ប្រទេសថៃ ៖ កាលពីល្ងាចថ្ងៃទី២៨ ខែមករា ឆ្នាំ២០២៤ លោកមេភូមិ ឈ្មោះ ម៉ាក់កាន់ អិនចាន់ បានទទួលដំណឹងពីពលរដ្ឋថា មានរថយន្តតូច១គ្រឿងជាប់នៅកណ្តាលស្ពានយោល ដែលតភ្ជាប់រវាងភូមិ២ និងភូមិ៩ ស្ថិតនៅឃុំវៀងថង ស្រុកស៊ូងម៉េន ខេត្ត Phrae ប្រទេសថៃ ។ ហេតុនេះ លោកមេភូមិក៏បានទំនាក់ទំនងទៅកាន់អាជ្ញាធរពាក់ព័ន្ធចុះមកត្រួតពិនិត្យ និងជួយអន្តរាគមន៍ ។

នៅចំណុចកើតហេតុ គឺជាស្ពានយោលបុរាណមានប្រវែងប្រមាណ១២០ម៉ែត្រ ដែលតភ្ជាប់រវាងភូមិ២ និងភូមិ៩ ស្ថិតនៅឃុំវៀងថង ស្រុកស៊ូងម៉េន ខេត្ត Phrae ហើយនៅភូមិ៩ គឺស្ថិតនៅឆ្ងាយពីសសរស្ពានប្រមាណ១៥ម៉ែត្រ ។ រថយន្តដែលជាប់នៅលើស្ពានយោលនេះ គឺជារថយន្តតូចពណ៌ស និងមានស្លាករថយន្ត ខេត្តឈៀងរ៉ាយ ។

រីឯកង់មុខខាងឆ្វេងរបស់រថយន្តបានធ្លាក់ទៅក្នុងប្រហោងស្ពានបាក់ ទើបបណ្តាលឱ្យរថយន្តនេះជាប់នៅមួយកន្លែង និងបើកទៅមុខអត់រួច ។ ជំហានដំបូង គេដឹងថា ស្ត្រីអ្នកបើកបររថយន្តនេះ មានអាយុ៣៨ឆ្នាំ គឺជាពលរដ្ឋមកពីស្រុកផ្សេង និងមិនធ្លាប់បើកបរនៅទីនេះពីមុនទេ ។ នាងបានចុះពីរថយន្ត ហើយមកសុំឱ្យអ្នកស្រុកជួយអន្តរាគមន៍ ។

តាមរយៈការសាកសួរស្ត្រីម្ចាស់រថយន្តឱ្យដឹងថា នាងមកពីស្រុកណងមួងខៃ ខេត្ត Phrae ហើយនាងមកកាន់ឃុំវៀងថង ស្រុកស៊ូងម៉េន ជាលើកដំបូង ដើម្បីមករកមិត្តភក្តិ ដែលមានផ្ទះនៅម្តុំក្បាលស្ពានវៀងថង ។ ហេតុនេះ នាងក៏បានបើកបររថយន្តតាម GPS ដោយសារវាបញ្ជាក់ថា បើនាងបើកឆ្លងកាត់ស្ពានយោលនេះ នាងនឹងមកដល់គោលដៅហើយ ។

នាងក៏បានបើករថយន្តឆ្លងកាត់ស្ពានយោលតាម GPS ប្រាប់ ប៉ុន្តែនៅពេលបើករថយន្តមកដល់ឃើញថា វាជាតំបន់ព្រៃ និងគ្មានផ្លូវបើកបន្តទៀតទេ ។ ដូច្នេះ នាងក៏បានបត់រថយន្តនៅត្រង់ក្បាលស្ពានដើម្បីមកចំណុចដើមវិញ ហើយពេលនាងបើករថយន្តបាន១៥ម៉ែត្រ ស្រាប់តែឈើនៅលើស្ពានយោលបាក់ ទើបកង់រថយន្តធ្លាក់នៅត្រង់ប្រហោងស្ពាន ។

នាងបន្តថា នាងរវល់តែមើល GPS និងពុំបានសង្កេតថា គ្មានស្ពានស៊ីម៉ងត៍នៅអមស្ពានយោលទេ ។ នៅពេលនាងបើករថយន្តឆ្លងកាត់ស្ពានឃើញថា វាមានសភាពរឹងមាំ ហើយគិតថា ស្ពាននេះមានមនុស្សឆ្លងកាត់ធម្មតា ។ ប៉ុន្តែនៅពេលរថយន្តនាងជាប់នៅលើស្ពាន ទើបនាងតក់ស្លុត ព្រោះចំណុចកើតហេតុនេះស្ថិតនៅចំណុចកណ្តាល នាងខ្លាចរថយន្តធ្លាក់ក្នុងទឹក ទើបចុះពីរថយន្តមកសុំឱ្យអ្នកស្រុកជួយសង្គ្រោះ ។

នាងបន្ថែមថា នាងមកពីស្រុកឆ្ងាយ ហើយមិនស្គាល់ផ្លូវទេ ។ នាងមិនដឹងថា មានស្ពានថ្មីនៅក្បែរនេះ ហើយក៏មិនដឹងថា គេហាមមិនឱ្យរថយន្តបើកបរឆ្លងកាត់ស្ពាននេះ ។ ដូច្នេះ នាងបានសំណូមពរមានការសរសេរស្លាកប្រកាស «ហាមចូល» ព្រោះខ្លាចអ្នកផ្សេងទៀតបើកបរឆ្លងកាត់ស្ពានដូចនាងដែរ ។ ក្រោយមក អាជ្ញាធរក្នុងតំបន់បាននាំគ្នាមកជួយអន្តរាគមន៍អូសរថយន្តរបស់នាងចេញពីស្ពានបានសម្រេច និងចំណាយពេលរហូតដល់២ម៉ោង ខណៈមានមនុស្សម្នាឈរមើលជាច្រើននាក់ ។

រីឯអ្នកឃើញហេតុការណ៍ប្រាប់ថា បានឃើញរថយន្តនេះបើកបរឡើងលើស្ពាន និងមិនខ្លាចគ្រោះថ្នាក់ ហើយពួកគេចង់ប្រាប់ដែរ តែប្រាប់មិនទាន់ ព្រោះនាងបានបើករថយន្តមកដល់ពាក់កណ្តាលស្ពានហើយ ។ ពេលនោះ អ្នកភូមិចង់ជិះម៉ូតូទៅប្រាប់ថា កុំឱ្យនាងបើករថយន្តត្រឡប់ក្រោយ ក៏មិនប្រាប់មិនទាន់ទៀត រហូតដល់កង់រថយន្តធ្លាក់ក្នុងប្រហោងស្ពានបែបនេះ ។

អ្នកភូមិបន្តថា តាមធម្មតា ស្ពានយោលមួយកន្លែងនេះ គ្មានអ្នកឆ្លងកាត់ញឹកញាប់ទេ ព្រោះវាសាងសង់ឡើងជិត៤០ឆ្នាំហើយ និងមានតែម៉ូតូកង់៣ ប៉ុណ្ណោះ ដែលបើកឆ្លងកាត់ស្ពាន ។ ប៉ុន្តែពេលឃើញរថយន្តតូចឆ្លងកាត់ធ្វើឱ្យអ្នកភូមិភ័យ ប៉ុន្តែសំណាងល្អ វាមិនបណ្តាលឱ្យបាត់បង់ដល់អាយុជីវិតអ្នកបើកបរ ។

ហេតុនេះ ពួកគេនឹងទំនាក់ទំនងទៅអាជ្ញាធរដើម្បីធ្វើស្លាកបិទប្រកាសថា «ហាមឆ្លងកាត់ស្ពាននេះ» ដោយសារជឿថា មានអ្នកផ្សេងទៀតដែលរស់នៅស្រុកផ្សេង នឹងបើកឡើងលើស្ពាននេះទៀត ដោយសារការមើល GPS ៕

Icon of the Seas គឺជាកប៉ាល់កម្សាន្តខ្នាតយក្សដែលមានទំហំធំបំផុតនៅលើពិភពលោក បានបង្ហាញខ្លួន និងផ្តល់សេវាកម្មដល់ភ្ញៀវទេសចរហើយ ។ កប៉ាល់នេះមានតម្លៃរហូតដល់២ពាន់លានដុល្លារអាមេរិក, មានទម្ងន់ប្រមាណ២សែន៥ម៉ឺន៨រយតោន និងមានប្រវែង៣៥០ម៉ែត្រ គឺវែងជាង Eiffel Tower របស់ប្រទេសបារាំងទៅទៀត ។

កប៉ាល់កម្សាន្តខ្នាតយក្ស Icon of the Seas គឺជារបស់ក្រុមហ៊ុន Royal Caribbean បានធ្វើដំណើរជាលើកដំបូងនៅទីក្រុងអៃអាមី រដ្ឋផ្លររីដា សហរដ្ឋអាមេរិក កាលពីថ្ងៃទី២៧ ខែមករា ឆ្នាំ២០២៤ ។ រីឯសំបុត្រជិះកប៉ាល់បានលក់ដាច់អស់គ្មានសល់ទៅឱ្យអតិថិជន តាំងពីថ្ងៃកក់សំបុត្រលើកដំបូងមកម៉្លេះ ។ វាជាកប៉ាល់កម្សាន្តដ៏ធំបំផុតនៅលើពិភពលោក ដែលគេបានចំណាយពេលផលិតអស់៩០០ថ្ងៃ នៅកន្លែងផលិតកប៉ាល់ក្នុងទីក្រុង Turku ប្រទេសហ្វាំងឡង់ ។

វាអាចផ្ទុកអ្នកដំណើរបានរហូតដល់៧.៦០០នាក់ ព្រមទាំងបុគ្គលិកបម្រើការនៅលើកប៉ាល់ ចំនួន២.៣៥០នាក់ទៀត ។ ហេតុនេះ វាអាចផ្ទុកមនុស្សស្មើនឹងចំនួនពលរដ្ឋដែលរស់នៅតាមទីក្រុងតូចៗដែរ ។

កប៉ាល់កម្សាន្តនេះមានប្រវែងរហូតដល់៣៥០ម៉ែត្រ គឺវែងជាង Eiffel Tower របស់ប្រទេសបារាំង ដែលមានកម្ពស់ត្រឹមតែ៣០០ម៉ែត្រ ។ វាមានកម្ពស់ស្មើនឹងអគារ២០ជាន់, មានបន្ទប់សម្រាកចំនួន២.៨០៥បន្ទប់, មានអាងហែលទឹកចំនួន៧ ដែលអាចផ្ទុកទឹកបានរហូតដល់៤ម៉ឺនលីត្រ គឺស្មើនឹងទឹកក្នុងបឹងមួយ ។ លើសពីនេះ នៅក្នុងកប៉ាល់មានភោជនីយដ្ឋាន និងក្លិបរាត្រីជាង៤០កន្លែង ដែលមានមុខម្ហូបជាច្រើនសម្រាប់អ្នកជិះកប៉ាល់កម្សាន្ត ថែមទាំងមានតារាចម្រៀង និងតារាកំប្លែង ចំនួន៥០នាក់ ។

ការធ្វើដំណើរជាលើកដំបូងរបស់កប៉ាល់កម្សាន្ត Icon of the Seas គឺមានគោលដៅទៅកាន់តំបន់ការ៉ាបៀនភាគខាងកើត ដោយត្រូវចំណាយពេលវេលាធ្វើដំណើរចំនួន៧ថ្ងៃ ។ គេបានចំណាយប្រាក់ចំនួន២ពាន់លានដុល្លារអាមេរិកដើម្បីផលិតកប៉ាល់នេះឡើង តាមរយៈការប្រើប្រាស់បច្ចេកវិទ្យាទំនើបចុងក្រោយ ។

បុគ្គលិកក្រុមហ៊ុន Royal Caribbean លើកឡើងថា កប៉ាល់ Icon of the Seas មិនប៉ះពាល់បរិស្ថានទេ ។ ក្រៅពីនេះ វាមានប្រព័ន្ធ Pyrolysis ដែលប្រើប្រាស់មីក្រូវ៉េវ ដើម្បីជួយបំលែងកាកសំណល់ទៅជាឧស្ម័នសម្រាប់ផលិតថាមពល រួមទាំងប្រព័ន្ធ Reverse Osmosis ជាប្រព័ន្ធបន្សុតទឹកស្អាតសម្រាប់ផ្គត់ផ្គង់ទឹកសាបស្ទើរទាំងអស់ក្នុងកប៉ាល់ ។

អ្នកនាំពាក្យក្រុមហ៊ុន Royal Caribbean ប្រាប់ថា កប៉ាល់នេះបានសន្សំសំចៃថាមពលច្រើនជាងកប៉ាល់ផលិតនាពេលបច្ចុប្បន្ន រហូតដល់២០% ។ លើសពីនេះ ក្រុមហ៊ុនបានដាក់ផែនការបង្ហាញកប៉ាល់បញ្ចេញកាបូនស្មើសូន្យ នៅឆ្នាំ២០៣៥ ផងដែរ ។ ទោះយ៉ាងណា អ្នកបរិស្ថាននានាបានបង្ហាញក្តីបារម្ភអំពីការប្រើប្រាស់ឧស្ម័នធម្មជាតិរាវជាឥន្ធនៈ ពីព្រោះវានឹងបញ្ចេញឧស្ម័នមេតានប៉ះពាល់ដល់បរិស្ថាន ៕

ក្នុងឱកាសបុណ្យចូលឆ្នាំថ្មី ក្រុមគ្រួសារភាគច្រើនតែងតែរៀបចំផ្កា ផ្លែឈើ ស្ករគ្រាប់ ភេសជ្ជៈ និងអាហារនានា ក៏ដូចជាអុជធូប ដើម្បីឧទ្ទិសកុសលផលបុណ្យដល់បុព្វការីជន ដោយសង្ឃឹមថា នឹងទទួលបានប្រសិទ្ធិពរជ័យជូនដល់កូនចៅ ឱ្យមានសុខភាពល្អ សុខសប្បាយ រកទទួលទានមានបានជាដើម។ ទោះជាយ៉ាងណា ផ្កាដែលដាក់សែនទេវតា ត្រូវតែជាផ្កា ៥ ប្រភេទដូចខាងក្រោមនេះ ដើម្បីទទួលបានហុងស៊ុយល្អពេញមួយឆ្នាំ។

១.ផ្កាឈូក៖ ផ្កាឈូក គឺជាផ្កាដែលមានក្លិនក្រអូបប្រណិត និងត្រូវបានចាត់ទុកថាមានបុគ្គលិកលក្ខណៈថ្លៃថ្នូរ បរិសុទ្ធ ច្បាស់លាស់។ តាមហុងស៊ុយ ផ្កានេះមានន័យថានាំសំណាង និងជោគជ័យ។

២.ផ្កាហ្សឺបេរ៉ា៖ ផ្កា Gerbera ក៏ជាផ្កាដែលមនុស្សជាច្រើនជ្រើសរើសថ្វាយនៅលើអាសនៈផងដែរ។ ផ្កានេះតាមហុងស៊ុយ មានអត្ថន័យនាំសំណាង និងភាពរុងរឿងដល់ម្ចាស់ផ្ទះ លើសពីនេះ ផ្កា gerbera ក៏បញ្ជាក់ពីសុខភាព និងភាពជាប់បានយូរផងដែរ។

៣.ផ្កាគ្រីសាន៖ ផ្កាគ្រីសាន តាមហុងស៊ុយមានន័យថានាំសំណាង និងជោគជ័យ។ ផ្កានេះគឺគេនិយមប្រើបំផុតក្នុងឱកាសបុណ្យចូលឆ្នាំថ្មី ដោយសារតែវាមានពណ៌លឿងភ្លឺ និងទាក់ភ្នែកជាមួយអត្ថន័យផ្សេងៗដូចជាភាពស្មោះ សុភមង្គលក្នុងជីវិត និងគង់វង្សយូរអង្វែង ។

៤.ផ្កាលីលីពណ៌ស៖ តាំងពីយូរយារណាស់មកហើយ ផ្កាលីលីពណ៌សត្រូវបានជ្រើសរើសជាផ្កាសម្រាប់តង្វាយអាសនៈ ព្រោះផ្កានេះតំណាងឱ្យភាពបរិសុទ្ធ ភាពពេញលេញ និងវិបុលភាព។

៥.ផ្កាកុលាបក្រហម៖ ជានិមិត្តរូបនៃក្ដីស្រឡាញ់ និងភាពរីករាយ។ នៅក្នុងក្បួនហុងស៊ុយ ពណ៌ក្រហមតំណាងឱ្យសំណាងល្អ ដូច្នេះការជ្រើសរើសផ្កាកុលាបមកតុបតែងប្រៀបដូចជាការទទួលពរជ័យពីព្រះ និងទ្រព្យហូរហៀរចូលផ្ទះផងដែរ។

ទោះជាយ៉ាងណា ចំនួនផ្កាគួរតែត្រូវបានដាក់នៅលើអាសនៈតាមហុងស៊ុយដូចគ្នានឹងចំនួនធូបដែរ ការរៀបចំផ្កាសម្រាប់អាសនៈគួរប្រើលេខសេសដូចជា ១,៣,៥,៧,៩,… ព្រោះលេខសេសនាំថាមពលវិជ្ជមានជានិមិត្តរូបនៃសំណាង។ ម្យ៉ាងទៀត ពេលថ្វាយតង្វាយលើអាសនៈ មិនត្រូវប្រើផ្កាក្រៀម ឬក្លែងក្លាយឡើយ ព្រោះនឹងនាំមកនូវសំណាងអាក្រក់ និងមិនបរិសុទ្ធ៕

បរទេស៖ ចំនួនអ្នកទេសចរចិនដែលធ្វើដំណើរកំឡុងបុណ្យចូលឆ្នាំនាពេលខាងមុខនេះ ត្រូវបានគេរំពឹងថានឹងបង្កើតកំណត់ត្រាថ្មីមួយជាមួយនឹងការធ្វើដំណើរចំនួន ៩ ពាន់លាននាក់នៅឆ្នាំ ២០២៤ ដែលជិតពីរដងកាលពីឆ្នាំមុន។

ប្រទេសចិនត្រូវបានគេចាត់ទុកថា មានប្រជាជនដែលធ្វើចំណាកស្រុកច្រើនជាងគេបំផុតនៅលើពិភពលោក ដូច្នេះនៅរដូវចូលឆ្នាំថ្មីនេះ ប្រទេសចិនរំពឹងថា ប្រជាជនរបស់ខ្លួននឹងត្រឡប់មកស្រុកកំណើតវិញដើម្បីជួបជុំគ្រួសារ និងមិត្តភក្តិ ដែលនេះនឹងធ្វើឱ្យតម្រូវការសម្រាប់ការជួបជុំគ្រួសារទេសចរណ៍កើនឡើង។ ពិធីបុណ្យចូលឆ្នាំថ្មីខាងមុខនេះ មានរយៈពេលចាប់ពីថ្ងៃទី ១០ ខែកុម្ភៈដល់ថ្ងៃទី ១៧ ខែកុម្ភៈដែលយូរជាងឆ្នាំ ២០២៣។

លោក Li Yang អនុរដ្ឋមន្ត្រីក្រសួងដឹកជញ្ជូនចិន បានប៉ាន់ប្រមាណថា អ្នកទេសចរនឹងមានការធ្វើដំណើរតាមរថយន្តប្រមាណ ៧.២ ពាន់លានដង រួមទាំងការធ្វើដំណើរតាមរថភ្លើងចំនួន ៤៨០ លានដងក្នុងអំឡុងពេលកំពូលនេះ កើនឡើង ៣៨% និង ១៨% រៀងគ្នាបើធៀបនឹងឆ្នាំ ២០១៩។ នៅថ្ងៃទី ២៦ ខែមករា ឆ្នាំ២០២៤ នេះអ្នកដំណើរប្រមាណ ១០.៦ លាននាក់បានធ្វើដំណើរតាមរថភ្លើង។

ការធ្វើដំណើរតាមអាកាសត្រូវបានគេព្យាករណ៍ថានឹងមានការធ្វើដំណើរប្រហែល ៨០ លានដង កើនឡើង ៩.៨% បើធៀបនឹងឆ្នាំ ២០១៩។ អាកាសយានដ្ឋានចំនួនពីរនៅទីក្រុងសៀងហៃបានប៉ាន់ប្រមាណថា ចរាចរណ៍អ្នកដំណើរកើនឡើង ៥៧.៦% បើធៀបនឹងឆ្នាំមុន ហើយជើងហោះហើរនៅទីក្រុងប៉េកាំងនឹងកើនឡើងជាង ៦០%។

រីឯចំនួនអ្នកទេសចរចិនដែលធ្វើដំណើរទៅក្រៅប្រទេសទំនងជាកើនឡើងបើធៀបនឹងឆ្នាំមុន ដោយសារក្រុមហ៊ុនអាកាសចរណ៍ចិនបានកើនឡើងជាង ២,៥០០ នៃជើងហោះហើរអន្តរជាតិក្នុងឱកាសបុណ្យចូលឆ្នាំថ្មី។ ក្រុមហ៊ុន Trip.com Group បាននិយាយថា ការកក់ការធ្វើដំណើរក្រៅប្រទេសរបស់ប្រទេសចិនក្នុងថ្ងៃឈប់សម្រាកនេះគឺខ្ពស់ជាងឆ្នាំ ២០២៣ ចំនួន ១០ ដង ដោយគោលដៅដែលលេចធ្លោជាងគេរួមមានប្រទេសថៃ ជប៉ុន និងកូរ៉េខាងត្បូង។

សម្រាប់ទេសចរណ៍ក្នុងស្រុកវិញ គោលដៅរដូវរងាគឺជាជម្រើសកំពូលសម្រាប់ភ្ញៀវទេសចរនៅក្នុងប្រទេសនេះ។ ទិន្នន័យ Trip.com បានបង្ហាញថាការស្វែងរកផលិតផលធ្វើដំណើរក្នុងរដូវរងាបានកើនឡើង ១០ ដងក្នុងរយៈពេលដូចគ្នាកាលពីឆ្នាំមុន ជាពិសេសទីក្រុង Harbin ក្នុងខេត្ត Heilongjiang៕

ប្រទេសថៃ ៖ កាលពីថ្ងៃទី២៨ ខែមករា ឆ្នាំ២០២៤ ប្រទេសថៃ និងចិន បានចុះហត្ថលេខាលើវិធានការលើកលែងទិដ្ឋាការរវាងគ្នាទៅវិញទៅមក ហើយវិធានការនេះនឹងអនុវត្តចាប់ពីថ្ងៃទី១ ខែមីនា ឆ្នាំ២០២៤ តទៅ ។ រដ្ឋមន្ត្រីការបរទេសថៃ លោក Parnpree Bahiddha-Nukara លើកឡើងថា វាជាការមានទំនុកចិត្តលើគ្នាទៅវិញទៅមកគ្រប់ផ្នែករវាងប្រទេសថៃ និងចិន ខណៈលោក Wang Yi បានថ្លែងអំណរគុណប្រទេសថៃ ដែលជួយគាំទ្រគោលការណ៍ «ប្រទេសចិនតែមួយ» ។

កិច្ចសហការគ្នានេះ លោក Parnpree Bahiddha-Nukara ឧបនាយករដ្ឋមន្ត្រី និងរដ្ឋមន្ត្រីការបរទេសថៃ ព្រមទាំងលោក Wang Yi ជំនួយការគណៈកម្មការកណ្តាលផ្នែកការបរទេសនៃបក្សកុម្មុយនិស្តចិន និងជារដ្ឋមន្ត្រីការបរទេសចិន បានចុះហត្ថលេខាលើឯកសារសំខាន់រវាងប្រទេសថៃ និងចិន ។ វាជាវិធានការលើកលែងទិដ្ឋាការរវាងគ្នាទៅវិញទៅមកសម្រាប់ពលរដ្ឋទាំងពីរប្រទេសដែលកាន់លិខិតឆ្លងដែនធម្មតា និងលិខិតឆ្លងដែនរាជការ ដោយអនុវត្តចាប់ពីថ្ងៃទី១ ខែមីនា ឆ្នាំ២០២៤ តទៅ ។

លោក Parnpree Bahiddha-Nukara ឧបនាយករដ្ឋមន្ត្រី និងរដ្ឋមន្ត្រីការបរទេសថៃថ្លែងថា ការធ្វើដំណើរទៅមករកគ្នារបស់ពលរដ្ឋទាំងពីរប្រទេស, ការដើរកម្សាន្ត ឬការទំនាក់ទំនងផ្នែកអាជីវកម្មផ្សេងៗនឹងធ្វើឡើងប្រកបដោយលក្ខណៈងាយស្រួល ក្រោយប្រទេសទាំងពីរបានចុះហត្ថលេខាលើវិធានការលើកលែងទិដ្ឋាការជាមួយគ្នា ។ ហេតុនេះ វានឹងជំរុញដល់វិស័យទេសចរណ៍របស់ប្រទេសថៃ និងចិន យ៉ាងពិតប្រាកដ ។

លោករដ្ឋមន្ត្រីការបរទេសថៃបញ្ជាក់ថា ជាពិសេស នៅឆ្នាំ២០២៥ វានឹងក្លាយជាឱកាសពិសេសដែលប្រទេសថៃ នឹងចិន នឹងប្រារព្ធខួបលើកទី៥០ឆ្នាំ នៃទំនាក់ទំនងការទូតថៃ-ចិន ខណៈប្រទេសទាំងពីរបានសហការគ្នាយ៉ាងស្អិតរមួតស្រាប់ហើយ គឺប្រទេសថៃ និងចិន នឹងបង្កើនកិច្ចសហការគ្រប់ផ្នែក ។

ចំណែកលោក Wang Yi បានសរសើរប្រទេសថៃ ដែលប្រកាន់យកគោលការណ៍ «ប្រទេសចិនតែមួយ» និងគាំទ្រគំនិតផ្តួចផ្តើមជាសកលរបស់លោកប្រធានាធិបតីចិន ស៊ី ជិនពីង ។ លោកជឿជាក់ថា វិធានការលើកលែងទិដ្ឋាការនេះ នឹងជំរុញដល់ការផ្លាស់ប្តូររវាងពលរដ្ឋទាំងពីរប្រទេស, ចំនួនភ្ញៀវទេសចរចិនមកប្រទេសថៃនឹងកើនឡើង ហើយប្រទេសចិនរីករាយទទួលស្វាគមន៍ពលរដ្ឋថៃទៅកម្សាន្តនៅចិនផងដែរ ។

ក្រៅពីនេះ ភាគីទាំងពីរនឹងចុះហត្ថលេខាលើការនាំចេញផលិតផលធ្វើពីសាច់សត្វ និងដើមស្រល់ពីប្រទេសថៃទៅចិន ។ ហេតុនេះ ប្រទេសចិនរីករាយឱ្យប្រទេសថៃនាំចេញទំនិញកសិកម្មកាន់តែច្រើនថែមទៀត និងគាំទ្រឱ្យក្រុមហ៊ុនចិនមកវិនិយោគនៅប្រទេសថៃ ដោយសហការលើផ្នែករថយន្តអគ្គិសនី, សេដ្ឋកិច្ចឌីជីថលផ្នែកបរិស្ថានពណ៌បៃតង និងសហការអនុវត្តច្បាប់បង្ក្រាបឧក្រិដ្ឋកម្មឆ្លងដែន, ការបោកប្រាស់តាមទូរស័ព្ទ, ការភ្នាល់តាមអនឡាញ និងបង្ក្រាបថ្នាំញៀនក្នុងប្រទេសទាំងពីរ ។

ការចុះហត្ថលេខាលើវិធានការលើកលែងទិដ្ឋាការនេះ ប្រទេសថៃសង្ឃឹមថា នឹងមានភ្ញៀវទេសចរចិនយ៉ាងហោចណាស់ ចំនួន៨លាននាក់ធ្វើដំណើរមកកម្សាន្តនៅប្រទេសថៃ ក្នុងឆ្នាំ២០២៤ ហើយប្រទេសថៃនឹងទទួលបានប្រាក់ចំណូលប្រមាណ៣២០ពាន់លានបាត ៕