ផ្ទុះកក្រើកយ៉ាងខ្លាំងក្នុងចង្កោមវិស័យបវរកញ្ញាបន្ទាប់ពីមានការបង្ហោះនូវសំណេរឆ្លើយឆ្លងរវាងបវរកញ្ញាម្នាក់និងគ្រូរបាំបុរាណខ្មែរដែលអត្តចរិតបវរកញ្ញានោះបានប្រើសម្តីក្រអើតក្រទម មិនគោរពគ្រូរបាំខ្មែរ និងបានប្រើសម្តីគំហកដាក់ផលិតករជាចាស់ទុំប្រៀបដូចជាលោកគ្រូម្នាក់។ ក្នុងឆាត បវរកញ្ញានោះបានបញ្ជាក់ថាខ្លួនជាមេដឹកនាំមួយរូបមិនពេញចិត្តការដឹកនាំរបស់ផលិតករដែលចង់ផ្លាស់ប្តូរតួថ្មីដោយបានតាំងខ្លួនថានាងជាបវរកញ្ញាម្នាក់ហេតុអ្វីប្តូរនាងទៅជាតួរងវិញ។ កញ្ញា ថៅ ពេជ្រអម្រិត ដែលបង្ហោះសារឆ្លើយឆ្លងនេះថាបវរកញ្ញាចរិតតួឯកនេះបើសិនជាមិនសូមទោសលោកពូជាផលិតករទេខ្លួននឹងបង្ហាញឈ្មោះឱ្យគេដឹងថាជានរណា។

ស្ថាបនិកនៃក្រុមរបាំអប្សរា ២៥ដួងកញ្ញា ថៅ ពេជ្រអម្រិត បានបង្ហោះសារឆ្លើយឆ្លងទាំងយប់រវាងខ្លួននិងបវរកញ្ញាម្នាក់ដែលមានអត្តចរិតក្រអើតក្រទមប្រើសម្តីមិនពីរោះសមទៅនឹងឈ្មោះថាជាបវរកញ្ញា។ កញ្ញា ពេជ្រ អម្រិត ថាបង្រៀនសិស្សរាប់រយនាក់ ១០ឆ្នាំមកនេះ គឺទើបតែជួបមួយនេះទេទ្រង់ចរិតតួឯកខុសគេ មិនបានឯកមិនធ្វើទេ ហើយមួយម៉ាត់ណាក៏បវរកញ្ញា មួយម៉ាត់ណាក៏បវរកញ្ញា តែមើលចរិតការនិយាយស្តីការងារខ្លួនឯងមិនគោរពហើយនៅមកស្រែកឱ្យគ្រូទៀត។

អ្នកគ្រូរបាំរូបនេះថា បវរកញ្ញាចរិតតួឯកដែលមិនទាន់បង្ហាញថាជានរណានេះមិនបាច់សូមទោសខ្លួនក៏បាន តែបវរកញ្ញានោះត្រូវសូមទោសលោកពូផលិតករដែលនាងគំហកស្រែកដាក់ឱ្យថ្ងៃមុនប្រៀបដូចជាគ្រូនាងអ៊ីចឹងមិនត្រូវធ្វើអត្តចរិតបែបនេះទេបើបវរកញ្ញានោះមិនសូមទោសទេ ខ្លួននាងនឹងបើកឈ្មោះបវរកញ្ញាឱ្យគេដឹងថាបវរកញ្ញាចរិតតួឯកឈ្មោះអ្វី ជាអ្នកណាដោយទុកឱកាសឱ្យសិន។ កញ្ញា ពេជ្រអម្រិតថា ខ្លួនមិនចង់ធ្វើបាប ហើយក៏មិនចង់បិទផ្លូវរកស៊ីរបស់បវរកញ្ញានោះទេ តែខ្លួនរង់ចាំពាក្យសូមទោសរបស់បវរកញ្ញាទៅកាន់លោកពូផលិតករ។

នៅក្នុងសារឆ្លើយឆ្លងបានបង្ហាញថា បវរកញ្ញានោះបានចោទសួរអ្នកគ្រូរបាំថាហេតុអ្វីបានជាផលិតករចង់ដូរតួនាង ដោយអ្នកគ្រូរបាំបានឆ្លើយថា បវរកញ្ញានោះជា BA ប៉ុន្តែមិនបានបំពេញតួនាទីរបស់ខ្លួនឱ្យបានល្អ ខណៈបវរកញ្ញានោះថានាងជាប់ការងារច្រើនមិនចាំអង្គុយតែស៊ែរនោះទេ ហើយអ្នកគ្រូរបាំរូបនេះឱ្យបវរកញ្ញានោះប្រើពាក្យសម្តីឱ្យសមរម្យ ពីរោះជាមួយខ្លួន។ បវរកញ្ញាម្នាក់នោះថាបវរកញ្ញាណាក៏ដូចគ្នាតែហត់ ឈឺ រវល់ គឺនិយាយចឹងហើយ។ បវរកញ្ញានោះនិយាយថានាងដឹងថា កញ្ញា ពេជ្រអម្រិត ជាគ្រូ មេដឹកនាំ ដោយបញ្ជាក់ថានាងក៏ជាមេដឹកនាំមួយរូបដែរ ប៉ុន្តែមិនមែនដឹកនាំរបៀបនេះនោះទេនាងជាបវរកញ្ញាប្តូរតួនាងទៅជាតួរងយ៉ាងមិច និងបានបង្ហាញការខឹងសម្បាររបស់ខ្លួនជាច្រើនទៀត។

ក្រោយពីសារនេះបានចែករំលែកនៅលើបណ្តាញសង្គមទស្សនិកជនបង្ហាញការហួសចិត្តយ៉ាងខ្លាំងចំពោះអត្តចរិតបវរកញ្ញារូបនេះនិងចង់ដឹងថា បវរកញ្ញាចរិតតួឯកនេះជានរណា ដែលធ្វើឱ្យឈ្មោះបវរញ្ញាត្រូវស្អុយក្រោមស្នាដៃនាងដូចនេះ៕

វីដេអូចែកចាយពីបណ្តាញសង្គម ដោយបុរសម្នាក់ហាក់មិនអស់ចិត្តនិងងើយឆ្ងល់ជាខ្លាំងចំពោះការបើកបររបស់បងប្អូនប្រជាពលរដ្ឋនៅតាមបណ្តោយផ្លូវជាតិលេខ៤ មិនគោរពច្បាប់ចរាចរណ៍ផ្លូវគោក ជិះទាំងបំពានគន្លងផ្លូវហាក់មិនញញើត ថែមទាំងបើកបរលឿនៗដូចព្យុះសង្ឃរា។

តាមរយៈវីដេអូ គេសង្កេតឃើញថា ការបើកបររបស់ប្រជាពលរដ្ឋខ្មែរនៅតាមបណ្តោយផ្លូវជាតិលេខ៤ (ពីភ្នំពេញទៅកាន់ព្រះសីហនុ) ពិតជាគ្មានសណ្តាប់ធ្នាប់ សសេចសសាចពេញទាំងផ្លូវតែម្តង ទាំងរថយន្តធុនតូច ធុនធំ រម៉កសណ្តោង និងម៉ូតូ បន្តបើកបរជែងគ្នាទាំងគ្មានការយល់ដឹង ដោយធ្វើការរំលងចូលទៅកាន់គន្លងផ្លូវម្ខាងទៀត ហើយសម្រាប់អ្នកធ្វើដំណើរនៅទិសដៅផ្ទុយស្ទើរតែគ្មានផ្លូវជិះទៅហើយ។

យោងតាមច្បាប់ស្តីពីចរាចរណ៍ផ្លូវគោកនៃព្រះរាជាណាចក្រកម្ពុជា ក្នុងជំពូកទី៣ មាត្រា ១០ (ការប្រើប្រាស់ទ្រូងផ្លូវ) ចែងថា៖ នៅលើទ្រូងផ្លូវដែលមានទិសចរាចរណ៍ពីរ ហើយដែលគ្មានគំនូសសញ្ញាបែងចែកទិសចរាចរណ៍ អ្នកបើកបរត្រូវប្រើប្រាស់ពាក់កណ្តាលទ្រូងផ្លូវផ្នែកខាងស្តាំ ដោយបើកបរកៀកទៅខាងស្តាំ ។ នៅលើទ្រូងផ្លូវឯកទិស ដែលគ្មានគំនូសសញ្ញាបែងចែកគន្លងផ្លូវ អ្នកបើកបរត្រូវបើកបរកៀកទៅខាងស្តាំលើកលែងតែត្រូវការបត់ឆ្វេង ។ អ្នកបើកបរអាចប្រើប្រាស់ទ្រូងផ្លូវខាងឆ្វេង បាននៅពេលជែងឬឈប់ ។ ដោយឡែកនៅក្នុងទីប្រជុំជនការប្រើប្រាស់ទ្រូងផ្លូវត្រូវកំណត់ដោយប្រកាសក្រសួងសាធារណការ និងដឹកជញ្ជូន។

បន្ថែមពីនេះ ច្បាប់ស្តីពីចរាចរណ៍ផ្លូវគោក ជំពូកទី៣ មាត្រា ១១ បានចែងអំពីការប្រើប្រាស់គន្លងផ្លូវ ដែលមានខ្លឹមសារថា ៖នៅលើគន្លងផ្លូវតម្រូវសម្រាប់យានជំនិះប្រភេទណាមួយ អ្នកបើកបរយានជំនិះប្រភេទដទៃ មិនត្រូវបើកបរចូលក្នុងគន្លងនេះទេ លើកលែងតែត្រូវចាកចេញ ឬ ចូលទៅក្នុងគន្លងផ្លូវរបស់ខ្លួន ។ នៅលើទ្រូងផ្លូវដែលមានទិសចរាចរណ៍ពីរហើយមានគំនួសបែងចែកទ្រូងផ្លូវ អ្នកបើកបរត្រូវប្រកាន់យកចំណែកផ្លូវខាងស្តាំ ។ នៅលើទ្រូងផ្លូវឯកទិសដែលមានគន្លងផ្លូវពីរ ឬច្រើន អ្នកបើកបរត្រូវប្រកាន់យកគន្លង ផ្លូវខាងស្តាំបំផុត ។ ក្នុងករណីមានចរាចរណ៍ចង្អៀតខ្លាំង អ្នកបើកបរអាចបើកបរបានលើគ្រប់គន្លងផ្លូវ៕

កម្មវិធីប្រដាល់មិត្តភាពកម្ពុជា-ជប៉ុនដ៏កក្រើកកាលពីរាត្រីយប់មិញនេះ ដែលបានបង្កើតឡើងក្នុងគោលបំណងស្វែងរកថវិការជួយដល់កុមារកំព្រានៅកម្ពុជា បាននឹងកំពុងអន្រួនបេះដូងប្រជាជនកម្ពុជាគ្រប់ៗរូប ជាពិសេសគឺទៅលើកីឡាករជនជាតិជប៉ុនមួយរូប។

នារាត្រីថ្ងៃទី ១០ ខែឧសភា ឆ្នាំ២០២៤នេះ ការប្រកួតប្រដាល់សប្បុរសធម៌មិត្តភាពកម្ពុជា ជប៉ុន ដើម្បីគៀងគរថរិការជួយដល់កុមារកំព្រាកម្ពុជា ដែលមានចាក់បញ្ចាំងលើកញ្ចក់ទូរទស្សន៍ CNC និង Page CBS Sports ។ តាមរយៈកម្មវិធី ក៏បានលេចនូវវត្តមានទាំងកីឡាករកម្ពុជានិងជប៉ុន ក្នុងនោះកីឡាករដែលទទួលបាននូវភាពលេចធ្លោ ព្រមជាមួយនឹងការអាណិតអាសូរនិងការស្ងើចសរសើរខ្លាំងបំផុត គឺ កីឡាករជប៉ុន Kozo Fujinaga។

លោក Kozo Fujinaga ជាកីឡាករជនជាតិជប៉ុន មានវ័យរហូតដល់ទៅ៦១ ឆ្នាំហើយ ហេតុតែទឹកចិត្តស្រលាញ់វិស័យប្រដាល់ ពោរពេញទៅដោយចិត្តសប្បុរស បានលះបង់ទាំងកម្លាំងកាយនិងកម្លាំងចិត្ត ឡើងសង្វៀនប្រកួតនៅក្នុងកម្មវិធីនេះមិនយកថ្លៃខ្លួនសូម្បីតែមួយរៀល។ នៅក្នុងការប្រកួតគាត់គឺស្ថិតនៅក្នុងបង្គោលក្រហម ដែលត្រូវប្រកួតជាមួយនឹងបង្គោលខៀវ ជាកីឡាករជនជាតិជប៉ុនដូចគ្នាដែរ។

នៅក្នុងការប្រកួត លោក Kozo Fujinaga ក៏ត្រូវបានគូរបដិបរ ទាំងដាល់ ទាត់ ធាក់ គ្រវីគ្រវាត់ យ៉ាងណាក៏ដោយក៏មិនព្រមចុះចាញ់ ស៊ូរហូតដល់ទីបញ្ចប់ទាំង៣ទឹក។ ទោះជាយ៉ាងណា គាត់មិនបានឈ្នះនៅក្នុងការប្រកួតទេ ប៉ុន្តែគាត់បានជាប់ជា MVP កីឡាករដែលធ្វើបានល្អបំផុតក្នុងព្រឹត្តិការណ៍សប្បុរសធម៌លើកនេះតំណាងឲ្យជប៉ុន ជាមួយនឹងរង្វាន់ជាទឹកប្រាក់ ៥០ម៉ឺនយេន (ជាង១៣លានរៀល)។

គួរបញ្ជាក់ថា កម្មវិធីកីឡាប្រដាល់សប្បុរសធម៌ កម្ពុជា-ជប៉ុនលើកនេះ ត្រូវបានបង្កើតឡើងនៅក្នុងគោលបំណងរៃអង្គាសថវិការជួយដល់កុមារកំព្រាកម្ពុជា។ តាមរយៈកម្មវិធី ចំពោះកីឡាករជប៉ុនទាំងអស់គឺបានស្ម័គ្រចិត្តមកប្រកួតដោយមិនយកថវិកាតម្លៃខ្លួនសូម្បីតែមួយរៀលនោះទេ។ បន្ថែមពីនេះ ក្រៅតែជាកម្មវិធីសប្បុរសជួយដល់កុមារកំព្រានៅកម្ពុជា កម្មវិធីលើកនេះក៏ជាការរឹតចំណងមិត្តភាពរវាងប្រទេសកម្ពុជានិងជប៉ុន រវាងប្រជាជននិងប្រជាជនទាំង២ប្រទេស ប្រកបដោយស្មាមញញឹមនិងភាពសុខដុមរមនាផងដែរ៕

ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានត្រាស់បង្គាប់ផ្តល់គោរមងារ អ្នកឧកញ៉ា ទ្រី ភាព ជា “លោកអ្នកឧកញ៉ា” នៅថ្ងៃទី១០ ខែឧសភា ឆ្នាំ២០២៤នេះ តាមរយៈព្រះរាជក្រឹត្យលេខ នស/រកត/០៥២៤/៤៤០ យោងតាមសេចក្តីក្រាបបង្គំទូលថ្វាយរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

នៅក្នុងថ្នាក់គោរមងារជា “ឧកញ៉ា” បានបែងចែកជា៣ថ្នាក់ដោយក្នុងនោះរួមមាន៖ឧកញ៉ា,អ្នកឧកញ៉ា និងលោកអ្នកឧកញ៉ា។

ក្នុងចំណោម៣នេះ លោកអ្នកឧកញ៉ា គឺជាគោរមងារថ្នាក់ខ្ពស់បំផុតលើសគេ ហើយបច្ចុប្បន្នអ្នកទទួលបានងារនេះមិនមានច្រើននោះទេ។

គួរបញ្ជាក់ផងដែរថា “លោកអ្នកឧកញ៉ា” ទ្រី ភាព មានតួនាទីជាទីប្រឹក្សាសម្តេចតេជោ ហ៊ុន សែន ប្រធានព្រឹទ្ធសភា នីតិកាលទី៥ មានឋានៈស្មើ “ទេសរដ្ឋមន្ត្រី” ហើយក៏ជាអនុប្រធានក្រុមការងារគណបក្សចុះមូលដ្ឋានស្រុកកណ្ដាលស្ទឹង ខេត្តកណ្តាល និងជាអនុប្រធានក្រុមការងារគណបក្សចុះមូលដ្ឋានខេត្តកំពង់ធំ នៃគណបក្សប្រជាជនផងដែរ៕