ប្រទេសវៀតណាម ៖ ការិយាល័យគយវៀតណាមបានរាយការណ៍ថា ការនាំចេញដំឡូងមីរបស់ប្រទេសវៀតណាម កាលពីខែមករា ឆ្នាំ២០២៤ បានកើនឡើងខ្ពស់បំផុតទាំងបរិមាណ និងតម្លៃ បើធៀបពីមួយខែទៅមួយខែ ។ នេះបើតាមការចេញផ្សាយរបស់សារព័ត៌មានបរទេស China Xinhua News កាលពីថ្ងៃទី២៣ ខែកុម្ភៈ ឆ្នាំ២០២៤ ។

យោងតាមរបាយការណ៍បញ្ជាក់ថា ការនាំចេញដំឡូងមីរបស់ប្រទេសវៀតណាម នៅខែមករា ឆ្នាំ២០២៤ មានបរិមាណកើនឡើងរហូតដល់៣៦៩,៦% ឯណោះ ។ ចំណែកតម្លៃវិញបានកើនឡើងរហូតដល់៣៤០,៨% បើធៀបពីមួយខែទៅមួយខែ ។

កាលពីខែមករា ឆ្នាំ២០២៤ ប្រទេសវៀតណាមបាននាំចេញដំឡូងមី ចំនួន៧៦.១១៨តោន និងទទួលបានប្រាក់ចំណូលចំនួន១៩,៩លានដុល្លារអាមេរិក ហើយចិន គឺជាប្រទេសនាំចូលដំឡូងមីរបស់វៀតណាមច្រើនជាងគេ ។

ប្រទេសវៀតណាមបាននាំចេញដំឡូងមី និងផលិតផលពាក់ព័ន្ធទៅកាន់ប្រទេសចិន ចំនួន៤០១.៩៤៥តោន ហើយវៀតណាមទទួលបានប្រាក់ចំណូលចំនួន១៨៣លានដុល្លារអាមេរិក ដែលមានបរិមាណកើនឡើង៤៨% និងតម្លៃកើនឡើង៣៨% បើធៀបពីមួយខែទៅមួយខែ ។

បច្ចុប្បន្ន ប្រទេសវៀតណាមបាននាំចេញដំឡូងមី ស្ថិតក្នុងចំណាត់ថ្នាក់ទី២ នៅលើពិភពលោក បន្ទាប់ពីប្រទេសថៃ ។ ហេតុនេះ វៀតណាមរំពឹងថា ការនាំចេញដំឡូងមីនេះ នឹងផ្តល់ប្រាក់ចំណូលដល់ប្រទេសវៀតណាម ចំនួន២ពាន់លានដុល្លារអាមេរិក នៅឆ្នាំ២០២៨ និងប្រាក់ចំណូលចំនួន២ពាន់៥រយលានដុល្លារអាមេរិក នៅឆ្នាំ២០៥០ ៕

យោងតាមរបាយការណ៍ផ្តាច់មុខពី SPOTV News ផលិតករល្បីឈ្មោះមួយរូបគឺលោក Shinsadong Tiger ត្រូវបានគេរកឃើញថាបានស្លា.ប់នៅព្រឹកថ្ងៃទី២៣ ខែកុម្ភៈ។ សេចក្តីរាយការណ៍បញ្ជាក់ថា មានអ្នកស្គាល់ផលិតកររូបនេះបានរាយការណ៍ទៅប៉ូលិសបន្ទាន់ពីប្រទះឃើញលោកស្លាប់នៅផ្ទះបន្ទាប់ពីមិនអាចទាក់ទងទៅ Shinsadong Tiger បាន។

លោក Shinsadong Tiger ត្រូវបានគេស្គាល់ថាជាអ្នកផលិតបទល្បីនៅក្នុងឧស្សាហកម្មកម្សាន្ត ដោយផលិតបទចម្រៀងល្បីៗដូចជា «Roly Poly» របស់ក្រុម T-ara បទ «No No No» របស់ក្រុម Apink , បានផលិតបទឱ្យក្រុម EXID និង Momoland ជាដើម។ ជាពិសេសលោកក៏បានចាប់ផ្ដើមក្រុមចម្រៀងស្រី TRI.BE ដែលទើបតែត្រលប់មកវិញជាមួយបទ «Diamond»។

ដំណឹងមរណភាពរបស់ផលិតកររូបនេះធ្វើឱ្យអ្នកនិយមលេងអ៊ីនធឺណិតបង្ហាញការសោកស្តាយចូលរួមកាន់ទុក្ខដល់ផលិតកររូបនេះ ដោយមានអ្នកគាំទ្រជាច្រើនសម្ដែងការតក់ស្លុតចំពោះការទទួលមរណភាពភ្លាមៗរបស់លោក។ ផលិតករដែលបានត្រួសត្រាយសំឡេងថ្មីសម្រាប់ឧស្សាហកម្មនេះមានគេស្រលាញ់ចូលចិត្តយ៉ាងច្រើន។

ទន្ទឹមនឹងនេះ Shinsadong Tiger គឺជាផលិតករដ៏សំខាន់បំផុតរបស់ K-Pop ដែលបានបង្កើតសំឡេងរបស់ K-Pop ក្នុងអំឡុងចុងទសវត្សរ៍ឆ្នាំ ២០០០និងដើមទសវត្សរ៍ឆ្នាំ ២០១០ ។យ៉ាងណាចំពោះមូលហេតុនៃការស្លាប់របស់លោកនៅល្ងាចថ្ងៃទី២៣ កុម្ភៈ នេះនៅមិនទាន់បានទម្លាយនៅឡើយទេ៕

ប្រទេសអង់គ្លេស ៖ ស្ត្រីម្នាក់ពិបាកចិត្តយ៉ាងខ្លាំង ដោយសារតែប្តីរបស់នាងចូលចិត្តបរិច្ចាគប្រាក់ឱ្យអ្នកដទៃ រហូតដល់អស់ពីខ្លួន ។ នាងបានរៀបរាប់នៅក្នុងបណ្តាញសង្គមថា ប្តីនាងបានបរិច្ចាគប្រាក់យ៉ាងច្រើនក្នុង១ឆ្នាំៗ ហើយនាងមិនយល់សោះថា ហេតុអ្វីបានជាគាត់មិនព្រមសន្សំប្រាក់ទាំងនេះទុកឱ្យកូនៗសម្រាប់ថ្ងៃអនាគត?

ចំពោះពាក្យមួយលើកឡើងថា «បើយើងមានទឹកចិត្តផ្តល់ទ្រព្យសម្បត្តិឱ្យអ្នកដទៃកាន់តែច្រើន យើងនឹងទទួលបានទ្រព្យសម្បត្តិច្រើនមកវិញ» វាអាចមិនត្រឹមត្រូវគ្រប់រឿងទាំងអស់ទេ ពីព្រោះពេលខ្លះ ការមានទឹកចិត្តជ្រុលពេក ដោយពុំបានគិតពីលទ្ធភាពរបស់ខ្លួននោះ វាអាចធ្វើឱ្យយើងពិបាកខ្លួនឯង នាថ្ងៃអនាគត ។

ស្ត្រីម្នាក់រស់នៅប្រទេសអង់គ្លេស បានរៀបរាប់ពីការតានតឹងផ្លូវចិត្តរបស់នាងចំពោះប្តី ដោយសារនាងគិតថា គាត់បានបង្ហាញពីទឹកចិត្តទៅកាន់អ្នកដទៃខ្លាំងពេក ។ នាងនិយាយថា ប្តីរបស់នាង គឺជាជនភៀសខ្លួនមកពីប្រទេសកំពុងអភិវឌ្ឍន៍ ហើយគ្រួសារនាងមានកូនតូចៗចំនួន២នាក់ នៅក្នុងបន្ទុក ។ ប្តីនាងមានប្រាក់ចំណូលច្រើនជាងនាង ហើយបើទោះជាប្រាក់ចំណូលក្នុងគ្រួសារមិនអាចធ្វើឱ្យពួកនាងក្លាយជាអ្នកមានបាន ប៉ុន្តែពួកនាងមិនពិបាកអ្វីទេ ។

ទោះយ៉ាងណា ការរស់នៅប្រចាំថ្ងៃត្រូវចំណាយខ្ពស់សព្វបែបយ៉ាង ហើយគ្រួសារនាងក៏ត្រូវសន្សំសំចៃប្រាក់ដូចគ្រួសារដទៃទៀតដែរ ដោយត្រូវកាត់បន្ថយការចំណាយណាមិនចាំបាច់ ។ រីឯប្តីនាងវិញអាចសន្សំសំចៃប្រាក់បានច្រើន ពីព្រោះគាត់ធ្វើការនៅផ្ទះ និងពុំសូវចំណាយអ្វីទេ ។ ប៉ុន្តែគាត់ចូលចិត្តបរិច្ចាគប្រាក់យ៉ាងច្រើនដល់អង្គការសប្បុរសធម៌នៅប្រទេសកំណើតរបស់គាត់ ។

នាងប្រាប់ថា ប្តីនាងបានបរិច្ចាគប្រាក់ ចាប់ពី២.០០០ផោន ទៅ២៥.០០០ផោនឯណោះ ក្នុង១ឆ្នាំៗ ។ មិនត្រឹមតែប៉ុណ្ណោះ គាត់បានបរិច្ចាគប្រាក់ជួយសាលារៀននៅប្រទេសអង់គ្លេសទៀតផង ។ នាងបន្តថា ៖ «ខ្ញុំមិនបារម្ភពីការអស់ប្រាក់ក្នុងហោប៉ៅទេ តែកូនៗរបស់ខ្ញុំ ចំនួន២នាក់កំពុងតែធំពេញវ័យ ហើយខ្ញុំដឹងថា សេដ្ឋកិច្ចគ្រួសារនឹងមានស្ថានភាពបែបណា ។ ហេតុនេះ យើងគួរតែសន្សំប្រាក់ខ្លះទុកឱ្យកូនៗ ករណីពួកគេត្រូវការជំនួយពីឪពុក-ម្តាយ នៅថ្ងៃអនាគត» ។

រឿងរ៉ាវរបស់នាងបានធ្វើឱ្យអ្នកលេងបណ្តាញសង្គមបញ្ចេញមតិខុសៗគ្នា ដោយមតិខ្លះយល់ឃើញថា ទង្វើរបស់ស្វាមីនាងនោះមិនខុសឆ្គងអ្វីទេ ហើយថែមទាំងគួរឱ្យសរសើរគាត់ទៀតផង ។ ប៉ុន្តែមតិខ្លះទៀតនិយាយថា វាមិនខុសទេ ដែលភរិយាព្រួយបារម្ភអំពីស្ថានភាពហិរញ្ញវត្ថុក្នុងគ្រួសារ និងអនាគតកូនៗ ហើយពួកគេណែនាំថា ប្តីនាង គួរតែបរិច្ចាគប្រាក់តែពាក់កណ្តាលបានហើយ ចំណែកប្រាក់ពាក់កណ្តាលទៀតត្រូវសន្សំទុកឱ្យកូនៗ ៕

ប្រទេសចិន៖ កាលពីពេលថ្មីៗនេះ យោងតាម Asianet Newsable បានឱ្យដឹងថា រថយន្តជាង ១០០ គ្រឿងបានបុ..កគ្នានិងជាន់លើផ្លូវហាយវេក្នុងទីក្រុង Suzhou ខេត្ត Jiangsu ប្រទេសចិន ដោយសារអាកាសធាតុត្រជាក់ពេកបណ្តាលឱ្យផ្លូវរអិល។

បើតាមប្រព័ន្ធផ្សព្វផ្សាយចិន បាននិយាយថា ឧបទ្ទវហេតុនេះ បានកើតឡើងនៅព្រឹកថ្ងៃទី២៣ ខែកុម្ភៈ ឆ្នាំ២០២៤ នៅលើផ្លូវល្បឿនលឿន ឆ្លងកាត់សួនឧស្សាហកម្ម Suzhou ក្នុងខេត្ត Jiangsu ភាគខាងកើតប្រទេសចិន បណ្តាលឱ្យមានមនុស្សជាច្រើននាក់រងរបួស។

នៅក្នុងវីដេអូដែលបានផ្សព្វផ្សាយបង្ហាញឱ្យឃើញថា រថយន្តជាច្រើនបានគៀបសង្កត់លើគ្នា និងរងការខូចខាតដោយការបុក។ ក្នុងហេតុការណ៍នោះគេឃើញថា មានរថយន្តមួយបានឈរឡើងស្ទើរតែបញ្ឈរដោយមានបំណែកកញ្ចក់រាយប៉ាយគ្រប់ទីកន្លែង។ គ្រោះថ្នាក់ចរាចរណ៍នេះកើតឡើងនៅលើកំណាត់ផ្លូវជាតិទឹកកក ដោយសារអាកាសធាតុត្រជាក់ ។

យោងតាមស្ថានីយ៍ប៉ូលីសសួនឧស្សាហកម្ម Suzhou បាននិយាយថា មានមនុស្ស ៣ នាក់បានរងរបួសធ្ងន់ និងត្រូវបញ្ជូនទៅមន្ទីរពេទ្យភ្លាមៗ ចំណែក ៦ នាក់ផ្សេងទៀតបានរងរបួសស្រាលនៅក្នុងឧបទ្ទវហេតុនេះ។ តំបន់ជាច្រើនក្នុងប្រទេសចិន បានរងឥទ្ធិពលដោយរលកត្រជាក់ និងព្រិលធ្លាក់ក្នុងប៉ុន្មានសប្តាហ៍ថ្មីៗនេះ ដែលប៉ះពាល់ដល់ការធ្វើដំណើររបស់មនុស្សរាប់លាននាក់មុនអំឡុងពេល និងក្រោយថ្ងៃឈប់សម្រាកបុណ្យចូលឆ្នាំថ្មី។

រដ្ឋាភិបាលចិនក្នុងសប្តាហ៍នេះ បានបង្កើនកម្រិតនៃការឆ្លើយតបបន្ទាន់ចំពោះអាកាសធាតុត្រជាក់ ក៏ដូចជាបានបង្កើតផែនការជាបន្តបន្ទាប់ដើម្បីធានាចរាចរណ៍ ការផ្គត់ផ្គង់សម្ភារៈចាំបាច់ និងថាមពលនៅក្នុងរដ្ឋធានីប៉េកាំង ខេត្ត Hebei ទីក្រុង Shaanxi និងទីក្រុង Anhui។ ហេតុនេះហើយ បច្ចុប្បន្នកម្លាំងសង្គ្រោះត្រូវបានដាក់ពង្រាយទៅកន្លែងកើតហេតុដើម្បីជួយអ្នកមានទុក្ខលំបាក៕

ភីលីពីន៖ កាលពីពេលថ្មីៗនេះ ដង្កៀបកៀបសក់រូបកូនទាពណ៌លឿនបានបង្កឱ្យមានព្យុះភ្លៀងយ៉ាងខ្លាំងពេញបណ្តាញសង្គម ដោយសារប្រជាជនភីលីពីនជាច្រើននាក់មិនថាប្រុស ឬស្ត្រីនោះទេ ពោលគឺគ្រប់វ័យ គ្រប់ភេទតែម្តង គឺសុទ្ធតែពាក់ដង្កៀបនេះទាំងអស់ ទាំងនៅក្នុងការិយាល័យ ភោជនីយដ្ឋាន ផ្សាទំនើប សាលារៀន និងទីសារធារណៈនានា បានធ្វើឱ្យអ្នកនិយមលេងអ៊ីនធឺណិតនៅតាមបណ្ដាប្រទេសផ្សេងៗមានការងឿយឆ្ងល់យ៉ាងខ្លាំង។

យោងតាម The Straits Times ដែលបានចុះផ្សាយកាលពីថ្ងៃទី២០ ខែកុម្ភៈ ឆ្នាំ២០២៤ ថា ដង្កៀបកៀបសក់រូបកូនទាពណ៌លឿននេះមានប្រភពចេញពីពិធីបុណ្យមួយក្នុងអំឡុងមហាសន្និបាត Cosplay នៅពាក់កណ្តាលឆ្នាំ២០២៣ នៅក្នុងទីក្រុង Baguio ចម្ងាយប្រហែល ២០០គីឡូម៉ែត្រ ភាគខាងជើងនៃរដ្ឋធានីម៉ានីល និងជាគោលដៅវិស្សមកាលដ៏ពេញនិយមសម្រាប់អាកាសធាតុត្រជាក់។ គេមានជំនឿថា ការពាក់ដង្កៀបកៀបសក់រូបកូនទាពណ៌លឿនដ៏គួរឱ្យស្រឡាញ់នេះ នឹងជួយឱ្យមនុស្សមានភាពសប្បាយ រីករាយ កាត់បន្ថយស្ត្រេស និងជៀសឆ្ងាយពីបញ្ហាអាក្រក់ៗផ្សេងៗ។

ជាមួយនឹងប្រយោគដែលមានចំណងជើងថា Do you have duck yet? (តើគ្រប់គ្នាមានកូនទាហើយឬនៅ?) កំពុងរីករាលដាលនៅលើប្រព័ន្ធផ្សព្វផ្សាយសង្គម ដោយគេឃើញថាមានកុមារ និងមនុស្សគ្រប់វ័យពាក់វានៅលើក្បាលដើរគ្រប់ទីកន្លែងនៅក្នុងប្រទេសភីលីពីន។ អ្នកប្រើប្រាស់អ៊ីនធឺណិតជនជាតិភីលីពីនឈ្មោះ Jaja de Guzman បានចែករំលែកថា ការពាក់ដង្កៀបប្លាស្ទីកនេះនៅលើក្បាលគឺពិតជាធ្វើឱ្យខ្ញុំរីករាយណាស់។ រីឯម្នាក់ទៀតក៏បាននិយាយដែរថា វាគួរឱ្យស្រឡាញ់ណាស់។

ទោះជាយ៉ាងណាក៏ដោយ លោកបណ្ឌិត Jimmuel Naval នៅសាកលវិទ្យាល័យហ្វីលីពីនបាននិយាយថា មិនមានអត្ថន័យស៊ីជម្រៅនៅពីក្រោយនិន្នាការនេះទេ។ វេជ្ជបណ្ឌិតបាននិយាយថា “មនុស្សមានទំនោរដើរតាមនិន្នាការដោយសារតែពួកគេចូលចិត្តអ្វីដែលថ្មី ដើម្បីកាត់បន្ថយជីវិតដ៏ស្មុគស្មាញរបស់ពួកគេតែប៉ុណ្ណោះ”។
គួរបញ្ជាក់ដែរថា នេះមិនមែនជាលើកទីមួយទេ ដែលគ្រឿងលម្អតម្លៃថោកគួរឱ្យស្រលាញ់នេះបានបង្កឱ្យមានការកក្រើកក្នុងសហគមន៍។ កាលពីមុនក្នុងឆ្នាំ ២០១៥ នៅក្នុងប្រទេសចិន ដង្កៀបកៀបសក់រូបជីកចក់ក៏បានក្លាយជារបស់ដ៏ពេញនិយមផងដែរ៕

ប្រទេសថៃ ៖ កាលពីថ្ងៃទី២២ ខែកុម្ភៈ ឆ្នាំ២០២៤ លោក Srettha Thavisin នាយករដ្ឋមន្ត្រីប្រទេសថៃ បានប្រកាសអំពីចក្ខុវិស័យ «Thailand Vision “IGNITE THAILAND» ដែលបង្ហាញពីកម្លាំងថាមពលរួមគ្នា ។ ចំណុច១ ក្នុងចំណោម៨ចំណុចក្នុងចក្ខុវិស័យ គឺជំរុញឱ្យថៃក្លាយជាមជ្ឈមណ្ឌលព្យាបាលជំងឺ និងថែទាំសុខភាព ។

លោក Srettha Thavisin នាយករដ្ឋមន្ត្រីថៃ បានបង្ហោះសារក្នុងបណ្តាញសង្គម X ថា ប្រទេសថៃនឹងក្លាយជាមជ្ឈមណ្ឌលព្យាបាលជំងឺ និងថែទាំសុខភាព (Medical Hub) ដោយសារប្រព័ន្ធថែទាំសុខភាពរបស់ថៃ គឺជាចំណុចទាក់ទាញភ្ញៀវទេសចរជាច្រើននាក់ឱ្យធ្វើដំណើរមកកាន់ប្រទេសថៃ ។ កាលពីឆ្នាំ២០២៣ ការធ្វើដំណើរកម្សាន្ត និងការថែទាំជំងឺរបស់ភ្ញៀវទេសចរ បានបង្កើតប្រាក់ចំណូលចូលប្រទេសថៃ ស្មើជាង៤ម៉ឺនលានបាត ។

មូលហេតុចម្បង៣ចំណុច ដែលធ្វើឱ្យថៃក្លាយជាគោលដៅផ្នែកវេជ្ជសាស្ត្រសម្រាប់មនុស្សនៅទូទាំងពិភពលោក រួមមាន ៖
១-មន្ទីរពេទ្យថៃមានការទទួលស្គាល់ពីអន្តរជាតិ ក្នុងនោះមានមន្ទីរពេទ្យឯកជននៅទីក្រុងបាងកក និងតាមបណ្តាខេត្ត
២-បុគ្គលិកពេទ្យ រួមមាន វេជ្ជបណ្ឌិត និងគិលានុបដ្ឋាយិកា សុទ្ធតែមានជំនាញឯកជន រួមទាំងជនជាតិថៃមានលក្ខណៈសម្បត្តិធ្វើឱ្យអ្នកជំងឺសប្បាយចិត្ត
៣-ការព្យាបាលនៅថៃមានតម្លៃសមរម្យ ហើយចាត់ទុកថា វាមានតម្លៃថោក បើធៀបនឹងតម្លៃព្យាបាលនៅប្រទេសជាច្រើន ។

លោកនាយករដ្ឋមន្ត្រីបន្តថា យើងអាចរកប្រាក់ចំណូលចូលប្រទេសបាន តាមរយៈការផ្សព្វផ្សាយពីវិស័យទេសចរណ៍វេជ្ជសាស្ត្រ ដោយរដ្ឋាភិបាលថៃនឹងបង្កើត Roadshow ដើម្បីទាក់ទាញជនបរទេសឱ្យមកព្យាបាលជំងឺនៅប្រទេសថៃ ។

ក្រៅពីផ្នែកពេទ្យ ប្រទេសថៃក៏មានឈ្មោះបោះសំឡេងផ្នែកការថែទាំសុខភាព ដូចជា ៖ ស្ប៉ាថៃ, ម៉ាស្សាបែបថៃ និងឱសថបុរាណថៃ សុទ្ធតែល្បីល្បាញក្នុងកម្រិត World Class ។ នៅរដ្ឋ Los Angeles និង San Francisco សហរដ្ឋអាមេរិក មានសមាគមម៉ាស្សាថៃ ដែលទទួលបានប្រាក់ចំណូលខ្ពស់ផងដែរ ។ ហេតុនេះ យើងនឹងជំរុញស្ប៉ាថៃ, ឱសថបុរាណថៃ និងម៉ាស្សាថៃ ឱ្យក្លាយជាផលិតផលនាំចេញទៅកាន់ទូទាំងពិភពលោក តាមរយៈការប្រើប្រាស់វិធានការផ្សេងៗ ។

ក្រៅពីវិធានការបង្កើតប្រាក់ចំណូលហើយ ពលរដ្ឋថៃត្រូវតែទទួលបាននូវសេវាព្យាបាលជំងឺដ៏ល្អ ហើយពលរដ្ឋថៃគ្រប់រូបនឹងទទួលបានការព្យាបាលជំងឺស្មើៗគ្នា ។ ពួកគេគ្រាន់តែចំណាយប្រាក់ត្រឹមតែ៣០បាតប៉ុណ្ណោះ (ឬស្មើប្រមាណ៣.០០០រៀល) នៅគ្រប់ទីកន្លែងទាំងអស់ ។

លើសពីនេះ យើងនឹងប្រើប្រាស់បច្ចេកវិទ្យា AI សម្រាប់តភ្ជាប់ទិន្នន័យមូលដ្ឋាន និងធ្វើឱ្យប្រសើរឡើងនូវប្រព័ន្ធវេជ្ជសាស្ត្រសម្រាប់ពលរដ្ឋថៃ ពេលទៅរកគ្រូពេទ្យ ។ ចាប់ពីពេលនេះទៅ អ្នកជំងឺអាចមិនស្គាល់គ្រូពេទ្យ ប៉ុន្តែគ្រូពេទ្យស្គាល់អ្នកជំងឺ តាមរយៈទិន្នន័យការប្រើប្រាស់សេវាវេជ្ជសាស្ត្រអស់មួយជីវិត ។

លោកនាយករដ្ឋមន្ត្រីបន្ថែមថា យើងនឹងបង្កើនចំនួនបុគ្គលិកពេទ្យ និងគិលានុបដ្ឋាយិកាឱ្យគ្រប់គ្រាន់សម្រាប់បំពេញតម្រូវការរបស់ពលរដ្ឋ ។ ក្រៅពីនេះ យើងនឹងថែទាំសុខុមាលភាពរបស់វេជ្ជបណ្ឌិត និងគ្រូពេទ្យទាំងអស់ឱ្យមានជីវិតល្អប្រសើរ ក៏ដូចជាជួយសម្រាលបន្ទុកពួកគេផងដែរ ។

វិធានការទាំងអស់នេះនឹងធ្វើឱ្យប្រទេសថៃក្លាយជា Medical Hub របស់ Southeast Asia តាមរយៈប្រព័ន្ធថែទាំសុខភាពយ៉ាងល្អសម្រាប់ពលរដ្ឋថៃ ដើម្បីកុំឱ្យពលរដ្ឋថៃមានបញ្ហាក្នុងការទទួលបានសេវាព្យាបាល ។ ដូច្នេះ វានឹងធ្វើឱ្យប្រទេសថៃក្លាយជាមជ្ឈមណ្ឌលព្យាបាលជំងឺ និងថែទាំសុខភាព ដើម្បីប្រមូលប្រាក់ចំណូលចូលជាតិ ៕