សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជាបានសម្តែងនូវអារម្មណ៍រំភើបចិត្តមានមោទនភាពចំពោះចលនារបស់ប្រជាជន និងយុវជនខ្មែរបានថតវីដេអូដើម្បីចូលរួមក្នុងការផ្សព្វផ្សាយសិល្បៈវប្បធម៌ខ្មែរយ៉ាងផុសផុលនៅលើបណ្ដាញសង្គម ទៅតាមលទ្ធភាព និងសមត្ថភាពរបស់ខ្លួន។ នេះបើតាមប្រសាសន៍របស់សម្តេចធិបតីបង្ហោះនៅលើបណ្តាញសង្គមនាថ្ងៃទី៣០ មេសា។
ដូចមហាជនជ្រាបមកហើយថា សិល្បការិនីល្បីៗជាច្រើនរូបរួមទាំងអ្នកមានឥទ្ធិពលនៅលើបណ្តាញសង្គមរួមគ្នាផលិតវីដេអូផ្សព្វផ្សាយលើកស្ទួយពីវប្បធម៌របស់ខ្មែរយ៉ាងច្រើនទោះបីជាការថតនោះច្រើនម៉ោង និងចំណាយថវិកាច្រើនក្នុងការផលិតក៏ដោយ។ ទន្ទឹមនឹងចលនានេះកើតឡើងឃើញថាប្រជាពលរដ្ឋក៏តបស្នងវិញយ៉ាងស័ក្តិសមដោយមានការគាំទ្រពេញទំហឹងដូចគ្នាដោយការចុចLiked រាប់ម៉ឺននាក់ និងចំនួនទស្សនាចូលដល់ខ្ទង់លាន។
មិនត្រឹមតែប្រជាពលរដ្ឋប៉ុណ្ណោះទេដែលស្រលាញ់ពេញចិត្តគាំទ្រចំពោះការផលិតវីដេអូ Khmer Make Up Trend នេះក្នុងនោះនាយករដ្ឋមន្រ្តីក៏សម្តែងនូវអារម្មណ៍មោទនភាពចំពោះការរួបរួមគ្នាលើកស្ទួយវប្បធម៌ខ្មែរនេះដូចគ្នា។
សម្តេចធិបតីមានប្រសាសន៍ថា៖ «ខ្ញុំពិតជាមានក្តីរំភើបរីករាយចំពោះចលនារបស់ប្រជាជន និងយុវជនខ្មែរជាច្រើន ដែលបានថតជារូបភាព និងវីដេអូផ្សេងៗ ដើម្បីចូលរួមក្នុងការផ្សព្វផ្សាយសិល្បៈវប្បធម៌ខ្មែរយ៉ាងផុសផុលនៅលើបណ្ដាញសង្គម ទៅតាមលទ្ធភាព និងសមត្ថភាពរបស់ពួកគាត់ ។ ខ្ញុំសង្ឃឹមថា ចលនាដ៏សកម្មនេះ នឹងបន្តរីកដុះដាលទៅដល់គ្រប់ទម្រង់នៃសិល្បៈខ្មែរ ដើម្បីលើកស្ទួយមោទនភាពជាតិខ្មែរយើង»។
នាយករដ្ឋមន្រ្តីក៏បានលើកឡើងដែរថា «រាជរដ្ឋាភិបាល តាមរយៈក្រសួងវប្បធម៌ និងវិចិត្រសិល្បៈ ព្រមទាំងក្រសួង-ស្ថាប័នពាក់ព័ន្ធ នឹងបន្តយកចិត្តទុកដាក់ និងជំរុញការអភិរក្ស និងការអភិវឌ្ឍសិល្បៈ វប្បធម៌ និងប្រពៃណីខ្មែរ សំដៅធ្វើយ៉ាងណាថែរក្សាកេរដំណែលដ៏ពិសិដ្ឋផូរផង់នេះឱ្យបានឋិតថេរគង់វង្ស»។
សម្តេចធិបតី បន្ថែមថា «ការអភិរក្ស និងការអភិវឌ្ឍផ្នែកវប្បធម៌ត្រូវបោះជំហានទន្ទឹមគ្នា ដើម្បីរក្សាឱ្យបានគង់វង្សនូវការអភិរក្សអត្តសញ្ញាណដើមនៃសិល្បៈ វប្បធម៌ ប្រពៃណី និងសាសនារបស់យើង ប្រកបដោយភាពបត់បែនស្របតាមវឌ្ឍនភាពរបស់សង្គមក្នុងពេលបច្ចុប្បន្ន និងទៅអនាគត តាមរយៈការពង្រឹងការស្រាវជ្រាវ ចងក្រង ផ្សព្វផ្សាយ និងបណ្តុះបណ្តាលមូលដ្ឋានគ្រឹះឱ្យបានច្បាស់លាស់ សម្រាប់កូនចៅខ្មែរគ្រប់ជំនាន់តរៀងទៅ»៕
n
