មានមនោសញ្ចេតនាជ្រាលជ្រៅជាមួយតារាល្បី ប្រូកាក់ ថាការស្រលាញ់មិនមែនត្រូវយកឱ្យបាន

មានចិត្តចំពោះតារាចម្រៀង សុខ ពិសី បង្ហាញការស្រលាញ់ជាសាធារណៈមិនត្រឹមតែសម្តីតែបង្ហាញទាំងទង្វើដែលកាយវិការនេះមានអ្នកខ្លះក៏សាទរ មានអ្នកខ្លះក៏រិះគន់ថាជោរ ចំណែកឯអ្នកផ្សេងទៀតក៏ដាក់សម្ពាធខាងស្រី។ ទោះយ៉ាងណាអ្នកបង្កើតមាតិកា ប្រូកាក់ បានបង្ហោះសារចាក់ដោតមួយថាការស្រលាញ់មិនមែនត្រូវយកឱ្យបាននោះទេ។

អ្នកបង្កើតមាតិការូបនេះបានរៀបរាប់នៅលើបណ្តាញសង្គមរបស់ខ្លួនថា «ពាក្យថាស្រលាញ់របស់ខ្ញុំមិនមែនមានន័យថាយកឱ្យបាននោះទេ។ ត្រូវហើយខ្ញុំស្រលាញ់បងសី តែមិនមែនមានន័យថាខ្ញុំយកគាត់ឱ្យទាល់តែបាននោះទេ ព្រោះគាត់ជាអ្នកជ្រើសរើស គាត់អាចជ្រើសរើសអ្នកណាក៏បាន តាមដែលគាត់គិតថា ល្អក្នុងជីវីតរបស់គាត់។ខ្ញុំដឹងវាមិនអាចទៅរួចនោះទេ តែខ្ញុំគ្រាន់តែស្រលាញ់ គ្មានបំណងអ្វីក្រៅពីស្រលាញ់នោះទេ»។

ប្រូកាក់ បញ្ជាក់បន្ថែមថា «រាល់ Video របស់គាត់(សុខ ពិសី) ទាំងអស់ ដែលខ្ញុំបានកាត់គឺមានតំណក់ទឹកភ្នែកខ្ញុំទាំងអស់ដាក់អារម្មណ៍ស្រមើស្រមៃដាក់ចិត្តដាក់កាយទៅអស់ហើយ ចឹងគ្មានទេពាក្យថាសម្តែងនោះទេ។ឥឡូវសួរថាខ្ញុំជាមួយគាត់ម៉េចហើយ ល្អធម្មតាទេ គ្មានអីទេខ្ញុំនៅស្រលាញ់គាត់ធម្មតា គ្មានអ្វីប្រែប្រួលទេ ឆ្នាំក្រោយទោះមិនមែនជាខ្ញុំក៏ខ្ញុំសប្បាយចិត្តដែរ ព្រោះចង់ឃើញគាត់មានគ្រួសារ មានសុភមង្គល។ សូមអ្នកទាំងអស់គ្នាឈប់ដាក់សម្ពាធទៅលើគាត់ទៀត»។

ក្រោយពីមានរឿងចម្រូងចម្រាសនៅលើបណ្តាញសង្គម តារាចម្រៀង សុខ ពិសី បានចេញវីដេអូជាសាធារណៈនៅថ្ងៃទី១៨ ខែកុម្ភៈ ថាប្រូកាក់ មិនមែនជាសង្សាររបស់ខ្លួននោះទេហើយការដែលនាងទទួលយកបាច់ផ្កាសារភាពស្នេហ៍របស់ ប្រូកាក់ នៅថ្ងៃប្រគំតន្រ្តីនាងមិនបានឆ្លើយយល់ព្រមដែរប៉ុន្តែទង្វើនេះគឺមិនចង់បំបាក់ទឹកចិត្តរបស់ភាគីម្ខាងទៀត។ តារាចម្រៀងរូបនេះបញ្ជាក់ថានាងតែងតែស្និទ្ធស្នាលជាមួយនឹងហ្វេនៗគ្រប់ៗគ្នាមិនថាជាមនុស្សស្រី មនុស្សប្រុស ឬក៏ភេទទី៣ឡើយប៉ុន្តែយ៉ាងណាភាពរួសរាយរបស់នាងក្លាយទៅជាអាវុធធ្វើបាបខ្លួនឯងវិញ៕