សហរដ្ឋអាមេរិក៖ អ្នកវិទ្យាសាស្ត្រ NASA បានរកឃើញទឹកនៅលើផ្ទៃនៃអាចម៍ផ្កាយចំនួយពីរដែលមានឈ្មោះថា Iris និង Massalia ដោយប្រើទិន្នន័យពីយានអវកាស SOFIA បង្ហាញថានៅលើអាចម៍ផ្កាយទាំងពីនេះគឺសម្បូរទៅដោយសារធាតុរាវ silicate ណាស់ ដែលជាសារធាតុមានប្រយោជន៍បំផុតមួយសម្រាប់មនុស្សជាតិ នេះបើយោងតាម ការចុះផ្សាយរបស់ Interesting Engineering កាលពីថ្ងៃទី១៣ ខែកុម្ភៈ ឆ្នាំ២០២៤។

ក្រុមអ្នកវិទ្យាសាស្ត្រមកពីវិទ្យាស្ថានស្រាវជ្រាវភាគនិរតី (SwRI) បានរកឃើញម៉ូលេគុលទឹកនៅលើផ្ទៃអាចម៍ផ្កាយជាលើកដំបូង ដោយប្រើទិន្នន័យពីយន្តហោះ Stratospheric Observatory for Infrared Astronomy (SOFIA) ពួកគេបានវិភាគអាចម៍ផ្កាយដែលសំបូរទៅដោយសារធាតុ silicate ចំនួន ៤ ដែលរូបភាពដោយកាមេរ៉ាបង្ហាញថា ក្នុងចំណោមអាចម៍ផ្កាយ៤ មានអាចម៍ផ្កាយពីរប៉ុណ្ណោះគឺ Iris និង Massalia ដែលមានវត្តមានរបស់ម៉ូលេគុលទឹក។

គួររំលឹកដែរថា ពីមុនអ្នកវិទ្យាសាស្ត្របានរកឃើញម៉ូលេគុលទឹកនៅតែក្នុងគំរូអាចម៍ផ្កាយប៉ុណ្ណោះ ប៉ុន្តែនេះជាលើកដំបូងហើយដែលពួកគេបានរកឃើញទឹកនៅលើផ្ទៃអាចម៍ផ្កាយតែម្តងក្នុងប្រភេទនៃការសង្កេតនេះ។ អាចម៍ផ្កាយគឺជាសំណល់ពីការកកើតភព ដូច្នេះសមាសភាពរបស់វាប្រែប្រួលអាស្រ័យលើកន្លែងដែលវាកើតនៅក្នុង nebula ព្រះអាទិត្យ។ ការចែកចាយទឹកនៅលើអាចម៍ផ្កាយមានការចាប់អារម្មណ៍ជាពិសេសព្រោះវាអាចបំភ្លឺពីរបៀបដែលទឹកត្រូវបាននាំយកមកផែនដី។

ការរកឃើញថ្មីនេះ បានផ្តល់ព័ត៌មានអំពីការចែកចាយទឹកក្នុងលំហ ហើយក៏ជួយដល់អ្នកវិទ្យាសាស្ត្រក្នុងការស្វែងរកជីវិតក្រៅភពទាំងក្នុង និងក្រៅប្រព័ន្ធព្រះអាទិត្យផងដែរ។ នៅក្នុងការស្រាវជ្រាវថ្មី ក្រុមអ្នកវិទ្យាសាស្ត្រនៅ SwRI បានរកឃើញថា បរិមាណទឹកនៅលើអាចម៍ផ្កាយគឺស្ទើរតែស្មើនឹងបរិមាណទឹកដែលបានរកឃើញនៅលើព្រះច័ន្ទ។ លោក Arredondo បាននិយាយថា “ដូចគ្នានេះដែរ នៅលើអាចម៍ផ្កាយ ទឹកក៏អាចភ្ជាប់ជាមួយសារធាតុរ៉ែ ក៏ដូចជាត្រូវបានស្រូបយកទៅលើសារធាតុ silicates ជាប់ ឬរលាយនៅក្នុងកញ្ចក់ដែលមានឥទ្ធិពល silicate”។

បន្ទាប់ពីរកឃើញម៉ូលេគុលទឹកនៅលើអាចម៍ផ្កាយទាំងពីរនេះហើយ ក្រុមអ្នកវិទ្យាសាស្ត្រនៅ SwRI ចង់បន្តទៅសិក្សាបន្ថែមទៀត។ ពួកគេបានកំណត់ពេលធ្វើទស្សនកិច្ចជាមួយកែវយឺតអវកាស James Webb របស់ NASA ដើម្បីសិក្សាពីអាចម៍ផ្កាយបន្ថែម ជាមួយនឹងឧបករណ៍ទំនើបៗរបស់ James Webb ដោយពួកគេសង្ឃឹមថានឹងយល់កាន់តែច្បាស់អំពីរបៀបដែលទឹកត្រូវបានចែកចាយនៅក្នុងប្រព័ន្ធព្រះអាទិត្យ៕

ប្រទេសឥណ្ឌា ៖ សារព័ត៌មានបរទេសបានរាយការណ៍កាលពីថ្ងៃទី១៤ ខែកុម្ភៈ ឆ្នាំ២០២៤ ថា ក្រុមកសិករឥណ្ឌាបានព្យាយាមដើរជាក្បួនពីទីក្រុងសាមភូ រដ្ឋប៉ាន់ចាប មកកាន់ទីក្រុងញូវដេលី ដើម្បីជំរុញឱ្យរដ្ឋាភិបាលដោះស្រាយបញ្ហាតម្លៃទិន្នផលកសិកម្មធ្លាក់ចុះជាបន្តបន្ទាប់ ។ ប៉ុន្តែមានកសិករជាង១០០នាក់បានរងរបួសក្នុងអំឡុងពេល ..ត..វ៉ា.. ដោយសារសមត្ថកិច្ចបានប្រើប្រាស់ឧស្ម័នបង្ហូរទឹកភ្នែក ។

កងកម្លាំងសមត្ថកិច្ចបានព្យាយាមស្ទាក់ក្បួនដង្ហែររបស់ក្រុមកសិករ ដែលពួកគេចង់ទៅប្រមូលផ្តុំគ្នាតវ៉ានៅទីក្រុងញូវដេលី ដើម្បីអំពាវនាវឱ្យរដ្ឋាភិបាលរបស់នាយករដ្ឋមន្ត្រីឥណ្ឌា លោក Narendra Modi ធានាតម្លៃទិន្នផលកសិកម្ម និងផ្តល់ប្រាក់ឧបត្ថម្ភផ្នែកផ្សេងទៀត ។ ពួកគេចង់ឱ្យរដ្ឋាភិបាលជួយអន្តរាគមន៍បញ្ហាទាំងនេះដើម្បីឱ្យកសិករមានប្រាក់ចំណូលទ្វេដង តាមការសន្យារបស់រដ្ឋាភិបាលជាមួយពលរដ្ឋ នៅពេលពួកគេតវ៉ាកាលពីឆ្នាំ២០២១ ។

សមត្ថកិច្ចបានគ្រប់គ្រងស្ថានការណ៍ដោយការបាញ់ឧស្ម័នបង្ហូរទឹកភ្នែកដាក់ក្រុមកសិករ និងមានការប៉ះទង្គិចគ្នាខ្លាំងក្លាផងដែរក្នុងអំឡុងពេលតវ៉ានេះ ។ គេរាយការណ៍ថា ក្រុមកសិករបានរងរបួសជាង១៥០នាក់ ខណៈសមត្ថកិច្ចនិយាយថា សមត្ថកិច្ចក៏បានរងរបួសដែរ គឺស្មើជាង១០នាក់ ។

គួរបញ្ជាក់ថា កសិករឥណ្ឌាបានតវ៉ាយ៉ាងខ្លាំងក្លា និងចំណាយពេលអស់ជាង១ឆ្នាំ គឺចាប់ពីឆ្នាំ២០២០ រហូតដល់ឆ្នាំ២០២១ ដើម្បីប្រឆាំងនឹងច្បាប់កំណែទម្រង់វិស័យកសិកម្ម ។ គេរាយការណ៍ថា ការតវ៉ារបស់ក្រុមកសិករក្នុងរយៈពេលជាង១ឆ្នាំនេះ មានកសិកររងរបួសមិនក្រោម៧០០នាក់ទេ ។ នេះចាត់ទុកថា វាជាបញ្ហាដ៏ធំបំផុតរបស់រដ្ឋាភិបាលលោក Narendra Modi តាំងពីលោកគ្រប់គ្រងប្រទេសកាលពីឆ្នាំ២០១៤ ។

បើទោះជានាយករដ្ឋមន្ត្រីឥណ្ឌា លោក Narendra Modi យល់ព្រមលុបចោលខ្លឹមសារខ្លះៗក្នុងច្បាប់កំណែទម្រង់វិស័យកសិកម្មក្តី ប៉ុន្តែក្រុមកសិករយល់ឃើញថា ការចាត់វិធានការរបស់រដ្ឋាភិបាលក្នុងការធានាតម្លៃទិន្នផលកសិកម្ម គឺដំណើរការយ៉ាងយឺតយ៉ាវ ។ ដូច្នេះ ទើបធ្វើឱ្យកសិករនាំគ្នាតវ៉ាឱ្យរដ្ឋាភិបាលដោះស្រាយបញ្ហាតម្លៃទិន្នផលកសិកម្មធ្លាក់ចុះ ៕

ប្រទេសជប៉ុន ៖ ក្រុមហ៊ុនមួយនៅទីក្រុងតូក្យូលើកឡើងថា ការទុកស្រាទំពាំងបាយជូរនៅបាតសមុទ្របរិវេណកោះ Amami-Oshima ខេត្ត

Kagoshima ស្ថិតនៅភាគនិរតីប្រទេសជប៉ុន បានជួយជំរុញសេដ្ឋកិច្ចក្នុងតំបន់ និងទាក់ទាញចំណាប់អារម្មណ៍ពីអតិថិជនផងដែរ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១២ ខែកុម្ភៈ ឆ្នាំ២០២៤ ។

ប្រធានក្រុមហ៊ុនទំនាក់ទំនងសាធារណៈនៅទីក្រុងតូក្យូ និងជាអ្នកចាប់ផ្តើមគម្រោងនេះនិយាយថា ៖ «ប្រទេសជាច្រើននិយមទុកស្រាទំពាំងបាយជូរនៅបាតសមុទ្រ ដោយសារបាតសមុទ្រមានសីតុណ្ហភាពទៀងទាត់ និងត្រជាក់ខ្លាំង ។ លើសពីនេះ វាគ្មានពន្លឺខ្លាំងពេកទេ ហើយវាសាកសមសម្រាប់ការទុកស្រាទំពាំងបាយជូរ ។ ប៉ុន្តែការទុកស្រានៅបាតសមុទ្រមិនមានច្រើនកន្លែងទេនៅប្រទេសជប៉ុន» ។

ប្រធានក្រុមហ៊ុនបន្តថា កាលពីចុងខែមករា ឆ្នាំ២០២៤ ស្រាទំពាំងបាយជូរប្រមាណ៥០០ដបនៅអឺរ៉ុប ត្រូវបានគេដាក់ក្នុងទ្រុងដែកអ៊ីណុកទម្លាក់ចូលក្នុងទឹកសមុទ្រដែលមានជម្រៅប្រមាណ២០ម៉ែត្រ ក្នុងតំបន់ Setouchi ស្ថិតនៅភាគខាងត្បូងកោះ Amami-Oshima ។ ក្រុមហ៊ុនទំនាក់ទំនងសាធារណៈបានបើកភោជនីយដ្ឋាន និងលក់ស្រាទំពាំងបាយជូរ កាលពីខែវិច្ឆិកា ឆ្នាំ២០២៣ សម្រាប់អតិថិជនចាប់អារម្មណ៍លើរសជាតិស្រានេះ ។

ដបស្រាទំពាំងបាយជូរភាគច្រើនត្រូវបានគេទុកនៅបាតសមុទ្រ ចាប់ពីខែមករា រហូតដល់ខែមិថុនា ជារៀងរាល់ឆ្នាំ ដើម្បីទុកលក់ឱ្យអតិថិជននៅខែកក្កដា ។ រីឯស្រាទំពាំងបាយជូរមួយចំនួនទៀតត្រូវទុកនៅបាតសមុទ្រយូរជាងនេះ ដើម្បីទទួលបានរសជាតិពិសេសបំផុត ។ នៅថ្ងៃអនាគត ក្រុមហ៊ុនទំនាក់ទំនងសាធារណៈគ្រោងផ្តល់សេវាកម្មទុកស្រាទំពាំងបាយជូរនៅបាតសមុទ្រសម្រាប់អតិថិជនចាប់អារម្មណ៍ទៀតផង ។

ប្រធានក្រុមហ៊ុនទំនាក់ទំនងសាធារណៈបន្ថែមថា គម្រោងនេះនឹងជួយកែលម្អបរិស្ថាន ដោយសារក្រុមហ៊ុនបានរៀបចំកន្លែងទុកដាក់ស្រាទំពាំងបាយជូរនៅបាតសមុទ្រយ៉ាងត្រឹមត្រូវ ហើយវាដើរតួនាទីជាផ្កាថ្មសិប្បនិម្មិតផងដែរដើម្បីទាក់ទាញប្រភពត្រី និងសារាយសមុទ្រ ។ លើសពីនេះ វានឹងស្រូបយកកាបូនឌីអុកស៊ីតផងដែរ ។

អ្នកចុះទៅបាតសមុទ្រដើម្បីដឹកជញ្ជូនដបស្រាទំពាំងបាយជូរនិយាយថា ទឹកក្នុងបរិវេណនេះក្តៅជាងសីតុណ្ហភាពធម្មតា និងសាកសមសម្រាប់ការទុកស្រាទំពាំងបាយជូរ ។ កាលពីថ្ងៃទី៣០ ខែមករា ឆ្នាំ២០២៤ សីតុណ្ហភាពនៅទីនេះស្មើនឹង២១អង្សារសេ ហើយចំណុចល្អ គឺសីតុណ្ហភាពបែបនេះអំណោយផលដល់ការទុកស្រារយៈពេលខ្លីប៉ុណ្ណោះ តែយើងនឹងទទួលបានរសជាតិស្រាយ៉ាងពិសេស ៕

ប្រទេសរុស្ស៊ី ៖ គេពុំនឹកស្មានថា បច្ចេកវិទ្យា AI បានដើរតួនាទីជាមេអណ្តើក និងធ្វើឱ្យមនុស្ស២នាក់យល់ចិត្តយល់ថ្លើមគ្នា រហូតឈានដល់ការរៀបអាពាហ៍ពិពាហ៍ ។ ជាទូទៅ បុរសភាគច្រើនតែងជជែកជាមួយមនុស្សស្រីដែលខ្លួនចូលចិត្តតាមទូរស័ព្ទជារឿយៗ ប៉ុន្តែសម្រាប់លោក អាឡិចសាន់ឌ័រ សាដាន ជនជាតិរុស្ស៊ី មិនធ្វើបែបនេះទេ ។ លោកបានបង្កើតកម្មវិធីមួយដើម្បីឱ្យបច្ចេកវិទ្យា AI ជជែកជាមួយនារីជាង៥.០០០នាក់ជំនួសលោក រហូតដល់បានជួបមនុស្សស្រីម្នាក់ដែលលោកពេញចិត្ត និងរៀបការជាមួយគ្នា ។

លោក អាឡិចសាន់ឌ័រ និយាយថា លោកបានបង្កើតកម្មវិធី ChatGPT ដែលបង្កើតឡើងដោយក្រុមហ៊ុន OpenAI ដើម្បីជួយប្រមូលប្រូហ្វាលរបស់ស្រីៗនៅលើកម្មវិធីស្វែងរកដៃគូឈ្មោះ Tinder ហើយឱ្យវាជជែកជាមួយស្រីៗ ដោយលោកគ្រាន់តែប្រាប់ពីលក្ខណៈសម្បត្តិនារីដែលលោកត្រូវការប៉ុណ្ណោះ ។ បន្ទាប់មក លោកឱ្យ AI ជួយឆ្លើយតបសារឱ្យដូចនឹងការគិតរបស់លោក និងលុបឈ្មោះស្រីៗដែលលោកមិនចូលចិត្តចេញពីកម្មវិធីជាបន្តបន្ទាប់ ។

លោកប្រាប់ថា រយៈពេល១ឆ្នាំ បច្ចេកវិទ្យា AI បានជួយឱ្យលោកជជែកជាមួយនារីចំនួន៥.២៣៩នាក់ ក្នុងនោះនារី១៦០នាក់បានជជែកជាមួយលោកដោយផ្ទាល់នៅក្នុងកម្មវិធីផ្សេងទៀត ។ លើសពីនេះ លោកបានណាត់នារីចំនួន១២នាក់ ទៅញ៉ាំអីខាងក្រៅជាមួយគ្នាទៀតផង ។ នៅទីបំផុត ការព្យាយាមរបស់លោកក៏ទទួលបានជោគជ័យ នៅពេលលោកបានជួបនាង ខាវីណា វីនឆាខាអេវ៉ា ជានារីក្នុងសុបិនរបស់លោក ហើយលោកបានជួបនាងលើកដំបូងនៅខែធ្នូ ឆ្នាំ២០២២ ។

ចំណែកនាង ខាវីណា និយាយថា ក្នុងរយៈពេល២ខែ ទៅ៣ខែដំបូង នាងមិនដឹងថា នាងកំពុងតែជជែកជាមួយបច្ចេកវិទ្យា AI ទេ ។ ប៉ុន្តែលោក អាឡិចសាន់ឌ័រ បានចូលមកជជែកជាមួយនាងដោយខ្លួនឯងនាពេលបន្ទាប់ និងបានណាត់ជួបនាងជាបន្តបន្ទាប់ ។ នាងមិនខឹងសម្បារអ្វីទេ ដែលលោក អាឡិចសាន់ឌ័រ ប្រើវិធីបែបនេះ ។ ប៉ុន្តែនាងគិតថា បច្ចេកវិទ្យា AI អាចធ្វើឱ្យនាងបានជួបគ្នាជាមួយមិត្តប្រុសជារឿងសំខាន់ជាង ។

ហេតុនេះ បច្ចេកវិទ្យា AI បានដើរតួជាមេអណ្តើកឱ្យអ្នកទាំងពីរ ព្រោះក្រៅពី AI បានជួយជជែក និងណាត់ជួបនាង ខាវីណា ហើយ លោក អាឡិចសាន់ឌ័រ ប្រាប់ថា លោកទទួលបានការណែនាំពីរឿងរៀបអាពាហ៍ពិពាហ៍ពី AI ផងដែរ ដោយសារលោកពុំបានគិតរឿងនេះមុនទេ ។ AI បានណែនាំឱ្យលោកសុំមិត្តស្រីរៀបការឆាប់ៗ ហើយមិត្តស្រីរបស់លោកក៏និយាយថា យល់ព្រមរៀបការជាមួយលោក ។

វាជាគំរូមួយគួរឱ្យចាប់អារម្មណ៍ ដែលបង្ហាញឱ្យឃើញពីសមត្ថភាពមិនធម្មតារបស់បច្ចេកវិទ្យា AI ដែលត្រូវគេយកមកប្រើប្រាស់ក្នុងវិធីត្រឹមត្រូវ ហើយវាបានក្លាយជាបច្ចេកវិទ្យាមួយជួយបង្កើតសេចក្តីសុខដល់អ្នកប្រើប្រាស់ ។ លើសពីនេះ AI នឹងអាចធ្វើឱ្យអ្នកនៅលីវជាច្រើនទៀតរកឃើញគូស្នេហ៍ឆាប់ៗទៀតផង ៕

បរទេស៖ ក្រុមហ៊ុន Samsung ត្រូវបានគេរំពឹងថានឹងប្រកួតប្រជែងជាមួយក្រុមហ៊ុន Huawei ដើម្បីក្លាយជាក្រុមហ៊ុនបញ្ចេញទូរស័ព្ទថ្មីដែលមានអេក្រង់បត់បានបីតង់ដំបូងគេនៅឆ្នាំ ២០២៤ នេះ។
យោងតាម Tech News ដែលបានចុះផ្សាយកាលពីថ្ងៃទី១៤ ខែកុម្ភៈថា ក្រុមហ៊ុន Huawei កំពុងបង្កើតម៉ូដែលទូរស័ព្ទថ្មីមួយដែលអាចបត់បានបីជាមួយនឹងការរចនាអេក្រង់រាង Z ដែលរំពឹងថានឹងប្រកាសនៅក្នុងត្រីមាសទីពីរនៃឆ្នាំ ២០២៤។ ដូច្នេះក្រុមហ៊ុន BOE នឹងក្លាយជាអ្នកផ្គត់ផ្គង់អេក្រង់សម្រាប់ផលិតផលនេះ ខណៈដែលក្រុមហ៊ុនពីរ Zhaoli និង Fusda ក៏នឹងចូលរួមក្នុងការផលិតស្មាតហ្វូនជំនាន់ថ្មីផងដែរ។

អ្នកជំនាញផ្នែកបច្ចេកវិទ្យា Ross Young បាននិយាយថា ទូរស័ព្ទ tri-fold របស់ក្រុមហ៊ុនចិន ដំបូងឡើយគ្រោងនឹងប្រកាសនៅចុងឆ្នាំ ២០២៣ ប៉ុន្តែត្រូវបានពន្យារពេល ដោយសារក្រុមហ៊ុនបានដាក់ពាក្យសុំប៉ាតង់សម្រាប់អេក្រង់បត់នៅឆ្នាំ ២០២១ បន្ទាប់មកត្រូវបន្ថែមឯកសារនៅខែមីនា និងខែកក្កដា ឆ្នាំ២០២២ ដូច្នេះទើបក្រុមហ៊ុនរំពឹងថានឹងប្រកាសនៅក្នុងត្រីមាសទីពីរនៃឆ្នាំ ២០២៤ នេះវិញ។

ទន្ទឹមនឹងនេះដែរ យោងតាមអ្នកជំនាញ Revegnus ក៏បានឱ្យដឹងដែរថា បច្ចុប្បន្ន Samsung ក៏កំពុងរៀបចំបង្ហាញម៉ូដែលទូរស័ព្ទថ្មីដែលមានអេក្រង់បត់បានបីនៅឆ្នាំនេះ បន្ថែមពីលើម៉ូដែលជំនាន់ថ្មីពីរគឺ Galaxy Z Fold6 និង Galaxy Z Flip6 ។ ការផ្លាស់ប្តូររបស់ក្រុមហ៊ុនកូរ៉េនេះ ត្រូវបានគេនិយាយថា នឹងក្លាយជាក្រុមហ៊ុនដំបូងគេដែលនាំយកស្មាតហ្វូនអាចបត់បានបីមកកាន់ទីផ្សារ ក៏ដូចជារក្សាតំណែងឈានមុខគេនៅក្នុងផ្នែកឧបករណ៍ដែលអាចបត់បាន។

ទោះជាយ៉ាងណាក៏ដោយ ទោះបីជាវាលឿនជាងគូប្រជែងរបស់ខ្លួនក្នុងការប្រណាំងក៏ដោយ ក៏ក្រុមហ៊ុន Huawei ត្រូវបានគេរំពឹងថានឹងប្រឈមមុខនឹងឧបសគ្គជាច្រើនដោយសារតែការហាមប្រាមរបស់សហរដ្ឋអាមេរិកដែលធ្វើឱ្យស្មាតហ្វូនរបស់ខ្លួនមិនអាចប្រើប្រាស់សេវាកម្មរបស់ Google ធ្វើឱ្យពិបាកក្នុងការប្រកួតប្រជែងក្នុងទីផ្សារអន្តរជាតិ។

គួរបញ្ជាក់ដែរថា ការរចនាស្មាតហ្វូនថ្មីដែលអាចបត់បានបីដង នឹងជួយឱ្យស្មាតហ្វូនមានអេក្រង់ធំដូចថេប្លេត ដោយអាចបង្រួម និងពង្រីកបាន ដែលវាពិតជាងាយស្រួលយកតាមខ្លួនណាស់។ នៅឯពិព័រណ៍ CES ២០២២ ក្រុមហ៊ុន Samsung បានបង្ហាញគំរូចំនួនពីរគឺ Flex S និង Flex G ដែលក្នុងនោះ Flex S អាចបត់ជារាង S ឬ Z បាន ខណៈដែលឧបករណ៍ផ្សេងទៀតអាចរមៀលផ្នែកនៃអេក្រង់ខាងក្នុងដូចជា Flex G។ ហេតុនេះហើយ Samsung អាចនឹងក្លាយជាក្រុមហ៊ុនផលិតស្មាតហ្វូនថ្មីដែលអាចបត់បានបីដងដំបូងគេបង្អស់នៅចុងឆ្នាំនេះ៕

កាលពីថ្ងៃទី១៣ ខែកុម្ភះនេះ ប៉ូលិសថៃបានធ្វើការឃា.ត់ខ្លួនស្ត្រីម្នាក់ ដោយចោ.ទប្រ.កាន់ថាបានចុចស៊ីផ្លេរដាក់ក្បួនរថយន្តគ្រួសាររាជ.វង្សថៃ។

ការប្រមា.ថ ចំពោះរាជានិយម ដែលរដ្ឋធម្មនុញ្ញបានចងក្រងទុកថាត្រូវតែគោរពបូជាចំពោះខ្សែស្រឡាយរាជវង្សានុវង្សទាំងអស់ គឺនឹងត្រូវផ្តន្ទា.ទោសដាក់ពន្ធ.នាគាររហូតដល់ ១៥ ឆ្នាំ ក្រោមច្បាប់ដ៏តឹងរឹងរបស់ប្រទេសថៃ។

ប្រព័ន្ធផ្សព្វផ្សាយបានរាយការណ៍ថា កាលពីថ្ងៃទី៤ ខែកុម្ភះ នាង Tantawan Tuatulanon អាយុ ២២ឆ្នាំ បានបើករថយន្តមួយគ្រឿងដោយព្យាយាមប្រជែង ហើយថែមទាំងចុចស៊ីផ្លេរដាក់ក្បួនរថយន្តរបស់ម្ចាស់ក្សត្រី ស៊ិរិនថន ដែលជាប្អូនស្រីរបស់ស្តេច Maha Vajiralongkorn ព្រះរាជាថៃបច្ចុប្បន្ន។

នាងថែមទាំងបានផ្សាយបន្តផ្ទាល់នៅលើគណនីហ្វេសប៊ុករបស់ខ្លួន ដែលបង្ហាញពីការឈ្លោះប្រកែកជាមួយប៉ូលីសដែលហែរហមក្បួនដង្ហែរម្ចាស់ក្សត្រីទៀតផង។ ឧបទ្ទវហេតុនេះផងដែរក៏បានបង្កឱ្យមានជម្លោះសាធារណៈកើតឡើងកាលពីថ្ងៃទី១០ ខែកុម្ភះ រវាងពួករាជានិយមនិងសកម្មជនកំណែទម្រង់របបរាជានិយម ហើយបានបណ្តាលឱ្យមនុស្សរាប់សិបនាក់រងរបួស។

ទោះជាយ៉ាងណា Tantawan បានបដិសេធថា រថយន្តរបស់នាងមិនបានព្យាយាមរំខាន ឬរារាំងក្បួនរថយន្តរបស់រាជវង្សនោះទេ។ អគ្គស្នងការរងនគរបាលជាតិ លោក Surachate Hakparn មានប្រសាសន៍ថា ការជេរប្រមាថព្រះមហាក្សត្រ និងបង្ហោះវីដេអូតាមអ៊ីនធឺណិត ធ្វើឲ្យខូចដល់របបរាជានិយម។ លោកថា ទង្វើបែបនេះគឺអាចចោតប្រកាន់ពីបទបះបោរដែលត្រូវផ្ដន្ទាទោសដាក់ពន្ធនាគាររហូតដល់៧ឆ្នាំ។ បច្ចុប្បន្ន Tantawan កំពុងប្រឈមនឹងការចោទប្រកាន់ពីការ ប្រមាថ ព្រះមហាក្សត្ររួចហើយផងដែរ។

គួរបញ្ជាក់ថា ចលនានយោបាយដឹកនាំដោយយុវជនថៃគឺបានលេចឡើងតាំងពីឆ្នាំ ២០២០ ដោយបានអំពាវនាវឱ្យមានការកែប្រែរបបរាជានិយមដែលជារបបប្រពៃណីចេញ ហើយពីមុនបានរិះ គន់ចំពោះការបិទចរាចរណ៍សម្រាប់ក្បួនដង្ហែរព្រះមហាក្សត្រផងដែរ៕