យោងតាមរបាយការណ៍របស់ CNN ចក្រភពអង់គ្លេស និងបារាំង បានព្រមព្រៀងគ្នាក្នុងការដាក់ពង្រាយកងទ័ពទៅកាន់អ៊ុយក្រែន ប្រសិនបើកិច្ចព្រមព្រៀងសន្តិភាពត្រូវបានសម្រេចឡើងជាមួយរុស្ស៊ី។ ចលនានេះមានបំណងផ្តល់ការធានាសន្តិសុខរយៈពេលវែងសម្រាប់ទីក្រុងគៀវ និងជួយទប់ស្កាត់ការឈ្លានពានរបស់រុស្ស៊ីនាពេលអនាគត។

ផែនការនេះត្រូវបានប្រកាសបន្ទាប់ពីកិច្ចចរចានៅទីក្រុងប៉ារីស ដែលមាន 35 ប្រទេសចូលរួម ជាកន្លែងដែលនាយករដ្ឋមន្ត្រីចក្រភពអង់គ្លេស Keir Starmer និងប្រធានាធិបតីបារាំង Emmanuel Macron បានចុះហត្ថលេខាលើសេចក្តីប្រកាសនេះ។ ក្រោមសំណើនេះ កងកម្លាំងអង់គ្លេស និងបារាំងនឹងអាចឈរជើងនៅលើដីអ៊ុយក្រែន បន្ទាប់ពីបទឈប់បា.ញ់រវាងរុស្ស៊ីនិងអ៊ុយក្រែនបានចូលជាធរមាន។

មន្ត្រីបាននិយាយថា ការដាក់ពង្រាយនេះនឹងរួមបញ្ចូលការបង្កើតមជ្ឈមណ្ឌលយោធា និងកន្លែងការពារ ដើម្បីជួយអ៊ុយក្រែនក្នុងការកសាង និងបណ្តុះបណ្តាលកងកម្លាំងប្រដាប់អាវុធរបស់ខ្លួនឡើងវិញ ។ គោលការណ៏នេះត្រូវបានគេមើលឃើញពីវត្តមានពហុជាតិ និងយន្តការត្រួតពិនិត្យ ដែលអាចដឹកនាំដោយសហរដ្ឋអាមេរិក ដើម្បីត្រួតពិនិត្យបទឈប់បា.ញ់ និងបញ្ឈប់ការរំលោ.ភបំពានពីសំណាក់រុស្ស៊ីមកលើអ៊ុយក្រែន។

យ៉ាងណាមិញ រុស្ស៊ីបានបង្ហាញការជំទាស់យ៉ាងខ្លាំងចំពោះវត្តមានរបស់កងទ័ពលោកខាងលិចនៅអ៊ុយក្រែនជាយូរមកហើយ ដោយកាលពីមុនធ្លាប់បានព្រមា.នថា ការធ្វើបែបនេះនឹងត្រូវបានចាត់ទុកថាជាគោលដៅស្របច្បាប់របស់រុស្ស៊ី។

ខណៈពេលដែលទីក្រុងមូស្គូមិនទាន់បានចេញការឆ្លើយតបភ្លាមៗចំពោះការប្រកាសចុងក្រោយនេះ សំណើនេះបានគូសបញ្ជាក់ពីបញ្ហាប្រឈមដែលនៅតែមាននៅក្នុងការបកប្រែកិច្ចព្រមព្រៀងសន្តិភាពនាពេលអនាគត៕

បាងកក៖ សភាពាណិជ្ជកម្មថៃបានលើកឡើងពីការព្រួយបារម្ភរបស់ខ្លួនថា ការចាប់ខ្លួនមេដឹកនាំវេណេស៊ុយអេឡារបស់សហរដ្ឋអាមេរិក អាចបង្កឱ្យមានហានិភ័យនៃការប្រែប្រួលនៅក្នុងទីផ្សារប្រេង ទំនិញ និងកសិកម្មរបស់ថៃ ចំពេលដែលសេដ្ឋកិច្ចពិភពលោកនៅតែផុយស្រួយ និងប្រឈមមុខនឹងភាពមិនប្រាកដប្រជាជាច្រើន។ នេះបើតាមការចុះផ្សាយរបស់សារព័ត៌មាន Thai Enquirer នៅដើមសប្ដាហ៍នេះ។

ថ្វីដ្បិតថា ពាណិជ្ជកម្មផ្ទាល់រវាងប្រទេសថៃ និងវេណេស៊ុយអេឡានៅមានកម្រិត ប៉ុន្តែផលប៉ះពាល់ដោយប្រយោលនៅតែអាចកើតមានដល់វិស័យថាមពល និងកសិកម្មរបស់ប្រទេសថៃ, ថ្លៃដើមប្រតិបត្តិការអាជីវកម្ម និងសេដ្ឋកិច្ចនៅក្នុងប្រទេសដទៃទៀត។ ភាពមិនប្រាកដប្រជានេះ ក៏អាចជះឥទ្ធិពលដល់ពាណិជ្ជកម្ម និងការវិនិយោគនៅអាមេរិកឡាទីន និងទីផ្សារពិភពលោក ដែលបច្ចុប្បន្នកំពុងស្ថិតនៅក្រោមភាពតានតឹងនៃភូមិសាស្ត្រនយោបាយ និងការបែកបាក់សេដ្ឋកិច្ចស្រាប់ទៅហើយ។

លោក Poj Aramwatananont ប្រធានសភាពាណិជ្ជកម្មថៃ បាននិយាយថា៖ ស្ថានភាពនេះ គួរតែត្រូវបានដោះស្រាយដោយសន្តិវិធីក្រោមច្បាប់អន្តរជាតិ និងក្របខ័ណ្ឌពហុភាគី ដោយកត់សម្គាល់ថា ការកើនឡើងអាចមានផលប៉ះពាល់យ៉ាងទូលំទូលាយទៅលើស្ថិរភាពសេដ្ឋកិច្ចពិភពលោក និងទំនុកចិត្តរបស់វិនិយោគិន។

ទីផ្សារសកលលោករហូតមកដល់ពេលនេះបានឆ្លើយតបដោយប្រុងប្រយ័ត្ន។ តម្លៃប្រេងបានប្រែប្រួលបន្តិចបន្តួច ដោយសារការផ្គត់ផ្គង់សកលលោកយ៉ាងច្រើនអាចទូទាត់សងសម្រាប់ការរំខានដែលអាចកើតមានពីទិន្នផលរបស់វេណេស៊ុយអេឡា ខណៈពេលដែលទីផ្សារភាគហ៊ុនសហរដ្ឋអាមេរិក និងអាស៊ីនៅតែមានស្ថេរភាព។

អ្នកវិភាគបានកត់សម្គាល់ថា ស្ថានភាពនេះបានបង្កើនបុព្វលាភហានិភ័យ និងអាចជះឥទ្ធិពលដល់លំហូរសុវត្ថិភាព ដែលប៉ះពាល់ដល់ទីផ្សារទំនិញកាន់តែទូលំទូលាយ។ ជាមួយគ្នានេះ សភាពាណិជ្ជកម្មបានជំរុញឱ្យប្រទេសថៃតាមដានតម្លៃប្រាក់បាត ថាមពល និងទីផ្សារហិរញ្ញវត្ថុអន្តរជាតិ ព្រមទាំងរៀបចំវិធានការកាត់បន្ថយហានិភ័យ ដើម្បីការពារសេដ្ឋកិច្ចក្នុងស្រុក៕

ប្រទេសវេណេស៊ុយអេឡា ៖ ចម្ងល់ជាច្រើនពាក់ព័ន្ធនឹងការមិនតបតរបស់កងទ័ពវេណេស៊ុយអេឡានៅកណ្តាលអធ្រាត្រថ្ងៃទី៣ ខែមករា ឆ្នាំ២០២៦ ដែលកងទ័ពអាមេរិកធ្វើប្រតិបត្តិការ «Absolute Resolve» ចា.ប់ខ្លួនលោកប្រធានាធិបតី Nicolas Maduro និងភរិយា ហើយចម្ងល់នេះត្រូវបានបកស្រាយកាន់តែច្បាស់ បន្ទាប់ពីមេបញ្ជាការកងទ័ពវេណេស៊ុយអេឡាប្រាប់ពីមូលហេតុដែលកងទ័ពវេណេស៊ុយអេឡាមិនតបតជាមួយកងទ័ពអាមេរិក ពីព្រោះបារម្ភខ្លាចការវាយប្រ.ហារកាន់តែធ្ងន់ធ្ងរ និងគិតពីសុវត្ថិភាពពលរដ្ឋ ។

តាមការចុះផ្សាយរបស់សារព័ត៌មានបរទេសកាលពីថ្ងៃទី៦ ខែមករា ឆ្នាំ២០២៦ មេបញ្ជាការកងទ័ពវេណេស៊ុយអេឡា លោក Edgar Alejandro Lugo Pereira និយាយថា កងទ័ពវេណេស៊ុយអេឡាមិនតបតទេ នៅយប់ដែលកងទ័ពអាមេរិកធ្វើប្រតិបត្តិការចាប់ខ្លួនលោកប្រធានាធិបតី Nicolas Maduro និងភរិយា គឺកងទ័ពវេណេស៊ុយអេឡារក្សាភាពស្ងៀមស្ងាត់ដើម្បីចៀសវាងផលប៉ះពាល់អាចកើតឡើងកាន់តែធ្ងន់ធ្ងរមកលើប្រទេសវេណេស៊ុយអេឡា ។

បទសម្ភាសន៍របស់មេបញ្ជាការកងទ័ពវេណេស៊ុយអេឡា លោក Edgar ជាមួយសារព័ត៌មាន RIA Novosti បញ្ជាក់ថា ទោះជាកងទ័ពវេណេស៊ុយអេឡាមានសព្វាវុធ និងសមត្ថភាពគ្រប់គ្រាន់អាចទប់ទល់ជាមួយការវាយប្រហារពីសំណាក់កងទ័ពអាមេរិកក្តី ប៉ុន្តែរដ្ឋាភិបាលវេណេស៊ុយអេឡា និងកងទ័ព សម្រេចចិត្តមិនតបតជាមួយកងទ័ពអាមេរិកដោយការប្រើប្រាស់កម្លាំង ។ យើងបារម្ភបើមានការបាញ់គ្នា ឬវាយប្រហារគោលដៅរបស់អាមេរិក វានឹងធ្វើឱ្យអាមេរិកលើកយកការប៉ះទង្គិចនេះបើកប្រតិបត្តិការកងទ័ពយ៉ាងពេញលេញវាយប្រហារវេណេស៊ុយអេឡា ដែលនាំឱ្យខាតបង់ច្រើនមិនអាចវាយតម្លៃការខូចខាត និងប៉ះពាល់ពលរដ្ឋវេណេស៊ុយអេឡា ។

កងទ័ពអាមេរិកបើកការវាយប្រហារឈានដល់ការចាប់ខ្លួនប្រធានាធិបតីវេណេស៊ុយអេឡា លោក Nicolas Maduro និងភរិយា កាលពីថ្ងៃទី៣ ខែមករា កន្លងមក គឺមានតែភ្នាក់ងារសន្តិសុខ និងពលរដ្ឋគុយបា ត្រឹមតែ៣២នាក់ប៉ុណ្ណោះ ដែលបានពលីជីវិតប្រយុទ្ធប្រឆាំងនឹងកងទ័ពអាមេរិករហូតដល់ពេលចុងក្រោយ ។ រីឯកងទ័ពវេណេស៊ុយអេឡាជាច្រើនមិនបានតបតទេ គ្រាន់តែសង្កេតមើលកងទ័ពអាមេរិកវាយប្រហារទីតាំងយុទ្ធសាស្ត្រនៅទីក្រុង Caracas ។

អ្នកវិភាគបរទេសចាត់ទុកថា នេះជាការពិតនៅពីក្រោយរវាងបញ្ជាការកងទ័ពវេណេស៊ុយអេឡាជាមួយអាមេរិក ដែលពួកគេមិនតបត ហើយបណ្តោយឱ្យកងទ័ពអាមេរិកចាប់មេដឹកនាំរបស់ខ្លួន ដើម្បីរក្សារចនាសម្ព័ន្ធអំណាចកងទ័ព និងការពារកុំឱ្យមហាអំណាចអាមេរិកបំផ្លិចបំផ្លាញប្រទេស ។

គួរបញ្ជាក់ថា ប្រធានាធិបតីអាមេរិក លោក Donald Trump បានចោទប្រកាន់ប្រធានាធិបតីវេណេស៊ុយអេឡា លោក Maduro ជួញដូរគ្រឿងញៀន, ឃុបឃិតកាន់កាប់អាវុធបំផ្លាញអាមេរិក, មានទំនាក់ទំនងជាមួយក្រុមជួញដូរគ្រឿងញៀន និងរត់ពន្ធគ្រឿងញៀនចូលទឹកដីអាមេរិក ។ ប៉ុន្តែលោក Maduro បដិសេធនឹងការចោទប្រកាន់នេះថា រដ្ឋាភិបាលក្រុងវ៉ាស៊ីនតោនយកលេសដើម្បីធ្វើប្រតិបត្តិការកងទ័ពផ្តួលរំលំរដ្ឋាភិបាលរបស់លោក ។

កងទ័ពពិសេសអាមេរិកវាយប្រហារទីក្រុង Caracas ប្រទេសវេណេស៊ុយអេឡា និងចាប់ខ្លួនលោកប្រធានាធិបតី Maduro និងភរិយា ទាំងកណ្តាលអធ្រាត្រកាលពីថ្ងៃទី៣ ខែមករា បានធ្វើឱ្យពិភពលោកភ្ញាក់ផ្អើលយ៉ាងខ្លាំង ហើយអ្វីគួរឱ្យចាប់អារម្មណ៍បំផុត គឺកងទ័ពអាមេរិកប្រើពេលមិនដល់៣ម៉ោងទេ ក្នុងការចាប់ខ្លួនប្រធានាធិបតីវេណេស៊ុយអេឡាដោយរលូន ។

ទោះជាអាមេរិកទទួលបានជោគជ័យក្នុងប្រតិបត្តិការនេះ ប៉ុន្តែប្រទេសជាច្រើនបានថ្កោលទោសទង្វើរបស់អាមេរិក ដោយអំពាវនាវឱ្យអាមេរិកគោរពច្បាប់អន្តរជាតិ និងដោះលែងប្រធានាធិបតីវេណេស៊ុយអេឡា និងភរិយា ជាបន្ទាន់ ខណៈលោកប្រធានាធិបតី Trump ប្រកាសថា លោក Maduro និងភរិយា ប្រឈមមុខនឹងទោសព្រហ្មទណ្ឌដែលត្រូវកាត់ក្តីដោយតុលាការអាមេរិក ៕

ចោ.រមិនដែលហៅខ្លួនឯងថាជាចោ.រ! ក្រោយកម្ពុជាដាក់ពាក្យប្ដឹ.ងទៅ UN ទាក់ទងនឹងសកម្មភាពទាហានថៃចូលលួ.ចនិងកាន់កាប់ទ្រព្យសម្បត្តិឯកជនពលរដ្ឋខ្មែរលើទឹកដីខ្មែរ ឥឡូវនេះប្រទេសថៃបានចេញមកបដិសេធដោយអះអាងថា៖ ទាំងនេះគឺជាការយល់ច្រលំរបស់ប្រព័ន្ធផ្សព្វផ្សាយ ខណៈរូបភាព និងវីដេអូដែលយើងបានឃើញកន្លងមក គឺកងទ័ពថៃគ្រាន់តែបើកប្រតិបត្តិការការពារ«អធិបតេយ្យភាព» ប្រឆាំងនឹងការឈ្លានពានព្រំដែនខុសច្បាប់ប៉ុណ្ណោះ។

តាមការចេញផ្សាយរបស់ Khaosod កាលពីថ្ងៃទី៦ មករា ម្សិលមិញនេះបានឲ្យដឹងថា កងទ័ពភូមិន្ទថៃសូមធ្វើការបដិសេធយ៉ាងដាច់អហង្ការចំពោះការចោទប្រកាន់ពីគណៈកម្មាធិការសិទ្ធិមនុស្សកម្ពុជា (CHRC) ដែលអះអាងថា កងទ័ពថៃបានកាន់កាប់ផ្ទះពលរដ្ឋខ្មែរដោយខុសច្បាប់ និងលួ.ចទ្រព្យសម្បត្តិក្នុងអំឡុងពេលមានភាពតានតឹងព្រំដែនថ្មីៗនេះ។

ជាមួយគ្នានេះ អ្នកនាំពាក្យកងទ័ពថៃ លោក វីនថៃ ស៊ូវ៉ារី បានចេញសេចក្តីបំភ្លឺមួយនៅថ្ងៃដដែលថា៖ ការអះអាងទាំងនេះអាចនាំឱ្យមានការយល់ច្រឡំពីសាធារណជន។ លោកបានសង្កត់ធ្ងន់ថា ប្រតិបត្តិការយោធាទាំងអស់ត្រូវបានបញ្ជាឲ្យអនុវត្តយ៉ាងតឹងរ៉ឹងតែនៅក្នុងទឹកដីអធិបតេយ្យភាពថៃ និងនៅក្នុងតំបន់ដែលត្រូវបានឈ្លានពានដោយខុសច្បាប់ប៉ុណ្ណោះ។

អ្នកនាំពាក្យរូបនេះបានបន្ថែមទៀតថា យោធាថៃត្រូវបានតម្រូវឱ្យរុះរើរចនាសម្ព័ន្ធខុសច្បាប់ ដើម្បីការពារកុំឲ្យមានអ្នកប្រើប្រាស់វាសម្រាប់គោលបំណងយោធា ឬជាការគំរាមកំហែងដល់សន្តិសុខជាតិថៃ។ ដោយឡែក ទាក់ទងនឹងទ្រព្យសម្បត្តិឯកជនដែលត្រូវបានរកឃើញ កងទ័ពថៃគ្រាន់តែ «ប្រមូលមករក្សាទុក» សម្រាប់ដំណើរការផ្លូវច្បាប់ និងមិនត្រូវបានយកមកប្រើប្រាស់សម្រាប់ប្រយោជន៍ផ្ទាល់ខ្លួននោះទេ។

ទាំងនេះគឺជាការអះអាងរបស់អ្នកនាំពាក្យកងទ័ពភូមិន្ទថៃ ដែលធ្វើឡើងដើម្បីលាងខ្លួនក្រោយពេលសកម្មភាពបំផ្លិ.ចបំផ្លា.ញ លួច និងគាស់កកាយយកទ្រព្យសម្បត្តិឯកជនពលរដ្ឋខ្មែរ ត្រូវបានចែកចាយយ៉ាងទូលំទូលាយនៅលើបណ្ដាញសង្គម។ មិនត្រឹមតែលួ.ចយករបស់របរទាំងនោះទៅប៉ុណ្ណោះទេ កងទ័ពថៃថែមទាំងបានប្រព្រឹត្តនូវទង្វើដ៏ស្មោ.កគ្រោគ និងអគតិជាច្រើនផ្សេងទៀត រួមមានការហែកក្រដាសប្រាក់រៀលខ្មែរ, យកជើងជាន់រូបព្រះឆាយាល័ក្ខអតីតព្រះមហាក្សត្រខ្មែរ និងវា.យកម្ទេចទីតាំងសក្ការៈបូជាជាដើម ដែលទង្វើទាំងនេះបានឆ្លុះបញ្ជាំងឲ្យអន្តរជាតិឃើញថា ជាតិសាសន៍នេះគ្មានសីលធម៌ គ្មានមនុស្សធម៌ និងមានចរិតពិសពុ.លជាខ្លាំង។

អាស្រ័យហេតុនេះ កម្ពុជាសង្ឃឹមថា សហគមន៍អន្តរជាតិនឹងបានមើលឃើញពីសន្តានពិតប្រាកដរបស់ថៃ ព្រមទាំងជួយជំរុញឲ្យថៃវិលមកដោះស្រាយជម្លោះព្រំដែនដោយស្របតាមច្បាប់អន្តរជាតិ និងកាតព្វកិច្ចរបស់ខ្លួន ក្រោមសន្ធិសញ្ញានិងកិច្ចព្រមព្រៀងដែលមានស្រាប់៕

មេដឹកនាំបណ្តាប្រទេសនៅអឺរ៉ុបបានបង្ហាញគោលជំហរគាំទ្រដាណឺម៉ាក និងកោះហ្គ្រីនឡែន ដោយបញ្ជាក់ថា កោះនៅតំបន់អាកទិកនេះជារបស់ពលរដ្ឋកោះហ្គ្រីនឡែន បន្ទាប់ពីប្រធានាធិបតីអាមេរិកចាប់អារម្មណ៍ចង់គ្រប់គ្រងកោះនេះជាថ្មី ។ ពេលឡើងកាន់តំណែងអាណត្តិទី២ លោកប្រធានាធិបតី Donald Trump ចង់បញ្ចូលកោះនេះទៅក្នុងទឹកដីអាមេរិកដើម្បីជាប្រយោជន៍សន្តិសុខជាតិ ពីព្រោះស្ថិតនៅទីតាំងយុទ្ធសាស្ត្រតំបន់អាកទិក សម្បូររ៉ែធម្មជាតិសំខាន់ៗសម្រាប់ប្រើប្រាស់ក្នុងបច្ចេកវិទ្យាជាន់ខ្ពស់ ទើបអាមេរិកត្រូវការកោះ ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី៧ ខែមករា ឆ្នាំ២០២៦ ។

សេចក្តីថ្លែងការណ៍របស់មេដឹកនាំប្រទេសបារាំង អាល្លឺម៉ង់ អ៊ីតាលី ប៉ូឡូញ អេស្ប៉ាញ អង់គ្លេស និងដាណឺម៉ាក បញ្ជាក់ថា កោះហ្គ្រីនឡែន (Greenland) គឺជារបស់ពលរដ្ឋហ្គ្រីនឡែន និងជាបញ្ហារបស់ប្រទេសដាណឺម៉ាក និងកោះហ្គ្រីនឡែនតែប៉ុណ្ណោះ ដែលអាចសម្រេចចិត្តពាក់ព័ន្ធនឹងការគ្រប់គ្រងកោះ ។ មេដឹកនាំប្រទេសទាំងនេះថា សន្តិសុខក្នុងតំបន់អាកទិកត្រូវតែសម្រេចតាមរយៈកិច្ចសហការជាមួយដៃគូអង្គការសន្ធិសញ្ញាអាត្លង់ទិកខាងជើង (NATO) រួមទាំងអាមេរិក ។

សេចក្តីថ្លែងការណ៍បញ្ជាក់ថា អង្គការ NATO បានបង្ហាញគោលជំហរយ៉ាងច្បាស់ពីតំបន់អាកទិកមានសារៈសំខាន់ ដែលសម្ព័ន្ធមិត្តអឺរ៉ុបកំពុងបង្កើនតួនាទី ហើយពួកយើង និងសម្ព័ន្ធមិត្តពីប្រទេសជាច្រើនបានបង្ហាញវត្តមាន សកម្មភាព និងការវិនិយោគ ដើម្បីផ្តល់សុវត្ថិភាពនៅតំបន់អាកទិក និងរារាំងសត្រូវ ខណៈលោកប្រធានាធិបតី Trump និយាយជាញឹកញាប់ចង់គ្រប់គ្រងកោះហ្គ្រីនឡែន ។

តាមការលើកឡើងរបស់មេដឹកនាំប្រទេសបារាំង អង់គ្លេស អាល្លឺម៉ង់ អ៊ីតាលី ប៉ូឡូញ អេស្ប៉ាញ និងដាណឺម៉ាក គឺអធិបតេយ្យ បូរណភាពទឹកដី និងការមិនល្មើសព្រំដែន គឺជាគោលការណ៍អន្តរជាតិ ហើយមេដឹកនាំប្រទេសទាំងនេះគាំទ្រគោលការណ៍អន្តរជាតិ ។

ការជ្រៀតជ្រែករបស់អាមេរិកនៅប្រទេសវេណេស៊ុយអេឡា បានធ្វើឱ្យប្រទេសនានាបារម្ភជាថ្មីអំពីលោកប្រធានាធិបតី Trump តាំងចិត្តចង់បញ្ចូលកោះហ្គ្រីនឡែនទៅក្នុងទឹកដីអាមេរិក ដែលកោះនេះមិនទាន់បានរុករករ៉ែកម្រនៅឡើយ ហើយកោះមានសារៈសំខាន់ពេលផ្ទាំងទឹកកករលាយ ដែលនឹងបើកផ្លូវដល់ការធ្វើដំណើរតាមផ្លូវទឹករបស់នាវាទាំងឡាយ ។ កោះនេះស្ថិតនៅផ្លូវខ្លីបំផុតសម្រាប់ការបាញ់មីស៊ីលរវាងអាមេរិក និងរុស្ស៊ី ហើយអាមេរិកក៏មានទីតាំងកងទ័ពនៅលើកោះដែរ ។

ស្របពេលមានស្ថានការណ៍បន្ទាន់នៅប្រទេសវេណេស៊ុយអេឡា លោកប្រធានាធិបតី Trump បាននិយាយកាលពីថ្ងៃទី៤ ខែមករា ថា ៖ «យើងនឹងគិតពីកោះហ្គ្រែនឡែនម្តងទៀតក្នុងរយៈពេលប្រហែល ២ខែ» ។

គួរបញ្ជាក់ថា ដាណឺម៉ាកបារម្ភយ៉ាងខ្លាំងពីការបាត់បង់កោះហ្គ្រីនឡែន បន្ទាប់ពីអាមេរិកចាប់ខ្លួនមេដឹកនាំវេណេស៊ុយអេឡា ហើយលោកប្រធានាធិបតី Trump បង្ហាញគោលជំហររបស់ខ្លួនម្តងហើយម្តងទៀតចង់គ្រប់គ្រងកោះនេះ ។ អ្វីគួរឱ្យបារម្ភ គឺភរិយារបស់មន្ត្រីជំនួយការជាន់ខ្ពស់អាមេរិកដ៏មានឥទ្ធិពលម្នាក់បានបង្ហោះរូបភាពកោះហ្គ្រីនឡែនភ្ជាប់ជាមួយទង់ជាតិអាមេរិក និងសរសេរថា «ឆាប់ៗ…» ។

នាយករដ្ឋមន្ត្រីដាណឺម៉ាក លោកស្រី Mette Frederiksen បានបញ្ជាក់ក្នុងសេចក្តីថ្លែងការណ៍ចេញផ្សាយកាលពីថ្ងៃទី៤ ខែមករា អំពាវនាវឱ្យរដ្ឋាភិបាលក្រុងវ៉ាស៊ីនតោនឈប់គំរាមកំហែងសម្ព័ន្ធមិត្តប្រវត្តិសាស្ត្រជាបន្ទាន់ វាគ្មានប្រយោជន៍ទេ ដែលអាមេរិកចង់គ្រប់គ្រងកោះហ្គ្រីនឡែន ។

កោះហ្គ្រីនឡែន ស្ថិតនៅចន្លោះតំបន់អឺរ៉ុប និងអាមេរិកខាងជើង ទើបធ្វើឱ្យកោះមានសារៈសំខាន់សម្រាប់ប្រព័ន្ធការពារមីស៊ីលរបស់អាមេរិក ។ លើសពីនេះ កោះសម្បូរធនធានធម្មជាតិរ៉ែផ្សេងៗដែលអាមេរិកត្រូវការដើម្បីកាត់បន្ថយការពឹងផ្អែករ៉ែពីប្រទេសចិន ។ កោះនេះស្ថិតក្រោមការគ្រប់គ្រងរបស់ដាណឺម៉ាក និងមានសិទ្ធិប្រកាសឯករាជ្យក្រោមកិច្ចព្រមព្រៀងកាលពីឆ្នាំ២០០៩ ប៉ុន្តែត្រូវការប្រាក់ឧបត្ថម្ភយ៉ាងច្រើនពីដាណឺម៉ាក ៕