កងក្លាយជាកន្លែងដ៏ស័ក្តិសមបំផុតសម្រាប់អ្នកមកសម្រាកលំហែរកាយបែបស្ងៀមស្ងាត់ គ្មានសំឡេងអ៊ូអររំខាន។ ទោះជាយ៉ាងណា អ្នកមិនអាចរត់លេងតាមឆ្នេរខ្សាច់ ដូចនៅកោះរ៉ុង និងកោះទន្សាយបានឡើយ ព្រោះនៅកោះនេះមានតែដុំថ្មតូចៗ រលោងៗត្រៀបត្រាពេញឆ្នេរប៉ុណ្ណោះ។ ក៏ប៉ុន្តែ នៅកោះនេះអ្នកអាចជិះទូកទស្សនាទេសភាពជុំវិញកោះ ស្ទួចត្រី និងមុជទឹកមើលផ្កាថ្មស្អាតៗនៅក្រោមសមុទ្របានផងដែរ។

សូមរំលឹកថា កោះអង្រ្កង មានទីតាំងស្ថិតនៅភូមិកែប សង្កាត់កែប ក្រុងកែប ខេត្តកែប។ ដំណើរកម្សាន្តនៅកោះនេះ នឹងផ្ដល់ឲ្យអ្នកនូវអារម្មណ៍ស្រស់ស្រាយ រំសាយអស់ទុកកង្វល់ ព្រមទាំងអាចស្វែងយល់អំពីធនធានធម្មជាតិដែលកំពុងអភិរក្សនៅទីនោះផងដែរ។ យ៉ាងណាសម្រាប់ភ្ញៀវទេសចរដែលមានគម្រោងទៅកម្សាន្តនៅទីនោះ គួរពិនិត្យមើលការព្យាករណ៍អាកាសធាតុ ព្រមទាំងប្រុងប្រយ័ត្ននៅពេលចុះលេងទឹកផងដែរ៕

(ភ្នំពេញ)៖ ធនាគារជាតិនៃកម្ពុជា បានបញ្ជាឲ្យធនាគារព្រីនស៍ ជម្រះបញ្ជីចាស់ និងហាមឃាត់មិនឱ្យបន្ដធ្វើប្រតិបត្តិការផ្តល់សេវាធនាគារថ្មីដល់អតិថិជនទៀតនោះទេ រួមទាំងការទទួលប្រាក់បញ្ញើ និងផ្តល់ឥណទាន។ សេចក្ដីសម្រេចនេះ ធ្វើឡើងក្រោយស្ថាបនិក ធនាគារព្រីនស៍ លោក ចេនហ្ស៊ី ត្រូវបានចាប់ខ្លួននិងបញ្ជូនទៅប្រទេសចិន។

យោងតាមសេចក្ដីប្រកាសព័ត៌មាន នៅថ្ងៃព្រហស្បត្តិ៍ ទី៨ ខែមករា ឆ្នាំ២០២៥ ធនាគារជាតិនៃកម្ពុជាបានធ្វើការជម្រាបជូនថា ធនាគារព្រីនស៍ ម.ក ត្រូវបានដាក់ឱ្យជម្រះបញ្ជីស្របតាមច្បាប់នៃព្រះរាជាណាចក្រកម្ពុជា ដោយធនាគារជាតិនៃកម្ពុជា បានតែងតាំងក្រុមហ៊ុនម៉ូរីសុនកាក់ អិមខេអេ អឌីត-អឺខោនធីង ឯ.ក (Morisonkak MKA audit-accounting Co., Ltd) ជាអ្នកជម្រះបញ្ជីធនាគារព្រីនស៍ ម.ក។

អាស្រ័យហេតុនេះ ធនាគារព្រីនស៍ ម.ក ត្រូវបានផ្អាកមិនឱ្យផ្តល់សេវាធនាគារថ្មីទៀតនោះទេ រួមទាំងការទទួលប្រាក់បញ្ញើ និងផ្តល់ឥណទាន។ ក្រុមហ៊ុនម៉ូរីសុនកាក់ អិមខេអេ អឌីត-អឺខោនធីង ឯ.ក នឹងទទួលបានសិទ្ធិគ្រប់គ្រងនិងចាត់ចែងលើ រាល់ប្រតិបត្តិការនិងទ្រព្យសម្បត្តិរបស់ធនាគារព្រីនស៍ ម.ក ចាប់ពីពេលជូនដំណឹងនេះតទៅ។

សេចក្ដីប្រកាសនេះបានគូសបញ្ជាក់ថា៖ ចំពោះអតិថិជនដែលមានប្រាក់បញ្ញើនៅធនាគារព្រីនស៍ ម.ក គឺអាចទៅដកប្រាក់បានធម្មតា ដោយត្រូវរៀបចំឯកសារដើម្បីដកប្រាក់បញ្ញើ ដែលនឹងមានការចាត់ចែងជូនទៅតាមលំដាប់អាទិភាព ស្របតាមច្បាប់ស្តីពីគ្រឹះស្ថានធនាគារនិងហិរញ្ញវត្ថុ។ ទន្ទឹមនេះ ចំពោះអ្នកខ្ចីប្រាក់ពីធនាគារព្រីនស៍ ម.ក គឺត្រូវបន្តបំពេញកាតព្វកិច្ចដែលមានជាប្រក្រតី។

ធនាគារជាតិនៃកម្ពុជា និងក្រសួង-ស្ថាប័នពាក់ព័ន្ធនឹងបន្តតាមដានយ៉ាងប្រុងប្រយ័ត្នខ្ពស់បំផុត លើការអនុវត្តរបស់អភិបាលកិច្ចបណ្តោះអាសន្ន ដើម្បីការពារផលប្រយោជន៍អ្នកដាក់ប្រាក់បញ្ញើ ក៏ដូចជាអតិថិជននានា៕

ផ្អើលពិភពលោក! ស្របពេលដែលមានព័ត៌មានលាបពណ៌ជាច្រើនអំពីប្រទេសកម្ពុជាថាអសុវត្ថិភាព តារាសម្ដែងហូលីវូដ និងជាផលិតករភាពយន្តដ៏ល្បី លោកស្រី អេនជេលីណា ជូលី បានបង្ហើបពីគម្រោងរបស់ខ្លួនថា នឹងធ្វើការផ្លាស់ទីលំនៅពីសហរដ្ឋអាមេរិកទៅក្រៅប្រទេសនៅឆ្នាំ២០២៦នេះ ខណៈប្រទេសកម្ពុជា គឺជាជម្រើសដ៏លេចធ្លោមួយនៅក្នុងការពិចារណារបស់លោកស្រី។

យោងតាមគេហទំព័រកម្សាន្ត People របស់សហរដ្ឋអាមេរិក នាពេលថ្មីៗនេះបានឲ្យដឹងថា៖ លោកស្រី អេនជេលីណា ជូលី បានដាក់លក់ផ្ទះដែលមានតម្លៃជាង ២៥ លានដុល្លាររបស់គាត់ នៅរដ្ឋឡូសអេនជឺឡេស (LA)) និងរៀបចំផ្លាស់ទៅរស់នៅក្រៅប្រទេស។ ជុំវិញព័ត៌មាននេះ គេបានកត់សម្គាល់ឃើញថា “ជូលីបានត្រៀមខ្លួនរួចជាស្រេច ដើម្បីរស់នៅជីវិតថ្មី ដែលមិនផ្តោតលើឡូសអេនជឺឡេស”។

តាមរយៈការផ្ដល់បទសម្ភាសន៍ជាមួយនឹងសារព័ត៌មានអន្តរជាតិធំៗ អេនជេលីណា ជូលី បាននិយាយថា លោកស្រីគ្រោងនឹងចាកចេញពីទីក្រុង Los Angeles នៅពេលដែលកូនៗរបស់គាត់ទាំងអស់មានអាយុគ្រប់ ១៨ ឆ្នាំ ជាពិសេសកូនពៅភ្លោះ Knox និង Vivienne ដែលនឹងគ្រប់អាយុនៅពាក់កណ្តាលឆ្នាំ ២០២៦។ជូលី បានបន្តថា៖ នាងកំពុងរង់ចាំការផ្លាស់ប្ដូរទីលំនៅយ៉ាងអន្ទះសារ ខណៈកាលដែលបន្តរស់នៅ Los Angeles មកដល់សព្វថ្ងៃ គឺដោយសារតែជាប់ពាក់ព័ន្ធនឹងដំណើរការផ្លូវច្បាប់ រួមទាំងជម្លោះអាណាព្យាបាលជាមួយអតីតស្វាមី ប្រ៊ែដ ភីត។ នៅក្នុងបទសម្ភាសន៍ពីមុន ជូលី បាននិយាយម្តងហើយម្តងទៀតថានាងនឹងចាកចេញពីទីនេះភ្លាមៗនៅពេលដែលកូនពៅរបស់ខ្ញុំ Knox និង Vivienne មានអាយុ ១៨ ឆ្នាំ។

តាមការបញ្ជាក់ ចាប់ពីឆ្នាំ ២០២៦ តទៅ ជូលី មានគម្រោងធ្វើការរវាងប្រទេសកម្ពុជា និងអឺរ៉ុប ជាកន្លែងដែលឯកជនភាពរបស់គាត់ត្រូវបានការពារ។ ជាពិសេស នៅកម្ពុជា ជាកន្លែងដែលនាងបានបង្កើតទំនាក់ទំនងមួយយ៉ាងស៊ីជម្រៅទាំងផ្នែកផ្ទាល់ខ្លួន វប្បធម៌ និងការងារមនុស្សធម៌ជាយូរមកហើយ ណាមួយគាត់ថែមទាំងមានសញ្ជាតិខ្មែរស្រាប់ផងដែរ។

កន្លងមក លោកស្រី អេនជេលីណា ជូលី តែងតែបង្ហាញថា លោកស្រីចាត់ទុកកម្ពុជាថាជា “ផ្ទះទីពីរ” របស់លោកស្រី ដោយសារវាជាទឹកដីកំណើតរបស់ Maddox (កូនប្រុសច្បង) និងជាកន្លែងដែលផ្លាស់ប្តូរជីវិតរបស់លោកស្រី។

គួរជម្រាបថា ទោះបីជាពេលនេះ លោកស្រីមិនទាន់បញ្ជាក់ជាផ្លូវការទាក់ទងនឹងលំនៅនាពេលអនាគតថានៅប្រទេសណាក៏ពិតមែន ប៉ុន្តែរបាយការណ៍ទាំងនេះបានឆ្លុះបញ្ចាំងឲ្យយើងឃើញថា តារាហូលីវុឌរូបនេះតែងតែចិញ្ចឹមចិត្តចង់មករស់នៅកម្ពុជាជានិច្ច ដ្បិតវាជាទឹកដីស្ងប់សុខ ដែលផ្ដល់ឲ្យគាត់នូវសន្តិភាពផ្លូវចិត្តអស់រយ់ពេលជាង២០ឆ្នាំមកហើយ ចាប់តាំងពីការមកដល់ដំបូងក្នុងឆ្នាំ២០០១។ ជាមួយគ្នានេះ ព័ត៌មាននេះទាក់ទាញការចាប់អារម្មណ៍យ៉ាងខ្លាំងពីអន្តរជាតិ និងធ្វើឱ្យសាធារណជនងាកមកចាប់អារម្មណ៍ជាថ្មីលើប្រទេសកម្ពុជា ក្នុងនាមជាទឹកដីនៃវប្បធម៌ សន្តិភាព និងការចូលរួមលំដាប់ពិភពលោក៕