កាលពីថ្ងៃទី៦ ខែមីនា ឆ្នាំ២០២៤នេះ យោងតាមការបង្ហោះរបស់ក្រសួងព័ត៌មានកម្ពុជាបានបង្ហាញថា រមណីយដ្ឋានអង្គរទទួលបានចំណូលជាង ១១,២លានដុល្លារ ពីការលក់បណ្ណ ចូល ទស្សនាអង្គរ គិតត្រឹមពីរខែដំបូងដើមឆ្នាំ២០២៤ កើនឡើងប្រមាណជា ៥២,០៩ភាគរយ ធៀប នឹងរយៈពេលដូចគ្នាកាលពីឆ្នាំមុន។

ក្រសួងបញ្ជាក់ថា យោងតាមសេចក្តីប្រកាសព័ត៌មានរបស់គ្រឹះស្ថានអង្គរ បានឱ្យដឹងថា រយៈពេល ២ខែដំបូង ឆ្នាំ២០២៤ នេះ រមណីយដ្ឋានអង្គរ ទទួលបានភ្ញៀវសរុប ២៣៥ ៨៥០នាក់ ដែលរកចំណូលបានជាង ១១,២លានដុល្លារ។

ប្រភពដដែលបានបញ្ជាក់ថា ក្នុងខែកុម្ភៈ ឆ្នាំ២០២៤ ការលក់សំបុត្រ ចូលទស្សនារមណីយដ្ឋានអង្គរ សម្រេចបានជាង ១២ម៉ឺននាក់ ដែលរកប្រាក់ចំណូលបាន ៥,៧លានដុល្លារ កើនឡើង ៥៣,២៥ភាគរយ ធៀបនឹងរយៈពេលដូចគ្នាកាលពីឆ្នាំមុន។

រីឯតម្លៃសំបុត្រចូលទស្សនារមណីយដ្ឋានអង្គរ ត្រូវបានចែកចេញជា ៣ប្រភេទ រួមមាន ចូលទស្សនា ១ថ្ងៃ មានតម្លៃ ៣៧ដុល្លារ, ទស្សនា ៣ថ្ងៃ មានតម្លៃ ៦២ដុល្លារ និង ៧ថ្ងៃ មានតម្លៃ ៧២ដុល្លារ។

គួរបញ្ជាក់ថា ក្រៅពីប្រាក់ចំណូលចូលទស្សនារមណីយដ្ឋានអង្គរហើយ គ្រឹះស្ថានអង្គរក៏រកចំណូលបានជាង ២៩ម៉ឺនដុល្លារ ពីការលក់សំបុត្រឱ្យភ្ញៀវបរទេសចូលទស្សនា ប្រាសាទកោះកេរ និងសំបុត្រទូកនៅកំពង់ផែចុងឃ្នៀស។ ចំណែក ប្រាក់ចំណូលឧបត្ថម្ភមូលនិធិគន្ធបុប្ផាកម្ពុជា រយៈពេល ២ខែ ក្នុងឆ្នាំ២០២៤នេះ មានចំនួនសរុប ៤៧ម៉ឺនដុល្លារ៕

សមាគមផលិតករភាពយន្តខ្មែរដែលមានលោក លៀក លីដា ជាប្រធានបានចេញសេចក្តីថ្លែងការណ៍នៅថ្ងៃទី៧ ខែមីនា ឆ្នាំ២០២៤ ពាក់ព័ន្ធករណីថ្មីៗនេះរវាងពលរដ្ឋខ្មែរនិងថៃនាំគ្នាពហិកាមិនទស្សនាភាពយន្តគ្នាទៅវិញទៅមក។ សមាគមផលិតករភាពយន្តខ្មែរបានអំពាវនាវពលរដ្ឋរក្សានូវភាពស្ងប់ស្ងាត់ សេចក្តីថ្លៃថ្នូរ ក្នុងនាមជាប្រជាជាតិដែលមានវប្បធម៌ អរិយធម៌ខ្ពង់ខ្ពស់ និងគោរពឱ្យបានខ្ជាប់ខ្ជួនតាមគោលនយោបាយរបស់រាជរដ្ឋាភិបាលកម្ពុជាក្នុងការកសាងទំនាក់ទំនងសហប្រតិបត្តិការល្អជាមួយប្រទេសថៃ ព្រមទាំងដើម្បីជៀសវាងនូវ រាល់អំពើដែលបង្កឱ្យមានការរើសអើងពូជសាសន៍ និងប៉ះពាល់ដល់ផលប្រយោជន៍នៃប្រទេសទាំងពីរ។

ខ្លឹមសារទាំងស្រុងរបស់សេចក្តីថ្លែងការណ៍បានឱ្យដឹងថា «សមាគមផលិតករភាពយន្តខ្មែរ បានពិនិត្យតាមដានយ៉ាងយកចិត្តទុកដាក់ចំពោះស្ថានភាពវិវត្តន៍ថ្មីៗ ក្នុងវិស័យភាពយន្តកម្ពុជាក្នុងរយៈពេលប៉ុន្មានថ្ងៃចុងក្រោយនេះ ពិសេសជុំវិញបញ្ហាប្រតិកម្មរបស់មហាជនអ្នក លេងបណ្តាញសង្គមលើការចាក់បញ្ចាំងភាពយន្តកម្ពុជានៅក្នុងប្រទេសថៃ និងការចាក់បញ្ចាំងភាពយន្តថៃក្នុង ប្រទេសកម្ពុជា ដែលបង្កឲ្យមានការធ្វើពហិកា មិនគាំទ្រ និងមិនទស្សនាភាពយន្តរបស់ប្រទេសទាំងពីរទៅវិញទៅមក ពិសេសលើករណីភាពយន្តរឿង «ម៉ែក្រឡាភ្លើង» របស់ផលិតកម្ម សាស្ត្រា ហ្វៀម»។

ប្រភពដដែលបានបន្តថា «ករណីនេះ សមាគម បានពិនិត្យឃើញថា ប្រតិកម្ម និងការធ្វើពហិការបស់អ្នកលេងបណ្តាញសង្គមថៃ លើភាពយន្តរបស់កម្ពុជា រឿងម៉ែក្រឡាភ្លើង គឺជាករណីភាន់ច្រឡំ និងវាយតម្លៃសាច់រឿងខុស របស់អ្នកលេងបណ្តាញសង្គមថៃ ចំពោះភាពយន្តខាងលើ តែមិនបានសំដៅជារួមលើស្នាដៃភាពយន្តរបស់កម្ពុជា ដែលចាក់បញ្ចាំងនៅក្នុងប្រទេសថៃនោះទេ។ ពាក់ព័ន្ធនឹងករណីនេះ សមាគមក៏បានសង្កេតឃើញ មានគណនីហ្វេសប៊ុកមិនប្រក្រតីមួយចំនួន (Fake Account) បាននិងកំពុងព្យាយាមបញ្ចេញមតិយោបល់ (Comment) បែបឌីដង ញុះញង់ ឲ្យប្រជា ពលរដ្ឋកម្ពុជាមានការរើសអើងចំពោះភាពយន្តថៃ និង ឌឺដង ញុះញង់ឲ្យប្រជាពលរដ្ឋថៃរើសអើងចំពោះភាពយន្ត កម្ពុជា។ សកម្មភាពខាងលើនេះ គឺជាបញ្ហាដ៏គួរឲ្យព្រួយបារម្ភ ដែលអាចបង្កជាការញុះញង់ឱ្យមានការរើសអើង និងដុតកំហឹងជាតិសាសន៍រវាងកម្ពុជាថៃ ព្រមទាំងធ្វើខូចទំនាក់ទំនងទ្វេភាគីរវាងប្រទេសទាំង២ ដែលជាប្រទេស ភូមិផងរបងជាមួយ»។

ជាមួយគ្នានេះ សមាគម បានអំពាវនាវដល់ប្រជាពលរដ្ឋទាំងអស់សូមមេត្តារក្សានូវភាពស្ងប់ស្ងាត់ សេចក្តីថ្លៃថ្នូរ ក្នុង នាមជាប្រជាជាតិដែលមានវប្បធម៌ អរិយធម៌ខ្ពង់ខ្ពស់ និងគោរពឲ្យបានខ្ជាប់ខ្ជួនតាមគោលនយោបាយរបស់រាជរដ្ឋាភិបាលកម្ពុជាក្នុងការកសាងទំនាក់ទំនងសហប្រតិបត្តិការល្អជាមួយប្រទេសថៃ ព្រមទាំងដើម្បីជៀសវាងនូវ រាល់អំពើដែលបង្កឲ្យមានការរើសអើងពូជសាសន៍ និងប៉ះពាល់ដល់ផលប្រយោជន៍នៃប្រទេសទាំង២។

ជាមួយ គ្នានេះផងដែរ សមាគមក៏ស្នើសុំកិច្ចអន្តរាគមន៍ពីអាជ្ញាធរមានសមត្ថកិច្ច មេត្តាពិនិត្យស្រាវជ្រាវលើគណនីហ្វេសប៊ុកមិន ប្រក្រតីមួយចំនួន ដែលកំពុងធ្វើសកម្មភាពទុច្ចរិតប៉ះពាល់ធ្ងន់ធ្ងរដល់សន្តិសុខជាតិ។
សមាគមផលិតករភាពយន្តខ្មែរ បានថ្លែងអំណរគុណយ៉ាងជ្រាលជ្រៅចំពោះបងប្អូនប្រជាពលរដ្ឋទាំង អស់ដែលបានយកចិត្តទុកដាក់ស្រឡាញ់ គាំទ្រ និងលើកស្ទួយវិស័យភាពយន្តជាតិ។ ជាមួយនេះ ក៏ស្នើសុំ ដល់ផលិតករភាពយន្តទាំងអស់បន្តរួបរួមគ្នា ខិតខំសំរិតសំរាំង ពង្រឹងនិងលើកកម្ពស់គុណភាពស្នាដៃភាពយន្តរបស់ខ្លួន ដើម្បីទទួលបានការគាំទ្រពីសំណាក់ទស្សនិកជនក្នុងស្រុក ភាពយន្តនៅក្រៅប្រទេស និងដើម្បីឧត្តមភាពប្រកួតប្រជែងសម្រាប់ទីផ្សារ៕

ក្រោយពីការរិះគន់ជាខ្លាំងទៅលើតារាងចម្រៀងលោក ម៉ៅហាជី ក្រោយបញ្ចេញបទចម្រៀងក្រោមចំណងជើងថា Team ទឹកត្នោតជូរ ដែលមានអ្នកនិពន្ធទំនុកច្រៀងដោយ លោក ថុន ស៊ីថែន និងនិពន្ធបទភ្លេងដោយ លោក ថុន ផានិត ដែលបានបង្ហោះផ្សព្វផ្សាយលើប្រព័ន្ធ YouTube នៅថ្ងៃទី៦ ខែមីនា ឆ្នាំ២០២៤ ក្រោមការផលិតរបស់ផលិតកម្មថោន។

ជុំវិញករណីនេះ ក្រសួងវប្បធម៌ និងវិចិត្រសិល្បៈ បានឱ្យដឹងថា៖”ការផលិតបទចម្រៀងខាងលើ ជាការរំលោភយ៉ាងធ្ងន់ធ្ងរលើសិទ្ធិសីលធម៌របស់អ្នកនិពន្ធ (សម្តេចព្រះមហាសង្ឃរាជ ជោតញ្ញាណោ ជួន ណាត) និងជាការប្រើប្រាស់បទភ្លេងដែលមានតម្លៃសម្រាប់ជាតិ និងប្រជាជន ទៅបំភ្លៃដោយមិនមានខ្លឹមសារអប់រំ និងគ្មានប្រយោជន៍សម្រាប់សង្គម”។

ក្រសួងវប្បធម៌ តម្រូវឱ្យផលិតកម្ម ថោន លុបចោលជាបន្ទាន់នូវការបង្ហោះផ្សព្វផ្សាយបទ ចម្រៀងខាងលើ តាមគ្រប់មធ្យោបាយ និងត្រូវបញ្ឈប់នូវរាល់ការផលិតបទចម្រៀងដែលរំលោភច្បាប់ សិទ្ធិអ្នកនិពន្ធ និងសិទ្ធិប្រហាក់ប្រហែល ព្រមទាំងត្រូវធ្វើលិខិតសុំទោសសាធារណជន ចំពោះកំហុសដែលបានកើតឡើងនេះ៕

ក្នុងអំឡុងពេលដែលតម្លៃប្រេងឡើងថ្លៃរាល់ថ្ងៃបែបនេះ មនុស្សជាច្រើនមិនអាចគ្រប់គ្រងតម្លៃប្រេងដែលកំពុងតែឡើងថ្លៃបានទេ ដែលវាកំពុងក្លាយជាបញ្ហាដ៏ធំបំផុតសម្រាប់អ្នកបើកបរ។ ដូច្នេះដើម្បីកាត់បន្ថយការចំណាយរបស់អ្នក មានរឿងសំខាន់ដែលយើងត្រូវដឹងពីល្បិចសន្សំសំចៃ និងបច្ចេកទេសបើកបរណាដែលអាចជួយសន្សំសំចៃប្រេងបាន។

១.ប្រើល្បឿនថេរ ៨០-៩០ គីឡូម៉ែត្រក្នុងមួយម៉ោង៖ ដោយសារតែល្បឿននេះគឺជារយៈពេលដែលម៉ាស៊ីននឹងស៊ីប្រេងតិចបំផុតបើធៀបនឹងចម្ងាយដែលបានធ្វើដំណើរ។ អ្នកគួរតែបើកបរក្នុងល្បឿនថេរ កាត់បន្ថយការជាន់ហ្វ្រាំងមិនចាំបាច់ វាអាចចំណាយពេលយូរបន្តិចដើម្បីទៅដល់គោលដៅរបស់អ្នក ប៉ុន្តែការធ្វើបែបពិតជានឹងសន្សំសំចៃប្រេងកាន់តែច្រើន ។

២.លៃតម្រូវម៉ាស៊ីនត្រជាក់ឱ្យខ្ពស់ជាងមុនបន្តិច៖ ជាទូទៅប្រព័ន្ធម៉ាស៊ីនត្រជាក់របស់រថយន្តរួមចំណែកដល់ការបង្កើនការប្រើប្រេងរបស់ម៉ាស៊ីន។ ព្យាយាមលៃតម្រូវសីតុណ្ហភាពខ្ពស់ជាងធម្មតាបន្តិច យ៉ាងហោចណាស់ ខ្ពស់ជាង ២ ទៅ ៣ ដឺក្រេ ដែលវាជួយទៅដល់ខ្យល់របស់ម៉ាស៊ីនធ្វើការតិច ក៏ដូចជាជួយសន្សំសំចៃប្រេងកាន់តែច្រើន។

៣.ការជាន់ហ្គាលបន្ថែមល្បឿនមួយៗ កុំប្រយាប់ ៖ ម៉ាស៊ីនស៊ីប្រេងច្រើនបំផុតពេលយើងកំពុងជាន់ហ្គាលបន្ថែមល្បឿន ដូច្នេះនៅពេលបញ្ឆេះម៉ាស៊ីនហើយ អ្នកគួរតែជាន់ហ្គាលយឺតៗកុំប្រយាប់ ។ ប្រសិនបើអ្នកចង់បន្ថែមល្បឿន អ្នកគួរតែដកជើងចេញពីហ្គាល បន្ទាប់មកជាន់ហ្គាលបន្ថែមល្បឿនម្តងទៀត ការធ្វើបែបនេះនឹងជួយកាត់បន្ថយកម្លាំងម៉ាស៊ីនធ្វើការខ្លាំងជាងមុន។

៤.ដាក់លេខ N នៅពេលឈប់ស្តុប៖ ការធ្វើបែបនេះវានឹងកាត់បន្ថយការប្រើប្រាស់យ៉ាងហោចណាស់ ៣០% បើធៀបនឹងការដាក់ឧបករណ៍ D និងការជាន់ហ្វ្រាំង។ ប៉ុន្តែវិធីល្អបំផុតគឺចាប់ហ្វ្រាំង ឬដាក់ហ្រ្វាំងដៃដើម្បីកុំឱ្យរថយន្តវិល។

៥.សម្ពាធខ្យល់កង់កុំធូរពេក៖ ការប្រើប្រាស់ជាមួយសម្ពាធសំបកកង់ធូរ ឬទាបពេក វានឹងបង្កើនការកកិតរវាងផ្ទៃសំបកកង់ និងផ្ទៃផ្លូវ ដែលជាហេតុធ្វើឱ្យម៉ាស៊ីនស៊ីប្រេងកាន់តែច្រើន។ ដូច្នេះសំបកកង់គួរតែមានសម្ពាធខ្យល់ដែលត្រឹមត្រូវដូចដែលបានបញ្ជាក់ដោយក្រុមហ៊ុនផលិត។ បន្ថែមពីនេះ សម្ពាធខ្យល់កង់ត្រូវតែលើសពីធម្មតានៅពេលដឹកអ្នកដំណើរពេញ និងដឹកឥវ៉ាន់ (Full Load) រួមទាំងការដករបស់របរមិនចាំបាច់ចេញពីរថយន្ត៕

ជឿជាក់ថាប្រិយមិត្តអ្នកលេងបណ្តាញសង្គមជ្រាបមកហើយថារយៈពេលប៉ុន្មានថ្ងៃមកនេះមានរឿងរ៉ាវចម្រូងចម្រាសជាច្រើននៅលើបណ្តាញសង្គមរវាងភាពយន្តខ្មែរនិងថៃដែលពលរដ្ឋទាំងពីរបានពហិកាមិនទស្សនាភាពយន្តគ្នាទៅវិញទៅមក។ ក្នុងនោះពលរដ្ឋកម្ពុជា ភាគច្រើនចង់ឱ្យបិទរឿងថៃម្តងទៀតដូចទៅនឹង២០ឆ្នាំមុនដែលកម្ពុជាសម្រេចបិទភាពយន្តថៃរយៈពេល១០ឆ្នាំ។ ចុះប្រសិនបើមានការមិនឱ្យចាក់បញ្ចាំងភាពយន្តថៃនៅកម្ពុជា តើជាការចំណេញឬខាត?

ក្នុងការបញ្ចេញទស្សនៈផ្ទាល់ខ្លួនរបស់លោក ខាំ ភូរិ ដែលផលិតករ អ្នកដឹកនាំរឿងដ៏មានប្រជាប្រិយភាពបានលើកឡើងនៅលើបណ្តាញសង្គមនាថ្ងៃទី៣ មីនា កន្លងមកនេះថាភាគី ថៃនឹងខាត ហើយខ្មែរចំណេញ។ លោកបានលើកហេតុផលថាមិនមែនលុយនៃការលក់សំបុត្រទេព្រោះទីផ្សារខ្មែរតូចណាស់ មិនបានជះឥទ្ធិពលលើប្រាក់ចំណូលរបស់ថៃនោះអ្វីដែលខាតនោះគឺលោកមិនបញ្ចេញទេដោយលើកឡើងថាអ្នកអាននឹងយល់ហើយ។

ជាមួយគ្នានេះផងដែរ លោក ខាំ ភូរិ បានលើកឡើងថាអ្វីដែលខ្មែរចំណេញនោះគឺផលិតករខ្មែរអាចមានឱកាសពង្រឹងសមត្ថភាព និងពង្រីកខ្លួនជាថ្មី ព្រោះបច្ចុប្បន្នយុវជនជំនាន់ក្រោយ មានសមត្ថភាពកាន់តែល្អហើយ ដើម្បីប្រជែងជាមួយផលិតករក្នុងតំបន់។ អ្វីដែលនៅខ្វះគឺ ឱកាស ទុន ទីផ្សារ និងការជួយបន្ថែមពីរដ្ឋ។

ចំណុចមួយទៀត ប្រសិនបិទរឿងថៃក្នុងទីផ្សារខ្មែរជាភាពត្រឹមត្រូវដែរឬទេលោកបានលើកឡើងថាវាជាការសម្រេចចិត្តដោយហ្មត់ចត់របស់រាជការ របស់អ្នកទស្សនាខ្លួនឯងផ្ទាល់ តែសម្រាប់លោកវិញយល់ឃើញថាពុំចាប់បាច់បិទរឿងថៃ ឬរឿងបរទេសទេ តែរដ្ឋគួរកំណត់ចំនួន និងប្រភេទរឿងដែលអាចអនុញាតិឱ្យបញ្ចាំង កំណត់ពេលវេលាក្នុងការចាក់ផ្សាយ និងតម្លើងពន្ធលើរឿងបរទេសឱ្យខ្ពស់ ដើម្បីជំរុញដល់ទូរទស្សន៍ និងរោងកុននានា ងាកមកផលិតរឿងក្នុងស្រុកឱ្យបានច្រើន។

លោក ខាំ ភូរិ បន្ថែមទៀតថា កម្ពុជាអាចទិញរឿងបរទេសក្នុងតម្លៃថោកៗ ហើយបញ្ចាំងទទួលបានប្រាក់ចំណូលខ្ពស់ ខណៈដែលការផលិតរឿងខ្មែរត្រូវចំណាយទុនច្រើនជាង៤ដង នៃការនាំចូលរឿងបរទេសដែលមានគុណភាពល្អស្រាប់។ ត្រង់ចំណុចរឿងខ្មែរមិនមានគុណភាព ផលិតកររូបនេះលើកឡើងថា ធនធានមនុស្ស ធនធានថវិកាផលិត និងការជួយពីរាជការ គឺជារឿងសំខាន់លោកឃើញផលិតករជំនាន់ក្រោយ ពួកគេមានសមត្ថភាពហើយ តែបញ្ហាគឺធនធានថវិកាក្នុងការផលិតគឺជាឧបសគ្គ ដោយភាពយន្តបរទេសមានទាំងសមត្ថភាព និងថវិកាច្រើន ចំណែកកម្ពុជាយើងគឺពិបាកនិយាយណាស់។

លោកបន្ថែមទៀតថាបន្ទោសរោងកុន ឬស្ថានីយ៍ទូរទស្សន៍ក៏មិនត្រូវដែរ ពួកគាត់ត្រូវការចំណូលដើម្បីទ្រទ្រង់ស្ថាប័នដូចគ្នា បើបន្ទោសអ្នកមើលក៏មិនបានដែរ បញ្ហាគឺរឿងល្អគាត់មើលហើយ បើមិនល្អគាត់ក៏មិនគាំទ្រដែរ។

ផលិតកររូបនេះ បានរម្លឹកដែរថា កន្លងទៅធ្លាប់មានការហាមមិនឱ្យមានការចាក់បញ្ចាំងរឿងថៃតាមទូរទស្សន៍បានជាងដប់ឆ្នាំដែរ ពេលនោះអាចជាឱកាសដល់ផលិតករក្នុងស្រុក ចាប់ផ្តើមផលិតភាពយន្ត និងភាពយន្តភាគ ឡើងវិញ។ តែជាអកុសល ទាំងសមត្ថភាពផលិត ទាំងថវិកា ទាំងការគាំទ្រពីស្ថាប័នរដ្ឋនៅមានកម្រិត ធ្វើឱ្យឱកាសមួយនោះ រសាត់បាត់ទៅវិញ៕

លោក ម៉ៅ ហាជី តារាចម្រៀងក្នុងទ្រនំថោន កំពុងរងនូវការរិះគន់យ៉ាងខ្លាំងពីសំណាក់អ្នកលេងបណ្តាញសង្គមក្រោយពីយកទំនុកច្រៀង «ដែនដីខ្មែរ» ស្នាព្រះហស្តសម្តេចព្រះសង្ឃរាជ ជួន ណាត លាយនៅក្នុងបទចម្រៀងរបស់លោកមានចំណងជើងថា « Team ទឹកត្នោតជូរ»។ ការយកស្នាព្រះហស្តរបស់ជាតិទៅច្រៀងចេញជាគ្រឿងស្រវឹងនេះពលរដ្ឋចាត់ទុកថាជាការប្រមាថមួយនិងស្នើឱ្យក្រសួងវប្បធម៌ និងវិចិត្រសិល្បៈចាត់វិធានការទៅលើរឿងនេះ ស្របពេលពលរដ្ឋមានជាតិនិយមរួបរួមគ្នាតបទៅភាគីថៃ បែរជាតារាចម្រៀងរូបនេះយកទំនុកច្រៀងបទជាតិទៅច្រៀងពីគ្រឿងស្រវឹងទៅវិញ។

«ដែនដីខ្មែរ» ព្រះរាជនិពន្ធដោយសម្ដេចព្រះសង្ឃរាជ ជួន ណាត ជាអង្រួនអារម្មណ៍យុវជនខ្មែរឱ្យចេះស្រឡាញ់ជាតិសាមគ្គីគ្នាជាធ្លុងមួយ ហ៊ានលះបង់សូម្បីជីវិតប្រសិនជាមានសត្រូវឈ្លានពាន។ ទោះយ៉ាងណាកំណាព្យជាតិដ៏មានតម្លៃនិងស្នាព្រះហត្តដ៏ថ្លៃថ្លារបស់សម្តេចព្រះសង្ឃរាជ ជួន ណាត ត្រូវបានអ្នកនិពន្ធឈ្មោះ ថុន ផានិត យកទំនុកច្រៀង «ដែនដីខ្មែរ» ប្រែថា សុវណ្ណភូមិ យកទៅនិពន្ធទំនុកច្រៀងក្នុងបទ « Team ទឹកត្នោតជូរ» ដែលបកស្រាយដោយតារាចម្រៀង ម៉ៅ ហាជី ចេញក្នុងផលិតកម្មថោន។

ឃ្លាយកលំនាំតាមបទជាតិ របស់លោក ម៉ៅ ហាជី នោះទេ «ភ្ញាក់ពីដេកក្រោកឡើងទៅធ្វើសំណង់ ចង់មិនចង់ទៅធ្វើសំណង់ដើម្បីគ្រួសារ ល្ងាចឡើងសាច់ក្លែមមិនខ្វះឡើយណា មិនផឹកស្រាផឹកត្នោតជូរទាំងអស់គ្នា ផឹកត្នោតជូរអស់លុយតិចតែស្រវឹងខ្លាំង ព្រោះមានថ្នាំខ្លាំងដាក់ត្រាំតាំងពីដូនតា បើស្រវឹងកុំបើកបរ កុំស្រែកឡូឡា ដាក់ជ្រុលកាលណានាំគ្នាចូលមុងដេក»។
ការយកបទជាតិទៅប្រឡូកប្រឡាក់ជាមួយនឹងគ្រឿងស្រវឹងជាប្រភេទទឹកត្នោតជូរ នេះបានបង្កទៅជារឿងក្តៅគគុកដែលមានការរិះគន់យ៉ាងខ្លាំងទៅលើតារាចម្រៀង ម៉ៅ ហាជី និងអ្នកនិពន្ធ ដែលអ្នកលេងបណ្តាញសង្គមចាត់ទុកថាជាការប្រមាថមួយដែលយកបទជាតិទៅជាន់ឈ្លីបែបនេះ។ ជាមួយការខឹងសម្បាររិះគន់ទក់សាច់ទៅកាន់តារាចម្រៀងរូបនេះ ពលរដ្ឋក៏ស្នើទៅក្រសួងវប្បធម៌ និងវិចិត្រសិល្បៈចាត់វិធានការទៅលើករណីនេះផងដែរ។

យ៉ាងណាមិញ នៅព្រឹកថ្ងៃទី៧ មីនា នេះលោក ម៉ៅ ហាជី និងអ្នកនិពន្ធ បានចេញវីដេអូ លើកម្រាមដៃ១០សូមទោសទស្សនិកជនដោយលោកអះអាងថាជាកំហុសអចេតនា ជាបទចម្រៀងច្រៀងតាំងពីតូចៗ រាងភាំងបន្តិចបានជ្រុលជ្រួសទៅលើទំនុកច្រៀងរបស់ សម្ដេចព្រះសង្ឃរាជ ដោយមិនដឹងខ្លួន។ លោក ម៉ៅ ហាជី ថាមួយបទនេះខាងផលិតកម្មថោន មិនបានដឹងនោះទេគឺខាងផលិតកម្មគ្រាន់តែយកបទលោកទៅបង្ហោះប៉ុណ្ណោះកុំបន្ទោសខាងផលិតកម្មអី។ ជាមួយគ្នានេះផងដែរ លោក ម៉ៅ ហាជី និងអ្នកនិពន្ធ ថុន ផានិត សន្យាថាមិនឱ្យមានជាលើកទី២នោះទេ ដែលប៉ះពាល់ទៅដល់ភ្លេងជាតិ។

លោក ម៉ៅ ហាជី ថាខ្លួនលោកពិតជាមានអារម្មណ៍សោកស្តាយ នូវកំហុសខុសឆ្គងនេះ នឹងសង្ឃឹមថាទស្សនិកជនអធ្យាស្រ័យផ្តល់ឱកាសថ្មីឱ្យលោកបន្តទៀតហើយលោកក៏មានបទចម្រៀងថ្មីៗជាច្រើនទៀតផងដែរ៕