នៅថ្ងៃទី២១ ខែកុម្ភៈ ឆ្នាំ២០២៤ ស្អែកនេះ រដ្ឋសភានៃ ព្រះរាជាណាចក្រកម្ពុជា នឹងបើកសម័យប្រជុំរដ្ឋសភាជាវិសាមញ្ញ នីតិកាលទី៧ក្រោមអធិបតីភាពដ៏ខ្ពង់ខ្ពស់ របស់សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា ដើម្បីធ្វើការបោះឆ្នោតផ្តល់សេចក្តីទុកចិត្តលើការ តែងតាំងបំពេញបន្ថែមសមាសភាពរាជរដ្ឋាភិបាល ចំនួន ៣រូប។

នៅក្នុងនោះរួមមាន៖

• ឯកឧត្តម ហ៊ុន ម៉ានី ជាឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ
• ឯកឧត្តម ស្រី ថាមរុង្គ ជាទេសរដ្ឋមន្ត្រី ទទួលបន្ទុកបេសកកម្មពិសេស
• ឯកឧត្តម ប៉ែន វិបុល ជាទេសរដ្ឋមន្ត្រី ទទួលបន្ទុកបេសកកម្មពិសេស៕

មាឃបូជាគឺជាពិធីបុណ្យដ៏សំខាន់មួយនៅក្នុងព្រះពុទ្ធសាសនា។ ពិធីបុណ្យនេះគឺត្រូវបានពុទ្ធសាសនិកគ្រប់ប្រទេសប្រារព្ធធ្វើឡើងជារៀងរាល់ឆ្នាំជារៀងរាល់ថ្ងៃសីលពេញបរមី ១៥កើត ខែមាឃ។ ពិធីបុណ្យមាឃបូជាគឺប្រារព្ធឡើងក្នុងគោលបំណងរំលឹកដល់ព្រឹត្តការណ៍សំខាន់២របស់ព្រះសម្មាសម្ពុទ្ធ។

ព្រឹត្តិការណ៍ទី១ គឺនៅពេលដែលព្រះអង្គប្រជុំព្រះភិក្ខុសង្ឃចំនួន១២៥០អង្គ ជាការប្រជុំលើកដំបូងបង្អស់ដើម្បីប្រកាសបង្កើតព្រះពុទ្ធសាសនា នៅឯប្រទេស¬ឥណ្ឌាកាលពី៥៨៨ឆ្នាំមុនគ្រិស្តសករាជ នាថ្ងៃទី១៥កើត ខែមាឃ ក្រោយព្រះអង្គបានត្រាស់ដឹងបានចំនួន៩ខែគត់។

ព្រឹត្តិការណ៍ទី២នៃពិធីបុណ្យមាឃបូជា គឺដើម្បីរំលឹកដល់ថ្ងៃដែលព្រះពុទ្ធប្រកាសដាក់ព្រះជន្មាយុសង្ខារនៅចំពោះមុខមារ(សត្រូវ)។ ទោះជាយ៉ាងណា ការប្រកាសនេះបានធ្វើឲ្យភិក្ខុសង្ឃនិងពុទ្ធបរិស័ទទាំងឡាយមានការតក់ស្លុតជាខ្លាំងព្រោះដឹងថាព្រះពុទ្ធនឹងត្រូវយ៉ាងចូលបរិនិព្វានដ៏ឆាប់នាពេលខាងមុខ។ ព្រឹត្តិការណ៍បានកើតឡើងនៅថ្ងៃទី១៥កើត ខែមាឃ ឆ្នាំម្សាញ់ មុនពេលព្រះពុទ្ធចូលព្រះបរិនិព្វាន៣ខែ។

អាស្រ័យលើព្រឹត្តិការណ៍សំខាន់ទាំង២ខាងលើនេះហើយ ទើបពុទ្ធសានិកដែលកាន់ព្រះពុទ្ធសាសនាគ្រប់គ្នាតែងតែគោរពពិធីបុណ្យមាឃបូជាជារៀងរាល់ថ្ងៃទី១៥កើតខែមាឃ ដើម្បីសម្តែងនូវសេចក្តីការដឹងគុណចំពោះព្រះសម្មាសម្ពុទ្ធ តាមរយៈការបូជាគ្រឿងសក្ការៈ សូត្រធម៌ សមាទានសីលជាដើម។ រីឯគ្រឿងសក្ការៈបូជាសម្រាប់ពិធីបុណ្យនេះមានដូចជា ទៀន ធូប ផ្កា គ្រឿងក្រអូបផ្សេងៗ។

ការប្រារព្ធពិធីបុណ្យមាឃបូជាគឺប្រារព្ធឡើងខុសៗគ្នាទៅតាមទំនៀមទម្លាប់នៃវត្តនីមួយៗ ជាទូទៅគឺកម្មវិធីសំខាន់ៗនៃបុណ្យនេះរួមមាន ការដង្ហែគ្រឿងសក្ការៈបូជា ប្រទក្សិណបូជនីយដ្ឋានជុំវិញព្រះវិហារជាដើម បន្ទាប់មកវេរគ្រឿងសក្ការៈទាំងនោះថ្វាយចំពោះព្រះរតនត្រ័យ នមស្ការ សមាទានសីល ហើយព្រះព្រះសង្ឃឬអាចារ្យនឹងដឹកនាំសម្តែងព្រះធម៌ទេសនាអំពីពុទ្អប្រវត្តិនិងប្រវត្តិមាឃបូជា។ វត្តខ្លះក៏ប្រារព្ធកម្មវិធីសូត្រធម៌ទល់ភ្លឺឬខ្លះទៀតត្រឹមតែពាក់កណ្តាលអាធ្រាតប៉ុណ្ណោះតាមលទ្ធភាពជាក់ស្តែង។

តាមរយៈពិធីបុណ្យមាឃបូជានេះ ព្រះពុទ្ធអង្គក៏បានបង្រៀនមនុស្សឲ្យប្រព្រឹត្តិនូវអំពើល្អដើម្បីទទួលបានសុខភាពផ្លូវចិត្តល្អ។ ម៉្យាងវិញទៀត ក្នុងឋានៈជាពលរដ្ឋរស់នៅក្នុងសង្គមមួយ គឺត្រូវតែចេះស្រលាញ់សាមគ្គី អធ្យាស្រ័យ យោគយល់គ្នាទៅវិញទៅមក មិនរើសអើងប្រកាន់ជាតិសាសន៍ ពណ៌សម្បុរឬសាសនា ព្រោះថារស់នៅក្នុងនាមជាមនុស្សជាតិដូចគ្នា ដើម្បីនាំមកនូវសន្តិភាពនិងការអភិវឌ្ឍប្រកបដោយនិរន្តរភាពដល់ប្រទេសផងដែរ៕

នៅថ្ងៃទី២០ ខែកុម្ភៈ ឆ្នាំ២០២៤ ក្រសួងធនធានទឹក និងឧតុនិយម បានចេញសេចក្ដីជូនដំណឹង អំពីស្ថានភាពធាតុអាកាសនៅព្រះរាជាណាចក្រកម្ពុជា។

ជ្រលងសម្ពាធទាបមានឥទ្ធិពលអូសបន្លាយពីឈូងសមុទ្របេងហ្គាល់រហូតដល់ឈូងសមុទ្រថៃ និងគ្របដណ្ដប់មកលើប្រទេសកម្ពុជា និងសម្ពាធខ្ពស់នៅសមុទ្រចិនខាងត្បូងបានថយឥទ្ធិពល ដែលស្ថានភាពបែបនេះនឹងធ្វើឱ្យ ចាប់ពីថ្ងៃទី២០ ដល់ថ្ងៃទី២២ ខែកុម្ភៈ ឆ្នាំ២០២៤ នៅតំបន់វាលទំនាបនឹងមានភ្លៀងធ្លាក់ក្នុងកម្រិតខ្សោយគ្រប់ដណ្តប់លើផ្ទៃដី៥% និងមានខ្យល់បក់មកពីទិសបូព៌មានល្បឿន២ម៉ែត្រ/វិនាទី។

ដោយឡែកតំបន់ខ្ពង់រាប មានសីតុណ្ហភាពមធ្យមអប្បបរមា២៤°C (អង្សាសេ) និងសីតុណ្ហភាពមធ្យមអតិបរមា៣៧°C (អង្សាសេ) ផ្ទៃមេឃមានពពកតិច ខ្យល់បក់មកពីទិសបូព៌មានល្បឿន២ម៉ែត្រ/វិនាទី ដោយឡែកនៅខេត្តកំពង់ស្ពឺ មានភ្លៀងធ្លាក់ខ្សោយគ្រប់ដណ្តប់លើផ្ទៃដី៥%។

ខណៈតំបន់មាត់សមុទ្រ មានសីតុណ្ហភាពមធ្យមអប្បបរមា២៥°C (អង្សាសេ) និងសីតុណ្ហភាពមធ្យមអតិបរមា៣៦°C (អង្សាសេ) ផ្ទៃមេឃមានពពកពីតិចទៅមធ្យម មានភ្លៀងធ្លាក់ក្នុងកម្រិតខ្សោយគ្រប់ដណ្តប់លើផ្ទៃដី២០% ខ្យល់បក់មកពីទិសនិរតី មានល្បឿន ៥ម៉ែត្រ/វិនាទី៕

កាលពីពេលថ្មីៗនេះ វត្តមានដ៏ខ្ពង់ខ្ពស់របស់ព្រះនាងតូចនរោត្តមជេនណាបានបង្កឲ្យការភ្ញាក់ផ្អើលដល់អ្នកស្រុកខេត្តបន្ទាយមានជ័យ ខណៈព្រះនាងបានយាងមកដោយផ្ទាល់សហការជាមួយស្រីផាចធ្វើម្ហូបខ្មែរមួយមុខយ៉ាងមានភាពជិតស្និត។

កាលពីថ្ងៃទី១៩ ខែកុម្ភះ ឆ្នាំ២០២៤ នេះ វីដេអូដែលបានបង្ហោះចែកចាយនៅលើបណ្តាញសង្គមអ៊ីនធើណែតគឺបានបង្ហាញឲ្យឃើញពីវត្តមានរបស់ព្រះនាងតូចនរោត្តមជេនណាក្នុងសម្លៀកបំពាក់យ៉ាងសាមញ្ញ នៅលើទឹកដីខេត្តបន្ទាយមានជ័យ នៅត្រង់បរិវេណផ្ទះស្រីផាច Youtuber និង Influencer ល្បីឈ្មោះ ព្រមទាំងជាចុងភៅដ៏ចំណានចំណាប់ក្នុងការធ្វើម្ហូបខ្មែរគ្រប់ទម្រង់។

នៅក្នុងវីដេអូនោះក៏បានបង្ហាញពីសកម្មភាពរបស់ព្រះនាងជេនណានិងស្រីផាចសហការគ្នាធ្វើម្ហូបប្រពៃណីខ្មែរមួយមុខគឺនំបញ្ចុកសម្លរប្រហើរ ដោយព្រះនាងយាងមកបេះបន្លែ ធ្វើគ្រឿងផ្សំផ្សេងៗ ជាមួយនឹងស្រីផាចយ៉ាងរីករាយនិងមានភាពស្និតស្នាលបំផុត។ មិនត្រឹមតែប៉ុណ្ណោះ ក៏បានចែកចាយម្ហូបដ៏ឈ្ងុយឆ្ងាញ់មួយមុខនេះចែកជូនដល់អ្នកស្រុកភូមិទីនោះបានឆ្អែតគ្រប់ៗគ្នា។ ព្រះនាងតូចក៏បាននាំយកអំណោយបន្តិចបន្តួចមកចែកជូនដល់អ្នកស្រុកនៅទីនោះ ដែលក្រសែចក្ខុរបស់ព្រះនាងបានបញ្ជាក់យ៉ាងច្បាស់ពីទឹកចិត្តដ៏ស្មោះសរនិងសេចក្តីស្រលាញ់ដល់បងប្អូនប្រជាជាពលរដ្ឋខ្មែរគ្រប់ៗរូប។

ព្រះនាងជេនណាក៏បានដាក់បង្ហោះនូវរូបថតមួយសន្លឹកជាមួយស្រីផាចដោយសរសេរថា «ខ្ញុំពិតជាគោរពស្រឡាញ់បងស្រីផាចមែនទែន បានឃើញថាការងារបង្កើតវីដេអូរបស់គាត់ម្តងៗ ពិតជាពិបាកណាស់មិនងាយស្រួលដូចដែលយើងធ្លាប់បានឃើញទេ ពិតជាចំណាយទាំងកម្លាំងនិងពេលវេលាច្រើន ខ្ញុំសូមកោតសរសើរគាត់ដោយស្មោះ ចំពោះទឹកចិត្តរបស់គាត់ដែលបានខិតខំជួយលើកកម្ពស់ម្ហូបខ្មែរយើង»។

ព្រះនាងនរោត្តមជេនណា ដែលត្រូវជាចៅស្រីបង្កើតរបស់ព្រះបាទនរោត្តមសីហនុ។ ព្រះនាងក៏តែងតែលេចវត្តមាននៅក្នុងវង្វង់សិល្បៈទាំងការសម្តែង រាំ ច្រៀងនិងបង្ហាញម៉ូតជាច្រើន។ បើទោះបីជាទ្រង់ជាខ្សែស្រឡាយនៃរាជវង្សានុវង្សក្តី ប៉ុន្តែព្រះនាងគឺមិនដែលប្រកាន់ខ្លួននោះទេ ព្រះនាងតែងតែចែករំលែកក្តីស្រលាញ់ ផ្តល់ភាពរីករាយដល់មនុស្សជុំវិញខ្លួនជានិច្ច។ មនុស្សគ្រប់ៗគ្នាគឺតែងតែកោតសរសើរ គោរពស្រលាញ់ពីទឹកចិត្តដ៏ប្រពៃរបស់ព្រះនាង ជាក្មេងស្រីដែលមិនប្រកាន់វណ្ណៈ មានសម្រស់ស្រស់ស្អាត ព្រមទាំងមានទេព្យកោសល្យសិល្បៈ៕