បរទេស៖ រថយន្តអគ្គិសនី Terren របស់ប្រទេសស្វីសដែលដំណើរការដោយថាមពលពន្លឺព្រះអាទិត្យ បានបង្កើតប្រវត្តិសាស្ត្រថ្មីមួយដោយការឡើងលើជម្រាលភ្នំភ្លើងសកម្មខ្ពស់បំផុតរបស់ពិភពលោក ជាមួយកម្ពស់ ៦,៥០០ ម៉ែត្រ។
យោងតាមការចុះផ្សាយរបស់ Interesting Engineering កាលពីថ្ងៃទី ២៧ ខែធ្នូថា នេះជាលើកទីមួយហើយដែលយានអគ្គិសនីអាចឡើងដល់កម្ពស់ ៦,៥០០ ម៉ែត្រពីលើនីវ៉ូទឹកសមុទ្រ ដែលជាព្រឹត្តិការណ៍ដ៏សំខាន់ថ្មីមួយនៃបច្ចេកវិទ្យាបៃតង។

រថយន្ត Terren ដែលប្រើក្នុងបេសកកម្ម គឺជារថយន្តដែលបានកែប្រែពីម៉ូដែល Aebi VT450 Transporter របស់ក្រុមហ៊ុនស្វីស Aebi Schmidt។ ដូច្នេះ សមាជិកបីនាក់នៃក្រុម Peak Evolution ដែលធ្វើការនៅប្រទេសស្វីស បានសាកល្បងបើកឡានថាមពលពន្លឺព្រះអាទិត្យ Terren ឡើងលើជម្រាលភាគខាងលិចនៃភ្នំភ្លើង Ojos del Salado ក្នុងប្រទេស Chile ដែលជាភ្នំភ្លើងសកម្មខ្ពស់បំផុតនៅលើភពផែនដីដោយជោគជ័យ ក៏ដូចជាទទួលបានកំណត់ត្រាថ្មីមួយសម្រាប់ការឡើងភ្នំខ្ពស់បំផុតផងដែរ។

រថយន្ត Terren បានបំពាក់ចង្កូតកង់ក្រោយសម្រាប់បង្កើនភាពរហ័សរហួន ហើយត្រូវបានបំពាក់ដោយកញ្ចប់ថាមពលថ្ម ៩០ kWh ដែលផ្តល់ចម្ងាយដល់ទៅ ២០០ គីឡូម៉ែត្រឯណោះ។ រីឯជំនាន់ផលិតអាចត្រូវបានដំឡើងនៅពេលក្រោយជាមួយនឹងកញ្ចប់ថ្មធំជាង ១៤០ kWh ដែលជួយបង្កើនការចល័ត។ ដូច្នេះហើយ ដំណើរកំណត់ត្រានេះបានចាប់ផ្តើមប្រហែលប្រាំបីសប្តាហ៍មុន នៅពេលដែលក្រុមហ៊ុនដឹកជញ្ជូន Gebrüder Weiss បានដឹកជញ្ជូន Terren ពីប្រទេសស្វីសទៅតំបន់ Atacama ប្រទេសឈីលី។

នៅចុងខែវិច្ឆិកា ក្រុម Peak Evolution បានសម្រេចនូវព្រឹត្ដិការណ៍ដ៏សំខាន់មួយ នៅពេលដែលពួកគេបានឡើងលើសសញ្ញាសម្គាល់ ៦,០០០ ម៉ែត្រ ដោយបំបែកកំណត់ត្រារថយន្តអគ្គិសនី។ បន្ទាប់មកប្រហែលមួយសប្តាហ៍ក្រោយ ពួកគេក៏បានបន្តបង្កើតកំណត់ត្រាថ្មីមួយជាមួយនឹងរយៈកម្ពស់ ៦,៥០០ ម៉ែត្រ។ បន្ទាប់ពីបង្កើតកំណត់ត្រាថ្មីបំផុតរបស់ពិភពលោក ក្រុមការងារ Peak Evolution គ្រោងនឹងបន្តការសាកល្បង និងអភិវឌ្ឍរថយន្តនេះក្នុងគោលបំណងធ្វើពាណិជ្ជកម្ម៕

ប្រទេសចិន ៖ បច្ចុប្បន្ន គេអាចស្វែងរកបន្ទប់ជួលតម្លៃសមរម្យនៅទីក្រុងសៀងហៃ តាមរយៈគម្រោងនានាពាសពេញទីក្រុងនេះ ។ បុគ្គលិកធ្វើការក្នុងក្រុមហ៊ុនភាគច្រើនបានសម្រេចចិត្តមកជួលបន្ទប់ស្នាក់នៅក្នុងគម្រោង «លំនៅឋានសម័យថ្មីសម្រាប់អ្នករស់នៅទីក្រុង» ដោយសារតែគម្រោងនេះបានផ្តល់លក្ខណៈងាយស្រួលគ្រប់យ៉ាងដល់ពួកគេ ។

លោក Zheng Yan អាយុ២៦ឆ្នាំ គឺជាបុគ្គលិកផ្នែកទទួលភ្ញៀវក្នុងក្រុមហ៊ុនមួយ បានមករស់នៅក្នុងគម្រោង «លំនៅឋានសម័យថ្មីសម្រាប់អ្នករស់នៅទីក្រុង» នៅតំបន់មីនហាង ទីក្រុងសៀងហៃ អស់រយៈពេលជាង៣ខែហើយ ។ លោកនិយាយថា កាលពីខែកក្កដា ឆ្នាំ២០២៣ អាជ្ញាធរក្រុងសៀងហៃបានប្រកាសថា អ្នកធ្វើការ និងយុវវ័យអាចមករស់នៅក្នុងគម្រោងនេះបាន ។

លោក Zheng Yan រៀបរាប់ថា លោកបានមករស់នៅទីនេះជាមួយមិត្តរួមការងារផ្សេងទៀតចំនួន៣នាក់ ដោយត្រូវចំណាយប្រាក់ថ្លៃឈ្នួលបន្ទប់ចំនួន៥០០យាន់ក្នុងម្នាក់ ។ ការរស់នៅទីនេះល្អប្រសើរខ្លាំងណាស់ ដោយសារមានភាពងាយស្រួលគ្រប់បែបយ៉ាង ដូចជា ៖ មានរថយន្តជិះទៅហាងលក់ទំនិញផ្សេងៗ និងរថយន្តទៅកាន់រថភ្លើងក្រោមដីផងដែរ ។

កាលពីចុងខែវិច្ឆិកា ឆ្នាំ២០២៣ ប្រធានាធិបតីចិន លោក ស៊ី ជិនពីង បានធ្វើដំណើរមកកាន់ទីក្រុងសៀងហៃ និងទស្សនាគម្រោង «លំនៅឋានសម័យថ្មីសម្រាប់អ្នករស់នៅទីក្រុង» ។ លោកប្រធានាធិបតីចិនបានសង្កត់ធ្ងន់ទៅលើភាពចាំបាច់ក្នុងការស្វែងរកកន្លែងរស់នៅឱ្យគ្រប់គ្រាន់ និងបន្ថែមគុណភាពជីវិតសម្រាប់អ្នករស់នៅទីក្រុង ។

ក្នុងរយៈពេលជាច្រើនឆ្នាំកន្លងមក អាជ្ញាធរក្រុងសៀងហៃបានព្យាយាមបង្កើនការសាងសង់បន្ទប់ជួលក្នុងតម្លៃសមរម្យ ដើម្បីជួយពលរដ្ឋដែលគ្មានលទ្ធភាពទិញលំនៅឋានដោយខ្លួនឯង ។ មន្ត្រីផ្នែកលំនៅឋានប្រចាំក្រុងសៀងហៃបញ្ជាក់ថា នៅចុងឆ្នាំ២០២៥ ទីក្រុងសៀងហៃមានគម្រោងសាងសង់បន្ទប់ជួលតម្លៃសមរម្យ ចំនួន៦សែនបន្ទប់ ។

Li Jiacheng ជានាយកប្រតិបត្តិរបស់ CR Land Youtha International APT Community លើកឡើងថា គម្រោងនេះមានបន្ទប់ជួលចំនួន២.៤៧៥បន្ទប់ ដែលបានសាងសង់ឡើងនៅក្រោមគំនិត «One bed, One room, One suite» ។ បន្ទប់ជួលទាំងនេះបានបែងចែកជា៣ប្រភេទ គឺ ៖ បន្ទប់សម្រាប់ក្រុមគ្រួសារ, បន្ទប់សម្រាប់យុវវ័យដែលទើបទទួលបានការងារធ្វើ និងបន្ទប់សម្រាប់បុគ្គលិក ។

គម្រោងនេះបានផ្តល់លក្ខណៈងាយស្រួលដល់អតិថិជន ដូចជា ៖ បណ្ណាល័យ, កន្លែងហាត់ប្រាណ និងសម្ភារៈកីឡា, ចង្ក្រានបាយ និងកន្លែងបោកគក់ ជាដើម ។ ហេតុនេះ វាស្របតាមគោលនយោបាយរបស់ប្រធានាធិបតីចិន លោក ស៊ី ជិនពីង ដែលបានកំណត់ថា នៅតាមទីក្រុងពុំគួរមានត្រឹមតែអគារខ្ពស់ៗប៉ុណ្ណោះទេ ប៉ុន្តែត្រូវធ្វើឱ្យអ្នករស់នៅទីក្រុងមានជីវិតល្អប្រសើរផងដែរ ៕

ឡាវគឺជាប្រទេសដែលសម្បូរទៅដោយធនធានធម្មជាតិជាច្រើន ជាពិសេសគឺតំបន់ទេសចរណ៍ផ្ទាល់តែម្ដង សុទ្ធតែស្អាត និងមានបរិយាសកាសស្ងប់ស្ងាត់ រួមទាំងស្រស់ស្រាយទៀតផង។ លើសពីនេះ ក្រៅពីមានតំបន់ទេសចរណ៍ធម្មជាតិស្អាតបែបបុរាណ ប្រទេសឡាវក៏មានការចំណាយលើការស្នាក់នៅ និងអាហារហូបចុក ក្នុងតម្លៃសមរម្យផងដែរ។ ដូច្នេះហើយ នៅគិតអីទៀតឆ្លងឆ្នាំខាងមុខនេះអាចមកទស្សនាកម្សាន្តនៅកន្លែងទេសចរណ៍ដ៏ទាក់ទាញទាំង ៥ ក្នុងប្រទេសឡាវដូចខាងក្រោម៖

១.វត្ត Xieng Thong៖ វត្ត Xieng Thong ជាកន្លែងទាក់ទាញមិនគួររំលងឡើយពេលទៅដល់ហ្លួងព្រះបាង។ វត្តនេះមានទីតាំងនៅចំណុចប្រសព្វនៃទន្លេមេគង្គ និងទន្លេណាំខាន់ ដែលត្រូវបានសាងសង់ឡើងតាំងពីរជ្ជកាលព្រះបាទជ័យជេដ្ឋាធិរាជក្នុងសតវត្សទី ១៦។ វាជាប្រាសាទដ៏សំខាន់ និងស្រស់ស្អាតបំផុត រួមទាំងមានការតុបតែងយ៉ាងអស្ចារ្យជាមួយនឹងលំនាំឆ្លាក់ផ្សេងៗ។ ដូច្នេះសម្រាប់តម្លៃសំបុត្រចូលទស្សនាគឺ ២០,០០០ គីប (ប្រហែល ៥,៤០០រៀល) ដោយបើកជារៀងរាល់ថ្ងៃ ចាប់ពីម៉ោង ៨:០០ ព្រឹក ដល់ ៥:០០ ល្ងាច។

២.ច្រកទ្វារជ័យជំនះ Patuxay៖ Patuxay គឺជាកន្លែងសំខាន់នៃរដ្ឋធានីវៀងច័ន្ទ ដោយវាជាការរំឮកដល់ប្រជាជនឡាវដែលបានពលីជីវិត នៅក្នុងសង្រ្គាមមុនបដិវត្តកុម្មុយនិស្ត។ កន្លែងនេះពីមុនត្រូវបានគេស្គាល់ថាជាវិមាន Anousavary ដែលត្រូវបានសាងសង់ពីឆ្នាំ ១៩៦២ ដល់ឆ្នាំ ១៩៦៨ ហើយក៏ជាបេតិកភណ្ឌវប្បធម៌ពិភពលោកផងដែរ។ ដូច្នេះសម្រាប់តម្លៃសំបុត្រចូលទស្សនាគឺ ២,០០០ គីប (ប្រហែល ៥០០រៀល) ដោយបើកជារៀងរាល់ថ្ងៃ ចាប់ពីម៉ោង ៨:០០ ព្រឹក ដល់ ៥:០០ ល្ងាច។

៣.ទឹកធ្លាក់ Kuang Si៖ ទឹកធ្លាក់ Kuang Si មានចម្ងាយជិត ៣០ គីឡូម៉ែត្រពីភាគខាងត្បូងនៃទីក្រុងហ្លួងព្រះបាង ជាមួយទឹកធ្លាក់ថ្មកំបោរ កម្ពស់ ៤ជាន់ ឬប្រហែល ៧០ម៉ែត្រ នឹងហ៊ុព័ទ្ធដោយភ្នំ ព្រៃឈើ បង្កើតបានជារូបភាពធម្មជាតិដ៏ស្រស់ស្អាតបំផុត។ សម្រាប់តម្លៃសំបុត្រចូលទស្សនាវិញគឺ ១០,០០០ គីប (ប្រហែល ២,៧០០រៀល) ក៏ដូចជាបើករៀងរាល់ថ្ងៃ ចាប់ពីម៉ោង ៨:០០ ព្រឹក ដល់ ៥:០០ ល្ងាចផងដែរ។

៤.ឧទ្យានព្រះពុទ្ធ Xieng Khuan៖ ឧទ្យានព្រះពុទ្ធ Xieng Khuan ត្រូវបានសាងសង់ឡើងក្នុងឆ្នាំ ១៩៥៨ នឹងមានចម្ងាយប្រហែល ២៥ គីឡូម៉ែត្រពីកណ្តាលនៃរដ្ឋធានីវៀងច័ន្ទ។ ឧទ្យាននេះមានចម្លាក់ និងស្នាដៃសិល្បៈជាង ២០០ ត្រូវបានធ្វើឡើងពីបេតុងពង្រឹងក្នុងទំហំចាប់ពីតូចទៅធំ រួមមានចម្លាក់ព្រះពុទ្ធ ព្រះហិណ្ឌូមួយចំនួន និងរូបចម្លាក់មនុស្ស បិសាច សត្វ និងសត្វទេវកថាមួយចំនួនតូចផងដែរ។ រីឯសំបុត្រចូលទស្សនាគឺមានតម្លៃ ៥,០០០ គីប (ប្រហែល ១,០០០ រៀល) ដោយបើកជារៀងរាល់ថ្ងៃ ចាប់ពីម៉ោង ៨:០០ ព្រឹក ដល់ ៥:០០ ល្ងាច។

៥.កន្លែងទេសភាពណាំសាយ៖ ចំណុចទេសភាពណាំសាយមានចម្ងាយ ៨ គីឡូម៉ែត្រពីកណ្តាលក្រុងវ៉ាងវៀង។ ដើម្បីមកដល់ទីនេះ ភ្ញៀវត្រូវឡើងចម្ងាយប្រហែល ៣០០ ម៉ែត្រ ដោយចំណាយពេលប្រហែល ៤៥ នាទី។ នេះជាកន្លែងមួយក្នុងចំណោមកន្លែងដែលមានទេសភាព និងជាពិសេសគឺថ្ងៃលិចដ៏ស្រស់ស្អាតនៅទីក្រុងវ៉ាងវៀង។ ដូច្នេះសម្រាប់តម្លៃសំបុត្រចូលទស្សនាគឺ ២០,០០០ គីប (ប្រហែល ៥,៤០០រៀល) ដោយបើកជារៀងរាល់ថ្ងៃ ចាប់ពីម៉ោង ៨:០០ ព្រឹក ដល់ ៥:០០ ល្ងាច៕

សហរដ្ឋអាមេរិក៖ អ្នកវិទ្យាសាស្ត្រអាមេរិកបានព្រមានថា “ជំងឺសត្វក្តាន់ Zombie” អាចនឹងឆ្លងដល់មនុស្ស បន្ទាប់ពីបានរកឃើញសត្វក្តាន់មួយហ្វូងធំស្លាប់នៅក្នុងឧទ្យានជាតិ Yellowstone ដោយសារការឆ្លងមេរោគនៅភាគពាយ័ព្យសហរដ្ឋអាមេរិក។

យោងតាមគេហទំព័រអន្តរជាតិ Yahoo News ដែលបានរាយការណ៍នៅថ្ងៃទី២៨ ខែធ្នូថា អ្នកវិទ្យាសាស្ត្របានប្រទះឃើញ ហ្វូងសត្វក្តាន់ដ៏ធំងាប់នៅ Yellowstone ដែលជាឧទ្យានព្រៃឈើធំៗ នៅសហរដ្ឋអាមេរិក មូលហេតុត្រូវបានគេជឿថាបណ្តាលមកពីការឆ្លងមេរោគ។ “ជំងឺសត្វក្តាន់ Zombie” ត្រូវបានគេភ័យខ្លាចថានឹងឆ្លងទៅមនុស្ស ខណៈដែលបច្ចុប្បន្នមិនមានវ៉ាក់សាំងសម្រាប់ព្យាបាលជំងឺនេះទេ។

ជំងឺសត្វក្តាន់ Zombie ឬ CWD គឺជាជំងឺរ៉ាំរ៉ៃ កំពុងរីករាលដាលរីករាលដាលយ៉ាងឆាប់រហ័សដល់រដ្ឋចំនួន ៣២ របស់សហរដ្ឋអាមេរិក និងខេត្តចំនួន ៤ របស់កាណាដា នេះបើយោងតាមការស្ទង់មតិភូគព្ភសាស្ត្រសហរដ្ឋអាមេរិក។

បន្ទាប់ពីបានរកឃើញសត្វក្តាន់មួយហ្វូងធំស្លាប់នៅក្នុងឧទ្យានជាតិ Yellowstone ភាគពាយ័ព្យសហរដ្ឋអាមេរិក។ ជំងឺនេះក៏ត្រូវបានគេរកឃើញផងដែរថា សត្វក្តាន់ដែលនៅសេសសល់ជារឿយៗមានឥរិយាបទចម្លែកៗដូចជា ស្រក់ទឹកមាត់ កិនធ្មេញ ស្លេកស្លាំង ជំពប់ដួលគ្រប់ទីកន្លែង និងមានភ្នែកពណ៌សដូចខ្មោចឆៅ។

លោកវេជ្ជបណ្ឌិត Thomas Rof ដែលជាពេទ្យសត្វ និងជាអតីតប្រធានផ្នែកសុខភាពសត្វព្រៃ បាននិយាយថា ជំងឺដ៏កាចសាហាវនេះ បច្ចុប្បន្នត្រូវបានគេរកឃើញនៅក្នុងសត្វក្តាន់ជាង ៨០០ ក្បាលនៅទូទាំងរដ្ឋ Wyoming ដែលវាជាការរកឃើញដ៏គួរឱ្យព្រួយបារម្ភបំផុតប្រសិនបើមនុស្សឆ្លងមេរោគនេះ។

រីឯអ្នកជំនាញផ្សេងទៀតក៏មានទស្សនៈថាជំងឺនេះអាចក្លាយជា “គ្រោះមហន្តរាយដែលនឹងកើតឡើងបន្តិចម្តងៗចំពោះពិភពលោកនាពេលខាងមុខ” ដូច្នេះក្រុមអ្នកវិទ្យាសាស្ត្របានចាប់ផ្តើមអំពាវនាវដល់រដ្ឋាភិបាលជុំវិញពិភពលោកឱ្យរៀបចំខ្លួនសម្រាប់ការផ្ទុះឡើងនៃជំងឺសត្វក្តាន់ zombie ដែលអាចនឹងឆ្លងដល់មនុស្សនាពេលអនាគត៕

ប្រទេសឥណ្ឌា ៖ ការធ្វើដំណើរតាមយន្តហោះ និងរថភ្លើងនៅប្រទេសឥណ្ឌាត្រូវបានផ្អាកភ្លាមៗ ក្រោយពីការចុះអ័ព្ទខ្លាំងនៅទីក្រុងញូវដែលី ។ រីឯការបើកបរយានជំនិះផ្សេងៗនៅតាមផ្លូវ ក៏ជួបការលំបាកខ្លាំងដែរ ដោយសារអ្នកបើកបរពុំអាចសម្លឹងមើលផ្លូវឆ្ងាយបានទេ ហើយបណ្តាលឱ្យមានគ្រោះថ្នាក់ចរាចរណ៍កើតឡើងជាច្រើនកន្លែង ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២៨ ខែធ្នូ ឆ្នាំ២០២៣ ។

សារព័ត៌មានបរទេសរាយការណ៍ទៀតថា អាកាសធាតុត្រជាក់លាយឡំនឹងការចុះអ័ព្ទខ្លាំងពេក បានបណ្តាលឱ្យការធ្វើដំណើរនៅទីក្រុងញូវដែលី និងតំបន់មួយចំនួននៅភាគជើងប្រទេសឥណ្ឌា ត្រូវផ្អាកជាបណ្តោះអាសន្ន ។ លើសពីនេះ ជើងហោះហើរជាង១០០ជើង និងការធ្វើដំណើរតាមរថភ្លើងចំនួន២៥ជើងត្រូវពន្យារពេល ដោយសារពិបាកមើលផ្លូវ ។

អាជ្ញាធរឥណ្ឌាបានរាយការណ៍ពីគ្រោះថ្នាក់ចរាចរណ៍ជាច្រើនកន្លែងនៅតាមដងផ្លូវ ដូចជា ៖ រដ្ឋ Uttar Pradesh ដែលស្ថិតនៅជិតទីក្រុងញូវដែលី មានរថយន្តបុកគ្នាជាច្រើនគ្រឿងនៅលើផ្លូវល្បឿនលឿន និងបណ្តាលឱ្យអ្នកដំណើររងរបួសជាច្រើននាក់ ប៉ុន្តែគ្មានអ្នកស្លា.ប់ទេ ។

ការិយាល័យឧតុនិយមឥណ្ឌារាយការណ៍ថា ទីក្រុងញូវដែលីបានគ្របដណ្តប់ទៅដោយអ័ព្ទយ៉ាងក្រាស់ និងមានធូលីកខ្វក់ពេញបរិយាកាសទៀតផង ។ ហេតុនេះ វាបណ្តាលឱ្យប៉ះពាល់ដល់សុខភាពរបស់ពលរដ្ឋប្រមាណ២០លាននាក់ ដែលរស់នៅទីក្រុងនេះ ។

ការិយាល័យឧតុនិយមព្យាករថា ប្រទេសឥណ្ឌានឹងមានអាកាសធាតុអាក្រក់បែបនេះរយៈពេល៥ថ្ងៃទៀត ព្រមទាំងដាស់តឿនឱ្យពលរដ្ឋទាំងអស់បើកបរយានជំនិះដោយការប្រុងប្រយ័ត្នខ្ពស់ និងត្រូវបើកភ្លើងបំភ្លឺផ្លូវផងដែរដើម្បីចៀសវាងគ្រោះថ្នាក់ ។ ការិយាល័យឧតុនិយមបញ្ជាក់ថា ពលរដ្ឋឥណ្ឌាគួរតែផ្អាកការធ្វើដំណើរមួយរយៈសិន បើពុំចាំបាច់ ៕