កាលពីថ្ងៃទី ១៤ ខែមករា ឆ្នាំ២០២៤នេះ ស្រីស្អាតដែលត្រូវជាតារា TikTok ជនជាតិសិង្ហបុរីម្នាក់បានបង្ហោះនូវវីដេអូមួយដែលរៀបរាប់ពីដំណើរកម្សាន្តរបស់នាង នៅឯផ្សាររាត្រីមួយកន្លែង នាទីក្រុងបាងកក ប្រទេសថៃ។ អ្វីដែលធ្វើឲ្យមានការចាប់អារម្មណ៍ខ្លាំងទៅលើវីដេអូនាង គឺនាងបានធ្វើការដើរភ្សក់សត្វល្អិតបំពងមួយចំនួននៅទីនោះ ដែលបានធ្វើឲ្យនាងចូលមន្ទីរពេទ្រភ្លាមៗតែម្តង។

នៅលើគណនី Tik Tok របស់ស្រីស្អាតរូបនេះដែលមានឈ្មោះថា Nicolette Callie Wee បានដាក់បង្ហោះនូវវីដេអូមួយឃ្លីបរយៈពេល ៣០ វិនាទី ដែលដំបូងឡើយនាងគឺបានបង្ហាញពីសកម្មភាពទិញចង្រិតបំពងមួយថង់ដោយរំភើបនិងភ័យអរ ព្រោះនេះជាលើកទី១ហើយ ដែលនាងមកភ្សក់អ្វីបែបនេះ។ នាងលាន់មាត់ថា «វាធាត់ទ្រលុកទ្រលន់ សុទ្ធតែខ្លាញ់ និងរសជាតិដិត។ ឱព្រះអើយ! ទំពារទៅស្រួយខ្ញោង ដងខ្លួងវាត្រូវបានបែកខ្ចាយនៅពេញមាត់ខ្ញុំយ៉ាងស្រៀវ»។

បន្ទាប់មកស្រីស្អាតម្នាក់នេះ ក៏បានទិញដុកឌឿមកភ្សក់បន្ថែមទៀត ព្រោះថាមើលទៅទំនងពេក។ នាងនិយាយថា “ហេតុអ្វីបានជាប្រទេសខ្ញុំគ្មានមិនមានអាហារសម្រន់ឆ្ងាញ់ៗបែបនេះអ៊ីចឹង?”

ទោះជាយ៉ាងណា បន្ទាប់ពីការភ្សក់រួចមក ប្រព័ន្ធរំលាយអាហាររបស់នាងហាក់ដូចជាមិនអំណោយផលជាមួយនឹងអាហារប្រពៃណីថៃមួយមុខនេះទេ។ ជាលទ្ធផលក៏បានធ្វើឲ្យស្រីស្អាតរូបនេះរាគយ៉ាងខ្លាំង ដែលនៅទីបំផុតធ្វើឱ្យនាងចូលមន្ទីរពេទ្យក្នុងទីក្រុងបាងកកភ្លាមៗតែម្តង។

តាមរយៈវីដេអូដែលនាងបានដាក់បង្ហោះរហូតមកដល់ពេលនេះគឺអ្នកចូលមើលរហូតដល់ជិត ៣០០ ០០០ដងឯណ្ណោះ ព្រមជាមួយនឹងការបញ្ចេញមតិយ៉ាងច្រើនពីអ្នកនិយមលេងបណ្តាញសង្គម។ អ្នកខ្លះក៏បានផ្តល់ដំបូន្មានថា គួរត្រូវតែប្រុងប្រយ័ត្នបន្តិចចំពោះការទទួលទានចំណីអាហារផ្សេងៗនៅអំឡុងពេលធ្វើដំណើរកម្សាន្ត ព្រោះថាអាចនឹងបណ្តាលឲ្យរាគរូស ឬពុលអាហារដោយប្រការណាមួយ នាំឲ្យខាតទាំងពេលវេលានិងដំណើរកម្សាន្តបែបនេះផងដែរ៕

@nicolettecalliewe

based on a true story

♬ original sound – Nicolette Callie Wee – Nicolette Callie Wee

ប្រទេសថៃ ៖ ហេតុការណ៍នេះបានធ្វើឱ្យអ្នកដំណើរនៅតាមផ្លូវភ្ញាក់ផ្អើលយ៉ាងខ្លាំង និងថតវីដេអូបង្ហោះក្នុងបណ្តាញសង្គម ដោយសារមានរថយន្តទំនើប១គ្រឿងបានបើកបរនៅទីក្រុងប៉ាតាយ៉ា ប្រទេសថៃ ដើម្បីនាំសត្វចិញ្ចឹមរបស់ខ្លួនទៅមើលទេសភាព និងស្រូបខ្យល់អាកាសនៅតាមផ្លូវ ។ ប៉ុន្តែសត្វចិញ្ចឹមនេះ មិនមែនជាសត្វចិញ្ចឹមធម្មតាទេ ។

បើតាមវីដេអូឃ្លីបបង្ហាញថា រថយន្តទំនើបនេះបានដឹកសត្វតោ១ក្បាលនៅផ្នែកខាងក្រោយ ដើម្បីឱ្យវាមើលមនុស្សម្នានៅទីក្រុងប៉ាតាយ៉ា ។ គេដឹងថា នៅទីក្រុងប៉ាតាយ៉ា មានមនុស្សម្នាយ៉ាងច្រើន ហើយក៏សម្បូរភ្ញៀវទេសចរបរទេសមកកម្សាន្តផងដែរ ប៉ុន្តែមិនដឹងថា ហេតុអ្វីបានជាម្ចាស់រថយន្តធ្វើបែបនេះ?

ក្រោយមានការបង្ហោះវីដេអូដឹកតោដើរលេងក្នុងទីក្រុងប៉ាតាយ៉ា ធ្វើឱ្យពលរដ្ឋថៃ និងជនបរទេសចែកចាយវីដេអូនេះជាច្រើន ព្រោះវាមិនមែនជាសត្វចិញ្ចឹមធម្មតា ដូចជា សត្វឆ្កែ និងឆ្មាទេ ។ ម្យ៉ាងទៀត ការដឹកតោដើរលេងគ្មានដាក់ទ្រុងបែបនេះអាចបង្កគ្រោះថ្នាក់ដល់អ្នកដទៃទៀតផង ដោយសារម្ចាស់តោបានដឹកវាដើរលេងក្នុងទីប្រជុំជនមានមនុស្សច្រើន ។

បើតាមបុរសម្នាក់មានផ្ទះនៅក្បែរជនបរទេសចិញ្ចឹមតោ លើកឡើងថា ម្ចាស់សត្វតោនេះ គឺជាជនបរទេសបានមករស់នៅទីក្រុងប៉ាតាយ៉ា ខេត្តឈុនបុរី មួយរយៈហើយ ។ រៀងរាល់ល្ងាច ម្ចាស់តោតែងតែបើករថយន្តដឹកវាដើរលេងមួយសន្ទុះសិន ទើបត្រឡប់មកផ្ទះវិញ ។

ក្រោយពីវីដេអូនេះត្រូវបានគេរិះគន់ក្នុងបណ្តាញសង្គម សមត្ថកិច្ចថៃ និងភ្នាក់ងារពាក់ព័ន្ធបានចុះទៅត្រួតពិនិត្យលំនៅឋានមួយកន្លែងក្នុងស្រុកបាងឡាក់ម៉ុង ខេត្តឈុនបុរី ដែលបានចិញ្ចឹមតោខាងលើ និងល្បីល្បាញក្នុងបណ្តាញសង្គម ។ បន្ទាប់មក សមត្ថកិច្ចបានឃើញទ្រុងចំនួន២ សម្រាប់ដាក់សត្វចិញ្ចឹម គឺទ្រុងទី១ មានតោ១ក្បាល រីឯទ្រុងទី២ មានឆ្កែ៣ក្បាល ប៉ុន្តែគ្មានអ្នកណាម្នាក់នៅផ្ទះទេ ។

បើតាមស្ត្រីចំណាស់ម្នាក់ដែលមានផ្ទះនៅក្បែរផ្ទះចិញ្ចឹមតោ រៀបរាប់ប្រាប់សមត្ថកិច្ចថា គាត់បានឃើញជនបរទេសយកតោមកចិញ្ចឹមជាង១ខែហើយ ។ ជារៀងរាល់ល្ងាច ជនបរទេសរូបនេះតែងនាំតោ ព្រមទាំងឆ្កែរបស់ខ្លួន ជិះឡានដើរលេងនៅម្តុំឆ្នេរសមុទ្រ ។

សមត្ថកិច្ចលើកឡើងថា តាមរយៈការត្រួតពិនិត្យជំហានដំបូងឃើញថា តោ១ក្បាលនេះបានចុះឈ្មោះចិញ្ចឹមនៅខេត្តរាជបុរី និងមានម្ចាស់ជានារីថៃ ។ ហេតុនេះ សមត្ថកិច្ចបានទំនាក់ទំនងទៅនារីថៃខាងលើឱ្យធ្វើដំណើរមកខេត្តឈុនបុរី ដើម្បីត្រួតពិនិត្យឯកសារចិញ្ចឹមតោឱ្យបានច្បាស់លាស់ ។

សមត្ថកិច្ចសន្និដ្ឋានថា ជនបរទេសដែលដឹកតោដើរលេងនៅតាមទីប្រជុំជននោះ គឺជាជនជាតិស្រីលង្ការ ហើយរថយន្តទំនើបដែលជនបរទេសជិះ គឺជារថយន្តជួលមកពីខេត្តភូកេត ។ រីឯសត្វតោដែលត្រូវគេរិះគន់ក្នុងបណ្តាញសង្គមនេះ គឺជាតោញី មានអាយុប្រមាណ៤ខែ ៕

បរទេស៖ ចំនួនប្រជាជនវ័យចំណាស់កាន់តែច្រើន និងអត្រាកំណើតទាបកំពុងបង្ខំឱ្យប្រទេសជប៉ុនប្រើមនុស្សយន្ត AI និងមនុស្សនិម្មិតនៅកន្លែងធ្វើការ។ នេះបើយោងតាមវិទ្យាស្ថានជ្រើសរើសការងាររបស់ប្រទេសជប៉ុន (RWI) ដែលបានរាយការណ៍កាលពីថ្ងៃទី២៣ ខែមករា ឆ្នាំ២០២៤។

លោក Shoto Furuya ប្រធានផ្នែកស្រាវជ្រាវនៅប្រទេសជប៉ុន បាននិយាយថា បច្ចុប្បន្នប្រទេសនេះមានការខ្វះខាតកម្លាំងពលកម្មយ៉ាងខ្លាំង ដោយមិនគិតថាតើសេដ្ឋកិច្ចដំណើរការល្អឬអត់។ យោងតាម RWI ប៉ាន់ប្រមាណថា ប្រទេសជប៉ុននឹងខ្វះខាតកម្មករចំនួន ១១ លាននាក់នៅឆ្នាំ ២០៤០ ហើយចំនួនមនុស្សដែលមានអាយុលើសពី ៦៥ ឆ្នាំបច្ចុប្បន្នមានជិត ៣០% នៃចំនួនប្រជាជន។

ថ្មីៗនេះ មានសញ្ញាជាច្រើនបង្ហាញថាប្រទេសនេះកំពុងប្រឈមនឹងវិបត្តិការងារ។ ផ្លូវរថភ្លើងកណ្តាលរបស់ប្រទេសជប៉ុនលែងមានរទេះអាហារនៅលើរថភ្លើងតូក្យូ-អូសាកាចាប់តាំងពីខែតុលាមក ហើយម៉ាស៊ីនលក់នៅទូទាំងប្រទេសមិនត្រូវបានផ្ទុកទំនិញអស់ជាច្រើនថ្ងៃមកហើយ។ វិធីមួយក្នុងចំណោមវិធីដែលប្រទេសនេះបានដាក់ពង្រាយដើម្បីដោះស្រាយបញ្ហាប្រឈមគឺការនាំយកបច្ចេកវិទ្យាចូលទៅក្នុងជីវិត។ ជាពិសេស AI មនុស្សយន្ត និងមនុស្សនិម្មិត គឺជាកម្លាំងពលកម្មដ៏មានសក្តានុពលនៅក្នុងវិស័យសំខាន់ៗចំនួនបួនគឺ សំណង់ ការដឹកជញ្ជូន កសិកម្ម និងការលក់រាយ។

ឧស្សាហកម្មសំណង់ក្នុងប្រទេសជប៉ុនបច្ចុប្បន្នមានការលំបាកក្នុងការទាក់ទាញកម្មករវ័យក្មេង និងស្ត្រី ដោយសារម៉ោងធ្វើការយូរ ពលកម្មដោយដៃធ្ងន់ និងប្រាក់ឈ្នួលទាប។ នេះបើយោងតាមក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ចំនួនមនុស្សធ្វើការក្នុងវិស័យនេះ បច្ចុប្បន្នមានកម្មករត្រឹមតែ ៤.៨ លាននាក់ ធ្លាក់ចុះ ៣០% បើធៀបនឹងកម្រិតកំពូលក្នុងឆ្នាំ ១៩៩៧។

រីឯនៅក្នុងវិស័យដឹកជញ្ជូនតាមផ្លូវគោក ប្រទេសនេះមានការព្រួយបារម្ភថា កង្វះកម្លាំងពលកម្មអាចនាំឱ្យមានការធ្លាក់ចុះនៃគុណភាពនៃសេវាកម្មសំខាន់ៗ។ នេះគឺធ្ងន់ធ្ងរជាពិសេស ដោយសារចំនួនប្រជាជនជប៉ុនដែលមានអាយុលើសពី ៦៥ ឆ្នាំត្រូវបានគេព្យាករណ៍ថានឹងកើនឡើងដល់ ២០៤២។

សម្រាប់វិស័យកសិកម្មវិញ ប្រទេសជប៉ុនកំពុងដើរលើផ្លូវឆ្ពោះទៅរកការផលិតផលិតផលឱ្យបានគ្រប់គ្រាន់ដោយខ្លួនឯង ប៉ុន្តែមិនមានកម្មករគ្រប់គ្រាន់ កំពុងធ្វើឱ្យគោលដៅនេះកាន់តែពិបាកសម្រេច។ ទោះជាយ៉ាងណាក៏ដោយ កសិករនៅទីនេះក៏កំពុងចាប់ផ្តើមអនុវត្តមនុស្សយន្ត និងស្វ័យប្រវត្តិកម្មក្នុងការផលិតផងដែរ។
ចំណែកឯនៅក្នុងវិស័យលក់រាយវិញ កង្វះកម្លាំងពលកម្មធ្វើឱ្យប្រទេសជប៉ុនសម្លឹងមើលមនុស្សនិម្មិត និងជម្រើស AI កាន់តែច្រើន។ ដោយលោក Shogo Nishiguchi នាយកប្រតិបត្តិនៃក្រុមហ៊ុន Avita មានបំណងដាក់ពង្រាយមនុស្សនិម្មិតចំនួន ១០០,០០០ នាក់នៅទូទាំងហាងនៅឆ្នាំ ២០៣០។

នេះបើយោងតាម Nikkei បានឱ្យដឹងទៀតថា តម្រូវការមនុស្សយន្តរបស់ប្រទេសជប៉ុនបច្ចុប្បន្នមានទំហំធំណាស់ ដោយក្រុមហ៊ុនមួយចំនួនបានកំពុងប្រើប្រាស់ប្រព័ន្ធម៉ាស៊ីនដែលផលិតក្នុងស្រុក ប៉ុន្តែទោះជាយ៉ាងណាម៉ាស៊ីនភាគច្រើនដែលជប៉ុនប្រើប្រាស់ ត្រូវបាននាំចូលពីប្រទេសចិន៕

ទំព័រហ្វេសប៊ុកថៃឈ្មោះ «Kanha-កញ្ញា» បានលើកឡើងថា មានជនជាតិខ្មែរម្នាក់បានសរសេរក្នុងបណ្តាញសង្គមថា យាយម៉ូ មានស្រុកកំណើតនៅប្រទេសកម្ពុជា ហើយអង្វរឱ្យជនជាតិថៃឈប់លាក់បាំងការពិត ។ ក្រោយពីការសរសេរបែបនេះធ្វើឱ្យជនជាតិថៃជាច្រើននាក់រិះគន់ថា ការលើកឡើងនេះមិនត្រឹមត្រូវទេ ព្រោះប្រទេសថៃបានសាងសង់រូបសំណាកយាយម៉ូ នៅខេត្តស៊ីសាកេត ដើម្បីឱ្យកូនចៅថៃបានគោរព និងដឹងគុណលោកយាយដែលបានតស៊ូក្នុងសង្គ្រាមការពារប្រទេសថៃ ។

ទំព័រហ្វេសប៊ុកនេះបន្តថា យោងតាមការអះអាងមួយនិយាយថា កម្ពុជា គឺជាចំណុចកណ្តាលរបស់ចក្រវាឡ ហើយការអះអាងបែបនេះមិនមែនជាការពិតទេ ពីព្រោះវាបានក្លាយជាប្រធានបទនៅក្នុងបណ្តាញសង្គមម្តងទៀត ក្រោយពីជនជាតិខ្មែរម្នាក់លើកឡើងពីប្រវត្តិសាស្ត្រក្នុងបណ្តាញសង្គម រហូតធ្វើឱ្យអ្នកលេងបណ្តាញសង្គមចូលបញ្ចេញមតិ ។

ជនជាតិខ្មែររូបនេះបានសរសេរក្នុងបណ្តាញសង្គមថា ៖ «លោកយាយម៉ូ ជាជនជាតិខ្មែរ មានសាច់ញាតិនៅស្រុកសំរោងចុងកាល់ ខេត្តឧត្តរមានជ័យ រហូតមកដល់សព្វថ្ងៃនេះ ។ ប្តីគាត់ធ្វើជាមន្ត្រីនៅខេត្តនគរាជសីមា ។ នៅពេលស្តេចលាវឈ្មោះ ព្រះចៅអនុវង្ស បានលើកទ័ពលាវវាយលុកចូលមកដល់ខេត្តនគរាជ យាយម៉ូ បាននាំពួកស្រីបញ្ចុកបន្ស៊ីពួកកងទ័ពលាវឱ្យស្រវឹង ហើយពួកកងទ័ពសៀមក៏បានវាយឈ្នះពួកលាវនៅពេលនោះទៅ ។ ស្តេចលាវឈ្មោះ ព្រះចៅអនុវង្ស ត្រូវពួកសៀមចាប់បានដាក់ទ្រុងដែកនាំយកមកថ្វាយស្តេចសៀម រាមាទី៣ នៅក្រុងបាងកក នៅឆ្នាំ១៨២៨ ហើយក៏សម្លាប់ចោលបាត់ទៅ ។ ក្រោយមក ម៉ែម៉ូ នេះ ត្រូវបានគេលើកតម្កើងជាវរនារីរបស់សៀម តរៀងមក ។ ឯស្តេចលាវវិញ ក៏ត្រូវបានពួកលាវកសាងរូបសំណាកនៅក្រុងវៀងច័ន្ទ ថា ជាវីរនារីលាវតរៀងមកដែរ» ។

ទំព័រហ្វេសប៊ុក «Kanha-កញ្ញា» និយាយថា ក្រោយពីជនជាតិខ្មែរខាងលើបានសរសេរបែបនេះក្នុងបណ្តាញសង្គម ធ្វើឱ្យអ្នកលេងបណ្តាញសង្គមជាច្រើននាក់ចូលមកបញ្ចេញមតិ ក្នុងនោះជនជាតិថៃម្នាក់និយាយថា ៖ «សូមក្រាបអរព្រះគុណយ៉ាងខ្ពស់ ដែលចាំគាំទ្រប្រទេសថៃរហូត» ។ ជនជាតិថៃម្នាក់ទៀតថា ៖ «យកពេលវេលាទៅស្រាវជ្រាវប្រវត្តិសាស្ត្រខ្លួនឯងទៅ ល្អទេ? ដើម្បីឱ្យជីវិតរីកចម្រើនជាងនេះ ។ អ្នករស់នៅខេត្តកូរ៉ាជ គឺជាកូនចៅយាយម៉ូ យើងមិនមែនជាខ្មែរទេ» ។

រីឯពលរដ្ឋខ្មែរថា ៖ «គ្មានប្រភពច្បាស់លាស់យកមកផុសផ្តេសផ្តាស ធ្វើឱ្យឱនភាពដល់ប្រជាជនកម្ពុជាទូទាំងប្រទេស ។ ខ្ញុំឃើញផេករបស់សៀមលើកយកមកផុសបង្អាប់ បន្ថោកដល់ប្រជាជនខ្មែរទូទាំងប្រទេស ដោយសារលោកឯងគ្មានប្រភពច្បាស់លាស់យកទៅផុស ដែលធ្វើឱ្យគេមើលងាយដល់ប្រទេសកម្ពុជា ។ កុំចង់បានឡាយពេក គិតដល់កិត្តិយសរបស់ជាតិផង» ។

ជនជាតិថៃម្នាក់និយាយថា ៖ «រូបសំណាកអនុស្សាវរីយ៍នេះស្ថិតនៅស្រុកមឿង ខេត្តនគរាជសីម៉ា ឬខេត្តកូរ៉ាជ ប្រទេសថៃ ។ យាយម៉ូ ស្លាប់ព្រោះតស៊ូក្នុងសង្គ្រាមដើម្បីការពារប្រទេសសៀម ។ យាយមិនមែនជាខ្មែរទេ បើទំនេរ មកមើលដោយខ្លួនឯងបាន» ។

ជនជាតិថៃម្នាក់ទៀតថា ៖ «មុនពេលអ្នកបង្ហោះអ្វីនៅលើអ៊ីនធើរណេតពាក់ព័ន្ធនឹងវប្បធម៌ និងប្រពៃណី ខ្ញុំសង្ឃឹមថា អ្នកនឹងត្រួតពិនិត្យយ៉ាងល្អិតល្អន់ ដើម្បីចៀសវាងការយល់ខុស ឬយល់ច្រឡំផ្សេងៗដល់ក្មេងជំនាន់ក្រោយរបស់កម្ពុជា ។ ខ្ញុំសូមផ្ញើក្តីស្រឡាញ់ពីប្រទេសថៃដល់អ្នក» ។

ជនជាតិថៃម្នាក់ទៀតថា ៖ «មិនបាច់ចាប់អារម្មណ៍ខ្មែរទេ បណ្តោយវាចុះ ។ ប្រកែកគ្នានាំតែខាតពេលវេលារកស៊ីទទេៗ ។ ការពិត គឺការពិត វាដូចអ៊ីអ្នកជិតខាងផ្ទះអីចឹង មួយថ្ងៃៗចង់តែបានរបស់អ្នកដទៃ» ៕

ប្រទេសចិន៖ ប្រទេសចិនបានសាងសង់អគារខ្ពស់កប់ពពកចំនួន ៥៧ ជាន់ ដោយប្រើបច្ចេកវិទ្យាកំពូលជាច្រើន ដែលធ្វើឱ្យពិភពលោកមានការភ្ញាក់ផ្អើលយ៉ាងខ្លាំង។
កាលពីថ្ងៃទី២០ ខែមករា ឆ្នាំ២០២៤ យោងតាមគេហទំព័រអន្តរជាតិមួយបានឱ្យដឹងថា ប្រទេសចិនបានធ្វើឱ្យពិភពលោកភ្ញាក់ផ្អើលយ៉ាងខ្លាំងជាមួយនឹងការអភិវឌ្ឍន៍សេដ្ឋកិច្ច វិទ្យាសាស្ត្រ និងបច្ចេកវិទ្យានៅក្នុងប្រទេស ដោយទីក្រុងនានាកំពុងត្រូវបានសាងសង់យ៉ាងឆាប់រហ័ស ជាពិសេសអគារខ្ពស់ៗដែលត្រូវការពេលវេលាច្រើនក្នុងការសាងសង់។

ទោះជាយ៉ាងណា ល្បឿនដែលចិនសាងសង់អគារកម្ពស់ ៥៧ ជាន់ក្នុងរយៈពេល ១៩ ថ្ងៃបានធ្វើឱ្យពិភពលោកភ្ញាក់ផ្អើលខ្លាំង។ អគារនេះត្រូវបានគេហៅថា Mini Sky City ដែលមានទីតាំងនៅខេត្ត Hunan ប្រទេសចិន និងមានផ្ទៃដីសរុប ១៨០,០០០ m2 អាចផ្ទុកមនុស្សបាន ៤,០០០ នាក់ រួមជាមួយផ្ទះល្វែង និងការិយាល័យចំនួន ៨០០ ក៏ដូចជាមានភាពធន់នឹងការរញ្ជួយដីកម្រិត ៩.០ រិចទ័រនៅលើមាត្រដ្ឋាន Richter ផងដែរ។

អាស្រ័យហេតុនេះ ក្រុមហ៊ុនចិនមួយបានសាងសង់អគារនេះជាមួយនឹងប្លុក prefabricated ដោយបានរៀបចំជាមុន ៩០% នៃរចនាសម្ព័ន្ធអគារនៅខាងរោងចក្រ ហើយនៅសល់ ១០% ត្រូវបានចាប់ផ្តើម និងដំឡើងនៅខាងក្រៅ។ ដំបូងឡើយ ក្រុមហ៊ុន Broad Sustainable Building Company គ្រោងនឹងសាងសង់អគារនេះមានកម្ពស់ ៩៧ ជាន់ ប៉ុន្តែក្រោយមកត្រូវបានបង្ខំឱ្យបន្ទាបវាមកត្រឹម ៥៧ ជាន់វិញ ដោយសារទីតាំងនៅជិតព្រលានយន្តហោះ។

គួររំលឹកផងដែរថា ល្បឿនសាងសង់របស់អគារបានឈានដល់កម្រិតកំណត់ត្រាមួយជាមួយនឹងការបញ្ចប់ ៣ ជាន់ក្នុងមួយថ្ងៃ។ កម្មករប្រមាណ ១.២០០ នាក់ត្រូវបានកេណ្ឌឱ្យធ្វើការពេញសមត្ថភាពទាំងយប់ទាំងថ្ងៃ ដោយអគារនេះប្រើប្រាស់រចនាសម្ព័ន្ធដំឡើងតាមបែប Lego ជាមួយនឹងប្លុក prefabricated ដែលអាចកាត់បន្ថយតម្រូវការក្នុងការចល័តរថយន្តលាយបេតុងចំនួន ១៥,០០០ ហើយទម្រង់នេះនឹងបញ្ចេញធូលីស្ទើរតែគ្មានចូលទៅក្នុងបរិស្ថាន។ ជញ្ជាំងខាងក្រៅរបស់អគារប្រើប្រាស់បច្ចេកវិទ្យាប្លែកៗជាច្រើន ដែលជួយសន្សំសំចៃថាមពលបាន ៨០% បើធៀបនឹងអគារធម្មតា។

វិស្វករ Chen Xiangqian ដែលចូលរួមក្នុងការសាងសង់អគារនេះ បាននិយាយថា “ប្រសិនបើធ្វើតាមវិធីបុរាណ មនុស្សត្រូវសាងសង់ឥដ្ឋនីមួយៗដើម្បីបង្កើតអគារខ្ពស់មួយ ហើយត្រូវចំណាយពេល ២ ឆ្នាំដើម្បីបញ្ចប់ ប៉ុន្តែនៅពេលដែលយើងប្រើប្រាស់ជាមួយនឹងវិធីសាស្រ្តថ្មីនោះ ការសាងសង់នឹងអាចបញ្ចប់ក្នុងរយៈពេល ១៩ ថ្ងៃប៉ុណ្ណោះ”។

ជាពិសេស ដើម្បីសាងសង់គម្រោងនេះ ប្រទេសចិនបានប្រើប្រាស់ម៉ាស៊ីនសាងសង់លើអាកាស ដែលជាវេទិកាឧបករណ៍មេកានិចដែលរួមបញ្ចូលគ្នានូវបច្ចេកវិទ្យាគ្រប់គ្រងខ្នាតធំ និងឆ្លាតវៃ។ បច្ចេកវិទ្យាដែលគាំទ្រដោយសំណង់នេះត្រូវបានបង្កើតឡើងដោយឯករាជ្យនៅក្នុងប្រទេសចិន។ ទន្ទឹមនឹងនោះ គុណសម្បត្តិនៃបច្ចេកវិទ្យាសាងសង់អគារ Mini Sky City គឺការការពារបរិស្ថាន ភាពត្រឹមត្រូវខ្ពស់ និងពេលវេលាសាងសង់ដ៏ល្អឥតខ្ចោះ៕