ភ្នំពេញ ៖ គិតត្រឹមឆ្នាំ ២០២៤នេះ មន្ទីរពេទ្យកុមារអង្គរត្រូវបានបង្កើតឡើងរយៈពេល២៥ឆ្នាំហើយ ដោយក្នុងរយៈពេល២៥ឆ្នាំកន្លងមកនេះ មន្ទីរពេទ្យកុមារអង្គរ បានជួយសង្គ្រោះអាយុជីវិតដល់កុមារជាង២,៥លាន និងបន្តជួយសង្គ្រោះកុមារជាបន្តបន្ទាប់ទៀតនាពេលបច្ចុប្បន្ននិងអនាគត ។
បច្ចុប្បន្ននេះ មន្ទីរពេទ្យកុមារអង្គរកំពុងប្រឈមនឹងបញ្ហាហិរញ្ញវត្ថុ និងត្រូវការឱ្យសប្បុរសជនជួយបរិច្ចាគដើម្បីឱ្យមន្ទីរពេទ្យនេះ អាចបន្តបេសកកម្មជួយសង្គ្រោះកុមារកម្ពុជាបន្តទៀត ដោយក្នុងមួយខែ មន្ទីរពេទ្យត្រូវការថវិកាចំណាយប្រមាណ៥០ម៉ឺនដុល្លរអាមេរិកដើម្បីធ្វើប្រតិបត្តិការ ។
បើតាមលោកវេជ្ជបណ្ឌិតងួន ច័ន្ទភក្ត្រា នាយកមន្ទីរពេទ្យកុមារអង្គរបានមានប្រសាសន៍នៅក្នុងសន្និសីទសារព័ត៌មានកាលពីថ្ងៃទី២១ កុម្ភៈ ២០២៤ ឱ្យដឹងថា សព្វថ្ងៃនេះ មន្ទីរពេទ្យកុមារអង្គរបានទទួលជំនួយពីសប្បុរសជននានាទាំងក្នុងនិងក្រៅប្រទេស ហើយយើងមិនមានអ្នកឧបត្ថម្ភធំណាមួយលើមន្ទីរពេទ្យនោះទេ តែមានប្រជាជនកម្ពុជាដែលបរិច្ចាគថវិកាតាមលទ្ធភាព ខ្លះ១ដុល្លារ២ដុល្លារ ឬតាមរយៈសកម្មភាពសប្បុរសធម៌នានាដែលបង្កើតឡើងដើម្បីកៀរគរថវិកាជួយដល់យើង ។
លោកវេជ្ជបណ្ឌិតបន្តថា ក្នុងរយៈពេល២៥ឆ្នាំកន្លងមកនេះ មន្ទីរពេទ្យកុមារអង្គរបានបោះជំហានយ៉ាងសំខាន់ក្នុងការធ្វើឱ្យប្រសើរឡើងនូវការថែទាំងសុខភាពនៅប្រទេសកម្ពុជា ។ មន្ទីរពេទ្យកុមារអង្គរ ក៏ជាមជ្ឈមណ្ឌលបណ្ដុះបណ្ដាលដ៏ឧត្តុង្គឧត្តមមួយ សម្រាប់មន្ត្រីសុខាភិបាលជំនាន់ក្រោយៗ ។ មន្ទីរពេទ្យកុមារអង្គរ បានបណ្ដុះបណ្ដាលធនធានមនុស្សប្រមាណ ៧៨ម៉ឺននាក់ ដល់និស្សិតវេជ្ជសាស្ត្រ និងមន្ត្រីសុខាភិបាលទាំងក្នុងនិងក្រៅមន្ទីរពេទ្យ ។
បើតាមលោកខេនរ៉ូ អ៊ីស៊ុ ស្ថាបនិកមន្ទីរពេទ្យកុមារអង្គរបានមានប្រសាសន៍ថា ទៅថ្ងៃខាងមុខទៀត លោកអត់ទាន់ដឹងថា តើមន្ទីរពេទ្យនឹងត្រូវប្រគល់ជូនរដ្ឋាភិបាលគ្រប់គ្រងឬយ៉ាងណានោះទេ ស្របនឹងវ័យរបស់លោកក៏កាន់តែចាស់ណាស់ទៅហើយ ដោយបច្ចុប្បន្ននេះ លោកអាយុ៧៥ឆ្នាំហើយ ។
គួរបញ្ជាក់ថា ដើម្បីអបអរសាទរ នៅក្នុងខួប២៥ឆ្នាំនេះ មន្ទីរពេទ្យកុមារអង្គរ នឹងប្រារព្ធ ព្រឹត្តិការណ៍ជាបន្តបន្ទាប់ ដែលមានដូចជាកម្មវិធីជួបជាមួយស្ថាបនិក មន្ទីរពេទ្យកុមារអង្គរ នៅថ្ងៃទី២១ កុម្ភៈ ២០២៤ ។ ពិធីប្រគល់ទទួល ប័ណ្ណសរសើរដល់បុគ្គលិកមន្ទីរពេទ្យកុមារអង្គរ បម្រើការងារយៈពេល២០ឆ្នាំ និង១០ឆ្នាំ នៅថ្ងៃទី ២៤ កុម្ភៈ ។ ជាមួយគ្នានេះដែរ មន្ទីរពេទ្យកុមារអង្គរ នឹងមានយុទ្ធនាការរៃអង្គាសថវិកា ដែលប្រព្រឹត្តិទៅចាប់ពីថ្ងៃទី៤ ដល់ថ្ងៃទី២២ខែមីនា ២០២៤ ដើម្បីរៃអង្គាសមូលនីធិសម្រាប់អភិវឌ្ឍន៍មជ្ឈមណ្ឌលរងរបួសនិងប៉ះទង្គិចធ្ងន់ធ្ងរ ៕
Home ព័ត៌មានសេដ្ឋកិច្ច