បរទេស៖ កាលពីថ្ងៃទី១៦ ខែមីនា ឆ្នាំ២០២៤ យោងតាមការស្ទង់មតិថ្មីមួយបានបង្ហាញថា អង់គ្លេសគឺជាប្រទេសមួយដែលមិនសូវសប្បាយរីករាយ ហើយប្រជាជនអង់គ្លេសភាគច្រើនមិនសូវសប្បាយចិត្តនោះទេ។
ចក្រភពអង់គ្លេសត្រូវបានគេដាក់ឈ្មោះថាជាប្រទេសក្រៀមក្រំជាងគេទីពីរលើពិភពលោក ដោយសារតែប្រជាជនមានទុក្ខព្រួយច្រើនបំផុត បន្ទាប់ពីប្រទេសនៅទ្វីបអាហ្វ្រិក នេះបើតាមការស្ទង់មតិដោយ Sapien Labs ដែលជាអង្គការសរសៃប្រសាទពិភពលោក។

យោងតាមការស្ទង់មតិនេះ សុខភាពផ្លូវចិត្តរបស់ជនជាតិអង់គ្លេសបានធ្លាក់ចុះចាប់តាំងពីជំងឺរាតត្បាត COVID-19 ហើយបង្ហាញថា “មិនមានសញ្ញានៃការជាសះស្បើយឡើងវិញទេ”។ របាយការណ៍ប្រចាំឆ្នាំទី ៤ របស់ Sapien Labs បានវាយតម្លៃសុខភាពផ្លូវចិត្តរបស់អ្នកចូលរួមអ៊ីនធឺណិតចំនួន ៤១៩,១៧៥ នៅទូទាំង ៧១ ប្រទេស។ លទ្ធផលបានបង្ហាញឱ្យឃើញថា ក្នុងចំណោមប្រទេសចំនួន ៧១ ដែលមានប្រជាជនក្រៀមក្រំជាងគេនោះរួមមាន ចក្រភពអង់គ្លេស អៀរឡង់ អូស្ត្រាលី និងនូវែលសេឡង់ ស្ថិតក្នុងក្រុមបាតតារាង ដោយប្រជាជនអង់គ្លេសមានកម្រិតខ្ពស់ជាងគេនៃភាពក្រៀមក្រំនេះ ទើប Sapien Labs ចាត់ថ្នាក់ថា ចក្រភពអង់គ្លេសជាប្រទេសក្រៀមក្រំជាងគេទីពីរលើពិភពលោក។

ទោះជាយ៉ាងណា ដើម្បីកំណត់សុខភាពផ្លូវចិត្តរបស់ប្រទេសនីមួយៗ អង្គការបានសួរបុគ្គលចំនួន ៤៧ សំណួរអំពី “អារម្មណ៍ និងទស្សនវិស័យ” របស់ពួកគេក្នុងអន្តរកម្មសង្គម ក៏ដូចជាចលនា និងការលើកទឹកចិត្ត រួមទាំងការសម្របខ្លួន និងភាពធន់ក្នុងចំណោមកត្តាផ្សេងៗទៀត។ ដោយជនជាតិអង់គ្លេសប្រមាណ ៣៥% បាននិយាយថា “ពួកគេមិនសប្បាយចិត្ត និងពិបាកចិត្តខ្លាំងណាស់” ខណៈពេលដែល Sapien Labs កត់ចំណាំថា ចម្លើយរបស់ពួកគេបានឈានដល់ការសន្និដ្ឋានស្រដៀងគ្នា។

ចំពោះមូលហេតុដែលប្រជាជនក្នុងប្រទេសនេះមិនសូវមានភាពរីករាយ គឺដោយសារការភ័យខ្លាចនៃជំងឺរាតត្បាត COVID-19 ដែលបណ្តាលឱ្យរក្សាគម្លាត ហើយមនុស្សតែងតែទទួលទានអាហារកែច្នៃជាជាងបរិភោគបន្លែផ្លែឈើ លើសពីនេះកុមារត្រូវបានផ្តល់ស្មាតហ្វូន និងលេងឧបករណ៍អេឡិចត្រូនិចច្រើនពេក ធ្វើឱ្យទំនាក់ទំនងរវាងសមាជិកគ្រួសារកាន់តែឃ្លាតឆ្ងាយពីគ្នា។ ដូច្នេះបើយោងតាមរបាយការណ៍បង្ហាញថា បច្ចុប្បន្នប្រជាជនប្រហែល ១.៨ លាននាក់នៅក្នុងចក្រភពអង់គ្លេសកំពុងរង់ចាំការព្យាបាលសុខភាពផ្លូវចិត្ត៕

ប្រទេសវៀតណាម ៖ បើតាមរបាយការណ៍របស់សមាគមស្បៀងអាហារប្រទេសវៀតណាមបង្ហាញថា ការនាំចេញអង្កររបស់វៀតណាមទៅក្រៅប្រទេស នៅឆ្នាំ២០២៤នេះ ស្មើប្រមាណពី៦លាន៥សែនតោន ទៅ៧លានតោនតែប៉ុណ្ណោះ និងធ្លាក់ចុះពីចំនួនការនាំចេញអង្ករខ្ពស់បំផុត ដែលស្មើនឹង៨លាន១សែនតោន កាលពីឆ្នាំ២០២៣ ។

វៀតណាមជាប្រទេសនាំចេញអង្ករដ៏ច្រើនបំផុតស្ថិតក្នុងលំដាប់ទី៣ នៅលើពិភពលោក បន្ទាប់ពីប្រទេសឥណ្ឌា និងថៃ ហើយវៀតណាមបានប្រកាសនាពេលមុននេះថា វៀតណាមនឹងកាត់បន្ថយបរិមាណការនាំចេញអង្ករសរុបបន្តិចម្តងៗ ដើម្បីផ្តោតទៅលើគុណភាព និងតម្លៃអង្ករកើនឡើង ។ ជាមួយគ្នានេះ វៀតណាមនឹងសម្របខ្លួននឹងការបម្រែបម្រួលអាកាសធាតុ និងរក្សាកម្រិតសន្តិសុខស្បៀងក្នុងប្រទេសផងដែរ ។

ក្រៅពីនេះ តម្រូវការអង្ករពីប្រទេសឥណ្ឌូណេស៊ី, ហ្វីលីពីន, ម៉ាឡេស៊ី, ចិន និងអាហ្វ្រិក ក៏បានកើនឡើងផងដែរ ដោយសារបាតុភូតគ្រោះរាំងស្ងួតអេលនីណូ នឹងប៉ះពាល់ដល់ការបង្កបង្កើនផលស្រូវនៅក្នុងប្រទេសទាំងនេះ យ៉ាងហោចណាស់ រហូតដល់ពាក់កណ្តាលឆ្នាំ២០២៤ ។

ចំណែកតម្លៃនាំចេញអង្កររបស់ប្រទេសឥណ្ឌា បានកើនឡើងខ្ពស់នៅពាក់កណ្តាលខែមីនា ឆ្នាំ២០២៤ ដោយសារក្រុមហ៊ុនលក់អង្ករជាច្រើនរង់ចាំភាពច្បាស់លាស់ពាក់ព័ន្ធនឹងការបង់ពន្ធនាំចេញ ។ ក្រុមហ៊ុនលក់អង្ករឥណ្ឌាមួយចំនួនបានចុះកិច្ចសន្យាថ្មីពាក់ព័ន្ធនឹងការនាំចេញអង្ករ ក្រោយពីការិយាល័យគយបានយកពន្ធលើការនាំចេញអង្ករ ស្មើរហូតដល់២០% ដែលគេចាត់ទុកថា វាជាការប្រមូលពន្ធខ្ពស់ជាងមុន ។

ទោះយ៉ាងណា អ្នកនាំចេញអង្ករឥណ្ឌាម្នាក់និយាយថា អតិថិជនមិនចង់ទិញអង្ករក្នុងតម្លៃខ្ពស់ទេ ទើបធ្វើឱ្យអាជីវករទាំងអស់មិនអាចលក់អង្ករបានច្រើនដូចមុន ចាប់តាំងពីការិយាល័យគយបានប្រកាសថា នឹងប្រមូលពន្ធខ្ពស់ជាងមុន ។

ចំណែកតម្លៃអង្ករនៅប្រទេសថៃ បានកើនឡើងពីតម្លៃ៦១៥ដុល្លារអាមេរិកក្នុង១តោន កាលពីពាក់កណ្តាលខែមីនា ឆ្នាំ២០២៤ មកស្មើនឹងតម្លៃ៦២០ដុល្លារអាមេរិក ទៅ៦២២ដុល្លារអាមេរិកក្នុង១តោន ។ អាជីវករលក់អង្ករម្នាក់នៅប្រទេសថៃនិយាយថា មូលហេតុដែលធ្វើឱ្យតម្លៃអង្ករកើនឡើងខ្ពស់ជាបន្តបន្ទាប់ ដោយសារតម្រូវការទិញអង្ករមានបរិមាណស្មើដើម ប៉ុន្តែទិន្នផលផលិតអង្ករធ្លាក់ចុះ ៕

អង្គការសហប្រជាជាតិ (United Nations) បានបញ្ជាក់ថា កាលពីឆ្នាំ២០២៣ ចំនួនអ្នកនៅលីវលើពិភពលោក ស្មើប្រមាណជាង២ពាន់លាននាក់ ឬអ្នកនៅលីវស្មើម្នាក់ក្នុងចំណោម៤នាក់ នៃចំនួនមនុស្សរស់នៅលើពិភពលោកទាំងអស់ ។ ចំនួនអ្នកនៅលីវលើពិភពលោកនឹងកើនឡើងបន្ថែមទៀត ស្មើរហូតដល់៣ពាន់លាននាក់ឯណោះ នៅឆ្នាំ២០៣០ ។

មូលហេតុមួយក្នុងចំណោមមូលហេតុចម្បងៗដែលធ្វើឱ្យចំនួនអ្នកនៅលីវលើពិភពលោកកើនឡើងបែបនេះ ដោយសារតែការចំណាយលើជីវភាពប្រចាំថ្ងៃខ្ពស់ និងទស្សនៈរបស់មនុស្សជំនាន់ថ្មី ដែលពួកគេចង់រស់នៅក្នុងជីវិតឯករាជ្យ ។ លើសពីនេះ ដោយសារមនុស្សមួយចំនួនមានបញ្ហាផ្នែកហិរញ្ញវត្ថុ និងការងារគ្មានស្ថិរភាព ទើបធ្វើឱ្យពួកគេសម្រេចចិត្តមិនរៀបការ ។

ការកើនឡើងនៃចំនួនអ្នកនៅលីវលើពិភពលោក បានធ្វើឱ្យពួកគេក្លាយជាអតិថិជនចម្បងក្នុងទីផ្សារមានសក្តានុពល និងគួរឱ្យចាប់អារម្មណ៍ផងដែរ ដោយសារអ្នកនៅលីវភាគច្រើនចូលចិត្តទិញទំនិញ និងប្រើប្រាស់សេវាកម្មផ្សេងៗ ក្នុងបរិមាណច្រើនជាងមនុស្សទូទៅ ។ គេសង្កេតឃើញថា អ្នកនៅលីវភាគច្រើនហ៊ានចំណាយប្រាក់ទិញទំនិញយ៉ាងច្រើន ដើម្បីធ្វើឱ្យខ្លួនឯងមានសេចក្តីសុខ និងពុំចាំបាច់ពិភាក្សាជាមួយអ្នកណាម្នាក់ ដោយសារពួកគេគ្មានបន្ទុកគ្រួសារ ឬពុំចាំបាច់ចំណាយប្រាក់លើការថែទាំកូន ។

លើសពីនេះ ចំនួនអ្នកនៅលីវលើពិភពលោកកើនឡើង ក៏នាំមកនូវឱកាសអាជីវកម្មថ្មីៗផងដែរ ពាក់ព័ន្ធនឹងទំនិញ និងសេវាកម្មផ្សេងៗក្នុងជីវិតប្រចាំថ្ងៃ ដូចជា ៖ ភោជនីយដ្ឋានសម្រាប់អង្គុយបរិភោគអាហារតែម្នាក់, អាជីវកម្មដឹកជញ្ជូនគ្រឿងផ្សំអាហារ, បន្ទប់ស្នាក់នៅ, កម្មវិធីសម្រាប់ដំណើរកម្សាន្តតែម្នាក់ ដែលអាចបំពេញតម្រូវការរបស់អ្នកនៅលីវ ក៏ដូចជាអាជីវកម្មពាក់ព័ន្ធនឹងសត្វចិញ្ចឹមផងដែរ សម្រាប់បំបាត់ការអផ្សុករបស់អ្នកនៅលីវ ៕

ប្រទេសសិង្ហបុរី ៖ សារព័ត៌មានបរទេសបានរាយការណ៍ កាលពីថ្ងៃទី១៧ ខែមីនា ឆ្នាំ២០២៤ ថា រដ្ឋាភិបាលសិង្ហបុរីបានបង្ហាញគម្រោង Skills Future Credit ជាគម្រោងឧបត្ថម្ភប្រាក់ដល់ពលរដ្ឋមានអាយុចាប់ពី៤០ឆ្នាំឡើងទៅ ដើម្បីឱ្យពួកគេចុះឈ្មោះចូលរៀនថ្នាក់បរិញ្ញាបត្ររងផ្នែកបច្ចេកវិទ្យា និងពហុបច្ចេកទេសក្រៅម៉ោង ។ ការឧបត្ថម្ភប្រាក់របស់រដ្ឋាភិបាលសិង្ហបុរី គឺពលរដ្ឋម្នាក់នឹងទទួលបានប្រាក់ចំនួន៤.០០០ដុល្លារអាមេរិក ។

ឧបនាយករដ្ឋមន្ត្រីប្រទេសសិង្ហបុរី លោក Lawrence Wong ថ្លែងថា ការឧបត្ថម្ភប្រាក់ចំនួន៤.០០០ដុល្លារអាមេរិកនេះ នឹងអាចជួយឱ្យពលរដ្ឋមានអាយុចាប់ពី៤០ឆ្នាំឡើងទៅ អាចអភិវឌ្ឍន៍ជំនាញនានាសម្រាប់ប្រកបមុខរបរបាន ស្របពេលការរីកចម្រើនផ្នែកបច្ចេកវិទ្យានៅកន្លែងការងារនាពេលបច្ចុប្បន្ន បានផ្លាស់ប្តូរយ៉ាងឆាប់រហ័ស ។

ក្រៅពីនេះ ពលរដ្ឋមានអាយុចាប់ពី៤០ឆ្នាំឡើងទៅ នឹងទទួលបានប្រាក់ច្រើនបំផុតរហូតដល់៣.០០០ដុល្លារអាមេរិកក្នុង១ខែ សម្រាប់រយៈពេល២ឆ្នាំ បើពួកគេចុះឈ្មោះចូលរៀនពេញម៉ោងក្នុងវគ្គសិក្សាមួយចំនួន នៅឆ្នាំ២០២៥ ។

បើតាមរបាយការណ៍របស់សាកលវិទ្យាល័យពហុបច្ចេកទេសនៅប្រទេសសិង្ហបុរី Ngee Ann Polytechnic (NP) បង្ហាញថា ការផ្តល់ប្រាក់ឧបត្ថម្ភផ្នែកអប់រំនេះ នឹងជួយលើកទឹកចិត្តដល់កូនសិស្សមានអាយុច្រើនចំនួន២នាក់ ក្នុងចំណោម៣នាក់ ដែលចង់អភិវឌ្ឍន៍ខ្លួនតាមឱ្យទាន់បច្ចេកវិទ្យាក្នុងការងារ មិនថាពួកគេមានអាយុប៉ុន្មានក៏ដោយ ។

គួរបញ្ជាក់ថា សាកលវិទ្យាល័យ Ngee Ann Polytechnic មានកូនសិស្សចូលរៀនដែលមានអាយុចាប់ពី៤០ឆ្នាំឡើងទៅ ស្មើជាង១៥% ក្នុងចំណោមកូនសិស្សមានអាយុច្រើនទាំងអស់ ។ កាលពីចុងឆ្នាំ២០២៣ កូនសិស្សមានអាយុក្រោម៣០ឆ្នាំ មកចុះឈ្មោះចូលរៀននៅសាកលវិទ្យាល័យនេះ ក៏បានកើនឡើងផងដែរ ។

Christy Chung គឺជានាយកសាកលវិទ្យាល័យ Ngee Ann Polytechnic លើកឡើងថា ប្រាក់ឧបត្ថម្ភនេះនឹងផ្តល់ទៅឱ្យបុគ្គលិកធ្វើការនៅតាមក្រុមហ៊ុន ឬស្ថាប័ននានាគ្រប់កម្រិត ដូចជា ៖ បុគ្គលិកធម្មតា, បុគ្គលិកមានជំនាញ, នាយកគ្រប់គ្រង និងអ្នកបច្ចេកទេស ។

កាលពីចុងឆ្នាំ២០២៣ ភ្នាក់ងារ Skills Future Singapore បានបង្ហាញរបាយការណ៍ថា ក្រុមហ៊ុនភាគច្រើននៅប្រទេសសិង្ហបុរី ត្រូវការបុគ្គលិកមានជំនាញខ្ពស់ផ្នែកគ្រប់គ្រងប្រព័ន្ធស្វ័យប្រវត្តិ និងការប្រើប្រាស់បច្ចេកវិទ្យាសម្រាប់កែលម្អប្រព័ន្ធការផលិត ។ ប៉ុន្តែក្រុមហ៊ុនមានទំហំតូច និងមធ្យម នៅតែប្រឈមនឹងការខ្វះខាតបុគ្គលិកមានជំនាញបច្ចេកវិទ្យា និងខ្វះខាតដើមទុនសម្រាប់យកបច្ចេកវិទ្យាមកប្រើប្រាស់ ៕

បរទេស៖ វិស្វករអាមេរិកបានបង្ហាញផែនការសម្រាប់យន្តហោះដ៏ធំបំផុតរបស់ពិភពលោក ដែលមានឈ្មោះថា WindRunner ប្រវែង ១០៨ ម៉ែត្រ កម្ពស់ ២៤ ម៉ែត្រ និងស្លាប ៨០ ម៉ែត្រ ក្នុងគោលបំណងដឹកជញ្ជូនទួរប៊ីនខ្យល់ដ៏ធំសម្បើមពីចំណុច A ដល់ B នៅលើដី។

កាលពីថ្ងៃទី១៥ ខែមីនា ឆ្នាំ២០២៤ យោងតាម New York Post បានឱ្យដឹងថា ទួរប៊ីនខ្យល់នៅឯនាយសមុទ្រដ៏មានឥទ្ធិពលបំផុតនាពេលបច្ចុប្បន្ននេះ គឺមិនងាយស្រួលដឹកជញ្ជូននៅលើគោកទេ ដោយកំណត់ការប្រើប្រាស់របស់វា។ ដូច្នេះក្រុមហ៊ុន Radia ដែលជាក្រុមហ៊ុនចាប់ផ្តើមថាមពលនៅរដ្ឋ Colorado សហរដ្ឋអាមេរិក បានស្នើដំណោះស្រាយមួយដោយការសាងសង់យន្តហោះយក្ស ដើម្បីដឹកជញ្ជូនម៉ាស៊ីនទួរប៊ីនខ្យល់។

WindRunner គឺជាគម្រោងយន្តហោះដ៏ធំបំផុត និងវែងបំផុតមួយរបស់ពិភពលោក ដែលវាអាចមានសមត្ថភាពឡើងដល់កម្ពស់អតិបរមា ១២,៥០០ ម៉ែត្រ និងហោះហើរពីកណ្តាលទៅទីតាំងដែលមានចម្ងាយ ២,០០០ គីឡូម៉ែត្រ។ យន្តហោះនេះមានប្រវែង ១០៨ ម៉ែត្រ កម្ពស់ ២៤ ម៉ែត្រ និងស្លាប ៨០ ម៉ែត្រ ដោយសន្យាថានឹងធ្វើបដិវត្តវិស័យថាមពលកកើតឡើងវិញដោយសម្រួលដំណើរការដឹកជញ្ជូនទួរប៊ីន។

លោក Mark Lundstrom ស្ថាបនិក Radia និងជាអ្នកវិទ្យាសាស្ត្ររ៉ុក្កែតដែលបណ្តុះបណ្តាលដោយ MIT បាននិយាយថា ដើម្បីធ្វើឱ្យវាកាន់តែងាយស្រួលក្នុងការស្រមៃ Windrunner គឺស្ទើរតែវែងដូចទីលានបាល់ទាត់ NFL (សម្ព័ន្ធបាល់ទាត់ជាតិអាមេរិក)។

វិមាត្រគួរឱ្យចាប់អារម្មណ៍ផ្តល់ឱ្យយន្តហោះនេះនូវបរិមាណដឹកទំនិញ ៨,២០០ ម៉ែត្រគូប ប្រហែល ១២ ដងនៃបរិមាណនៃយន្តហោះប៊ូអ៊ីង 747-400។ ជាមួយនឹងតួដ៏ធំរបស់វា WindRunner ត្រូវការហេដ្ឋារចនាសម្ព័ន្ធឯកទេស ជាឧទាហរណ៍ ផ្លូវរត់ ១,៨០០ ម៉ែត្រគឺត្រូវការនៅកន្លែងផលិតម៉ាស៊ីនទួរប៊ីនខ្យល់ ដើម្បីសម្រួលដល់ការហោះហើរ និងចុះចតយន្តហោះ។ បេសកកម្មចម្បងរបស់ WindRunner គឺដឹកជញ្ជូនទួរប៊ីនខ្យល់យក្សនៅលើដី។ ទួរប៊ីនខ្យល់អាចមានប្រវែងពី ៤៥ ទៅ ៩០ ម៉ែត្រ និងទម្ងន់រហូតដល់ ៣៥ តោន ដោយទំហំដ៏ធំនេះធ្វើឱ្យពិបាកសម្រាប់មធ្យោបាយដឹកជញ្ជូនបច្ចុប្បន្ន។

ទោះជាយ៉ាងណាក៏ដោយ លោក Mark Lundstrom ក៏បានបន្តទៀតថា ក្រុមការងាររបស់លោក នឹងផលិតយន្តហោះយក្ស WindRunner ដើម្បីដោះស្រាយដែនកំណត់នៃការដឹកជញ្ជូន ក៏ដូចជាបង្កើនល្បឿននៃការអភិវឌ្ឍន៍ថាមពលខ្យល់ រួមទាំងមានប្រយោជន៍សម្រាប់ការដឹកជញ្ជូនសម្ភារៈយោធាធុនធ្ងន់ផងដែរ ដោយ Radia បានបង្ហាញថា WindRunner អាចនឹងចាប់ផ្តើមដំណើរការក្នុងរយៈពេល ៤ ឆ្នាំខាងមុខ៕