ប្រទេសជប៉ុន ៖ ក្រុមហ៊ុនជប៉ុនឈ្មោះ Uber Eats បានចាប់ផ្តើមប្រើប្រាស់គ្រឿងយន្តដឹកជញ្ជូនម្ហូបអាហារនៅតាមតំបន់តូចៗក្នុងទីក្រុងតូក្យូ ហើយក្រុមហ៊ុននេះសង្ឃឹមថា នឹងអាចពង្រីកតំបន់ចែកចាយអាហារនៅទូទាំងប្រទេសជប៉ុន ។ គ្រឿងយន្តនេះអាចធ្វើដំណើរតាមដងផ្លូវនានាដើម្បីដឹកជញ្ជូនអាហារឱ្យអតិថិជន ហើយវាអាចដើរគេចពីមនុស្ស ឬវត្ថុនៅបាំងមុខបាន ។

សារព័ត៌មាន AFP បានរាយការណ៍ពីទីក្រុងតូក្យូ ប្រទេសជប៉ុន កាលពីថ្ងៃទី៦ ខែមីនា ឆ្នាំ២០២៤ ថា ជប៉ុនបានប្រឈមមុខនឹងការខ្វះខាតកម្លាំងពលកម្ម ហើយជប៉ុនបានធ្វើវិសោធនកម្មច្បាប់ចរាចរណ៍ កាលពីឆ្នាំ២០២៣ ដើម្បីជួយឱ្យគ្រឿងយន្តដឹកជញ្ជូនអាហារអាចធ្វើដំណើរនៅតាមផ្លូវសាធារណៈបាន ។ ក្រោយពីជប៉ុនធ្វើវិសោធនកម្មច្បាប់ចរាចរណ៍រួចមក ក្រុមហ៊ុនជាច្រើនបានសាកល្បងប្រើប្រាស់គ្រឿងយន្តតូចៗ និងមានរូបរាងគួរឱ្យស្រឡាញ់សម្រាប់ដឹកអាហារ និងទំនិញផ្សេងៗឱ្យអតិថិជន ។

ក្នុងចំណោមក្រុមហ៊ុនទាំងនេះ ក្រុមហ៊ុន Uber Eats បានផលិតគ្រឿងយន្ត Uber Eats មានរូបរាងស្អាត, មានចង្កៀងមុខរាង៤ជ្រុង ដូចកែវភ្នែកមនុស្ស និងមានកង់សរុបចំនួន៦ សម្រាប់ដឹកអាហារនៅតាមដងផ្លូវ ។ គ្រឿងយន្តនេះអាចគណនាប្រវែងផ្លូវដោយខ្លួនវា តាមរយៈការប្រើប្រាស់ Sensor ដើម្បីគេចពីមនុស្សដើរនៅតាមផ្លូវ និងគេចពីវត្ថុនៅបាំងផ្លូវផ្សេងៗ ។

គ្រឿងយន្តដឹកជញ្ជូនអាហាររបស់ក្រុមហ៊ុន Uber Eats បានបម្លាស់ទីក្នុងល្បឿនលឿនបំផុត ស្មើនឹង៥.៤គីឡូម៉ែត្រក្នុង១ម៉ោង ។ លើសពីនេះ ក្រុមហ៊ុនបានបំពាក់នូវអំពូលភ្លើងតូចៗនៅជុំវិញគំរបរបស់វា និងមានមនុស្សបញ្ជាផងដែរក្នុងករណីមានបញ្ហាកើតឡើង ។

លោក Alvin U ប្រធានគ្រប់គ្រងទីផ្សាររបស់ក្រុមហ៊ុន Uber Eats ប្រទេសជប៉ុន និយាយថា ជំហានដំបូង ក្រុមហ៊ុននឹងកំណត់តំបន់ផ្តល់សេវាកម្មដឹកអាហារតាមគ្រឿងយន្ត ហើយអ្នកប្រើប្រាស់កម្មវិធីដឹកអាហារតាមគ្រឿងយន្ត ពួកគេត្រូវចេញមករង់ចាំនៅខាងក្រៅផ្ទះ ឬអគារ រហូតដល់គ្រឿងយន្តមកដល់ ។ ប៉ុន្តែនៅថ្ងៃអនាគត គ្រឿងយន្តនេះនឹងអាចធ្វើដំណើរទៅដល់មុខទ្វារការិយាល័យ, អាផាតមិន ឬមុខបន្ទប់អគារខ្ពស់ៗ រហូតដល់ផ្តល់សេវាកម្មនៅតាមតំបន់ជនបទទៀតផង ។

លោក Alvin U ប្រធានគ្រប់គ្រងទីផ្សារនិយាយថា ៖ «ភ្នាក់ងារដឹកអាហារបច្ចុប្បន្ននេះ ពុំចាំបាច់បារម្ភពីការបាត់បង់ការងារទេ ពីព្រោះរយៈពេល៥ឆ្នាំ ឬ១០ឆ្នាំទៀត នឹងមានការងារផ្នែកដឹកជញ្ជូនទំនិញសម្រាប់មនុស្សក្នុងកម្មវិធីរបស់ក្រុមហ៊ុន Uber Eats ជានិច្ច» ។

បច្ចុប្បន្ន អតិថិជនប្រើប្រាស់កម្មវិធី Uber Eats នៅប្រទេសជប៉ុន ពុំអាចជ្រើសរើសសេវាកម្មគ្រឿងយន្តដឹកជញ្ជូនអាហារបានទេ ប៉ុន្តែប្រសិនបើទទួលបានសិទ្ធិ គឺពួកគេអាចទទួល ឬបដិសេធសេវាកម្មនេះតាមតម្រូវការ ៕

សហរដ្ឋអាមេរិក៖ ស្ថាបនិកក្រុមហ៊ុន Amazon លោក Jeff Bezos បានក្លាយជាកំពូលមហាសេដ្ឋីពិភពលោកជាមួយនឹងទ្រព្យសម្បត្តិ ២០០ ពាន់លានដុល្លារ ដោយបានផ្តួល Elon Musk ឱ្យឈរត្រឹមតំណែងលេខ ៣ វិញ ខណៈលោកឈរក្នុងតំណែងលេខ ២ និងថៅកែ LVMH លោក Bernard Arnault ឈរក្នុងតំណែងលេខ ១។

កាលពីពេលថ្មីៗនេះ យោងតាម Bloomberg Billionaires Index បានឱ្យដឹងថា បច្ចុប្បន្នស្ថាបនិក Amazon Jeff Bezos មានទ្រព្យសម្បត្តិសរុប ២០០ ពាន់លានដុល្លារអាមេរិក ខណៈដែល Elon Musk មានទ្រពសម្បត្តិត្រឹមតែ ១៩៨ ពាន់លានដុល្លារអាមេរិកប៉ុណ្ណោះ។ ស្ថាបនិកក្រុមហ៊ុន Amazon វ័យ ៦០ ឆ្នាំរូបនេះបានយកមកវិញនូវតំណែងកំពូលមហាសេដ្ឋីពិភពលោក បន្ទាប់ពីបានបាត់បង់តំណែងនេះអស់រយៈពេល ៣ឆ្នាំកន្លងទៅ ដោយទម្លាក់លោក Elon Musk នាយកប្រតិបត្តិ Tesla ចំនួន ២ ពាន់លានដុល្លារ។

បើយោងតាម CNN ភាគហ៊ុនរបស់ក្រុមហ៊ុន Tesla បានធ្លាក់ចុះជាង ៧% កាលពីថ្ងៃទី៤ ខែមីនា ដែលការអភិវឌ្ឍន៍នេះបានធ្វើឱ្យទ្រព្យសម្បត្តិរបស់ Musk ធ្លាក់ចុះ ១៧.៦ ពាន់លានដុល្លារក្នុងរយៈពេលត្រឹមតែមួយថ្ងៃប៉ុណ្ណោះ។ ចាប់តាំងពីដើមឆ្នាំមក គាត់បានខាតបង់ច្រើនជាង ៣១ ពាន់លានដុល្លារ នៅពេលដែលភាគហ៊ុន Tesla បានធ្លាក់ចុះ ២៤%។ ទន្ទឹមនឹងនេះដែរ ទ្រព្យសម្បត្តិសុទ្ធរបស់ Bezos បានកើនឡើងចំនួន ២៣ ពាន់លានដុល្លារកាលពីឆ្នាំមុន។ ដូច្នេះសរុបមក ភាគហ៊ុនរបស់ក្រុមហ៊ុន Amazon បានកើនឡើងពីរដងចាប់តាំងពីចុងឆ្នាំ ២០២២ ហើយកំពុងស្ថិតនៅលើផ្លូវដើម្បីកំណត់កម្រិតខ្ពស់ជាប្រវត្តិសាស្រ្តថ្មី។

ក្នុងរយៈពេលមួយឆ្នាំកន្លងទៅ បុរសមានបំផុតក្នុងពិភពលោកបានផ្លាស់ប្តូរជាបន្តបន្ទាប់។ នៅខែឧសភា ឆ្នាំ២០២៣ ថៅកែ LVMH លោក Bernard Arnault បានវ៉ាដាច់ Elon Musk ក្លាយជាមហាសេដ្ឋីលំដាប់លេខ ១ លើភពផែនដីជាមួយទ្រពសម្បត្តិ ២២៥.៧ ពាន់លានដុល្លារអាមេរិក ខណៈនាយកប្រតិបត្តិ Tesla លោក Elon Musk ឈរត្រឹមតំណែងលេខ ២។ បន្ទាប់មកនៅពេលថ្មីៗនេះ ស្ថាបនិកក្រុមហ៊ុន Amazon លោក Jeff Bezos ក៏បានទម្លាក់លោក Elon Musk ឱ្យឈរត្រឹមតំណែងលេខ ៣ វិញ ខណៈលោកឈរក្នុងតំណែងលេខ ២។

គួរបញ្ជាក់ដែរថា បច្ចុប្បន្នជាមហាសេដ្ឋីពិភពលោកលំដាប់លេខ ១ បានទៅលើថៅកែ LVMH លោក Bernard Arnault ជាមួយទ្រពសម្បត្តិ ២២៥.៧ ពាន់លានដុល្លារអាមេរិក និងលេខ ២ បានទៅលើស្ថាបនិកក្រុមហ៊ុន Amazon លោក Jeff Bezos ជាមួយទ្រព្យសម្បត្តិ ២០០ ពាន់លានដុល្លារអាមេរិក, ខណៈលេខ ៣ បានទៅលើនាយកប្រតិបត្តិ Tesla លោក Elon Musk ជាមួយទ្រពសម្បត្តិ ១៩៨ ពាន់លានដុល្លារអាមេរិក, និងលេខ ៤ បានទៅលើនាយកប្រតិបត្តិ Meta លោក Mark Zuckerberg ជាមួយទ្រពសម្បត្តិ ១៧៦.៧ ពាន់លានដុល្លារអាមេរិក៕

ប្រទេសជប៉ុន ៖ សារព័ត៌មានស៊ិនហួររាយការណ៍ថា អាជ្ញាធរខេត្តយ៉ាម៉ាណាស៊ី ដែលស្ថិតនៅខាងលិចទីក្រុងតូក្យូ បានកំណត់គោលការណ៍ប្រមូលថ្លៃសេវាឡើងភ្នំហ្វូជិ (Fuji) ពីភ្ញៀវទេសចរដែលធ្វើដំណើរតាមផ្លូវពេញនិយមបំផុត ចំនួន២.០០០យេនក្នុងម្នាក់ (ឬស្មើប្រមាណ១៤ដុល្លារអាមេរិក) ។ ការប្រមូលថ្លៃសេវាពីភ្ញៀវទេសចរនេះ នឹងអនុវត្តចាប់ពីថ្ងៃទី១ ខែកក្កដា ឆ្នាំ២០២៤ តទៅ ដែលជារដូវកាលឡើងភ្នំហ្វូជិ នៅឆ្នាំ២០២៤ ។

អាជ្ញាធរខេត្តយ៉ាម៉ាណាស៊ី លើកឡើងថា ពួកគេនឹងរៀបចំទីតាំងឱ្យភ្ញៀវទេសចរទាំងអស់បង់ប្រាក់ បើពួកគេចង់ឡើងទៅកម្សាន្តនៅលើភ្នំហ្វូជិ ។ ចំណែកមូលហេតុដែលអាជ្ញាធរជប៉ុនប្រមូលថ្លៃសេវាឡើងភ្នំ គឺក្នុងគោលបំណងកាត់បន្ថយការកកស្ទះដោយសារចំនួនភ្ញៀវទេសចរនៅលើភ្នំច្រើនលើសលប់ ហើយអាជ្ញាធរនឹងយកប្រាក់ទាំងនេះបង្កើតវិធានការគាំទ្រសុវត្ថិភាពសម្រាប់ភ្ញៀវទេសចរ ។

ក្រុមអ្នកឡើងភ្នំទាំងអស់ នឹងត្រូវបង់ប្រាក់ខ្ពស់រហូតដល់៣.០០០យេនក្នុង១លើក (ឬស្មើប្រមាណ២១ដុល្លារអាមេរិក) រួមទាំងថ្លៃសេវាតាមការស្ម័គ្រចិត្ត ចំនួន១.០០០យេន (ឬស្មើប្រមាណ៦ដុល្លារអាមេរិក) នាពេលបច្ចុប្បន្ន សម្រាប់ថ្លៃការពារ និងថែរក្សាភ្នំហ្វូជិ ផងដែរ ។

រដូវកាលឡើងភ្នំហ្វូជិ គឺរហូតដល់ពាក់កណ្តាលខែកញ្ញា ឆ្នាំ២០២៤ ហើយភ្ញៀវទេសចរអាចមកបង់ប្រាក់នៅតាមទីតាំងបង់ប្រាក់ដែលធ្វើការជារៀងរាល់ថ្ងៃ ។ អាជ្ញាធរនឹងកំណត់ចំនួនភ្ញៀវទេសចរឡើងលើភ្នំ ប្រសិនបើមានអ្នកឡើងភ្នំច្រើនជាង៤.០០០នាក់ក្នុង១ថ្ងៃ ។ ប៉ុន្តែនឹងមានករណីលើកលែងផងដែរ ជាពិសេស សម្រាប់អ្នកដែលបានកក់តូបស្បូវសម្រាកនៅលើភ្នំ ។

ការប្រកាសប្រមូលថ្លៃសេវាឡើងភ្នំពីភ្ញៀវទេសចរ ដោយសារបច្ចុប្បន្ននេះ អាជ្ញាធរជប៉ុនព្រួយបារម្ភថា ភ្ញៀវទេសចរអាចឡើងភ្នំគ្មានសុវត្ថិភាព ដូចជា ៖ ពួកគេបានឡើងទៅដល់គោលដៅកំពូលភ្នំតែម្តង ដោយគ្មានការឈប់សម្រាកនៅតាមផ្លូវ (Bullet Climbing) ។

ភ្នំហ្វូជិ គឺជាភ្នំខ្ពស់បំផុតនៅប្រទេសជប៉ុន វាមានកម្ពស់៣.៧៧៦ម៉ែត្រ ។ ភ្នំហ្វូជិ ស្ថិតនៅក្នុងចន្លោះខេត្តយ៉ាម៉ាណាស៊ី និងខេត្តស៊ីហ្ស៊ូអូកា ត្រូវបានចាត់ទុកថា គឺជាសម្បត្តិបេតិកភណ្ឌពិភពលោក របស់អង្គការយូណេស្កូ (UNESCO) ។ អាជ្ញាធរជប៉ុននឹងអនុញ្ញាតឱ្យភ្ញៀវទេសចរឡើងកម្សាន្តលើភ្នំនេះ ចាប់ពីខែកក្កដា រហូតដល់ខែកញ្ញា ឆ្នាំ២០២៤ ៕

សារព័ត៌មាន CNN រាយការណ៍ថា ខ្សែកាបសម្រាប់តភ្ជាប់អ៊ីនធើរណេត និងទូរគមនាគមន៍នៅបាតសមុទ្រក្រហមត្រូវបានគេ បំ.ផ្លា.ញ និងបណ្តាលឱ្យ ខូ.ចខា.ត ។ ក្រុមហ៊ុនទូរគមនាគមន៍ HGC Global Communications លើកឡើងថា ក្រុមហ៊ុនផ្តល់សេវាកម្មអ៊ីនធើរណេតបានផ្លាស់ប្តូរការបញ្ជូនទិន្នន័យ១ ក្នុងចំណោម៤ នៅតំបន់អាស៊ី, អឺរ៉ុប និងមជ្ឈិមបូព៌ា ដោយសារខ្សែកាបជាបណ្តាញទូរគមនាគមន៍ធំៗចំនួន៤ ត្រូវបានកាត់ផ្តាច់បណ្តាលឱ្យអ៊ីនធើរណេតមិនដំណើរការ ។

ក្រុមហ៊ុនទូរគមនាគមន៍ HGC Global Communications ប៉ាន់ស្មានថា ២៥% នៃការបញ្ជូនទិន្នន័យរវាងតំបន់អាស៊ី, អឺរ៉ុប និងមជ្ឈិមបូព៌ា បានទទួលរងផលប៉ះពាល់ ហើយក្រុមហ៊ុននេះក៏បានផ្លាស់ប្តូរការបញ្ជូនទិន្នន័យផងដែរ ដើម្បីជួយអន្តរាគមន៍ដល់អ្នកប្រើប្រាស់ដែលរងផលប៉ះពាល់ ។

ខ្សែកាបទូរគមនាគមន៍រងការខូចខាត រួមមាន ៖ ខ្សែកាបតភ្ជាប់រវាងតំបន់អឺរ៉ុប និងប្រទេសឥណ្ឌា ដែលមានប្រវែង១៥.០០០គីឡូម៉ែត្រ ដែលវាបានតភ្ជាប់បណ្តាញទៅតំបន់អឺរ៉ុប, មជ្ឈិមបូព៌ា និងប្រទេសឥណ្ឌា ។ ចំណែកខ្សែកាបទូរគមនាគមន៍ខូចខាតមួយទៀត គឺខ្សែកាបរវាងតំបន់អាស៊ី-អាហ្វ្រិក-អឺរ៉ុប ដែលមានប្រវែង២៥.០០០គីឡូម៉ែត្រ ដែលតភ្ជាប់រវាងតំបន់អាស៊ីអាគ្នេយ៍ជាមួយតំបន់អឺរ៉ុប តាមរយៈប្រទេសអេហ្ស៊ីប ។ ខ្សែកាបទាំងនេះបានផ្តល់សេវាកម្មតភ្ជាប់បណ្តាញអ៊ីនធើរណេត ស្មើជាង១០០ប្រទេស ។

ខ្សែកាបនៅបាតសមុទ្រទាំងអស់ទទួលបានប្រាក់ឧបត្ថម្ភយ៉ាងច្រើនពីក្រុមហ៊ុនបច្ចេកវិទ្យាធំៗ ដូចជា ៖ ក្រុមហ៊ុន Google, Microsoft, Amazon និង Meta ។ ការខូចខាតយ៉ាងធ្ងន់ធ្ងរនេះអាចបណ្តាលឱ្យកើតភាពវឹកវរ ដូចហេតុការណ៍ដែលធ្លាប់កើតឡើងនៅតៃវ៉ាន់ កាលពីឆ្នាំ២០០៦ ។

មុននេះ ក្រុមឧទ្ទាម Houthi ដែលមានការគាំទ្រពីប្រទេសអ៊ីរ៉ង់បានប្រកាសថា ពួកគេនឹងបំផ្លាញខ្សែកាបនៅបាតសមុទ្រក្រហម ខណៈពេលកន្លងមក ពួកគេបានវាយប្រហារនាវាដឹកជញ្ជូនផលិតផលពាណិជ្ជកម្ម ដែលធ្វើឱ្យប៉ះពាល់ដល់សេដ្ឋកិច្ច និងអាជីវកម្មពិភពលោក ។

គួរបញ្ជាក់ថា ប្រទេសចំនួន៦ ដែលមានព្រំដែនជាប់ជាមួយសមុទ្រក្រហម រួមមាន ៖ ប្រទេសអារ៉ាប៊ីសាអូឌីត, យេម៉ែន, អេហ្ស៊ីប, ស៊ូដង់, អេរីទ្រា និងប្រទេសជីប៊ូទី ៕

សហរដ្ឋអាមេរិក៖ កាលពីពេលថ្មីៗនេះ ក្រុមហ៊ុនផលិតរថយន្តអគ្គិសនីរបស់អាមេរិក Fisker បានប្រកាសថាខ្លួននឹងបញ្ឈប់បុគ្គលិក ១៥ ភាគរយដើម្បីកាត់បន្ថយការចំណាយ ដោយសារបច្ចុប្បន្នក្រុមហ៊ុនកំពុងជួបបញ្ហាហិរញ្ញវត្ថុធ្ងន់ធ្ងរ និងកំពុងស្វែងរកការវិនិយោគបន្ថែមទៀត នេះបើយោងតាម The Verge ដែលបានចុះផ្សាយនៅថ្ងៃទី៥ ខែមីនា ឆ្នាំ២០២៤។

Fisker គឺជាក្រុមហ៊ុនផលិតរថយន្តអគ្គិសនីដែលត្រូវបានបង្កើតឡើងដោយអ្នករចនារថយន្តដ៏ល្បីល្បាញជនជាតិដាណឺម៉ាក Henrik Fisker ក្នុងឆ្នាំ ២០០៧ បន្ទាប់ពីដំណើរការអស់រយៈពេល ១៧ ឆ្នាំ អត្ថិភាពរបស់ក្រុមហ៊ុនគឺមិនដំណើរការល្អនោះទេ ដោយសារតម្រូវការធ្លាក់ចុះ និងអត្រាការប្រាក់ខ្ពស់កំពុងគម្រាមកំហែងដល់បញ្ហាហិរញ្ញវត្ថុរបស់ក្រុមហ៊ុន។

នៅក្នុងត្រីមាសចុងក្រោយនៃឆ្នាំមុន ក្រុមហ៊ុនបានខាតបង់ចំនួន ៤៦៣.៦ លានដុល្លារ និងបានកត់ត្រាប្រាក់ចំណូលត្រឹមតែ ២០០ លានដុល្លារប៉ុណ្ណោះ។ ដើម្បីមានលុយសម្រាប់ប្រតិបត្តិការរយៈពេល ១២ ខែទៀត Fisker នឹងបញ្ឈប់បុគ្គលិក ១៥% ដើម្បីកាត់បន្ថយការចំណាយ ក៏ដូចជាកំពុងពិភាក្សាជាមួយអ្នកវិនិយោគអំពីលទ្ធភាពនៃការចាក់បញ្ចូលដើមទុនបន្ថែម ហើយភាគហ៊ុនរបស់ក្រុមហ៊ុននេះបច្ចុប្បន្នមានតម្លៃប្រហែល ០.៤១ ដុល្លារក្នុងមួយឯកតា។

ទោះជាយ៉ាងណា Fisker មិនទាន់បានបញ្ជាក់ព័ត៌មានច្បាស់លាស់អំពីរបាយការណ៍ហិរញ្ញវត្ថុសរុបសម្រាប់ឆ្នាំ ២០២៣ របស់ខ្លួននៅឡើយទេ ដោយសារវាត្រូវការពេលវេលាបន្ថែមទៀតដើម្បីបញ្ចប់។ នាយកប្រតិបត្តិ និងជាស្ថាបនិក លោក Henrik Fisker បាននិយាយថា “ឆ្នាំ ២០២៣ គឺជាឆ្នាំដ៏លំបាកមួយសម្រាប់ក្រុមហ៊ុន នៅពេលដែលការពន្យារពេលផ្គត់ផ្គង់ និងបញ្ហាជាច្រើនទៀតរារាំងយើងមិនឱ្យផ្តល់យានជំនិះ Ocean ឱ្យបានលឿនតាមការរំពឹងទុក”។

ទោះជាយ៉ាងណាក៏ដោយចាប់ពីឆ្នាំនេះពួកគេបានផ្លាស់ប្តូរយុទ្ធសាស្រ្តរបស់ពួកគេហើយចាប់ផ្តើមចុះកិច្ចសន្យាជាមួយអន្តរការី ដោយបច្ចុប្បន្នក្រុមហ៊ុនមានភ្នាក់ងារចំនួន ១២ នៅសហរដ្ឋអាមេរិក និងអឺរ៉ុប។ ដូច្នេះនាយកប្រតិបត្តិ និងជាស្ថាបនិក Henrik Fisker ក៏បានទទួលខុសត្រូវក្នុងការរចនារថយន្តស្ព័រល្បីៗជាច្រើនដូចជា Aston Martin DB9, V8 Vantage, Artega GT និង BMW Z8 ផងដែរ។ ហេតុនេះក្រុមហ៊ុន Fisker ដែលមានមូលដ្ឋាននៅរដ្ឋកាលីហ្វ័រញ៉ា បានព្យាករណ៍ថានៅឆ្នាំ ២០២៤ នេះនឹងមានការនាំចេញរថយន្តទៅបរទេសចំនួន ២០,០០០ គ្រឿង៕