សហរដ្ឋអាមេរិក៖ Bella Hadid ដែលជាកំពូលតារាម៉ូឌែលដ៏ជោគជ័យមួយរបស់ពិភពលោកបានផ្លាស់ទៅរស់នៅរដ្ឋតិចសាស់ ដើម្បីរស់នៅជាមួយមិត្តប្រុសរបស់នាង និងប្រើជីវិតរស់នៅដ៏សាមញ្ញបំផុត។
យោងតាមសារព័ត៌មាន Hollywood Reporter កាលពីថ្ងៃទី៣០ ខែមេសា បានឱ្យដឹងថា កំពូលតារាម៉ូឌែល Bella Hadid បាននិយាយអំពីការសម្រេចចិត្តរបស់នាងក្នុងការបញ្ចប់អាជីពម៉ូដ ដើម្បីផ្តោតលើការថែរក្សាសុខភាពផ្លូវកាយ និងផ្លូវចិត្តរបស់នាងវិញ។ Bella បាននិយាយថា “បន្ទាប់ពីបង្ហាញខ្លួនអស់រយៈពេល ១០ ឆ្នាំនៃការដើរម៉ូត” នាងតែងតែខិតខំប្រឹងប្រែងអស់ពីសមត្ថភាព ប៉ុន្តែដោយសារនាងរងសម្ពាធច្រើនពេកទើបធ្វើឱ្យនាងសម្រេចលាឈប់ពីវិស័យនេះ។
យោងតាមទស្សនាវដ្ដី Allure Bella គឺជាកំពូលតារាម៉ូឌែលដែលទទួលបានជោគជ័យបំផុតក្នុងពិភពលោក ដោយបានបង្ហាញខ្លួនជា Brand Ambassador ក្នុងម៉ូដល្បីៗជាច្រើនដូចជា Chanel, Marc Jacobs, Givenchy និងបានបង្ហាញខ្លួននៅលើក្របទស្សនាវដ្តី Vogue អន្តរជាតិទៀតផង។ Bella Hadid បានធ្វើជាតារាបង្ហាញម៉ូតតាំងពីនាងមានអាយុ ១៦ ឆ្នាំមកម្ល៉េះ ដោយចាប់ផ្តើមអាជីពជាតារាបង្ហាញម៉ូតរបស់នាងនៅក្នុងឆ្នាំ ២០១៤ ជាមួយនឹងការដើរបង្ហាញម៉ូតសម្រាប់កម្មវិធី Desigual’s Spring Summer 2015។ នៅដើមឆ្នាំ ២០១៥ ភាពស្រស់ស្អាតបានទាក់ទាញនាងឱ្យចូលរួមក្នុងកម្មវិធី Tom Ford Fall-Winter 2015។ ព្រឹត្តិការណ៍នេះបានក្លាយជាវេទិកាមួយសម្រាប់អាជីពរបស់ Bella ឱ្យរីកចម្រើន។ ក្នុងរយៈពេល ២ ឆ្នាំ ភាពស្រស់ស្អាតរបស់នាងបានដណ្ដើមផ្លូវរត់ភាគច្រើននៃផ្ទះម៉ូដដ៏ធំបំផុតរបស់ពិភពលោក។
ទោះបីជាយ៉ាងណាក៏ដោយ ចាប់ពីឆ្នាំ ២០២៣ រហូតមកដល់ពេលនេះ Bella បានលាឈប់ពីការងារ ហើយបានផ្លាស់ទៅរស់នៅរដ្ឋតិចសាស់ ហើយក៏បានចាប់ផ្តើមជីវិតថ្មីជាមួយនឹងគូស្នេហ៍របស់នាងគឺបុរសគង្វាលគោ Adan Banuelos អាយុ ៣៥ ឆ្នាំដោយរស់នៅបែបសាមញ្ញនៅលើភ្នំ។ យោងតាមគេហទំព័រ Harper’s Bazaar អ្នកទាំងពីរមានចំណង់ចំណូលចិត្តក្នុងការជិះសេះ និងកាប់ឈើដូចគ្នា។ ក្រៅពីចំណាយពេលរីករាយនឹងជីវិត បច្ចុប្បន្ន Balla ក៏គ្រោងធ្វើជំនួញផងដែរ ដោយសព្វថ្ងៃកំពុងចាប់ផ្តើមផលិតទឹកអប់ផ្ទាល់ខ្លួនរបស់នាង។
តារាម៉ូឌែលរូបនេះបាននិយាយប្រាប់សារព័ត៌មានថា “នាងពិតជាពេញចិត្តនឹងការរស់នៅដ៏សាមញ្ញបែបនេះខ្លាំងណាស់” វាអាចធ្វើឱ្យខ្ញុំធូរស្រាលទាំងផ្លូវកាយ និងផ្លូវចិត្តហើយក៏មិនចាំបាច់គិតច្រើនពេកដែរ។ Balla បានបន្តទៀតថា “ខ្ញុំមិនដែលមានឱកាសធ្វើបែបនេះពីមុនមកទេ ដូច្នេះខ្ញុំនឹងមិនទៅណាទៀតទេ ហើយខ្ញុំនឹងចំណាយពេលវេលាដ៏មានអត្ថន័យបែបនេះនៅជាមួយខ្លួនឯងឱ្យបានច្រើន”។ គួរបញ្ជាក់ដែរថា បច្ចុប្បន្ន Bella Hadid មានអាយុត្រឹមតែ ២៨ ឆ្នាំប៉ុណ្ណោះនាងមានដើមកំណើតនៅប្រទេសហូឡង់និងប៉ាឡេស្ទីន ហើយនាងគឺជាប្អូនស្រីបង្កើតរបស់ Gigi Hadid ដែលអ្នកទាំងពីរសុទ្ធតែស្ថិតក្នុងបញ្ជីតារាម៉ូដែលល្បីៗរបស់ពិភពលោក៕