ថ្មីៗនេះអ្នកលេងបណ្តាញសង្គមកម្ពុជាមានការភ្ញាក់ផ្អើលយ៉ាងខ្លាំងបន្ទាប់ពីពាក្យ ខេត្តសៀមរាប និង សៀមរាប ជាភាសាខ្មែរនៅលើបណ្តាញសង្គមទិកតុក(TikTok ) ស្វែងរកពាក្យគន្លឹះនេះលែងឃើញ។ ក្រោយពីមានការទាមទារពីសំណាក់អ្នកលេងបណ្តាញសង្គមពេលនេះពាក្យទាំងនេះស្វែងរកឃើញវិញហើយនៅលើបណ្តាញសង្គមមួយនេះ។
កាលពីរាត្រីថ្ងៃទី១៨ មីនា អ្នកប្រើប្រាស់បណ្តាញសង្គមផ្ទុះការភ្ញាក់ផ្អើលយ៉ាងខ្លាំងបន្ទាប់ពីពាក្យ ខេត្តសៀមរាប និង សៀមរាប ជាខេមរៈភាសា ស្វែងរកលែងឃើញនៅលើបណ្តាញសង្គមទិកតុកត្រូវក្រុមហ៊ុនបិទចោលដោយបញ្ជាក់ថាពាក្យនេះខុសគោលការណ៍ក្រុមហ៊ុនជាប់ទាក់ទងនឹងអាកប្បកិរិយាការស្អប់ខ្ពើម ហើយក្រុមហ៊ុនត្រូវការការពារសហគមន៍ពីការរីករាលដាលទង្វើស្អប់ខ្ពើម។
រឿងរ៉ាវដ៏ក្តៅគគុកនេះដែរ ពលរដ្ឋប្រើបណ្តាញសង្គមកម្ពុជាសង្ស័យថាជាទង្វើរបស់ប្រទេសជិតខាងដែលតែងតែច្រណែនមកលើកម្ពុជាមិនចេះចប់ អស់ពីមួយរឿងចូលមួយរឿង។ ជាមួយគ្នានេះពលរដ្ឋកម្ពុជាស្នើសុំរាជរដ្ឋាភិបាល ក្រសួងពាក់ព័ន្ធជួយសង្គ្រោះ Keywords ខេត្តសៀមរាប ដើម្បីឱ្យបានប្រើប្រាស់វិញផង ការដែលពាក្យខ្មែរត្រូវក្រុមហ៊ុនបិទដូចនេះប្រៀបដូចជាមិនឱ្យតម្លៃអក្សរសាស្រ្តខ្មែរយើងដែលអាចមានជនខិលខូចប្រើល្បិចពីលើ។
បន្ទាប់ពីរឿងរ៉ាវនេះផ្ទុះកក្រើកទីបំផុតពាក្យ ខេត្តសៀមរាប និង សៀមរាប ជាភាសាខ្មែរបានវិលត្រលប់មកវិញហើយកាលពីយប់ថ្ងៃទី១៩ ខែមីនា ក្រោយពីមានការតវ៉ាពីសំណាក់អ្នកលេងបណ្តាញសង្គមដោយបញ្ជាក់ទៅកាន់ក្រុមហ៊ុននេះថាជាពាក្យខេត្តរបស់ខ្មែរ។
គួរបញ្ជាក់ថា ខេត្តសៀមរាប គឺស្ថិតនៅភាគពាយ័ព្យនៃប្រទេសកម្ពុជាហើយសព្វថ្ងៃខេត្តនេះត្រូវបានគេស្គាល់ទូទាំងពិភពលោកថាជាខេត្តតាំងនៅនៃប្រាសាទអង្គរវត្តដ៏ល្បីល្បាញជាតំបន់ទេសចរណ៍ដ៍សំខាន់របស់ប្រទេសកម្ពុជា។ ក្រៅពីប្រាសាទអង្គរវត្ត ខេត្តនេះមានប្រាសាទបុរាណដទៃទៀតជាច្រើន។ 
អ្នកប្រវត្តិសាស្ត្រនៃប្រទេសកម្ពុជា បានពន្យល់ប្រហាក់ប្រហែលគ្នាថា ពាក្យ សៀម គឺទាក់ទងនឹងជាតិសាសន៍មួយ ដែលបច្ចុប្បន្នបានប្រែឈ្មោះទៅជាថៃ ទៅហើយ។ ឯពាក្យថា រាប គឺមានន័យថា ចាញ់ខ្លបខ្លាច។ នៅក្នុងសតវត្សទី១៥-១៦ មានព្រះមហាក្សត្រខ្មែរមួយអង្គព្រះនាម អង្គចន្ទរាជា បានធ្វើចម្បាំងជាមួយកងទ័ពសៀម ដើម្បីបណ្ដេញឱ្យពួកសៀមចេញពីតំបន់អង្គរ។ ក្នុងការធ្វើសង្គ្រាមកាលណោះ គឺកងទ័ពខ្មែរបានជោគជ័យយ៉ាងធំធេងហើយពាក្យថា សៀមរាប គឺត្រូវបានគេដាក់ឈ្មោះ បន្ទាប់ពីជ័យជម្នះរបស់កងទ័ពខ្មែរលើពួកសៀម៕.png)
