ថ្មីៗនេះ មានការរិះគន់ពីសំណាក់អ្នកលេងបណ្តាញសង្គមហ្វេសប៊ុកជាខ្លាំងទៅលើឧត្តមសេនីយ៍ទោ ប៊ន សំអាត ដែលបានពាក់ស្បែកជើងនៅក្នុងសាលាឆទានក្នុងអំឡុងពេលជួបជុំសំណេះសំណាលជាមួយលោកយាយ លោកតា នៅវត្តមួយកន្លែង។ លោកផ្កាយ២កំពុងជួបបញ្ហានេះ រ៉ូស បាននិយាយថានេះជាកម្មពារ ខណៈកាលពីជាង១ឆ្នាំមុនអ្នកទាំងពីរធ្លាប់មានអាស្រូវយ៉ាងកក្រើក។

គេចាំបានថា កាលពីអំឡុងខែកក្កដា ឆ្នាំ២០២២ រ៉ូស បានចេញមកបង្ហោះសារជាបន្តបន្ទាប់ក្តៅដូចបាយពុះជាមួយមន្រ្តីផ្កាយ២ ប៊ន សំអាត ទាក់ទងស្នេហាបោកប្រាស់ដែលបានសន្យាទិញឡាន៥៧០ និងបើករីសតឱ្យនាងប៉ុន្តែបែរជាឆាតមិនតប ខលមិនលើករហូតដល់ប្លុកលេខចោលទៀត។ លើសពីនេះ រ៉ូស ក៏បានគំរាមលោកផ្កាយ២ ប៊ន សំអាត ថាមិនអាន់ប្លុកនាងវិញទេនោះនាងនឹង Live ឱ្យផ្អើលហ្វេកប៊ុកនិងបញ្ចេញរូបផ្សេងៗទៀត។ ទោះយ៉ាងណា ក្រោយពីបង្ហោះសារជាបន្តបន្ទាប់ រ៉ូស បានចេញមកប្រកាសម្តងទៀតថានាងគ្មានជាប់ពាក់ព័ន្ធអ្វីជាមួយមន្រ្តី ប៊ន សំអាត នោះទេគ្រប់យ៉ាងគ្រាន់តែជាការយល់ច្រលំដោយបានលុបចោលទាំងអស់រាល់សំណេរដែលបង្ហោះគំរាមកន្លងមក។

ក្រោយពីគំរាមមន្រ្តីផ្កាយ២ មិនបានប៉ុន្មានថ្ងៃ ស្រីស្អាត រ៉ូស បានទៅទិញពេជ្រលួងចិត្តខ្លួនជាង៣ម៉ឺនដុល្លារ ខណៈ រ៉ូស ក៏ធ្លាប់និយាយដាក់មន្រ្តីផ្កាយ២ ប៊ន សំអាត ថាជា «តាកញ្ចាស់ល្មមកាម ស៊ីមិនរើស»។

ដោយឡែកនាពេលថ្មីៗនេះឧត្តមសេនីយ៍ទោ ប៊ន សំអាត កំពុងរងនូវបញ្ហាត្រូវសាធារណជនរិះគន់យ៉ាងដំណំបន្ទាប់ពីបានពាក់ស្បែកជើងនៅក្នុងសាលាឆទានក្នុងអំឡុងពេលជួបជុំសំណេះសំណាលជាមួយលោកយាយ លោកតា នៅវត្តមួយកន្លែង។

ឃើញអតីតដៃគូចាស់ធ្លាប់មានរឿងចម្រូងចម្រាសជាមួយគ្នា រ៉ូស បានលើកឡើងថា នេះជាកម្មពារ។ អាណា រ៉ូស បានសរសេរនៅលើបណ្តាញសង្គមនាល្ងាចថ្ងៃទី១៧ ខែមីនា ថា «ចប់ហើយតាអាត ចប់គ្រប់យ៉ាង កម្មប្រែថាអំពើ កម្មពារមិនចាំជាតិក្រោយសាងអីបាននឹង សុំអហោសកម្ម»។

គួរបញ្ជាក់ផងដែរថា បន្ទាប់ពីរងនូវការរិះគន់ពីប្រជាពលរដ្ឋឧត្តមសេនីយ៍ទោ ប៊ន សំអាត ឋានៈអនុប្រធាននាយកដ្ឋានព្រហ្មទណ្ឌនៃអគ្គស្នងការដ្ឋាន នគរបាលជាតិក្រសួងមហាផ្ទៃ បានចេញលិខិត និងបានលើកដៃសូមខមាទោស ជាសាធារណចំពោះកំហុសខុសឆ្គងផងដែរ៕

នៅក្នុងកម្មវិធី «កម្សាន្ដភូមិបុស្បា» កាលពីកន្លងទៅនេះដែលរៀបចំដោយបុរីបុស្បារបស់ អ្នកនាង ស្រីអូន មានកម្មវិធីសប្បាយៗជាច្រើនទាំងការល្បែងប្រជាប្រិយខ្មែរ ការផ្តល់រង្វាន់នានា និងកម្មវិធីប្រគំតន្រ្តីដោយមានការចូលរួមពីតារាចម្រៀងល្បីៗជាច្រើនរូប។ ក្នុងកម្មវិធីនេះ អ្នកនាង ស្រីអូន បាននិយាយនៅលើឆាកប្រគំតន្រ្តីពីទំនួលខុសត្រូវខ្លួនត្រូវសង បំណុលរាប់លានដុល្លារ។ អ្នកនាងក៏បាននិយាយដែរថា ខ្លួនមិនបានយក«គ្រួសារជាធំ»នោះទេ ជាហេតុធ្វើឱ្យមានការជជែកវែកញែកនៅលើបណ្តាញសង្គម ខណៈលោក រិន សុក្រិត្យ ក៏បានលូកមាត់លើរឿងនេះដូចគ្នា។

អ្នកនាង ស្រីអូន បាននិយាយថា «មនុស្សដូចជានាងគឺស្លាប់រស់ជាមួយទំនួលខុសត្រូវមានបញ្ហាច្រើនណាស់ពីមួយថ្ងៃទៅមួយថ្ងៃប៉ុន្តែនាងអាចញញឹមទទួលយកបាន។ មនុស្សដូចនាងមិនបានយកគ្រួសារជាធំនោះទេ នៅពេលដែលយកគ្រួសារជាធំសកម្មភាពរបស់យើងមិនបានទំលំទូលាយនៅក្នុងសង្គមដែរ។ ជាដំបូងរបស់នាងដែលឱ្យតម្លៃមុនគេ មានជំទាវម្នាក់គាត់ល្បីខ្លាំងធ្លាប់ឱ្យនាងគូសរវាងគ្រួសារខ្លួនឯងនិងសង្គម នាងយកសង្គមទី១។ អ្នកនាងស្រីអូនថា មូលហេតុដែលធ្វើឱ្យនាងរឹងមាំបានគឺរឹងមាំដើម្បីមនុស្សស្រីគ្រប់រូប រឹងមាំដើម្បីសង្គមមួយនេះទោះបីជាមានអ្នកមើលឃើញនិងមិនឃើញក្តី»។

ពាក្យសម្តីរបស់អ្នកនាង ស្រីអូន មិនយកគ្រួសារជាធំនេះត្រូវបានអ្នកលេងបណ្តាញសង្គមបានបង្ហាញការមិនគាំទ្រនូវការលើកឡើងដូចនេះទេ។ លោក រិន សុក្រិត្យ អ្នកបង្កើតមាតិកាល្បីឈ្មោះមួយរូបនិងជាសហគ្រិនវ័យក្មេង បានលើកឡើងថា «រកស៊ីអ្វីក៏ដោយ ធ្វើ អ្វីក៏ដោយ គឺគេការពារ គេលើកស្ទួយគ្រួសារមុនគេ ទើបជីវិតរុងរឿងអាចឈានទៅដល់ជួយសង្គមជាតិ។ សូម្បីមេដឹកនាំប្រទេសក៏គេត្រូវឱ្យតម្លៃលើគ្រួសារមុនគេ ទើបជាប់ឆ្នោត»។

ចំណែកឯអ្នកផ្សេងទៀតបានបង្ហាញការមិនគាំទ្រពាក្យសម្តីរបស់អ្នកនាង ស្រីអូន មិនយកគ្រួសារជាធំឡើយ ពួកគេបានលើកឡើងថា សូម្បីសត្វក៏យកគ្រួសារជាធំដែរ ហើយសង្គមមួយដែលមានការរីកចម្រើនក៏ផ្តើមចេញពីគ្រួសារទៅដូចគ្នា។ អ្នកលេងបណ្តាញសង្គមបានជ្រើសយកគ្រួសារគឺជម្រើសទី១ ចំណែកឯសង្គមជាជម្រើសទី២ រួមទាំងមតិយោបល់ជាច្រើនទៀតបានរិះគន់ទៅកាន់អ្នកនាងស្រីអូន៕

ផ្នែកតាមសេចក្តីប្រកាសព័ត៌មានរបស់សមាគមឧកញ៉ាកម្ពុជា កាលពីពេលថ្មីៗនេះបានឲ្យដឹងថា យោងតាមមាត្រា១៩ នៃព្រះរាជក្រឹត្យលេខ នស/រកត/១០២៣/២២៥០ ចុះនៅថ្ងៃទី១១ ខែតុលា ឆ្នាំ២០២៣ ស្តីអំពីតួនាទី ភារកិច្ច និងការទទួលខុសត្រូវរបស់សមាគមឧកញ៉ាកម្ពុជា ក្នុងភាពជាតំណាងគោរវន្តទាំងអស់នៅព្រះរាជាណាចក្រកម្ពុជា និងភាពជាដៃគូររបស់រាជរដ្ឋាភិបាល។

ទន្ទឹមនឹងនោះ សមាគមឧកញ៉ាកម្ពុជា ក៏ជាសមាជិកគណៈកម្មការអន្តរក្រសួងពិនិត្យនិងវាយតម្លៃលើសំណើរសុំគោរមងារ និងការបញ្ចប់គោរមងារឧកញ៉ា ដែលគណៈកម្មការនេះនឹងត្រូវរៀបចំអនុក្រឹត្យស្តីពីបែបបទ និងនិតិវិធីនៃការស្នើសុំ និងវាយតម្លៃក្នុងការផ្តល់គោរមងារឧកញ៉ា និងការបញ្ចប់គោរមងារឧកញ៉ាផងដែរ។

យោងតាមមាត្រា២២ នៃព្រះរាជក្រិត្យដដែលបានបញ្ញត្តិថា លោកឧកញ៉ា អ្នកឧកញ៉ា និងឧកញ៉ា ត្រូវគោរពរដ្ឋធម្មនុញ្ញ ច្បាប់ និងលិខិតបទដ្ឋានគតិយុត្តនានារបស់ព្រះរាជាណាចក្រកម្ពុជា ប្រកាន់ខ្ជាប់នូវសីលធម៌ល្អ ប្រកបមុខរបរស្របច្បាប់ និងចៀសវាងសកម្មភាពណាដែលធ្វើឲ្យប៉ះពាល់កិត្តិយសនិងសេចក្តីថ្លៃថ្នូររបស់គោរមងារឧកញ៉ា។

ជាមួយគ្នានោះ មាត្រា២៣ បានបញ្ញត្តិ ពីការបញ្ចប់គោរមងារឧកញ៉ា ដែលស្ថិតក្នុងករណីណាមួយក្នុងមូលហេតុទាំង៥ដូចខាងក្រោមនេះ៖
– គោរមវន្តសុំលាលែងពីគោរមងារឧកញ៉ាដោយស្ម័គ្រចិត្ត
-គោរមវន្តមិនបំពេញកាតព្វកិច្ចបង់វិភាគទានប្រចាំឆ្នាំរយៈពេល៣ឆ្នាំជាប់ៗគ្នា ដោយគ្មានមូលហេតុ
-គោរមងារត្រូវបានផ្តន្ទាទោសពីបទឧក្រិដ្ឋ ឬបទមជ្ឈិមណាមួយ
-ត្រូវបានរកឃើញថាគោរមវន្ត បានប្រព្រឹត្តល្មើសនឹងមាត្រា២២ នៃព្រះរាជក្រឹត្យខាងលើ
-ត្រូវបានរកឃើញថា សំណុំឯកសារស្នើសុំគោរមងារឧកញ៉ារបស់គោរមវន្តមានការក្លែងបន្លំ៕

កាលពីព្រឹកថ្ងៃទី១៨ ខែមីនា យោងតាមការបង្ហោះនៅលើគណនីផ្លូវការរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានរៀបរាប់ថា «ក្នុងរយៈពេលថ្មីៗនេះ ឃើញមានការបង្ហោះតាមបណ្តាញសង្គមមួយចំនួន ពាក់ព័ន្ធនឹងសកម្មភាពរបស់ប្រជាពលរដ្ឋ ជាពិសេសក្មួយៗយុវជននិងកុមារ ធ្វើសកម្មភាពរាំលេងតាមដងផ្លូវទៅតាមចង្វាក់ស៊ីផ្លេបែបភ្លេងរបស់រថយន្តធំៗ ដែលសកម្មភាពរាំលេងនេះធ្វើឱ្យប៉ះពាល់ដល់សណ្តាប់ធ្នាប់នៅតាមដងផ្លូវ ក៏ដូចជាបង្កហានិភ័យសម្រាប់ការធ្វើដំណើរ និងជាពិសេសអាចបណ្តាលឱ្យមានគ្រោះថ្នាក់ដល់ក្មួយៗតែម្តង»។

សម្តេចបន្តថា«ជាមួយគ្នានេះដែរ កម្លាំងសមត្ថកិច្ចតាមបណ្តាខេត្តមួយចំនួន បានចាត់វិធានការ ដោយបានធ្វើការណែនាំឱ្យអ្នកបើកបររថយន្តធំដោះស៊ីផ្លេខុសលក្ខណៈបច្ចេកទេសចេញ និងធ្វើការផ្លាស់ប្តូរស៊ីផ្លេវិញ ព្រមទាំងណែនាំដល់ក្មួយៗឱ្យបញ្ឈប់សកម្មភាពនេះ។ ប៉ុន្តែវិធានការនេះ ហាក់នៅមិនទាន់គ្រប់គ្រាន់នៅឡើយទេ»។

«ដើម្បីឲ្យការអនុវត្តវិធានការនេះកាន់តែមានប្រសិទ្ធភាពនិងកាន់តែទូលំទូលាយ ខ្ញុំសូមណែនាំដល់ក្រសួងសាធារណការ និងដឹកជញ្ជូន អគ្គស្នងការដ្ឋាននគរបាលជាតិ អាជ្ញាធររាជធានី-ខេត្ត និងស្នងការដ្ឋាននគរបាលរាជធានី-ខេត្ត ធ្វើការសហការគ្នា ត្រួតពិនិត្យ និងធ្វើការណែនាំពាក់ព័ន្ធនឹងលក្ខណៈបច្ចេកទេសស៊ីផ្លេរថយន្ត ដើម្បីទប់ស្កាត់ភាពអនាធិបតេយ្យតាមដងផ្លូវសាធារណៈ។ ជាពិសេសខ្ញុំសូមប្រគល់ភារកិច្ចជូនគណៈបញ្ជាការឯកភាពរដ្ឋបាល រាជធានី ខេត្ត ក្រុង ស្រុក ខណ្ឌ ធ្វើការណែនាំ និងចាត់វិធានការឱ្យបានតឹងរ៉ឹង ដើម្បីទប់ស្កាត់សកម្មភាពអនាធិបតេយ្យដែលប៉ះពាល់ដល់សណ្តាប់ធ្នាប់នៅតាមដងផ្លូវសាធារណៈ និងអាចបង្កឱ្យមានគ្រោះថ្នាក់ដល់អាយុជីវិតប្រជាពលរដ្ឋ»។

សម្តេចក៏បានបន្តទៀតថា«ជាមួយគ្នានេះ ខ្ញុំក៏សូមអំពាវនាវដល់ក្រុមហ៊ុនដឹកជញ្ជូន ព្រមទាំងប្អូនៗ និងក្មួយៗដែលជាអ្នកបើកបររថយន្តធំៗ ត្រូវដាក់ស៊ីផ្លេឱ្យបានត្រឹមត្រូវតាមលក្ខណៈបច្ចេកទេសដែលក្រសួងសាធារណការ និងដឹកជញ្ជូន បានណែនាំ និងជៀសវាងការប្រើប្រាស់ស៊ីផ្លេដែលនាំឱ្យមានការលើកទឹកចិត្តដល់ប្រជាពលរដ្ឋ ជាពិសេសក្មួយៗ ធ្វើសកម្មភាពរាំលេងតាមដងផ្លូវ»។

ជាចុងក្រោយ សម្តេចក៏សូមអំពាវនាវដល់ប្រជាពលរដ្ឋ ជាពិសេសក្មួយៗ សូមបញ្ឈប់សកម្មភាពរាំលេងតាមដងផ្លូវតាមចង្វាក់ស៊ីផ្លេភ្លេងរបស់រថយន្តធំៗ ជៀសវាងគ្រោះថ្នាក់ និងបង្កភាពអនាធិបតេយ្យតាមដងផ្លូវ។ ហើយក៏សូមអាណាព្យាបាលចូលរួមសហការ និងធ្វើការណែនាំដល់ក្មួយៗឱ្យបញ្ឈប់សកម្មភាពរាំលេងតាមដងផ្លូវ៕

រដ្ឋបាលខេត្តព្រះវិហារបានចេញនូវសេចក្តីស្រាយបំភ្លឺ បន្ទាប់ពីបានលេចចេញនូវរឿងរ៉ាវមិនពិតរបស់ស្រ្តីម្នាក់ ដែលថាបានសម្លា.ប់ខ្លួនដោយចេតនានៅខេត្តព្រះវិហារ ដោយសារតែភាពចម្រូង.ចម្រាស់ផ្សេងៗទាក់ទងនឹងបញ្ហា ដីធ្លី។

ថ្មីៗនេះដោយមើលឃើញថាមានការបង្ហោះចែកចាយពេញបណ្តាញសង្គមអ៊ីនធើណែត ដែលបានបង្ហាញនូវរូបថតមួយចំនួនភ្ជាប់ជាមួយនឹងសំណេរមួយឃ្លាដែលបានលើកឡើងថា «ពលរដ្ឋដែលមានជម្លោះដីធ្លី នៅខាងខេត្តព្រះវិហារកំពុងបន្តលាក់ខ្លួនក្នុងព្រៃ ក្រោយពីអស់លោកមន្រ្តីបានដុ.តផ្ទះពួកគាត់ចោលអស់រាប់សិបខ្នង និងតាមចាប់.ខ្លួនពួកគាត់។ ហើយម្នាក់ក្នុងចំណោមស្រ្តី និងកុមារដទៃទៀតដែលបានរត់គេចខ្លួន ទាំងអត់បាយក្រហាយទឹកនោះ បានសម្រេចចិត្តផឹកថ្នាំបាញ់ស្មៅ ស.ម្លា.ប់.ខ្លួន»។

ទោះជាយ៉ាងណា យោងតាមការបង្ហោះរបស់រដ្ឋបាលខេត្តព្រះវិហារកាលពីថ្ងៃទី១៧ ខែមីនានេះបានឲ្យដឹងថា ជុំវិញករណីនេះ រដ្ឋបាលខេត្តព្រះវិហារ សូមបដិសេធទាំងស្រុងការចេញផ្សាយព័ត៌មានតាមបណ្តាញសង្គម ហ្វេស ប៊ុក នានា ដែលមានខ្លឹមសារថា “ស្ត្រីនៅខេត្តព្រះវិហារម្នាក់សម្លាប់ខ្លួន បន្ទាប់ពីអាជ្ញាធរដុតផ្ទះ និងយកដីធ្លី” ។

តាមលិខិតអះអាងបានលើកឡើងយ៉ាងដូច្នេះថា ផ្អែកតាមលទ្ធផលដែលអាជ្ញាធាមានសមត្ថកិច្ចចុះដល់លំនៅដ្ឋានសព ស្ថិតក្នុងភូមិក្អក ឃុំភ្នំត្បែងពីរ ស្រុក គូលែន ឃើញថា ក្រុមគ្រួសារសពមានផ្ទះធំ និងដីលំនៅដ្ឋានសមរម្យ និងបានជួបសាកសួរដោយផ្ទាល់ជាមួយលោក នួន ហេង ត្រូវជាប្ដីសព, លោក ហ៊ុក ហួន ត្រូវជាកូនបង្កើតសព និងលោក សុខា យាប់ពីដាន ត្រូវជាកូនប្រសារសត បានបញ្ជាក់ថា៖

១). ការស្លាប់របស់ប្រពន្ធ និងម្តាយក្មេកខាងលើ គឺពុំពាក់ព័ន្ធទៅនឹងករដើរអនុវត្តវិធានការច្បាប់របស់កម្លាំង ជម្រុះ កាលពីថ្ងៃទី០៦ ខែមីនា ឆ្នាំ២០២៨៤នោះទេ។

២). ការស្លាប់របស់ស្ត្រីខាងលើកាលពីថ្ងៃទី១៥ ខែមីនា ឆ្នាំ២០២៤ ផ្តើមចេញពីវិបត្តិក្នុងគ្រួសារ ដោយសារ មានទំនាស់ប្រតាយប្រទប់គ្នា ទើបស្ត្រីខាងលើផឹកស្រាស្រវឹង និងឈានរហូតដល់ផឹកថ្នាំសម្លាប់ស្មៅ កាលពីថ្ងៃទី០៩ ខែមីនា ឆ្នាំ២០១៤។ទោះបីជាក្រុមគ្រួសារសព ខិតខំបញ្ជូនទៅសង្គ្រោះបន្ទាន់នៅមណ្ឌល សុខភាពឃុំស្រយង់ មន្ទីរពេទ្យខេត្ត និងបញ្ជូនបន្តទៅមន្ទីរពេទ្យខេត្តសៀមរាប ក៏ពុំអាចសង្គ្រោះជីវិតបាន។

៣). ក្រុមគ្រួសារគាត់រស់នៅក្នុងភូមិ ដោយពុំមាននរណាម្នាក់រត់ចូលទៅក្នុងព្រៃ ឬត្រូវបានកម្លាំងសមត្ថកិច្ច ស្វែងរកចាប់ឃាត់ខ្លួននោះឡើយ។

សរុបជារួមឃើញថា ការស្តារបស់អ្នកស្រី ហែម ឡី ខាងលើគី ពុំពាក់ព័ន្ធទៅនឹងករណីអនុវត្តវិធានការច្បាប់ របស់កម្លាំងចម្រុះនោះទេ។ ការចុះផ្សាយតាមបណ្តាញសង្គម ហ្វេស ប៊ុក ធានាខាងលើ គឺគ្មានមូលដ្ឋានច្បាស់លាស់ ប្រាសចាកពីការពិត និងបំភ័ន្តសាធារណមតិ៕