ទឹកដូងគឺមានអត្ថប្រយោជន៍ខ្លាំងណាស់ចំពោះស្ត្រីដែលមានផ្ទៃពោះ ព្រោះវាសម្បូរទៅដោយវីតាមីនជាច្រើនដូចជា ប៉ូតាស្យូម, កាល់ស្យូម, ក្លរូ និងសារធាតុចិញ្ចឹមដទៃទៀត ដែលល្អសម្រាប់សុខភាព ក៏ដូចជាជួយបង្កើនថាមពល និងប្រឆាំងជំងឺផ្សេងៗបានទៀតផង។ ទោះជាយ៉ាងណា ការផឹកទឹកដូងច្រើនពេក ៣ ទៅ ៤ ផ្លែក្នុងមួយថ្ងៃ ក៏អាចធ្វើឱ្យគ្រោះថ្នាក់ដល់សុខភាពម្ដាយ និងកូនក្នុងផ្ទៃផងដែរ។ ដូច្នេះហើយ បើយោងតាមជំនឿរបស់ចាស់បុរាណជឿថាពេលមានផ្ទៃពោះ ការផឹកទឹកដូងធ្វើឱ្យកូនកើតមកស្បែកស និងថ្លោសល្អ តើជំនឿនេះពិតដែរឬទេ?
ចម្លើយនោះគឺ ទឹកដូងមិនអាចជួយឱ្យក្មេងកើតមកស្បែកសនោះទេ ព្រោះបើយោងតាមទិន្នន័យវិទ្យាសាស្ត្របច្ចុប្បន្ន មិនមានភស្តុតាងណាមួយដែលបង្ហាញថា ការផឹកទឹកដូងអាចជួយកូនរបស់អ្នកកើតមកមានស្បែកសនោះទេ ដោយសារតែពណ៌នៃស្បែករបស់ទារក វាអាស្រ័យលើហ្សែនរបស់ឪពុកនិងម្តាយ ដូច្នេះកត្តាអាហារូបត្ថម្ភមិនមានផលប៉ះពាល់ទេ ឬវាអាចមានឥទ្ធិពលតិចតួចប៉ុណ្ណោះ។
ទោះជាយ៉ាងណាក៏ដោយ យោងតាមអ្នកជំនាញបាននិយាយថា ស្ត្រីដែលកំពុងតែពពោះ ៤ ខែឡើងទៅ បើញ៉ាំទឹកដូងច្រើន គឺកាត់បន្ថយប្រឡាក់ស្នាមទឹកភ្លោះ ហើយកូនកើតមកអាចនឹងថ្លោសល្អ ដោយសារសារធាតុរ៉ែជាច្រើនជួយក្នុងការបំពេញរាងកាយជាមួយនឹងអំបិលរ៉ែ។ ហើយមានវីតាមីនជួយពង្រឹងប្រព័ន្ធការពាររាងកាយ ដើម្បីជួយអ្នកជំងឺឆាប់ជាសះស្បើយ ដោយសារទឹកដូងជាភេសជ្ជៈធម្មជាតិគ្មានជាតិខ្លាញ់ ជាពិសេសទឹកដូងខ្ចីដែលមានសារធាតុរ៉ែច្រើនប្រភេទ នេះនឹងជួយជំនួសអំបិលរ៉ែដែលបានបាត់បង់។
ប៉ុន្តែសម្រាប់ស្ត្រីដែលមានផ្ទៃពោះ ៣ ខែដំបូងវិញ គឺមិនឱ្យផឹកទឹកដូងច្រើនពេកនោះទេ ព្រោះអ័រម៉ូននៅក្នុងខ្លួនអាចនឹងផ្លាស់ប្តូរ ហើយសុខភាពរបស់ទារកគឺមិនស្ថិតស្ថេរ។ ទឹកដូងមានលក្ខណៈសម្បត្តិត្រជាក់ធ្វើឱ្យរាងកាយត្រជាក់ ប៉ះពាល់ដល់សម្ពាធឈាមទាប និងធ្វើឱ្យសរសៃពួរ ក៏ដូចជាសាច់ដុំរបស់ម្តាយចុះខ្សោយ រួមទាំងបណ្តាលឱ្យហើមពោះ និងការចាញ់កូនធ្ងន់ធ្ងរផងដែរ។ ដូច្នេះវាពិតជាមានគ្រោះថ្នាក់ដល់សុខភាពម្ដាយ និងកូនក្នុងផ្ទៃខ្លាំងណាស់ ជាងនេះទៅទៀត ម្តាយដែលមានផ្ទៃពោះមិនគួរញ៉ាំអាហារដែលមានជាតិស្ករ ឬម្សៅខ្ពស់នោះទេ បន្ទាប់ពីផឹកទឹកដូងច្រើន៕