ម្ចាស់ពាន The Voice Cambodia រដូវកាលទី៣ លឹម សេរីហាន់នីកា ត្រូវបានអ្នកលេងបណ្តាញសង្គមមួយចំនួនប្រើសម្តីក្នុងន័យបន្តុះបង្អាប់ពីពណ៌សម្បុររបស់នាងថាមានស្បែកខ្មៅ បន្ទាប់ពីម្ចាស់ពានរូបនេះចាប់ដៃគូជាមួយ លីម តិចម៉េង ថតបទចម្រៀងថ្មីដែលត្រៀមផ្តល់រសជាតិថ្មីដល់អ្នកគាំទ្រ។ ពាក្យសម្តីបន្តុះបង្អាប់នេះដែរត្រូវបាន នីកា ឆ្លើយតបវិញថា សម្បុរខ្មៅខុសអ្វី?។

ការរើសអើងពណ៌សម្បុរនាពេលបច្ចុប្បន្ននៅតែកើតមានមិនថានៅប្រទេសជឿនលឿន ឬប្រទេសកំពុងអភិវឌ្ឍ អ្នកមួយចំនួននៅប្រកាន់ភ្ជាប់នូវទស្សនៈអាត្មានិយមទាល់តែសម្បុរសទើបស្រស់ស្អាត ហើយអ្នកមានសម្បុរខ្មៅមិនស្រស់ស្អាតឡើយ។ ពាក្យសម្តីរើសអើងពណ៌សម្បុរនេះអ្នកមួយចំនួនបានប្រើភាគច្រើនទៅលើស្រ្តី ដោយមិនយល់ពីអត្ថន័យថាមនុស្សម្នាក់ៗតែងមានភាពស្រស់ស្អាតផ្សេងៗគ្នាដោយមិនសម្គាល់ទៅលើបុគ្គលនោះ ធាត់ឬស្គម សឬខ្មៅ ឡើយ។

ភាពរើសអើងពណ៌សម្បុរនេះក៏បានធ្លាក់ទៅលើកញ្ញា លឹម សេរីហាន់នីកា ម្ចាស់ពាន The Voice Cambodia រដូវកាលទី៣ ដែលត្រូវបានអ្នកលេងបណ្តាញសង្គមមួយចំនួនបន្តុះបង្អាប់ពីពណ៌សម្បុររបស់នាង។ ការបន្តុះបង្អាប់នេះគឺនៅពេលមានអ្នកគាំទ្ររបស់ លីម តិចម៉េង បានបង្ហោះវីដេអូ ក្រៅឆាកពីការថតបទថ្មីចង្វាក់ប្រពៃណីខ្មែររបស់ តិចម៉េង និង សេរីហាន់កា ដែលម្ចាស់ពានទាំងពីរមានបទចម្រៀងថ្មីរួមគ្នាផ្តល់ជូនទស្សនិកជននាពេលឆាប់ៗខាងមុខនេះ។
អ្នកលេងបណ្តាញសង្គមនោះបានបញ្ចេញមតិដាក់ លឹម សេរីហាន់នីកា ថា «ចុម មើលតួស្រីខ្មៅម៉្លេះ? , ងាប់ហើយមើលមុខតួស្រីចាញ់សម្រស់បងផាត់មុខផង»។

បន្ទាប់ពីរងនូវពាក្យសម្តីនេះហើយ លឹម សេរីហាន់នីកា បានឆ្លើយតបវិញថា « ខ្មៅខុសអី? បើប្អូនកើតមកពិននឹង ប៉ុន្តែក្នុងកែវភ្នែកពុកម៉ែប្អូនគឺ គាត់ថាប្អូនស្រស់ស្អាតណាស់»។ ចំណែកអ្នកគាំទ្រវិញ ក៏បានចេញមុខការពារតារាចម្រៀងរូបនេះដែរថា សម័យនេះទៅហើយនៅមានអ្នកប្រើសម្តីអសីលធម៌រើសអើងពណ៌សម្បុរបែបនេះទៀតភាពស្រស់ស្អាតរបស់មនុស្សមិនមែនស្ថិតទៅលើពណ៌សម្បុរនោះទេ។

គួរបញ្ជាក់ថា លឹម សេរីហាន់នីកា ជាម្ចាស់ពាននារីដំបូងគេកម្មវិធីលំដាប់ពិភពលោក The Voice Cambodia រដូវកាលទី៣ ហើយទទួលបានត្រឹមមួយកៅអីប៉ុណ្ណោះពីគ្រូបង្វឹក ពេជ្រ សោភា ខណៈមានវ័យត្រឹម១៦ឆ្នាំ ប៉ុន្តែរូបនាងពោរពេញដោយសមត្ថភាព។ បន្ទាប់ពីក្លាយជាតារាចម្រៀងកុងត្រាក្នុងផលិតកម្មរស្មីហង្សាមាសបទចម្រៀង នីកា ដែលទម្លាក់លើទីផ្សារទទួលបានគាំទ្រច្រើនជាងគេគឺបទ ឯណាពាក្យស្មោះ , សុំបែកចង់ឱ្យបងលួង និងបទ បងលែងវិលវិញ ជាដើម៕

តារាចម្រៀង ចេន ដែលមានឈ្មោះបោះសំឡេងលើអាជីពសិល្បៈតាមរយៈពេលបទមនោសញ្ចេតនា Original Song បានទម្លាយរឿងដ៏ហួសចិត្តដែលខំបៀមទុកអស់រយៈពេលជិត១០ឆ្នាំលើអាជីពសិល្បៈទៅលើអ្នក control sound លើឆាក concert លេងវិធីស្មោគរោគធ្វើស៊ីអ្នកចម្រៀងឱ្យលក់មុខចំពោះមុខទស្សនិកជន។ មិនត្រឹមតែ ចេន ប៉ុណ្ណោះទេដែលរងគ្រោះលើរឿងនេះសូម្បីតែតារាចម្រៀងមួយចំនួនដូចជាតារាចម្រៀង នាង ដាវីន លីម តិចម៉េង ណាក់ Fake និងអ្នកផ្សេងទៀតក៏ជួបប្រទះរឿងនេះដូចគ្នា។

នៅយប់ថ្ងៃទី៤ កុម្ភៈ តារាចម្រៀង ចេន ម្ចាស់បទ «ស្រដៀងសង្សារ» បានចេញមកបង្ហោះសំណេរទាំងយប់ដែលបៀមទុកអស់រយៈពេលជាយូរដោយបានរៀបរាប់យ៉ាងដូច្នេះថា«
ខ្ញុំសុំនិយាយនៅភាពអត់ធ្មត់ដែលខ្ញុំទ្រាំជិត១០ឆ្នាំមកនេះនូវវិស័យចម្រៀងនិងតន្រ្តីនៅលើឆាក concert បន្តិច សំនួរសួរថា ហេតុអី? តើពួកខ្ញុំទៅធ្វើអីពួកបង? តើពេលណាបានបងៗ control sound លើឆាក concert ឈប់ស្មោគរោគធ្វើបាបអ្នកចម្រៀងនិងតន្រ្តីករដោយ ធ្វើស៊ីលើឆាកដោយមិនបើក monitor ឱ្យគ្នាមិនឮនេះមិនលឮនោះស្តាប់ខ្លួនឯងមិនឮ ពេលឆែកសោនសម្រេចគ្នាហើយ ពេលLive លក់មុខគ្នាតែម្តង»។

ចេន បន្តថា «តើគេជួលបងបងមកសម្រាប់បំបាក់មុខសិល្បករលក់មុខតន្រ្តីករ? គេជួលបងមកសម្រាប់ជួយជំរុញសិល្បករប្រគំតន្រ្តីច្រៀងឱ្យបានពីរោះជូនអ្នកគាំទ្រ ហេតុអីមិនជួយឱ្យគ្នាប្រគំនិងច្រៀងឱ្យពីរោះទៅ? ហេតុអី? សុំបន្ថែមសុំបន្ថយមិនចង់ធ្វើឱ្យតឹងចិត្តណាស់ កិត្តិយសពួកខ្ញុំស្ថិតលើដៃបងរុញចុះឡើងនឹងហើយ …»។
តារាចម្រៀងរូបនេះបានស្នើទៅដល់ថ្នាក់លើជួយពិនិត្យលើរឿងនេះទោះបីជាអ្នកចម្រៀងច្រៀងពីរោះដល់ឋានសួគ៌ បើអ្នកគ្រប់គ្រងសំឡេងធ្វើស៊ីក៏មិនអាចច្រៀងពីរោះដែរ។ លោករៀបរាប់ថា «សូមពិនិត្យមើលពួកគាត់ឡើងវិញបងៗថ្នាក់លើ សូមកុំបន្តធ្វើបែបនេះទៀត ព្រោះចង់ច្រៀងពីរោះដល់ឋានសួគ៌ទៀតក៏ទៅមិនរួចដែរ ខ្ញុំមានបទពិសោធន៍ច្រើនខ្ញុំអត់ធ្មត់ច្រើនណាស់ខ្ញុំយល់ ។ ហើយបើពួកគាត់បន្តធ្វើបែបនេះទៀតស្មើនឹងទម្លាក់តម្លៃនិងកិត្តិយសសិល្បៈផ្នែកចម្រៀងនិងតន្រ្តីយ៉ាងធ្ងន់ធ្ងរ ខ្មែរគ្នាឯងសោះ មិចតារាស្រុកគេមកមិនហ៊ានធ្វើចឹងផងទៅ កុំមើលងាយសិល្បៈខ្មែរខ្ញុំប្រាប់យកបុណ្យចុះបងមួយចំនួន»។

ការចេញមករៀបរាប់រឿងស្មោគរោគរបស់អ្នក control sound លើឆាក concert មួយចំនួនទៅលើអ្នកចម្រៀងនេះបានធ្វើឱ្យមហាជនសម្តែងការហួសចិត្តយ៉ាងខ្លាំង ព្រមទាំងមានអ្នកខ្លះក៏បានបញ្ចេញមតិដែរថា មានរឿងបែបនេះសោះបានជាអ្នកចម្រៀងឡើងច្រៀងពេល Live ផ្ទាល់ច្រៀងមិនពីរោះ។

មិនត្រឹមតែ ចេន ប៉ុណ្ណោះទេដែលជួបប្រទះបញ្ហាទាំងនេះនៅលើវិស័យតន្រ្តី សូម្បីតែសិល្បករជំនាន់ក្រោយ ដូចជាតារាចម្រៀង លីម តិចម៉េង នាង ដាវីន ណាក់ Fake ព្រមទាំងអ្នកមួយចំនួនទៀតក៏ជួបរឿងរ៉ាវនេះដូចគ្នាថែមទាំងអរគុណទៅដល់ ចេន ដែលបានលើករឿងនេះមកនិយាយ៕

អ្នកនាង ម៉េង កែវពេជ្ជតា បានធ្វើឱ្យអ្នកលេងបណ្តាញសង្គមភ្ញាក់ផ្អើលយ៉ាងខ្លាំងបន្ទាប់ពីតារាចម្រៀងជើងចាស់រូបនេះព្រលះអ្នកសិល្បៈម្នាក់មានឈ្មោះថា «VJ ALaskoo» ដោយសម្តីធ្ងន់ៗដោយសារតែប្រើពាក្យសម្តីមិនគោរពរៀមច្បងដូចជាខ្លួនចេញមុខការពារប្រធានសមាគមសិល្បករខ្មែរ។

នៅលើបណ្តាញសង្គមរបស់ VJ ALaskoo បានសរសេរយ៉ាងដូច្នេះថា «មីងម្នាក់អ្នកចំរៀងជើងចាស់ គេមិនហៅច្រៀង អត់កន្លែងច្រៀង បែរមកយំបន្ទោស សមាគមន៍សិល្បៈ ..? ថីនុងមីង.. ប្រធានសិល្បៈមិនមែនរៀបចំកម្មវិធី ទូទាំងប្រទេសទេ .. មីងយល់? »។ ពាក្យសម្តីនេះបានធ្វើឱ្យកំពូលតារាចម្រៀង ម៉េង កែវពេជ្ជតា ចេញមកព្រលះមិនទុកមុខដោយបានបោះពាក្យសម្តីធ្ងន់ៗទៅវិញនៅយប់ថ្ងៃទី៤ កុម្ភៈ ថា «ដើរល្បាតតាមផ្លូវ មិនខ្វះទេឆ្កែព្រុស ! ឆ្កែព្រុសការពារឆ្អឹង ! បងប្អូនស្គាល់គាត់ម្នាក់នេះទេ ? មើលសំដីគាត់សរសេរទៅនឹងយល់ហើយថា ពេលនេះ ម៉ោងនេះ ដែលខ្ញុំកំពុងជួបបញ្ហា ហើយគាត់និយាយបែបហ្នឹង តើគាត់ចង់ថាឱ្យនរណាគេ? តើប្អូនហ្នឹងជាដៃជើងអ្នកណាទើបគ្រាន់តែចង់ការពារសមាគមន៍ហ៊ានមានប្រសាសន៍ឈ្លើយលែងស្គាល់ចាស់ទុំរៀមច្បងបែបនេះ? ថីនុង? ក្រែងខ្លួនជាអ្នកសិល្បៈដែរមិនចឹង?»។

អ្នកនាង ម៉េង កែវពេជ្ជតា បានបន្តទៀតថា «បងប្អូន នេះហើយចរិតអ្នកសិល្បៈមួយចំនួនដែលនៅក្រោមការដឹកនាំរបស់សមាគមន៍សិល្បៈបច្ចុប្បន្ន ។ ថាមិនចង់តបទេ តែវាចេះតែចេញមកបែបៗហ្នឹង ដល់ពេលគេសំពងក្បាលវិញក៏ថាគេរើសដាក់ខ្លួន រួចហើយប្រកាច់ចង់ប្តឹងគេ អីក៏ថោកទាបម្ល៉េះ ! សូមប្រាប់ផងថា បើអាប្អូនមុខកញ្ចាស់ឯងចង់ប្តឹង គួរតែប្រាប់ខ្លួនឯងវិញថា ដោយសារអាចិត្តចង្រៃរបស់ខ្លួនឯងទេដែលវានាំដៃដ៏ល្ងង់ខ្លៅរបស់ប្អូនឱ្យសរសេរដៀលគេមុន ដូច្នេះបើគេទះកំផ្លៀងជ្រុះធ្មេញនោះ ប្អូនមិនបាច់ខំទៅប្តឹងនាំខាតលុយខាតពេលទេ តែគួរយកលុយទៅទិញធ្មេញដាក់វិញកុំឱ្យខ្មាសគេដូចពេលនេះ។ ចាំទុកណា៎ បងដើរតាមក្រោយប្អូនទេ ។ ក្រោយៗគិតសិនចាំគូរ ។ បើចង់ខាំបង ប្អូនគួររៀនស្គាល់ពីបងឱ្យច្បាស់ ប្អូនកុំផុសហើយលុបចេញលឿនអញ្ចឹង វាមិនសមជាកូនប្រុសទេ យល់ទេ!»។

ងាកទៅកាន់លោក VJ ALaskoo ក៏បានបង្ហោះសារមួយនៅព្រឹកថ្ងៃទី៥ កុម្ភៈ នេះដោយបានរៀបរាប់ថា «ខ្ញុំលុបផុសមិនមែនខ្លាចរអា អ្នកណាទេ តែដោយបងៗថ្នាក់ដឹកនាំខលប្រាប់ ចាំក្រុមប្រឹក្សាភិបាល គេធ្វើការវិញ .. ផុសនាំតែប៉ះអារម្មណ៍មហាជន»។

គួរបញ្ជាក់ផងដែរថា អ្នកនាង ម៉េង កែវពេជ្ជតា បាន Live កាលពីពេលថ្មីៗនេះដោយបានបោះសម្តីថាការដឹកនាំរបស់ប្រធានសមាគមសិល្បករមិនកើត ចូលចិត្តប្រកាន់បក្សពួកនិយមធ្វើឱ្យតម្លៃអ្នកសិល្បៈកាន់តែធ្លាក់ចុះ។ ស្របពេលនេះអ្នកនាងក៏កំពុងមានរឿងជាមួយអ្នកនាង សារីណា ភរិយារបស់អតីតតារាសម្តែង ស៊ុក សុភា ដូចគ្នា៕