ប្រទេសហ្វីលីពីន ៖ បច្ចុប្បន្ន គេអាចប្រែក្លាយផ្លែម្នាស់ឱ្យក្លាយជាកាបូបស្បែកប្រណីតមានគុណភាពល្អ និងមានតម្លៃខ្ពស់ ។ នេះជាគំនិតរបស់ក្រុមហ៊ុននៅប្រទេសហ្វីលីពីនឈ្មោះ «Ananas Anam» ដោយក្រុមហ៊ុននេះបានធ្វើឱ្យអតិថិជនរបស់ខ្លួនស្រឡាញ់កាបូបផលិតពីផ្លែម្នាស់ និងភ្លេចកាបូបផលិតពីស្បែកសត្វ ។

ចាប់ពីពេលនេះតទៅ សម្រាប់អ្នកដែលចង់មានកាបូបស្អាតៗទុកស្ពាយពេលចេញដើរទៅណាមកណា គឺពួកគេពុំចាំបាច់ទិញកាបូបផលិតពីស្បែកសត្វទៀតទេ ដោយសារកាបូបស្បែកសត្វនេះតម្រូវឱ្យមានការសម្លាប់សត្វ ដើម្បីយកស្បែករបស់វាមកផលិតជាកាបូប ។ បច្ចុប្បន្ននេះ គេអាចប្រែក្លាយផ្លែម្នាស់សម្រាប់ផលិតជាកាបូបស្បែកមានគុណភាពល្អ និងតម្លៃខ្ពស់ ។

ក្រុមហ៊ុន Ananas Anam បញ្ជាក់ថា ស្បែកផលិតពីផ្លែម្នាស់ គឺជាស្បែកសិប្បនិម្មិតឈ្មោះថា «Pinatex» ។ គេអាចយកស្បែកប្រភេទនេះទៅផលិតជាផលិតផលជាច្រើនប្រភេទ ដូចជា ៖ កាបូប, ស្បែកជើងធម្មតា, ស្បែកជើងកវែង, ស្បែកកៅអីរថយន្ត, ស្បែកសម្រាប់គ្រឿងសង្ហារិម, ខ្សែក្រវ៉ាត់ និងសម្ភារៈប្រើប្រាស់ផ្សេងទៀត ។ ប៉ុន្តែសម្ភារៈដែលទទួលបានការពេញនិយមបំផុតពីអតិថិជន គឺកាបូបស្បែក ។

បើតាមអ្នកប្រើប្រាស់កាបូបស្បែកផលិតពីផ្លែម្នាស់ប្រាប់ថា រូបរាងរបស់កាបូបស្បែកសិប្បនិម្មិតនេះ គឺមានសភាពដូចគ្នានឹងស្បែកសត្វទូទៅដែរ ពីព្រោះកាបូបភាគច្រើនអាចការពារការជ្រាបទឹកបានយ៉ាងល្អ ហើយវាមានរូបភាពស្អាតទាក់ទាញអតិថិជនទៀតផង ។

ស្បែកសិប្បនិម្មិត «Pinatex» គឺជាស្បែកផលិតពីសរសៃធម្មជាតិផ្សំឡើងពីស្លឹកម្នាស់ ព្រមទាំងសមាសធាតុផ្លាស្ទិក ។ ស្បែកសិប្បនិម្មិតមានទំហំតូចល្មម គឺក្រុមហ៊ុនបានប្រើប្រាស់ស្លឹកម្នាស់ប្រមាណ៤៨០សន្លឹក ។ រីឯការលក់វិញ គឺស្បែកសិប្បនិម្មិត១ផ្ទាំងតូចមានតម្លៃប្រមាណ២៥ដុល្លារអាមេរិក ប៉ុន្តែបើកែច្នៃវាឱ្យក្លាយជាកាបូបហ្វ្រែនៗនោះ គឺវាមានតម្លៃចាប់ពី៥៧ដុល្លារ ទៅ១៤២ដុល្លារអាមេរិក ។ កាបូបទាំងនេះមានពណ៌ជាច្រើនសម្រាប់ឱ្យអតិថិជនជ្រើសរើសទៀតផង មិនមែនមានតែ១ពណ៌ទេ ។

ចំណែកគុណសម្បត្តិរបស់ស្បែកសិប្បនិម្មិត «Pinatex» គឺវាអាចជួយកាត់បន្ថយផលប៉ះពាល់បរិស្ថាន ប៉ុន្តែនៅប្រទេសហ្វីលីពីនមានចម្ការម្នាស់មិនច្រើនទេ ។ ហេតុនេះ កសិករហ្វីលីពីននឹងមានឱកាសអាចស្វែងរកប្រាក់ចំណូលបន្ថែមទៀត ប៉ុន្តែពួកគេត្រូវមានចំណេះដឹងផ្នែករក្សាទុកម្នាស់ផងដែរ ដូចជា ៖ វិធីរក្សាទុកម្នាស់នៅកន្លែងស្ងួត និងកន្លែងត្រជាក់ ៕

សហរដ្ឋអាមេរិក៖ នាយកប្រតិបត្តិ Meta លោក Mark Zuckerberg បានបង្ហោះវីដេអូមួយនៅលើគេហទំព័រ Instagram ផ្ទាល់ខ្លួនរបស់គាត់ ដោយនិយាយអំពីមូលហេតុដែលវ៉ែនតានិម្មិត Quest 3 របស់គាត់ល្អជាង Vision Pro របស់ក្រុមហ៊ុន Apple ដែលទើបនឹងបើកដំណើរការថ្មីៗនេះ។

ជាការពិតណាស់ ក្នុងប៉ុន្មានសប្តាហ៍មុននេះការចេញលក់ជាផ្លូវការរបស់វ៉ែនតានិមិ្មត Apple Vision Pro បានធ្វើឱ្យមនុស្សជាច្រើនមានការចាប់អារម្មណ៍យ៉ាងខ្លាំងទៅលើបច្ចេកវិទ្យាដ៏ទំនើបនេះ ទោះបីជាវាមានតម្លៃថ្លៃខ្លាំងប៉ុណ្ណាក៏ដោយ ក៏ផលិតផលនេះលក់បានជាង ២០០.០០០ គ្រឿង ចាប់តាំងពីវាត្រូវបានដាក់លក់ដំបូងនៅសហរដ្ឋអាមេរិកកាលពីខែមុនមកម្លេះ។

ទោះជាយ៉ាងណា លោក Mark Zuckerberg បាននិយាយថា វ៉ែនតានិម្មិត Apple Vision Pro មានសមត្ថភាពមិនស្មើនឹង វ៉ែតា Quest 3 របស់គាត់នោះទេ ដោយលោក Mark បានលើកឡើងអំពីមូលហេតុធំៗ ៨ យ៉ាងដូចខាងក្រោម៖
១.តម្លៃថោកជាង៖ សម្រាប់វ៉ែនតានិមិ្មត Quest 3 របស់លោក Mark គឺមានតម្លៃត្រឹមតែ ៥០០ ដុល្លារអាមេរិកប៉ុណ្ណោះ ខណៈដែល Apple Vision Pro មានតម្លៃរហូតដល់ ៣,៥០០ ដុល្លារអាមេរិក។

២.គុណភាពខ្ពស់ជាង៖ សម្រាប់អ្នកចូលចិត្តប្រើវ៉ែនតាការពិតនិម្មិត គួរតែជ្រើសរើស Quest 3 ទៅល្អជាងដោយសាររូបភាពដែលអ្នកទទួលបានគឺល្អប្រសើរជាង Apple Vision Pro។

៣.មានផាសុកភាព៖ ជាមួយនឹងទម្ងន់ស្រាលជាង ១២០ ក្រាម Quest 3 សន្យាថានឹងទទួលបាននូវបទពិសោធន៍នៃការពាក់កាន់តែមានផាសុកភាព និងធានាសុត្ថិភាពចំពោះអ្នកប្រើប្រាស់។

៤.ឥតខ្សែ ៖ ការរចនាឥតខ្សែរបស់ Quest 3 ជួយអ្នកប្រើប្រាស់ផ្លាស់ទីដោយសេរីដោយមិនបាច់ប្រើខ្សែ បើប្រៀបទៅនឹង Apple Vision Pro គឺតម្រូវឱ្យអ្នកប្រើប្រាស់ប្រើខ្សែដើម្បីភ្ជាប់ទូរស័ព្ទ ឬឧបករណ៍ផ្សេងៗ។

៥.អេក្រង់ភ្លឺជាង និងមានរូបភាពធំៗច្បាស់ល្អ៖ Quest 3 ត្រូវបានបំពាក់ដោយអេក្រង់ភ្លឺជាង និងមុំមើលធំទូលាយជាង Vision Pro របស់ក្រុមហ៊ុន Apple។

៦.មានឧបករណ៍ដែលអាចបញ្ជាបានតាមចលនាដៃ៖ អ្នកប្រើប្រាស់អាចជ្រើសរើសរវាងការគ្រប់គ្រងភាពជាក់លាក់ ឬការតាមដានដោយដៃ ហើយ Zuckerberg បានសង្កត់ធ្ងន់ថាសមត្ថភាពតាមដានដៃរបស់ Quest 3 គឺមានភាពសុក្រិតជាង។

៧.មានមាតិកាសម្បូរបែបជាង៖ មាតិកា VR/MR របស់ Quest 3 មានភាពចម្រុះជាង Vision Pro ។

៨.គាំទ្រពហុវេទិកា៖ បន្ថែមពីលើកម្មវិធី VR/MR Quest 3 ក៏អនុញ្ញាតឱ្យមើល YouTube ឬលេងហ្គេម Xbox ផងដែរ សម្រាប់ចលនានៅលើ Quest 3 គឺច្បាស់ជាង និងងាយស្រួលប្រើប្រាស់ជាង។

គួរបញ្ជាក់ដែរថា ក្រុមហ៊ុន Apple មិនដែលប្រកួតប្រជែងដោយផ្ទាល់ជាមួយក្រុមហ៊ុន Meta នោះទេ។ ទោះជាយ៉ាងណា យោងតាមពាក្យចចាមអារ៉ាម កំណែបន្ទាប់របស់ Vision Pro នឹងមានតម្លៃសមរម្យជាង ហើយក្រុមហ៊ុនទាំងពីរទំនងនឹងបន្តអភិវឌ្ឍឧបករណ៍ការពិតនិម្មិត/លាយបញ្ចូលគ្នានាពេលអនាគត៕

ប្រទេសមីយ៉ាន់ម៉ា ៖ កាលពីថ្ងៃទី១៥ ខែកុម្ភៈ ឆ្នាំ២០២៤ សារព័ត៌មានមីយ៉ាន់ម៉ារាយការណ៍ថា ចាប់តាំងពីថ្ងៃទី១២ ខែកុម្ភៈ ឆ្នាំ២០២៤ មានពលរដ្ឋមីយ៉ាន់ម៉ាជាច្រើននាក់នាំគ្នាទៅឈរតម្រង់ជួរយ៉ាងវែងនៅលើដងផ្លូវមុខស្ថានទូតថៃប្រចាំទីក្រុងយ៉ាំងហ្គោន ដើម្បីដាក់ពាក្យស្នើសុំទិដ្ឋាការធ្វើដំណើរមកប្រទេសថៃ ។ ចំនួនមនុស្សឈរតម្រង់ជួរនេះបានកើនឡើងពីមួយថ្ងៃទៅមួយថ្ងៃ គឺចាប់ពីខ្ទង់រយ រហូតដល់ខ្ទង់ពាន់ ។

ការដាក់ពាក្យស្នើសុំទិដ្ឋាការនៅស្ថានទូតថៃនេះ ចាប់ផ្តើមកើតឡើងក្រោយពីរដ្ឋាភិបាលយោធាមីយ៉ាន់ម៉ាបានប្រកាសអនុវត្តច្បាប់បម្រើកងទ័ព ដែលច្បាប់នេះបានចេញតាំងពីថ្ងៃទី៤ ខែវិច្ឆិកា ឆ្នាំ២០១០ ហើយរដ្ឋាភិបាលយោធាមីយ៉ាន់ម៉ាប្រកាសថា នឹងចាប់ផ្តើមអនុវត្តច្បាប់នេះចាប់ពីថ្ងៃទី១០ ខែកុម្ភៈ ឆ្នាំ២០២៤ តទៅ ។ នៅក្នុងខ្លឹមសារច្បាប់បង្ហាញថា បុគ្គលមានសញ្ជាតិមីយ៉ាន់ម៉ាទាំងអស់ គឺបុរសមានអាយុចាប់ពី១៨ឆ្នាំ ទៅ៣៥ឆ្នាំ និងស្រីមានអាយុចាប់ពី១៨ឆ្នាំ ទៅ២៧ឆ្នាំ ត្រូវតែចូលបម្រើការងារកងទ័ព យ៉ាងហោចណាស់ ចាប់ពី២ឆ្នាំ ទៅ៤ឆ្នាំ ។

បើបុគ្គលណាម្នាក់ប្រឆាំងនឹងច្បាប់នេះ នឹងត្រូវមានទោសជាប់ពន្ធនាគាររយៈពេល៥ឆ្នាំ ។ ហេតុនេះ ទើបធ្វើឱ្យពលរដ្ឋមីយ៉ាន់ម៉ាដែលមិនចង់ចូលបម្រើការងារកងទ័ពត្រូវស្វែងរកផ្លូវគេចខ្លួន ឬមករស់នៅប្រទេសថៃ ។ មានសេចក្តីរាយការណ៍ថា ចាប់តាំងពីថ្ងៃទី១២ ខែកុម្ភៈ ឆ្នាំ២០២៤ នៅខាងមុខស្ថានទូតថៃប្រចាំទីក្រុងយ៉ាំងហ្គោន ចាប់ផ្តើមមានពលរដ្ឋមីយ៉ាន់ម៉ាជាច្រើននាក់មកឈរតម្រង់ជួរ ដើម្បីស្នើសុំទិដ្ឋាការធ្វើដំណើរមកប្រទេសថៃ ហើយការតម្រង់ជួរនេះកាន់តែវែងទៅៗជារៀងរាល់ថ្ងៃ ។

កាលពីថ្ងៃទី១៤ ខែកុម្ភៈ ឆ្នាំ២០២៤ ស្ថានទូតថៃនៅប្រទេសមីយ៉ាន់ម៉ាបានប្រកាសលក្ខខណ្ឌការស្នើសុំទិដ្ឋាការ ដោយស្ថានទូតថៃបញ្ជាក់ថា ក្នុង១ថ្ងៃ ស្ថានទូតអាចទទួលពាក្យស្នើសុំទិដ្ឋាការពីពលរដ្ឋមីយ៉ាន់ម៉ា ប្រមាណ៤០០នាក់ប៉ុណ្ណោះ ។ ហេតុនេះ ស្ថានទូតចាំបាច់ត្រូវប្រើប្រាស់ប្រព័ន្ធការចែកកាតតម្រង់ជួរ គឺមន្ត្រីស្ថានទូតនឹងចាប់ផ្តើមចែកកាតតម្រង់ជួរ ចាប់ពីម៉ោង៨និង៣០នាទីព្រឹក និងចាប់ផ្តើមទទួលពាក្យស្នើសុំទិដ្ឋាការ ចាប់ពីម៉ោង៩ព្រឹក ។

កាតតម្រង់ជួរនីមួយៗអាចប្រើប្រាស់បានតែម្នាក់ប៉ុណ្ណោះសម្រាប់អ្នកមកដាក់ពាក្យស្នើសុំទិដ្ឋាការមកប្រទេសថៃ ហើយពួកគេមិនអាចតម្រង់ជួរជំនួសគ្នាបានទេ ។ ហេតុនេះ អ្នកដាក់ពាក្យស្នើសុំទិដ្ឋាការមកប្រទេសថៃ ត្រូវតែត្រៀមឯកសារភ្ជាប់ឱ្យបានត្រឹមត្រូវគ្រប់ចំនួន ពីព្រោះស្ថានទូតថៃនឹងមិនពិចារណាលើពាក្យស្នើសុំណាដែលខ្វះខាតឯកសារទេ ។

ដោយឡែក សារព័ត៌មានថៃរាយការណ៍ថា នៅខែកុម្ភៈ ឆ្នាំ២០២៤ កងទ័ពថៃប្រចាំការនៅស្រុកម៉ែសត បានចាប់ខ្លួនយុវជនមីយ៉ាន់ម៉ា ចំនួន២៧នាក់ (ក្នុងនោះមានប្រុស១៣នាក់ និងស្រី១៤នាក់) នៅស្រុកភពព្រះ ខេត្តតាក ដែលពួកគេបម្រុងឆ្លងចូលមកធ្វើការនៅប្រទេសថៃដោយខុសច្បាប់ ។ ពួកគេបានធ្វើដំណើរមកពីខេត្ត Myawaddy ប្រទេសមីយ៉ាន់ម៉ា និងឆ្លងតាមច្រកធម្មជាតិសំដៅមកកាន់ប្រទេសថៃ ៕

ប្រទេសថៃ៖ ប្រទេសថៃបានចំណាយប្រាក់ចំនួន ៥០ លានបាត (ប្រមាណជាង ១,៣ លានដុល្លារអាមេរិក) លើជំនួយផ្នែកវេជ្ជសាស្រ្តសម្រាប់ភ្ញៀវទេសចរអន្តរជាតិ ដើម្បីបង្កើនទំនុកចិត្តរបស់អ្នកទេសចរក្នុងការធ្វើដំណើរប្រកបដោយសុវត្ថិភាព។

នៅថ្ងៃទី១៥ ខែកុម្ភៈ ឆ្នាំ២០២៤ រដ្ឋមន្ត្រីទេសចរណ៍របស់ប្រទេសថៃបានប្រកាសផ្តល់ជំនួយសរុបចំនួន ៥០ លានបាត (ប្រមាណជាង ១,៣ លានដុល្លារអាមេរិក) ដោយម្នាក់ទទួលបាន ១៤,០០០ ដុល្លារអាមេរិក សម្រាប់ភ្ញៀវទេសចរអន្តរជាតិណាដែលជួបប្រទះគ្រោះថ្នាក់ ឬឧបទ្ទវហេតុណាមួយកើតឡើងនៅពេលធ្វើដំណើរក្នុងប្រទេសថៃ។

ក្នុងការប្រកាសនោះ រដ្ឋាភិបាលក៏នឹងផ្តល់សំណងរហូតដល់ ១ លានបាត (ប្រមាណជាង ២,៧ ម៉ឺនដុល្លារអាមេរិក) ក្នុងករណីភ្ញៀវទេសចរមរណភាព និង ៥ សែនបាត (ប្រមាណជាង ១,៣ ម៉ឺនដុល្លារអាមេរិក) ក្នុងករណីពិការភាពជាដើម។

រដ្ឋមន្ត្រីក្រសួងទេសចរណ៍ Sudawan Wangsuphakijkosol បាននិយាយថា ភ្ញៀវទេសចរនឹងទទួលបានការគាំទ្រផ្នែកហិរញ្ញវត្ថុសម្រាប់ការចំណាយលើការព្យាបាលក្នុងករណីមានឧបទ្ទវហេតុ ឬគ្រោះថ្នាក់ផ្សេងៗអំឡុងពេលធ្វើដំណើរក្នុងប្រទេសថៃ។

លោកស្រីបានបន្តទៀតថា៖ «យុទ្ធនាការនេះគឺជាផ្នែកមួយនៃកិច្ចខិតខំប្រឹងប្រែងក្នុងគោលបំណងធានាសុវត្ថិភាពដល់ភ្ញៀវទេសចរបរទេស ហើយអ្នករាល់គ្នានឹងស្ថិតនៅក្រោមការថែទាំយ៉ាងល្អពីប្រទេសថៃ»។ លើសពីនេះ វិធានការចុងក្រោយនេះ ក៏បង្កើនទំនុកចិត្តដល់ភ្ញៀវទេសចរដែលចូលមកប្រទេសថៃ ដោយហេតុនេះអាចទាក់ទាញភ្ញៀវទេសចរអន្តរជាតិកាន់តែច្រើន។

ទោះជាយ៉ាងណាក៏ដោយ ប្រសិនបើឧបទ្ទវហេតុនេះកើតចេញពីការធ្វេសប្រហែសរបស់អ្នកទេសចរ ឬបំពានច្បាប់ដោយចេតនា ប្រាក់ឧបត្ថមនេះមិនត្រូវបានប្រើប្រាស់សម្រាប់ផ្គត់ផ្គង់ភ្ញៀវទេសចរឡើយ។ សម្រាប់លក្ខខណ្ឌក្នុងការទទួលបានជំនួយផ្នែកវេជ្ជសាស្រ្ដនេះ គឺភ្ញៀវទេសចរត្រូវមានលិខិតឆ្លងដែនដែលមានសុពលភាពចូលក្នុងប្រទេសថៃនៅចន្លោះថ្ងៃទី១ ខែមករា ដល់ថ្ងៃទី៣១ ខែសីហា ឆ្នាំ២០២៤ តាមទិដ្ឋាការទេសចរណ៍ ឬក្នុងគោលបំណងទេសចរណ៍សាមញ្ញជាដើម៕