សហរដ្ឋអាមេរិក៖ កាលពីពេលថ្មីៗនេះទីភ្នាក់ងារអវកាសអាមេរិក NASA បានរកឃើញ “ភពផែនដីដ៏អស្ចារ្យមួយ” ដែលជាភពអាចទ្រទ្រង់ជីវិតមនុស្សលោកបាន ដោយវាស្ថិតនៅចម្ងាយត្រឹមតែ ១៣៧ ឆ្នាំពន្លឺប៉ុណ្ណោះជិតល្មមអាចរុករក និងស្រាវជ្រាវបានយ៉ាងលម្អិត។

យោងតាមអត្ថបទមួយនៅក្នុងទិនានុប្បវត្តិវិទ្យាសាស្ត្រ Astrobiology ដោយជីវវិទូអវកាសលោក Keith Cowing អតីតអ្នកគ្រប់គ្រង Payload នៃស្ថានីយ៍អវកាស NASA បានឱ្យដឹងថា ភពរកឃើញថ្មីនេះត្រូវបានគេដាក់ឈ្មោះថា Super-Earth TOI-751b ដែលវាមានទីតាំងនៅទាំងស្រុងក្នុងតំបន់ជីវិត Goldiliocks នៃផ្កាយមេ។ វាត្រូវបានគេរកឃើញដោយ “អ្នកប្រមាញ់ភពក្រៅ” របស់ NASA ដែលជាយានអវកាសមានជំនាញក្នុងការស្វែងរកពិភពដូចផែនដី។

Super-Earth TOI-751b មិនត្រឹមតែស្ថិតនៅក្នុងតំបន់ដែលអាចរស់នៅបាននោះទេ ពោលគឺជាកន្លែងដែលមានសីតុណ្ហភាពគ្រប់គ្រាន់ដើម្បីបង្កើតជាទឹករាវលើផ្ទៃរបស់វា និងលក្ខខណ្ឌរស់នៅសមរម្យ ដែលវាមានទំហំប្រហែល ១.៥ ដងនៃផែនដី។ ភពដែលមានទំហំប៉ុនផែនដី ឬ Super-Earth ដែលមានទំហំមិនខុសគ្នាខ្លាំងពេក ត្រូវបានគេជឿថា ជាបេក្ខភាពឈានមុខគេក្នុងការស្វែងរកជីវិតមនុស្សភពក្រៅរបស់ NASA ។

Super-Earth TOI-715b ធ្វើដំណើរជុំវិញផ្កាយមនុស្សតឿក្រហម ដែលតូចជាង និងត្រជាក់ជាងព្រះអាទិត្យរបស់យើង ដូច្នេះការពិតដែលថាវានៅជិតផ្កាយមេរបស់វា បានជួយឱ្យវាចូលទៅក្នុងតំបន់នៃជីវិតដោយចៃដន្យ នេះបើយោងតាម NASA វាបញ្ចប់គន្លងពេញមួយឆ្នាំក្នុងរយៈពេលត្រឹមតែ ១៩ ថ្ងៃប៉ុណ្ណោះ។ ផ្កាយមេ TOI-715 ស្ថិតនៅចម្ងាយត្រឹមតែ ១៣៧ ឆ្នាំពន្លឺពីផែនដី ដែលវានៅតែជិតសម្រាប់ក្រុមតារាវិទូ គ្រប់គ្រាន់សម្រាប់ការស្រាវជ្រាវបន្ថែមដោយប្រើកែវយឺតទំនើប James Webb ដើម្បីពិនិត្យមើលកាន់តែជិត។

ជាមួយនឹងការសង្កេតរបស់ James Webb អ្នកវិទ្យាសាស្ត្រ NASA រំពឹងថាវានឹងទទួលបានទិដ្ឋភាពលម្អិតដែលនឹងជួយបង្ហាញសមាសភាពនៃបរិយាកាសរបស់ Super-Earth TOI-715b ។ ដោយសារតែសមាសធាតុគីមីនៅក្នុងបរិយាកាសគឺជាកត្តាឈានមុខគេដែលជួយកំណត់ថាតើមានសារពាង្គកាយមានជីវិតនៅលើភពនោះឬអត់។ សមាសធាតុសរីរាង្គមួយចំនួនដែលទាក់ទងយ៉ាងជិតស្និទ្ធទៅនឹងសកម្មភាពជីវសាស្រ្តគឺជាភស្តុតាងសម្រាប់ជីវិត។

ជំហានបន្ទាប់ក៏រួមបញ្ចូលផងដែរនូវការសិក្សាអំពីសមាសភាពនៃភពនេះ តាមរយៈការវិភាគទិន្នន័យពី TESS ដើម្បីកំណត់ថាតើវាជាភពថ្មប្រភេទណា ហើយវាអាចមានទឹកល្មមដូចជាផែនដី ឬវាអាចជាភពមហាសមុទ្រដែលមានទឹកច្រើន។ ប្រភេទនៃភពថ្មដែលមានទឹកល្មមនៅតែស្ថិតក្នុងលំដាប់កំពូលនៃពិភពលោកដែលគេជឿថាអាចរស់នៅបាន ប៉ុន្តែក៏មានការសិក្សាថ្មីៗមួយចំនួនដែលបញ្ជាក់ថា ភពក្នុងមហាសមុទ្រក៏អាចមានទម្រង់ជីវិតពិសេសផងដែរ៕

នាពេលបច្ចុប្បន្ននេះ ការធ្វើដំណើរតាមជើងហោះហើរជាធម្មតាពីទីក្រុងញូវយ៉ក (សហរដ្ឋអាមេរិក) ទៅកាន់ ទីក្រុងប៉េកាំង (ប្រទេសចិន) គឺត្រូវចំណាយពេលរហូតដល ១៨ ម៉ោងឯណ្ណោះ។

ប៉ុន្តែកាលពីកន្លងទៅនេះ ប្រទេសចិនបាននឹងកំពុងព្យាយាមបង្កើតយាន្តអវកាសបែបថ្មីមួយទៀត ពោលគឺយន្តហោះល្បឿនលឿន ដែលអាចដឹកជញ្ជូនមនុស្សម្នាទៅកាន់ជុំវិញពិភពលោក កាន់តែមានប្រសិទ្ធភាព បង្កនូវភាពងាយស្រួល ក៏ដូចជាចំណេញពេលវេលាច្រើន។

កាលពីឆ្នាំ ២០២២ ក្រុមហ៊ុនចិនបានប្រកាសថាខ្លួនកំពុងអភិវឌ្ឍ “រ៉ុក្កែតមានស្លាប” ពោលគឺយន្តហោះល្បឿនលឿននេះ ដើម្បីផ្លាស់ប្តូរឧស្សាហកម្មអាកាសចរណ៍នាយុគមនុស្សសម័យថ្មី។ យន្តហោះនេះគឺត្រូវបានរចនាឡើងយ៉ាងពិសេសសម្រាប់ទេសចរណ៍អវកាសដែលនឹងផ្តល់ពេលវេលាធ្វើដំណើរដែលមិនធ្លាប់មានពីមុនមកនៅទូទាំងពិភពលោក។

ក្រុមហ៊ុនអវកាសចិនមួយនេះបានអួតថា យន្តហោះថ្មីខ្លួនប្រភេទ supersonic នឹងធ្វើដំណើរក្នុងល្បឿន ៤២០០ គីឡូម៉ែត្រក្នុងមួយម៉ោង ដែលលឿនជាងប្រភេទយន្តហោះល្បឿនលឿន Iconic Concorde រហូតដល់ទៅ២ដង។

អ្នកនាំពាក្យក្រុមហ៊ុនបាននិយាយថា “យើងកំពុងអភិវឌ្ឍរ៉ុក្កែតស្លាបឬយន្តហោះល្បឿនលឿនបំផុត សម្រាប់ការដឹកជញ្ជូនអ្នកដំណើរពីគោលដៅមួយទៅគោលដៅមួយទៀតបានយ៉ាងមានប្រសិទ្ធភាព ហើយពិសេសជាងនេះទៀតនោះគឺវាម្លៃទាបជាងរ៉ុក្កែតផ្កាយរណប។ រីឯល្បឿនវិញគឺលឿនជាងយន្តហោះធម្មតាបច្ចុប្បន្ននេះច្រើនដងណាស់។
គួរបញ្ជាក់ថា ការហោះសាកល្បងរបស់យន្តហោះល្បឿនលឿនប្រភេទថ្មីនេះត្រូវបានប្រកាសកាលឆ្នាំ ២០២២ ហើយគ្រោងនឹងបញ្ចប់នៅចុងឆ្នាំ២០២៤នេះ។ ប្រសិនបើជោគជ័យ ការហោះសាកល្បងរបស់នាវិកនឹងធ្វើឡើងនៅឆ្នាំ ២០២៥ ផងដែរ។

ប្រទេសឥណ្ឌា៖ កាលពីពេលថ្មីៗនេះអ្នកជំនាញឥណ្ឌាបាននិយាយថា កង្វះខាតអង្ករពិភពលោកនឹងកាន់តែអាក្រក់ទៅៗ នៅពេលដែលការនាំចេញអង្ករគុណភាពខ្ពស់របស់ប្រទេសឥណ្ឌាប្រឈមនឹងឧបសគ្គ ដោយសារតែថ្លៃដឹកជញ្ជូនកើនឡើង ចំពេលមានជម្លោះរវាងក្រុមហាម៉ាស-អ៊ីស្រាអែល និងការខ្វះខាតក្នុងស្រុកប៉ះពាល់ដល់ការនាំចេញអង្ករប្រភេទផ្សេងទៀត។

ការនាំចេញអង្ករ basmati របស់ឥណ្ឌាក្នុងខែមករា ឆ្នាំ២០២៤ គឺត្រឹមតែពាក់កណ្តាលនៃឆ្នាំមុនប៉ុណ្ណោះ។ យោងតាមឈ្មួញអង្ករ ស្ថានភាពខាងលើគឺដោយសារតែអត្រាដឹកជញ្ជូនបានកើនឡើងទ្វេដង បន្ទាប់ពីការវាយប្រហារជាបន្តបន្ទាប់ពីសំណាក់កងកម្លាំង Houthi លើនាវាពាណិជ្ជកម្ម។ លើសពីនេះ ការកើនឡើងនៃភាពតានតឹងនៅមជ្ឈិមបូព៌ា ខណៈដែលកងកម្លាំង Houthi វាយប្រហារសហរដ្ឋអាមេរិក និងគោលដៅផ្សេងទៀតនៅក្នុងសមុទ្រក្រហម ក៏បានរំខានដល់ការដឹកជញ្ជូនទំនិញទូទាំងពិភពលោកផងដែរ។

អតីតប្រធានសមាគមអ្នកនាំចេញអង្ករទាំងអស់របស់ប្រទេសឥណ្ឌា លោក Vijay Setia បាននិយាយថា “បច្ចុប្បន្នបញ្ហានៅសមុទ្រក្រហមកំពុងកើនឡើង”។ ដំណោះស្រាយរហ័សនឹងមិនអាចកើតឡើងបានទេ បើទោះបីជាមានអន្តរាគមន៍របស់សហរដ្ឋអាមេរិកដើម្បីបញ្ឈប់ការវាយប្រហាររបស់ Houthi ក៏ដោយ។ ដូច្នេះហើយ អ្នករាល់គ្នាស្ថិតក្នុងស្ថានភាពរង់ចាំ ហើយការនាំចេញគឺមានចំនួនកំណត់ប៉ុណ្ណោះ»។

មជ្ឈិមបូព៌ាគឺជាទីផ្សារដ៏សំខាន់សម្រាប់ការនាំចេញអង្ករ basmati របស់ឥណ្ឌា។ ទោះជាយ៉ាងណាក៏ដោយ លោក Setia បាននិយាយថា ពេលវេលាដឹកជញ្ជូនទំនិញពីប្រទេសឥណ្ឌាទៅកាន់តំបន់នេះបានកើនឡើងបីឬបួនសប្តាហ៍បន្ទាប់ពីអំពើហិង្សាបានផ្ទុះឡើងនៅក្នុងសមុទ្រក្រហម។

ជាមួយគ្នានេះ ប្រធានសហព័ន្ធអ្នកនាំចេញអង្ករនៃប្រទេសឥណ្ឌា លោក Prem Garg ក៏មានប្រសាសន៍ដែរថា ការនាំចេញអង្ករប្រភេទផ្សេងទៀតរបស់ឥណ្ឌាក៏កំពុងរងផលប៉ះពាល់ផងដែរ ដោយសារបរិមាណមានកំណត់សម្រាប់ពាណិជ្ជករ ក៏ដូចជាពេលវេលាដឹកជញ្ជូនមានរយៈពេលយូរ និងថ្លៃដឹកជញ្ជូនទៅកាន់ផ្នែកខ្លះនៃ អាហ្រ្វិក និងកន្លែងផ្សេងទៀតខ្ពស់ជាង៕

នៅដើមខែកុម្ភៈ ឆ្នាំ២០២៤ នាយកក្រុមហ៊ុនផលិតរថយន្តចិន BYD បានប្រកាសថា ខ្លួនមិនមែនជាគូប្រជែងរបស់ក្រុមហ៊ុន Tesla ទេ ប៉ុន្តែក្រុមហ៊ុនទាំងពីរនឹងសហការគ្នាលើការប្រើប្រាស់រថយន្តអគ្គិសនី និងវាយលុកទីផ្សាររថយន្តប្រេងឥន្ធនៈ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១ ខែកុម្ភៈ ឆ្នាំ២០២៤ ។

ក្រុមហ៊ុន BYD បានចេញមកនិយាយរឿងល្អៗជាមួយក្រុមហ៊ុន Tesla ក្រោយពីយល់ឃើញថា Tesla មិនមែនជាគូប្រជែងផ្នែកពាណិជ្ជកម្មរបស់ខ្លួន ប៉ុន្តែក្រុមហ៊ុន Tesla គឺជាសម្ព័ន្ធមិត្តដ៏រឹងមាំមួយរបស់ BYD ដើម្បីរួមគ្នាប្រកួតប្រជែងជាមួយទីផ្សារឧស្សាហកម្មរថយន្តប្រេងឥន្ធនៈ ។ បច្ចុប្បន្ន ក្រុមហ៊ុន BYD និង Tesla បានប្រើប្រាស់បច្ចេកវិទ្យា LFP Battery Cells ដូចគ្នាសម្រាប់រថយន្តមួយចំនួន ហើយមើលទៅ ហាក់ដូចជាទំនាក់ទំនងរវាងក្រុមហ៊ុនទាំងពីរនេះរីកចម្រើនយ៉ាងឆាប់រហ័ស ។

នាយកក្រុមហ៊ុន BYD បាននិយាយទៅកាន់សារព័ត៌មាន CNBC ថា ៖ «ក្រុមហ៊ុន Tesla បានក្លាយជាមិត្តផ្នែកឧស្សាហកម្មរថយន្តដ៏សំខាន់ និងជាអតិថិជនរបស់យើងផងដែរ ។ ខ្ញុំគិតថា ទីផ្សារនេះមានទំហំធំណាស់ ហើយយើងមិនចាំបាច់ពូកែជាងពួកគេ ឬពួកគេត្រូវពូកែជាងយើងទេ ប៉ុន្តែក្រុមហ៊ុន BYD និង Tesla នឹងសហការគ្នាផលិតរថយន្តថាមពលថ្មីរួមគ្នា ។ យើងនឹងគិតអំពីរបៀបផលិត និងចំណែកទីផ្សាររថយន្តអគ្គិសនីឱ្យបានច្រើនជាងរថយន្តប្រេងឥន្ធនៈ» ។

បើទោះជាក្រុមហ៊ុនទាំងពីរនេះចាប់យកទីផ្សារគោលដៅខុសៗគ្នាក្នុងអំឡុងពេលការចាប់ផ្តើមប្រើប្រាស់រថយន្តអគ្គិសនីក្តី ប៉ុន្តែក្រុមហ៊ុន BYD នឹងផ្តោតទៅលើប្រព័ន្ធ PHEV (Plug-in Hybrid Electric Vehicle) នៅដំណាក់កាលដំបូង ខណៈក្រុមហ៊ុន Tesla នឹងផ្តោតលើប្រព័ន្ធ BEV (Battery Electric Vehicle) ប៉ុន្តែ Tesla មិនបានគិតអំពីក្រុមហ៊ុនផលិតរថយន្តរបស់ចិនប៉ុន្មានទេ ។

កាលពីឆ្នាំ២០១១ នាយកក្រុមហ៊ុន Tesla លោក Elon Musk បាននិយាយចំអកគំនិតរបស់ក្រុមហ៊ុន BYD ថា ក្រុមហ៊ុននេះគ្រាន់តែជាក្រុមហ៊ុនចិនមានទំហំតូចតាចប៉ុណ្ណោះ ។ ប៉ុន្តែរហូតមកដល់ពេលបច្ចុប្បន្ន បែរជាក្រុមហ៊ុន BYD អាចលក់រថយន្តអគ្គិសនីបានច្រើនជាងក្រុមហ៊ុន Tesla ។

ទោះយ៉ាងណា ក្រុមហ៊ុន BYD និង Tesla មានគោលដៅរួមគ្នា គឺលុបបំបាត់រថយន្តប្រើប្រាស់ប្រេងឥន្ធនៈឱ្យអស់ពីពិភពលោកនេះ ហើយក្រុមហ៊ុនទាំងពីរនឹងព្យាយាមផ្លាស់ប្តូរការដឹកជញ្ជូននានាឱ្យក្លាយជាការដឹកជញ្ជូនប្រើប្រាស់ថាមពលអគ្គិសនីទាំងស្រុង ៕

ប្រទេសវៀតណាម ៖ កាលពីថ្ងៃទី៤ ខែកុម្ភៈ ឆ្នាំ២០២៤ សារព័ត៌មានបរទេសរាយការណ៍ថា ប្រទេសវៀតណាមបានប្រឈមនឹងបញ្ហាចុះអ័ព្ទយ៉ាងធ្ងន់ធ្ងរ រហូតធ្វើឱ្យប៉ះពាល់ដល់ការធ្វើដំណើរទាំងផ្លូវគោក និងផ្លូវអាកាស ។ ហេតុនេះ អាជ្ញាធរវៀតណាមបានណែនាំឱ្យពលរដ្ឋទាំងអស់ថែទាំសុខភាពរបស់ខ្លួន និងត្រូវពាក់ម៉ាស់ជានិច្ចពេលចេញទៅក្រៅ ។

គេសង្កេតឃើញថា មានអ័ព្ទយ៉ាងក្រាស់នៅតាមទីកន្លែងជាច្រើនក្នុងទីក្រុងហាណូយរបស់វៀតណាម ដោយបរិមាណធូលី PM2.5 ស្ថិតនៅក្នុងកម្រិតខ្ពស់ខ្លាំង ។ ហេតុនេះ វាធ្វើឱ្យសន្ទស្សន៍គុណភាពខ្យល់ថយចុះមកនៅកម្រិតគ្រោះថ្នាក់ខ្លាំង និងធ្វើឱ្យប៉ះពាល់ដល់សុខភាពពលរដ្ឋវៀតណាម ។ លើសពីនេះ វាធ្វើឱ្យទីក្រុងហាណូយ ជាប់ចំណាត់ថ្នាក់ជាទីក្រុងមួយមានការបំពុលបរិយាកាសខ្ពស់បំផុតនៅលើពិភពលោក កាលពីថ្ងៃទី៣ ខែកុម្ភៈ ឆ្នាំ២០២៤ ។

ទោះយ៉ាងណា នៅតាមដងផ្លូវនានានៅទីក្រុងហាណូយ ពោរពេញទៅដោយរថយន្ត និងម៉ូតូជាច្រើនគ្រឿងធ្វើចរាចរណ៍ទៅមកយ៉ាងណែន បើទោះជាបរិមាណធូលី PM2.5 ស្ថិតក្នុងកម្រិតខ្ពស់ និងចាប់ផ្តើមប៉ះពាល់ដល់ការមើលផ្លូវក៏ដោយ ។

ចំណែកនៅអាកាសយានដ្ឋានអន្តរជាតិនៅទីក្រុងហាណូយ ក៏បានរងផលប៉ះពាល់ដោយសារការចុះអ័ព្ទខ្លាំងដូចគ្នាដែរ ហើយធ្វើឱ្យជើងហោះហើរប្រមាណ១០០ជើង ត្រូវសម្រេចចិត្តចុះចតនៅអាកាសយានដ្ឋានក្នុងទីក្រុងក្បែរគ្នាវិញ ។

ទីក្រុងហាណូយបានប្រឈមនឹងបញ្ហាការបំពុលបរិយាកាសជាបន្តបន្ទាប់ ហើយហាណូយបានជាប់ចំណាត់ថ្នាក់ជាទីក្រុងមានការបំពុលខ្យល់ខ្ពស់បំផុតនៅលើពិភពលោក ។ ហេតុនេះ អាជ្ញាធរវៀតណាមបានណែនាំឱ្យពលរដ្ឋទាំងអស់ពាក់ម៉ាស់នៅពេលចេញទៅទីសាធារណៈ និងកាត់បន្ថយការធ្វើសកម្មភាពផ្សេងៗនៅក្រោមកំដៅថ្ងៃដើម្បីសុវត្ថិភាព ៕

បរទេស៖ យោងតាមអ្នកជំនាញសេដ្ឋកិច្ច បាននិយាយថា វិបត្តិសមុទ្រក្រហមគឺជាហេតុផលដែលរុញតម្លៃប្រេងពិភពលោកឡើងដល់កម្រិតខ្ពស់នាពេលបច្ចុប្បន្ន ដោយសារសេដ្ឋកិច្ចរបស់ប្រទេសចិន ដែលជាអ្នកទិញប្រេងដ៏ធំបំផុតរបស់ពិភពលោក និងការសង្ស័យជុំវិញយុទ្ធសាស្ត្ររបស់អង្គការប្រទេសនាំចេញប្រេង (OLO) (អង្គការនៃប្រទេសនាំចេញប្រេង OPEC) នឹងទាញតម្លៃប្រេងធ្លាក់ចុះប្រហែល ២% បើធៀបនឹងតម្លៃបច្ចុប្បន្ន ដូច្នេះការនាំចេញប្រេងតាមសមុទ្រគឺជួបប្រទះនឹងផលលំបាកខ្លាំងណាស់។

នៅថ្ងៃទី ២ ខែកុម្ភៈ ឆ្នាំ២០២៤ តម្លៃប្រេង Brent នៅសមុទ្រខាងជើងកំពុងជួញដូរនៅតម្លៃ ៧៧.៣៣ ដុល្លារ/បារ៉ែល ខណៈដែលតម្លៃប្រេងឆៅផ្អែមស្រាលរបស់សហរដ្ឋអាមេរិក (WTI) បានឈប់នៅ ៧២.២៨ ដុល្លារ/បារ៉ែល ដោយមិនរាប់បញ្ចូលអស្ថិរភាពភូមិសាស្ត្រនយោបាយ។ អ្នកសង្កេតការណ៍ជឿថា តម្លៃប្រេងពិតប្រាកដគួរតែប្រែប្រួលក្នុងរង្វង់ ៧០-៧៥ ដុល្លារក្នុងមួយបារ៉ែល។ នេះបើយោងតាមអ្នកជំនាញបាននិយាយថា កម្លាំងទីផ្សារសំខាន់ៗភាគច្រើនកំពុងទាញតម្លៃប្រេងធ្លាក់ចុះ។

អ្នកវិភាគ Rebecca Babin មកពីក្រុមហ៊ុនគ្រប់គ្រងទ្រព្យសកម្ម CIBC បាននិយាយថា “ខណៈពេលដែលវាមិនបង្ហាញថាតម្លៃប្រេងធ្លាក់ចុះយ៉ាងខ្លាំង វាច្បាស់ណាស់ថាតម្លៃកំពុងត្រូវបានរារាំងដោយភាពទន់ខ្សោយជាមូលដ្ឋាន” ។ ភាពទន់ខ្សោយនោះកើតចេញពីការធ្លាក់ចុះនៃតម្រូវការនៅក្នុងប្រទេសចិន និងការធ្លាក់ចុះនៃប្រេងនៅក្នុងទីផ្សារ ដោយសារតែប្រទេសដែលមិនមែនជាអង្គការ OPEC បន្តពង្រីកផលិតកម្ម។

ទោះបីជាមានការកត់ត្រាកំណើន ៥.២% សម្រាប់ប្រេងទាំងមូលនៃឆ្នាំ ២០២៣ ក៏ដោយ ក៏សេដ្ឋកិច្ចចិនកំពុងបង្ហាញពីការធ្លាក់ចុះ ជាពិសេសនៅក្នុងវិស័យអចលនទ្រព្យ និងការវិនិយោគ។ យោងតាមអ្នកជំនាញ Babin ទស្សនវិស័យតម្រូវការខ្សោយរបស់អ្នកនាំចូលប្រេងឈានមុខគេរបស់ពិភពលោកនឹងក្លាយជាការគំរាមកំហែងដ៏ធំបំផុតដែលប្រឈមមុខនឹងទីផ្សារប្រេងពិភពលោកនៅឆ្នាំ ២០២៤ ។ លើសពីនេះ OPEC ដែលជាអង្គការនៃប្រទេសនាំចេញប្រេងក៏ជាកម្លាំងទាញមួយទៀតដែលបញ្ចុះតម្លៃប្រេងផងដែរ។

នេះពន្យល់ពីការអះអាងដែលថាភាពតានតឹងនៅសមុទ្រក្រហមគឺជាហេតុផលតែមួយគត់ដែលជំរុញឱ្យតម្លៃប្រេងឡើងថ្លៃ។ នៅក្នុងកំណត់ត្រាដែលបានធ្វើបច្ចុប្បន្នភាពនៅថ្ងៃទី ១ ខែកុម្ភៈ អ្នកជំនាញ Babin បានពន្យល់ថាការផ្គត់ផ្គង់ប្រេងមិនបានថយចុះគួរឱ្យកត់សម្គាល់នោះទេ ដោយសារតែការកើនឡើងនៃភាពតានតឹងនៅមជ្ឈិមបូព៌ា។ ជាលទ្ធផល ប្រេងមិនត្រូវបានកំណត់តម្លៃដោយផ្អែកលើកង្វះការផ្គត់ផ្គង់នោះទេ ប៉ុន្តែថ្លៃដឹកជញ្ជូនខ្ពស់បានជួយដល់តម្លៃទំនិញ។ វាត្រូវបានគេប៉ាន់ប្រមាណថាការចំណាយកើនឡើងទាក់ទងនឹងការដឹកជញ្ជូន/ការធានារ៉ាប់រងនៅជុំវិញតំបន់សមុទ្រក្រហមប៉ះពាល់ដល់តម្លៃប្រេងប្រហែល ២-៣ ដុល្លារ។

អ្នកជំនាញ Hunter Kornfeind មកពី Rapidan Energy បាននិយាយថា “តាមបច្ចេកទេស ការផ្គត់ផ្គង់មិនត្រូវបានរំខានទេ។ ពេលវេលាដឹកជញ្ជូនកាន់តែយូរគឺជាហេតុផលសម្រាប់ការកើនឡើងតម្លៃប្រេងបន្តិច»។ អ្នកជំនាញ Babin ប៉ាន់ប្រមាណថា ប្រសិនបើភាពតានតឹងនៅសមុទ្រក្រហមមិនបញ្ចប់ក្នុងពេលឆាប់ៗនេះទេ វាទំនងជាតម្លៃប្រេងអាចឡើងដល់ ៩០ ដុល្លារ/បារ៉ែល នាពេលអនាគតដ៏ខ្លីខាងមុខនេះ៕

ប្រទេសថៃ ៖ នៅដើមខែកុម្ភៈ ឆ្នាំ២០២៤ នេះ មហាជនថៃបានរិះគន់ករណីខោដំរី ដែលពលរដ្ឋថៃចាត់ទុកថា គឺជា Soft Power របស់ជាតិនោះ ត្រូវបានក្រុមហ៊ុនចិនផលិត និងនាំចេញខោដំរីរបស់ថៃមកលក់ឱ្យប្រទេសថៃក្នុងចំនួនយ៉ាងច្រើន រហូតធ្វើឱ្យថៃប្រឈមនឹងឱនភាពពាណិជ្ជកម្ម និងបញ្ហាកម្មសិទ្ធិ ។ កន្លងមក មហាជនថៃធ្លាប់រិះគន់ប្រទេសជិតខាងពាក់ព័ន្ធនឹងខោដំរី ប៉ុន្តែលើកនេះ ក្រុមហ៊ុនចិនបានផលិតខោដំរី តើប្រទេសថៃនឹងដោះស្រាយបែបណា?

លោក Srettha Thavisin នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃបានផ្តល់បទសម្ភាសន៍ពាក់ព័ន្ធនឹងករណីខោដំរីថា វាជាបញ្ហាការធ្វើពាណិជ្ជកម្ម បើកន្លែងណាមានឱកាស គេនឹងចាប់យកឱកាសនេះដោយផ្ទាល់ ។ ហេតុនេះ លោកជឿថា ប្រទេសថៃត្រូវតែពិនិត្យមើលបញ្ហាម្ចាស់កម្មសិទ្ធ និងការចាប់យកឱកាសពាណិជ្ជកម្មយ៉ាងឆាប់រហ័ស ពីព្រោះប្រសិនបើប្រទេសថៃយឺតយ៉ាវ នឹងមានអ្នកធ្វើវាមុន ។ នេះជាបទពិសោធន៍មួយដែលយើងត្រូវលើកយកមកជជែកគ្នា ។ នៅពេលអ្នកសារព័ត៌មានសួរថា តើប្រទេសថៃត្រូវតែដាក់ផែនការផលិតខោដំរីបន្ថែមទៀតឬយ៉ាងណា? លោក Srettha Thavisin នាយករដ្ឋមន្ត្រីថៃលើកឡើងថា ប្រទេសថៃត្រូវតែដោះស្រាយបញ្ហាប្រភពឫសគល់ជាមុនសិនថា តើថៃបានឈ្វេងយល់ពីការធ្វើទីផ្សារដែរឬទេ? តើមានការការពារកម្មសិទ្ធបញ្ញាដែរឬទេ? ពីព្រោះវាមិនមែនជារឿងថ្មីទេ ក្នុងការធ្វើពាណិជ្ជកម្ម ។

លោកនាយករដ្ឋមន្ត្រីថៃបន្តថា នៅកន្លែងណាមានឱកាស គេនឹងចាប់យកឱកាសនោះ ហើយបើប្រទេសថៃយឺតយ៉ាវនឹងបាត់បង់ឱកាសនេះ វាដូចគ្នានឹងករណីជាច្រើនទៀតដែលប្រទេសថៃអនុវត្តយឺតយ៉ាវ ។ ហេតុនេះ យើងត្រូវតែប្រញាប់ប្រញាល់ធ្វើឱ្យបានលឿនជាងមុន ។ ជាក់ស្តែង ករណីលើកលែងទិដ្ឋាការ និងលើកកម្ពស់លិខិតឆ្លងដែនថៃ គឺយើងត្រូវនាំមុខអនុវត្តវិធានការនេះ ។

លោកបន្ថែមថា យើងត្រូវចាប់យកឱកាសដើម្បីក្លាយជាប្រទេសនាំមុខគេផ្នែកវិស័យទេសចរណ៍នៅតំបន់អាស៊ាន ។ វាជាបញ្ហាតូចតាច ប៉ុន្តែវាឆ្លុះបញ្ចាំងពីការងារក្នុងរូបភាពធំ ដែលត្រូវធ្វើការ និងគិតឱ្យបានឆាប់រហ័ស ព្រមទាំងការពារផលប្រយោជន៍របស់ប្រទេសជាតិផងដែរ ។

គួរបញ្ជាក់ថា មហាជនថៃបានរិះគន់ក្រុមហ៊ុនចិនផលិតខោដំរី និងនាំចេញមកលក់ឱ្យប្រទេសថៃ ក្រោយពីទំព័រហ្វេសប៊ុកមួយបង្ហោះព័ត៌មានថា ក្រុមហ៊ុនចិនបានលក់ខោដំរីតាមអនឡាញ គឺខោ១ មានតម្លៃត្រឹមតែ៣០បាតប៉ុណ្ណោះ ហើយតើរោងចក្រថៃយកអ្វីទៅទប់ទល់ជាមួយក្រុមហ៊ុនចិន? ពីព្រោះក្រុមហ៊ុនចិនមានអតិថិជនកុម្ម៉ង់ទិញខោដំរីយ៉ាងច្រើន ។ លើសពីនេះ អាជីវករថៃក៏បានកុម្ម៉ង់ទិញខោដំរីពីចិន និងយកមកលក់បន្តនៅប្រទេសថៃក្នុងតម្លៃលើសមុនជិតទ្វេដង គឺខោ១ មានតម្លៃចាប់ពី៦៥បាត ទៅ១៩៩បាត ៕