នៅព្រឹកថ្ងៃទី២៨ ខែមីនា នេះពិធីមង្គលការរបស់អ្នកបង្កើតមាតិកាល្បីល្បាញ ហេង វិសាល និង ជា ស្រីនា បានប្រព្រឹត្តទៅយ៉ាងអធិកអធមក្រោយការចូលរួមអបអរសាទរយ៉ាងច្រើនពីសំណាកទស្សនិកជនព្រោះអ្នកទាំងពីរជាបុគ្គលគំរូនៅក្នុងសង្គម។ អ្វីដែលកាន់តែចាប់អារម្មណ៍គឺការទទួលថ្លៃបណ្ណាការបស់ ជា ស្រីនា ដែលទទួលបានលុយទាំងដុំៗរាប់ម៉ឺនដុល្លារពី ហេង វិសាល។ 
ថ្លៃបណ្ណាការរាប់ម៉ឺនដុល្លារនេះនៅក្នុងពិធីមង្គលការរបស់ ជា ស្រីនា និង ហេង វិសាល ទទួលបានការចាប់អារម្មណ៍យ៉ាងខ្លាំងពីអ្នកលេងបណ្តាញសង្គមដោយមានការលើកឡើងជាច្រើន។ អ្នកខ្លះថា ការទទួលបានថ្លៃបណ្ណាការដ៏ច្រើននេះគឺពិតជាស័ក្តិសមហើយចំពោះ ជា ស្រីនា ព្រោះនាងជាមនុស្សស្អាត ឆ្លាត ពូកែ ជាមនុស្សមានមុខមាត់ក្នុងសង្គមជាកូនស្រី ថៅកែម្ចាស់សំអាងការដ៏ល្បីមួយនៅក្នុងប្រទេស។ ជាមួយគ្នានេះដែរ មិត្តៗនារីៗមួយចំនួនក៏ប្រាថ្នាចង់បានជីវិតដូចជាកូនក្រមុំ ជា ស្រីនា ដូចគ្នា។
បើតាមលោក រិន សុក្រិត្យ ជាអ្នកបង្កើតមាតិកាមួយរូប និង ជាសហគ្រិនផងក៏បានលើកឡើងពីថ្លៃបណ្ណាការរបស់ ជា ស្រីនា និង ហេង វិសាល ផងដែរ។ លោកបានលើកឡើងនៅលើបណ្តាញសង្គមថា «រូបថតមួយសន្លឹកនេះ អាចនឹងធ្វើឱ្យបងប្អូនមួយចំនួនមានអារម្មណ៍រវើរវាយគិតថា ចង់បានជីវិតដូចគេដែរ ឬក៏ថាចង់បានដូចគេដែរ។
ជឿខ្ញុំទៅ ពេលឃើញអ្នកដទៃជាពិសេសតារាល្បីគេព្យាយាមបង្ហាញ ក្នុងនាមជាហ្វេនបងប្អូនគួរអបអរសាទរ គួរសប្បាយចិត្ត ប៉ុន្តែកុំភ្លេចអបអរសាទរខ្លួនឯងផង»។
លោក បន្តថា «មានមិនច្រើននោះទេ ជីវិតស្នេហាដែលអាចចេញដំណើរដោយរលូន មានអ្វីៗគ្រប់យ៉ាងប្រៀបដូចជារឿងនិទាន ខណៈបងប្អូនខ្លះរកតែលុយចូលដណ្តឹងប្រពន្ធមិនបានផង រកតែលុយជួលភ្នួងរៀបការសឹងមិនបានផង ខណៈគេជាកូនថៅកែភ្នួងដ៏ធំល្បីលំដាប់ប្រទេសមួយ។ អ្វីដែលគេឱ្យមើល បងប្អូនមើលចុះ តែកុំមើលដល់ថ្នាក់ស្លុងចិត្តហើយឈានដល់ការប្រៀបធៀបជីវិតខ្លួនឯងទៅនឹងជីវិតអ្នកដទៃជាពិសេសគឺប្រៀបធៀបទៅនឹងជីវិតមួយដែលគេបង្ហាញនៅលើបណ្តាញសង្គម»។ 
អ្នកបង្កើតមាតិការូបនេះបានលើកឡើងទៀតថា «បងប្អូនត្រូវរៀនហ្វឹកហាត់អារម្មណ៍ខ្លួនឯងកុំឱ្យរសាត់អណ្តែតតាមអ្វីដែលគេបង្ហាញនៅលើ Social Media ព្រោះថាវាពុំបានជះឥទ្ធិពលល្អលើសតិអារម្មណ៍ និងសតិបញ្ញារបស់បងប្អូននោះទេ។រៀនច្រោះយកនូវអ្វីដែលជាកត្តាជំរុញទឹកចិត្តឱ្យខ្លួនមានកម្លាំងចិត្តរស់នៅក្នុងសង្គម ហើយមើលអ្វីដែលផ្តល់ចំណេះដឹងដល់ការលូតលាស់ផ្នត់គំនិត ជាជាងការមើលអ្វីដែលជាការបណ្តុំនៃអារម្មណ៍រវើរវាយហើយខ្លួនមិនអាចធ្វើបានដូចគេ។ អបអរសាទរប្អូនទាំងពីរ»។
គួរបញ្ជាក់ផងដែរថា ពិធីមង្គលការរបស់ ជា ស្រីនា និង ហេង វិសាល ទទួលបានការសាទរយ៉ាងខ្លាំងពីទស្សនិកជនក្នុងនាមជាបុគ្គលសាធារណៈ និងជាបុគ្គលគំរូ ពិធីមង្គលរបស់អ្នកទាំងពីរបានរំលេចទំនៀមទម្លាប់ វប្បធម៌ប្រពៃណីបុរាណខ្មែរយ៉ាងច្រើនដើម្បីលើកស្ទួយប្រពៃណីបុរាណខ្មែរឱ្យកាន់តែទូលំទូលាយទៅដល់យុវវ័យជំនាន់ក្រោយ៕
