ប្រទេសអង់គ្លេស ៖ កាលពីថ្ងៃទី១៩ ខែមីនា ឆ្នាំ២០២៤ សារព័ត៌មានបរទេសរាយការណ៍ថា ប្រទេសអង់គ្លេសត្រៀមប្រកាសអនុញ្ញាតឱ្យផ្តល់សេវាកម្មរថយន្តតាក់ស៊ីហោះនៅទូទាំងប្រទេស ក្នុងរយៈពេល២ឆ្នាំទៀត ។ ការត្រៀមផ្តល់សេវាកម្មតាក់ស៊ីហោះសម្រាប់អ្នកដំណើរ នឹងក្លាយជាដំណោះស្រាយមួយសម្រាប់បញ្ហាកកស្ទះចរាចរណ៍នាពេលបច្ចុប្បន្ននៅអង់គ្លេស ។

ក្រសួងគមនាគមន៍អង់គ្លេសមានគម្រោងផ្តល់សេវាកម្មរថយន្តតាក់ស៊ីហោះជាលើកដំបូង ដែលវានឹងហោះហើរនៅតាមទីក្រុងនានារបស់អង់គ្លេស ក្នុងឆ្នាំ២០២៦ ហើយគេរំពឹងថា វានឹងក្លាយជាផ្លូវគមនាគមន៍ដែលទទួលបានការពេញនិយមពីអ្នកដំណើរ ។ ដូច្នេះ រយៈពេល២ឆ្នាំទៀត វានឹងក្លាយជារឿងធម្មតា ដែលគេអាចមើលឃើញរថយន្តតាក់ស៊ីហោះជាច្រើនគ្រឿងនៅពាសពេញទីក្រុង ។

គេចាត់ទុកថា រថយន្តតាក់ស៊ីហោះ គឺជាយានជំនិះប្រភេទ «eVTOLs» ឬយានជំនិះអគ្គិសនី ដែលអាចហោះហើរ និងចុះចតជាលក្ខណៈខ្សែត្រង់ ។ បច្ចុប្បន្ន ក្រុមហ៊ុនជាច្រើនបានផលិតតាក់ស៊ីហោះជាច្រើនម៉ាក ហើយតាក់ស៊ីហោះភាគច្រើនមានរូបរាងស្រដៀងគ្នានឹងឧទ្ធម្ភាគចក្រទំហំតូច ដែលអាចដឹកអ្នកដំណើរ ចាប់ពី៣នាក់ ទៅ៥នាក់ ។ ហេតុនេះ តាក់ស៊ីហោះសមស្របនឹងការផ្តល់សេវាកម្មដឹកអ្នកដំណើរនៅតាមទីក្រុង ។

គេរំពឹងថា ការលេចរូបរាងរបស់តាក់ស៊ីហោះ នឹងក្លាយជាដំណោះស្រាយថ្មីមួយសម្រាប់បញ្ហាកកស្ទះចរាចរណ៍ ដែលប្រទេសជាច្រើននៅលើពិភពលោកបានប្រឈម ពីព្រោះវាមិនបាច់ធ្វើដំណើរប្រជ្រៀតគ្នាជាមួយរថយន្តនៅតាមដងផ្លូវទេ ។ ហេតុនេះ គេនឹងអាចធ្វើដំណើរតាមតាក់ស៊ីហោះបានឆាប់រហ័ស និងងាយស្រួល ។

បើតាមការសាកល្បងដំណាក់កាលដំបូងបង្ហាញថា ការធ្វើដំណើរពីទីក្រុង Liverpool ទៅកាន់ទីក្រុង Leeds ក្នុងចម្ងាយផ្លូវប្រវែង១០០គីឡូម៉ែត្រ គឺចំណាយពេលវេលាត្រឹមតែ២៦នាទីប៉ុណ្ណោះ បើធៀបនឹងការធ្វើដំណើរតាមរថយន្ត ដែលត្រូវចំណាយពេលយ៉ាងហោចណាស់ ចំនួន២ម៉ោងឯណោះ ។

ចំណែកអ្នកជំនាញយល់ឃើញថា នាពេលបច្ចុប្បន្ន មានឧបសគ្គមួយចំនួនដែលរដ្ឋាភិបាលអង់គ្លេសត្រូវតែយកឈ្នះឱ្យបាន គឺសេចក្តីព្រាងច្បាប់ចរាចរណ៍, បទប្បញ្ញត្តិស្របនឹងបច្ចេកវិទ្យា និងធ្វើឱ្យសាធារណជនយល់ព្រមទទួលស្គាល់ការផ្លាស់ប្តូរដែលនឹងកើតឡើង ។ ហេតុនេះ វានឹងប៉ះពាល់ដល់ជីវិតប្រចាំថ្ងៃ និងការស្វែងរកទីតាំងចុះចតឱ្យសមរម្យ ព្រមទាំងមិនរំខានដល់ការហោះហើរ ឬចុះចតរបស់យន្តហោះនៅបរិវេណអាកាសយានដ្ឋាន ។

ទោះយ៉ាងណា តាក់ស៊ីហោះមិនអាចជំនួសឱ្យការធ្វើដំណើរទាំងអស់ទេ ប៉ុន្តែតាក់ស៊ីហោះនឹងក្លាយជាជម្រើសបន្ថែម ឬជាដំណោះស្រាយដើម្បីជួយកាត់បន្ថយការកកស្ទះចរាចរណ៍នៅតាមដងផ្លូវនានា ។ នៅដំណាក់កាលដំបូង វាអាចសមស្របសម្រាប់អ្នកជំនួញ ដែលតាមធម្មតា ពួកគេប្រើប្រាស់ឧទ្ធម្ភាគចក្រ ឬយន្តហោះផ្ទាល់ខ្លួន ដើម្បីឱ្យពួកគេងាកមកធ្វើដំណើរតាមយានជំនិះមិនប៉ះពាល់បរិស្ថាន ។

នៅដំណាក់កាលបន្ទាប់ រថយន្តតាក់ស៊ីហោះអាចក្លាយជាជម្រើសសម្រាប់ការដឹកជញ្ជូនសម្ភារៈ ឬទំនិញផ្សេងៗ ហើយបន្ទាប់ពីនេះ វានឹងអាចផ្តល់សេវាកម្មដឹកអ្នកដំណើរទូទៅនៅតាមទីក្រុងនានា ។ នេះបើតាមការលើកឡើងរបស់អ្នកជំនាញអង់គ្លេស ៕

ដោយមើលឃើញថា បច្ចុប្បន្ននេះសេដ្ឋកិច្ចកំពុងតែធ្លាក់ចុះខ្លាំងនៅទូទាំងពិភពលោក ខណៈវិស័យអចលនទ្រព្យនៅអាស៊ីកំពុងតែដុន.ដាបជាបណ្តើរៗ។ ក្រឡេកមកមើលប្រទេសវៀតណាមវិញ កាលពីពេលថ្មីៗនេះគឺអាជ្ញាធរមូលដ្ឋានបានធ្វើការស៊ើ.បអង្កេតនិងចា.ប់ខ្លួនបានមេខ្លោងធំៗជាបន្តបន្ទាប់ក្នុងវិស័យអចលនទ្រព្យ ដែលបានបោកប្រាស់ប្រជាពលរដ្ឋស្លូតត្រង់ ដោយជនឆបោកទាំងនោះអាចនឹងត្រូវកាត់ទោ.សធ្ងន់ធ្ងរ រហូតដល់ ប្រ.ហារជី.វិត ស្របតាមច្បាប់ប្រទេសវៀតណាម។

កាលពីថ្ងៃទី ១៩ ខែមីនានេះ អាជ្ញាវៀតណាមបានអំពាវនាវឱ្យមានការកាត់ទោសប្រហារជីវិតដល់អ្នកស្រី Truong My Lan ដែលជាមេក្លោងនៃការក្លែងបន្លំហិរញ្ញវត្ថុដ៏ធំបំផុតនៅអាស៊ីអាគ្នេយ៍ មិនធ្លាប់មានពីមុនមក។ អ្នកស្រី Lan ដែលជាប្រធានក្រុមហ៊ុនអភិវឌ្ឍន៍អចលនទ្រព្យ Van Thinh Phat Holdings Group ប្រឈមមុខនឹងការកាត់ក្តីនៅក្នុងមជ្ឈមណ្ឌលសេដ្ឋកិច្ចនៃទីក្រុងហូជីមិញ ដោយចោទប្រកាន់ថាបានដឹកនាំការឆបោកក្នុងទំហំទឹកប្រាក់រហូតដល់ ២០ ពាន់លានដុល្លារអាមេរិក។

ជាមួយគ្នានោះ មហាសេដ្ឋីអចលនទ្រព្យវៀតណាម មួយរូបទៀត គឺលោក Do Anh Dung ប្រធានក្រុមហ៊ុនលក់បុរី Tan Hoang Minh ក៏ត្រូវបានកាត់ទោសនៅថ្ងៃទី ១៩ ខែមីនាដូចគ្នាដែរ។ លោកត្រូវបានគេចោទប្រកាន់ពីបទបោកប្រាស់អ្នកវិនិយោគប្រមាណ ៦៦៣០នាក់ ក្នុងទំហំ ចំនួន ៣៥៥ លានដុល្លារអាមេរិក។ ចុងចោទបានលក់មូលបត្របំណុលដើម្បីបង្កើនដើមទុន ដោយសន្យាថាអ្នកវិនិយោគនឹងទទួលបានផលចំណេញខ្ពស់ ប៉ុន្តែក្រុមហ៊ុននេះបានកិបកេងប្រាក់រាប់រយលានដុល្លារដែលទទួលបាន និងមិនព្រមផ្តល់ការប្រាក់តាមការសន្យានោះទេ។

ទោះជាយ៉ាងណា ការកាត់ក្តីដែលរំពឹងថានឹងដំណើរការរហូតដល់ដំណាច់ខែមេសា ឆ្នាំ២០២៤នេះ ដែលវាគឺជាផ្នែកនៃយុទ្ធនាការប្រឆាំងនឹងអំពើពុករលួយដែលមេដឹកនាំបក្សកុម្មុយនិស្តវៀតណាម លោក Nguyen Phu Trong បានសន្យាអស់រយៈពេលជាច្រើនឆ្នាំដើម្បីលុបបំបាត់អំពើពុករលួយទូទាំងប្រទេស ទោះបីជាទទួលបានលទ្ធផលជាក់ស្តែងតិចតួចក្តី។

គួរបញ្ជាក់ថា ប្រទេសវៀតណាមបានចាប់ផ្តើមការបង្រ្កាបអំពើពុករលួយយ៉ាងទូលំទូលាយក្នុងប៉ុន្មានឆ្នាំថ្មីៗនេះ ជាមួយនឹងមន្ត្រីពុករលួយ និងតួរលេខធុរកិច្ចជាន់ខ្ពស់ក្នុងចំណោមមនុស្ស ៤,៤០០ នាក់ដែលត្រូវបានចោទប្រកាន់ក្នុងជាង ១,៧០០ ករណីចាប់តាំងពីឆ្នាំ ២០២១ផងដែរ៕

ប្រទេសជប៉ុន ៖ សារព័ត៌មានជប៉ុនបានរាយការណ៍ពីទីក្រុងតូក្យូ កាលពីថ្ងៃទី១៩ ខែមីនា ឆ្នាំ២០២៤ ថា អាជ្ញាធរទីក្រុងយូកូហាម៉ា (Yokohama) ដែលស្ថិតនៅក្បែរទីក្រុងតូក្យូ បានស្នើឱ្យចេញបម្រាមហាមពលរដ្ឋទាំងអស់ ជ.ក់បា.រី នៅទីកន្លែងសាធារណៈ សរុបចំនួន២.៧០០កន្លែង រួមទាំងតំបន់ទេសចរណ៍ពេញនិយមផងដែរ ។ រីឯអ្នកល្មើសនឹងបម្រាមនេះ នឹងត្រូវបានពិន័យជាប្រាក់ចំនួន៥ម៉ឺនយ៉េន (ឬស្មើប្រមាណ៣៤៣ដុល្លារអាមេរិក) ។

ការស្នើឱ្យចេញបម្រាមហាមជក់បារីនៅទីសាធារណៈនេះ ត្រូវបានស្នើឡើងក្នុងកិច្ចប្រជុំសាលាក្រុង កាលពីថ្ងៃទី១៨ ខែមីនា ឆ្នាំ២០២៤ កន្លងមក ព្រមទាំងការធ្វើវិសោធនកម្មច្បាប់ផងដែរ ដើម្បីកំណត់ថា ការជក់បារី គឺជាទង្វើហាមឃាត់នៅទីសាធារណៈក្នុងទីក្រុងយូកូហាម៉ា ព្រមទាំងសួនសាធារណៈយ៉ាម៉ាឈិតាក់ និងសួនសាធារណៈហាប័រវីវ ដែលជាតំបន់ទេសចរណ៍ដ៏សំខាន់ ។

ក្រៅពីនេះ អាជ្ញាធរទីក្រុងយូកូហាម៉ា មានគម្រោងចងក្រងនូវមតិយោបល់របស់សាធារណជនក្នុងរយៈពេលប្រមាណ១ខែ (គឺនៅខែមេសា ឆ្នាំ២០២៤) មុននឹងបញ្ជូនសេចក្តីព្រាងច្បាប់ ដើម្បីធ្វើវិសោធនកម្មច្បាប់ដែលពាក់ព័ន្ធ នៅខែកញ្ញា ឆ្នាំ២០២៤ ។ អាជ្ញាធរទីក្រុងយូកូហាម៉ា មានគោលដៅអនុវត្តបម្រាមការជក់បារីនេះ នៅខែមេសា ឆ្នាំ២០២៥ ។

នាពេលមុននេះ គឺចាប់ពីខែតុលា ដល់ខែវិច្ឆិកា ឆ្នាំ២០២៣ ទីក្រុងយូកូហាម៉ា បានសាកល្បងហាមពលរដ្ឋជក់បារីនៅសួនសាធារណៈ ចំនួន៥កន្លែង និងបានស្ទង់មតិការយល់ឃើញរបស់ពលរដ្ឋ ចំនួនជាង២.០០០នាក់ ។ រីឯលទ្ធផលការស្ទង់មតិបង្ហាញថា ការហាមជក់បារីនៅទីសាធារណៈទទួលបានសហការ និងគាំទ្រយ៉ាងខ្លាំងពីពលរដ្ឋទូទៅ ។ លើសពីនេះ ពលរដ្ឋភាគច្រើនចង់ឱ្យរដ្ឋាភិបាលដោះស្រាយបញ្ហាផលប៉ះពាល់សុខភាព ដែលបណ្តាលមកពីផ្សែងបារីសម្រាប់អ្នកមិនជក់បារី ៕

ប្រទេសថៃ ៖ ការិយាល័យស៊ើបអង្កេតកណ្តាលរបស់ប្រទេសថៃ (Central Investigation Bureau) បានជូនដំណឹងទៅកាន់ពលរដ្ឋថា ការលួចបើកមើលទូរស័ព្ទរបស់អ្នកដទៃ ឬចូលប្រើប្រាស់បណ្តាញសង្គមអ្នកដទៃ ឬលួច Hack ចូលប្រើប្រាស់ទិន្នន័យអ្នកដទៃដោយខុសច្បាប់ ដែលគេចាត់ទុកថា វាជាកន្លែងផ្ទុកទិន្នន័យផ្ទាល់ខ្លួននោះ នឹងមានទោសតាមមាត្រា៥ ក្នុងច្បាប់ប្រទេសថៃ គឺនឹងជាប់ ពន្ធ.នា.គារ មិនលើសពី៦ខែ ឬត្រូវបានពិន័យជាប្រាក់មិនលើសពី១ម៉ឺនបាត ឬទាំងជាប់ ពន្ធ.នា.គារ និងពិន័យជាប្រាក់ ។ នេះបើយោងតាមការចេញផ្សាយរបស់សារព័ត៌មានថៃ កាលពីថ្ងៃទី១៩ ខែមីនា ឆ្នាំ២០២៤ ។

លើសពីនេះ ប្រសិនបើលួចចូលប្រើប្រាស់ទិន្នន័យក្នុងទូរស័ព្ទរបស់អ្នកដទៃ ដែលគេបានដាក់លេខសម្ងាត់រួចហើយ គឺចាត់ទុកថា បានប្រព្រឹត្តខុសច្បាប់តាមមាត្រា៧ ក្នុងច្បាប់ប្រទេសថៃ គឺនឹងជាប់ពន្ធនាគារមិនលើសពី២ឆ្នាំ ឬត្រូវបានពិន័យជាប្រាក់មិនលើសពី៤ម៉ឺនបាត ឬទាំងជាប់ពន្ធនាគារ និងពិន័យជាប្រាក់ផងដែរ ។

លើសពីនេះ បើប្រព្រឹត្តទង្វើណាមួយដែលបង្កការខូចខាតដល់ម្ចាស់ទូរស័ព្ទ ឬម្ចាស់ទិន្នន័យ ដូចជា ៖ ធ្វើឱ្យខូចដល់កេរ្តិ៍ឈ្មោះ ឬប្រើប្រាស់ទិន្នន័យរបស់អ្នកដទៃយកទៅបោកប្រាស់មនុស្សផ្សេងទៀត គឺចាត់ទុកថា វាជាទង្វើរំលោភសិទ្ធិរបស់អ្នកដទៃដោយខុសច្បាប់ ។ បើយោងតាមច្បាប់រដ្ឋប្បវេណី និងពាណិជ្ជកម្មរបស់ប្រទេសថៃ មាត្រា៤២០ ចែងថា បើជនរងគ្រោះបានទទួលរងការខូចខាត គឺជនរងគ្រោះមានសិទ្ធិទទួលបានសំណងពីជនល្មើស ៕

បរទេស៖ ម៉ាកយីហោម៉ូដបារាំង Coperni បានដាក់បង្ហាញកាបូបស្រាលបំផុតក្នុងពិភពលោកដែលមានទម្ងន់ត្រឹមតែ ៣៧ ក្រាមប៉ុណ្ណោះ និងផលិតពីខ្យល់ Airgel ៩៩% អាចទប់ទល់នឹងទម្ងន់ រួមទាំងអាកាសធាតុក្តៅបានទៀតផង។
បើយោងតាមគេហទំព័រ Audience Central ដែលបានចុះផ្សាយកាលពីថ្ងៃទី១៩ ខែមីនា ឆ្នាំ២០២៤ ថាម៉ាកយីហោម៉ូដបារាំង Coperni បានដាក់បង្ហាញកាបូបយួរដៃថ្មីមួយ ដែលលក្ខណពិសេសរបសវាគឺជាកាបូបស្រាលបំផុតក្នុងលោក ជាមួយនឹងទម្ងន់ត្រឹមតែ ៣៧ ក្រាមនិងជាប់ធន់បំផុត។

កាបូបនេះមានឈ្មោះថា “Air Swipe” ផលិតពីសម្ភារៈ Silica airgel ដែលជាវត្ថុធាតុខ្យល់រឹងស្រាលបំផុតនៅលើពិភពលោក និងមានពន្លឺខ្លាំង ដោយវាមានកម្ពស់ ២៧ សង់ទីម៉ែត្រ ប្រវែង ១៦ សង់ទីម៉ែត្រ និងកម្រាស់ ៦ សង់ទីម៉ែត្រ។ កាបូប Air Swipe ត្រូវបានបង្កើតឡើងដោយខ្យល់ ៩៩% និងកញ្ចក់ ១% ហើយត្រូវបានផលិតនៅក្នុងផ្សិតដែកអ៊ីណុកតាមរយៈដំណើរការស្ងួតពិសេស។ វាប្រើសីតុណ្ហភាព និងសម្ពាធជាក់លាក់មួយ ដើម្បីប្រែក្លាយរាវទៅជាកែវ។

ក្រុមហ៊ុនក៏បានបញ្ជាក់ដែរថា ទោះជាកាបូបនោះមានទម្ងន់ស្រាលក៏ដោយ ប៉ុន្តែវាជាកាបូបដែលប្រើបានយូរ ដោយសារតែវាអាចទប់ទល់នឹងសម្ពាធរហូតដល់ ៤,០០០ ដងនៃទម្ងន់របស់ថង់ រួមទាំងធន់នឹងកំដៅរហូតដល់ ១,២០០ អង្សាសេ។ ដូច្នេះសម្រាប់អ្នកដែលចាប់អារម្មណ៍ កាបូបនេះអាចទិញបានក្នុងតម្លៃ ៧៦០ ដុល្លារអាមេរិក។

គួរបញ្ជាក់ដែរថា ម៉ាកយីហោម៉ូដបារាំង Coperni តែងតែបង្កើតកាបូប Swipe ដ៏ពេញនិយមរបស់ខ្លួនជារៀងរាល់ឆ្នាំ ដោយមានការរចនាប្លែកៗ និងគួរឱ្យចាប់អារម្មណ៍បំផុត។ កាលពីឆ្នាំមុន ក្រុមហ៊ុននេះបានបង្កើតកាបូបដៃ “អាចម៍ផ្កាយ” ដោយមានកំណត់ដែលឆ្លាក់ចេញពីអាចម៍ផ្កាយធ្លាក់មកលើផែនដីរាប់ពាន់ឆ្នាំមុន។ ដូច្នេះបច្ចុប្បន្ន ម៉ាកយីហោបារាំងបានកំពុងចាប់ដៃគូជាមួយអ្នកស្រាវជ្រាវជនជាតិក្រិច និងវិចិត្រកររូបភាព Ioannis Michaloudis ដើម្បីបង្កើតកាបូបសម្រាប់គម្រោងថ្មីបន្តបន្ទាប់ទៀត៕