កាលពីពេលថ្មីៗនេះ យោងតាមប្រភពមួយដែលមានឈ្មោះថា ចៃព្រៃ KH បានចែករំលែកវីដេអូដ៏ក្តៅគគុកមួយភ្ជាប់ជាមួយនឹងចំណងជើងថា នាយកសាលាកាត់ស្បែកជើងសិស្ស ដែលក្នុងវីដេអូនោះបង្ហាញឱ្យឃើញថា មានស្បែកជើងសិស្សរាប់រយគូត្រូវបានគ្រូកាត់ខ្ទិចខ្ទីគ្មានសល់ មូលហេតុគឺដោយសារសិស្សមិនព្រមពាក់ស្បែកជើងប៉ាត់តាតាមវិន័យសាលា ដែលបង្កឱ្យមានការវែកញែកពេញបណ្តាញសង្គម។

នៅថ្ងៃទី១៨ ខែមីនា ឆ្នាំ២០២៤ យោងតាមការបង្ហោះរបស់ប្រភពមួយបានឱ្យដឹងថា វិទ្យាល័យស្រយ៉ង់ ស្ថិតក្នុងភូមិស្រយង់ជើង ឃុំស្រយ៉ង់ ស្រុកគូលែន ខេត្តព្រះវិហារ បានអនុម័តច្បាប់មួយ ដោយតម្រូវឱ្យសិស្សានុសិស្សទាំងអស់ពាក់ស្បែកជើងប៉ាត់តាពេលចូលរៀន ហើយបម្រាមមិនឱ្យសិស្សពាក់ស្បែកជើងផ្សេង ក្រៅពីស្បែកជើងប៉ាត់តាចូលសាលានោះទេ។

ខណៈសិស្សជាច្រើនបានត្អូញត្អែថា គ្រួសាររបស់ពួកគេគ្មានលទ្ធភាព ក៏ដូចជាគ្មានថវិការគ្រប់គ្រាន់ដើម្បីទិញស្បែកជើងប៉ាត់តាតាមវិន័យសាលាឡើយ ដូច្នេះទើបពួកគេសម្រេចពាក់ស្បែកជើងភ្ទាត់ ឬស្បែកជើងសកធម្មតាផ្សេងទៀតចូលសាលា ដែលបណ្តាលឱ្យគ្រូក្នុងសាលានេះ សម្រេចចិត្តកាត់ស្បែកជើងសិស្សខ្ទិចគ្មានសល់។

នៅក្នុងវីដេអូដែលបានចែកចាយពាសពេញបណ្តាញសង្គមនោះ មានអ្នកចែករំលែកជាង ១១ ពាន់នាក់ និងអ្នកបញ្ចេញមតិជាង ៥០០ នាក់ ដោយអ្នកខ្លះនិយាយថា គ្រាន់តែធ្វើតាមវិន័យសាលារៀនក្មួយៗធ្វើមិនបានផង តើរៀនចេះដឹងទៅដឹកនាំសង្គមមនុស្សបានដែរឬទេ? អ្នកខ្លះក៏ខំមិនថា មុននឹងគ្រូអនុវត្តប្រហែលគ្រូនិយាយសឹកមាត់ហើយ សិស្សមិនស្ដាប់គឺបែបហ្នឹងបើចង់ធ្វើអ្វីតាមទំនើងចិត្តរៀននៅផ្ទះ មិនកាន់ជើងគ្រូទេ តែមើលតាមការជាក់ស្ដែង។ ចំណែកអ្នកខ្លះទៀតក៏ខំមិនថា សិស្សមួយចំនួនមិនមែនក្បាលរឹងនោះទេ តែគ្នាខ្វះលទ្ធភាពប៉ុន្តែអ្នកមិនយល់អំពីការខ្វះខាតរបស់ម្ដាយឪពុកសិស្សនោះទេ។

រីឯអ្នកខ្លះក៏បញ្ចេញមតិថា រឿងមានហេតុ បំណុលមានម្ចាស់ បើមិនដឹងរឿងច្បាស់យើងកុំទាន់សន្និដ្ឋាន ប្រទេសមានច្បាប់ គ្រួសារមានវិន័យ សាលាក៏មានវិន័យ បើមិនឱ្យគ្រូអនុវត្តវិន័យសាលានោះទេតើអោយអប់រំទូន្មានប្រដៅសិស្សបែបណា? ម្នាក់ៗចង់អោយតែកូនខ្លួនល្អតែមិនអោយគ្រូអប់រំប្រដៅបណ្ដោយតាមតែទំនើងចិត្ត និយាយជារួមចាំតែរិះគន់ រិះគន់ក្នុនន័យស្ថាបនា មិនជាអ្វីទេខ្លាចតែបែបជាន់ពន្លិចដើម្បីរក view តែប៉ុណ្ណោះ។ ទោះជាយ៉ាងណាក្នុងការវែកញែកដ៏ក្តៅគគុកនាពេលថ្មីៗនេះ មិនទាន់មានគ្រូឬនាយកសាលាចេញមុខបកស្រាយនៅឡើយទេ៕

ស្វាយកែវរមៀតខ្មែរ កំពុងតែមានសន្ទុះនៃការគាំទ្រខ្លាំងនៅថៃ ខណៈប្រជាកសិករខ្មែរមួយចំនួននៅតែអះអាងថា ស្វាយគ្មានទីផ្សារ។ ទោះជាយ៉ាងណា តាមការបញ្ជាក់ពីមន្ត្រីនៃមន្ទីរកសិកម្មខេត្តបាត់ដំបងបានឲ្យដឹងថា ស្វាយកែវរមៀតលើទឹកដីខេត្តខ្លួនបាននាំចេញទៅកាន់ប្រទេសថៃរាប់រយតោនក្នុងមួយថ្ងៃៗ ជាមួយគ្នានោះ គាត់ក៏បានលើកឡើងពីហេតុផលមួយចំនួនដែលស្វាយរបស់កសិករខ្លះនៅតែបន្តគ្មានទីផ្សារ។

យោងតាមប្រភពក្រសួងព័ត៌មានកម្ពុជា កាលពីថ្ងៃទី១៨ ខែមីនា ឆ្នាំ២០២៤នេះ បានបង្ហាញពីទិន្នផលផ្លែស្វាយកែវរមៀតខ្មែររបស់កសិករអ្នកខេត្តបាត់ដំបង គឺបាននាំចេញទៅប្រទេសថៃក្នុង១ថ្ងៃៗ ចន្លោះពី ១៥០-២០០តោន ដែលនេះជាការបញ្ជាក់ពីលោក ហេង សិទ្ទ មន្ត្រីនៃមន្ទីរកសិកម្មខេត្តបាត់ដំបង។

លោក ហេង សិទ្ទ បានលើកឡើងថា ក្នុងខេត្តបាត់ដំបងមានផ្ទៃដីដាំដំណាំស្វាយកែវរមៀត សរុបចំនួន ១៦ ០៧៩ហិកតា និងប្រមូលផលលើផ្ទៃដី ១៤ ៣៤០ហិកតា ដោយក្នុងមួយហិកតាទទួលបានទិន្នផលជាមធ្យម ២១តោន ៧០០គីឡូក្រាម ។

ចំពោះទិន្នផលផ្លែស្វាយកែវរមៀតដែលនាំចេញនេះ គឺក្រុមហ៊ុននៅប្រទេសថៃគេបានកុម្ម៉ង់ទុកជាមុន ចំពោះកសិករណាដែលប្រមូលផល ហើយបានអនុវត្តន៍ទៅតាមតម្រូវការរបស់ក្រុមហ៊ុន ពោល គឺត្រូវតែប្រមូលផលស្វាយតាមបែបស្តង់ដារអនាម័យល្អ មិនមានការប្រឡាក់ដោយជ័រស្វាយ ផ្លែស្វាយស្អាតល្អ ហើយក្រុមហ៊ុនក៏បានប្រគល់ស្បោងសម្រាប់ច្រកត្រឹមត្រូវ ទៅតាមបច្ចេកទេស ។ ផ្ទុយទៅវិញ បើស្វាយមិនល្អនិងមិនស្របតាមស្តង់ដារ មានប្រឡាក់ដោយជ័រគេមិនទទួលទិញនោះទេ ហើយបើគេទទួលទិញក៏បានតម្លៃថោកដែរ។ ទាំងនេះហើយហេតុផលដែលកសិករមួយចំនួន ប្រឈមមុខនឹងការបាត់ទីផ្សារបច្ចុប្បន្ន ដោយខ្វះព័ត៌មានសម្រាប់ទីផ្សារ ។

ក្រសួងបញ្ជាក់ថា ដោយមើលឃើញថាកសិករខ្មែរមួយចំនួនដែលជាម្ចាស់ចម្ការគិតថាស្វាយគ្មានទីផ្សារ ហើយក៏បានបំផ្លាញដើមស្វាយខ្លួនចោល នោះមិនមែនជាជម្រើសត្រឹមត្រូវឡើយ នឹងស្តាយក្រោយ ខណ:ដែលខេត្តបាត់ដំបង នឹងមានរោងចក្រកែច្នៃផ្លែស្វាយដ៏ធំមួយវិនិយោគដោយក្រុមហ៊ុនចិន ស្ថិតនៅក្នុងស្រុករតន:មណ្ឌល ដែលនឹងសាងសង់រួចរាល់ក្នុងពេលឆាប់ៗនេះ។

ទាក់ទងទីផ្សារស្វាយនេះដែរ មន្រ្តីកសិកម្មរូបនេះបានណែនាំថា បើកសិករជួបបញ្ហាលើទីផ្សារ ក៏មិនគួរបំផ្លាញដោយមិនបានក្តាប់ព័ត៌មាន ឱ្យបានគ្រប់ជ្រុងជ្រោយនោះដែរ ព្រោះដំណាំប្រភេទនេះមិនមែនធ្វើការដាំដុះរយ:ពេលខ្លី ដូចដំណាំផ្សេងៗនោះទេ ហើយក៏មិនមែនចេះតែអត់អ្នកទិញរហូតដែរ ៕

យោងតាមការចេញផ្សាយរបស់គេហទំព័រសហរដ្ឋអាមេរិក U.S. New & World Report គឺបានបង្ហាញប្រទេសកំពូលៗទាំង១០ ដែលមានថ្លៃដើមនៃការផលិតថោកបំផុតប្រចាំឆ្នាំ២០២៣ ដែលកម្ពុជាគឺបានជាប់ចំណាត់ទី៨។ របាយការណ៍គឺផ្អែកលើការស្ទង់មតិនានា។

ប្រទេសទាំង១០នោះរួមមាន ៖
ចំណាត់ថ្នាក់លេខ១ ដែលមានថ្លៃដើមនៃការផលិតថោកបំផុត គឺប្រទេសឥណ្ឌា
ចំណាត់ថ្នាក់លេខ២ គឺប្រទេសចិន
ចំណាត់ថ្នាក់លេខ៣ គឺប្រទេសវៀតណាម
ចំណាត់ថ្នាក់លេខ៤ គឺប្រទេសថៃ
ចំណាត់ថ្នាក់លេខ៥ គឺប្រទេសឥណ្ឌូនេស៊ី
ចំណាត់ថ្នាក់លេខ៦ គឺបង់ក្លាដែស
ចំណាត់ថ្នាក់លេខ៧ គឺភីលីពីន
ចំណាត់ថ្នាក់លេខ៨ គឺកម្ពុជា
ចំណាត់ថ្នាក់លេខ៩ គឺម៉ាឡេស៊ី
និងចំណាត់ថ្នាក់លេខ១០ គឺស្រីលង្ការ។

យ៉ាងណាមិញ ឥណ្ឌាជាប្រទេសដែលមានប្រជាជនច្រើនលំដាប់ទី២លើពិភពលោកបន្ទាប់ពីចិន។ ការដែលប្រទេសនេះបានឡើងកាន់ដំណែងលេខ១ ដែលមានថ្លៃដើមផលិតកម្មធូរថ្លៃក៏ព្រោះជាប្រទេសមានសេដ្ឋកិច្ចចម្រុះដែលមានការរីកចម្រើនយ៉ាងឆាប់រហ័ស និងពឹងផ្អែកលើកម្លាំងពលកម្មច្រើន។ ម៉្យាងវិញទៀត កម្រិតការអប់រំខ្ពស់របស់ឥណ្ឌា ជាពិសេសប្រជាជនចេះនិយាយភាសាអង់គ្លេសច្រើន បានធ្វើឲ្យឥណ្ឌាក្លាយជាមជ្ឈមណ្ឌលដ៏សំខាន់នៃផ្នែកសេវាកម្មព័ត៌មានវិទ្យា សេវាកម្មអាជីវកម្មខាងក្រៅ និងបុគ្គលិកផ្នែកទន់។ វិស័យកសិកម្ម និងសេវាកម្មរបស់ប្រទេសនេះគឺជាប្រភពដ៏សំខាន់នៃកំណើនសេដ្ឋកិច្ច។ ទោះជាយ៉ាងណា វាក៏ជាប្រទេសក្រីក្របំផុតមួយក្នុងពិភពលោក ដោយផ្អែកលើប្រាក់ចំណូល និង GDP per capita ផលិតផលជាតិសរុបក្នុងមនុស្សម្នាក់ផងដែរ៕

ប្រិយមិត្តប្រើប្រាស់បណ្តាញសង្គមជ្រាបមកហើយថាអ្នកនាង នួន ស៊ុន្ទនារី ហៅ ស្រីអូន ត្រូវរងនូវមតិរិះគន់យ៉ាងច្រើនក្រោយពីនិយាយថាមិនយកគ្រួសារជាធំដោយយកសង្គមជាធំវិញ។ ការរិះគន់ខ្លះប្រើពាក្យជេរប្រមាថលើសលុបដាក់ខ្លួនពេក អ្នកនាង ស្រីអូន ថាពិភពលោកនេះបើយើងខ្សោយគឺគេជាន់ហើយចឹងសុំធ្វើជាផ្លែម្ទេសវិញ។

យប់ថ្ងៃទី១៨ ខែមីនា អ្នកនាង ស្រីអូន បានបង្ហោះរូបអ្នកប្រើសម្តីជេរប្រមាថខ្លួនជុំវិញរឿងថ្មីៗនេះភ្ជាប់ជាមួយខ្លឹមសារថា «ចេញតែមួយសិនទុកជាគំរូតស់បងប្អូនទៅមើលរឿង «មាយើង» ត្រង់វគ្គដែលស្តេចឱ្យពេជ្ឈឃាតយក មាយើងទៅ សំ លាប់ តើដោយសាររឿងអី? ចុះហេតុអី មាយើងឆ្លងផុត? ជាការពិតរឿង មាយើង បានឆ្លុះបញ្ចាំងពីសង្គមជាក់ស្ដែងឱ្យយល់ច្បាស់ពីការវិនិច្ឆ័យរឿងតូច រឿងធំ ដែលបានកើតឡើងក្នុងសង្គម មនុស្សមួយចំនួនតូចចូលចិត្តកាត់ក្ដី វិភាគ ជួនកាលប្រើពាក្យជេរប្រមាថ ហាក់ដូចជាខ្លួនដឹងច្បាស់100% ទាំងដែលរឿងខ្លះមើលបានត្រឹមមួយជ្រុងតូច»។

អ្នកនាង បន្តថា « វីដេអូនេះកាត់ខ្លី បាត់ន័យពេញ មិនគួរណាបងប្អូនមួយចំនួនតូចខមមិន ដោយពាក្យមិនសមរម្យដូចស្អប់ខ្ញុំពីណាមក ? មិនដែលស្គាល់ខ្ញុំ ហេតុអីស្អប់ខ្ញុំ? ជាការពិតទង្វើបង្ហាញពីចរិត បើស្អប់ខ្ញុំខ្លាំង ជ្រេញខ្ញុំខ្លាំងទុកក្នុងចិត្តទៅ បើខមមិនបញ្ចេញអារម្មណ៍ខ្លួនជាសាធារណៈចឹង សាមីខ្លួនគង់តែឃើញចូលនិយាយលេងជាមួយចឹងហើយ កុំឆ្ងល់ ហើយបើខ្ញុំយកមកផុសក៏ចង់ឱ្យគាត់ដឹងច្បាស់ថា ជីវិតមួយនេះ យើងឱ្យសុខគេ គេក៏ឱ្យសុខយើង យើងឱ្យទុក្ខគេ គេឱ្យទុក្ខយើង»។
ស្រីអូនបុស្បា បានបន្តចុងក្រោយថា «រឿងមួយទៀតដែលយើងត្រូវទទួលស្គាល់ការពិតគឺ មនុស្សខ្លះអាចនឹងស្អប់យើងទាំងដែលយើងមិនស្គាល់គេសោះ ដើរនិយាយពីយើងដូចដឹងរឿងច្បាស់ ដល់ជួបទល់មុខយើង សើចស្វា។ ឃើញលុបផុស លុបស៊ែរ លុបខមមិនច្រើនហើយ តែចង់ប្រាប់ថាខ្ញុំថតទុកអសហើយ។ កុំចង់ជាន់ខ្ញុំអី ខ្ញុំរឹងមាំល្មមគួរសមដែរ រឹងមាំបែបច្បាស់ៗ ហ៊ានប្រឈមមុខ មិនមែនបែបលំៗទេ ពិភពលោកនេះបើយើងខ្សោយគឺគេជាន់ហើយ ចឹងសុំធ្វើជាផ្លែម្ទេស»។

គួរបញ្ជាក់ថា នៅក្នុងកម្មវិធី «កម្សាន្ដភូមិបុស្បា» កាលពីកន្លងទៅនេះដែលរៀបចំដោយបុរីបុស្បារបស់ អ្នកនាង ស្រីអូន មានកម្មវិធីសប្បាយៗជាច្រើន។ ក្នុងកម្មវិធីនេះ អ្នកនាង ស្រីអូន បាននិយាយនៅលើឆាកប្រគំតន្រ្តីពីទំនួលខុសត្រូវរបស់ខ្លួនត្រូវសងបំណុលរាប់លានដុល្លារ។ អ្នកនាងក៏បាននិយាយដែរថា ខ្លួនមិនបានយក«គ្រួសារជាធំ»នោះទេ ជាហេតុធ្វើឱ្យមានការជជែកវែកញែកនៅលើបណ្តាញសង្គម ខណៈការរឹងមាំរបស់អ្នកនាងគឺដើម្បីមនុស្សស្រីគ្រប់រូប រឹងមាំដើម្បីសង្គមមួយនេះទោះបីជាមានអ្នកមើលឃើញនិងមិនឃើញក្តី៕