វិធានការក្តៅ! ក្រុងហាណូយប្រើកាមេរ៉ាផាកពិន័យលើអ្នកលក់ដូរណារំលោ.ភចិញ្ចើមផ្លូវ

ហាណូយ៖ អាជ្ញាធរទីក្រុងហាណូយ ប្រទេសវៀតណាម បានសម្រេចរឹតបន្តឹងការអនុវត្តច្បាប់យ៉ាងតឹងរ៉ឹងបំផុត នាពាក់កណ្តាលឆ្នាំ២០២៦នេះ តាមរយៈការដាក់ចេញវិធានការផាកពិន័យជាប្រាក់យ៉ាងធ្ងន់ធ្ងរ លើអាជីវកម្មគ្រប់ប្រភេទដែលរំលោ.ភបំពានចិញ្ចើមផ្លូវសាធារណៈ។ យុទ្ធនាការនេះ ធ្វើឡើងក្នុងគោលបំណងដណ្តើមយកចិញ្ចើមផ្លូវមកវិញសម្រាប់ទុកជូនអ្នកថ្មើរជើង និងដើម្បីលើកកម្ពស់សណ្តាប់ធ្នាប់ របៀបរៀបរយ ក៏ដូចជាសោភ័ណភាពទីក្រុងឡើងវិញ។

ផ្អែកតាមទិន្នន័យនៃការចុះត្រួតពិនិត្យខ្សែផ្លូវចំនួន ១២០កន្លែង កាលពីឆ្នាំ២០២៥ កន្លងទៅ បានបង្ហាញលទ្ធផលគួរឱ្យព្រួយបារម្ភថា ចិញ្ចើមផ្លូវសាធារណៈរហូតដល់ទៅ ៩០% នៅក្នុងទីក្រុងហាណូយ ត្រូវបានរំលោភបំពានធ្វើជាកន្លែងលក់ដូរខុសច្បាប់ និងជាចំណតយានជំនិះ។

វិធានការបច្ចេកវិទ្យា និងកម្រិតប្រាក់ពិន័យដើម្បីធានាបាននូវប្រសិទ្ធភាពខ្ពស់ក្នុងការអនុវត្តច្បាប់ អាជ្ញាធរក្រុងបានសម្រេចដំឡើងកាមេរ៉ាសុវត្ថិភាពជិត ២,០០០គ្រឿង នៅតាមដងផ្លូវសំខាន់ៗ ដើម្បីស្វែងរកបទល្មើស និងធ្វើការផាកពិន័យពីចម្ងាយ។ លើសពីនេះ មន្ត្រីសាលាក្រុងហាណូយ ក៏កំពុងពិភាក្សាគ្នាពីលទ្ធភាពដំឡើងប្រាក់ពិន័យជាពីរដងបន្ថែមទៀត ចំពោះជនណាដែលនៅតែបន្តរឹងរូសមិនព្រមអនុវត្តតាម។

បច្ចុប្បន្ន យន្តការនៃការផាកពិន័យត្រូវបានបែងចែកជា២ទម្រង់ផ្អែកលើទំហំអាជីវកម្ម៖
-អាជីវកម្មខ្នាតតូច៖ អ្នកលក់ដូរចំណីអាហារលើចិញ្ចើមផ្លូវ ត្រូវប្រឈមនឹងការពិន័យប្រាក់ចាប់ពី ១០ ដល់ ១៨ដុល្លារអាមេរិក។
-អាជីវកម្មខ្នាតធំ៖ ហាងទំនិញ ឬអាជីវកម្មដែលមានការតម្រៀបតុ កៅអី ឱ្យភ្ញៀវអង្គុយរំលោភលើចិញ្ចើមផ្លូវ នឹងត្រូវរងការពិន័យធ្ងន់ធ្ងរ ចាប់ពី ១៥៧ ដល់ ២៣៥ដុល្លារអាមេរិក។

ទន្ទឹមនឹងការរៀបចំសណ្តាប់ធ្នាប់ អាជ្ញាធរក៏បានពង្រឹងការត្រួតពិនិត្យផ្នែកអនាម័យចំណីអាហារយ៉ាងម៉ឺងម៉ាត់ផងដែរ ដោយតម្រូវឱ្យអាជីវករលក់ដូរតាមទីសាធារណៈទាំងអស់ ត្រូវតែពាក់ស្រោមដៃ និងមានគំរបបិទបាំងអាហារឱ្យបានត្រឹមត្រូវ ដើម្បីការពារធូលីហុយចូល៕