អង្គការសហប្រជាជាតិ (United Nations) បានបញ្ជាក់ថា កាលពីឆ្នាំ២០២៣ ចំនួនអ្នកនៅលីវលើពិភពលោក ស្មើប្រមាណជាង២ពាន់លាននាក់ ឬអ្នកនៅលីវស្មើម្នាក់ក្នុងចំណោម៤នាក់ នៃចំនួនមនុស្សរស់នៅលើពិភពលោកទាំងអស់ ។ ចំនួនអ្នកនៅលីវលើពិភពលោកនឹងកើនឡើងបន្ថែមទៀត ស្មើរហូតដល់៣ពាន់លាននាក់ឯណោះ នៅឆ្នាំ២០៣០ ។

មូលហេតុមួយក្នុងចំណោមមូលហេតុចម្បងៗដែលធ្វើឱ្យចំនួនអ្នកនៅលីវលើពិភពលោកកើនឡើងបែបនេះ ដោយសារតែការចំណាយលើជីវភាពប្រចាំថ្ងៃខ្ពស់ និងទស្សនៈរបស់មនុស្សជំនាន់ថ្មី ដែលពួកគេចង់រស់នៅក្នុងជីវិតឯករាជ្យ ។ លើសពីនេះ ដោយសារមនុស្សមួយចំនួនមានបញ្ហាផ្នែកហិរញ្ញវត្ថុ និងការងារគ្មានស្ថិរភាព ទើបធ្វើឱ្យពួកគេសម្រេចចិត្តមិនរៀបការ ។

ការកើនឡើងនៃចំនួនអ្នកនៅលីវលើពិភពលោក បានធ្វើឱ្យពួកគេក្លាយជាអតិថិជនចម្បងក្នុងទីផ្សារមានសក្តានុពល និងគួរឱ្យចាប់អារម្មណ៍ផងដែរ ដោយសារអ្នកនៅលីវភាគច្រើនចូលចិត្តទិញទំនិញ និងប្រើប្រាស់សេវាកម្មផ្សេងៗ ក្នុងបរិមាណច្រើនជាងមនុស្សទូទៅ ។ គេសង្កេតឃើញថា អ្នកនៅលីវភាគច្រើនហ៊ានចំណាយប្រាក់ទិញទំនិញយ៉ាងច្រើន ដើម្បីធ្វើឱ្យខ្លួនឯងមានសេចក្តីសុខ និងពុំចាំបាច់ពិភាក្សាជាមួយអ្នកណាម្នាក់ ដោយសារពួកគេគ្មានបន្ទុកគ្រួសារ ឬពុំចាំបាច់ចំណាយប្រាក់លើការថែទាំកូន ។

លើសពីនេះ ចំនួនអ្នកនៅលីវលើពិភពលោកកើនឡើង ក៏នាំមកនូវឱកាសអាជីវកម្មថ្មីៗផងដែរ ពាក់ព័ន្ធនឹងទំនិញ និងសេវាកម្មផ្សេងៗក្នុងជីវិតប្រចាំថ្ងៃ ដូចជា ៖ ភោជនីយដ្ឋានសម្រាប់អង្គុយបរិភោគអាហារតែម្នាក់, អាជីវកម្មដឹកជញ្ជូនគ្រឿងផ្សំអាហារ, បន្ទប់ស្នាក់នៅ, កម្មវិធីសម្រាប់ដំណើរកម្សាន្តតែម្នាក់ ដែលអាចបំពេញតម្រូវការរបស់អ្នកនៅលីវ ក៏ដូចជាអាជីវកម្មពាក់ព័ន្ធនឹងសត្វចិញ្ចឹមផងដែរ សម្រាប់បំបាត់ការអផ្សុករបស់អ្នកនៅលីវ ៕

ប្រទេសសិង្ហបុរី ៖ សារព័ត៌មានបរទេសបានរាយការណ៍ កាលពីថ្ងៃទី១៧ ខែមីនា ឆ្នាំ២០២៤ ថា រដ្ឋាភិបាលសិង្ហបុរីបានបង្ហាញគម្រោង Skills Future Credit ជាគម្រោងឧបត្ថម្ភប្រាក់ដល់ពលរដ្ឋមានអាយុចាប់ពី៤០ឆ្នាំឡើងទៅ ដើម្បីឱ្យពួកគេចុះឈ្មោះចូលរៀនថ្នាក់បរិញ្ញាបត្ររងផ្នែកបច្ចេកវិទ្យា និងពហុបច្ចេកទេសក្រៅម៉ោង ។ ការឧបត្ថម្ភប្រាក់របស់រដ្ឋាភិបាលសិង្ហបុរី គឺពលរដ្ឋម្នាក់នឹងទទួលបានប្រាក់ចំនួន៤.០០០ដុល្លារអាមេរិក ។

ឧបនាយករដ្ឋមន្ត្រីប្រទេសសិង្ហបុរី លោក Lawrence Wong ថ្លែងថា ការឧបត្ថម្ភប្រាក់ចំនួន៤.០០០ដុល្លារអាមេរិកនេះ នឹងអាចជួយឱ្យពលរដ្ឋមានអាយុចាប់ពី៤០ឆ្នាំឡើងទៅ អាចអភិវឌ្ឍន៍ជំនាញនានាសម្រាប់ប្រកបមុខរបរបាន ស្របពេលការរីកចម្រើនផ្នែកបច្ចេកវិទ្យានៅកន្លែងការងារនាពេលបច្ចុប្បន្ន បានផ្លាស់ប្តូរយ៉ាងឆាប់រហ័ស ។

ក្រៅពីនេះ ពលរដ្ឋមានអាយុចាប់ពី៤០ឆ្នាំឡើងទៅ នឹងទទួលបានប្រាក់ច្រើនបំផុតរហូតដល់៣.០០០ដុល្លារអាមេរិកក្នុង១ខែ សម្រាប់រយៈពេល២ឆ្នាំ បើពួកគេចុះឈ្មោះចូលរៀនពេញម៉ោងក្នុងវគ្គសិក្សាមួយចំនួន នៅឆ្នាំ២០២៥ ។

បើតាមរបាយការណ៍របស់សាកលវិទ្យាល័យពហុបច្ចេកទេសនៅប្រទេសសិង្ហបុរី Ngee Ann Polytechnic (NP) បង្ហាញថា ការផ្តល់ប្រាក់ឧបត្ថម្ភផ្នែកអប់រំនេះ នឹងជួយលើកទឹកចិត្តដល់កូនសិស្សមានអាយុច្រើនចំនួន២នាក់ ក្នុងចំណោម៣នាក់ ដែលចង់អភិវឌ្ឍន៍ខ្លួនតាមឱ្យទាន់បច្ចេកវិទ្យាក្នុងការងារ មិនថាពួកគេមានអាយុប៉ុន្មានក៏ដោយ ។

គួរបញ្ជាក់ថា សាកលវិទ្យាល័យ Ngee Ann Polytechnic មានកូនសិស្សចូលរៀនដែលមានអាយុចាប់ពី៤០ឆ្នាំឡើងទៅ ស្មើជាង១៥% ក្នុងចំណោមកូនសិស្សមានអាយុច្រើនទាំងអស់ ។ កាលពីចុងឆ្នាំ២០២៣ កូនសិស្សមានអាយុក្រោម៣០ឆ្នាំ មកចុះឈ្មោះចូលរៀននៅសាកលវិទ្យាល័យនេះ ក៏បានកើនឡើងផងដែរ ។

Christy Chung គឺជានាយកសាកលវិទ្យាល័យ Ngee Ann Polytechnic លើកឡើងថា ប្រាក់ឧបត្ថម្ភនេះនឹងផ្តល់ទៅឱ្យបុគ្គលិកធ្វើការនៅតាមក្រុមហ៊ុន ឬស្ថាប័ននានាគ្រប់កម្រិត ដូចជា ៖ បុគ្គលិកធម្មតា, បុគ្គលិកមានជំនាញ, នាយកគ្រប់គ្រង និងអ្នកបច្ចេកទេស ។

កាលពីចុងឆ្នាំ២០២៣ ភ្នាក់ងារ Skills Future Singapore បានបង្ហាញរបាយការណ៍ថា ក្រុមហ៊ុនភាគច្រើននៅប្រទេសសិង្ហបុរី ត្រូវការបុគ្គលិកមានជំនាញខ្ពស់ផ្នែកគ្រប់គ្រងប្រព័ន្ធស្វ័យប្រវត្តិ និងការប្រើប្រាស់បច្ចេកវិទ្យាសម្រាប់កែលម្អប្រព័ន្ធការផលិត ។ ប៉ុន្តែក្រុមហ៊ុនមានទំហំតូច និងមធ្យម នៅតែប្រឈមនឹងការខ្វះខាតបុគ្គលិកមានជំនាញបច្ចេកវិទ្យា និងខ្វះខាតដើមទុនសម្រាប់យកបច្ចេកវិទ្យាមកប្រើប្រាស់ ៕

បរទេស៖ វិស្វករអាមេរិកបានបង្ហាញផែនការសម្រាប់យន្តហោះដ៏ធំបំផុតរបស់ពិភពលោក ដែលមានឈ្មោះថា WindRunner ប្រវែង ១០៨ ម៉ែត្រ កម្ពស់ ២៤ ម៉ែត្រ និងស្លាប ៨០ ម៉ែត្រ ក្នុងគោលបំណងដឹកជញ្ជូនទួរប៊ីនខ្យល់ដ៏ធំសម្បើមពីចំណុច A ដល់ B នៅលើដី។

កាលពីថ្ងៃទី១៥ ខែមីនា ឆ្នាំ២០២៤ យោងតាម New York Post បានឱ្យដឹងថា ទួរប៊ីនខ្យល់នៅឯនាយសមុទ្រដ៏មានឥទ្ធិពលបំផុតនាពេលបច្ចុប្បន្ននេះ គឺមិនងាយស្រួលដឹកជញ្ជូននៅលើគោកទេ ដោយកំណត់ការប្រើប្រាស់របស់វា។ ដូច្នេះក្រុមហ៊ុន Radia ដែលជាក្រុមហ៊ុនចាប់ផ្តើមថាមពលនៅរដ្ឋ Colorado សហរដ្ឋអាមេរិក បានស្នើដំណោះស្រាយមួយដោយការសាងសង់យន្តហោះយក្ស ដើម្បីដឹកជញ្ជូនម៉ាស៊ីនទួរប៊ីនខ្យល់។

WindRunner គឺជាគម្រោងយន្តហោះដ៏ធំបំផុត និងវែងបំផុតមួយរបស់ពិភពលោក ដែលវាអាចមានសមត្ថភាពឡើងដល់កម្ពស់អតិបរមា ១២,៥០០ ម៉ែត្រ និងហោះហើរពីកណ្តាលទៅទីតាំងដែលមានចម្ងាយ ២,០០០ គីឡូម៉ែត្រ។ យន្តហោះនេះមានប្រវែង ១០៨ ម៉ែត្រ កម្ពស់ ២៤ ម៉ែត្រ និងស្លាប ៨០ ម៉ែត្រ ដោយសន្យាថានឹងធ្វើបដិវត្តវិស័យថាមពលកកើតឡើងវិញដោយសម្រួលដំណើរការដឹកជញ្ជូនទួរប៊ីន។

លោក Mark Lundstrom ស្ថាបនិក Radia និងជាអ្នកវិទ្យាសាស្ត្ររ៉ុក្កែតដែលបណ្តុះបណ្តាលដោយ MIT បាននិយាយថា ដើម្បីធ្វើឱ្យវាកាន់តែងាយស្រួលក្នុងការស្រមៃ Windrunner គឺស្ទើរតែវែងដូចទីលានបាល់ទាត់ NFL (សម្ព័ន្ធបាល់ទាត់ជាតិអាមេរិក)។

វិមាត្រគួរឱ្យចាប់អារម្មណ៍ផ្តល់ឱ្យយន្តហោះនេះនូវបរិមាណដឹកទំនិញ ៨,២០០ ម៉ែត្រគូប ប្រហែល ១២ ដងនៃបរិមាណនៃយន្តហោះប៊ូអ៊ីង 747-400។ ជាមួយនឹងតួដ៏ធំរបស់វា WindRunner ត្រូវការហេដ្ឋារចនាសម្ព័ន្ធឯកទេស ជាឧទាហរណ៍ ផ្លូវរត់ ១,៨០០ ម៉ែត្រគឺត្រូវការនៅកន្លែងផលិតម៉ាស៊ីនទួរប៊ីនខ្យល់ ដើម្បីសម្រួលដល់ការហោះហើរ និងចុះចតយន្តហោះ។ បេសកកម្មចម្បងរបស់ WindRunner គឺដឹកជញ្ជូនទួរប៊ីនខ្យល់យក្សនៅលើដី។ ទួរប៊ីនខ្យល់អាចមានប្រវែងពី ៤៥ ទៅ ៩០ ម៉ែត្រ និងទម្ងន់រហូតដល់ ៣៥ តោន ដោយទំហំដ៏ធំនេះធ្វើឱ្យពិបាកសម្រាប់មធ្យោបាយដឹកជញ្ជូនបច្ចុប្បន្ន។

ទោះជាយ៉ាងណាក៏ដោយ លោក Mark Lundstrom ក៏បានបន្តទៀតថា ក្រុមការងាររបស់លោក នឹងផលិតយន្តហោះយក្ស WindRunner ដើម្បីដោះស្រាយដែនកំណត់នៃការដឹកជញ្ជូន ក៏ដូចជាបង្កើនល្បឿននៃការអភិវឌ្ឍន៍ថាមពលខ្យល់ រួមទាំងមានប្រយោជន៍សម្រាប់ការដឹកជញ្ជូនសម្ភារៈយោធាធុនធ្ងន់ផងដែរ ដោយ Radia បានបង្ហាញថា WindRunner អាចនឹងចាប់ផ្តើមដំណើរការក្នុងរយៈពេល ៤ ឆ្នាំខាងមុខ៕

វៀតណាម៖ កាលពីពេលថ្មីៗនេះ បើយោងតាមទស្សនាវដ្ដីទេសចរណ៍ដ៏ល្បីឈ្មោះ Destin Asia ដែលមានមូលដ្ឋាននៅប្រទេសសិង្ហបុរីបានប្រកាសបញ្ជីឈ្មោះកន្លែងទេសចរដ៏ល្អបំផុតនៅទូទាំងបណ្តាប្រទេសអាស៊ី ដោយកោះភូកុក (ដែលជាអតីតកោះត្រល់របស់ខ្មែរ) ត្រូវបានផ្តល់កិត្តិយសក្នុងចំណាត់ថ្នាក់លេខ ៦ ជាកោះល្អបំផុតក្នុងចំណោមកោះទាំង ១០ នៅអាស៊ីប៉ាស៊ីហ្វិកឆ្នាំ ២០២៤ ខណៈទីក្រុងហូជីមិញក៏បានជាប់ចំណាត់ថ្នាក់ទី ១០ ក្នុងបញ្ជីទីក្រុងល្អបំផុតផងដែរ។

នៅក្នុងបញ្ជីទីក្រុងដ៏ល្អបំផុតនៅអាស៊ីប៉ាស៊ីហ្វិកឆ្នាំ ២០២៤ ដែល Destin Asia បានប្រកាសរួមមាន៖
១.ទីក្រុងបាងកក ប្រទេសថៃ
២.ទីក្រុងតូក្យូ ប្រទេសជប៉ុន
៣.ប្រទេសសិង្ហបុរី
៤.ទីក្រុងកូឡាឡាំពួរ ប្រទេសម៉ាឡេស៊ី
៥.ទីក្រុងហុងកុង ប្រទេសចិន
៦.ទីក្រុងសេអ៊ូល ប្រទេសកូរ៉េខាងត្បូង
៧.ទីក្រុងស៊ីដនី ប្រទេសអូស្ត្រាលី
៨.ទីក្រុងសៀងហៃ ប្រទេសចិន
៩.កោះតៃវ៉ាន់
១០.ទីក្រុងហូជីមិញ ប្រទេសវៀតណាម។

រីឯកោះដែលល្អបំផុតនៅអាស៊ីប៉ាស៊ីហ្វិកសម្រាប់ឆ្នាំ ២០២៤ ដែល Destin Asia បានប្រកាសវិញរួមមាន៖
១.កោះបាលី ប្រទេសឥណ្ឌូណេស៊ី
២.កោះម៉ាល់ឌីវ ប្រទេសឥណ្ឌា
៣.កោះភូកេត ប្រទេសថៃ
៤.កោះសាមុយ ប្រទេសថៃ
៥.កោះបូរ៉ាកា ប្រទេសហ្វីលីពីន
៦.កោះភូកុក ប្រទេសវៀតណាម
៧.កោះលង្កាវី ប្រទេសម៉ាឡេស៊ី
៨.កោះប៉េណាង ប្រទេសម៉ាឡេស៊ី
៩.កោះប៉ាឡាវ៉ាន់ ប្រទេសហ្វីលីពីន
១០.កោះឡុំបុក ប្រទេសឥណ្ឌូនេស៊ី។

គួរបញ្ជាក់ដែរថា បញ្ជីនៃគោលដៅនេះគឺផ្អែកលើការបោះឆ្នោតពីអ្នកជំនាញទេសចរណ៍ និងភ្ញៀវទេសចរ។ លក្ខណៈវិនិច្ឆ័យសម្រាប់ការជ្រើសរើសគោលដៅគឺផ្អែកលើការពេញចិត្តរបស់អ្នកទស្សនាចំពោះទីតាំងរបស់គោលដៅ បទពិសោធន៍នៅទីនោះ ភាពរួសរាយរាក់ទាក់របស់មនុស្សក្នុងតំបន់ អាហារ ការដឹកជញ្ជូន ហេដ្ឋារចនាសម្ព័ន្ធ និងភាពងាយស្រួលក្នុងផ្លូវហោះហើរ និងតម្លៃ។ កន្លែងពេញនិយមត្រូវបានចាត់ទុកថាជាការណែនាំសម្រាប់អ្នកទេសចរ ដូច្នេះប្រសិនបើអ្នកមិនដឹងថាត្រូវទៅកន្លែងណាក្នុងវិស្សមកាលនាពេលខាងមុខ អ្នកអាចទៅទស្សនាកន្លែងខាងលើបាន។

គួររំលឹកដែរថា កោះភូកុក (ដែលជាអតីតកោះត្រល់របស់ខ្មែរ) មានភាពល្បីល្បាញសម្រាប់ភ្ញៀវអន្តរជាតិ ដោយសារឆ្នេរខ្សាច់សស្អាត ទឹកពណ៌ខៀវថ្លា ទេសភាពព្រៃឈើ សមុទ្រចម្រុះ និងតំបន់កម្សាន្តជាច្រើន។ លើសពីនេះ កោះភូកុកក៏មានហេដ្ឋារចនាសម្ព័ន្ធដឹកជញ្ជូនងាយស្រួល ដូចជាព្រលានយន្តហោះអន្តរជាតិ និងកំពង់ផែទេសចរណ៍ជាដើម។ ដោយប្រព័ន្ធនៃកន្លែងកម្សាន្តនៅលើកោះមានភាពស៊ីសង្វាក់គ្នា លាតសន្ធឹងពីខាងជើងទៅភាគខាងត្បូងនៃកោះ និងផ្នែកចម្រុះពីតម្លៃសមរម្យរហូតដល់ថ្នាក់ខ្ពស់៕