បរទេស៖ បច្ចុប្បន្នអត្រានៃភាពក្រីក្រនៅក្នុងប្រទេសអាហ្សង់ទីនបានកើនឡើងពី ២០ ភាគរយ ដល់ ៦០% បើធៀបនឹង ៤០% ក្នុងឆ្នាំ ២០២៣ មូលហេតុគឺដោយសារការកើនឡើងអតិផរណាបានធ្វើឱ្យមនុស្សជាច្រើនសម្រេចចិត្តរើសអាហារពីធុងសំរាម។

យោងតាមសារព័ត៌មានបរទេស ដែលបានចុះផ្សាយនៅថ្ងៃទី១៣ ខែមីនា ឆ្នាំ២០២៤ ថាអ្នកលក់ផ្លែឈើ និងបន្លែនៅក្នុងទីក្រុង Buenos Aires ប្រទេសអាហ្សង់ទីន បានឃើញមនុស្សជាច្រើនកំពុងស្វែងរកអាហារនៅក្នុងធុងសំរាម។ Sandra Boluch ដែលជាអ្នកលក់បន្លែនៅ Buenos Aires បាននិយាយថា ការលក់ថ្មីៗនេះបានធ្លាក់ចុះខ្លាំង ដោយសារមនុស្សមិនទិញបន្លែល្អៗនោះទេ ពោលគឺពួកគេចាំយកតែបន្លែខូចៗ ឬរបស់ដែលបោះចោលប៉ុណ្ណោះ។

Boluch បានបន្តទៀតថា “យើងមានធុងសំរាមនៅខាងក្រោយដើម្បីបោះចោលអាហារដែលខូច ដោយគ្រាន់តែយកថង់សំរាមទៅទីនោះភ្លាម មនុស្សប្រហែល ២០ នាក់ស្រាប់តែរត់ដណ្តើមយករបស់ដែលបោះចោលនោះទេម្តង”។ រឿងនេះធ្លាប់កើតឡើងកាលប៉ុន្មានឆ្នាំមុន ប៉ុន្តែថ្មីៗនេះករណីនេះក៏បានកើតឡើងម្តងទៀត ហើយជាពិសេសក្នុងចំណោមមនុស្សចាស់ដែលគ្មានប្រាក់ចំណូល ដោយសារអតិផរណាបានកើនឡើង។

បើយោងតាមរបាយការណ៍ខែកុម្ភៈ ឆ្នាំ២០២៤ បានបង្ហាញថា អត្រានៃភាពក្រីក្រនៅក្នុងប្រទេសអាហ្សង់ទីនបានកើនឡើងពី ២០ ភាគរយដល់ ៦០% បើធៀបនឹង ៤០% ក្នុងឆ្នាំ២០២៣ ដោយដាក់សម្ពាធលើផែនការកំណែទម្រង់ និងកាត់បន្ថយការចំណាយរបស់ប្រធានាធិបតី Javier Milei ។

គោលនយោបាយរឹតបន្តឹងដូចជា កាត់បន្ថយការចំណាយរបស់រដ្ឋ ការកំណត់គោលដៅឧបត្ថម្ភធនសម្រាប់អ្វីៗដូចជាឧបករណ៍ប្រើប្រាស់ ការដឹកជញ្ជូន និងការស្វែងរកការសម្រួលកម្មវិធីសុខុមាលភាពបានធ្វើឱ្យមានសម្ពាធដល់ជីវិតរបស់ប្រជាជន។ ជាពិសេស រដ្ឋាភិបាលក៏បានទម្លាក់តម្លៃប្រាក់ប៉េសូលើសពី ៥០% កាលពីចុងឆ្នាំមុន ដែលជំរុញឱ្យមានអតិផរណា ធ្វើឱ្យប្រជាជនគ្រប់វណ្ណៈពិបាក។

គួរបញ្ជាក់ដែរថា អាហ្សង់ទីនកំពុងរៀបចំបញ្ចេញទិន្នន័យអតិផរណាខែកុម្ភៈជាមួយនឹងការកើនឡើងប្រចាំខែប្រហែល ១៥.៣% ធ្លាក់ចុះពី ២០% ក្នុងខែមករា និង ២៥% កាលពីខែមុន។ ទោះជាយ៉ាងណាក៏ដោយ មន្ត្រីនៅក្នុងប្រទេសនេះក៏បាននិយាយផងដែរថា ស្ថានភាពក្នុងខែមីនាអាចកាន់តែ “ស្មុគស្មាញ” នៅពេលដែលសេដ្ឋកិច្ចនៅតែអាប់អួរ ដោយសារការលក់ និងសកម្មភាពផលិតកម្មធ្លាក់ចុះ៕

ប្រទេសឥណ្ឌា ៖ នាយករដ្ឋមន្ត្រីឥណ្ឌា លោក Narendra Modi បានប្រកាសនៅក្នុងបណ្តាញសង្គម X កាលពីថ្ងៃទី១១ ខែមីនា ឆ្នាំ២០២៤ ថា ប្រទេសឥណ្ឌាទទួលបានជោគជ័យក្នុងការ បា.ញ់ សាកល្បង មី.ស៊ី.ល ឆ្លងទ្វីបផលិតដោយខ្លួនឯងទៅលើបរិយាកាស ដែលវាប្រើប្រាស់បច្ចេកវិទ្យាទំនើបអាចបាញ់ទៅលើបរិយាកាសបានច្រើនគោលដៅ (Multiple Independently Targetable Re-entry Vehicle – MIRV) ។

ក្រុមអ្នកវិទ្យាសាស្ត្ររបស់ឥណ្ឌាបានបំពាក់បច្ចេកវិទ្យាទៅក្នុងមីស៊ីល Agni-5 ដើម្បីជួយឱ្យការបាញ់មីស៊ីល១គ្រាប់ ប៉ុន្តែអាចបញ្ជូនក្បាលគ្រាប់ ដើម្បីបាញ់ទៅលើបរិយាកាសបានច្រើនគោលដៅផ្សេងគ្នា ។ គេចាត់ទុកថា នេះជាការបោះជំហានចុងក្រោយសម្រាប់មីស៊ីលប្រភេទ Agni ដែលមានសមត្ថភាពបំពាក់ក្បាលគ្រាប់នុយក្លេអ៊ែរ ។

ប្រទេសឥណ្ឌាអាចបាញ់មីស៊ីល Agni-5 ក្នុងរយៈចម្ងាយឆ្ងាយរហូតដល់៥.០០០គីឡូម៉ែត្រឯណោះ ។ វាជាមីស៊ីលផ្លោងរយៈចម្ងាយឆ្ងាយ ឬជាមីស៊ីលបាញ់ឆ្លងទ្វីប និងជាមីស៊ីលតែមួយគត់ដែលមានវត្តមាននៅឥណ្ឌា នាពេលបច្ចុប្បន្ននេះ ។

សហរដ្ឋអាមេរិក, អង់គ្លេស, បារាំង, ចិន និងរុស្ស៊ី គឺជាប្រទេសមហាអំណាចលើពិភពលោក ដែលមានមីស៊ីលប្រភេទ (MIRV) ។ រីឯប្រទេសប៉ាគីស្ថាន ក៏បានចាប់ផ្តើមយកមីស៊ីលប្រភេទនេះមកសាកល្បងបាញ់ផងដែរ កាលពីឆ្នាំ២០១៧ ។ នេះបើតាមទិន្នន័យរបស់មជ្ឈមណ្ឌលគ្រប់គ្រង និងមិនចែកចាយអាវុធ (Center for Arms Control and Non-Proliferation) ដែលមានទីតាំងនៅទីក្រុងវ៉ាស៊ីនតោន សហរដ្ឋអាមេរិក ។

គួរបញ្ជាក់ថា មីស៊ីលប្រភេទ MIRV របស់ប្រទេសឥណ្ឌា ត្រូវបានអភិវឌ្ឍន៍ឡើងដោយអង្គការស្រាវជ្រាវ និងអភិវឌ្ឍន៍ផ្នែកការពារជាតិ (Defence Research and Development Organisation) ដែលជាភ្នាក់ងារស្រាវជ្រាវស្ថិតនៅក្រោមការគ្រប់គ្រងរបស់កងទ័ពឥណ្ឌា ៕

ប្រទេសចិន៖ កាលពីពេលថ្មីៗនេះ បើយោងតាម South China Morning Post បានរាយការណ៍ថា គ្រូបង្រៀនម្នាក់នៅខេត្ត Hunan ប្រទេសចិន បានបង្កឱ្យមានការខឹងសម្បារយ៉ាងខ្លាំងពេញបណ្តាយសង្គម ក្រោយលេចធ្លាយវីដេអូនាងវាយ.សិស្ស.ស្រីជាច្រើនដងយ៉ាងឃោរ.ឃៅនៅលើតុ និងដាល់.សិស្សប្រុសម្នាក់ចំមុខព្រោះតែពួកគេអត់ធ្វើកិច្ចការផ្ទះ។

នៅថ្ងៃទី១៣ ខែមីនា ឆ្នាំ២០២៤ បណ្តាញទំនាក់ទំនងសង្គមរបស់ចិនបានផ្សព្វផ្សាយវីដេអូមួយដែលបង្ហាញឱ្យឃើញ គ្រូបង្រៀនគណិតវិទ្យាថ្នាក់ទី ៦ នៅសាលាបឋមសិក្សា Jinquan ខេត្ត Hunan ភាគកណ្តាលប្រទេសចិន បានស្រែកនិងធ្វើបា.បសិស្សយ៉ាងសា.ហាវនៅក្នុងថ្នាក់រៀន ដែលវីដេអូនេះត្រូវបានថតដោយគ្រូម្នាក់ទៀតនៅជាប់ថ្នាក់រៀននេះ។ ហើយនាងក៏ត្រូវបានគេចាប់ដោយកាមេរ៉ាសុវត្ថិភាពវា.យក្បាលសិស្សស្រីម្នាក់នៅលើតុជាច្រើនដង និងដា.ល់មុខសិស្សប្រុសម្នាក់យ៉ាងព្រៃ.ផ្សៃទៀតផង។

បន្ទាប់ពីបែកធ្លាយនូវវីដេអូនេះ មិនយូរប៉ុន្មានគ្រូបង្រៀនស្រីម្នាក់នោះក៏ត្រូវបានព្យួរការងារ ហើយប៉ូលីសកំពុងស៊ើបអង្កេតបន្ថែមទៀតជុំវិញករណីនេះ។ វីដេអូនេះបានធ្វើឱ្យអ្នកប្រើប្រាស់បណ្តាញសង្គមចិន Douyin ភ្ញាក់ផ្អើល និងខឹងសម្បារយ៉ាងខ្លាំង ដោយមានអ្នក Comment ច្រើនជាង ២០០,០០០ គិតត្រឹមថ្ងៃទី១២ ខែមីនា។ មនុស្សជាច្រើនបានចោទសួរថា ហេតុអ្វីបានជាគ្មានអ្នកណានៅសាលាព្យាយាមបញ្ឈប់គ្រូម្នាក់នេះអញ្ចឹង? អ្នកខ្លះទៀតក៏ខំមិនថា «ឱព្រះអើយ វាគួរឱ្យរន្ធ.ត់ណាស់»។

ទោះជាយ៉ាងណាក៏ដោយ ឧប្បត្តិហេតុនេះមិនមែនជាលើកទីមួយទេ កាលពីចុងឆ្នាំ ២០២៣ គ្រូបង្រៀនសាលាបឋមសិក្សាជនជាតិចិនម្នាក់ក៏ត្រូវបានផ្អាកផងដែរសម្រាប់ការឱ្យសិស្សស្រីម្នាក់ទះកំផ្លៀងខ្លួនឯងនៅពេលនាងញ៉ាំអាហារសម្រន់នៅក្នុងថ្នាក់ ហើយគ្រូនោះក៏បានបង្គាប់ឱ្យសិស្សប្រុសក្នុងថ្នាក់វាយសិស្សស្រីដោយការទះកំផ្លៀងផងដែរ។

បន្ទាប់មកកាលពីខែកក្កដាកន្លងទៅ គ្រូបង្រៀនសាលាឯកជនម្នាក់ក៏ត្រូវបានគេរកឃើញថាបានធ្វើបាបសិស្សជាច្រើនឆ្នាំ ដោយបង្ខំឱ្យពួកគេទះកំផ្លៀង និងជេរប្រមាថគ្នាទៅវិញទៅមក។ ក្នុងខែដដែលនោះ វីដេអូពីកាមេរ៉ាឃ្លាំមើលបានបង្ហាញពីគ្រូបង្រៀននៅសាលាមួយភាគខាងជើងប្រទេសចិន ដោយប្រើអំពើហិង្សាដាក់ទណ្ឌកម្មសិស្ស។ ហេតុនេះ ឧប្បត្តិហេតុគ្រូវាយដំសិស្សកំពុងកើនឡើងខ្លាំងនៅក្នុងប្រទេសចិននាពេលបច្ចុប្បន្ន៕

ប្រទេសចិន៖ ប្រទេសចិន បច្ចុប្បន្នបានប្រើប្រាស់ AI ដើម្បីគ្រប់គ្រងប្រព័ន្ធរថភ្លើងល្បឿនលឿនដ៏ធំបំផុតរបស់ពិភពលោក ដោយសារតែវាមានសមត្ថភាពអាចទស្សន៍ទាយកំហុសបានយ៉ាងត្រឹមត្រូវ ដោយផ្តល់ការប្រកាសមុនពេលមានបញ្ហាកើតឡើងនៅលើផ្លូវរថភ្លើងល្បឿនលឿនដ៏ធំបំផុតនេះ។

បើយោងតាមសារព័ត៌មានបរទេស ដែលបានចុះផ្សាយកាលពីពេលថ្មីៗនេះថា មុនពេលចិនចាប់ផ្តើមសាងសង់ផ្លូវរថភ្លើងល្បឿនលឿនដំបូងគេរបស់ពិភពលោកកាលពី ១៥ ឆ្នាំមុន បញ្ហាប្រឈមចម្បងដែលអ្នករិះគន់បានព្យាករណ៍នោះគឺការថែទាំ។ ក្រុមអ្នករិះគន់និយាយថា ការថែទាំនឹងក្លាយជាបន្ទុកមួយ ដោយសារប្រព័ន្ធផ្លូវដែកនៅទីបំផុតនឹងចាស់ទៅតាមពេលវេលា ហើយវានឹងបង្កើតបញ្ហាដែលត្រូវដោះស្រាយ។

ទោះជាយ៉ាងណាក៏ដោយ ឥឡូវនេះប្រទេសចិនកំពុងប្រើប្រាស់ AI (Artificial Intelligence) ដើម្បីគ្រប់គ្រងប្រព័ន្ធផ្លូវរថភ្លើងល្បឿនលឿនធំបំផុតរបស់ពិភពលោក ក្នុងប្រតិបត្តិការ និងថែទាំបណ្តាញផ្លូវដែករបស់ខ្លួន។ ប្រព័ន្ធ AI ពិសេសនេះមានសមត្ថភាពទស្សន៍ទាយកំហុសបានត្រឹមត្រូវ និងចេញការព្រមានមុនពេលមានបញ្ហា ហើយវាដើរតួនាទីយ៉ាងសំខាន់ក្នុងការថែរក្សាទាន់ពេលវេលានៃខ្សែរថភ្លើងល្បឿនលឿន។
បណ្តាញផ្លូវដែកល្បឿនលឿន ៤៥,០០០ គីឡូម៉ែត្រនេះគឺជាបណ្តាញផ្លូវដែកល្បឿនលឿនដ៏ធំបំផុតនៅលើផែនដី ហើយត្រូវបានគ្រប់គ្រងដោយប្រព័ន្ធ AI នៅក្នុងទីក្រុងប៉េកាំង។ យោងតាមវិស្វករដែលចូលរួមក្នុងគម្រោងនេះ ប្រព័ន្ធ AI នេះមានភាពត្រឹមត្រូវខ្ពស់ប្រហែល ៨៩% ហើយសម្រេចបាននូវចំណុចសំខាន់ៗមួយចំនួនក្នុងអំឡុងពេលប្រតិបត្តិការរបស់វា។

នៅក្នុងការអនុវត្តជាក់ស្តែង ប្រព័ន្ធ AI នេះដំណើរការទិន្នន័យយ៉ាងច្រើនក្នុងពេលវេលាជាក់ស្តែងទូទាំងប្រទេស។ វាក៏មានសមត្ថភាពក្នុងការជូនដំណឹងដល់ក្រុមថែទាំអំពីស្ថានភាពមិនធម្មតាក្នុងរយៈពេល ៤០ នាទីផងដែរ។ ជាមួយនឹង AI ចំនួននៃបញ្ហាផ្លូវតូចដែលលេចឡើងនៅក្នុងផ្លូវរថភ្លើងល្បឿនលឿនដែលកំពុងដំណើរការរបស់ប្រទេសចិនបានថយចុះ ៨០% ក្នុងរយៈពេលមួយឆ្នាំកន្លងមក។
លោក Liu Daoan ដែលជាវិស្វករជាន់ខ្ពស់នៅមជ្ឈមណ្ឌលត្រួតពិនិត្យហេដ្ឋារចនាសម្ព័ន្ធនៃសាជីវកម្មផ្លូវដែករដ្ឋចិនបានកត់សម្គាល់ថាប្រព័ន្ធ AI នេះពិតជាដំណើរការបានយ៉ាងល្អ។ លោកបានបន្តទៀតថា « ប្រព័ន្ធ AI នេះនឹងជួយក្រុមក្នុងកាត្រួតពិនិត្យ ក៏ដូចជាជួសជុលឡើងវិញបានលឿនតាមដែលអាចធ្វើទៅបាន »។

គួរបញ្ជាក់ដែរថា ផ្លូវរថភ្លើងល្បឿនលឿនរបស់ប្រទេសចិនគឺជាខ្សែបណ្តាញដែលដំណើរការលឿនបំផុតនៅក្នុងពិភពលោក។ ដោយបច្ចុប្បន្ននេះ វាបម្រើដល់រថភ្លើងដែលដំណើរការក្នុងល្បឿន ៣៥០ គីឡូម៉ែត្រក្នុងមួយម៉ោង ហើយគ្រោងនឹងបង្កើនវាដល់ល្បឿន ៤០០ គីឡូម៉ែត្រក្នុងមួយម៉ោងនៅឆ្នាំក្រោយ។ រដ្ឋាភិបាលក្រុងប៉េកាំងក៏មានគម្រោងបន្តពង្រីកផ្លូវនេះរហូតដល់វាតភ្ជាប់ទីក្រុងទាំងអស់ដែលមានប្រជាជនជាង ៥០ ម៉ឺននាក់ផងដែរ៕