សហរដ្ឋអាមេរិក ៖ នៅថ្ងៃទី៩ ខែមករា ឆ្នាំ២០២៤ សារព័ត៌មានបរទេសរាយការណ៍ថា មានហេតុការណ៍ផ្ទុះកើតឡើងក្នុងសណ្ឋាគារមួយឈ្មោះ «សែនម៉ែន» នៅរដ្ឋតិចសាស់ សហរដ្ឋអាមេរិក ។ ហេតុការណ៍ផ្ទុះក្នុងសណ្ឋាគារនេះបានបណ្តាលឱ្យមនុស្សរងរបួសចំនួន២១នាក់ និងមានមនុស្សមួយចំនួនទៀតជាប់នៅជាន់ក្រោមដីរបស់សណ្ឋាគារផងដែរ ។

ក្រោយពីកើតហេតុការណ៍ផ្ទុះក្នុងសណ្ឋាគារកាលពីថ្ងៃទី៨ ខែមករា ឆ្នាំ២០២៤ បានបណ្តាលឱ្យសណ្ឋាគារ «សែនម៉ែន» ខូចខាតយ៉ាងខ្លាំង និងធ្លាក់កំទេចថ្មពាសពេញផ្លូវនៅខាងមុខសណ្ឋាគារ ។ ការខូចខាតបានកើតឡើងនៅបរិវេណជាន់ខាងក្រោមនៃសណ្ឋាគារ ប៉ុន្តែអគារនៅទល់មុខគ្នានេះពុំរងការខូចខាតទេ ។

សណ្ឋាគារ «សែនម៉ែន» មានកម្ពស់២០ជាន់ មានទីតាំងស្ថិតនៅចំណុចកណ្តាលទីក្រុងហ្វតវឺស រដ្ឋតិចសាស់ ។ ក្រោយកើតហេតុ ភ្នាក់ងារពន្លត់ភ្លើង និងភ្នាក់ងារជួយសង្គ្រោះប្រចាំទីក្រុងហ្វតវឺស បញ្ជាក់ថា ហេតុការណ៍នេះបណ្តាលឱ្យមនុស្សរងរបួសចំនួន២១នាក់ ក្នុងនោះមានម្នាក់រងរបួសធ្ងន់ធ្ងរ ។ រីឯមនុស្សខ្លះទៀតជាប់នៅជាន់ក្រោមដីនៃសណ្ឋាគារ ។

ក្រោយកើតហេតុ អាជ្ញាធរបានសុំឱ្យពលរដ្ឋចៀសវាងកុំធ្វើដំណើរមកកាន់ចំណុចកើតហេតុដើម្បីសុវត្ថិភាព ។ អាជ្ញាធរបានសន្និដ្ឋានអំពីមូលហេតុនៃការផ្ទុះថា អាចបណ្តាលមកពីការធ្លាយធុងហ្គាសនៅក្នុងសណ្ឋាគារ ។ ម្យ៉ាងទៀត ក្នុងពេលកើតហេតុ ក៏មានការកែលម្អសណ្ឋាគារផងដែរ ប៉ុន្តែមិនដឹងថា តើវាពាក់ព័ន្ធនឹងការផ្ទុះដែរឬទេ?

គួរបញ្ជាក់ថា សណ្ឋាគារ «សែនម៉ែន» មានបន្ទប់សម្រាកចំនួន២៤៥បន្ទប់ ហើយសណ្ឋាគារនេះបានសាងសង់ឡើងនៅឆ្នាំ១៩២០ ។ បើគិតរហូតមកដល់បច្ចុប្បន្ន សណ្ឋាគារនេះមានអាយុកាលជាង១០០ឆ្នាំហើយ ។ សណ្ឋាគារ «សែនម៉ែន» ធ្លាប់បានចុះឈ្មោះជាតំបន់បុរាណរបស់អាមេរិក តាំងពីឆ្នាំ១៩៧៩ ៕

បរទេស៖ ប្រទេសកូរ៉េខាងត្បូងបានអនុម័តច្បាប់ហាមឃាត់ការលក់ ឬការបរិភោគសត្វឆ្កែចាប់ពីឆ្នាំ ២០២៧ ដូច្នេះអ្នកដែលបំពានច្បាប់នេះនឹងត្រូវប្រឈមមុខនឹងការជាប់ពន្ធនាគាររយៈពេល ៣ ឆ្នាំ ឬពិន័យជាប្រាក់ ៣០ លានវ៉ុន (ប្រមាណ ២២,៨០០ ដុល្លារអាមេរិក)។

យោងតាមប្រភពព័ត៌មាន BBC ដែលបានរាយការណ៍នៅថ្ងៃទី៩ ខែមករាថា ប្រទេសកូរ៉េខាងត្បូងបានអនុម័តច្បាប់មួយក្នុងគោលបំណងបញ្ចប់ការសម្លាប់ និងលក់សាច់ឆ្កែ ក៏ដូចជាបញ្ចប់វប្បធម៌បរិភោគសាច់ឆ្កែនៅកូរ៉េខាងត្បូងដែលបានបន្តអស់រយៈពេលជាច្រើនទសវត្សរ៍មកហើយ។

នៅក្រោមច្បាប់ថ្មី ការចិញ្ចឹម ឬសម្លាប់សត្វឆ្កែដើម្បីបរិភោគ នឹងត្រូវជាប់ពន្ធនាគារអតិបរមា ៣ ឆ្នាំ ឬពិន័យជាប្រាក់ ៣០ លានវ៉ុន (ប្រមាណ ២២,៨០០ ដុល្លារអាមេរិក) ដែលច្បាប់នេះនឹងចូលជាធរមាននៅឆ្នាំ ២០២៧។ ហេតុផលដែលច្បាប់នេះនឹងចូលជាធរមាននៅឆ្នាំ ២០២៧ គឺដើម្បីផ្តល់ឱកាសសម្រាប់ភោជនីយដ្ឋាន និងកសិដ្ឋានចិញ្ចឹមឆ្កែ ស្វែងរកប្រភពចំណូលផ្សេងទៀត ក៏ដូចជាស្វែងរកអាជីវកម្មថ្មី។

យោងតាមស្ថិតិរបស់រដ្ឋាភិបាលកូរ៉េខាងត្បូង បានឱ្យដឹងទៀតថា កាលពីឆ្នាំ ២០២៣ ប្រទេសនេះមានភោជនីយដ្ឋានសាច់ឆ្កែប្រហែល ១,៦០០ និងកសិដ្ឋានសាច់ឆ្កែ ១,១៥០ ទោះជាយ៉ាងណាក៏ដោយ ប្រជាប្រិយភាពរបស់សាច់ឆ្កែបានធ្លាក់ចុះយ៉ាងខ្លាំងកាលពីឆ្នាំមុន។

គួរបញ្ជាក់ដែរថា ការបរិភោគសាច់ឆ្កែគឺជាទំនៀមទម្លាប់ដែលមានអាយុកាលរាប់សតវត្សមកហើយនៅលើឧបទ្វីបកូរ៉េ។ ម្ហូបនេះត្រូវបានចាត់ទុកថាជាប្រភពនៃថាមពលក្នុងរដូវក្តៅក្តៅ។ ប៉ុន្តែចំនួនកើនឡើងនៃប្រជាជនកូរ៉េខាងត្បូង ចង់ឱ្យរដ្ឋាភិបាលហាមឃាត់សាច់ឆ្កែ ជាមួយនឹងការព្រួយបារម្ភកាន់តែខ្លាំងឡើងអំពីសិទ្ធិសត្វ និងការព្រួយបារម្ភអំពីមុខមាត់អន្តរជាតិរបស់ប្រទេស៕

ពន្ធនាគារ Ringerik ស្ថិតនៅក្នុងទីក្រុង Ringerike តំបន់ Tyristrand ភាគខាងត្បូងប្រទេសន័រវេស ដែលជាពន្ធនាគារសន្តិសុខខ្ពស់បំផុតរបស់ប្រទេស និងជាកន្លែងឃុំឃាំងអ្នកទោសដ៏គ្រោះថ្នាក់បំផុតមួយ។ ពន្ធនាគារនេះមានទីតាំងនៅលើផ្ទៃដី ៧៤ ហិចតា ហ៊ុព័ទ្ធដោយជញ្ជាំងកម្ពស់ ៧ ម៉ែត្រ បណ្តោយ ១,០៦៨ ម៉ែត្រ ដែលអាចផ្ទុកអ្នកទោសចំនួន ១៦០ នាក់។

អ្វីដែលពិសេសនិងគួរឱ្យចាប់អារម្មណ៍បំផុតរបស់ពន្ធនាគារ Ringerik នោះគឺនៅទីនោះមានកន្លែងហាត់ប្រាណដ៏ធំទូលាយប្រកបដោយផាសុខភាព ដោយអ្នកទោសតម្រូវឱ្យរស់នៅក្នុងបន្ទប់បង្ខាំងទោលពីរជាន់ដ៏ស្រស់ស្អាត ដែលមានផ្ទះបាយ បន្ទប់ទូរទស្សន៍ ជាមួយនឹងម៉ាស៊ីនត្រជាក់ និងម៉ាស៊ីនហ្គេមដើម្បីឱ្យអ្នកទោសលេងកម្សាន្តកំដអារម្មណ៍ពេលអផ្សុក ក៏ដូចជាមានបូជាចារ្យ និងបុគ្គលិកពេទ្យមកពិនិត្យសុខភាពជាប្រចាំផងដែរ។

លើសពីនេះអ្នកទោសក៏អាចចម្អិនអាហារតាមចំណង់ចំណូលចិត្ត លេងហ្គេម ដើរ ធ្វើលំហាត់ប្រាណ និងលេងបាល់បោះនៅក្នុងពន្ធនាគារដ៏ធំទូលាយនេះបានទៀតផង។ រីឯបន្ទប់គេងរបស់អ្នកទោសវិញត្រូវបានបំពាក់ដោយគ្រែមួយ តុ និងធ្នើប្រណិតជាមួយនឹងម៉ាស៊ីនត្រជាក់។ ចំពោះបន្ទប់ទឹកវិញគឺប្រើវាំងននដើម្បីបំបែកតំបន់ស្ងួត និងសើម។ សម្រាប់បន្ទប់ទូរទស្សន៍ និងបន្ទប់លេងហ្គេមវិញគឺមានទីតាំងនៅជាន់ទីមួយ ដោយនៅខាងក្រៅគឺជាផ្ទះបាយ និងសាលធំ។

សាលជាន់ទីពីរ គឺជាកន្លែងរក្សាទ្រុងបក្សី រួមទាំងមានកន្លែងហាលថ្ងៃ ខ្យល់អាកាសបរិសុទ្ធ និងទីលានបាល់បោះដ៏ធំទូលាយហ៊ុព័ទ្ធដោយសំណាញ់ដែក។ ទោះជាយ៉ាងណាក៏ដោយ ពន្ធនាគារ Ringerik នេះមិនមាន Wifi នោះទេ ហើយអ្នកទោសនៅទីនោះតែងប្រឈមនឹងបញ្ហាផ្លូវចិត្ត ក៏ដូចជាបាក់ទឹកចិត្ត ទោះបីនៅទីនោះមានភាពស្រស់ស្អាត និងមានអ្វីគ្រប់យ៉ាងក៏ដោយ៕

ប្រទេសថៃ ៖ កាលពីថ្ងៃទី៨ ខែមករា ឆ្នាំ២០២៤ សមត្ថកិច្ចប្រទេសថៃបានចាប់ខ្លួនចោរលួចម្នាក់ពូកែខាងសូត្រធម៌ មុននឹងចូលលួចទ្រព្យសម្បត្តិនៅកន្លែងណាមួយ ។ ចោរម្នាក់នេះប្រាប់ថា មុនពេលធ្វើសកម្មភាពម្តងៗ ខ្លួនបានសូត្រធម៌ជាមុនសិនដើម្បីបើកផ្លូវ និងងាយស្រួលលួច ។ ប៉ុន្តែការលួចលើកនេះ ធម៌ជួយមិនទាន់ ក៏ត្រូវបានសមត្ថកិច្ចចាប់ខ្លួនមុន ។

ចោរខាងលើឈ្មោះ ខាឆេន ឬឈ្មោះ Chain Sihamat អាយុ៤៨ឆ្នាំ ស្នាក់នៅក្នុងតំបន់បាងកកណយ ទីក្រុងបាងកក ប្រទេសថៃ ។ ក្នុងការចាប់ខ្លួននេះ ដោយសារសមត្ថកិច្ចបានទទួលដំណឹងពីភ្នាក់ងារស៊ើបការណ៍សម្ងាត់ថា ចោរឈ្មោះ ខាឆេន បានលួចទ្រព្យសម្បត្តិ និងបំផ្លាញទ្រព្យសម្បត្តិជនរងគ្រោះ ។

បើតាមសមត្ថកិច្ចឱ្យដឹងថា ចោរឈ្មោះ ខាឆេន បានលួចរបស់របរមួយចំនួន មិនលើកលែងសូម្បីតែវ៉ែនតា និងលួចប្រាក់ចំនួន៩.០០០បាតពីជនរងគ្រោះ ។ បន្ទាប់មក ចោរបានរត់មកលាក់ខ្លួននៅបរិវេណផ្លូវបាងឃុនណុន ។ ក្រោយធ្វើការស៊ើបអង្កេតរួច សមត្ថកិច្ចក៏បានទៅកាន់កន្លែងលាក់ខ្លួនរបស់ចោរ និងចាប់ខ្លួនតែម្តង ។

ចោរសារភាពប្រាប់សមត្ថកិច្ចថា ខ្លួនពិតជាបានលួចទ្រព្យសម្បត្តិអ្នកដទៃ និងជាបុគ្គលដែលសមត្ថកិច្ចស្វែងរកចាប់ខ្លួន ។ មុននឹងធ្វើសកម្មភាពនៅកន្លែងណាមួយ ខ្លួនតែងតែសូត្រធម៌ជានិច្ចថា ៖ «ខ្ញុំបាទឈ្មោះ ខាឆេន សុំសេចក្តីអនុគ្រោះពីម្ចាស់ទឹក ម្ចាស់ដី និងអ្នកមានអំណាចទាំងឡាយ សូមឱ្យខ្ញុំបាទបានឃើញទ្រព្យសម្បត្តិរបស់ម្ចាស់កម្មផល ឬជនដែលកុហកបោកប្រាស់អ្នកដទៃ ។ សូមឱ្យខ្ញុំបាទទទួលបានទ្រព្យសម្បត្តិរបស់ជនទាំងនេះដោយងាយស្រួល មានសុវត្ថិភាព និងសូមកុំឱ្យអ្នកណាម្នាក់ចាប់អារម្មណ៍លើរូបខ្ញុំបាទឱ្យសោះ» ។

កន្លងមក តាមរយៈការចុះផ្សាយរបស់សារព័ត៌មាននានា គេពុំធ្លាប់ប្រទះឃើញចោរដូចខាងលើទេ ពីព្រោះចោរត្រូវប្រញាប់ធ្វើសកម្មភាពឱ្យបានលឿនមុនពេលម្ចាស់ផ្ទះមកទាន់ ។ រីឯចោរបែបនេះមានតែម្នាក់ប៉ុណ្ណោះនៅលើពិភពលោក ដែលតែងតែសូត្រធម៌សិន មុននឹងលួចទ្រព្យសម្បត្តិនៅកន្លែងណាមួយ ៕

បរទេស៖ ទូរស័ព្ទ IPHONE នៅតែដំណើរការល្អដដែលបន្ទាប់ពីជ្រុះចេញពីលើយន្តហោះ Alaska Airlines នៅរយៈកម្ពស់ជិត ៤,៨០០ ម៉ែត្រត្រូវបានរកឃើញនៅលើដីក្នុងរដ្ឋ Washington សហរដ្ឋអាមេរិក។

យោងតាមគេហទំព័រអន្តរជាតិ CBS News ដែលបានចុះផ្សាយនៅថ្ងៃទី៨ ខែមករាថា ទូរស័ព្ទ iPhone ត្រូវបានគេរកឃើញនៅចិញ្ចើមផ្លូវ ដោយឧបករណ៍នេះប្រើស្រោម ដោយស្ទើរតែគ្មានការខូចខាតអ្វីទាំងអស់ពីសម្បកខាងក្រៅ ហើយអេក្រង់ក៏មិនមានសញ្ញានៃការប្រេះដែរ។ លើសពីនេះទៀត iPhone នៅតែបង្ហាញអ៊ីមែលផ្ទៀងផ្ទាត់ឥវ៉ាន់សម្រាប់យន្តហោះ Alaska Airlines ដែលនេះគឺជាសញ្ញាមួយបង្ហាញឱ្យដឹងថា iPhone អាចនឹងធ្លាក់ពីយន្តហោះ Boeing 737-9 MAX ដែលបានហោះឡើងកាលពីថ្ងៃទី ៥ ខែមករា ពីអាកាសយានដ្ឋានអន្តរជាតិ Portland រដ្ឋ Oregon ទៅកាន់រដ្ឋ California សហរដ្ឋអាមេរិក។

នៅពេលនោះយន្តហោះ Alaska Airlines បានឡើងដល់កម្ពស់ ៤,៨០០ ម៉ែត្រ ស្រាប់តែមានការផ្ទុះ ហើយស៊ុមបង្អួចមួយបានផ្ទុះចេញ បង្កើតរន្ធដែលមានទំហំប៉ុនច្រកចេញសង្គ្រោះបន្ទាន់ ដោយសម្ពាធនៅក្នុងកាប៊ីនបានធ្លាក់ចុះយ៉ាងខ្លាំង ហើយវត្ថុជាច្រើនក៏ត្រូវធ្លាក់ចុះពីយន្តហោះផងដែរ។ ទោះជាយ៉ាងណាក៏ដោយ យន្តហោះនេះបានចុះចតដោយសុវត្ថិភាព ហើយអ្នកដំណើរទាំង ១៧១ នាក់ និងសមាជិកនាវិក ៦ នាក់ក៏បានរួចផុតពីគ្រោះថ្នាក់នេះផងដែរ។

ហេតុនេះហើយ បច្ចុប្បន្នទូរស័ព្ទ iPhone នេះត្រូវបានប្រគល់ឱ្យក្រុមប្រឹក្សាសុវត្ថិភាពដឹកជញ្ជូនជាតិសហរដ្ឋអាមេរិក NTSB ដើម្បីយកទូរស័ព្ទនេះទៅឱ្យម្ចាស់ដើមវិញ។
គួរបញ្ជាក់ដែរថា នេះមិនមែនជាលើកទីមួយទេដែល iPhone ត្រូវបានគេសរសើរចំពោះភាពធន់របស់វា។ ក្នុងឆ្នាំ ២០១១ ទូរស័ព្ទ iPhone 4 ក៏ដំណើរការបានធម្មតាដែរ នៅពេលដែលម្ចាស់របស់វាទម្លាក់ពីកម្ពស់ ៣០០ ម៉ែត្រ។ ដូច្នេះទោះបីទូរស័ព្ទប្រភេទ iPhone ទាំងអស់ធ្លាក់នៅរយៈកម្ពស់ខ្ពស់ប៉ុណ្ណាក៏ដោយ ក៏វាមិនខូចខាតដែរ៕