វៀតណាម៖ ភ្ញៀវទេសចរជាង ២,០០០ នាក់បានចូលរួមប្រមូលផ្តុំគ្នាជុំវិញសង្វៀនចំបាប់នៅជើងភ្នំក្នុងស្រុក Nam Dan ប្រទេសវៀតណាម ដើម្បីមើលអ្នកចំបាប់ប្រកួតប្រជែងគ្នាក្នុងពិធីបុណ្យ King Mai Temple ឆ្នាំ ២០២៤។មហោស្រពប្រាសាទស្តេចម៉ៃ (Mai Hac De) ឆ្នាំនេះប្រព្រឹត្តទៅនៅថ្ងៃទី ២២-២៤ ខែកុម្ភៈ តាមខេត្ត ដែលកីឡាចំបាប់គឺជាព្រឹត្តិការណ៍ដ៏ធំ និងពេញនិយមបំផុតមួយនៅក្នុងប្រទេសវៀតណាម។ ការប្រកួតចំបាប់នេះបានធ្វើឡើងកាលពីរសៀលថ្ងៃទី២២ កុម្ភៈ លើវាលទំហំរាប់សិបម៉ែត្រការ៉េ នៅជើងភ្នំ King Mai ក្នុងទីក្រុង Nam Dan ដែលមានប្រជាពលរដ្ឋ និងភ្ញៀវទេសចររាប់ពាន់នាក់បានសម្រុកចូលមើលជាហេតុធ្វើឱ្យផ្លូវចូលនិងចេញមានការកកស្ទះយ៉ាងខ្លាំង។

ជារៀងរាល់ឆ្នាំនៅរដូវផ្ការីកនៃជើងភ្នំ King Mai តែងតែរៀបចំការប្រកួតនៅតាមតំបន់នីមួយៗ ដោយជ្រើសរើសអ្នកចំបាប់ដែលមានសុខភាពល្អ ដើម្បីបំពេញបន្ថែមកងទ័ពជួរមុខ។ កីឡាចំបាប់នេះបានក្លាយជាទំនៀមទម្លាប់ក្នុងពិធីបុណ្យភូមិ ដោយបង្ហាញពីស្មារតីក្បាច់គុនរបស់ប្រជាជនខេត្ត Nghe An។ អ្នកទេសចរជាតិ និងអន្តរជាតិ ជាច្រើនបានឡើងលើភ្នំតាំងពីព្រលឹមរកទីតាំងណាដែលល្អៗ ហើយអង្គុយនៅក្រោមដើមគុម្ពឈើ និងដើមអម្ពិល ដើម្បីមើលអ្នកចំបាប់ប្រកួត។ យោងតាមរបាយការណ៍ គិតត្រឹមថ្ងៃទី២២ និង ២៣ ខែកុម្ភៈ មានភ្ញៀវទេសចរចូលរួមពិធីបុណ្យចំបាប់នេះប្រហែល ២,០០០ នាក់។

បុណ្យចំបាប់ដែលជាប្រពៃណីបុរាណរបស់ជនជាតិវៀតណាម តម្រូវឱ្យអ្នកចូលរួមប្រកួតមានសុខភាពល្អ រាងកាយមាំមួន ដោយប្រកួតក្នុងប្រភេទទម្ងន់ ៥០-៥៥ គីឡូក្រាម ៦០-៦៥ គីឡូក្រាម និងជាង ៧០ គីឡូក្រាម។ តាមច្បាប់ក្នុងការប្រកួតមួយប្រសិនបើអ្នកចំបាប់វាយគាត់ឱ្យដួលដែលធ្វើឱ្យគូប្រកួតប៉ះនឹងកន្ទេល នោះគាត់នឹងឈ្នះ។ ការប្រកួតនីមួយៗមានរយៈពេលប្រហែល ៣-៥ នាទី ដោយគូដែលផ្គូផ្គងស្មើគ្នាជាច្រើនមានរយៈពេលច្រើនជាង ១០ នាទី នៅពេលឈ្នះ អ្នកចំបាប់នឹងត្រូវបានផ្តល់រង្វាន់ជាច្រើន ហើយប្រសិនបើពួកគេប្រកួតប្រជែងដោយភាពក្លៀវក្លា មានការលះបង់ និងមានការប្រកួតប្រជែងយ៉ាងស្វិតស្វាញ នោះពួកគេនឹងទទួលបានប្រាក់ ២ ទៅ ៤ដុល្លារពីភ្ញៀវទេសចរម្នាក់ៗផងដែរ៕

សហរដ្ឋអាមេរិក ៖ បុរសមានកម្ពស់ខ្ពស់បំផុត និងនារីមានមាឌតូចល្អិតបំផុតនៅលើពិភពលោក បានថតរូបរួមគ្នាម្តងទៀត ក្នុងអំឡុងពេលពួកគេបានជួបគ្នានៅរដ្ឋកាលីហ្វ័រញ៉ា សហរដ្ឋអាមេរិក ។ ឈ្មោះរបស់អ្នកទាំងពីរត្រូវបានគេកត់ត្រាចូលក្នុងសៀវភៅ Guinness ថា គឺជាបុគ្គលដែលមានរាងកាយខុសប្លែកខ្លាំងពីមនុស្សធម្មតា ។

មហាជនមិនងាយបានឃើញរូបភាពការជួបគ្នារបស់អ្នកទាំងពីរទេ ប៉ុន្តែអ្នកទាំងពីរបានថតរូបរួមគ្នា នៅពេលពួកគេបានជួបគ្នាជាលើកទី២ ។ លោក Sultan Kosen Dev Adam មានកម្ពស់ខ្ពស់ខ្លាំង គឺស្មើរហូតដល់២.៥១ម៉ែត្រឯណោះ ហើយគេបានដាក់ឈ្មោះឱ្យគាត់ថា ជាបុរសមានកម្ពស់ខ្ពស់បំផុតនៅលើពិភពលោក ។

ចំណែកនាង Chayoti Amke គឺជានារីមានមាឌតូចល្អិតបំផុតលើពិភពលោក ដែលកម្ពស់ចាប់ពីក្បាល រហូតដល់ចុងជើងរបស់នាង គឺស្មើប្រមាណតែ៦២សង់ទីម៉ែត្រប៉ុណ្ណោះ ។

ការជួបគ្នារបស់អ្នកទាំងពីរលើកនេះ គឺនៅរដ្ឋកាលីហ្វ័រញ៉ា សហរដ្ឋអាមេរិក កាលពីថ្ងៃទី១៨ ខែកុម្ភៈ ឆ្នាំ២០២៤ ។ នេះចាត់ទុកថា វាគឺជាលើកទី២ ដែលលោក Sultan Kosen Dev បានជួបគ្នាជាមួយនាង Chayoti Amke បន្ទាប់ពីពួកគេបានជួបគ្នាជាលើកដំបូងកាលពីឆ្នាំ២០១៨ ក្នុងអំឡុងពេលចូលរួមធ្វើយុទ្ធនាការផ្សព្វផ្សាយវិស័យទេសចរណ៍របស់ប្រទេសអេហ្ស៊ីប (Egypt) ។

កម្មវិធីយុទ្ធនាការផ្សព្វផ្សាយវិស័យទេសចរណ៍នេះ បានរៀបចំឡើងដោយ Guinness World Records ហើយមហាជនកម្រឃើញរូបភាពរបស់អ្នកទាំងពីរនៅជាមួយគ្នាបែបនេះណាស់ ។ បើទោះជាមើលទៅឃើញថា ពួកគេមានរាងកាយខុសប្លែកខ្លាំងពីមនុស្សទូទៅក្តី ប៉ុន្តែបើគេពិនិត្យមើលទៅរូបភាពទាំងនេះវិញ គឺពួកគេតែងតែមានស្នាមញញឹម និងបង្ហាញនូវថាមពលវិជ្ជមានជានិច្ច ៕

ប្រទេសអាល្លឺម៉ង់ ៖ បុរសចំណាស់ម្នាក់ អាយុ៨០ឆ្នាំ រស់នៅប្រទេសអាល្លឺម៉ង់ ត្រូវបានគេដាក់ឈ្មោះថា ជាសេដ្ឋីសន្សំសំចៃបំផុតលើពិភពលោក ដោយសារគាត់មានផ្ទះរហូតដល់១០កន្លែង និងមានប្រាក់រាប់លានដុល្លារអាមេរិកក្នុងបញ្ជីធនាគារ ប៉ុន្តែបែរជាគាត់មកដើររើសអាហារ និងសម្ភារៈអេតចាយតាមធុងសំរាមដើម្បីរស់ ។

ជារៀងរាល់ថ្ងៃ គេតែងឃើញបុរសចំណាស់ម្នាក់ដើរនៅតាមផ្លូវនៅប្រទេសអាល្លឺម៉ង់ ហើយគាត់ស្លៀកសម្លៀកបំពាក់ចាស់ៗ និងស្ពាយកាបូបធំឈរនៅមុខធុងសំរាម ដើម្បីកាយរកសម្ភារៈអេតចាយ ម្ហូបអាហារ និងបន្លែបង្ការផ្សេងៗ ។

បុរសចំណាស់នេះឈ្មោះ Heinz b អាយុ៨០ឆ្នាំ ត្រូវបានគេដាក់ឈ្មោះថា ជាសេដ្ឋីសន្សំសំចៃបំផុតលើពិភពលោក ដោយសារគាត់ចិញ្ចឹមជីវិតដោយការរកអាហារ និងលក់សម្ភារៈអេតចាយក្នុងធុងសំរាម ។ បើទោះជាគាត់មានទ្រព្យសម្បត្តិរាប់លានដុល្លារអាមេរិកក្តី ក៏គាត់នៅតែធ្វើបែបនេះជាប្រចាំ ។

មើលទៅលោកតា Heinz b ពិតជាមានសភាពក្រីក្រលំបាក ប៉ុន្តែគាត់ទើបតែបានដកប្រាក់ពីធនាគារ ចំនួន៧សែនអឺរ៉ូ ដើម្បីទិញផ្ទះថ្មីមួយកន្លែងទៀត (ដែលជាផ្ទះទី១០ របស់គាត់) ។ រីឯប្រាក់នៅសល់ចំនួន១សែនអឺរ៉ូ គាត់បានដាក់ចូលក្នុងកុងធនាគារ ដើម្បីយកការប្រាក់ ។

លោកតានិយាយថា គាត់បានសន្សំសំចៃបែបនេះរហូតមក ហើយគាត់ពុំចាំបាច់ចំណាយប្រាក់ទិញអ្វីទេ ។ គាត់នឹងមានសេចក្តីសុខច្រើនជាងនេះ បើគាត់បានស្វែងរកអាហារក្នុងធុងសំរាម និងប្រមូលសម្ភារៈអេតចាយដែលអ្នកដទៃបោះចោល ។

ពេលខ្លះ គាត់បានទិញសម្ភារៈប្រើប្រាស់នៅតាមហាងទំនិញ ប៉ុន្តែភាគច្រើន គាត់បានឃើញបន្លែក្នុងធុងសំរាម ហើយគាត់ក៏ប្រមូលបន្លែទាំងនេះទុកធ្វើម្ហូប ។ គាត់យល់ថា មនុស្សសម័យនេះបានចាយវាយប្រាក់ខ្ជះខ្ជាយ ហើយពួកគេបោះចោលសម្ភារៈប្រើប្រាស់យ៉ាងច្រើន ខណៈសម្ភារៈទាំងនេះនៅតែអាចប្រើប្រាស់បាន ។

សារព័ត៌មានធ្លាប់ចុះផ្សាយពីរឿងរ៉ាវរបស់លោកតាម្តងហើយកាលពីឆ្នាំ២០២១ គឺសារព័ត៌មានចុះផ្សាយថា គាត់ជាម្ចាស់ផ្ទះចំនួន៧កន្លែង ហើយគាត់មានអាផាតមិន ចំនួន២ទៀត ។ ក្រៅពីនេះ គាត់មានប្រាក់ក្នុងកុងធនាគារ ប្រមាណ៤៦ម៉ឺនអឺរ៉ូ ហើយទ្រព្យសម្បត្តិរបស់គាត់បានកើនឡើងជាបន្តបន្ទាប់ ។ លោកតា Heinz b ចូលចិត្តទិញផ្ទះក្នុងតំបន់ដូចគ្នា ដើម្បីឱ្យគាត់ងាយស្រួលធាក់កង់ទៅកាន់ផ្ទះរបស់គាត់ ។ មិនតែប៉ុណ្ណោះ គាត់ថែមទាំងអាចជួសជុលផ្ទះដោយខ្លួនឯងទៀតផង ។

កាលពីមុន លោកតាធ្លាប់ធ្វើជាវិស្វករអគ្គិសនី ហើយពេលគាត់ចូលនិវត្តន៍ គាត់ទទួលបានប្រាក់ចំនួន៣.៦០០អឺរ៉ូក្នុង១ខែ ព្រមទាំងប្រាក់ឧបត្ថម្ភចំនួន១៥៦អឺរ៉ូទៀត ។ ភាគច្រើន គាត់យកប្រាក់ទាំងនេះទៅដាក់ក្នុងកុងធនាគារ ដោយសារគាត់មិនត្រូវការចំណាយលើអ្វីច្បាស់លាស់ ។ គាត់បានចំណាយប្រាក់ត្រឹមតែ៥អឺរ៉ូប៉ុណ្ណោះ សម្រាប់ការចាយវាយប្រចាំខែ ។ គាត់គ្មានទូរស័ព្ទដៃប្រើប្រាស់ឡើយ គឺមានតែកុំព្យូទ័រយួរដៃប៉ុណ្ណោះ ។

លោកតាបានចំណាយពេលភាគច្រើនក្នុងការប្រមូលសម្ភារៈចាស់ៗ ដែលអ្នកផ្សេងបោះចោល ។ ក្រៅពីនេះ គាត់បានជិះកង់នៅជុំវិញទីក្រុង ដើម្បីស្វែងរកអ្វីថ្មីៗថែមទៀត ដោយគ្មានពេលឈប់សម្រាក ។ គាត់បានលក់សម្ភារៈចាស់ៗទៅឱ្យអ្នកជិតខាង ឬប្តូរយកម្ហូបអាហារដែលពួកគេមិនបរិភោគ ។

លោកតាគ្មានក្រុមគ្រួសារ និងកូនចៅ ដើម្បីឱ្យគាត់អាចបែងចែកទ្រព្យសម្បត្តិឱ្យទេ ហើយគាត់មិនដឹងថា នៅពេលគាត់ស្លាប់ទៅ តើគាត់នឹងប្រគល់ទ្រព្យសម្បត្តិទាំងអស់ឱ្យអ្នកណា? គាត់មានសាច់ញាតិរស់នៅឆ្ងាយៗដែរ ប៉ុន្តែពួកគេគ្មានប្រាក់បង់ពន្ធទ្រព្យសម្បត្តិទេ ។ ហេតុនេះ គាត់នឹងបែងចែកទ្រព្យសម្បត្តិខ្លះទៅឱ្យអ្នកជួលផ្ទះ ៕

ប្រទេសចិន៖ តាមការសិក្សាថ្មីមួយបានបង្ហាញថា ការចំណាយលើផលិតផលថែទាំកុមារ ឬសម្ភារៈប្រើប្រាស់មួយចំនួនជាមធ្យមនៃការចិញ្ចឹមកូនក្នុងប្រទេសចិនគឺជិត ៧៨,០០០ ដុល្លារអាមេរិកសម្រាប់មនុស្សម្នាក់ ដែលជាតម្លៃខ្ពស់បំផុតទីពីរនៅលើពិភពលោកបន្ទាប់ពីប្រទេសកូរ៉េខាងត្បូង។

កាលពីទី២១ ខែកុម្ភៈ ឆ្នាំ២០២៤ បើតាមរបាយការណ៍របស់វិទ្យាស្ថានស្រាវជ្រាវប្រជាជន Yuwa ដែលមានមូលដ្ឋាននៅទីក្រុងប៉េកាំង បានឱ្យដឹងថា ការចំណាយលើការចិញ្ចឹមកូនក្នុងប្រទេសចិនតាំងពីកុមារភាពរហូតដល់អាយុ ១៨ ឆ្នាំគឺ ៥៣៨,០០០ យន់ (ប្រមាណ ៧៨,០០០ ដុល្លារអាមេរិក) ខ្ពស់ជាងតម្លៃចិញ្ចឹមកូនក្នុងប្រទេសអូស្ត្រាលីរហូតដល់ ២.០៨ដង និង ២.២៤ដងក្នុងប្រទេសបារាំង រួមទាំង ៤.១១ដងនៅសហរដ្ឋអាមេរិក ក៏ដូចជា ៤.២៦ដង នៅក្នុងប្រទេសជប៉ុន។

ការចិញ្ចឹមកូនក៏នាំទៅរកការកាត់បន្ថយម៉ោងការងារ និងអត្រាប្រាក់ឈ្នួលរបស់ស្ត្រីផងដែរ ខណៈដែលជីវភាពរបស់បុរសនៅតែមិនផ្លាស់ប្តូរច្រើនទេ។ របាយការណ៍បានលើកឡើងថា ម្តាយនិងឪពុកបាត់បង់តែពេលទំនេរប៉ុណ្ណោះ ខណៈដែលម្តាយបាត់បង់ការងារចំនួន ២,០១៦ ម៉ោង អំឡុងពេលថែទាំកូនតាំងពីកំណើតដល់អាយុ ៤ ឆ្នាំ និងបាត់បង់ប្រាក់ចំណូលចំនួន ៦៣,០០០ យន់ (ប្រមាណ ៨,៧០០ ដុល្លារ) យោងតាមប្រាក់ខែជាមធ្យម ៣០ យន់ក្នុងមួយថ្ងៃរបស់រដ្ឋាភិបាល ហើយប្រាក់ចំណូលឬប្រាក់ឈ្នួលរបស់ស្ត្រីក៏ធ្លាក់ចុះ ១២-១៧% ផងដែរ។

ហេតុនេះហើយ ដោយសារតែបរិយាកាសសង្គមបច្ចុប្បន្ននៅក្នុងប្រទេសចិនមិនមានភាពរួសរាយរាក់ទាក់ចំពោះការមានកូនរបស់ស្ត្រី ដូចជាការចំណាយខ្ពស់ក្នុងការបង្កើតកូន ការចំណាយពេលវេលាច្រើន និងការលំបាកសម្រាប់ស្ត្រីក្នុងការធ្វើឱ្យមានតុល្យភាពគ្រួសារ ការងារ និងឱកាសសម្រាប់ស្ត្រីក្នុងការមានកូនគឺខ្ពស់ពេក ទើបស្ត្រីជនជាតិចិនភាគច្រើនក៏សម្រេចចិត្តនៅលីវ មិនរៀបការ មិនយកកូន។

របាយការណ៍នេះកើតឡើងបន្ទាប់ពីចំនួនប្រជាជនរបស់ប្រទេសចិនបានធ្លាក់ចុះជាលើកទីពីរជាប់ៗគ្នាក្នុងឆ្នាំ ២០២៣ ជាមួយនឹងចំនួននៃការកើតថ្មីបានធ្លាក់ចុះមកនៅត្រឹមពាក់កណ្តាលនៃឆ្នាំ ២០១៦។ ស្ត្រីកាន់តែមានទំនោរពន្យារពេល ឬបដិសេធមិនធ្វើជាម្តាយ ដោយសារតែភ័យខ្លាចផលប៉ះពាល់អវិជ្ជមានលើអាជីព និងហិរញ្ញវត្ថុរបស់ពួកគេ។

ទោះជាយ៉ាងណា នៅឆ្នាំ២០២៤ រដ្ឋាភិបាលចិនបានដាក់ចេញនូវវិធានការជំរុញអត្រាកំណើត ដើម្បីកាត់បន្ថយការចំណាយលើការចិញ្ចឹមកូន ចាប់ពីប្រាក់ឧបត្ថម្ភជាសាច់ប្រាក់សម្រាប់កុមារបន្ថែម ការបន្ធូរបន្ថយពន្ធ ដល់ការបញ្ចុះតម្លៃលើសេវាកម្មបង្កើតកូនសិប្បនិម្មិត និងការទទួលបានសេវាមេដោះបរទេសឥតគិតថ្លៃ ដោយគេជឿថាគោលនយោបាយនេះនឹងជួយឱ្យស្ត្រីមានទឹកចិត្តឡើងវិញ៕

ស្ករសំឡីដែលកុមារភាគច្រើនចូលចិត្តញ៉ាំជាញឹកញាប់ ដោយសារវាមានពណ៌ស្រស់ស្អាត រសជាតិផ្អែមៗ និងរលាយចូលមាត់យ៉ាងឆ្ងាញ់ ដែលជាទូទៅគេនិយមលក់វានៅកន្លែងកម្សាន្ត និងកន្លែងពិព័រណ៍ផ្សេងៗ។

កាលពីពេលកន្លងទៅនេះ បន្ទាប់ពីការធ្វើតេស្តមន្ទីរពិសោធន៍មួយនៅប្រទេសឥណ្ឌាបានបញ្ជាក់អំពីវត្តមាននៃសារធាតុបង្កជំងឺមហារីក Rhodamine-B នៅក្នុងស្ករសំឡី ខណៈរដ្ឋជាច្រើនក្នុងប្រទេសឥណ្ឌាបានហាមឃាត់មិនឲ្យលក់ស្ករប្រភេទនេះជាបន្តទៀតនោះទេ។

កាលពីថ្ងៃទី២២ ខែកុម្ភៈ យោងតាមរបាយការណ៍ពី BBC News បានឲ្យដឹងថា ការធ្វើតេស្តមន្ទីរពិសោធន៍បានរកឃើញវត្តមានរបស់ Rhodamine-B ដែលជាសមាសធាតុគីមីម៉្យាងដែលផ្តល់ពណ៌ឲ្យស្ករសំឡី។ សារធាតុគីមីនេះផ្តល់នូវពណ៌ភ្លឺស្អាតៗ «fluorescent» ដែលជាទូទៅគេប្រើវាដើម្បីលាបពណ៌វាយនភ័ណ្ឌ គ្រឿងសំអាង និងទឹកថ្នាំ។ ការសិក្សាបានបង្ហាញទៀតថា សារធាតុគីមីនេះអាចបង្កើនហានិភ័យនៃជំងឺមហារីក ហើយប្រទេសនៅប៉ែកអឺរ៉ុបមួយចំនួនក៏បានប្រើប្រាស់វាដើម្បីធ្វើជាថ្នាំជ្រលក់អាហារខុសច្បាប់ផងដែរ។

គួរបញ្ជាក់ថា ប្រភេទស្ករសំឡីនេះ គឺត្រូវបានអ្នកលក់កែច្នៃដោយដៃផ្ទាល់ និងមិនបានចុះបញ្ជីពីរោងចក្រណាមួយនោះទេ៕

បរទេស៖ Apple បានបង្កើតកំណត់ត្រាថ្មីមួយដោយទទួលបានចំណាត់ថ្នាក់កំពូលទាំងប្រាំពីរនៅក្នុងតារាងលក់ស្មាតហ្វូនសកលសម្រាប់ឆ្នាំ ២០២៣ ដែលជាស្នាដៃបង្ហាញនូវជំហរទីផ្សារដ៏លេចធ្លោរបស់ខ្លួន និងបានក្លាយជាក្រុមហ៊ុនទូរស័ព្ទធំបំផុតរបស់ពិភពលោកទាក់ទងនឹងទិន្នផលប្រចាំឆ្នាំជាលើកដំបូង។

យោងតាមរបាយការណ៍ពី Counterpoint Research ដែលបានចុះផ្សាយកាលពីថ្ងៃទី២២ ខែកុម្ភៈ ឆ្នាំ២០២៤ ថានេះជាលើកដំបូងហើយដែលម៉ាកយីហោតែមួយសម្រេចបាននូវចំណុចសំខាន់បែបនេះ។ របាយការណ៍ក៏បានកត់សម្គាល់ផងដែរថា Samsung ក៏បានដណ្តើមចំណាត់ថ្នាក់ដែលនៅសល់ចំនួន ៣ ក្នុងចំណាត់ថ្នាក់កំពូលទាំង ១០ ដែលបង្ហាញពីភាពប្រសើរឡើងបន្តិចបើប្រៀបធៀបកាលពីឆ្នាំមុន និងបង្ហាញពីទិដ្ឋភាពប្រកួតប្រជែងនៃឧស្សាហកម្មស្មាតហ្វូន។

ក្នុងនោះចំណាត់ថ្នាក់ទី១ ទី២ និងទី៣ បានទៅលើទូរស័ព្ទ iPhone 14, 14 Pro Max និង 14 Pro ឈរនៅលំដាប់កំពូល ដែលភាគច្រើនលក់ដាច់នៅក្នុងទីផ្សារអាមេរិក និងចិន។ សម្រាប់ iPhone 13 ដែលចេញលក់ក្នុងឆ្នាំ ២០២២ វិញជាប់ចំណាត់ថ្នាក់ទី៤ កើនឡើងពីរខ្ទង់ក្នុងរយៈពេលដូចគ្នាកាលពីឆ្នាំមុន ហើយម៉ូដែលនេះលក់ដាច់បំផុតនៅក្នុងទីផ្សារជប៉ុន និងឥណ្ឌា។ នៅចំណាត់ថ្នាក់ទី៥ ទី៦ និងទី៧ ក៏បានទៅលើទូរស័ព្ទ iPhone ផងដែរគឺ iPhone15 Pro Max, 15 Pro, និង iPhone 15។

ហេតុនេះហើយ ភាពលេចធ្លោរបស់ក្រុមហ៊ុន Apple កាលពីឆ្នាំមុនគឺដោយសារតែកំណើនដ៏រឹងមាំនៅក្នុងទីផ្សារដែលកំពុងរីកចម្រើនដូចជាប្រទេសឥណ្ឌា មជ្ឈិមបូព៌ា និងអាហ្វ្រិក (MEA)។ នៅឆ្នាំ ២០២៣ ប្រទេសឥណ្ឌាបានក្លាយជាទីផ្សារស្មាតហ្វូនធំបំផុតទី ៥ របស់ Apple ជាមួយនឹងការលក់ច្រើនជាង ១០ លានឧបករណ៍។

សម្រាប់តំណែងដែលនៅសេសសល់ចុងក្រោយចំនួន ៣ វិញគឺបានទៅលើម៉ូដែល Galaxy A14 5G, A04e និង A14 4G របស់ក្រុមហ៊ុន Samsung។ ដូច្នេះយោងតាមស្ថិតិពី Counterpoint និង IDC បានបង្ហាញថា Apple ជាប់ចំណាត់ថ្នាក់លេខ ១ ក្នុងទិន្នផលស្មាតហ្វូនសម្រាប់ឆ្នាំ ២០២៣ ដោយហេតុនេះក្លាយជាក្រុមហ៊ុនទូរស័ព្ទធំបំផុតរបស់ពិភពលោកទាក់ទងនឹងទិន្នផលប្រចាំឆ្នាំជាលើកដំបូង៕