កាមេរ៉ា ដែលលាក់ជាធម្មតាមានទំហំតូចណាស់ ហើយអាចលាក់ទុកនៅក្នុងបន្ទប់សណ្ឋាគារ ឬផ្ទះសំណាក់សូម្បីតែរន្ធតូចមួយនៅក្នុងជញ្ជាំងក៏ដោយ។ នៅពេលដែលយើងទៅដើរលេង ឬទៅទស្សនាកន្លែងនានា ពិតណាស់ប្រាកដជាត្រូវជួលបន្ទប់សណ្ឋាគារ ឬបន្ទប់ក្នុងផ្ទះសំណាក់ដើម្បីសម្រាក ប៉ុន្តែយើងមិនដឹងទេថា តើបន្ទប់ទាំងនោះមានបង្កប់កាមេរ៉ាដែរ ឬយ៉ាងណា? ដូច្នេះដើម្បីការពារ ក៏ដូចជាស្វែងរកកាមេរ៉ាដែលលាក់នៅក្នុងសណ្ឋាគារ ឬផ្ទះសំណាក់ អ្នកជំនាញបានណែនាំវិធី ៤ យ៉ាងដូចខាងក្រោម៖

១.ប្រើភ្នែកទទេ៖ ដំបូង អ្នកជំនាញប្រើភ្នែករបស់ពួកគេដើម្បីស្វែងរកកាមេរ៉ាដែលលាក់នៅក្នុងទីតាំងដែលទំនងជាត្រូវបានដំឡើង ដូចជានាឡិការោទិ៍លើតុ ព្រីភ្លើង និងភ្លើងអគ្គិសនីជាដើម។ នៅពេលនោះអ្នកជំនាញបានមើលជុំវិញបន្ទប់ ដោយដំបូងឡើយឃើញថាគ្មានអ្វីចម្លែកទេ។ ក្រោយការស្រាវជ្រាវអស់ ២០ នាទី គាត់ក៏បានរកឃើញកាមេរ៉ាមួយជាប់ក្នុងនាឡិកា ព្រោះនាឡិកាបង្ហាញម៉ោងខុស។

២.ប្រើទូរស័ព្ទដៃ៖ អ្នកជំនាញបានទាញយកកម្មវិធីមួយដែលមានឈ្មោះថា Fing ដែលកម្មវិធីនេះ អាចជូនដំណឹងថាមានកាមេរ៉ាលាក់នៅក្នុងបន្ទប់ ឬមិនមាន ប៉ុន្តែមិនអាចបង្ហាញទីតាំងបានទេ។ ដូច្នេះអ្នកជំនាញបានបើកពិលទូរស័ព្ទរួចរកមើលជុំវិញបន្ទប់ គាត់ក៏បានរកឃើញកាមេរ៉ាចំនួន ៣ ដែលលាក់នៅក្នុងឧបករណ៍ដំឡើង wifi និងបង្កប់នៅក្នុងភ្នែករបស់តុក្កតាខ្លាឃ្មុំ។

៣.ប្រើឧបករណ៍រាវរក៖ ឧបករណ៍រាវរក ឬឧបករណ៍ចាប់ប្រេកង់នឹងរោទិ៍នៅពេលដែលដាក់វាជិតកាមេរ៉ា ប៉ុន្តែវិធីសាស្ត្រនេះមានប្រសិទ្ធភាពនៅពេលដែលកាមេរ៉ាត្រូវបានភ្ជាប់ទៅ wifi ប៉ុណ្ណោះ។ អ្នកជំនាញបាននិយាយថា “ឧបករណ៍ចាប់សញ្ញាមិនអាចរកឃើញប្រសិនបើកាមេរ៉ាប្រើកាតមេម៉ូរីដើម្បីរក្សាទុកទិន្នន័យជំនួសឱ្យការភ្ជាប់វ៉ាយហ្វាយ”។ លើសពីនេះ ឧបករណ៍រាវរកក៏បានរាយការណ៍មិនត្រឹមត្រូវពីរបីដងផងដែរ។

៤.ប្រើឧបករណ៍ចាប់កញ្ចក់៖ ឧបករណ៍នេះនឹងបញ្ចេញពន្លឺអ៊ីនហ្វ្រារ៉េដ ដែលឆ្លុះបញ្ចាំងពីកញ្ចក់កាមេរ៉ា និងបង្ហាញចំណុចក្រហម។ វាត្រូវបានដំណើរការពីចម្ងាយ ដែលអនុញ្ញាតឱ្យអ្នកជំនាញមើលឃើញកាមេរ៉ាពីទូទាំងបន្ទប់តែម្តង។ ភ្លាមនោះអ្នកជំនាញក៏បានរកឃើញកាមេរ៉ាចំនួន ១១ នៅក្នុងបន្ទប់សណ្ឋាគាររបស់គាត់ ដោយគាត់រកឃើញកាមេរ៉ានេះនៅក្នុងប្រអប់ជាលិកា សំណាញ់វ៉ាយហ្វាយ កាបូបស្បែក និងមួយទៀតក្នុងចំណោមឯកសារនៅក្រោមតុ។

គួរបញ្ជាក់ដែរថា អ្នកជំនាញបានរកឃើញកាមេរ៉ាទាំងអស់ចំនួន ១៧ ក្នុងចំណោម ២៧ បន្ទប់ដែលគាត់បានកក់នៅក្នុងសណ្ឋាគារ និងផ្ទះសំណាក។ ហេតុនេះហើយ អ្នកដែលចូលចិត្តដើរផ្សងព្រេងម្នាក់ឯងគួរតែមានការប្រុងប្រយ័ត្នឱ្យបានខ្ពស់ និងគួរតែយល់ដឹងពីរបៀបនៃការស្វែងរកកាមេរ៉ាដែលបង្កប់នៅក្នុងសណ្ឋាគារ ឬផ្ទះសំណាក់ផងដែរ៕

កូរ៉េខាងត្បូង៖ ពិធីបុណ្យស្ទូចត្រីទឹកកក នៅកូរ៉េខាងត្បូង ទាក់ទាញភ្ញៀវទេសចរ មកកំសាន្ត បានច្រើនជាង១លាននាក់ចូលរួម និងរកចំណូលជាង ៧០លានដុល្លារ ត្រឹមរយៈពេលតែ១៥ថ្ងៃប៉ុណ្ណោះ។

កាលពីថ្ងៃទី២១ ខែមករា ឆ្នាំ២០២៤ អ្នករៀបចំពិធីបុណ្យទឹកកក Hwacheon Sancheoneo បាននិយាយថា នៅក្នុងពិធីបុណ្យស្ទូចត្រីទឹកកកនោះមានអ្នកទស្សនាចំនួន ១.០២ លាននាក់បានចូលរួមក្នុងរយៈពេល ១៥ ថ្ងៃកន្លងមកនេះ ជាមួយនឹងភ្ញៀវបរទេសប្រហែល ៣៩,០០០ នាក់។

ពិធីបុណ្យប្រចាំឆ្នាំនេះចាប់ផ្តើមនៅថ្ងៃទី ៦ ខែមករា មានរយៈពេល ២៣ ថ្ងៃនៅក្នុងទីក្រុង Hwacheon ដែលជាទីក្រុងភ្នំក្នុងខេត្ត Gangwon ចម្ងាយ ៩០ គីឡូម៉ែត្រភាគឦសាននៃទីក្រុងសេអ៊ូល និងប្រហែល ២៥ គីឡូម៉ែត្រភាគខាងត្បូងនៃព្រំដែនអន្តរកូរ៉េ។ អ្នកទេសចរបានមកចាប់ត្រីសាម៉ុង Sancheoneo តាមរន្ធដែលកាត់នៅផ្ទៃទន្លេដែលកក ក្រៅពីការនេសាទត្រី salmon អ្នកទស្សនាក៏អាចស្នាក់នៅដើម្បីជិះស្គី សាកល្បងសំលៀកបំពាក់ប៉េងប៉ោង ទស្សនាស្តង់ដែលទាក់ទងនឹងវិទ្យាសាស្ត្រ លេងបាល់ទាត់ទឹកកក និងមើលការបង្ហាញវប្បធម៌រដូវរងាជាសកលជាដើម។

ដូច្នេះហើយ នៅដើមឆ្នាំ២០២៤ ទីក្រុងនេះបានបើកតំបន់រូបចម្លាក់ទឹកកកក្នុងផ្ទះ ដែលសាងសង់ឡើងដោយមានជំនួយពីអ្នកជំនាញមកពីទីក្រុង Harbin ប្រទេសចិន។ ក្រៅពីនេះក៏មានទីលានវាយកូនហ្គោលដែលមានកីឡាករមកពីប្រទេសហ្វាំងឡង់ស្លៀកពាក់ជាសាន់តាក្លូសផងដែរ។ ក្នុងឆ្នាំ ២០១១ ទីភ្នាក់ងារសារព័ត៌មាន CNN បានចុះបញ្ជីពិធីបុណ្យនេះថាជាអច្ឆរិយៈរដូវរងាមួយក្នុងចំណោម ៧ អច្ឆរិយៈនៃពិភពលោក។ នៅដើមឆ្នាំ ២០២៤ កាសែត The New York Times បានហៅព្រឹត្តិការណ៍ប្រពៃណីនៅទីក្រុង Hwacheon ថាជាពិធីបុណ្យមួយក្នុងចំណោមពិធីបុណ្យទាំង ៥ ដែលត្រូវតែទៅទស្សនានៅអាស៊ីក្នុងរដូវរងារ។

មហោស្រព Hwacheon បានធ្វើឡើងជាលើកដំបូងក្នុងឆ្នាំ ២០០៣ ហើយបានឈានដល់អ្នកទស្សនាមួយលាននាក់ក្នុងឆ្នាំ ២០០៦។ នៅឆ្នាំ ២០២៤ វិញគឺជាឆ្នាំទី ១៥ ដែលព្រឹត្តិការណ៍នេះត្រូវបានប្រារព្ធឡើង។ ដោយមន្ត្រី Hwacheon បាននិយាយថា ពិធីបុណ្យទឹកកកនេះបានអភិវឌ្ឍទៅជាក្បាលម៉ាស៊ីនសេដ្ឋកិច្ចក្នុងស្រុក ដែលបង្កើតឥទ្ធិពលសេដ្ឋកិច្ចដោយផ្ទាល់ជាង ១០០ ពាន់លានវ៉ុន (ប្រមាណ ៧៤.៩ លានដុល្លារ) ជារៀងរាល់ឆ្នាំ៕

Elon Musk គឺជាមហាសេដ្ឋីពិភពលោកដែលមានទ្រពសម្បត្តិច្រើនជាងគេបំផុតនាពេលបច្ចុប្បន្ននេះ។ គាត់គឺជាស្ថាបនិក ប្រធាននាយកប្រតិបត្តិ និង CTO នៃ SpaceX; Tesla និងក្រមហ៊ុនជាច្រើនទៀត…។ នៅក្នុងបទសម្ភាសន៍ជាមួយ The New York Time លោក Elon Musk បានចែករំលែកថា មុននឹងគាត់ក្លាយជាមហាសេដ្ឋីពិភពលោក គាត់បានអានសៀវភៅចំនួនបួនក្បាលនេះ។

១.សៀវភៅ Foundation៖ នៅក្នុងបទសម្ភាសន៍មួយ Elon Musk ធ្លាប់បាននិយាយថា ជាទូទៅគាត់ចូលចិត្តអាចសៀវភៅ Foundation ខ្លាំងណាស់។ សៀវភៅនេះគឺនិយាយអំពីវិទ្យាសាស្ត្របែបបុរាណ និងប្រឌិតដែលសរសេរដោយអ្នកនិពន្ធ Isaac Asimov គឺជាអ្នកនិពន្ធវិទ្យាសាស្ត្រដ៏អស្ចារ្យបំផុតរបស់គាត់។ រហូតមកដល់បច្ចុប្បន្ន សៀវភៅនេះមានឥទ្ធិពលយ៉ាងធំធេងលើការប្រឌិតបែបវិទ្យាសាស្ត្រតាមរយៈគំនូរចក្រភព Galactic ហើយជារឿងដែលបានបំផុសគំនិតនៃស៊េរីបុរាណផ្សេងទៀតដូចជា Dune និង Star Wars ជាដើម។

២.សៀវភៅ The Lord of the Rings៖ The Lord of the Rings គឺជាសៀវភៅដែលបានបោះពុម្ពពីឆ្នាំ ១៩៥៤-១៩៥៥ ត្រូវបានបែងចែកទៅជា ៦ សៀវភៅ ដែលនិយាយអំពីឆ្នាំដ៏អស្ចារ្យនៃ Middle-earth ក្នុងសង្រ្គាមប្រឆាំងនឹងស្តេចងងឹត Sauron នៃប្រជាជនធម្មជាតិ និងការវិលត្រឡប់មកវិញរបស់ស្តេច។ សៀវភៅនេះទទួលបានជោគជ័យយ៉ាងខ្លាំង ដែលវាត្រូវបានបង្កើតជាខ្សែភាពយន្តដែលមានឈ្មោះដូចគ្នា និងទទួលបានការគាំទ្រពីអ្នកគាំទ្រជាច្រើន ក៏ដូចជាទទួលបានពានរង្វាន់ដ៏ថ្លៃថ្នូជាច្រើនផងដែរ។

៣.សៀវភៅ The Moon Is a Harsh Mistress៖ The Moon Is a Harsh Mistress គឺជាសៀវភៅដែលនិពន្ធដោយជនជាតិអាមេរិក Robert A ប្រាប់អំពីការបះបោរនៃអាណានិគមនៅលើព្រះច័ន្ទប្រឆាំងនឹងអ្នកគ្រប់គ្រងពីផែនដី។ ប្រលោមលោកនេះបង្ហាញ និងពិភាក្សាអំពីឧត្តមគតិនៃលទ្ធិសេរីនិយម ហើយត្រូវបានគេសរសើរចំពោះការបង្ហាញដ៏ល្អឥតខ្ចោះរបស់វាអំពីសង្គមមនុស្សនាពេលអនាគតដែលស្រមៃនៅលើផែនដី និងព្រះច័ន្ទ។ នេះក៏ជាប្រភេទសៀវភៅដែល Musk ស្រឡាញ់ និងស័ក្តិសមនឹងការស្រមៃរបស់គាត់។

៤.សៀវភៅ Stranger in a Strange Land៖ គឺជាប្រលោមលោកដ៏ល្បីល្បាញរបស់អ្នកនិពន្ធជនជាតិអាមេរិក Robert A. Heinlein ដែលបានចេញផ្សាយក្នុងឆ្នាំ ១៩៦១ និង ១៩៦៦ រៀងៗខ្លួន។ Stranger in a Strange Land ប្រាប់ពីរឿងរបស់ Valentine Michael Smith ដែលកើតនៅលើភពអង្គារ និងធំឡើងដោយ Martians បានមកផែនដីកាលពីនៅក្មេង ហើយបានរកឃើញទំនាក់ទំនងរបស់គាត់ទៅនឹងការផ្លាស់ប្តូរចុងក្រោយនៃវប្បធម៌ Terran (ផែនដី)។

គួរបញ្ជាក់ដែរថា ក្នុងចំណោមការងារទាំងអស់ដែល Elon Musk កាន់កាប់និងគ្រប់គ្រងដោយជោគជ័យបំផុតនោះគឺការងារបែបវិទ្យាសាស្ត្រ។ គាត់មានក្តីសុបិន្តនៃយានអវកាស និងការធ្វើដំណើរក្នុងលំហរតាំងពីនៅក្មេងមកម្លេះ ដូច្នេះសៀវភៅដែលធ្វើឱ្យគាត់ជោគជ័យគឺសៀវភៅដែលទាក់ទងនិងវិទ្យាសា្រស្ត្រអវកាស៕

ប្រទេសថៃ ៖ កាលពីថ្ងៃទី២២ ខែមករា ឆ្នាំ២០២៤ សារព័ត៌មានថៃឈ្មោះ «ខាវឆងវ៉ាន់» រាយការណ៍ថា មានក្រុមយុវជនអាយុចាប់ពី១៣ឆ្នាំ ទៅ១៥ឆ្នាំ ប្រើប្រាស់កាំបិតដេញកាប់ភ្ញៀវទេសចរបរទេសក្នុងគោលបំណងប្លន់ប្រាក់ ។ រីឯភ្ញៀវទេសចរដែលរងនូវអំពើហិង្សាពីយុវជន គឺទើបតែបានមកកម្សាន្តនៅប្រទេសថៃត្រឹម២សប្តាហ៍ប៉ុណ្ណោះ ។

បើតាមវីដេអូឃ្លីបបង្ហាញថា ពួកយុវជនបានជិះម៉ូតូដេញកាប់ភ្ញៀវទេសចរបរទេសនៅវេលាម៉ោង៣ទៀបភ្លឺ ហើយករណីនេះមិនមែនទើបតែកើតឡើងលើកដំបូងទេ ។ ហេតុការណ៍យុវជនយកកាំបិតមកកាប់ភ្ញៀវទេសចរដើម្បីប្លន់ទ្រព្យសម្បត្តិនេះ កើតឡើងនៅតំបន់ប៉ាតាយ៉ាខាងត្បូង ។

អ្នកឃើញហេតុការណ៍លើកឡើងថា ដោយសារភ្ញៀវទេសចរបរទេសតបតវិញ ទើបយុវជនទាំងនេះយកកាំបិតដេញកាប់ ប៉ុន្តែអ្នកឃើញហេតុការណ៍បាននាំគ្នាមកជួយជនបរទេស ទើបក្រុមយុវជនរត់គេចអស់ ។ រីឯជនបរទេសបានជិះម៉ូតូដេញតាមក្រុមចោរក្មេងៗប្រកិតគ្នា ហើយសមត្ថកិច្ចប្រចាំក្រុងប៉ាតាយ៉ា ចាប់បានចោរក្មេងម្នាក់នៅតាមផ្លូវ ។ ក្រោយមក សមត្ថកិច្ចចាប់បានចោរក្មេងផ្សេងទៀត សរុបចំនួន៥នាក់ ។

សមត្ថកិច្ចបានប្រមូលវត្ថុតាងពីក្រុមចោរ ដែលពួកគេប្រើប្រាស់សម្រាប់កាប់ភ្ញៀវទេសចរបរទេស ។ តាមរយៈការសួរចម្លើយបង្ហាញថា ចោរក្មេងៗដែលមានអាយុចាប់ពី១៣ឆ្នាំ ទៅ១៥ឆ្នាំ ប្រាប់ថា ពីដំបូង ពួកគេបានជិះម៉ូតូដើរលេងនៅក្រុងប៉ាតាយ៉ា ហើយបានជួបសិស្សច្បងម្នាក់ឈ្មោះ មេច អាយុ១៧ឆ្នាំ និងម្នាក់ទៀតឈ្មោះ ប៊ិន អាយុ១៦ឆ្នាំ ហើយសិស្សច្បងទាំង២នាក់ក៏បានបបួលពួកគេប្លន់ភ្ញៀវទេសចរបរទេស ។

មុនកើតហេតុការណ៍យុវជនទាំងនេះដេញកាប់ភ្ញៀវទេសចរបរទេសខាងលើ គឺរយៈពេល១ម៉ោងមុន ពួកគេបានទើបតែធ្វើសកម្មភាពប្លន់ប្រាក់ពីភ្ញៀវទេសចរម្នាក់បានសម្រេច និងទទួលបានប្រាក់ចំនួន១.៤០០បាត ។ ក្រោយមក ពួកគេយកប្រាក់នេះមកចែកគ្នាចំនួន៧នាក់ គឺម្នាក់ៗទទួលបានប្រាក់២០០បាត ។ ប៉ុន្តែដោយសារប្រាក់តិចតួចពេក ពួកគេក៏នាំគ្នាជិះម៉ូតូប្លន់ភ្ញៀវទេសចរបរទេសបន្ថែមទៀត ហើយប្លន់មិនទាន់សម្រេចផង ស្រាប់តែភ្ញៀវទេសចរដេញតាម និងមានអ្នកនៅក្បែរនោះជួយភ្ញៀវទេសចរផងដែរ ។

សមត្ថកិច្ចលើកឡើងថា ពុំទាន់បានចោទប្រកាន់យុវជនទាំង៥នាក់នេះនៅឡើយទេ ពីព្រោះត្រូវធ្វើតាមលក្ខខណ្ឌសម្រាប់យុវជនជាមុនសិន ។ ប៉ុន្តែសមត្ថកិច្ចនឹងតាមចាប់ខ្លួនយុវជនចំនួន២នាក់ទៀតដែលបានរត់គេចខ្លួន គឺឈ្មោះ មេច និង ប៊ិន មកដាក់ទោសឱ្យបាន ។

ពលរដ្ឋលើកឡើងថា ករណីនេះបានធ្វើឱ្យខូចកេរ្តិ៍ឈ្មោះដល់ទីក្រុងទេសចរណ៍ប៉ាតាយ៉ា និងក្លាយជាទីកន្លែងគ្មានសុវត្ថិភាពសម្រាប់ភ្ញៀវទេសចរ ហើយពួកគេបានសំណូមពរឱ្យស្ថាប័នពាក់ព័ន្ធរកដំណោះស្រាយផង បើមិនដូច្នោះទេ គ្មានអ្នកណាហ៊ានមកលេងប៉ាតាយ៉ាទេ ៕

ក្រុមហ៊ុន AstraZeneca កំពុងប្រឈមមុខនឹងការទាមទារសំណងរាប់រយលានដុល្លារពីជនរងគ្រោះដែលបានចោទប្រកាន់ថាមានមនុស្សចំនួន៣៥បានជួបនូវផលវិបាក និង៨១នាក់បានស្លាប់ ក្រោយពីបានចាក់វ៉ាក់សាំងនេះរួចមក។

យោងតាមប្រភពសារព័ត៌មាន Daily Mail បានឲ្យដឹងថា ក្រុមហ៊ុនឱសថយក្ស AstraZeneca ដែលបានចាប់ដៃគូជាមួយសាកលវិទ្យាល័យ Oxford ក្នុងការផលិតវ៉ាក់សាំងកូវីដ១៩កាលពីពេលកន្លងទៅ ខណៈពេលនេះគឺកំពុងតែប្រឈមមុខនឹងការដោះស្រាយនៅតុលាការជុំវិញករណីវ៉ាក់សាំងនេះបានរកឃើញថា “មានភាពខុសប្រក្រតី” ។ តាមលទ្ធផលពិសោធន៍ថ្មីគឺបានរកឃើញថាវ៉ាក់សាំងប្រភេទនេះគឺបានផ្សារភ្ជាប់ជាមួយបរិបទថ្មី ដែលបណ្តាលឱ្យមានការកកឈាម។

យ៉ាងហោចណាស់មនុស្ស ៨១ នាក់បានស្លាប់ដោយសារតែផលប៉ះពាល់ដ៏កម្រនៃវ៉ាក់សាំងប្រភេទនេះ ដែលមិនគាំទ្រនៅក្នុងសារពាង្គកាយមួយចំនួន និងជាលទ្ធផលមានមនុស្សរាប់រយនាក់បានទទួលរងនូវជំងឺផ្សេងៗ។

បើយោងតាមសារព័ត៌មាន The Telegraph បានឲ្យដឹងទៀតថា ក្រុមហ៊ុនផលិតវ៉ាក់សាំងអាចប្រឈមមុខនឹងការសងជំងឺចិត្តដល់ទៅជាង១០០លានដុល្លារជុំវិញករណីនេះ ។ ចំណែករដ្ឋាភិបាលវិញក៏ត្រូវបានរួមចំណែកផ្តល់សំណងដល់ក្រុមហ៊ុន AstraZeneca និងក្រុមហ៊ុនផលិតវ៉ាក់សាំងផ្សេងទៀតដូចគ្នា ព្រោះបានជំរុញឲ្យមានចាក់វ៉ាក់សាំងក្នុងអំឡុងពេលជំងឺរាតត្បាត។

ទោះជាយ៉ាងណា ក្រុមហ៊ុន AstraZeneca កំពុងតែច្រានចោលនូវការចោទប្រកាន់ទាំងអស់ ថាពួកគេមានការ “យល់ច្រឡំ ” មកលើក្រុមហ៊ុនខ្លួន។ ក្រុមហ៊ុនក៏បានចង្អុលបង្ហាញថា វ៉ាក់សាំងខ្លួនក៏ធ្លាប់បានជួយជីវិតមនុស្សរាប់លាននាក់ កាលពីខ្លួនបានផលិតចេញឲ្យសាធារណៈជនប្រើប្រាស់អំឡុងជំងឺរាតត្បាតដែរ។

វ៉ាក់សាំង AstraZeneca នេះទៀតសោតក៏មិនមានការលើកទឹកចិត្តពីចក្រភពអង់គ្លេសឲ្យប្រជាជនខ្លួនស្ម័គ្រចិត្តចាក់នោះទេ ព្រោះថាអ្នកជំនាញបានណែនាំថា វ៉ាក់សាំង mRNA ដូចជា Pfizer ឬ Moderna jabs គួរតែមានប្រសិទ្ធិភាពជាង។

គួរបញ្ជាក់ថា ផលវិបាកផ្សេងៗនៃវ៉ាក់សាំង AstraZeneca ក៏ត្រូវបានគេកត់ត្រាទុកផងដែរ ដោយមាន វេជ្ជបណ្ឌិត Stephen Wright អាយុ ៣២ ឆ្នាំបានស្លាប់ដោយកើតមានកំណកឈាមក្នុងខួរក្បាល ១០ ថ្ងៃបន្ទាប់ពីការចាក់វ៉ាក់សាំង AstraZeneca ដំបូងរបស់គាត់ក្នុងខែមករាឆ្នាំ ២០២១ ។ រីឯករណីមួយទៀត គឺតន្ត្រីកររ៉ុកម្នាក់ដែលគេស្គាល់ថាជា Lord Zion បានឈឺក្បាលយ៉ាងធ្ងន់ធ្ងរ ហើយត្រូវបានបញ្ជូនទៅមន្ទីរពេទ្យបន្ទាប់ពីបានចាក់វ៉ាក់សាំងរួច។ ស្ថានភាពរបស់គាត់កាន់តែយ៉ាប់យ៉ឺនពីមួយថ្ងៃទៅមួយថ្ងៃ ហើយលោកក៏បានលាចាកលោកនៅត្រឹមតែរយៈពេលប៉ុន្មានថ្ងៃបន្ទាប់។ សំបុត្រមរណៈភាពបឋមរបស់លោកក៏បានបញ្ជាក់យ៉ាងច្បាស់ថា មានកំណកឈាមក្នុងខួរក្បាលដែលបណ្តាលមកពីផលវិបាកនៃវ៉ាក់សាំងនេះឯង។

ទោះជាយ៉ាងណា ទាំងនេះគឺជាផលប៉ះពាល់ដ៏កម្រ មិនមែនមនុស្សគ្រប់គ្នាដែលចាក់វ៉ាក់សាំងនេះសុទ្ធតែប្រឈមនឹងបញ្ហាណាមួយនោះទេ៕

ប្រទេសកាណាដា ៖ សុវត្ថិភាព គឺជាកត្តាសំខាន់ដែលភ្ញៀវទេសចរបានគិតជាចម្បង មុននឹងពួកគេសម្រេចចិត្តទៅដើរកម្សាន្តនៅប្រទេសណាមួយ ។ នៅដើមឆ្នាំ២០២៤ នេះ ប្រទេសកាណាដាទើបតែទទួលបានការចាត់ចំណាត់ថ្នាក់ជាប្រទេសមានសុវត្ថិភាពបំផុតសម្រាប់ភ្ញៀវទេសចរ ប្រចាំឆ្នាំ២០២៤ ។

វាជាការចាត់ចំណាត់ថ្នាក់របស់ក្រុមហ៊ុនធានារ៉ាប់រងការធ្វើដំណើរមួយឈ្មោះ Berkshire Hathaway ។ ក្រុមហ៊ុននេះលើកហេតុផលថា កាណាដា គឺជាប្រទេសដែលមានដង់ស៊ីតេពលរដ្ឋតិចតួច និងអត្រាឧក្រិដ្ឋកម្មទាប ជាពិសេស ការប្រើប្រាស់កាំភ្លើងបង្កហិង្សាស្ទើរតែមិនកើតឡើងឡើយ ។ ការប្រើប្រាស់អំពើហិង្សានៅប្រទេសនេះស្ទើរតែគ្មាន និងគ្មានជំងឺឆ្លងទេ ។

ក្រៅពីនេះ ប្រទេសកាណាដាមិនរើសអើងជាតិសាសន៍ផ្សេង, ពណ៌សម្បុរ, ភេទ ឬរើសអើងសាសនាទេ ។ ហេតុនេះ ធ្វើឱ្យកាណាដាទទួលបានការចាត់ចំណាត់ថ្នាក់ជាប្រទេសមានសុវត្ថិភាពបំផុតសម្រាប់ភ្ញៀវទេសចរប្រចាំឆ្នាំ២០២៤ ខណៈនៅឆ្នាំ២០២៣ កាណាដាបានជាប់ចំណាត់ថ្នាក់ទី៦ ។

ទោះយ៉ាងណា គ្រោះថ្នាក់មួយដែលអាចកើតឡើងនៅប្រទេសកាណាដា គឺភ្លើងឆេះព្រៃ ដោយសារកាណាដាមានផ្ទៃដីព្រៃឈើលាតសន្ធឹងធំទូលាយ ។ ដូច្នេះ វាធ្វើឱ្យកាណាដាប្រឈមនឹងការកើតភ្លើងឆេះព្រៃ និងធ្វើឱ្យគុណភាពអាកាសធាតុកាន់តែអាក្រក់ ។ លើសពីនេះ ភ្លើងឆេះព្រៃនឹងប៉ះពាល់ដល់អ្នកមានបញ្ហាផ្លូវដង្ហើមទៀតផង ។

បើទោះជាប្រទេសកាណាដាមានព្រំដែនជាប់អាមេរិក ដែលអាមេរិកមានអត្រាឧក្រិដ្ឋកម្មខ្ពស់ ប៉ុន្តែកាណាដាបែរជាមានសុវត្ថិភាពគួរឱ្យភ្ញាក់ផ្អើល ដោយសារកាណាដាមានច្បាប់គ្រប់គ្រងកាំភ្លើងយ៉ាងតឹងរ៉ឹង, សមត្ថកិច្ចរក្សាសណ្តាប់ធ្នាប់ និងសន្តិសុខបានល្អ ។

ចំណុចសំខាន់ កាណាដាមានស្ថិរភាពសេដ្ឋកិច្ច, ស្ថិរភាពនយោបាយ, រដ្ឋាភិបាលថែរក្សាពលរដ្ឋបានល្អ ហើយពលរដ្ឋគ្មានការដាក់សម្ពាធក្នុងការរស់នៅទេ បើទោះជាពួកគេគ្មានការងារធ្វើក្តី ក៏ពួកគេមានគុណភាពជីវិតល្អប្រសើរដែរ ។ ហេតុនេះ ពលរដ្ឋកាណាដាពុំចាំបាច់ដើរឆក់ប្លន់ ឬប្រើអំពើហិង្សាលើអ្នកដទៃឡើយ ។

នេះជាចំណាត់ថ្នាក់ប្រទេសមានសុវត្ថិភាពបំផុតសម្រាប់ភ្ញៀវទេសចរ ប្រចាំឆ្នាំ២០២៤ រួមមាន ៖
-ចំណាត់ថ្នាក់ទី១ ប្រទេសកាណាដា
-ចំណាត់ថ្នាក់ទី២ ប្រទេសស្វីស
-ចំណាត់ថ្នាក់ទី៣ ប្រទេសន័រវេស
-ចំណាត់ថ្នាក់ទី៤ ប្រទេសអៀរឡង់ និង
-ចំណាត់ថ្នាក់ទី៥ ប្រទេសហូឡង់

រីឯប្រទេសមានសុវត្ថិភាពបំផុតសម្រាប់ភ្ញៀវទេសចរនៅតំបន់អាស៊ី គឺប្រទេសជប៉ុន ទទួលបានចំណាត់ថ្នាក់ទី១២ ៕