នៅថ្ងៃទី 28 ខែមីនា ឆ្នាំ2024 នេះ ក្រុមហ៊ុន សាមសុង បានប្រកាសជាផ្លូវការក្នុងការប្រើប្រាស់កំណែអាប់ដេតថ្មី One UI 6.1 + Galaxy AI ដ៏ទំនើបចេញពីក្រុមហ៊ុនផ្ទាល់។

នេះជាដំណឹងដ៏ពិសេសសម្រាប់ប្រិយមិត្តរបស់យើងជាច្រើន ដែលជាម្ចាស់ស្មាតហ្វូន/ថេប្លេតស៊េរីមុនៗរបស់ Samsung កំពុងទន្ទឹងរង់ចាំជាយូរមកហើយ ឥឡូវនេះអតិថិជនដែលប្រើប្រាស់ Device សាមសុងអាច អាប់ដេតមុខងារ One UI 6.1 មានភ្ជាប់នឹង AI បានហើយ។

ដោយក្រុមហ៊ុន Samsung Electronics បានបញ្ជាក់ច្បាស់ៗហើយថា ស្មាតហ្វូនត្រកូល Galaxy ទាំងប៉ុន្មានម៉ូឌែលខាងក្រោមនេះនឹងទទួលបានកំណែអាប់ដេត One UI 6.1 ថ្មីមានភ្ជាប់មុខងារ AI ពិសេសៗមកជាមួយដូចមាននៅលើ Galaxy S24 Series ផងដែរ។ ដោយនៅក្នុងរបាយការណ៍ខាងលើនោះ ក្រុមហ៊ុនបានបញ្ជាក់ប្រាប់មកថា Galaxy AI នឹងមកដល់នៅលើស្មាតហ្វូនត្រកូល Galaxy ទាំង 9 ម៉ូឌែល រួមមានដូចជា៖

– Galaxy S23 Ultra
– Galaxy S23+
– Galaxy S23
– Galaxy S23 FE
– Galaxy Z Fold5
– Galaxy Z Flip5
– Galaxy Tab S9 Ultra
– Galaxy Tab S9+
– Galaxy Tab S9

គួរជម្រាបផងដែរថា ស្មាតហ្វូន និងថេប្លេតដែលបានបញ្ជាក់ខាងលើនេះនឹងចាប់ផ្តើមទទួលបានកំណែអាប់ដេត One UI 6.1 + Galaxy AI ហើយ។

នាថ្ងៃទី២៧ ខែមីនា ឆ្នាំ២០២៤ នៅក្នុងកិច្ចពិភាក្សាស្តីពីការគ្រប់គ្រងល្បែងផ្សងសំណាង និងការគ្រប់គ្រងផលប៉ះពាល់ពីល្បែងស៊ីសងគ្រប់ប្រភេទ ឯកឧត្តម វ៉ី សំណាង អភិបាល នៃគណៈអភិបាលខេត្ដកំពង់ស្ពឺ បានធ្វើការស្នើទៅក្រសួងពាក់ពន្ធ័ សុំមិនឱ្យមានល្បែងស៊ីសងគ្រប់ប្រភេទ កើតមាននៅក្នុងខេត្តកំពង់ស្ពឺ បើទោះជាល្បែងនោះមានច្បាប់ក៏ដោយ។

ឯកឧត្តម វ៉ី សំណាង បានលើកឡើងថា៖”លោកមិនចូលចិត្តជាមួយនឹងការបើកឱ្យមានស៊ីសងក្នុងមូលដ្ឋានរបស់លោកនោះទេ ហើយក៏មិនចង់ឱ្យពលរដ្ឋរបស់លោកនាំគ្នាលេងល្បែងនោះដែរ។ លោកចង់ឃើញពលរដ្ឋរបស់ខ្លួនមានជីវភាពធូរធា ស្របពេលដែលប្រទេសជាតិកំពុងមានការអភិវឌ្ឍ ក្រោមម្លប់នៃសុខសន្តិភាពដែលរកបានដោយបាតដៃស្ថាបនិកសន្តិភាព គឺ សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា ដោយការប្រកបការងាររោងចក្រ សហគ្រាសកំពុងមានការរីកចម្រើននៅក្នុងខេត្ត ក៏ដូចនៅទូទាំងប្រទេស”។

ឯកឧត្ដម បានសង្កត់ធ្ងន់ថា៖”សំណូមពរដល់រដ្ឋាភិបាល ក៏ដូចក្រសួងពាក់ពន្ធ័ សុំមិនឱ្យមានល្បេងស៊ីសងគ្រប់ប្រភេទ កើតមាននៅក្នុងខេត្តកំពង់ស្ពឺ ទោះជាល្បែងនោះមានច្បាប់ក៏ដោយ ល្បែងស៊ីសងគឺនាំមកនូវភាពវិនាសហិនហោចនិងកើតមានហឹង្សាក្នុងគ្រួសារ កើតមានភាពអសន្តិសុខ ចោរកម្ម ឆក់លួចប្លន់ បាត់បង់អស់សន្តិសុខក្នុងមូលដ្ឋាន”៕

កាលពីថ្ងៃទី២៧ ខែមីនា ឆ្នាំ២០២៤ មានករណីកងកម្លាំងគណៈបញ្ជាការឯកភាពខណ្ឌពោធិ៍សែនជ័យ បានរឹបអូសយកតុក្កតាដាក់លើរថយន្ត ដែលតុក្កតាទាំងនោះ ជារបស់ស្ត្រីម្នាក់ដាក់តាំងលក់នៅមុខអកាសយានដ្ឋានអន្តរជាតិភ្នំពេញជាប្រចាំ។

បើយោងតាមវីដេអូ ដែលបង្ហោះនៅលើបណ្ដាញសង្គម បានបង្ហាញថា៖” កាលពីវេលាម៉ោងជាង៨ព្រឹក ថ្ងៃទី២៧ ខែមីនា ឆ្នាំ២០២៤ មានស្ត្រីម្នាក់បានក្រាលកៅស៊ូតង់ ដាក់លក់តុក្កតាជាច្រើន នៅលើសាបនៅមុខដីឡូត៌មួយកន្លែង ស្ថិតនៅត្រង់ចំណុចមុខអាកាសយានដ្ឋានអន្តរជាតិភ្នំពេញ ស្ថិតតាមបណ្ដោយមហាវិថីសហព័ន្ធរុស្ស៊ី ភូមិក្បាលដំរី១ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ”។

ជុំវិញករណីនេះ តាមពិតទៅ ដោយសារតែមានក្បួនថ្នាក់ដឹកនាំឆ្លងកាត់ ហើយសមត្ថកិច្ចបានប្រាប់ឱ្យផ្អាកលក់ជាបណ្ដោះអាសន្ន ប៉ុន្តែស្ត្រីអ្នកលក់ គាត់មិនព្រមស្ដាប់ ទើបចាប់យកទៅទុកនៅសាលាខណ្ឌ ពេលចប់ក្បួនថ្នាក់ដឹកនាំឆ្លងកាត់ ទើបប្រគល់ឱ្យគាត់វិញ៕

ថ្មីៗនេះ អគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានចុះត្រួតពិនិត្យ ណែនាំ និងអប់រំ នៅទីតាំងផលិតឈាមជ្រូក និងសណ្តែកបណ្តុះចំនួន ២ទីតាំង ស្ថិតនៅភូមិ១៧ សង្កាត់បឹងសាឡាង ខណ្ឌទួលគោក រាជធានីភ្នំពេញ ក្រោយរកឃើញមានការក្លែងបន្លំវត្ថុធាតុដើម។នៅក្នុងប្រតិបត្តិការនេះ អគ្គនាយកដ្ឋាន រកឃើញផលិតផលឈាមជ្រូកធ្វើអំពីឈាមគោ ដែលជាកម្មវត្ថុនៃការក្លែងបន្លំវត្ថុធាតុដើម បន្លំយថាប្រភេទនៃផលិតផលឈាម ចំនួន៥១គីឡូក្រាមនិងសណ្តែកបណ្តុះមានដាក់បន្ថែមសារធាតុគីមី ចំនួន២២គីឡូក្រាម សរុបចំនួន ៧៣គីឡូក្រាម។

ក្រោយការត្រួតពិនិត្យ និងការពន្យល់ណែនាំអំពីច្បាប់ដល់ម្ចាស់ទីតាំងទាំង២ខាងលើ ម្ចាស់ទីតាំងបានយល់ព្រមសហការទទួលការណែនាំ អប់រំ ពីមន្ត្រីជំនាញ ដោយម្ចាស់ទីតាំងបានស្នើសុំការរៀបចំរយៈពេល៣ខែដើម្បីកែតម្រូវអនាម័យទីតាំងឱ្យបានល្អ និងសហការជាមួយសមត្ថកិច្ចជំនាញ ដើម្បីចុះផ្ទៀងផ្ទាត់ពីភាពត្រឹមត្រូវក្នុងការធ្វើអាជីវកម្មនេះ៕

ត្រីបបែលយក្សរបស់កម្ពុជា ជាប្រភេទត្រីទឹកសាប ដែលបច្ចុប្បន្នកំពុងតែមានវត្តមាននៅតាមដងទន្លេសាប និងទន្លេមេគង្គនៃប្រទេសកម្ពុជា ប៉ុន្តែអ្វីដែលជាការព្រួយបារម្ភខ្លាំងបំផុតនោះគឺ ប្រជានេសាទហាក់ខ្វះការ.ពិចារណា ដោយបាននឹងកំពុងធ្វើការនេសាទដោយខុ.សច្បាប់ យកត្រីប្រភេទនេះទៅដាក់លក់ បានតម្លៃយ៉ាងខ្ពស់បំផុត។

ក្រៅពីត្រីគល់រាំងនិងត្រីរាជ ប្រទេសកម្ពុជាយើងគឺមានត្រីទឹកសាបមួយប្រភេទទៀត ដែលមានទម្ងន់មហាសាល គឺត្រីបបែលយក្ស។ ត្រីបបែលយក្សនេះគឺអាចលូតលាស់និងមានទម្ងន់ធ្ងន់បំផុតរហូតដល់ទៅជាង ៦០០គីឡូក្រាម និងប្រវែងរហូតដល់ជាង ៥ម៉ែត្រ សរុបទាំងកន្ទុយ។ ត្រីបបែលទឹកសាប គឺជាប្រភេទពូជយក្ស គឺត្រូវបានគេចាត់ទុកថាជារបស់ដ៏កម្របំផុតមួយនៅលើភពផែនដី ហើយកាលពីវិច្ឆិកា ឆ្នាំ២០២៣ បបែលយក្សកម្ពុជាទម្ងន់ ៣០០គីឡូក្រាម ក៏បានបំបែកឯតទគ្គកម្មពិភពលោក ដោយ Guinness World Record ថាជាប្រភេទត្រីទឹកសាបធំជាងគេបំផុតលើលោកផងដែរ។

យោងតាមការសិក្សាស្រាវជ្រាវ ត្រីបបែលយក្សទឹកសាប គឺបាននឹងកំពុងរស់នៅដងទន្លេនានានៃប្រទេសកម្ពុជា ជាពិសេសនៅទន្លេសេកុង(ខេត្តស្ទឹងត្រែង) តំបន់ព្រែកកាំពី(ខេត្តក្រចេះ) និងខេត្តព្រៃវែងជាដើម ដែលគេជឿជាក់ថា កន្លែងទាំងនេះគឺជាទីសុខសាន្តជាងគេសម្រាប់ពួកវា នៅទូទាំងសកលលោក។ ទោះជាយ៉ាងណា ត្រីបបែលយក្សទាំងនេះកំពុងតែប្រឈមមុខនឹងទៅនឹងការដាច់ពូជ ព្រោះថាកំណើននៃការនេសាទដោយខុសច្បាប់កំពុងកើនឡើងជារៀងរាល់ថ្ងៃ។

គួរបញ្ជាក់ដែរថា ត្រីបបែលយក្សទឹកសាបនេះ គឺបាតពោះមានពណ៌ត្នោតប្រផេះ ជាយក្រែងនៃពោះមានពណ៌ខ្មៅ និងកន្ទុយមានប្រវែងវែងជាងដងខ្លួន។ ត្រីបបែលយក្សនេះអាចរស់បានរហូតដល់ ១០ឆ្នាំ ដែលចំពោះប្រភេទខ្លះនៅពេលរដូវបន្តពូជ វានឹងផ្លាស់ទីទៅសមុទ្រដើម្បីបន្តពូជ ដោយកើតកូនបានម្តងៗមានចំនួនច្រើន ហើយកូនដែលកើតមកមានទំហំប្រមាណ ៣០សង់ទីម៉ែត្រ ហើយវាលាក់កូនក្នុងស្រកី នៅអំឡុង៧-ទៅ៩ខែ។ ចំពោះចំណីរបស់ត្រីបបែល គឺស៊ីត្រី សត្វឥតឆ្អឹងកង និងសត្វល្អិតជាអាហារ។

ទោះជាយ៉ាងណា សូមអំពាវនាវដល់បងប្អូនប្រជាពលរដ្ឋខ្មែរ ហាមធ្វើការនេសាទ ទិញ-លក់ ត្រីប្រភេទនេះដោយខុសច្បាប់ ដើម្បីជាការអភិរក្សដល់សត្វក្នុងទឹកដែលជាធនធានដ៏កម្រលើពិភពលោក ក៏ដូចជាសូមសំណូមពរដល់ក្រសួងស្ថាប័នពាក់ព័ន្ធចុះអនុវត្តនិងចាត់វិធានការទៅលើបញ្ហានេះឲ្យបានឆាប់បំផុតផងដែរ៕

ថ្មីៗនេះ យោងតាមការបង្ហោះរូបភាពពីបណ្តាញសង្គមគឺបានបង្ហាញឲ្យឃើញថា ដើមឈើរយឆ្នាំយ៉ាងធំមួយដើមដែលដុះលើប្រាសាទព្រះខ័ន ត្រូវបានកា.ប់ចោល ដែលបណ្តាលឲ្យមហាជនមួយចំនួនបញ្ចេញមតិរិះគ.ន់ ស្របពេលដែលមតិគាំទ្រក៏បានលើកឡើងជាមួយគ្នា។

អ្នកដែលធ្លាប់បានទៅលេងប្រាសាទព្រះខ័ននៅក្រុងអង្គរ(សៀមរាប) បានឃើញហើយថា ប្រាសាទមួយនេះមានដើមឈើទំហំធំមួយដើមស្ថិតនៅពីលើ ខណៈថ្មីៗនេះ រូបភាពចែកចាយពីបណ្តាញសង្គមបង្ហាញថាដើមឈើមួយដើមនេះត្រូវបានគេកាប់ចោលហើយ ដោយអ្នកខ្លះបានសម្តែងនូវការនូវការមិនពេញចិត្ត ក៏បានលើកឡើងថា «ពិតជាឡប់មែនទៅកាត់ចោល ព្រោះវាជាភាពទាក់ទាញ វាមិនបាក់ទេប្រាសាទ»។ អ្នកខ្លះថា «បានត្រឹមតែសោកស្តាយ»។ អ្នកខ្លះទៀតថា «វាគ្មានដំណោះស្រាយដែលអាចរក្សាបានទាំងប្រាសាទនឹងទ្រទម្ងន់ដើមឈើបានទេឬ?»

ទោះជាយ៉ាងណា ជាមួយគ្នានេះ ក៏មានមតិមួយចំនួនសម្តែងនូវការគាំទ្រដោយលើកឡើងថា«ខ្ញុំគិតថាកាត់ចឹងល្អហើយ កុំឲ្យបាក់ប្រាសាទ ព្រោះប្រាសាទទ្រទម្ងន់ធ្ងន់អាចនឹងបាក់»។ អ្នកខ្លះថា «បើយើងមិនកាត់ចោលទេ វាអាចធ្វើឲ្យឬសវាចាក់ចូលប្រាសាទកាន់តែខូចទៅៗ»។ ចំណែកអ្នកខ្លះថា «សម្រាប់ខ្ញុំ កូនខ្មែរនឹងកាប់គ្រប់ដើមឈើទាំងអស់ ហើយរក្សាប្រាសាទឲ្យនៅទ្រង់ទ្រាយដើម ទើបដូនតាមានមោទនភាព»។

បើយោងតាមការសិក្សាក៏បានកំណត់អត្តសញ្ញាណថា ដើមឈើដែលដុះពីលើប្រាសាទព្រះខ័ននេះ គឺមានឈ្មោះថា«ដើមស្ពង់» ដែលមានឈ្មោះវិទ្យាសាស្រ្តថា Tetrameles Nudiflora គឺជារុក្ខជាតិម្យ៉ាងដែលចូលចិត្តដុះនៅលើថ្មប្រាសាទ មានអាយុកាលរស់រហូតដល់ ២៥០ ទៅ៣០០ឆ្នាំ មានរាងធំ ខ្ពស់ រលោង និងសម្បុរស។ ដើមស្ពង់នេះគឺមានអាយុកាលខ្លីណាស់ បើប្រៀបធៀបជាមួយដើមឈើផ្សេងទៀតនៅតំបន់អង្គរ។ ដើមស្ពង់ គឺជាប្រភេទឈើម៉្យាងដែលមិនសូវមានគុណភាពល្អនោះទេ ដូច្នេះហើយគេមិនអាចយកវាមកធ្វើជាគ្រឿងសង្ហារឹមឬរបស់មានតម្លៃទេ ជាទូទៅគេទុកសម្រាប់ដុតប៉ុណ្ណោះ។

គួរបញ្ជាក់ថា ប្រាសាទព្រះខ័ន មានទំហំ ៥៦ ហិចតា មានទីតាំងនៅបរិវេណក្រុងអង្គរ លើទឹកដីនៃខេត្តសៀមរាប ស្ថិតនៅតាមផ្លូវវង់ធំ ដោយចេញតាមផ្លូវទ្វារដីឆ្នាំងនៃរាជធានីអង្គរធំ។ ប្រាសាទនេះកសាងឡើងនៅសតវត្យរ៍ទី១២ ក្នុងឆ្នាំ១១៩១ ដោយព្រះបាទជ័យវរ្ម័នទី៧ ដើម្បីឧទ្ទិសដល់ព្រះវររាជបិតារបស់ព្រះអង្គ។ តាមសិលាចារឹកក៏បានកត់ត្រាថា ប្រាសាទនេះសាងសង់នៅសមរភូមិចុងក្រោយ ដែលព្រះបាទជ័យវរ្ម័នទី៧ បានផ្តួលរំលំពួកចាមផងដែរ៕