បរទេស៖ ប្រធានាធិបតីរុស្ស៊ីលោក វ្ល៉ាឌីមៀ ពូទីន បានបញ្ជាឱ្យសាងសង់នាវាបំបែកទឹកកកដើរដោយថាមពលនុយក្លេអ៊ែរដែលមានឈ្មោះថា Leningrad នៅឯកន្លែងផលិតកប៉ាល់បាល់ទិកក្នុងទីក្រុង Saint Petersburg ។

កាលពីថ្ងៃទី ២៨ ខែមករា ឆ្នាំ២០២៤ យោងតាម Maritime Executive បានឱ្យដឹងថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានចូលរួមក្នុងពិធីបើកការដ្ឋានសាងសង់នាវាបំបែកទឹកកកនុយក្លេអ៊ែរជំនាន់ទី ៥ ក្រោមគម្រោង 22220 នៅទីលានបាល់ទិក។ តាមការណែនាំពីប្រធានាធិបតី នាយកសាជីវកម្មថាមពលនុយក្លេអ៊ែរ Rosatom លោក Alexey Likhachev និងនាយក VTB លោក Andrey Kostin រួមជាមួយអ្នកនាំពាក្យក្រុមប្រឹក្សាសហព័ន្ធ លោកស្រី Valentina Matvienko និង St. Petersburg លោក Alexander Beglov បានទទួលយក និងរឹតបន្តឹងប៊ូឡុងនៅក្នុងតួដំបូងនៃនាវាបំបែកទឹកកកនាពេលអនាគត។

លោកពូទីនបានសង្កត់ធ្ងន់ថា កប៉ាល់ថ្មីនេះនឹងអនុញ្ញាតឱ្យមានពាណិជ្ជកម្មកាន់តែច្រើននៅតាមបណ្តោយផ្លូវសមុទ្រខាងជើង។ កប៉ាល់នេះមានឈ្មោះថា Leningrad ដោយផ្លាស់ប្តូរពីឈ្មោះដំបូង Sakhalin គឺជានាវាបំបែកទឹកកកទី ២ ដែលឈ្មោះរបស់វាបានផ្លាស់ប្តូរពីតំបន់ភូមិសាស្ត្រនៃតំបន់អាក់ទិកទៅជាឈ្មោះនៃទីក្រុងរុស្ស៊ីសម័យសូវៀត។

នាវាបំបែកទឹកកកនុយក្លេអ៊ែរ Leningrad នឹងមានប្រវែង ១៧៣.៣ ម៉ែត្រ ទទឹង ៣៤ ម៉ែត្រ កម្ពស់ ៥២ ម៉ែត្រ ជាមួយនឹងសេចក្តីព្រាងការរចនា ១០.៥ ម៉ែត្រ និងសេចក្តីព្រាងប្រតិបត្តិការអប្បបរមា ៩.២ ម៉ែត្រ រួមទាំងទម្ងន់នៃកប៉ាល់គឺ ៣៣,៥៤០ តោន។ នាវាបំបែកទឹកកកនេះត្រូវបានរចនាឡើងសម្រាប់ប្រតិបត្តិការរយៈពេល ៤០ ឆ្នាំ ដោយកប៉ាល់នេះអាចផ្ទុកនាវិកបាន ៥២ នាក់។ កប៉ាល់ដំណើរការដោយប្រភពថាមពលសំខាន់ពីរ ដែលបានមកពីរ៉េអាក់ទ័រ RITM-200 និងមានសមត្ថភាព 60 MW ។

គួរបញ្ជាក់ដែរថា នាវាបំបែកទឹកកក Project 22220 គឺជានាវាបំបែកទឹកកកដ៏ធំ និងមានឥទ្ធិពលបំផុតនៅលើពិភពលោក។ ប្រទេសរុស្ស៊ីអនុវត្តគម្រោង 22220 ដើម្បីផ្តល់សមត្ថភាពបំបែកទឹកកកបន្ថែមដល់ផ្លូវសមុទ្រខាងជើង។ ដូច្នេះនាវានេះនឹងបំបែកទឹកកកចំនួន ៣ ពេលកំពុងដំណើរការ ហើយ ៣ គ្រឿងទៀតនឹងចូលរួមជាមួយកងនាវានៅឆ្នាំ ២០៣០៕

ប្រទេសចិន៖ កាលពីថ្ងៃទី២៨ ខែមករា ឆ្នាំ២០២៤ យោងគេហទំព័រអន្តរជាតិមួយ បានឱ្យដឹងថា ប្រទេសចិនបានរកឃើញអណ្តូងប្រេងឆៅបម្រុងរហូតដល់ ១០៧ លានតោននៅក្នុងអាង Sanmen Hiep នៃខេត្ត Henan ភាគកណ្តាលប្រទេសចិន ក្នុងបរិបទដែលអាជ្ញាធរបង្កើនកិច្ចខិតខំប្រឹងប្រែងដើម្បីបង្កើនសន្តិសុខថាមពល និងកាត់បន្ថយការពឹងផ្អែកកាន់តែខ្លាំងលើការនាំចូលប្រេង។

យោងតាមរបាយការណ៍បានឱ្យដឹងទៀតថា ទំហំប៉ាន់ស្មាននៃអណ្តូងប្រេងនេះត្រូវបានរាយការណ៍ដោយការស្ទង់មតិភូមិសាស្ត្ររបស់ប្រទេសចិនដែលស្ថិតនៅក្រោមក្រសួងធនធានធម្មជាតិ ដោយទុនបម្រុងរបស់វាស្មើនឹងជាងពាក់កណ្តាលនៃទិន្នផលរបស់ប្រទេសចិនក្នុងឆ្នាំ ២០២៣។ នេះបើយោងតាម CCTV បានរាយការណ៍ថា “អណ្តូងប្រេងមានមូលដ្ឋានគ្រឹះក្នុងការកសាងមូលដ្ឋានធនធានប្រេង និងឧស្ម័ន ” ដោយពិពណ៌នាការរកឃើញថាជាព្រឹត្តិការណ៍ដ៏សំខាន់មួយនៅក្នុងការស្ទង់មតិប្រេង និងឧស្ម័នរយៈពេល ៥០ ឆ្នាំ ដែលត្រូវបានធ្វើឡើងនៅក្នុងខេត្ត Ha Nam ។

ដូច្នេះហើយ ប្រេងដែលរកឃើញនៅ Ha Nam គឺជាប្រេងឆៅស្រាល មិនមានជាតិទឹក និងការចម្រាញ់គឺមានភាពងាយស្រួល។ លោក Peng Peng ប្រធានប្រតិបត្តិនៃសមាគមកំណែទម្រង់ក្វាងទុង បាននិយាយថា “អណ្តូងប្រេងនេះមានចំនួនជិតមួយភាគបីនៃផលិតកម្មប្រេង និងឧស្ម័នបច្ចុប្បន្នសរុបរបស់ប្រទេស ដែលជាទុនបំរុងដ៏សំខាន់ និងធ្វើឱ្យវាក្លាយជារបកគំហើញដ៏សំខាន់សម្រាប់ប្រទេសចិន ដោយសារប្រទេសនេះពឹងផ្អែកខ្លាំងលើប្រេងឆៅ។

ប្រេងឆៅ គឺជាប្រេងដែលចម្រាញ់ចេញពីដីផ្ទាល់ ហើយត្រូវបានប្រើប្រាស់យ៉ាងទូលំទូលាយនៅក្នុងឧស្សាហកម្មទាក់ទងនឹងសម្លៀកបំពាក់ សារធាតុគីមី ឱសថ យានអវកាសជាដើម…ទោះបីជាទិន្នផលប្រេងឆៅរបស់ប្រទេសចិនមានចំនួនច្រើនគួរសមនៅលើមាត្រដ្ឋានពិភពលោកក៏ដោយ ក៏តម្រូវការសម្រាប់ធនធានធម្មជាតិនេះនៅតែមានកម្រិតខ្ពស់នៅឡើយ ព្រោះប្រទេសនេះគឺជាអ្នកផលិតឧស្សាហកម្មធំបំផុតរបស់ពិភពលោក។

គួរបញ្ជាក់ដែរថា កាលពីឆ្នាំមុន ប្រទេសចិនបានពឹងផ្អែកលើការនាំចូលពីបរទេសដើម្បីបំពេញតម្រូវការប្រេងឆៅច្រើនជាង ៧០% ដែលរុស្ស៊ី និងអារ៉ាប៊ីសាអូឌីតគឺជាប្រទេសលក់ប្រេងកំពូលទៅឱ្យចិន។ ទោះជាយ៉ាងណាក៏ដោយ បើយោងតាមទិន្នន័យដែលចេញផ្សាយដោយរដ្ឋបាលថាមពលជាតិ បានឱ្យដឹងថា ប្រទេសចិនបានផលិតប្រេង និងឧស្ម័នច្រើនជាង ៣៩០ លានតោន រួមទាំងប្រេងឆៅ ២០៨ លានតោននៅឆ្នាំ២០២៣ ដែលស្មើនឹងប្រហែល ១.៥៨% នៃទុនបម្រុងពិភពលោក និងជាប់ចំណាត់ថ្នាក់ទី ១៣ នៅលើពិភពលោក៕

បរទេស៖ ក្រុមហ៊ុន Toyota បានអំពាវនាវឱ្យម្ចាស់រថយន្តចាស់ៗចំនួន ៥០,០០០ គ្រឿងនៅសហរដ្ឋអាមេរិក ធ្វើការជួសជុលជាបន្ទាន់ ដោយសារតែពោងសុវត្ថិភាពមានបញ្ហា និងអាចបណ្តាលឱ្យពោងខ្យល់ផ្ទុះ ដែលធ្វើឱ្យមនុស្សស្លាប់បានទៀតផង។

កាលពីថ្ងៃទី ៣០ ខែមករា ឆ្នាំ២០២៤ គេហទំព័រ BBC បានរាយការណ៍ថា ក្រុមហ៊ុនតូយ៉ូតាបានស្នើឱ្យម្ចាស់រថយន្តចំនួន ៥០,០០០ គ្រឿងនៅក្នុងសហរដ្ឋអាមេរិកបញ្ឈប់ការបើកបរជាបន្ទាន់ ហើយសូមយករថយន្តមកជួសជុលពោងសុវត្ថិភាពដែលផលិតដោយក្រុមហ៊ុន Takata ជាបន្ទាន់ ព្រោះខ្លាចថាបើពោងសុវត្ថិភាពផ្ទុះអាចបណ្ដាលឱ្យស្លាប់។

យោងតាមរបាយការណ៍ បានឱ្យដឹងទៀតថា ចាប់តាំងពីឆ្នាំ ២០០៩ ការស្លាប់ជាង ៣០ នាក់ត្រូវបានផ្សារភ្ជាប់ទៅនឹងបំពង់ខ្យល់ដែលផលិតដោយក្រុមហ៊ុន Takata ។ ក្រុមហ៊ុនតូយ៉ូតាបាននិយាយថា ប្រសិនបើពោងសុវត្ថិភាពកំពុងដំណើរការ នោះផ្នែកមួយនៅខាងក្នុងទំនងជានឹងផ្ទុះ និងបាញ់បំណែកដែកដ៏មុតស្រួចទៅលើអ្នកប្រើប្រាស់។ បំណែកទាំងនោះ “អាចបណ្តាលឱ្យមានរបួសធ្ងន់ធ្ងរ ឬស្លាប់ដល់អ្នកបើកបរ ឬអ្នកដំណើរទៀតផង”។ដូច្នេះរថយន្តដែលជាប់ពាក់ព័ន្ធនឹងការប្រមូលយកមកវិញមានម៉ាក Corolla ស៊េរី 2003-2004, Corolla Matrix 2003-2004 និង RAV4 2004-2005 ។ ទោះជាយ៉ាងណាក៏ដោយ ប្រសិនបើយើងត្រលប់ទៅខែធ្នូ ឆ្នាំ ២០២៣ ក្រុមហ៊ុន Toyota ក៏បានប្រកាសថា ខ្លួនកំពុងរៀបចំប្រមូលរថយន្តម៉ាក Toyota និង Lexus មកវិញ ដោយម៉ូដែលជាច្រើនត្រូវបានផលិតនៅចន្លោះឆ្នាំ ២០២០ និង ២០២២ នៅសហរដ្ឋអាមេរិក និងជុំវិញពិភពលោកដែលមានចំនួនសរុបជាង ១ លានគ្រឿង បន្ទាប់ពីប្រព័ន្ធពោងសុវត្ថិភាពកៅអីអ្នកដំណើរខាងមុខត្រូវបានរកឃើញថាមិនដំណើរការត្រឹមត្រូវ។

ហេតុនេះហើយ ក្នុងសប្តាហ៍នេះ ក្រុមហ៊ុនរថយន្តយក្សរបស់ប្រទេសជប៉ុនបានផ្អាកការនាំចេញរថយន្តមួយចំនួនដោយសារតែភាពមិនប្រក្រតីនៃការធ្វើតេស្តវិញ្ញាបនប័ត្រសម្រាប់ម៉ាស៊ីនម៉ាស៊ូត ដែលត្រូវបានបង្កើតឡើងដោយក្រុមហ៊ុន Toyota Industries ។
គួរបញ្ជាក់ដែរថា ទោះបីជាបច្ចុប្បន្នរថយន្តរបស់តូយូតាមានបញ្ហាក៏ដោយ ក៏ការលក់រថយន្តចំនួន ១១.២ លានគ្រឿងក្នុងឆ្នាំ ២០២៣ នៅតែបន្តតំណែងជាក្រុមហ៊ុនផលិតរថយន្តដែលលក់ដាច់បំផុតលើពិភពលោកក្នុងរយៈពេល ៤ ឆ្នាំជាប់ៗគ្នាផងដែរ៕

តើដឹងឬទេថា នៅពេលយើងទិញរថយន្តថ្មី ហេតុអ្វីត្រូវបើករថយន្តនោះកិនក្រូចឆ្មារជាមុនសិន? ពិធីមួយក្នុងចំណោមពិធីផ្សេងៗដែលមនុស្សភាគច្រើនបានធ្វើនៅពេលទិញរថយន្តថ្មី ដែលធ្វើឱ្យកើតការងឿងឆ្ងល់យ៉ាងខ្លាំង គឺក្រោយពីការទិញរថយន្តថ្មី ត្រូវតែកិនក្រូចឆ្មារមុនគេ ។

បើតាមការតំណាលបន្តគ្នាមកថា ដើម្បីឱ្យការធ្វើដំណើរមានសុវត្ថិភាព និងបង្កើនសិរីមង្គល ចាំបាច់ត្រូវបើករថយន្តកិនក្រូចឆ្មារ ។ ហេតុអ្វីត្រូវធ្វើបែបនោះ? ហើយធ្វើដើម្បីអ្វី? បើតាមជំនឿរបស់ជនជាតិថៃ គឺនៅថ្ងៃដែលយើងទិញរថយន្តចេញពីហាងលក់រថយន្ត យើងត្រូវតែបើកកិនក្រូចឆ្មារសិន ព្រោះជឿថា វានឹងជួយឱ្យកង់រថយន្តជាប់ជាមួយផ្លូវថ្នល់បានល្អ, មិនរអិល និងជួយកាត់បន្ថយគ្រោះថ្នាក់ចរាចរណ៍ ។

ជនជាតិថៃជឿថា ជាពិសេសបំផុត ករណីយើងទិញរថយន្តជជុះមកប្រើប្រាស់ ការបើករថយន្តកិនផ្លែក្រូចឆ្មារ វានឹងជួយទាក់ទាញយកទ្រព្យសម្បត្តិ និងលាងសម្អាតភាពកខ្វក់ ឬរឿងរ៉ាវមិនល្អចេញពីរថយន្តបាន ។

គួរអនុវត្តវិធីខាងក្រោមនេះ នៅពេលយើងទិញរថយន្តថ្មីមកប្រើប្រាស់ ៖
១-តម្រៀបក្រូចឆ្មារនៅបរិវេណជុំវិញកង់រថយន្តទាំង៤ បន្ទាប់មក ចូរបើករថយន្តកិនក្រូចឆ្មារឱ្យបែក
២-ពុះក្រូចឆ្មារជា២កំណាត់ ហើយកុំឱ្យដាច់ពីគ្នា បន្ទាប់មក ចូរយកវាមកដាក់នៅក្រោមកង់រថយន្ត និងបើករថយន្តកិនក្រូចឆ្មារ
៣-ពុះក្រូចឆ្មារ និងច្របាច់វាដាក់លើសម្បកកង់រថយន្ត ។

គេមានជំនឿថា ក្រូចឆ្មារអាចជួយឱ្យយើងជួបនឹងរឿងរ៉ាវល្អៗ និងបណ្តេញអ្វីមិនល្អចេញពីជីវិតបាន ។ បើតាមតម្រាប្រទេសថៃសរសេរថា ដើមក្រូចឆ្មារ គឺជាដើមមង្គលមួយប្រភេទ ដែលគួរដាំវានៅទិសពាយ័ព្យនៃផ្ទះរបស់យើង ដើម្បីឱ្យអ្នករស់នៅក្នុងផ្ទះមានសេចក្តីសុខ និងមានលាភចូល ។

រីឯតម្រាថៃខ្លះទៀតសរសេរថា វាជាជំនឿរបស់អ្នករស់នៅតំបន់ព្រៃភ្នំកាលពីសម័យមុន គឺមុនពេលធ្វើដំណើរឆ្លងកាត់តំបន់ព្រៃភ្នំ ពួកគេបានដាក់ផ្លែក្រូចឆ្មារ ឬផ្លែក្រូចសើចតាមខ្លួន ដើម្បីទុកលាបច្រមុះគោ-ក្របី សម្រាប់បំបាត់ក្លិនសត្វខ្លា ពីព្រោះសត្វគោ-ក្របី ពេលវាធុំក្លិនខ្លាហើយ វានឹងមិនព្រមដើរទៅមុខទេ ។

ចំណែកអ្នកស្រុករស់នៅភាគខាងកើតខ្លះមានជំនឿថា ក្រូចឆ្មារអាចកម្ចាត់ថាមពលងងឹត និងនាំមកនូវសំណាងល្អឱ្យយើង ។ ហេតុនេះ ពួកគេបានយកផ្លែ ឬមែកក្រូចឆ្មារ មកប្រើប្រាស់ដើម្បីលាងសម្អាតអាថ័នផ្សេងៗ ដូចជា ៖ ការពារពស់វែក, លាងអាថ័នផ្ទះ ឬការពារអាថ៌កំបាំងផ្សេងៗក្នុងពិធីបុណ្យសព កុំឱ្យចូលមកយាយី ។

នេះជាជំនឿរបស់បុគ្គលម្នាក់ៗ ហើយបើធ្វើអ្វីមួយដើម្បីឱ្យសប្បាយចិត្ត និងមិនប៉ះពាល់ដល់អ្នកដទៃ គឺយើងអាចអនុវត្តបាន ។ ទោះយ៉ាងណា យើងគួរតែបើកបររថយន្តប្រកបដោយភាពទទួលខុសត្រូវគ្រប់ពេលវេលា ដើម្បីមិនបង្កគ្រោះថ្នាក់ដល់ជីវិតមនុស្ស និងទ្រព្យសម្បត្តិរបស់យើង ក៏ដូចជារបស់អ្នកដទៃ ៕

ប្រទេសវៀតណាម ៖ សារព័ត៌មានរ៉យទ័របានរាយការណ៍កាលពីថ្ងៃទី២៦ ខែមករា ឆ្នាំ២០២៤ ថា ប្រទេសហ្វីលីពីន និងវៀតណាម នឹងចុះហត្ថលេខាលើកិច្ចព្រមព្រៀងមួយ ដែលភាគីទាំងពីរនឹងពង្រឹងកិច្ចសហការពាក់ព័ន្ធនឹងឆ្មាំឆ្មេរសមុទ្រ ក្នុងអំឡុងពេលដំណើរទស្សនកិច្ចមកកាន់ទីក្រុងហាណូយរបស់ប្រធានាធិបតីហ្វីលីពីន លោក Ferdinand Marcos Jr. ។

ប្រទេសស្ថិតក្នុងតំបន់អាស៊ីអាគ្នេយ៍ទាំងពីរនេះ បានអះអាងពីកម្មសិទ្ធនៅសមុទ្រចិនខាងត្បូងរៀងៗខ្លួន ដែលវាជាផ្លូវទឹកដ៏សំខាន់សម្រាប់ការនេសាទ និងពាណិជ្ជកម្ម ខណៈប្រទេសចិនអះអាងថា ខ្លួនជាម្ចាស់កម្មសិទ្ធស្ទើរទាំងអស់នៅដែនទឹកនេះ ។ ហ្វីលីពីន និងវៀតណាម នឹងចុះហត្ថលេខាលើកិច្ចសហការរវាងកងកម្លាំងឆ្មាំសមុទ្ររបស់ពួកគេ ។ នេះបើតាមការបញ្ជាក់របស់មន្ត្រីឆ្មាំសមុទ្រហ្វីលីពីន ។

ក្រសួងការបរទេសវៀតណាមបានចេញសេចក្តីថ្លែងការណ៍ថា ការចុះកិច្ចព្រមព្រៀងរួមគ្នានៅទីក្រុងហាណូយ រវាងលោក Vo Van Thuong ប្រធានាធិបតីវៀតណាម និងប្រធានាធិបតីហ្វីលីពីន លោក Ferdinand Marcos Jr. គឺជាការជំរុញកិច្ចសហការរួមគ្នារវាងឆ្មាំសមុទ្រប្រទេសទាំងពីរ ព្រមទាំងការពារហេតុការណ៍ធ្ងន់ធ្ងរដែលនឹកស្មានមិនដល់នៅសមុទ្រចិនខាងត្បូង ។

បើទោះជាខ្លឹមសារសំខាន់ៗនៃកិច្ចព្រមព្រៀងមិនទាន់បង្ហាញជាសាធារណៈក្តី ប៉ុន្តែវាអាចមានលទ្ធភាពខ្ពស់ជាងការពង្រឹងកិច្ចសហការរវាងប្រទេសទាំងពីរក្នុងរឿងនេះ ហើយវាកាន់តែធ្វើឱ្យរដ្ឋាភិបាលក្រុងប៉េកាំងមិនពេញចិត្ត ព្រោះប្រទេសចិនបានអះអាងពីកម្មសិទ្ធស្ទើរតែទាំងអស់នៅលើសមុទ្រនេះ ។

ជាមួយគ្នានេះ ក្រសួងពាណិជ្ជកម្មវៀតណាមបានចេញសេចក្តីថ្លែងការណ៍ថា រដ្ឋាភិបាលក្រុងម៉ានីលត្រៀមនាំចូលអង្ករពីវៀតណាម ក្នុងរយៈពេល៥ឆ្នាំផងដែរ ។ រីឯមន្ត្រីហ្វីលីពីននិយាយថា គេសង្ឃឹមថា ប្រទេសទាំងពីរនឹងជំរុញកិច្ចសហការស្វែងរកអង្ករ ខណៈហ្វីលីពីន គឺជាទីផ្សារនាំចេញអង្ករដ៏ធំបំផុតរបស់វៀតណាម ។

កាលពីខែវិច្ឆិកា ឆ្នាំ២០២៣ ប្រធានាធិបតីហ្វីលីពីន លោក Ferdinand Marcos Jr. ថ្លែងថា ប្រទេសហ្វីលីពីនបានទំនាក់ទំនងជាមួយវៀតណាម និងប្រទេសផ្សេងទៀត ដើម្បីពិភាក្សាគ្នាអំពីការអនុវត្តវិធានការផ្សេងៗនៅសមុទ្រចិនខាងត្បូង ៕

តូក្យូ៖ ទីភ្នាក់ងារអវកាសជប៉ុន បាននិយាយកាលពីថ្ងៃទី២៩ ខែមករានេះថា យានអវកាស SLIM របស់ខ្លួនបានទទួលថាមពលឡើងវិញហើយ ដោយកាលពីថ្ងៃទី១៩ ខែមករា វាបានចុះចតដ៏ជោគជ័យក្នុងគន្លងជាក់លាក់មួយ ប៉ុន្តែវាក៏ត្រូវបានដាច់ចរន្តអគ្គិសនី ដោយសារតែបន្ទះស្រូបពន្លឺព្រះអាទិត្យរបស់វាស្ថិតនៅខុសមុំ។

ទីភ្នាក់ងារអវកាស JAXA បាននិយាយ យានខ្លួនអាចបង្កើតថាមពលថ្មឡើងវិញបានហើយដោយសារបានផ្លាស់ប្តូរទិសដៅ បែរមុខទៅរកពន្លឺព្រះអាទិត្យ។ ដូច្នេះហើយពន្លឺពីព្រះអាទិត្យបានបង្កើតថ្មបំពេញតម្រូវការយានខ្លួន ដើម្បីបន្តបេសកម្មរបស់ពួកគេ។

ឥឡូវនេះ ភ្នាក់ងារអវកាសជប៉ុនអាចបន្តប្រតិបត្តិការរបស់ខ្លួននៅលើឋានព្រះចន្ទឡើងវិញបានហើយ។ ប្រតិបត្តិការរុករកនេះគឺនូវក្នុងគោលបំណងដើម្បីវិភាគសមាសភាពនៃថ្មអូលីវីននៅលើផ្ទៃព្រះច័ន្ទ ជាមួយនឹងកាមេរ៉ាពហុក្រុម ដើម្បីស្វែងរកតម្រុយអំពីប្រភពដើមនៃព្រះច័ន្ទ។ ជាពិសេសគឺផ្តោតទៅលើការរកប្រភពនៃឥន្ធនៈ ទឹក និងអុកស៊ីសែន ថាអាចនឹងមាននៅទីនោះ ដើម្បីអាចនឹងយកមនុស្សទៅរស់នៅលើភពព្រះចន្ទជំនួសឲ្យភពផែនដីនាខាងមុខ។

ទោះជាយ៉ាងណា ភ្នាក់ងារអវកាសជប៉ុនមិនទាន់ដឹងនៅឡើយនោះទេថា បេសកម្មខ្លួននៅលើឋានព្រះចន្ទលើកនេះនឹងបញ្ចប់នៅពេលណាទេ ដោយយានរបស់ខ្លួនបានទៅដល់ឋានព្រះច័ន្ទកាលពីថ្ងៃទី ១៩ ខែមករាកន្លងទៅ ក្នុងរយៈចម្ងាយ ៥៥ ម៉ែត្រប៉ុណ្ណោះពីគោលដៅដែលខ្លួនបានកំណត់លើផ្ទៃព្រះចន្ទ និងជាក់លាក់ជាងយានអវកាសមុនៗ។
គួរបញ្ជាក់ផងដែរថា ជប៉ុនបានក្លាយជាប្រទេសទី៥ ដែលអាចចុះចតយានអវកាសខ្លួននៅលើឋានព្រះច័ន្ទ បន្ទាប់ពីសហរដ្ឋអាមេរិក រុស្ស៊ី ចិន និងឥណ្ឌា៕