បរទេស៖ ត្រីបាឡែនពណ៌ប្រផេះដែលជាសត្វដ៏កម្រត្រូវបានគេគិតថាផុតពូជនៅក្នុងមហាសមុទ្រអាត្លង់ទិកតាំងពីទសវត្សរ៍ឆ្នាំ ១៧០០ មកម្លេះ ប៉ុន្តែស្រាប់តែថ្មីៗនេះវាបានបង្ហាញខ្លួនម្តងទៀតនៅជិតកោះ Nantucket រដ្ឋ Massachusetts សហរដ្ឋអាមេរិក។

យោងតាម NBC News ដែលបានចុះផ្សាយនៅថ្ងៃ៦ ខែមីនា ឆ្នាំ២០២៤ ថាត្រីបាឡែននេះត្រូវបានគេប្រទះឃើញនៅចម្ងាយ ៣០ ម៉ាយពីភាគខាងត្បូងនៃកោះ Nantucket កាលពីថ្ងៃទី១ ខែមីនា ដោយបានឃើញវាធ្វើការជ្រមុជទឹក និងហែលលេងជុំវិញសមុទ្រ ហាក់ដូចជាកំពុងរកចំណី។

បើយោងតាមអ្នកវិទ្យាសាស្ត្រនៅមជ្ឈមណ្ឌល Anderson Cabot of the New England Aquarium សម្រាប់ជីវិតសត្វសមុទ្របាននិយាយថា ប្រភេទសត្វនេះបានបាត់ខ្លួនពីមហាសមុទ្រអាត្លង់ទិកនៅសតវត្សទី ១៨ ដែលមួយផ្នែកដោយសារតែការនេសាទត្រីបាឡែន។ ទោះជាយ៉ាងណា ការរកឃើញថ្មីៗនេះ បានបង្ហាញពីសារៈសំខាន់នៃការស្ទង់មតិ ដោយយើងរំពឹងថានឹងរកឃើញត្រីបាឡែនកម្រជាច្រើនប្រភេទទៀតនៅក្នុងមហាសមុទ្រនេះ។

ក្រុមអ្នកស្រាវជ្រាវក៏បានឱ្យដឹងទៀតថា ជាទូទៅត្រីបាឡែនពណ៌ប្រផេះភាគច្រើនគឺវាលូតលាស់នៅតំបន់ប៉ាស៊ីហ្វិក ប៉ុន្តែដោយសារបម្រែបម្រួលអាកាសធាតុអាចជាមូលហេតុដែលត្រីបាឡែនពណ៌ប្រផេះបង្ហាញសញ្ញាទៅសមុទ្រអាត្លង់ទិកវិញ។ ត្រីបាឡែននេះប្រហែលជាបានឆ្លងកាត់ Northwest Passage ដែលជាផ្លូវឆ្លងកាត់មហាសមុទ្រអាកទិកតភ្ជាប់មហាសមុទ្រប៉ាស៊ីហ្វិកនិងមហាសមុទ្រអាត្លង់ទិក។ ការឡើងកំដៅផែនដីធ្វើឱ្យ Northwest Passage គ្មានទឹកកកក្នុងរដូវក្តៅ ដោយផ្តល់ផ្លូវសម្រាប់ត្រីបាឡែនពណ៌ប្រផេះហែលចូលទៅក្នុងមហាសមុទ្រអាត្លង់ទិក។

ទោះជាយ៉ាងណាក៏ដោយ មហាសមុទ្រកាន់តែក្តៅធ្វើឱ្យអ្នកជំនាញអាកាសធាតុព្រួយបារម្ភអំពីបញ្ហាជាច្រើនដូចជាខ្យល់ព្យុះខ្លាំង ការបំផ្លាញថ្មប៉ប្រះទឹកផ្កាថ្ម និងការរលាយទឹកកកសមុទ្រជាដើម។ ការប្រែប្រួលអាកាសធាតុក៏ជះឥទ្ធិពលយ៉ាងខ្លាំងដល់ប្រភេទត្រីបាឡែនផ្សេងៗទៀតផងដែរ ក្រៅពីត្រីបាឡែនពណ៌ប្រផេះ។ ជាឧទាហរណ៍ ត្រីបាឡែនខាងជើងអាត្លង់ទិក ដែលជាប្រភេទសត្វជិតផុតពូជនៅក្នុងបញ្ជីក្រហមរបស់សហភាពអន្តរជាតិសម្រាប់ការអភិរក្សធម្មជាតិ (IUCN) គឺកាន់តែតិចទៅៗ ដោយសារអាកាសធាតុក្តៅខ្លាំងពេក៕

គេហទំព័រ amusingplanet បានផ្សព្វផ្សាយពីរូបភាពទឹករលកសមុទ្ររាងការ៉េ ឬរលកសមុទ្រចម្លែក ឈ្មោះថា «Cross Wave ឬ Cross Sea» ដែលបានកើតឡើងនៅប្រទេសបារាំង ។ នេះចាត់ទុកថា គឺជាហេតុការណ៍មួយដែលកម្រកើតឡើងណាស់ ហើយមូលហេតុដែលបណ្តាលឱ្យទឹករលកសមុទ្រក្លាយជារាងការ៉េបែបនេះ ដោយសារតែលក្ខខណ្ឌអាកាសធាតុ២ផ្សេងគ្នា ។

បើគេសម្លឹងមើលទៅផ្ទៃខាងលើរបស់ទឹករលករាងការ៉េឃើញថា វាពិតជាមានរូបរាងស្រស់ស្អាត និងប្លែកភ្នែកយ៉ាងខ្លាំង ប៉ុន្តែអ្នកជំនាញលើកឡើងថា ទឹករលករាងការ៉េ ឬរាង៤ជ្រុងនេះ នឹងផ្តល់គ្រោះថ្នាក់ខ្លាំងដល់មនុស្ស ជាពិសេស វាអាចបង្កគ្រោះថ្នាក់ដល់នាវាសមុទ្រ ដែលត្រូវប្រឈមនឹងទឹករលកមកពីទិសដៅ២ផ្សេងគ្នាក្នុងពេលតែមួយ ។ ទឹករលកប្រភេទនេះពិតជាមានកម្លាំងខ្លាំងក្លា ហើយវាអាចធ្វើឱ្យនាវាសមុទ្រក្រឡាប់បាន ។

ទឹករលកសមុទ្រអាចបម្លាស់ទីបានក្នុងចម្ងាយរាប់ពាន់គីឡូម៉ែត្រនៅលើផ្ទៃទឹកសមុទ្រ បើទោះជាពេលមានខ្យល់ព្យុះបោកបក់ខ្លាំង ឬនៅពេលមានអាកាសធាតុល្អ គ្មានភ្លៀងធ្លាក់ក្តី ក៏អាចបណ្តាលឱ្យកើតបាតុភូតទឹករលកសមុទ្ររាងការ៉េដែរ រួមទាំងទឹករលកទូទៅ ។ នៅពេលមានហេតុការណ៍ប៉ះគ្នារវាងទឹករលក២ប្រភេទ ដែលបម្លាស់ទៅមកពីទិសដៅផ្សេងគ្នា វានឹងបណ្តាលឱ្យកើតទឹករលកសមុទ្ររាងការ៉េ ដូចគេបានឃើញក្នុងរូបភាពទាំងនេះ ។

បើទោះជាទឹករលកសមុទ្ររាងការ៉េមានគ្រោះថ្នាក់ខ្លាំងក្តី ប៉ុន្តែទឹករលកប្រភេទនេះពុំសូវកើតឡើងញឹកញាប់ទេ ។ គេកម្របានឃើញទឹករលកសមុទ្របែបនេះណាស់ ដោយសារកម្លាំងខ្យល់បក់នៅផ្នែកខាងលើផ្ទៃសមុទ្រ នឹងបំផ្លាញរូបរាងរបស់ទឹករលករាងការ៉េ និងទិសដៅរបស់វាបាន ។ នេះបើតាមការផ្សព្វផ្សាយរបស់គេហទំព័រ amusingplanet ៕

ប្រទេសជប៉ុន ៖ ក្រុមហ៊ុនជប៉ុនឈ្មោះ Uber Eats បានចាប់ផ្តើមប្រើប្រាស់គ្រឿងយន្តដឹកជញ្ជូនម្ហូបអាហារនៅតាមតំបន់តូចៗក្នុងទីក្រុងតូក្យូ ហើយក្រុមហ៊ុននេះសង្ឃឹមថា នឹងអាចពង្រីកតំបន់ចែកចាយអាហារនៅទូទាំងប្រទេសជប៉ុន ។ គ្រឿងយន្តនេះអាចធ្វើដំណើរតាមដងផ្លូវនានាដើម្បីដឹកជញ្ជូនអាហារឱ្យអតិថិជន ហើយវាអាចដើរគេចពីមនុស្ស ឬវត្ថុនៅបាំងមុខបាន ។

សារព័ត៌មាន AFP បានរាយការណ៍ពីទីក្រុងតូក្យូ ប្រទេសជប៉ុន កាលពីថ្ងៃទី៦ ខែមីនា ឆ្នាំ២០២៤ ថា ជប៉ុនបានប្រឈមមុខនឹងការខ្វះខាតកម្លាំងពលកម្ម ហើយជប៉ុនបានធ្វើវិសោធនកម្មច្បាប់ចរាចរណ៍ កាលពីឆ្នាំ២០២៣ ដើម្បីជួយឱ្យគ្រឿងយន្តដឹកជញ្ជូនអាហារអាចធ្វើដំណើរនៅតាមផ្លូវសាធារណៈបាន ។ ក្រោយពីជប៉ុនធ្វើវិសោធនកម្មច្បាប់ចរាចរណ៍រួចមក ក្រុមហ៊ុនជាច្រើនបានសាកល្បងប្រើប្រាស់គ្រឿងយន្តតូចៗ និងមានរូបរាងគួរឱ្យស្រឡាញ់សម្រាប់ដឹកអាហារ និងទំនិញផ្សេងៗឱ្យអតិថិជន ។

ក្នុងចំណោមក្រុមហ៊ុនទាំងនេះ ក្រុមហ៊ុន Uber Eats បានផលិតគ្រឿងយន្ត Uber Eats មានរូបរាងស្អាត, មានចង្កៀងមុខរាង៤ជ្រុង ដូចកែវភ្នែកមនុស្ស និងមានកង់សរុបចំនួន៦ សម្រាប់ដឹកអាហារនៅតាមដងផ្លូវ ។ គ្រឿងយន្តនេះអាចគណនាប្រវែងផ្លូវដោយខ្លួនវា តាមរយៈការប្រើប្រាស់ Sensor ដើម្បីគេចពីមនុស្សដើរនៅតាមផ្លូវ និងគេចពីវត្ថុនៅបាំងផ្លូវផ្សេងៗ ។

គ្រឿងយន្តដឹកជញ្ជូនអាហាររបស់ក្រុមហ៊ុន Uber Eats បានបម្លាស់ទីក្នុងល្បឿនលឿនបំផុត ស្មើនឹង៥.៤គីឡូម៉ែត្រក្នុង១ម៉ោង ។ លើសពីនេះ ក្រុមហ៊ុនបានបំពាក់នូវអំពូលភ្លើងតូចៗនៅជុំវិញគំរបរបស់វា និងមានមនុស្សបញ្ជាផងដែរក្នុងករណីមានបញ្ហាកើតឡើង ។

លោក Alvin U ប្រធានគ្រប់គ្រងទីផ្សាររបស់ក្រុមហ៊ុន Uber Eats ប្រទេសជប៉ុន និយាយថា ជំហានដំបូង ក្រុមហ៊ុននឹងកំណត់តំបន់ផ្តល់សេវាកម្មដឹកអាហារតាមគ្រឿងយន្ត ហើយអ្នកប្រើប្រាស់កម្មវិធីដឹកអាហារតាមគ្រឿងយន្ត ពួកគេត្រូវចេញមករង់ចាំនៅខាងក្រៅផ្ទះ ឬអគារ រហូតដល់គ្រឿងយន្តមកដល់ ។ ប៉ុន្តែនៅថ្ងៃអនាគត គ្រឿងយន្តនេះនឹងអាចធ្វើដំណើរទៅដល់មុខទ្វារការិយាល័យ, អាផាតមិន ឬមុខបន្ទប់អគារខ្ពស់ៗ រហូតដល់ផ្តល់សេវាកម្មនៅតាមតំបន់ជនបទទៀតផង ។

លោក Alvin U ប្រធានគ្រប់គ្រងទីផ្សារនិយាយថា ៖ «ភ្នាក់ងារដឹកអាហារបច្ចុប្បន្ននេះ ពុំចាំបាច់បារម្ភពីការបាត់បង់ការងារទេ ពីព្រោះរយៈពេល៥ឆ្នាំ ឬ១០ឆ្នាំទៀត នឹងមានការងារផ្នែកដឹកជញ្ជូនទំនិញសម្រាប់មនុស្សក្នុងកម្មវិធីរបស់ក្រុមហ៊ុន Uber Eats ជានិច្ច» ។

បច្ចុប្បន្ន អតិថិជនប្រើប្រាស់កម្មវិធី Uber Eats នៅប្រទេសជប៉ុន ពុំអាចជ្រើសរើសសេវាកម្មគ្រឿងយន្តដឹកជញ្ជូនអាហារបានទេ ប៉ុន្តែប្រសិនបើទទួលបានសិទ្ធិ គឺពួកគេអាចទទួល ឬបដិសេធសេវាកម្មនេះតាមតម្រូវការ ៕

សហរដ្ឋអាមេរិក៖ ស្ថាបនិកក្រុមហ៊ុន Amazon លោក Jeff Bezos បានក្លាយជាកំពូលមហាសេដ្ឋីពិភពលោកជាមួយនឹងទ្រព្យសម្បត្តិ ២០០ ពាន់លានដុល្លារ ដោយបានផ្តួល Elon Musk ឱ្យឈរត្រឹមតំណែងលេខ ៣ វិញ ខណៈលោកឈរក្នុងតំណែងលេខ ២ និងថៅកែ LVMH លោក Bernard Arnault ឈរក្នុងតំណែងលេខ ១។

កាលពីពេលថ្មីៗនេះ យោងតាម Bloomberg Billionaires Index បានឱ្យដឹងថា បច្ចុប្បន្នស្ថាបនិក Amazon Jeff Bezos មានទ្រព្យសម្បត្តិសរុប ២០០ ពាន់លានដុល្លារអាមេរិក ខណៈដែល Elon Musk មានទ្រពសម្បត្តិត្រឹមតែ ១៩៨ ពាន់លានដុល្លារអាមេរិកប៉ុណ្ណោះ។ ស្ថាបនិកក្រុមហ៊ុន Amazon វ័យ ៦០ ឆ្នាំរូបនេះបានយកមកវិញនូវតំណែងកំពូលមហាសេដ្ឋីពិភពលោក បន្ទាប់ពីបានបាត់បង់តំណែងនេះអស់រយៈពេល ៣ឆ្នាំកន្លងទៅ ដោយទម្លាក់លោក Elon Musk នាយកប្រតិបត្តិ Tesla ចំនួន ២ ពាន់លានដុល្លារ។

បើយោងតាម CNN ភាគហ៊ុនរបស់ក្រុមហ៊ុន Tesla បានធ្លាក់ចុះជាង ៧% កាលពីថ្ងៃទី៤ ខែមីនា ដែលការអភិវឌ្ឍន៍នេះបានធ្វើឱ្យទ្រព្យសម្បត្តិរបស់ Musk ធ្លាក់ចុះ ១៧.៦ ពាន់លានដុល្លារក្នុងរយៈពេលត្រឹមតែមួយថ្ងៃប៉ុណ្ណោះ។ ចាប់តាំងពីដើមឆ្នាំមក គាត់បានខាតបង់ច្រើនជាង ៣១ ពាន់លានដុល្លារ នៅពេលដែលភាគហ៊ុន Tesla បានធ្លាក់ចុះ ២៤%។ ទន្ទឹមនឹងនេះដែរ ទ្រព្យសម្បត្តិសុទ្ធរបស់ Bezos បានកើនឡើងចំនួន ២៣ ពាន់លានដុល្លារកាលពីឆ្នាំមុន។ ដូច្នេះសរុបមក ភាគហ៊ុនរបស់ក្រុមហ៊ុន Amazon បានកើនឡើងពីរដងចាប់តាំងពីចុងឆ្នាំ ២០២២ ហើយកំពុងស្ថិតនៅលើផ្លូវដើម្បីកំណត់កម្រិតខ្ពស់ជាប្រវត្តិសាស្រ្តថ្មី។

ក្នុងរយៈពេលមួយឆ្នាំកន្លងទៅ បុរសមានបំផុតក្នុងពិភពលោកបានផ្លាស់ប្តូរជាបន្តបន្ទាប់។ នៅខែឧសភា ឆ្នាំ២០២៣ ថៅកែ LVMH លោក Bernard Arnault បានវ៉ាដាច់ Elon Musk ក្លាយជាមហាសេដ្ឋីលំដាប់លេខ ១ លើភពផែនដីជាមួយទ្រពសម្បត្តិ ២២៥.៧ ពាន់លានដុល្លារអាមេរិក ខណៈនាយកប្រតិបត្តិ Tesla លោក Elon Musk ឈរត្រឹមតំណែងលេខ ២។ បន្ទាប់មកនៅពេលថ្មីៗនេះ ស្ថាបនិកក្រុមហ៊ុន Amazon លោក Jeff Bezos ក៏បានទម្លាក់លោក Elon Musk ឱ្យឈរត្រឹមតំណែងលេខ ៣ វិញ ខណៈលោកឈរក្នុងតំណែងលេខ ២។

គួរបញ្ជាក់ដែរថា បច្ចុប្បន្នជាមហាសេដ្ឋីពិភពលោកលំដាប់លេខ ១ បានទៅលើថៅកែ LVMH លោក Bernard Arnault ជាមួយទ្រពសម្បត្តិ ២២៥.៧ ពាន់លានដុល្លារអាមេរិក និងលេខ ២ បានទៅលើស្ថាបនិកក្រុមហ៊ុន Amazon លោក Jeff Bezos ជាមួយទ្រព្យសម្បត្តិ ២០០ ពាន់លានដុល្លារអាមេរិក, ខណៈលេខ ៣ បានទៅលើនាយកប្រតិបត្តិ Tesla លោក Elon Musk ជាមួយទ្រពសម្បត្តិ ១៩៨ ពាន់លានដុល្លារអាមេរិក, និងលេខ ៤ បានទៅលើនាយកប្រតិបត្តិ Meta លោក Mark Zuckerberg ជាមួយទ្រពសម្បត្តិ ១៧៦.៧ ពាន់លានដុល្លារអាមេរិក៕

ប្រទេសជប៉ុន ៖ សារព័ត៌មានស៊ិនហួររាយការណ៍ថា អាជ្ញាធរខេត្តយ៉ាម៉ាណាស៊ី ដែលស្ថិតនៅខាងលិចទីក្រុងតូក្យូ បានកំណត់គោលការណ៍ប្រមូលថ្លៃសេវាឡើងភ្នំហ្វូជិ (Fuji) ពីភ្ញៀវទេសចរដែលធ្វើដំណើរតាមផ្លូវពេញនិយមបំផុត ចំនួន២.០០០យេនក្នុងម្នាក់ (ឬស្មើប្រមាណ១៤ដុល្លារអាមេរិក) ។ ការប្រមូលថ្លៃសេវាពីភ្ញៀវទេសចរនេះ នឹងអនុវត្តចាប់ពីថ្ងៃទី១ ខែកក្កដា ឆ្នាំ២០២៤ តទៅ ដែលជារដូវកាលឡើងភ្នំហ្វូជិ នៅឆ្នាំ២០២៤ ។

អាជ្ញាធរខេត្តយ៉ាម៉ាណាស៊ី លើកឡើងថា ពួកគេនឹងរៀបចំទីតាំងឱ្យភ្ញៀវទេសចរទាំងអស់បង់ប្រាក់ បើពួកគេចង់ឡើងទៅកម្សាន្តនៅលើភ្នំហ្វូជិ ។ ចំណែកមូលហេតុដែលអាជ្ញាធរជប៉ុនប្រមូលថ្លៃសេវាឡើងភ្នំ គឺក្នុងគោលបំណងកាត់បន្ថយការកកស្ទះដោយសារចំនួនភ្ញៀវទេសចរនៅលើភ្នំច្រើនលើសលប់ ហើយអាជ្ញាធរនឹងយកប្រាក់ទាំងនេះបង្កើតវិធានការគាំទ្រសុវត្ថិភាពសម្រាប់ភ្ញៀវទេសចរ ។

ក្រុមអ្នកឡើងភ្នំទាំងអស់ នឹងត្រូវបង់ប្រាក់ខ្ពស់រហូតដល់៣.០០០យេនក្នុង១លើក (ឬស្មើប្រមាណ២១ដុល្លារអាមេរិក) រួមទាំងថ្លៃសេវាតាមការស្ម័គ្រចិត្ត ចំនួន១.០០០យេន (ឬស្មើប្រមាណ៦ដុល្លារអាមេរិក) នាពេលបច្ចុប្បន្ន សម្រាប់ថ្លៃការពារ និងថែរក្សាភ្នំហ្វូជិ ផងដែរ ។

រដូវកាលឡើងភ្នំហ្វូជិ គឺរហូតដល់ពាក់កណ្តាលខែកញ្ញា ឆ្នាំ២០២៤ ហើយភ្ញៀវទេសចរអាចមកបង់ប្រាក់នៅតាមទីតាំងបង់ប្រាក់ដែលធ្វើការជារៀងរាល់ថ្ងៃ ។ អាជ្ញាធរនឹងកំណត់ចំនួនភ្ញៀវទេសចរឡើងលើភ្នំ ប្រសិនបើមានអ្នកឡើងភ្នំច្រើនជាង៤.០០០នាក់ក្នុង១ថ្ងៃ ។ ប៉ុន្តែនឹងមានករណីលើកលែងផងដែរ ជាពិសេស សម្រាប់អ្នកដែលបានកក់តូបស្បូវសម្រាកនៅលើភ្នំ ។

ការប្រកាសប្រមូលថ្លៃសេវាឡើងភ្នំពីភ្ញៀវទេសចរ ដោយសារបច្ចុប្បន្ននេះ អាជ្ញាធរជប៉ុនព្រួយបារម្ភថា ភ្ញៀវទេសចរអាចឡើងភ្នំគ្មានសុវត្ថិភាព ដូចជា ៖ ពួកគេបានឡើងទៅដល់គោលដៅកំពូលភ្នំតែម្តង ដោយគ្មានការឈប់សម្រាកនៅតាមផ្លូវ (Bullet Climbing) ។

ភ្នំហ្វូជិ គឺជាភ្នំខ្ពស់បំផុតនៅប្រទេសជប៉ុន វាមានកម្ពស់៣.៧៧៦ម៉ែត្រ ។ ភ្នំហ្វូជិ ស្ថិតនៅក្នុងចន្លោះខេត្តយ៉ាម៉ាណាស៊ី និងខេត្តស៊ីហ្ស៊ូអូកា ត្រូវបានចាត់ទុកថា គឺជាសម្បត្តិបេតិកភណ្ឌពិភពលោក របស់អង្គការយូណេស្កូ (UNESCO) ។ អាជ្ញាធរជប៉ុននឹងអនុញ្ញាតឱ្យភ្ញៀវទេសចរឡើងកម្សាន្តលើភ្នំនេះ ចាប់ពីខែកក្កដា រហូតដល់ខែកញ្ញា ឆ្នាំ២០២៤ ៕