ប្រទេសជប៉ុន ៖ កាលពីថ្ងៃទី១ ខែមករា ឆ្នាំ២០២៤ សារព័ត៌មានបរទេសបានរាយការណ៍ពីហេតុការណ៍គ្រោះរញ្ជួយដី ចាប់ពីកម្រិត៧.៤វិកទ័រ ទៅ៧.៦វិកទ័រ មានជម្រៅ១០គីឡូម៉ែត្រ ក្នុងតំបន់ Notojo ខេត្ត Ishikawa ស្ថិតនៅភាគកណ្តាលប្រទេសជប៉ុន ។ អាជ្ញាធរប្រចាំក្រុង Suzu នៃខេត្ត Ishikawa ឱ្យដឹងថា គ្រោះរញ្ជួយដីនេះបណ្តាលឱ្យអគារ, ផ្ទះសម្បែង និងបង្គោលភ្លើងជាច្រើនកន្លែងដួលរលំ ។

សារព័ត៌មានរាយការណ៍ថា មានរលកយក្សស៊ូណាមិ កម្ពស់ជាង១ម៉ែត្រនៅទីក្រុងវ៉ាជីម៉ាក់ ខេត្ត Ishikawa ។ ការត្រួតពិនិត្យអាកាសធាតុនៅតាមតំបន់ឆ្នេរសមុទ្រ និងកាមេរ៉ាសុវត្ថិភាពប្រចាំទីក្រុងស៊ូសុ អាចថតរូបភាពគ្រោះរញ្ជួយដីនៅបរិវេណឆ្នេរសមុទ្រ ព្រមទាំងរូបភាពការខូចខាតអគារ, ផ្ទះសម្បែង និងផ្លូវនៅបរិវេណក្បែរនោះផងដែរ ។

ចំណែកហាងលក់ទំនិញនៅទីក្រុងណាកាណុ ស្ថិតនៅភាគកណ្តាលប្រទេសជប៉ុន គេបានឃើញទំនិញផ្សេងៗក្នុងហាងធ្លាក់ចេញពីធ្នេរ ។ ដូចគ្នានេះ ហាងលក់ទំនិញនៅទីក្រុងខាណាសូវ៉ាក់ ខេត្តអ៊ីស៊ីកាវ៉ាក់ មានទំនិញជាច្រើនធ្នាក់រាយប៉ាយនៅលើឥដ្ឋ និងមានទឹកធ្លាក់ពីលើដំបូលទៀតផង ។

សារព័ត៌មាន NSK រាយការណ៍ថា រលកយក្សស៊ូណាមិនៅឆ្នេរសមុទ្រជប៉ុននឹងកើតឡើងជាញឹកញាប់ ហើយមានកម្ពស់ខ្ពស់ជាងមុន ។ ចំណែកពលរដ្ឋក្នុងតំបន់បាននាំគ្នាជម្លៀសចេញភ្លាមៗ ជាពិសេស អ្នករស់នៅខេត្តមីអ៊ីង៉ាតាក់ និងខេត្តថូយ៉ាម៉ាក់ ដែលរលកយក្សស៊ូណាមិអាចមានកម្ពស់រហូតដល់៣ម៉ែត្រ ។ អាជ្ញាធរបានសំណូមពរឱ្យពលរដ្ឋជម្លៀសទៅកាន់ទីកន្លែងខ្ពស់ និងទៅឱ្យឆ្ងាយពីឆ្នេរសមុទ្រ ។

ក្រុមហ៊ុនអគ្គិសនីជប៉ុនឱ្យដឹងថា ពួកគេបានត្រួតពិនិត្យភាពខុសប្រក្រតីនៅរោងចក្រថាមពលនុយក្លេអ៊ែរជាច្រើនកន្លែង ។ ដូចគ្នានេះ នាយករោងចក្រនុយក្លេអ៊ែរដ៏ធំបំផុតរបស់ជប៉ុនបញ្ជាក់ថា ពុំទាន់មានភាពខុសប្លែកក្នុងរោងចក្រនេះទេ ។

នាយករដ្ឋមន្ត្រីជប៉ុន លោក Fumio Kishida ថ្លែងថា រដ្ឋាភិបាលជប៉ុនបានបង្កើតមជ្ឈមណ្ឌលសង្គ្រោះពិសេសមួយ ដើម្បីប្រមូលផ្តុំព័ត៌មានពាក់ព័ន្ធនឹងគ្រោះរញ្ជួយដី និងរលកយក្សស៊ូណាមិ ។ មជ្ឈមណ្ឌលសង្គ្រោះពិសេសនេះអាចផ្តល់ដំណឹងទៅកាន់ពលរដ្ឋយ៉ាងឆាប់រហ័ស និងប្រាប់ឱ្យពលរដ្ឋរស់នៅក្នុងតំបន់រងគ្រោះជម្លៀសទៅកាន់កន្លែងមានសុវត្ថិភាព ។

រីឯអ្នកនាំពាក្យរដ្ឋាភិបាល លោក Yoshimasa Hayashi និយាយថា លោកពុំទាន់ទទួលបានរបាយការណ៍ពីបញ្ហាមិនប្រក្រតីណាមួយទេនៅរោងចក្រនុយក្លេអ៊ែរក្នុងតំបន់ ។ ប៉ុន្តែលោកបានស្នើទៅកាន់ស្ថាប័នពាក់ព័ន្ធឱ្យប្រុងប្រយ័ត្ន និងតាមដានស្ថានការណ៍នេះឱ្យដិតដល់ ។

ប្រព័ន្ធផ្សព្វផ្សាយអនឡាញបានបង្ហោះរូបភាព និងវីដេអូគ្រោះថ្នាក់ដោយសារគ្រោះរញ្ជួយដី ដូចជា អគារ, ផ្ទះសម្បែង និងផ្លូវជាច្រើនកន្លែងបានខូចខាតយ៉ាងធ្ងន់ធ្ងរ រួមទាំងដំបូលហាងលក់ទំនិញមួយចំនួនបានធ្លាក់ខ្ចាត់ខ្ចាយ ៕

កាលពីពេលថ្មីៗនេះ ប៉ូលីសថៃកំពុងបើកប្រតិបត្តិការស៊ើបអង្កេតទៅលើ «ករណីពពោះជំនួសដោយខុសច្បាប់» ដែលពាក់ព័ន្ធទៅនឹងការរៀបការរវាងបុរសជនជាតិចិននិងនារីថៃ ក្រោយពីស្ត្រីថៃម្នាក់បានដាក់ពាក្យបណ្តឹងថា នាងត្រូវបានរគូដណ្តឹងបោះបង់ចោល ក្រោយដឹងថាកូនដែលកំពុងនៅក្នុងផ្ទៃនាងគឺជាកូនស្រី មិនមែនជាកូនប្រុសដូចទៅនឹងការចង់បានរបស់ឪពុក។

លោក សុរាជាតិ ហាក់ផន អគ្គស្នងការរងនគរបាលជាតិ បាននិយាយកាលពីថ្ងៃទី២៥ ខែធ្នូថា លោកបានបញ្ជាឱ្យត្រួតពិនិត្យទៅលើករណីថ្មីមួយ ដែលជនជាតិចិនជាច្រើននាក់ អាចនឹងជាប់ពាក់ព័ន្ធនៅក្នុងរឿងក្តីការជួលឲ្យ “ពពោះជំនួសដោយខុសច្បាប់” ក្នុងប្រទេសថៃ ។

ការស៊ើបអង្កេតនេះបានចាប់ផ្តើមជាមួយនឹងករណីស្ត្រីជនជាតិថៃ មានឈ្មោះថា ណាយ អាយុ ៣៦ ឆ្នាំម្នាក់ បានប្រាប់ប៉ូលីសថានាងត្រូវបានគូដណ្តឹងជនជាតិចិនបោះបង់ចោល បន្ទាប់ពីនាងមានផ្ទៃពោះ ហើយបុរសចិននោះបានដឹងថា កូននៅក្នុងផ្ទៃនាងជាកូនស្រី មិនមែនកូនប្រុស។

ណាយបាននិយាយថា នាងធ្វើការជាតារាបង្ហាញម៉ូដ ហើយបានរស់នៅជាមួយម្ដាយ និងប្អូនស្រីរបស់នាងក្នុងខុនដូមួយនៅផ្លូវ Rama IX នាទីក្រុងបាងកក។ គ្រាមួយគឺមានស្ត្រីជនជាតិចិន ម្នាក់ ដែលស្នាក់នៅក្នុងអគារខុនដូរតែមួយគឺតែងតែព្យាយាមមកបង្កើតភាពស្និតស្នាលជាមួយនាងនិងក្រុមគ្រួសារ ហើយបានណែនាំបុរសជនជាតិចិនជាច្រើននាក់ឱ្យស្គាល់នាង។ ទីបំផុត នាងបានចាប់ផ្ដើមមានទំនាក់ទំនងជាមួយបុរសជនជាតិចិនម្នាក់ ដែលមានឈ្មោះថា Mr Zhang។

ដំបូងឡើយ ពួកគេទាក់ទងគ្នាតាមរយៈវីដេអូខល ដោយប្រើកម្មវិធីឆាតប៉ុណ្ណោះ។ បន្ទាប់មកនៅពីខែមិថុនា ឆ្នាំ២០២៣នេះ ពួកគេក៏បានណាត់ជួបគ្នានៅប្រទេសថៃ និងរស់នៅជាមួយគ្នាក្នុងរយៈពេលខ្លីផងដែរ។ បុរសចិននោះបានស្នើនិងសន្យារៀបការជាមួយនាងនៅខែកញ្ញា។ បន្ទាប់មកគាត់បានត្រឡប់ទៅប្រទេសចិនវិញ។

ក្រោយមកនៅចុងខែមិថុនា នាងបានដឹងថាខ្លួនកំពុងមានផ្ទៃពោះជាមួយបុរសចិនដែលជួបគ្នាមុននោះ។ រួចនាងក៏បានប្រាប់ទៅបុរសចិននោះ ហើយគាត់បានសុំពន្យារពេលពិធីមង្គលការរហូតដល់ខែតុលា ដោយនិយាយថាគាត់រវល់ខ្លាំងណាស់។ ម៉្យាងវិញទៀត គាត់ក៏តែងតែសួរចង់ដឹងពីភេទរបស់កូនដែលមិនទាន់កើតផងដែរ។ នៅចុងខែកញ្ញា នាងបានរកឃើញថា ក្មេងនៅក្នុងផ្ទៃខ្លួនជាកូនស្រី រួចក៏បានជូនដំណឹងទៅ តែបុរសចិនរូបនេះគឺបានបញ្ឈប់ការទាក់ទងជាមួយនាងភ្លាមៗ ដោយហេតុថាជនជាតិចិនចង់បានតែកូនប្រុសប៉ុណ្ណោះ។

ភ្នាក់ងាស៊ើបអង្កេតក៏បានសន្និដ្ឋានដែរថា បច្ចុប្បន្ននេះ បុរសជនជាតិចិនកំពុងព្យាយាមស្វែងរកនារីថៃនិងឡាវស្អាតៗ ដើម្បីបង្កើតកូនប្រុសឲ្យខ្លួន ដោយហេតុថាស្ត្រីជនជាតិចិនមិនសូវចាប់អារម្មណ៍លើការរៀបអាពាហ៍ពិពាហ៍និងយកកូននោះទេ។

ទោះជាយ៉ាងណា ភ្នាក់ងារប៉ូលីសថៃគឺកំពុងតែស៊ើបអង្កេតរឿងនេះបន្ថែមទៀត ព្រោះថានេះមិនមែនជាលើកទី១ទេ គឺមាននារីថៃជាច្រើននាក់ណាស់ដែលបានរងគ្រោះដោយសាររឿងនេះដូចគ្នាផងដែរ៕

បរទេស៖ រដ្ឋចំនួនពីររបស់សហរដ្ឋអាមេរិកគឺ Maine និង Colorado បានសម្រេចដកលោក Donald Trump ចេញពីសន្លឹកឆ្នោតនៅក្នុងការបោះឆ្នោតបឋមនៅឆ្នាំក្រោយ ដោយសារគាត់បានចូលរួមញុះញង់ឱ្យមានការបះបោរព័ត៌មានមិនពិតអំពីការក្លែងបន្លំសន្លឹកឆ្នោតកាលពីឆ្នាំ ២០២០។

យោងតាមគេហទំព័រអន្តរជាតិ Washington Post ដែលបានចុះផ្សាយនៅថ្ងៃទី២៩ ខែធ្នូថា អតីតប្រធានាធីបតីអាមេរិក Donald Trump នឹងមិនអាចឈរឈ្មោះបោះឆ្នោតនៅក្នុងរដ្ឋ Maine និង Colorado បានឡើយ។ ដោយអគ្គលេខាធិការនៃរដ្ឋទាំងពីរ បានសន្និដ្ឋានថា លោក Trump បានញុះញង់ឱ្យមានការបះបោរដោយការផ្សព្វផ្សាយការអះអាងមិនពិតអំពីការក្លែងបន្លំសន្លឹកឆ្នោតនៅក្នុងការបោះឆ្នោតប្រធានាធិបតីឆ្នាំ ២០២០។

ហេតុនេះហើយ អគ្គលេខាធិការនៃរដ្ឋ Maine និង Colorado ក៏បានសម្រេចចិត្តដកឈ្មោះលោក Trump ចេញពីសន្លឹកឆ្នោតក្នុងការបោះឆ្នោតបឋមនៅឆ្នាំក្រោយ ដោយសារគាត់ “អសមត្ថភាព”។ ការសម្រេចចិត្តនេះ បានធ្វើឱ្យប៉ះពាល់ដល់តំណែងរបស់លោក Trump ក្នុងការប្រជែងតំណែងសម្រាប់សេតវិមានក្នុងខែវិច្ឆិកា ឆ្នាំ ២០២៤ និងដាក់សម្ពាធបន្ថែមទៀតលើតុលាការកំពូលរបស់សហរដ្ឋអាមេរិកដើម្បីដោះស្រាយសំណួរអំពីសិទ្ធិទទួលបានអតីតប្រធានាធិបតីទូទាំងប្រទេស។

ទោះជាយ៉ាងណាក៏ដោយ ការសម្រេចចិត្តនេះក៏ជាលើកដំបូងក្នុងប្រវត្តិសាស្ត្ររបស់ប្រទេសផងដែរ ក្នុងការដកបេក្ខជនប្រធានាធិបតីចេញពីសន្លឹកឆ្នោតក្រោមឃ្លានៃការបះបោររបស់រដ្ឋធម្មនុញ្ញ។ បច្ចុប្បន្នសំណុំរឿងរបសរដ្ឋទាំងពីរត្រូវបានប្តឹងឧទ្ធរណ៍ទៅតុលាការកំពូលរបស់សហរដ្ឋអាមេរិក ហើយលោក Trump បាននិយាយថា លោកក៏នឹងប្តឹងបន្តទៅវិញចំពោះការសម្រេចចិត្តរបស់រដ្ឋទាំងពីរនេះ៕

កាលពីពេលថ្មីៗនេះ នៅលើបណ្តាញសង្គមអ៊ីនធើណែតកំពុងតែមានការចាប់អារម្មណ៍និងអាណិតអាសូរបុរសម្នាក់ជាពន់ពេក ក្រោយបុរសជាអ្នកបើកបរឡានដឹកទំនិញនៅ Inner Mongolia (ប្រទេសចិន) ពេលកំពុងបើកបរឆ្លងកាត់ព្យុះព្រិល ដោយតូចចិត្តនឹងជីវិតខ្លួនឯងខ្លាំងពេកធ្វើឲ្យគាត់ទប់ចិត្តមិនជាប់ ក៏ស្ទុះចេញពីរថយន្តបង្ហើបពាក្យមួយឃ្លានេះ ។

ព្យុះព្យុលកំពុងតែបោកបក់ខ្លាំង ធ្វើឲ្យផ្លូវរអិល ឡានក៏ទៅមុខមិនរួច ដែលបណ្តាលឲ្យអ្នកបើកបរម្នាក់នោះបានជាប់គាំងនៅកន្លែងដាច់ស្រយ៉ាលមួយតែម្នាក់ឯង។ គាត់បានសម្លឹងមើលព្រិលដ៏ត្រជាក់ដែលបក់មកលើមុខរបស់គាត់ ទឹកភ្នែករបស់គាត់ស្រុកចុះ លាយជាមួយនឹងព្រិល និងទឹកភ្លៀង។ ភ្លាមនោះគាត់ក៏បាននិយាយពាក្យមួយឃ្លាថា៖ «ខ្ញុំពិតជាស្តាយក្រោយខ្លាំងណាស់ដែលខ្ញុំមិនខំរៀន បើមានជាតិក្រោយពិតខ្ញុំនឹងខំរៀន»។ មួយឃ្លានេះផងដែរ បានធ្វើឱ្យអ្នកនិយមលេងអ៊ីនធឺណិតស្ទើរតែធ្លាយបេះដូងចេញមកក្រៅ និងក្តុកក្តួលគ្រប់ៗគ្នា។

ដូចដែលបានដឹងមកហើយថា ឥឡូវនេះនៅភាគខាងជើងប្រទេសចិនកំពុងទទួលរងនូវអាកាសធាតុត្រជាក់ខ្លាំង។ កន្លែងជាច្រើនដែលមានព្រិលធ្លាក់ខ្លាំង មនុស្សម្នានាំគ្នាសំងំលាក់ខ្លួនក្នុងបន្ទប់ដែលមានម៉ាស៊ីនកម្ដៅដើម្បីជៀសវាងភាពត្រជាក់។ រីឯសាលារៀនជាច្រើនក៏បានប្រកាសឈប់សម្រាកបណ្តោះអាសន្នសម្រាប់សិស្សផងដែរ។

អាកាសធាតុត្រជាក់ខ្លាំងបែបនេះបានបង្កការលំបាកដល់មនុស្សគ្រប់ទីកន្លែង។ ខណៈមនុស្សមួយចំនួន ប្រៀបទៅនឹងបុរសបើកឡានដឹកទំនិញម្នាក់នេះជាដើម ព្រោះតែជីវភាពខ្វះខាតខ្លាំងពេក ទើបធ្វើឲ្យគាត់ហ៊ានប្រថុយធ្វើការទាំងក្រោមខ្យល់ និងព្រិលយ៉ាងលំបាកនិងគ្រោះថ្នាក់បំផុត។

លោកបានរៀបរាប់ថា តាមដងផ្លូវនៅខណៈពេលនោះគឺកកអស់ហើយ ប្រសិនបើជិះទៅមុខវានឹងរអិលខ្លាំង ដែលអាចបង្កគ្រោះថ្នាក់ដល់អាយុជីវិត។ រីឯនៅពីក្រោយគាត់គឺមានឡានពណ៌ក្រហមដ៏ធំមួយដែលមានតម្លៃស្មើនឹងជីវិតគាត់។ គាត់បានយំហើយនិយាយថា៖ «ខ្ញុំមិននឹកស្មានថាវាពិបាក ហើយពិបាកខ្លាំងដល់ថ្នាក់នេះទេ។ បើខ្ញុំបានដឹងបែបនេះ ខ្ញុំនឹងខំរៀនតាំងពីក្មេង»។ បើអ្នកនៅក្មេងហើយមិនខំធ្វើការ អ្នកនឹងវេទនា។ ប៉ុន្តែបើអ្នកនៅក្មេង ហើយខំរៀន យ៉ាងហោចណាស់ក៏អាចរកការងារបានសមរម្យដែរ ដោយមិនចាំបាច់ទៅធ្វើការនៅកន្លែងដាច់ស្រយាលតែម្នាក់ឯង ដេកហាលថ្ងៃហាលខ្យល់បែបនេះដែរ។ វាពិតជាពិបាកណាស់!

ការបើកឡានដឹកទំនិញធំគឺជាការងារដ៏លំបាកមួយ។ ទោះបីជាអ្នករកបានប្រាក់ច្រើនក៏ដោយ ប៉ុន្តែអ្នកត្រូវតែធ្វើដំណើរទៅគ្រប់ទីកន្លែង ឬអាចនឹងនៅក្នុងរថយន្តជាច្រើនខែផងក៏មានព្រោះតែការធ្វើដំណើរផ្លូវឆ្ងាយ។ វាជារឿងធម្មតាដែលត្រូវឃ្លាតពីផ្ទះ ឆ្ងាយពីគ្រួសារនិងកូន។ ជាងនេះទៅទៀត អ្នកបើកបររថយន្តដឹកទំនិញតែងតែជួបប្រទះការលំបាក និងហានិភ័យនៅពេលបើកបរផ្លូវឆ្ងាយ។ ពួកគេមិនហ៊ានធ្វេសប្រហែសទេ ព្រោះបើភ្លាត់តែបន្តិចនឹងមានគ្រោះថា្នក់កើតឡើងដោយអចេតនា។ ប្រសិនបើអាកាសធាតុល្អ ហើយផ្លូវរាបស្មើមិនអីទេ! ប្រសិនបើមានខ្យល់ខ្លាំង និងភ្លៀងធ្លាក់ ឬធ្លាក់ព្រិលខ្លាំង នោះវាជារឿងដ៏លំបាកហើយសម្រាប់អ្នកបើកឡានដឹកទំនិញគ្រប់រូបផងដែរ៕

ប្រទេសកូរ៉េខាងត្បូង ៖ កាលពីថ្ងៃទី២៨ ខែធ្នូ ឆ្នាំ២០២៣ សារព័ត៌មានបរទេសរាយការណ៍ថា មានអាជ្ញាធរជាង១.០០០នាក់មកពីស្ថាប័នកងទ័ព, ប៉ូលិស និងភ្នាក់ងារសង្គ្រោះបន្ទាន់របស់កូរ៉េខាងត្បូង បានមកចូលរួមហ្វឹកហាត់រួមគ្នាដើម្បីទប់ទល់នឹងការវាយប្រហារពីប្រទេសកូរ៉េខាងជើង ។ ការហ្វឹកហាត់លើកនេះ កូរ៉េខាងត្បូងបានលើកយកករណីក្រុមហាម៉ាស់វាយលុ.កមកលើប្រទេសអ៊ីស្រាអែល មកធ្វើជាមេរៀនជាក់ស្តែង ។

ក្នុងការហ្វឹកហាត់របស់ក្រុមអាជ្ញាធរទាំងនេះ គេបានសន្មត់ថា បណ្តាញទំនាក់ទំនងសាធារណៈសំខាន់ៗនៅប្រទេសកូរ៉េខាងត្បូង កំពុងតែធ្លាក់នៅក្រោមការវាយប្រហាររបស់កូរ៉េខាងជើង ដូចជា ៖ បណ្តាញទឹកស្អាត, បណ្តាញទូរស័ព្ទ, បណ្តាញអ៊ីនធើរណេត, បណ្តាញអគ្គិសនី និងប្រព័ន្ធទំនាក់ទំនងនៅក្រោមដី ជាដើម ។

អភិបាលក្រុងសេអ៊ូល Oh Se-hun លើកឡើងថា អ៊ីស្រាអែល គឺជាប្រទេសមួយដែលមានប្រព័ន្ធការពារសុវត្ថិភាពនាំមុខគេលើពិភពលោក ប៉ុន្តែប្រទេសនេះបែរជាមិនអាចការពារខ្លួនឯងពីការវាយប្រហារយ៉ាងខ្លាំងក្លារបស់ក្រុមហាម៉ាស់ ។ ហេតុនេះ ការវាយប្រហារនៅប្រទេសអ៊ីស្រាអែល ចាត់ទុកថា គឺជាមេរៀនសម្រាប់ឱ្យកូរ៉េខាងត្បូងអនុវត្តវិធានការដើម្បីការពារជីវិត និងសុវត្ថិភាពពលរដ្ឋកូរ៉េខាងត្បូង ដោយសារការវាយប្រហារភេរវ.កម្មរបស់កូរ៉េខាងជើង ។

គួរបញ្ជាក់ថា ទីក្រុងសេអ៊ូលរបស់កូរ៉េខាងត្បូង មានពលរដ្ឋរស់នៅប្រមាណ៩លាន៤សែននាក់ ហើយទីក្រុងនេះស្ថិតនៅឆ្ងាយពីព្រំដែនជាប់ប្រទេសកូរ៉េខាងជើង ត្រឹមតែ៣៨គីឡូម៉ែត្រប៉ុណ្ណោះ ។ ហេតុនេះ ទីក្រុងសេអ៊ូលអាចប្រឈមនឹងគ្រោះថ្នាក់ខ្លាំង និងក្លាយជាគោលដៅវាយប្រហារពីកូរ៉េខាងជើងគ្រប់ពេលវេលា ។

ការហ្វឹកហាត់របស់កូរ៉េខាងត្បូងបានធ្វើឡើងចំនួន១ថ្ងៃ ដើម្បីទប់ទល់នឹងស្ថានការណ៍អាសន្នដែលអាចកើតឡើង ដោយសារថ្មីៗនេះ កូរ៉េខាងជើងបានសាកល្បងបាញ់មីស៊ីលរយៈចម្ងាយឆ្ងាយ (ICBM) និងបង្ហោះផ្កាយរណបចារកម្មទៅកាន់អវកាស ។ មុននេះ កូរ៉េខាងត្បូងបានប្រកាសដាក់ទណ្ឌកម្មសេដ្ឋកិច្ចជាថ្មីទៅលើកូរ៉េខាងជើង ដោយសំដៅលើគម្រោងអភិវឌ្ឍន៍មីស៊ីល និងនុយក្លេអ៊ែររបស់កូរ៉េខាងជើង ៕