ប្រទេសម៉ាឡេស៊ី ៖ អ្នកជំនាញជនជាតិម៉ាឡេស៊ីចាត់ទុកថា ប្រទេសកំពុងអភិវឌ្ឍន៍នានានៅក្នុងតំបន់អាស៊ី រួមទាំងម៉ាឡេស៊ីផងដែរ នឹងទទួលបានផលប្រយោជន៍ផ្សេងៗពីការអភិវឌ្ឍផ្នែកបច្ចេកវិទ្យាក្នុងឧស្សាហកម្មបច្ចេកវិទ្យាកម្រិតខ្ពស់របស់ប្រទេសចិន ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៣ ខែមីនា ឆ្នាំ២០២៤ ។

លោក Shankaran Nambiar អ្នកស្រាវជ្រាវជាន់ខ្ពស់នៅវិទ្យាស្ថានស្រាវជ្រាវសេដ្ឋកិច្ចម៉ាឡេស៊ីលើកឡើងថា ប្រទេសចិនបានបង្កើតផលប្រយោជន៍ជាច្រើនក្នុងផ្នែកឧស្សាហកម្មថ្មីៗ ជាពិសេស ផ្នែកបញ្ញាសិប្បនិម្មិត (AI), រថយន្តអគ្គិសនី, Fintech, រថភ្លើងល្បឿនលឿន និងបច្ចេកវិទ្យាជាន់ខ្ពស់ផ្សេងទៀត ។ ហេតុនេះ វាបានបង្កើតតម្រូវការផលិតផលវត្ថុធាតុដើម ឬផលិតផលគ្រប់មុខ ដែលផលិតនៅប្រទេសម៉ាឡេស៊ី ។

លោក Shankaran Nambiar បន្តទៀតថា ប្រទេសចិនមានឋានៈជាដៃគូពាណិជ្ជកម្មដ៏ធំបំផុតរបស់ម៉ាឡេស៊ី តាំងពីឆ្នាំ២០០៩ មកម៉្លេះ ហើយចិននឹងក្លាយជាប្រទេសជំរុញសេដ្ឋកិច្ចដ៏សំខាន់នៅក្នុងតំបន់ផងដែរ ។

គួរបញ្ជាក់ថា ក្នុងអំឡុងពេលកិច្ចប្រជុំកំពូលពិសេសរវាងអាស៊ាន និងអូស្ត្រាលី នៅទីក្រុង Melbourne ប្រទេសអូស្ត្រាលី នាពេលកន្លងមក នាយករដ្ឋមន្ត្រីម៉ាឡេស៊ី លោក Anwar Ibrahim បានលើកឡើងថា សហរដ្ឋអាមេរិក និងប្រទេសសម្ព័ន្ធមិត្តមួយចំនួន មិនគួររារាំងម៉ាឡេស៊ី ក្នុងការធ្វើសម្ព័ន្ធមិត្តជាមួយចិនទេ ។

ប្រទេសចិនបានរក្សាតំណែងជាដៃគូពាណិជ្ជកម្មដ៏ធំបំផុតរបស់ម៉ាឡេស៊ី អស់រយៈពេល១៥ឆ្នាំមកហើយ ហើយចិនក៏ជាប្រភពវិនិយោគដ៏សំខាន់របស់ម៉ាឡេស៊ី អស់រយៈពេលជាច្រើនឆ្នាំផងដែរ ។ បើតាមរបាយការណ៍របស់ Kenanga Research បង្ហាញថា តម្រូវការពីទីផ្សារចិននឹងក្លាយជាកម្លាំងដ៏សំខាន់ ដើម្បីជំរុញការរីកចម្រើនផ្នែកនាំចេញរបស់ម៉ាឡេស៊ី នៅឆ្នាំ២០២៤ នេះ ៕

ប្រទេសអង់គ្លេស ៖ កាលពីថ្ងៃទី១៣ ខែមីនា ឆ្នាំ២០២៤ គេហទំព័រ ETtoday បានចុះផ្សាយថា កាលពីពេលថ្មីៗនេះ មាននារីម្នាក់ឈ្មោះ Ravenna Hannili អាយុ២៣ឆ្នាំ មកពីប្រទេសប្រេស៊ីល បានជួបហេតុការណ៍នឹកស្មានមិនដល់មួយ ខណៈនាងបម្រុងធ្វើដំណើរតាមយន្តហោះចាកចេញពីទីក្រុងឡុងដ៍ ប្រទេសអង់គ្លេស ទៅកាន់ប្រទេសប្រេស៊ីល ។ វាបណ្តាលមកពីបុគ្គលិកបម្រើការលើយន្តហោះ (អូតែស) មិនព្រមឱ្យនាងស្លៀកពាក់បែបនេះឡើងយន្តហោះ រហូតដល់ក្លាយជាប្រធានបទធ្វើឱ្យអ្នកលេងបណ្តាញសង្គមជជែកវែកញែកគ្នាយ៉ាងខ្លាំង ។

កាលពីថ្ងៃទី១០ ខែមីនា ឆ្នាំ២០២៤ នាង Ravenna បានបង្ហោះរូបភាពរបស់ខ្លួនក្នុង Instagram និងបង្ហាញឱ្យឃើញពីសម្លៀកបំពាក់ដែលនាងស្លៀកឡើងយន្តហោះនៅថ្ងៃនោះ គឺជាឈុតដ៏សិចស៊ី និងស្រដៀងគ្នាជាមួយឈុតហាត់ប្រាណរបស់ស្ត្រី ។ នាងបានពាក់អាវទ្រនាប់ និងស្លៀកខោខ្លីរឹបជើង ហើយបង្ហាញឱ្យឃើញខ្លួនប្រាណនាងយ៉ាងច្បាស់ ។ នាងបានថតរូបទាំងនេះនៅមុខកញ្ចក់បន្ទប់ទឹកក្នុងអាកាសយានដ្ឋានក្នុងទីក្រុងឡុងដ៍ មុនពេលឡើងលើយន្តហោះ ។

ក្រោយមក ក្នុងអំឡុងពេលនាង Ravenna បម្រុងឡើងលើយន្តហោះ ស្រាប់តែនារីជាបុគ្គលិកបម្រើការលើយន្តហោះម្នាក់ប្រាប់ឱ្យនាងឈប់ ព្រមទាំងប្រាប់ឱ្យនាងទៅផ្លាស់ប្តូរសម្លៀកបំពាក់សិន ទើបបុគ្គលិករូបនេះអនុញ្ញាតឱ្យនាងឡើងយន្តហោះ ដោយសារនាងស្លៀកពាក់ពុំសមរម្យ ។ ពេលនោះ នាង Ravenna មានអារម្មណ៍ភ្ញាក់ផ្អើលយ៉ាងខ្លាំង ហើយនាងក៏ឆ្លើយតបថា គេបានបញ្ជូនវ៉ាលិសសម្លៀកបំពាក់របស់នាងដាក់នៅបាតយន្តហោះអស់ហើយ ហើយនាងមានតែកាបូបតូច១ប៉ុណ្ណោះនៅជាប់ខ្លួន អីចឹង តើឱ្យនាងទៅយកសម្លៀកបំពាក់ពីណាមកផ្លាស់ប្តូរ?

បន្ទាប់មក នាង Ravenna បានសួរទៅកាន់បុគ្គលិកបម្រើការលើយន្តហោះថា ៖ «តើមានអ្វីត្រូវណែនាំខ្ញុំទេ នៅពេលនេះ? តើឱ្យខ្ញុំទៅយកខោអាវពីណាមកស្លៀក?» នៅពេលបុគ្គលិកបម្រើការលើយន្តហោះគ្មានការឆ្លើយតប នាង Ravenna ក៏បានសួរទៀតថា ៖ «តើច្បាប់ចំណុចណារបស់ក្រុមហ៊ុនអាកាសចរណ៍ ដែលចែងថា ខ្ញុំមិនទទួលបានការអនុញ្ញាតឱ្យស្លៀតឈុតហាត់ប្រាណឡើងយន្តហោះ?» ។ នៅទីបំផុត គេក៏អនុញ្ញាតឱ្យនាង Ravenna ជិះយន្តហោះ ដោយពុំចាំបាច់ផ្លាស់ប្តូរសម្លៀកបំពាក់ ហើយនាងក៏បានធ្វើដំណើរទៅដល់ប្រទេសប្រេស៊ីល ។

ទោះយ៉ាងណា ក្រោយពីរឿងរ៉ាវនេះបានចែកចាយនៅក្នុងបណ្តាញសង្គម ធ្វើឱ្យអ្នកលេងបណ្តាញសង្គមប្រកែកគ្នាពីភាពសមរម្យនៃសម្លៀកបំពាក់ដែលនាងស្លៀក ។ មនុស្សមួយចំនួននិយាយថា នាងស្លៀកពាក់បើកចំហរាងកាយខ្លាំងពេក ទើបអូតែសត្រូវធ្វើតាមតួនាទី ខណៈមនុស្សខ្លះទៀតនិយាយថា នាងមិនខុសអ្វីទេ ដោយសារក្រុមហ៊ុនអាកាសចរណ៍គ្មានច្បាប់ច្បាស់លាស់ពាក់ព័ន្ធនឹងការស្លៀកពាក់ ។ ម្យ៉ាងទៀត សម្លៀកបំពាក់របស់នាង ក៏បានឆ្លងកាត់កន្លែងត្រួតពិនិត្យរួចហើយដែរ ហេតុអ្វីបានជាអូតែសបដិសេធមិនឱ្យនាងឡើងយន្តហោះ ៕

ប្រទេសចិន៖ ភ្ញៀវទេសចរដែលទើបតែមកទស្សនាទីក្រុងសៀងហៃថ្មីៗ មានការភ្ញាក់ផ្អើលខ្លាំងជាមួយនឹងរបៀបហាលសម្លៀកបំពាក់ពាសពេញទីក្រុងក្នុងប្រទេសចិន ដែលលេចចេញពីអគារផ្ទះល្វែងខ្ពស់ៗ ជាពិសេសអគារផ្ទះល្វែងចាស់ៗ។ ប៉ុន្តែទោះជាយ៉ាងណា ក្នុងក្រសែភ្នែកប្រជាជននៅទីនេះ ការហាលសម្លៀកបំពាក់បែបនេះគឺប្រៀបបាននឹងទង់ជាតិចម្រុះពណ៌ដែលបក់បោកតាមខ្យល់។

ស្នួលហាលខោអាវនៅទីក្រុងសៀងហៃ ជាធម្មតាមានស៊ុមរាងចតុកោណកែងជាប់នឹងជញ្ជាំង ដែលមានទំហំប្រហែល ៣x២ ម៉ែត្រ លាតសន្ធឹងពីយ៉រ ឬបង្អួច។ បន្ទាប់ពីបោកគក់សម្លៀកបំពាក់រួច ត្រូវបានរៀបចំនៅលើបង្គោលវែងហើយព្យួរដោយប្រុងប្រយ័ត្ននៅលើស្នួល ដោយបង្គោលនីមួយៗមានប្រវែងវែងល្មមអាចសម្ងួតបាន ៣-៤ សម្លៀកបំពាក់ក្នុងពេលតែមួយ។ ស្នួលហាលខោអាវទាំងនេះមានប្រជាប្រិយភាពខ្លាំង ពីព្រោះមនុស្សគិតថាវាមានប្រសិទ្ធភាពជាងម៉ាស៊ីនសម្ងួតសម្លៀកបំពាក់ និងសន្សំសំចៃអគ្គិសនី។

ទោះជាយ៉ាងណា រដ្ឋាភិបាលក្រុងសៀងហៃជឿថា ការហាលសម្លៀកបំពាក់បែបនេះគឺមិនល្អ ដោយសារវាមានភាពរញ៉េរញ៉ៃ និងប៉ះពាល់ដល់អារម្មណ៍ភ្ញៀវទេសចរ ក៏ដូចជាជះឥទ្ធិពលអវិជ្ជមានដល់រូបភាពនៃទីក្រុងដែលត្រូវបានណែនាំថាជាទីក្រុងទំនើប។ ក្នុងឆ្នាំ ២០១០ មន្ត្រីបានប្រកាសហាមប្រជាជនសម្ងួតសម្លៀកបំពាក់តាមបង្អួចនៅតាមដងផ្លូវសំខាន់ៗ។ ប៉ុន្តែសម្រាប់ប្រជាជនក្នុងតំបន់ ទម្លាប់សម្ងួតសម្លៀកបំពាក់នេះគួរតែត្រូវបានចាត់ទុកជាបេតិកភណ្ឌវប្បធម៌អរូបីដែលមិនអាចលុបបាន។

អ្នកនិពន្ធ Ma Shanglong បាននិយាយថា ស្នួលហាលខោអាវនេះអាចលេចឡើងនៅក្នុងតំបន់លំនៅដ្ឋានមួយដែលត្រូវបានសាងសង់ក្នុងទសវត្សរ៍ឆ្នាំ ១៩៨០ និង ១៩៩០ ដើម្បីបំពេញតម្រូវការចាំបាច់។ លោកជឿថាកម្មករគឺជាមនុស្សដំបូងគេដែលប្រើវិធីនេះ មូលហេតុដែលប្រជាជនមានទម្លាប់ហាលខោអាវបែបនេះ គឺដោយសារសំណើមនៅទីក្រុងសៀងហៃមានកម្រិតខ្ពស់ ពេលដែលផ្លាស់ពីផ្ទះទៅអាផាតមិន ពួកគេនៅតែរក្សាទម្លាប់សម្ងួតខោអាវនៅខាងក្រៅ ហើយម្យ៉ាងទៀតកន្លែងរស់នៅតូចចង្អៀត ធ្វើឱ្យអ្នករស់នៅខ្វះកន្លែងសម្ងួតសម្លៀកបំពាក់។

បើយោងតាមស្ថិតិក្នុងទសវត្សរ៍ឆ្នាំ ១៩៨០ និងឆ្នាំ ១៩៩០ ផ្ទះល្វែងជាមធ្យមនៅទីក្រុងសៀងហៃមានទំហំត្រឹមតែ ១៣-១៥ ម៉ែត្រការ៉េ ហើយគ្រឿងសង្ហារិមត្រូវបានដាក់ជាមូលដ្ឋានស្ទើរតែពេញបន្ទប់។ ដូច្នេះ គ្រួសារជាច្រើនបានចេញគំនិតពង្រីកយ៉រ និងសង់ធ្នើរនៅក្រៅបង្អួចដើម្បីបង្កើនកន្លែងរស់នៅ។

គួរបញ្ជាក់ដែរថា ទំនៀមទំលាប់ហាលខោអាវពាសពេញទីក្រុងសៀងហៃរបស់ប្រជាជនចិន ពិតជាផ្តល់ភាពងាយស្រួលមែន ប៉ុន្តែទោះជាយ៉ាងណាវាក៏មានគ្រោះថ្នាក់មួយចំនួនផងដែរ។ កាលពីមុន នៅឯអគារផ្ទះល្វែងមួយកន្លែងនៅផ្លូវ Tham Xuan ស្រុក Man Hang ស្នួលសម្ងួតនៅជាន់ទី៤ ត្រូវបានខ្យល់បក់បោក និងបំផ្លាញកញ្ចក់នៃផ្ទះល្វែងជាន់ផ្ទាល់ដី កត្តានេះបានធ្វើឱ្យអគារមួយចំនួនក្នុងទីក្រុងសៀងហៃហាមមិនឱ្យប្រើស្នួលចាស់ៗនោះទេ៕

ប្រទេសឥណ្ឌា ៖ អតិថិជន៥នាក់បានក្អួត ឈា.ម ភ្លាមៗក្រោយពីពួកគេបរិភោគអាហារនៅភោជនីយដ្ឋានមួយឈ្មោះ «La Forestta Cafe» ក្នុងទីក្រុង Gurugram រដ្ឋ Haryana ប្រទេសឥណ្ឌា ហើយខាងភោជនីយដ្ឋានលើកទឹកកកស្ងួតមកឱ្យភ្ញៀវផឹកដើម្បីបំបាត់ក្លិនមាត់ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៧ ខែមីនា ឆ្នាំ២០២៤ ។

ហេតុការណ៍នេះបានកើតឡើងក្រោយពីខាងភោជនីយដ្ឋានលើកម្ហូបចុងក្រោយមកជូនភ្ញៀវ ហើយម្ហូបនេះផ្សំពីស្ករលាយជាមួយគ្រឿងទេស ហើយពេលភ្ញៀវបរិភោគម្ហូបនេះរួច ពួកគេមានក្លិនមាត់មិនល្អ ឃើញបែបនេះ ខាងភោជនីយដ្ឋានក៏បានយកថ្នាំបំបាត់ក្លិនមាត់ផ្សំជាមួយទឹកកកស្ងួតច្រកថង់មកឱ្យភ្ញៀវផឹក ។ ប៉ុន្តែពេលភ្ញៀវយកថ្នាំនេះដាក់ចូលមាត់មិនយូរប៉ុន្មាន ស្រាប់តែមាត់របស់ពួកគេក៏ចាប់ផ្តើមឈឺក្រហល់ក្រហាយដូចភ្លើងឆេះ បន្ទាប់មក ក៏ក្អួតចេញឈាមតែម្តង ។

បើតាមវីដេអូដែលគេចែកចាយក្នុងបណ្តាញសង្គមឥណ្ឌាបង្ហាញថា ភ្ញៀវម្នាក់ៗឈឺអណ្តាតយ៉ាងខ្លាំង និងស្តោះទឹកមាត់ ខណៈភ្ញៀវខ្លះទៀតចេញឈាមតាមមាត់ ។ នៅទីបំផុត ភ្នាក់ងារសង្គ្រោះក៏បានបញ្ជូនភ្ញៀវទាំងអស់ទៅកាន់មន្ទីរពេទ្យ ហើយក្នុងចំណោមនោះ ភ្ញៀវ២នាក់មានគ្រោះថ្នាក់ធ្ងន់ធ្ងរ ។ នៅពេលគ្រូពេទ្យបានឃើញថង់ដាក់ទឹកកកស្ងួតនេះ គ្រូពេទ្យប្រាប់ថា វាមានជាតិអាស៊ីត និងអាចបណ្តាលឱ្យអ្នកផឹកមានគ្រោះថ្នាក់រហូតដល់ស្លាប់ ។

ក្រោយកើតហេតុ សមត្ថកិច្ចក៏បានចាប់ខ្លួនអ្នកគ្រប់គ្រងភោជនីយដ្ឋាន «La Forestta Cafe» និងចោទប្រកាន់ពីបទដាក់ថ្នាំពុល ក្នុងគោលបំណងឱ្យអ្នកដទៃមានគ្រោះថ្នាក់ ឬរងរបួស ដោយសារទឹកកកស្ងួតបានផលិតចេញពីកាបូនឌីអុកស៊ីត ដែលគេនិយមប្រើប្រាស់សម្រាប់ធ្វើផ្សែង និងផ្តល់ជាតិត្រជាក់ ។ ចំណែកម្ចាស់ភោជនីយដ្ឋាននេះ សមត្ថកិច្ចនឹងតាមចាប់ខ្លួនមកដាក់ទោសតាមច្បាប់ ៕