Nokia គឺជាក្រុមហ៊ុនតែមួយគត់ដែលផលិតទូរស័ព្ទដៃចល័តឈានមុខគេលើពិភពលោកក្នុងអំឡុងដើមទសវត្សឆ្នាំ ២០០០។ ប៉ុន្តែទោះជាយ៉ាងណាប៉ុន្មានឆ្នាំក្រោយមក Nokia ក៏បានជួបការលំបាកក្នុងការស្វែងរកទីផ្សារឲ្យទូរស័ព្ទដៃរបស់ខ្លួនវិញ និងបរាជ័យខ្លាំងរហូតលក់ក្រុមហ៊ុនខ្លួនទៅឲ្យក្រុមហ៊ុន Microsoft តែម្តង។

កាលពីដំបូងឡើយក្រុមហ៊ុន Nokia បានចាប់ដៃគូរជាមួយនឹងក្រុមហ៊ុន Microsoft ដើម្បីដាក់ដំណើរការប្រព័ន្ធ Window នៅលើប្រព័ន្ធប្រតិបត្តិការរបស់ខ្លួន។ ប៉ុន្តែប្រព័ន្ធនេះក៏មិនបានជួយអ្វីបានច្រើនឡើយ ដោយសារវាមិនមានភាពទូលំទូលាយ ដូចទៅនឹងប្រព័ន្ធដែលមាននៅលើ iOS របស់ Apple និង Android របស់ Samsung ឡើយ។

ការធ្លាក់ប្រជាប្រិយភាពរបស់ក្រុមហ៊ុន Nokia គឺដោយសារតែមានការប្រកួតប្រជែងខ្លាំងពីក្រុមហ៊ុនស្មាតហ្វូនប្រកបដោយភាពច្នៃប្រឌិតដូចជា Apple, Samsung និង Google រួមជាមួយនឹងកត្តាផ្សេងៗ ដូចជាការផ្លាស់ប្តូរទីផ្សារទូរស័ព្ទធម្មតាទៅកាន់ស្មាតហ្វូនទំនើប ក៏ដូចជាប្រព័ន្ធប្រតិបត្តិការក្នុងទូរស័ព្ទដៃ Nokia មិនមានភាពល្អប្រសើរឡើងប្រៀបនឹងស្មាតហ្វូតដទៃទៀតជាដើម។

ទោះជាយ៉ាងណាក៏ដោយ ក្រុមហ៊ុន Nokia ក៏ធ្លាប់ជាក្រុមហ៊ុនដ៏គួរឱ្យគោរពនិងអស្ចារ្យជាងគេមួយដែរ មុននឹងក្រុមហ៊ុននេះដួលរលំ។ ពាក្យសំដីណែនាំរបស់នាយកប្រតិបត្តិក្រុមហ៊ុន Nokia ក៏បាននិយាយថា “យើងមិនបានធ្វើអ្វីខុសក្នុងអាជីវកម្មមួយនេះនោះទេ ប៉ុន្តែយើងគ្រាន់តែចាញ់”។ ដោយហេតុថាពិភពលោកបានផ្លាស់ប្តូរលឿនពេក ហើយការប្រកួតប្រជែងនៅលើទីផ្សារខ្លាំងពេក ទើបបណ្តាលឲ្យក្រុមហ៊ុនដួលរលំបែបនេះ។ “Nokia គួរតែយល់ដឹងឲ្យស៊ីជម្រៅអំពីបរិយាកាសអាជីវកម្ម មានគំនិតច្នៃប្រឌិតថ្មីៗសម្រាប់អតិថិជនខ្លួន ក៏ដូចជាមានការផ្លាស់ប្តូរយ៉ាងឆាប់រហ័សឲ្យស្របទៅនឹងនិន្នាការមនុស្សសម័យថ្មី” ដែលទាំងនេះគឺជាគន្លឹះនៅក្នុងការធ្វើអាជីវកម្មមួយប្រកបដោយភាពជោគជ័យ៕

នាយកដ្ឋានព័ត៌មាន និងទំនាក់ទំនង នៃទីក្រុងហូជីមិញ បានកោះហៅម្ចាស់គណនី TikTok ឈ្មោះ Hua Quoc Anh ទាក់ទងនឹងករណីបង្ហោះវីដេអូឃ្លីបប្រាសាទអង្គរវត្ត កាលពីដើមខែវិច្ឆិកា ឆ្នាំ២០២៣ ដោយបានធ្វើការពិន័យជាទឹកប្រាក់៧.៥លានដុង(ប្រមាណជា៣០០ដុល្លារ)។

ការពិន័យនេះ ផ្អែកទៅតាមអនុក្រឹត្យលេខ ១៥/២០២០ របស់រដ្ឋាភិបាលវៀតណាម ដែលម្ចាស់គណីនេះត្រូវជាប់ចោទពីបទផ្តល់ព័ត៌មានមិនពិត បំភ្លៃ បង្កាច់បង្ខូចកេរ្តិ៍ឈ្មោះរបស់ ទីភ្នាក់ងារ អង្គការ និងកិត្តិយស សេចក្តីថ្លៃថ្នូររបស់បុគ្គល។គួរបញ្ជាក់ផងដែរថា កាលពីដើមខែវិច្ឆិកា ឆ្នាំ២០២៣ ម្ចាស់គណនី Tiktok ឈ្មោះ Hua Quoc Anh បានបង្ហោះវីដេអូឃ្លីបបង្ហាញសកម្មភាពនៅប្រាសាទអង្គរវត្ត ដោយបានស្លៀកសម្លៀកបំពាក់ពណ៌ផ្កាឈូកដែលមិនមែនជាសំលៀកបំពាក់ប្រពៃណីខ្មែរ និងបានបញ្ចូលរូបភាពទង់ជាតិ និងរូបព្រះមហាក្សត្រថៃ ដែលធ្វើឱ្យប៉ះពាល់កិត្តិយសប្រាសាទអង្គរវត្ត និងពលរដ្ឋខ្មែរជាខ្លាំង៕

កន្លាត គឺជាសត្វដែលបង្កើតភាពរំខាន និងកខ្វក់គួរឱ្យស្អប់ខ្ពើម ជាពិសេសមនុស្សមួយចំនួនតែងតែព្យាយាមកម្ចាត់វាដោយប្រើវិធីផ្សេងៗដូចជា ការបុក ឬការជាន់ ដែលអាចបណ្តាលឱ្យមេរោគដែលមាននៅក្នុងខ្លួនរបស់សត្វកន្លាតរីករាលដាលចូលទៅក្នុងប្រព័ន្ធដង្ហើមរបស់មនុស្ស ។

ដូច្នេះអង្គការសុខភាពពិភពលោក (WHO) បានព្រមានថា ការកម្ចាត់សត្វកន្លាតអាចបណ្តាលឱ្យមានការរីករាលដាលនៃមេរោគដែលអាចបង្កគ្រោះថ្នាក់ដល់សុខភាពរបស់មនុស្សយើងបាន ព្រោះសត្វកន្លាតមានសមត្ថភាពផ្ទុកមេរោគជាច្រើនដូចជា៖ គ្រុនពោះវៀន រាគ ជំងឺឆ្លងនៃបំពង់បង្ហូរនោម ពងបែកលើស្បែក ជំងឺនៃប្រព័ន្ធរំលាយអាហារ ការពុលអាហារ និងជំងឺគ្រុនពោះវៀនជាដើម។

លើសពីនេះសត្វកន្លាតក៏មានដង្កូវប៉ារ៉ាស៊ីត និងជាសំបុកសម្រាប់ប្រមូលជំងឺដូចជា ដង្កូវនាងទំពក់ ដង្កូវមូល ដង្កូវតឿ ដង្កូវទឹកឈាម ដែលពួកវាមានប៉ារ៉ាស៊ីត ១២ ប្រភេទដែលអាចចេញមកតាមរយៈតំណក់កន្លាត។ សត្វកន្លាតក៏មានផ្សិត ២ ប្រភេទដែលអាចបង្កជំងឺផ្លូវដង្ហើម និងជំងឺស្បែកដល់មនុស្សយើងផងដែរ ហើយវាក៏ជាមេរោគ ដែលអាចធ្វើឱ្យមនុស្សមានជំងឺរលាកថ្លើមបានទៀតផង។

សត្វកន្លាតមានប្រូតូហ្សូ ដែលបណ្តាលឱ្យមានពិការភាពពីកំណើតនៅក្នុងទារក ហើយវាក៏ជាមូលហេតុនៃជំងឺរាគរូសផងដែរ។

ទោះជាយ៉ាងណាក៏ដោយ ដើម្បីការពារ និងកំចាត់សត្វកន្លាតប្រកបដោយសុវត្ថិភាព និងមានប្រសិទ្ធភាព គឺត្រូវការសម្អាតផ្ទះឱ្យស្អាត បិទធុងសំរាម និងប្រើប្រាស់ថ្នាំសម្លាប់សត្វល្អិត ក៏ដូចជាប្រើប្រាស់អន្ទាក់សត្វល្អិត រួមទាំងការប្រើប្រាស់សារធាតុគីមីដែលមានលក្ខណៈសម្បត្តិការពារសត្វល្អិតជាដើម៕

ប្រទេសចិន ៖ អ្នកលេងបណ្តាញសង្គមចិនបានចាប់អារម្មណ៍ និងចែកចាយវីដេអូមួយក្នុងបណ្តាញសង្គម ដែលវីដេអូនោះបង្ហាញពីការដឹកជញ្ជូនអាហារឱ្យកម្មករធ្វើការនៅលើកំពូលភ្នំមួយកន្លែង ។ ការដឹកជញ្ជូនអាហារតាមឧទ្ធម្ភាគចក្របានធ្វើឡើងជារៀងរាល់ថ្ងៃ ហើយក្រៅពីអាហារ ឧទ្ធម្ភាគចក្រក៏បានដឹករបស់របរផ្សេងៗមកឱ្យកម្មករប្រើប្រាស់ផងដែរ ។

ការដឹកជញ្ជូនអាហារ និងរបស់របរផ្សេងៗតាមឧទ្ធម្ភាគចក្រនេះបានកើតឡើងនៅលើកំពូលភ្នំមួយកន្លែងនៅទីក្រុងឆៃចូ តំបន់ឈឺជៀង ប្រទេសចិន ។ ចំណែកអ្នកដឹកជញ្ជូនអាហារឱ្យកម្មករនេះ គឺជាម្ចាស់គម្រោង ហើយគាត់ក៏ជាម្ចាស់ឧទ្ធម្ភាគចក្រ១គ្រឿងនេះផងដែរ ។

ម្ចាស់គម្រោងបានបើកឧទ្ធម្ភាគចក្រដឹកអាហារឱ្យកម្មកររបស់គាត់ជារៀងរាល់ថ្ងៃ ហើយបន្ទាប់ពីគាត់បានថតវីដេអូបង្ហោះក្នុងបណ្តាញសង្គម ស្រាប់តែធ្វើឱ្យអ្នកលេងបណ្តាញសង្គមនៅប្រទេសចិនចាប់អារម្មណ៍យ៉ាងខ្លាំង ។ អ្នកខ្លះបានសរសើរពីទឹកចិត្តរបស់ថៅកែរូបនេះចំពោះកម្មករ ខណៈអ្នកខ្លះទៀតប្រាប់ថា ពួកគេមិនធ្លាប់ឃើញការដឹកអាហារតាមវិធីនេះពីមុនមកទេ ។

តាមរយៈការសាកសួរឱ្យដឹងថា ជាធម្មតា អ្នកធ្វើការទាំងអស់ត្រូវបើកបររថយន្តទៅទិញអាហារ ឬរបស់របរដោយខ្លួនឯងនៅជើងភ្នំ ហើយពួកគេត្រូវចំណាយពេលរហូតដល់៣០នាទីឯណោះក្នុងការធ្វើដំណើរទៅ-មក ។ រីឯផ្លូវវិញក៏ពិបាកធ្វើដំណើរ និងអាចមានគ្រោះថ្នាក់ផងដែរ ប៉ុន្តែដោយសារម្ចាស់គម្រោងចង់ឱ្យគម្រោងបញ្ចប់មុនពេលកំណត់ និងចង់ឱ្យកម្មករទាំងអស់បានត្រឡប់ទៅចូលរួមពិធីបុណ្យចូលឆ្នាំចិន ទើបម្ចាស់គម្រោងសម្រេចចិត្តដឹកអាហារឱ្យកម្មករនៅលើកំពូលភ្នំតាមឧទ្ធម្ភាគចក្រជាប្រចាំ ។

ហេតុនេះ វាធ្វើឱ្យចំណេញពេលវេលាដល់អ្នកធ្វើការឱ្យគាត់ ហើយការងារនឹងរួចរាល់មុនពេលកំណត់ផងដែរ ពីព្រោះការធ្វើដំណើរចុះភ្នំ និងឡើងភ្នំនៅតំបន់នេះពិបាកខ្លាំង ។ លើសពីនេះ ការធ្វើដំណើរអាចនឹងមានគ្រោះថ្នាក់ទៀតផង បើពួកគេបើកបរធ្វេសប្រហែស ៕

តម្លៃមាសនៅឆ្នាំ ២០២៤ នេះអាចបង្កើតកំណត់ត្រាថ្មីមួយ ដោយសារសហរដ្ឋអាមេរិកបានកាត់បន្ថយអត្រាការប្រាក់ ភូមិសាស្ត្រនយោបាយ ហើយធនាគារកណ្តាលនៅតែបន្តទិញ។

យោងតាមគេហទំព័រអន្តរជាតិ Reuters បានឱ្យដឹងថា ការបិទវគ្គជួញដូរចុងក្រោយនៃឆ្នាំ២០២៣ តម្លៃមាសនៅលើពិភពលោក បានធ្លាក់ចុះ ៤ ដុល្លារ មកត្រឹម ២,០៦២ ដុល្លារអាមេរិកក្នុងមួយអោន។ ទោះយ៉ាងណាក៏ដោយ សម្រាប់ពេញមួយឆ្នាំ តម្លៃនៅតែកើនឡើង ១៣% ដែលជាឆ្នាំដ៏ល្អបំផុតចាប់តាំងពីឆ្នាំ ២០២០។

លោក Olen Hansen អ្នកវិភាគនៅធនាគារ Saxo Bank បាននិយាយថា “បន្ទាប់ពីឆ្នាំ ២០២៣ ដ៏គួរឱ្យរំភើបមួយដែលមិននឹកស្មានដល់ យើងក៏បានព្យាករណ៍ថានិន្នាការនេះនឹងកើនឡើងបន្តដល់ឆ្នាំ ២០២៤ ដោយសារតែមានកម្លាំងទិញនៃមូលនិធិវិនិយោគ និងធនាគារកណ្តាល”។ បច្ចុប្បន្នតម្លៃមាសពិភពលោកគឺមានការប្រែប្រួលជាច្រើន កាលពីដើឆ្នាំ ២០២៣ តម្លៃកើនឡើងដោយសារវិបត្តិធនាគារក្នុងស្រុកនៅអាមេរិក ប៉ុន្តែមកដល់ខែតុលាតម្លៃមាសក៏បានធ្លាក់ចុះវិញ។

នេះបើតាមការស្ទង់មតិរបស់ Reuters ក៏បានរកឃើញដែរថាតម្លៃមាសជាមធ្យមក្នុងឆ្នាំ ២០២៤ គឺត្រឹមតែ ១,៩៨៦ ដុល្លារអាមេរិកប៉ុណ្ណោះ។ ទោះជាយ៉ាងណា ក្រុមហ៊ុន JP Morgan ព្យាករណ៍ថាតម្លៃមាសនឹង “កើនឡើង” នៅពាក់កណ្តាលឆ្នាំ ២០២៤ នេះដែលអាចឈានដល់ ២,៣០០ ដុល្លារ ដោយសារការរំពឹងទុកនៃអត្រាការប្រាក់កាត់បន្ថយ។ UBS ក៏ជឿជាក់ដែរថាតម្លៃនឹងឡើងដល់ ២,១៥០ ដុល្លារនៅចុងឆ្នាំនេះ ប្រសិនបើប្រទេសនានាពិតជាកាត់បន្ថយអត្រាការប្រាក់មែន។

ដូច្នេះហើយ នៅក្នុងរបាយការណ៍ទស្សនវិស័យឆ្នាំ ២០២៤ ក្រុមប្រឹក្សាមាសពិភពលោក (WGC) ក៏បានព្យាករណ៍ដែរថា ប្រសិនបើអត្រាការប្រាក់ធ្លាក់ចុះ ៧៥-១០០ ពិន្ទុមូលដ្ឋាន (០.៧៥-១%) តម្លៃមាសនឹងកើនឡើង ៤% ។ ដោយអ្នកវិភាគជឿជាក់ថា ជម្លោះនៅមជ្ឈិមបូព៌ា អស្ថិរភាពពីការបោះឆ្នោតក្នុងប្រទេសសេដ្ឋកិច្ចធំៗនៅឆ្នាំនេះ និងអំណាចទិញរបស់ធនាគារកណ្តាលដែលដឹកនាំដោយប្រទេសចិននឹងទាញការធ្លាក់ចុះតម្រូវការជម្រកនៅឆ្នាំនេះឱ្យកើនឡើងខ្ពស់។

ជាពិសេសនៅក្នុងប្រទេសចិន ដែលជាទីផ្សារប្រើប្រាស់មាសឈានមុខគេរបស់ពិភពលោក ក្រុមហ៊ុន Heaeus Metals ជឿជាក់ថា តម្រូវការគ្រឿងអលង្ការមាសនៅទីនេះកំពុងកើនឡើងនៅឆ្នាំនេះ ដោយសារគោលនយោបាយជំរុញទឹកចិត្តពីអាជ្ញាធរ។

ទោះយ៉ាងណាក៏ដោយ “តម្លៃនៅតែអាចធ្លាក់ចុះប្រសិនបើអតិផរណាកើនឡើងម្តងទៀតដោយបង្ខំឱ្យ Fed បោះបង់ចោលនូវចេតនារបស់ខ្លួនក្នុងការផ្លាស់ប្តូរទិសដៅគោលនយោបាយ”។ ក្រៅពីនេះ ប្រសិនបើអតិផរណាត្រជាក់លឿនជាងអត្រាដែល Fed កាត់បន្ថយអត្រាការប្រាក់ សេដ្ឋកិច្ចក៏នឹងធ្លាក់ចុះផងដែរ ដោយកាត់បន្ថយតម្រូវការទិញមាស៕

ប្រទេសអូស្ត្រាលី ៖ កាលពីថ្ងៃទី៣ ខែមករា ឆ្នាំ២០២៤ សារព័ត៌មានបរទេសរាយការណ៍ថា ក្រុមអ្នកស្រាវជ្រាវមកពីសាកលវិទ្យាល័យ Queensland ប្រទេសអូស្ត្រាលី បានសាកល្បងបង្កើតផ្លាស្ទិកអាចរលាយដោយខ្លួនឯងនៅក្នុងទឹកសមុទ្រ ។ គេបានដឹងហើយថា នៅបាតសមុទ្រពោរពេញទៅដោយសំរាមផ្លាស្ទិកជាភាគច្រើនប្រភេទ ដែលសំរាមទាំងនេះបានអណ្តែតពីលើគោក និងធ្លាក់ពីកប៉ាល់ដែលបើកបរឆ្លងកាត់មហាសមុទ្រ ។

សំរាមទាំងអស់ដែលអណ្តែតក្នុងទឹកសមុទ្រ និងធ្លាក់ទៅក្រោមបាតសមុទ្រ វាមិនអាចរលាយដោយងាយៗនោះទេ ។ ប៉ុន្តែសំរាមទាំងនេះត្រូវបានត្រី ឬសត្វសមុទ្រផ្សេងៗស៊ីជាអាហារ ខណៈសំរាមមួយចំនួនទៀតបានរុំព័ទ្ធខ្លួនសត្វសមុទ្ររហូតដល់ងា.ប់ ។ ហេតុនេះ សំរាមផ្លាស្ទិកបានបង្កគ្រោះថ្នាក់យ៉ាងខ្លាំងដល់បរិស្ថាន និងសត្វសមុទ្រជាច្រើនប្រភេទ ។

អ្នកស្រាវជ្រាវម្នាក់ឈ្មោះ Ruirui Qiao មកពីសាកលវិទ្យាល័យ Queensland ប្រទេសអូស្ត្រាលី បានអនុវត្តបច្ចេកទេសប្រើប្រាស់សារធាតុម្យ៉ាងឈ្មោះ Polymerization ដើម្បីផលិតផ្លាស្ទិកអាចរលាយដោយខ្លួនឯងបាន បើទោះជាវានៅក្នុងទឹកសមុទ្រក្តី ។ លើសពីនេះ ផ្លាស្ទិកប្រភេទថ្មីនេះមានតម្លៃធូរថ្លៃ ហើយមនុស្សគ្រប់គ្នាអាចប្រើប្រាស់វាជំនួសផ្លាស្ទិកធម្មតាបាន ។

អ្នកស្រាវជ្រាវរូបនេះបានសហការជាមួយដៃគូជាច្រើនទៀត ដើម្បីដំណើរការគម្រោងបង្កើតផ្លាស្ទិកអាចរលាយបាន ។ ពួកគេបានសាកល្បងបង្កើតផ្លាស្ទិកជាច្រើនប្រភេទដែលអាចរលាយក្នុងទឹកសមុទ្រ ដោយប្រើប្រាស់ម៉ាស៊ីនបោះពុម្ព 3D ។ គម្រោងនេះទទួលបានថវិកាពី Queensland-Chinese Academy of Sciences Collaborative Science Fund ចំនួន១២ម៉ឺន៥ពាន់ដុល្លារអាមេរិក ដើម្បីឱ្យក្រុមស្រាវជ្រាវពន្លឿនការផលិតផ្លាស្ទិកអាចរលាយបានក្នុងរយៈពេល២ឆ្នាំ ។

គោលដៅរបស់ក្រុមស្រាវជ្រាវ គឺពួកគេមានគោលបំណងឱ្យផ្លាស្ទិកថ្មីនេះអាចប្រើប្រាស់បានជាទូទៅនៅប្រទេសអូស្ត្រាលី និងប្រទេសចិន ក្នុងរយៈពេល៥ឆ្នាំទៀត ។ ហេតុនេះ វានឹងអាចជំនួសការប្រើប្រាស់ផ្ទាស្ទិកដូចពេលមុន ដែលធ្វើឱ្យប៉ះពាល់បរិស្ថាន ៕

នៅមុនកើតហេតុការណ៍គ្រោះរញ្ជួយនៅជប៉ុន គឺនៅចុងឆ្នាំ២០២៣ អ្នកមុជទឹក និងអ្នកនេសាទតាមសមុទ្រ បានប្រទះឃើញវត្តមានប្រភេទត្រីដ៏កម្រមួយដែលគេឲ្យឈ្មោះថា ‘Doomsday Fish’ ឬ Oarfish ឬ គេហៅថា “ត្រីរញ្ជួយដី”នៅក្រោមបាតសមុទ្រ។

មនុស្សជាច្រើនមានការព្រួយបារម្ភ និងចាត់ទុកថា វាគឺជាសត្វដែលនាំមកនូវដំណឹងអាក្រក់និងគ្រោះមហន្តរាយដ៏ធំនាពេលខាងមុខ សម្រាប់ប្រជាជននិងប្រទេសជប៉ុនមានជំនឿលើវត្តមានសត្វចម្លែកក្រោមបាតសមុទ្រ ‘Doomsday Fish’ ឬ Oarfish។ មិនយូរប៉ុន្មានផង ប្រទេសដែលសំបូរដោយដែនកោះមួយនេះពិតជាទទួលរងនូវការវាយប្រហារដោយគ្រោះរញ្ជួយដីពិតមែន គឺនៅដើមឆ្នាំថ្មី ២០២៤នេះតែម្តង។

មនុស្សរាប់ម៉ឺននាក់ត្រូវបានជម្លៀសចេញពីផ្ទះរបស់ពួកគេនៅទូទាំងប្រទេសជប៉ុន ហើយចំនួនអ្នកស្លាប់គិតត្រឹមថ្ងៃទី០២ ខែមករានេះ គឺមានរហូតដល់ ៤៨ នាក់។ បន្ទាប់ពីគ្រោះរញ្ជួយដីបោកបក់យ៉ាងខ្លាំងដែលជាសញ្ញាព្រមានមួយបញ្ជាក់អំពីរលកយក្សស៊ូណាមិនិងកើតមានឆាប់ៗខាងមុខនេះ។

បើទោះជាយ៉ាងណា នៅក្នុងដំណើរការនៃការជួយសង្គ្រោះពលរដ្ឋចេញពីគ្រោះរញ្ជួយដីនេះ។ ប្រទេសជប៉ុនក៏បានជួបប្រទះនូវហេតុការណ៍ដ៏អាក្រក់មួយទៀតដែរ គឺយន្តហោះអាកាសចរណ៍ដឹកអ្នកដំណើររបស់ក្រុមហ៊ុន Japan Airline បានបុកគ្នាជាមួយយន្តហោះឆ្មាំសមុទ្រដែលត្រៀមហោះទៅជួយសង្គ្រោះពលរដ្ឋដែលកំពុងតែរង់គ្រោះ និងបានធ្វើឲ្យយន្តហោះអាកាសចរណ៍ឆាបឆេះយ៉ាងសន្ធោសន្ធៅ។

អ្នកដំណើរ និងនាវិកទាំងអស់ ៣៧៩នាក់ នៃយន្តហោះ Japan Airlines ត្រូវបានជម្លៀសចេញ ប៉ុន្តែសមាជិកនាវិករបស់ភ្នាក់ងារជួយសង្គ្រោះ ៥នាក់បានបាត់បង់ជីវិត និងម្នាក់រងរបួសធ្ងន់។

សូមរំលឹកផងដែរថា កោះ Honshu គឺជាកោះ ដ៏មានសក្តានុពលមួយរបស់ប្រទេសជប៉ុន ត្រូវបានរងផលប៉ះពាល់យ៉ាងធ្ងន់ធ្ងរដោយការរញ្ជួយដីកម្រិត 7.6 រ៉ិចទ័រ ជាមួយនឹងរលកយក្សស៊ូណាមិកម្ពស់ ១ ម៉ែត្រ វាយប្រហារតាមឆ្នេរសមុទ្រភាគខាងលិច។

វាគឺជាគ្រោះមហន្តរាយធម្មជាតិដ៏ធំបំផុតមួយនៅក្នុងប្រវត្តិសាស្ត្ររបស់ប្រទេសជប៉ុន។ ហើយឥឡូវនេះមនុស្សម្នាជាច្រើនកំពុងតែវិភាគថា តើវត្តមានត្រីដ៏ចម្លែក ដែលបានលេចចេញមកអោយប្រជាជនជប៉ុនបានឃើញកាលពីពេលមុននេះ។ តើវាពិតជាសញ្ញាណ និងជាសារដាស់តឿនសម្រាប់ប្រទេសជប៉ុនថា នឹងកើតគ្រោះមហន្តរាយដ៏អាក្រក់។

សូមរំលឹកថាប្រជាជនជប៉ុន មានរឿងព្រេងនិទានកថាដែលនិយាយពីប្រវត្តិ ត្រីចំលែកត្រី Oarfish ខាងលើ។ ហើយសម្រាប់អ្នកដែលមានជំនឿមាំលើរឿងនិទាននេះ ការជួប រឺបានឃើញសត្វត្រីចំលែក Doomsday Fish រឺ Oarfish គឺជារឿងដែលគួរអោយខ្លាចជាងគេបំផុតនៅក្នុងពិភពនៃបាតសមុទ្រ។ ជាធម្មតាប្រភេទត្រីចម្លែកមួយប្រភេទនេះ រស់នៅក្នុងទឹកដែលមានជម្រៅជ្រៅចាប់ពី១០០០ម៉ែត្រ(3,300 ហ្វីតឡើងទៅ)។ ហើយការដែលមើលឃើញពពួកត្រីចម្លែកនៅក្នុងទឹករាក់ គឺជាប្រផ្នូលនៃការរញ្ជួយដី ហើយជំនឿខាងលើនេះមានចាប់តាំងពីសតវត្សទី 17មកម្ល៉េះ ដែលគេអាចហៅថាវាជា “អ្នកនាំសារមកពីរាជវាំងនៃមហាសមុទ្រ” នេះបើយោងតាមការចុះផ្សាយរបស់កាសែត Japan Times ។

កាលពីចុងឆ្នាំ២០២៣ ក្រុមអ្នកមុជទឹកបានប្រទះឃើញត្រី Oarfish នៅឆ្នេរសមុទ្រតៃវ៉ាន់។ ប្រភេទត្រីដ៏កម្រនេះ ខណៈអ្នកខ្លះហៅវាថា “ត្រីរញ្ជួយដី” ដែលមានប្រវែងរហូតដល់ ៦ ហ្វីត ឬ ជិត ២ម៉ែត្រ ហើយដោយសារតែទំហំ និងរូបរាងដូចជាត្រីបញ្ឈរយ៉ាងចម្លែក និងមានលក្ខណៈស្រដៀងនឹង ‘សត្វពស់សមុទ្រ’ ក៏ត្រូវបានចាត់ទុកថាវាជាសញ្ញានៃគ្រោះមហន្តរាយរញ្ជួយដី ក៏ដូចជាប្រផ្នូលអាក្រក់របស់ប្រទេសជប៉ុននឹងកើតឡើងឆាប់ៗ។
បន្ទាប់មកគឺនៅដើមឆ្នាំ២០២៤នេះ ក៏បានកើតគ្រោះរញ្ជួយដីពិតមែន ហើយក៏កំពុងតែបន្តកើតឡើងដោយមិនដឹងទេថានឹងត្រូវបញ្ចប់នៅពេលណា ហើយនឹងមានមនុស្សស្លាប់ប៉ុណ្ណាន ហើយប្រទេសជប៉ុននឹងរងការខូតខាតដល់កម្រិតណាផងដែរ។

គួរបញ្ជាក់ផងដែរថា នៅចុងឆ្នាំ ២០០៩ និង ២០១០ គេក៏ប្រទះឃើញមានត្រីកម្ររាប់សិបក្បាលបានលេចចេញមកពីឆ្នេរសមុទ្រប្រទេសជប៉ុន។ បន្ទាប់មកនៅឆ្នាំ ២០១១ ប្រទេសជប៉ុនក៏ទទួលរងគ្រោះរញ្ជួយដី Tohoku និងរលកយក្សស៊ូណាយ៉ាងធ្ងន់ធ្ងរផងដែរ៕